ទីបំផុតដូចការប៉ាន់ស្មានរបស់អ្នកគាំទ្រមួយចំនួនធំដែលគិតថាអ្នកនាង ប្រាសាទ ដាវីន នឹងក្លាយជា Miss Universe Cambodia 2024 តំណាងប្រទេសកម្ពុជាចូលប្រកួតនៅលើឆាកអន្តរជាតិ ខណៈសមិទ្ធធំៗ៣ក្នុងដៃរបស់ ប្រាសាទ ដាវីន គឺកាន់តែជំរុញចិត្តឱ្យអ្នកគាំទ្រជឿជាក់លើនាងកាន់តែខ្លាំងក្នុងការតំណាងកម្ពុជា។

នៅរាត្រីថ្ងៃទី២៩ សីហា ក្នុងចំណោមTOP5 ទាំង៥រូបរួមមាន មៀលីយ៉ាន ឆន ស្រីណេត ប្រាសាទ ដាវីន ហង្ស សូរីយ៉ាន់ និង ខេមា មេតាយ័រ គឺ ប្រាសាទ ដាវីន បានក្លាយជា Miss Universe Cambodia 2024។ ក្នុងរាត្រីគ្រងមកុដ កញ្ញាឯកចក្រវាលកម្ពុជា ក្រោមចំណងជើងថា «ស្ត្រីនៃចក្កវាឡ» បានផ្តល់នូវផ្ទាំងទស្សនីយភាពដ៏ជក់ចិត្តនៃសិល្បៈវប្បធម៌ខ្មែរដែលជារឿងដ៏គួរឱ្យសរសើរដែលកម្មវិធីបវរកញ្ញាបានលើកយកនូវសិល្បៈវប្បធម៌ខ្មែរបង្ហាញបែបនេះ។

លទ្ធផលដែល ប្រាសាទ ដាវីន បានក្លាយជា Miss Universe Cambodia 2024 គឺមានការចូលរួមអបអរសាទរយ៉ាងច្រើនពីសំណាកទស្សនិកជនរួមទាំងអ្នកនៅក្នុងចង្កោមវិស័យបវរកញ្ញស្របពេលមានមនុស្សជាច្រើនគឺបានទាយទុកមុននិងមានការរំពឹងខ្ពស់ថារូបអ្នកនាងនឹងក្លាយជាម្ចាស់មកុដឆ្នាំនេះ។ ក្នុងពេល ប្រាសាទ ដាវីន នឹងតំណាងកម្ពុជាចូលរួមប្រកួតនៅឆាកអន្តរជាតិ Miss Universe លើកទី៧៣ នៅប្រទេសម៉ិកស៊ិកកូ នាពេលខាងមុខឆាប់ៗនេះ ប្រាសាទ ដាវីន គឺជាស្រ្តីដែលជាម្តាយដំបូងគេតំណាងកម្ពុជាចូលប្រកួតក្នុងកម្មវិធីនេះផងដែរ។ អ្វីដែលគួរឱ្យកត់សម្គាល់រយៈពេលចុងក្រោយនេះ Miss Universe Cambodia 2024 គឺមានសមិទ្ធផលធំៗបីនៅក្នុងដៃគួរឱ្យកត់សម្គាល់បង្កើនទំនុកចិត្តហ្វេនៗឱ្យកាន់តែជឿជាក់លើសមត្ថភាពម្ចាស់មកុដថ្មីៗនេះ។

កាលពីឆ្នាំ២០២៣ អ្នកនាង ប្រាសាទ ដាវីន តំណាងកម្ពុជាដំបូងគេប្រកួតក្នុងកម្មវិធី Universal Woman និង បានជាប់លំដាប់រងទី៤ លើទឹកដីទីក្រុងឌូបៃ ប្រទេសអារ៉ាប់រួម។ សមិទ្ធផលធំមួយទៀតអ្នកនាងគឺជា ND Mister Friendship Cambodia 2023 ព្រមទាំងបានបញ្ចូន លាវ វេងហួរ ទៅប្រកួតនៅប្រទេសថៃនិងបានធ្វើឱ្យប្រទេសកម្ពុជាយកឈ្នះប្រទេសផ្សេងទៀតក្លាយជា Mister Friendship International 2023។ ចុងក្រោយនេះទៀតសោតពោលគឺនៅក្នុងឆ្នាំ២០២៤ Miss Universe Cambodia 2024 វ័យ៣៣ឆ្នាំរូបនេះគឺក៏ជាអ្នករៀបចំកម្មវិធី Universal Women 2024 ដែលកម្ពុជាធ្វើជាម្ចាស់ផ្ទះផងដែរនិងបានផ្សព្វផ្សាយវប្បធម៌ខ្មែរយ៉ាងទូលំទូលាយតាមរយៈបេក្ខភាពជាច្រើនរូបចូលរួមប្រកួត៕

គម្រោងបង្កើតតំបន់សេដ្ឋកិច្ចពិសេសលើផ្ទៃដី ៣២ហិចតា ក្នុងស្រុកបាទី ខេត្តតាកែវ ត្រូវបានសមាគមពាណិជ្ជកម្មចិនឆោសានស្នើសុំការគាំទ្រ និងជួយសម្របសម្រួលពីរដ្ឋបាលខេត្តតាកែវ។

គម្រោងនេះ នឹងជួយបង្កើតការងារកាន់តែច្រើនថែមទៀត ដោយកាត់បន្ថយការធ្វើចំណាកស្រុក ជាពិសេសនឹងលើកស្ទួយសេដ្ឋកិច្ចគ្រួសាររបស់បងប្អូនប្រជាពលរដ្ឋខេត្តតាកែវឱ្យកាន់តែល្អប្រសើរឡើង។

គិតត្រឹមឆ្នាំ២០២១ មានតំបន់សេដ្ឋកិច្ចពិសេសចំនួន ៥៤ នៅក្នុងប្រទេសកម្ពុជា ដែលភាគច្រើននៅខេត្តព្រះសីហនុ រាជធានីភ្នំពេញ និងបាវិត។

គួរបញ្ជាក់ផងដែរថា មុខងារនៃតំបន់សេដ្ឋកិច្ចពិសេសទាំងនេះ គឺជំរុញកំណើនសេដ្ឋកិច្ចកម្ពុជា តាមរយៈការសម្របសម្រួលការលើកទឹកចិត្តសម្រាប់ការវិនិយោគ ជាពិសេសក្នុងវិស័យកាម្មន្តសាល៕

កាលពីរាត្រីថ្ងៃទី២៦ ខែសីហា ឆ្នាំ២០២៤ មានករណីបំផ្ទុះស្តូវមិត្តភាពកម្ពុជា-វៀតណាម បានបង្កការភ្ញាក់ផ្អើលជាខ្លាំង តែមិនបណ្តាលឱ្យមនុស្សរបួសនោះទេ។

បើតាមសមត្ថកិច្ច ធ្វើការស្រាវជ្រាវបានបញ្ជាក់ថា៖”មូលហេតុនៃការបំផ្ទុះនេះ បណ្តាលមកពីជម្លោះរវាងជាង និងអ្នកម៉ៅការ ដោយកែច្នៃប៊ីដុងដាក់ប្រេងម៉ាស៊ូត ចងផ្អោប ជាមួយរូបសំណាកមិត្តភាពកម្ពុជា-វៀតណាម ដើម្បីដុតឱ្យ ផ្ទុះធ្វើឱ្យខូចនូវរូបសំណាកនេះ”។

គួរបញ្ជាក់ផងដែរថា ស្តូបមិត្តភាពកម្ពុជាវៀតណាម ដែលអាជ្ញាធរទើបនឹងសាងសង់រួចរាល់ មិនទាន់សម្ពោធនៅឡើយទេ ឋិតនៅក្បែររង្វង់មូលអប្សរា ក្បែរផ្លូវ ៦០ ក្នុងក្រុងសៀមរាប ត្រូវជនមិនស្គាល់មុខលួចបំផ្លាញ កាលពីយប់ម៉ោង ២ ថ្ងៃទី២៦ ខែសីហា ឆ្នាំ២០២៤៕

ជឿជាក់ថា មនុស្សភាគតិចណាស់ដែលបានស្គាល់«ផ្លែកោន»ជាប្រភេទផ្លែឈើព្រៃម្យ៉ាងដែលនិយមដុះតាមព្រៃជ្រៅ ជាពិសេសគឺនៅលើខ្នងភ្នំគូលែន នៃខេត្តសៀមរាប។ ផ្លែកោនឲ្យផលតាមរដូវកាលដូចគា្នទៅនឹងផ្លែគូលែន សិរមាន់ និងផ្លែគុយជាដើមដែរ។

កោន ដែលដើមរបស់វាជាប្រភេទរុក្ខជាតិវល្លិ៍ សណ្ឋានដើមវាស្រដៀងនឹងដើមទ្រាល តែខុសគ្នាតែស្លឹកទ្រាលតូចៗជាងស្លឹកកោន។ ផ្លែកោនតែងហុចផលជាពិសេសចន្លោះខែឧសភា ដល់ខែកញ្ញា ឬក៏ប្រែប្រួលទៅតាមអាកាសធាតុ។ ផ្លែកោនខ្លះមានទំហំប៉ុនមេដៃ មេជើង ខ្លះសឹងតែប៉ុនផ្លែចេកណាំវ៉ាចេកផងដែរ។ ផ្លែនេះមានរាងទ្រវែង សំបកគ្រើម ហើយផ្លែម្តងៗជាចង្កោមៗ។ សម្រាប់រសជាតិ ផ្លែកោន ពេលវានៅខ្ចីជាធម្មតាគឺមានរសជាតិចត់បន្តិច ប៉ុន្តែពេលវាទុំមានរសជាតិផ្អែមឆ្ងាញ់ស្រដៀងនឹងផ្លែចេក និងមានគ្រាប់ជាក្លែបៗ ប្រមាណ ៤ ទៅ ៥ គ្រាប់។

ផ្លែកោន ដែលតែងត្រូវបានប្រជាសហគមន៍តែងបេះយកបរិភោគប្រចាំគ្រួសារក៏ដូចជាដាក់លក់យកប្រាក់កម្រៃខ្លះៗ តែយ៉ាងណា ប្រជាពលរដ្ឋភាគច្រើនគឺមិនសូវមានអ្នកស្គាល់វានោះទេ។ នាពេលបច្ចុប្បន្ននេះ ផ្លែកោនបន្សល់តិចតួចណាស់ផងដែរ តាមតំបន់ព្រៃមួយចំនួនប៉ុណ្ណោះ។

គួរបញ្ជាក់ថា កាលពីសម័យបុរាណ ចាស់ៗជំនាន់ដើមតែងយកដើមរបស់វាទៅធ្វើជាឱសថបុរាណ ព្យាបាលជម្ងឺរោគក្រពះបានយ៉ាងមានប្រសិទ្ធភាពផងដែរ៕

កូនខ្មែរមួយរូបដែលទទួលបាននូវការសារទរយ៉ាងពេញទំហឹងកាលពីពេលកន្លងទៅ ក្នុងការកែច្នៃស្ពៃក្រញ៉ាញ់ដាំដោយកសិករខ្មែរ ឲ្យក្លាយទៅជាសាប៊ូស្ពៃក្រញ៉ាញ់ក្រោមស្នាកយីហោកូនខ្មែរប្រកបដោយគុណភាពខ្ពស់។ យ៉ាងណាមិញ ថ្មីៗនេះ កូនខ្មែរដដែលរូបនេះបានបង្ហើបទៀតថា ផលិតផលថ្មីពីផ្លែម្នាស់អាចនឹងលេចរូបរាងឡើង ដែលបន្ថែមពីការលើកស្ទួយកសិផលក្នុងស្រុកហើយ អ្នកទាំងអស់គ្នាក៏អាចរកប្រាក់ចំណូលតាមរយៈការលក់ផលិតផលខ្មែរ ក៏ដូចជាប្រើប្រាស់វាបានយ៉ាងមានទំនុកចិត្តផងដែរ។

កាលពីថ្ងៃទី២៨ ខែសីហា យោងតាមការបង្ហោះនៅគេហទំព័រផ្លូវការរបស់អ្នកនាង នុត សម្ផស្ស ដែលជាស្ថាបនិករោងចក្រសាប៊ូអូកា បានគូសបញ្ជាក់ថា «ម្នាស់បាត់ដំបង ក្លិនក្រអូប ផ្អែមឈ្ងុយ! បើនាងខ្ញុំជាអ្នកកែច្នៃកសិផល ហើយបងប្អូនជាអ្នកលក់ និងប្រើប្រាស់ តើបងប្អូនយល់ព្រមទេ? ជាការចូលរួមចំណែកលើកស្ទួយកសិផលក្នុងស្រុកយើង និងបង្កើនចំណូលសម្រាប់បងប្អូនកសិករ នាងខ្ញុំអាចជួយកែច្នៃរាល់សំណល់កសិផល (កសិផលដែលទីផ្សារមិនត្រូវការ តូចៗ រូបរាងមិនស្អាត ហួសអាយុ ។ល។)។ តើបងប្អូនយល់ឃើញយ៉ាងណាដែរ? សូមអរគុណបងប្អូនកសិករខាងបាត់ដំបង ដែលបានផ្ញើម្នាស់មកឲ្យនាងខ្ញុំសាកល្បងកែច្នៃ»។

ទោះជាយ៉ាងណា ស្ថាបនិករូបនេះមិនទាន់បញ្ជាក់នោះទេថានឹងយកផ្លែម្នាស់ទៅកែច្នៃជាផលិតផលអ្វី ដោយគ្រាន់តែបង្ហើបថាក្រុមការងាររបស់អ្នកនាងកំពុងតែរៀបចំដំណើរធ្វើតេស្តសាកល្បង នឹងចាំអ៊ុតមើលដំណឹងល្អក្នុងពេលឆាប់ៗ។ យ៉ាងណាមិញ បង្ហើបតែប៉ុណ្ណេះ ផលិតផលផ្លែម្នាស់ក៏ទទួលសន្ទុះនៃការគាំទ្រយ៉ាងច្រើនផុសផុលក្នុងចំណោមមហាជនខ្មែរ។

ដោយសង្កេតឃើញថា នាពេលបច្ចុប្បន្ននេះ ប្រជាជនខ្មែរយើងភាគច្រើនបានងាកមកចាប់អារម្មណ៍ផលិតផលក្នុងស្រុកជាជាងការនាំចូលពីបរទេស និងគាំទ្រឲ្យមានការផលិតជាបន្តបន្ទាប់ទៀត រហូតដល់សំណូមពរជាមតិក្នុងការកែច្នៃទិន្នផលក្នុងស្រុកផ្សេងៗដូចជា ប្រទាលកន្ទុយក្រពើ ស្រូវ ដំឡូងមី ស្វាយជាដើមផងដែរ៕

ថ្មីៗនេះ មហាជនជាច្រើនហាក់មានការចាប់អារម្មណ៍យ៉ាងខ្លាំងទៅលើសិស្សានុសិស្សនៃសាលាអនុវិទ្យាល័យទីរួមខេត្តកំពង់ស្ពឺ មានគំនិតច្នៃប្រឌិតខ្ពស់ ដែលបាននាំគ្នាបណ្តុះជំនាញកសិកម្ម ដាំបន្លែក្នុងទីធ្លាសាលារៀន។

យោងតាមការបង្ហោះនៅលើគេហទំព័រក្រសួងអប់រំ យុវជន និងកីឡា (Krou Cambodia) បានចែករំលែករូបថតជាច្រើនសន្លឹក ដោយភ្ជាប់មកជាមួយនឹងខ្លឹមសារថា«សិស្សានុសិស្សសាលាអនុវិទ្យាល័យទីរួមខេត្តកំពង់ស្ពឺ បានប្រមូលផលកសិកម្ម(ដំណាំស្ពៃ) និងបានដាក់លក់ ដើម្បីប្រមូលថវិកា សម្រាប់ទិញគ្រាប់ពូជ និងសន្សំទុក ដើម្បីទិញសម្ភារៈសិក្សាជូនដល់សិស្សមានការលំបាកក្នុងជីវភាព និងមួយផ្នែកទៀតទុកជាឥណទាន»។

ការបង្កើតសួនបន្លែក្នុងបរិវេនសាលារៀននេះ ដែលក្រៅពីបានបង្កើននូវសោភណ្ឌភាពស្រស់ស្អាតក្នុងសាលាហើយ វាក៏ជាការបណ្តុះនូវផ្នត់គំនិតឲ្យសិស្សានុសិស្ស ក៏ដូចជាលោកគ្រូអ្នកគ្រូ បានយល់ដឹងអំពីរបៀបនៃការធ្វើកសិកម្ម ដែលពួកគេនឹងទទួលបានបន្លែធម្មជាតិស្រស់ៗមកបរិភោគ កាត់បន្ថយការចំណាយបានមួយផ្នែក ហើយក៏អាចរកប្រាក់ចំណូលបន្ថែមពីវាផងដែរ។

យ៉ាងណាមិញ បន្ទាប់ពីរូបភាពទាំងនោះបានចែកចាយទៅ អ្នកលេងបណ្តាញសង្គមជាច្រើនក៏បានចូលទៅបញ្ចេញមតិពេញចិត្តនិងកោតសរសើរព្រោងព្រាត រហូតដល់មានការសំណូមពរថា បើសាលារៀនទាំងអស់នៅទូទាំងប្រទេសកម្ពុជា បណ្តុះជំនាញកសិកម្ម ដល់សិស្សានុសិស្សគ្រប់ៗរូប មិនដឹងជាល្អយ៉ាងណានោះទេ៕