កូរ៉េខាងត្បូង៖ ស្ថានភាពគ្រូបង្រៀនលាឈប់ពីការងារបានកំពុងធ្វើឱ្យប្រទេសកូរ៉េខាងត្បូងព្រួយបារម្ភយ៉ាងខ្លាំងអំពីការធ្លាក់នៃវិស័យអប់រំកូរ៉េ។
ក្នុងរយៈពេល ៥ ឆ្នាំកន្លងមកនេះ ប្រទេសកូរ៉េបានឃើញនិន្នាការដ៏លំបាកនៃគ្រូបង្រៀនចាកចេញពីមុខតំណែងមុនអាយុចូលនិវត្តន៍ ដោយមានគ្រូបង្រៀនជាង ៣២,០០០ នាក់បានលាឈប់។ និន្នាការនេះក៏បានបន្តរហូតដល់បច្ចុប្បន្ន ដោយមានគ្រូជាង ៣,៣០០ នាក់ទៀតក៏បានចាកចេញពីមុខតំណែងផងដែរ។

គ្រូបង្រៀននៅគ្រប់កម្រិតទាំងអស់សុទ្ធតែបានលាឈប់ពីអាជីពចាប់តាំងពីឆ្នាំ ២០១៩ ដល់ឆ្នាំ ២០២៤ ដោយសារមូលហេតុប្រាក់ខែទាប និងការ Bullly ពីសិស្ស រួមទាំងការថយចុះនៃការគោរពវិជ្ជាជីវៈគ្រូបង្រៀន ការលំបាកក្នុងការគ្រប់គ្រងសិស្ស ហើយគ្រូបង្រៀនវ័យក្មេងដែលមានបទពិសោធន៍តិចជាង ១០ ឆ្នាំក៏មាននិន្នាការចាកចេញផងដែរ។ ការស្ទង់មតិដែលធ្វើឡើងដោយសហព័ន្ធគ្រូបង្រៀនកូរ៉េ (KFTA) កាលពីខែសីហាឆ្នាំមុន បានរកឃើញថា ៨៦% នៃគ្រូបង្រៀនក្នុងវ័យ ២០ ឆ្នាំ និង ៣០ ឆ្នាំរបស់ពួកគេបានពិចារណាចាកចេញពីអាជីពគ្រូបង្រៀនដោយសារតែពួកគេមិនពេញចិត្តនឹងប្រាក់ខែរបស់ពួកគេ។

លើសពីនេះ ២៦.៥% ផ្សេងទៀតបាននិយាយថា ពួកគេរងសម្ពាធយ៉ាងខ្លាំងដោយសារសិស្ស Bully។ ការកើនឡើងនៃការធ្វើបាបគ្រូបង្រៀនបានធ្វើឱ្យប្រទេសកូរ៉េប្រឈមនឹងបញ្ហាស្មុគស្មាញជាច្រើន ហើយមកដល់សព្វថ្ងៃនេះមិនទាន់មានវិធានការណាមួយដើម្បីការពារសិទ្ធិ និងសុវត្ថិភាពគ្រូបង្រៀននោះទេ។ យោងតាមទិន្នន័យរបស់រដ្ឋាភិបាលកូរ៉េ គ្រូបង្រៀនសាលារដ្ឋប្រហែល ១០០ នាក់បានធ្វើអត្តឃាតនៅចន្លោះខែមករា ឆ្នាំ ២០១៨ ដល់ខែមិថុនា ឆ្នាំ ២០២៣។

ទោះជាយ៉ាងណាក៏ដោយ រដ្ឋាភិបាលថ្មីៗនេះបានកំពុងធ្វើការផ្លាស់ប្តូរសំខាន់ៗ ដើម្បីធានាថាគ្រូបង្រៀនត្រូវបានការពារ និងមានលក្ខខណ្ឌការងារកាន់តែប្រសើរឡើង។ គ្រូបង្រៀនត្រូវបានអនុញ្ញាតឱ្យបណ្តេញសិស្សណាដែលរំខាន ឬរញ៉េរញ៉ៃចេញពីថ្នាក់រៀន។ បន្ទប់សាលានីមួយៗបានបំពាក់កាមេរ៉ាគ្រប់ជ្រុងជ្រោយដើម្បីឃ្លាំមើលវីដេអូ ហើយបណ្តឹងរបស់ឪពុកម្តាយក៏លែងជាទំនួលខុសត្រូវរបស់គ្រូទៀតហើយ ប៉ុន្តែជារបស់នាយកសាលា លើសពីនេះឪពុកម្តាយក៏ត្រូវបានហាមឃាត់មិនឱ្យមានទំនាក់ទំនងជាមួយគ្រូផងដែរ។

ទោះបីជាយ៉ាងនេះក្តី អ្នកជំនាញបានចង្អុលបង្ហាញថា បញ្ហានេះនៅតែជាការលំបាក ដោយសារឪពុកម្តាយទំនងជាការពារកូនៗរបស់ពួកគេហួសហេតុខ្លាំង ជាហេតុបណ្តាលឱ្យគ្រូបង្រៀននៅតែជៀសមិនផុតពីការ Bully ពីសិស្ស។ នៅខែមេសា ឆ្នាំ ២០២៣ ការស្ទង់មតិដោយសហជីពគ្រូបង្រៀនបានរកឃើញថា ២៦.៥% នៃគ្រូបង្រៀនបានទទួលការប្រឹក្សា ឬការព្យាបាលសម្រាប់បញ្ហាផ្លូវចិត្តទាក់ទងនឹងការងារ ខណៈដែលរហូតដល់ ៨៧% បានពិចារណាលាឈប់ពីការងារ។ អ្នកជំនាញជឿថាឫសគល់នៃបញ្ហាទាំងនេះគឺមកពីមនោគមវិជ្ជានៃសង្គមកូរ៉េ៕

គ្រោះទឹកជំនន់ គឺជាគ្រោះមហន្តរាយដ៏កាចសាហាវបំផុតមួយ ដែលតែងតែឆក់យកជីវិតមនុស្ស សត្វជារៀងរាល់ឆ្នាំ និងបង្កវិនាសកម្មយ៉ាងធ្ងន់ធ្ងរបំផុតដល់ប្រជាជាតិនានាជុំវិញពិភពលោក។ ដូច្នេះហើយតើលោកអ្នកដឹងទេថា ប្រទេសណាខ្លះដែលរងគ្រោះដោយសារទឹកជំនន់ខ្លាំងជាងគេក្នុងប្រវត្តិសាស្ត្រពិភពលោកយើងនេះ? សម្រាប់ចម្លើយនោះគឺប្រទេសចិន។

នៅប្រទេសចិន ទឹកជំនន់បានបង្កការបំផ្លិចបំផ្លាញហេដ្ឋារចនាសម្ព័ន្ធ លំនៅដ្ឋានប្រជាពលរដ្ឋ អស់រយៈពេលរាប់ពាន់ឆ្នាំមកហើយ។ ទោះជាយ៉ាងណាប្រជាជននៅតែទ្រាំរស់នៅជាមួយការលិចលង់បែបនេះតាំងពីបុរាណកាលរហូតមកដល់ពេលបច្ចុប្បន្ន ហើយក៏តែងតែមានមនុស្សស្លាប់ជារៀងរាល់ឆ្នាំផងដែរ។ គ្រោះមហន្តរាយដ៏កំណាចនេះ គឺបង្កឡើងដោយទន្លេសំខាន់ៗចំនួន២ គឺទន្លេឆាងជាំង និងទន្លេលឿង ខណៈប្រជាជនប្រមាណ ៣៥០ លាននាក់កំពុងរស់នៅតាមដងទន្លេឆាងជាំង និងប្រមាណ ១០០ លាននាក់ទៀតរស់នៅតាមដងទន្លេលឿង។

យោងតាមគេហទំព័រ Nikkei Asia បានបង្ហាញថា នៅឆ្នាំ ២០២៤ នេះប្រជាជនចិនប្រមាណ ២.៧ លាននាក់ត្រូវបានជម្លៀសចេញពីលំនៅដ្ឋាន ហើយប្រមាណជាង ៦៣លាននាក់ទៀតបានរងផលប៉ះពាល់យ៉ាងខ្លាំង។ នេះបើតាមការកត់ត្រានៅឆ្នាំ ១៨៨៧ ទន្លេលឿងបានជន់លិចលើផ្ទៃដីប្រមាណ ៣០,០០០ គីឡូម៉ែត្រការ៉េ ធ្វើឱ្យលិចលង់ភូមិដ្ឋានរបស់ប្រជាជនចិនអស់ប្រមាណ ១,៥០០ ភូមិ។ រីឯទន្លេឆាងជាំងនៅភាគខាងត្បូងនោះវិញ ក៏តែងតែបង្កឱ្យមានទឹកជំនន់គួរឱ្យភ័យខ្លាចខ្លាំងណាស់ដែរ ខណៈទឹកជំនន់ដ៏ធំបំផុតបានកើតឡើងនៅឆ្នាំ១៨៨៧ បង្កឱ្យមានអ្នករងគ្រោះប្រមាណ ៩០០,០០០ នាក់ ហើយរហូតមកដល់ឆ្នាំ ១៩៣៨ ទឹកជំនន់ក៏បានបង្កឱ្យមានអ្នករងគ្រោះប្រហាក់ប្រហែលនឹងឆ្នាំ ១៨៨៧ ផងដែរ។

ចាប់ពីចុងទសវត្សរ៍ឆ្នាំ ១៩៩០ រហូតមកដល់ពេលនេះប្រទេសចិននៅតែរងគ្រោះយ៉ាងធ្ងន់ធ្ងរដោយសារគ្រោះទឹកជំនន់ជាបន្តបន្ទាប់។ ឆ្លើយតបនឹងគ្រោះធម្មជាតិនេះ រដ្ឋាភិបាលក្រុងប៉េកាំងបានកសាងទំនប់ច្រកភ្នំចំនួន ៣ ចាប់ពីឆ្នាំ ២០០៣ ដើម្បីកាត់បន្ថយផលប៉ះពាល់ដោយសារទឹកជំនន់ទន្លេឆាងជាំង ឬទន្លេលឿងនេះ។ ក្រៅពីប្រទេសចិន ក៏មានប្រទេសមួយចំនួនផ្សេងទៀតក៏បានរងគ្រោះដោយសារគ្រោះទឹកជំនន់ធ្ងន់ធ្ងរផងដែរ ក្នុងនោះរួមមានប្រទេសឥណ្ឌា បង់ក្លាដែស វៀតណាម ប៉ាគីស្ថាន ឥណ្ឌូណេស៊ី អេហ្ស៉ីប មីយ៉ាន់ម៉ា អាហ្វហ្កានីស្ថាន នីហ្សេរីយ៉ា ប្រេស៊ីល ថៃ កុងហ្គោ អ៊ីរ៉ាក់ ព្រមទាំងកម្ពុជាផងដែរ៕

ភ្ញៀវទេសចរបរទេសជាច្រើនចាប់អារម្មណ៍មកកម្សាន្តនៅវៀតណាម ដោយសារនៅប្រទេសនេះមានតំបន់ទេសចរណ៍ស្អាតៗជាច្រើនកន្លែង ដូចជា ៖ ឆ្នេរសមុទ្រ កោះ និងតំបន់ទីប្រជុំជនតាមផ្លូវរថភ្លើង ។ ប៉ុន្តែយើងគួរតែប្រុងប្រយ័ត្នចំណុចទាំងនេះ មុនពេលទៅប្រទេសវៀតណាម ។

១-ប្រយ័ត្នគេសម្លឹងមើល ៖ បើអ្នកណាមានរូបរាងធាត់លើសទម្ងន់ គឺត្រូវប្រយ័ត្នខ្លួនបន្តិចពេលទៅវៀតណាម ពីព្រោះនៅវៀតណាមពុំសូវមានមនុស្សធាត់ទេ ។ ជនជាតិវៀតណាមបានប្រឹងប្រែងធ្វើការខ្លាំង ហើយពួកគេចូលចិត្តបរិភោគបន្លែច្រើនជាងសាច់ ។ វាពុំចម្លែកទេ ដែលយុវជនវៀតណាមភាគច្រើនសុទ្ធតែមានរូបរាងស្អាតសង្ហា ទើបគេកម្រឃើញមនុស្សធាត់នៅទីនេះ ។

ភ្ញៀវទេសចរបរទេសម្នាក់ធ្លាប់ទៅលេងប្រទេសវៀតណាម និយាយថា ខ្លួនបានទៅដើរលេងនៅផ្សារមួយកន្លែង ស្រាប់តែអាជីវករវៀតណាមនិយាយថា ពុំធ្លាប់ឃើញមនុស្សធាត់បែបនេះ ។ ហេតុនេះ បើយើងមានរូបរាងធាត់ ហើយត្រូវជនជាតិវៀតណាមសម្លឹងមើលនោះ យើងកុំភ្ញាក់ផ្អើលអី ។

២-ប្រយ័ត្នម៉ូតូ ៖ នៅហាណូយ មិនត្រឹមតែជាទីក្រុងធំរបស់វៀតណាមប៉ុណ្ណោះទេ ប៉ុន្តែវាជាទីក្រុងម៉ូតូផងដែរ ។ យើងនឹងបានឮសំឡេងម៉ូតូពេញមួយថ្ងៃ និងឮសំឡេងចុចស៊ីប្លេម៉ូតូនៅតាមផ្លូវបំបែកជា៤ ពីព្រោះពលរដ្ឋនៅហាណូយជិះម៉ូតូច្រើនណាស់ ។ លើសពីនេះ យើងក៏ត្រូវប្រុងប្រយ័ត្នពេលឆ្លងផ្លូវផងដែរ ហើយចំណុចសំខាន់ អ្នកថ្មើរជើងត្រូវតែចៀសចេញពីផ្លូវម៉ូតូ និងយានជំនិះផ្សេងៗ ។

៣-ប្រយ័ត្នចាញ់ល្បិច ៖ មិនមែនជនជាតិវៀតណាមទាំងអស់សុទ្ធតែជាមនុស្សមិនល្អទេ ប៉ុន្តែភ្ញៀវទេសចរបរទេសគ្រប់រូបដែលធ្លាប់ទៅប្រទេសវៀតណាម បាននិយាយដូចៗគ្នាថា បើចង់ទិញរបស់របរ គឺយើងត្រូវតែតថ្លៃឱ្យអ្នកលក់បញ្ចុះតម្លៃពាក់កណ្តាល ពីព្រោះអ្នកលក់តែងតែលក់ទំនិញតម្លៃខ្ពស់ឱ្យភ្ញៀវទេសចរបរទេស ។

ដូចគ្នានេះ បើយើងជិះរថយន្តតាក់ស៊ី គឺត្រូវចរចាតម្លៃជាមួយអ្នកបើកបរតាក់ស៊ីជាមុន ។ វិធីល្អ ពុំគួរចរចាតម្លៃជិះតាក់ស៊ីផ្ទាល់មាត់ទេ ប៉ុន្តែត្រូវឱ្យអ្នកបើកតាក់ស៊ីចុះហត្ថលេខាបញ្ជាក់ថា នឹងយកថ្លៃជិះប៉ុន្មាន ពីព្រោះពេលខ្លះ ភ្ញៀវទេសចរកំពុងជិះរថយន្តសុខៗ ស្រាប់តែអ្នកបើកតាក់ស៊ីសុំឡើងថ្លៃក៏មាន ។

ភ្ញៀវទេសចរបរទេសជាច្រើនឆ្ងល់ថា ហេតុអ្វីអាជីវករវៀតណាមមានទម្លាប់លក់ទំនិញតម្លៃខ្ពស់ឱ្យភ្ញៀវទេសចរបរទេស? គឺដោយសារប្រទេសវៀតណាមទើបតែឆ្លងកាត់សង្គ្រាមមិនយូរប៉ុន្មាន ទាំងសង្គ្រាមជាមួយបារាំង និងសង្គ្រាមជាមួយវៀតណាមគ្នាឯង ។ ហេតុនេះ ធ្វើឱ្យជនជាតិវៀតណាមភាគច្រើនប្រឹងប្រែងរកស៊ីចិញ្ចឹមជីវិត និងរស់នៅយ៉ាងលំបាក ។

៤-គូស្នេហ៍អង្គុយសាសងនៅទីសាធារណៈ ៖ បើទោះជាជនជាតិវៀតណាមរក្សាអត្តសញ្ញាណរបស់ពួកគេក្តី ប៉ុន្តែបើទៅទីសាធារណៈនៅវៀតណាម យើងនឹងឃើញគូស្នេហ៍វៀតណាមអង្គុយសាសងជាគូ ដោយសារពួកគេស្រឡាញ់គ្នាដោយបើកចំហដូចនៅអឺរ៉ុប ។ ដូច្នេះ បើជួបបែបនេះ កុំភ្ញាក់ផ្អើលអី ពីព្រោះវាជារឿងធម្មតានៅទីនេះ ៕

ប្រទេសវៀតណាម ៖ កាលពីថ្ងៃទី១៣ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ទីក្រុងហាណូយ ប្រទេសវៀតណាម នៅតែប្រឈមនឹងទឹកជំនន់ដោយសារឥទ្ធិពលខ្យល់ព្យុះ Yagi ។ វៀតណាមសន្និដ្ឋានថា កម្រិតទឹកទន្លេក្រហមក្នុងទីក្រុងនេះនឹងពុំស្រកចុះទេ រហូតដល់ថ្ងៃទី១៣ ខែកញ្ញា ខណៈពលរដ្ឋវៀតណាមស្លា.ប់ ដោយសារទឹកជំនន់កើនឡើងរហូតដល់១៩៩នាក់ និងបាត់ខ្លួន១២៨នាក់ ។

ស្របពេលស្ថានការណ៍ទឹកជំនន់នៅវៀតណាមពុំទាន់ធូរស្រាល ក្រសួងការបរទេសអូស្ត្រាលីបានប្រកាសកាលពីថ្ងៃទី១២ ខែកញ្ញា ថា ប្រទេសអូស្ត្រាលីនឹងផ្តល់ជំនួយឧបត្ថម្ភដល់វៀតណាម ផ្នែកមនុស្សធម៌ និងសម្ភារៈចាំបាច់មួយចំនួន ដែលស្មើទឹកប្រាក់២លានដុល្លារអាមេរិក ។ យន្តហោះកងទ័ពអាកាសអូស្ត្រាលីបានដឹកជញ្ជូនសម្ភារៈទៅប្រទេសវៀតណាម តាំងពីថ្ងៃទី១១ ខែកញ្ញា កន្លងមក ។

កម្រិតទឹកទន្លេក្រហមក្នុងទីក្រុងហាណូយពុំទាន់ស្រកចុះឡើយ ហើយធ្វើឱ្យពលរដ្ឋវៀតណាមដែលរស់នៅតាមមាត់ទន្លេពិបាកយ៉ាងខ្លាំង ។ មន្ត្រីឧតុនិយមព្យាករថា ទឹកទន្លេក្រហមអាចស្រកចុះបន្តិច នៅព្រឹកថ្ងៃទី១៣ ខែកញ្ញា ប៉ុន្តែតំបន់ជាច្រើនទៀតនៅតែប្រឈមនឹងទឹកជំនន់បន្តទៀត ។

ប្រទេសវៀតណាមបានទទួលរងផលប៉ះពាល់ខ្លាំងដោយសារទឹកជំនន់ និងការបាក់ដីជាច្រើនកន្លែង ដោយសារឥទ្ធិពលខ្យល់ព្យុះ Yagi ដែលបោកបក់មកលើវៀតណាម តាំងពីថ្ងៃទី៧ ខែកញ្ញា ។ ភ្នាក់ងារគ្រប់គ្រងគ្រោះមហន្តរាយរបស់រដ្ឋាភិបាលវៀតណាមរាយការណ៍ថា ចំនួនមនុស្សស្លាប់កើនឡើងដល់១៨១នាក់ និងបាត់ខ្លួន១៤១នាក់ ។

ចំណែកនៅបណ្តាខេត្តផ្សេងៗភាគខាងជើងប្រទេសវៀតណាមនៅតែមានទឹកជំនន់ខ្លាំង ដោយសារទឹកទន្លេបានហូរចូលតំបន់ទំនាប, ទំនប់ទឹក និងតំបន់មួយចំនួនរបស់ទីក្រុងហាណូយ ។

អាជ្ញាធរក្រុងហាណូយបានជម្លៀសពលរដ្ឋរាប់ពាន់នាក់ដែលរស់នៅមាត់ទន្លេទៅកាន់ជម្រកបណ្តោះអាសន្ន ដោយសារកម្រិតទឹកទន្លេកើនឡើងខ្ពស់ក្នុងរយៈពេល២០ឆ្នាំ ។ រីឯតំបន់ភ្នំភាគខាងជើងទីក្រុងហាណូយ នៅតែមានដីបាក់ជាបន្តបន្ទាប់ កាលពីថ្ងៃទី១២ ខែកញ្ញា ៕

សហរដ្ឋអាមេរិក ៖ កាលពីថ្ងៃទី១២ ខែកញ្ញា ឆ្នាំ២០២៤ សារព័ត៌មាន Reuters រាយការណ៍ថា ក្រុមហ៊ុនរបស់លោក Elon Musk ឈ្មោះ SpaceX បានបង្កើតប្រវត្តិសាស្ត្រថ្មីមួយលើពិភពលោក ដោយបញ្ជូនមហាសេដ្ឋី និងវិស្វករអាមេរិកចំនួន៤រូប ទៅលេងអវកាសជាលើកដំបូង តាមរយៈយានអវកាសឈ្មោះ Crew Dragon ។

នេះជាលើកដំបូងដែលមានការបញ្ជូនមនុស្សទៅក្រៅផែនដីក្នុងរយៈពេល៦៥ឆ្នាំ ដែលមនុស្សទាំង៤រូបពុំពាក់ព័ន្ធនឹងការងារ ឬបំពេញភារកិច្ចលើអវកាសរបស់រដ្ឋាភិបាលអាមេរិកទេ ។ ប៉ុន្តែវាជាការបើកទ្វារផ្នែកទេសចរណ៍ថ្មី គឺដំណើរកម្សាន្តលើអវកាស និងអាជីវកម្មលំហអវកាស ។

ជនជាតិអាមេរិកចំនួន៤នាក់នេះ រួមមាន ៖ លោក Jared Isaacman អាយុ៤១ឆ្នាំ, លោក Skogge Poteet អាយុ៥០ឆ្នាំ, អ្នកស្រី Sarah Gillis អាយុ៣០ឆ្នាំ និងអ្នកស្រី Anna Mannon អាយុ៣៨ឆ្នាំ ។ លោក Isaacman បានក្លាយជាមនុស្សដំបូងគេលើពិភពលោក ដែលបានឈានជើងចេញពីយានអវកាសទៅមើលលំហអាកាស ហើយជនជាតិអាមេរិកទាំង៤រូបបានចំណាយពេលលើអាកាសសរុបមិនលើស៣០នាទី ។

ការបើកឱកាសឱ្យភ្ញៀវទេសចរអាមេរិកធ្វើដំណើរទៅអវកាសនេះ គឺជាទស្សនវិស័យរបស់លោក Elon Musk ជាស្ថាបនិកក្រុមហ៊ុន SpaceX និងក្រុមហ៊ុនជាច្រើនទៀត ។ លោកចង់ជំរុញវិស័យទេសចរណ៍អវកាសឱ្យកាន់តែទូលំទូលាយ ហើយគេចាត់ទុកថា ជាការរីកចម្រើនចុងក្រោយបង្អស់ និងការបោះជំហានថ្មីផ្នែកអវកាស ។

ដំណើរកម្សាន្តលើអវកាសនេះពុំមែនគ្មានហានិភ័យទេ ហើយមានតែលោក Isaacman ម្នាក់ប៉ុណ្ណោះក្នុងចំណោមភ្ញៀវទេសចរទាំងអស់ ដែលធ្លាប់ធ្វើដំណើរទៅអវកាស ។ នេះជាការងារដ៏លំបាកមួយនៅអវកាស ប៉ុន្តែក្រុមហ៊ុន SpaceX អាចធ្វើវាបាន បញ្ជាក់ថា ក្រុមហ៊ុនទទួលបានជោគជ័យយ៉ាងខ្លាំងក្នុងប្រវត្តិសាស្ត្រដំណើរកម្សាន្តលើអវកាសរបស់មនុស្ស ៕

ប្រទេសវៀតណាម ៖ សារព័ត៌មានវៀតណាមបានរាយការណ៍ កាលពីថ្ងៃទី១២ ខែកញ្ញា ឆ្នាំ២០២៤ ថា បច្ចុប្បន្ន រដ្ឋាភិបាលវៀតណាមបានជំរុញវិនិយោគិនបរទេសឱ្យចូលមកវិនិយោគនៅខេត្ត Vinh Phuc របស់វៀតណាម ព្រមទាំងលើកទឹកចិត្តភ្ញៀវទេសចរបរទេសមកកម្សាន្តនៅខេត្តនេះផងដែរ ដោយសារមានកត្តាអំណោយផល និងតំបន់ទេសចរណ៍ជាច្រើនកន្លែង ។

ខេត្ត Vinh Phuc ស្ថិតនៅភាគខាងជើងប្រទេសវៀតណាម និងជាមជ្ឈមណ្ឌលឧស្សាហកម្មដ៏សំខាន់ ដូចជា ៖ យានយន្ត, ឧបករណ៍អេឡិចត្រូនិក, សម្ភារៈអគ្គិសនី, ម្ហូបអាហារ និងសម្លៀកបំពាក់ ។ ប្រសិនបើធ្វើដំណើរតាមរថយន្តចេញពីទីក្រុងហាណូយ និងអាកាសយានដ្ឋានអន្តរជាតិ Noi Bai មកកាន់ខេត្តនេះ គឺចំណាយពេលត្រឹមតែ១ម៉ោងប៉ុណ្ណោះ ។

លោក Nguyen Dinh Bang ប្រធានសមាគមអ្នកសារព័ត៌មានប្រចាំតំបន់និយាយថា ខេត្ត Vinh Phuc របស់វៀតណាម ប្រៀបដូចជាស្ពានសម្រាប់តភ្ជាប់ជាមួយបណ្តាខេត្តផ្សេងៗនៅភាគខាងជើងទីក្រុងហាណូយ និងតំបន់ដីសណ្តទន្លេក្រហម ។ ខេត្តនេះមានពលរដ្ឋរស់នៅជាង១លាន១សែននាក់ ហើយខេត្តមានតួនាទីសំខាន់ក្នុងយុទ្ធសាស្ត្រអភិវឌ្ឍន៍សេដ្ឋកិច្ចតំបន់ និងសេដ្ឋកិច្ចជាតិ ។

នៅឆ្នាំ២០២៤ វិនិយោគិនមកពីប្រទេសចំនួន១៩ បានមកវិនិយោគក្នុងគម្រោងផ្សេងៗនៅខេត្ត Vinh Phuc ។ រីឯប្រទេសដែលមកវិនិយោគនៅខេត្តនេះច្រើនជាងគេ រួមមាន ៖ កូរ៉េខាងត្បូង, ជប៉ុន, តៃវ៉ាន់, ចិន, សិង្ហបុរី, ថៃ, អ៊ីតាលី និងហូឡង់ ។

លោក Dinh Bang ប្រធានសមាគមអ្នកសារព័ត៌មានប្រចាំតំបន់បន្តថា ខេត្ត Vinh Phuc បានក្លាយទៅជាតំបន់ដ៏ពេញនិយមសម្រាប់បណ្តាវិនិយោគិនទាំងក្នុងប្រទេស និងក្រៅប្រទេស ។ រដ្ឋាភិបាលវៀតណាមបានលើកទឹកចិត្តវិនិយោគិនបរទេស និងជំរុញឱ្យខេត្តនេះក្លាយជាតំបន់ឧស្សាហកម្មថ្មីផ្នែកច្នៃប្រឌិតឧស្សាហកម្មបច្ចេកវិទ្យាខ្ពស់ ក៏ដូចជាតំបន់ទេសចរណ៍ ។

ក្រៅពីនេះ លោក Dinh Bang ក៏បានអញ្ជើញភ្ញៀវទេសចរបរទេសមកកម្សាន្តនៅខេត្ត Vinh Phuc ឱ្យបានច្រើនផងដែរ ដើម្បីទទួលបានបទពិសោធន៍ថ្មីជាមួយតំបន់ទេសចរណ៍ធម្មជាតិដ៏សម្បូរបែប ៕

ប្រទេសឥណ្ឌា ៖ សារព័ត៌មានបរទេសបានរាយការណ៍ កាលពីថ្ងៃទី១១ ខែកញ្ញា ឆ្នាំ២០២៤ ថា ប្រទេសឥណ្ឌា និងសិង្ហបុរីបានចុះហត្ថលេខាលើអនុស្សរណៈសម្រាប់កិច្ចសហការលើផ្នែកសំខាន់ៗ ជាពិសេស សហការផ្នែកផលិតបន្ទះឈីប, បច្ចេកវិទ្យាឌីជីថល, ការអភិវឌ្ឍជំនាញ និងសេវាកម្មសុខភាព ។

បើទោះជាអាស៊ីខាងត្បូងនៅតែជាតំបន់រីកចម្រើនយ៉ាងឆាប់រហ័ស ហើយសេដ្ឋកិច្ចឥណ្ឌាបានរីកចម្រើនលឿនលើពិភពលោកក្តី ប៉ុន្តែពលរដ្ឋរស់នៅក្នុងតំបន់នេះនៅតែមានប្រាក់ចំណូលទាបដដែល ។ ជាក់ស្តែង ប្រាក់ចំណូលរបស់ពលរដ្ឋឥណ្ឌាម្នាក់ស្មើត្រឹមតែ២.៧៣០ដុល្លារអាមេរិកក្នុង១ឆ្នាំ គឺតិចជាងពលរដ្ឋអាមេរិកដែលមានប្រាក់ចំណូលស្មើនឹង៨៥.៣៧០ដុល្លារអាមេរិកក្នុង១ឆ្នាំ និងពលរដ្ឋចិនមានប្រាក់ចំណូលស្មើនឹង១៣.១៤០ដុល្លារអាមេរិកក្នុង១ឆ្នាំ ។

នាយករដ្ឋមន្ត្រីឥណ្ឌា លោក Narendra Modi បានថ្លែងថា សិង្ហបុរីមិនត្រឹមតែជាមិត្តភក្តិដ៏ល្អរបស់ឥណ្ឌាប៉ុណ្ណោះទេ ប៉ុន្តែសិង្ហបុរី គឺជាកម្លាំងចិត្តសម្រាប់ប្រទេសកំពុងអភិវឌ្ឍន៍ទាំងអស់ផងដែរ ហើយឥណ្ឌានឹងសហការជាមួយសិង្ហបុរីក្នុងផ្នែកជាច្រើនទៀត ។

នាយករដ្ឋមន្ត្រីឥណ្ឌា លោក Narendra Modi និងនាយករដ្ឋមន្ត្រីសិង្ហបុរី លោក Lawrence Wong បានធ្វើដំណើរទៅពិនិត្យមើល AEM ជាក្រុមហ៊ុនផលិតបន្ទះឈីប និងគ្រឿងអេឡិចត្រូនិករបស់សិង្ហបុរីជាមួយគ្នា ហើយមេដឹកនាំប្រទេសទាំងពីររូបសន្យាថា នឹងបង្កើនកិច្ចការផ្នែកផលិតបន្ទះឈីប ។

ចំណែកលោក Heng Swee Keat ឧបនាយករដ្ឋមន្ត្រីសិង្ហបុរីបានសង្កត់ធ្ងន់ថា ការបង្កើនកិច្ចសហការនេះនឹងជួយឱ្យប្រទេសទាំងពីរអាចយកឈ្នះឧបសគ្គផ្សេងៗជាមួយគ្នាបាន ដូចជា ៖ បម្រែបម្រួលអាកាសធាតុ, កំណើនពលរដ្ឋអាយុច្រើន និងសុខភាពសាធារណៈ ជាដើម ។

ទោះយ៉ាងណា អ្នកសង្កេតការណ៍នយោបាយជាច្រើននាក់បាននិយាយមកកាន់សារព័ត៌មាន CNBC ថា ឥណ្ឌានឹងអាចរៀនសូត្របទពិសោធន៍ជាច្រើនពីសិង្ហបុរី ខណៈសិង្ហបុរីព្យាយាមប្រែក្លាយប្រទេសឱ្យក្លាយជាមជ្ឈមណ្ឌលរចនាម៉ូដ និងផលិតទំនិញលំដាប់ពិភពលោក ។ សិង្ហបុរីមានឈ្មោះល្បីល្បាញផ្នែករោងចក្រផលិតទំនិញទំនើបជាយូរមកហើយ ទើបសិង្ហបុរីអាចទាក់ទាញការវិនិយោគរបស់ក្រុមហ៊ុនបច្ចេកវិទ្យា និងក្រុមហ៊ុនធំៗជាច្រើនពីជុំវិញពិភពលោក ។

គួរបញ្ជាក់ថា ក្នុងរយៈពេល៧ឆ្នាំកន្លងមក សិង្ហបុរីបានបើកមជ្ឈមណ្ឌលអភិវឌ្ឍន៍ជំនាញក្នុងទីក្រុងជាច្រើនរបស់ប្រទេសឥណ្ឌា ដូចជា ៖ ទីក្រុងញូវដេលី និងទីក្រុងគូវ៉ាហាទី ស្ថិតនៅរដ្ឋអាស់សាំ ៕

ប្រទេសកូរ៉េខាងត្បូង ៖ សារព័ត៌មានបរទេសរាយការណ៍ថា ដោយសារឥទ្ធិពលភាពយន្ត និងប្រព័ន្ធផ្សព្វផ្សាយរបស់ខាងត្បូង ដែលផ្សព្វផ្សាយពីអាហារផ្សេងៗបានធ្វើឱ្យភ្ញៀវទេសចរបរទេសចង់បរិភោគអាហារកូរ៉េខាងត្បូង ។ រីឯអាហារដែលភ្ញៀវទេសចរបរទេសពេញនិយមបំផុត គឺសាច់មាន់បំពង ដែលស្ថិតក្នុងចំណោមអាហារប្រចាំតំបន់របស់កូរ៉េខាងត្បូង ចំនួន១៥មុខ ។

BC Card ជាស្ថាប័នទូទាត់ប្រាក់ដ៏ធំបំផុតរបស់កូរ៉េខាងត្បូង បានលើកឡើងកាលពីថ្ងៃទី៨ ខែកញ្ញា ឆ្នាំ២០២៤ ថា សាច់មាន់បំពង គឺជាអាហារប្រចាំទីក្រុង Daegu ស្ថិតនៅភាគអាគ្នេយ៍ប្រទេសកូរ៉េខាងត្បូង បានក្លាយជាអាហារលក់ដាច់បំផុតសម្រាប់ភ្ញៀវទេសចរបរទេស ។ ភ្ញៀវទេសចរបរទេសបានទូទាត់ប្រាក់ថ្លៃសាច់មាន់បំពងយ៉ាងច្រើនក្នុងរយៈពេល៣ឆ្នាំ គឺចាប់ពីឆ្នាំ២០២២ ដល់ឆ្នាំ២០២៤ ។

ចំណែកគុយទាវដាក់ទឹកជ្រលក់ខ្មៅ និងក្តាមទឹកស៊ីអ៊ីវ ដែលជាអាហារប្រចាំតំបន់ភាគខាងលិចនៃទីក្រុងសេអ៊ូល ឬជាអាហាររបស់ខេត្ត Gyeonggi និង Incheon បានក្លាយជាអាហារលក់ដាច់សម្រាប់ភ្ញៀវទេសចរបរទេសបន្ទាប់ពីសាច់មាន់បំពង គឺស្ថិតក្នុងលំដាប់ទី២ និងទី៣ តាមលំដាប់ ។

ស្ថាប័ន BC Card កត់សម្គាល់ថា ក្តាមទឹកស៊ីអ៊ីវមានចំនួនលក់កើនឡើងខ្លាំងនាពេលបច្ចុប្បន្ន ខណៈកាលពីមុន អាហារប្រភេទនេះពុំទទួលបានការពេញនិយមទេ ដោយសាររសជាតិរបស់វា ។ ប៉ុន្តែអាហារនេះបែរជាទទួលបានការពេញនិយមខ្លាំង ពីព្រោះឥទ្ធិពលភាពយន្ត និងបណ្តាញសង្គមកូរ៉េខាងត្បូងបានបង្ហាញពីអាហារជាច្រើនប្រភេទ ទើបធ្វើឱ្យជនបរទេសដែលទស្សនាភាពយន្តចង់សាកល្បងអាហារទាំងនេះ ។

ចំណែកអាហារផ្សេងទៀតរបស់កូរ៉េខាងត្បូងដែលពុំសូវពេញនិយមបរិភោគកាលពីមុន ប៉ុន្តែភ្ញៀវទេសចរបរទេសចាប់អារម្មណ៍យ៉ាងខ្លាំងនាពេលបច្ចុប្បន្ន មានដូចជា ៖ តៅហ៊ូទន់ នៅទីក្រុង Gangneung និងបបរសាច់ជ្រូក នៅទីក្រុង Busan ។

ស្ថាប័ន BC Card បញ្ជាក់ថា ភ្ញៀវទេសចរបរទេសចូលចិត្តបរិភោគអាហារប្រចាំតំបន់របស់កូរ៉េខាងត្បូងកាន់តែច្រើន ហើយពួកគេបានចំណាយប្រាក់ទិញអាហារទាំងនេះច្រើនជាងជនជាតិកូរ៉េខាងត្បូងដែលជាម្ចាស់ប្រទេស រហូតដល់ជាង៤ដងឯណោះ ។

ក្រសួងវប្បធម៌ កីឡា និងទេសចរណ៍ ព្រមទាំងអង្គការទេសចរណ៍កូរ៉េខាងត្បូងបានប្រកាសធ្វើយុទ្ធនាការទេសចរណ៍ម្ហូបអាហារឈ្មោះ «Taste your Korea» កាលពីថ្ងៃទី១០ ខែកក្កដា ឆ្នាំ២០២៤ ព្រមទាំងរៀបចំកម្មវិធីម្ហូបអាហារ, នំចំណី, គ្រឿងផ្សំ និងស្រាបៀរប្រចាំតំបន់នីមួយៗ ចំនួន៣៣មុខ ។ ការរៀបចំកម្មវិធីនេះក្នុងគោលបំណងទាក់ទាញភ្ញៀវទេសចរបរទេស និងលើកកម្ពស់កូរ៉េខាងត្បូងឱ្យក្លាយជាគោលដៅទេសចរណ៍ម្ហូបអាហារឈានមុខគេ ៕

ប្រទេសឥណ្ឌា ៖ ទំនាក់ទំនងរវាងប្រទេសដែលមានចំនួនពលរដ្ឋច្រើនបំផុតលើពិភពលោក គឺឥណ្ឌា និងចិន កាន់តែតា.នតឹង ខ្លាំងឡើង ក្រោយពីកងទ័ពប្រទេសទាំងពីរមានជ.ម្លោះ ជាមួយគ្នាកាលពីឆ្នាំ២០២០ ។ វាធ្វើឱ្យរដ្ឋាភិបាលឥណ្ឌាត្រួតពិនិត្យគោលនយោបាយការបរទេសរបស់ខ្លួនឡើងវិញ ជាពិសេស ទំនាក់ទំនងជាមួយចិន ។

នៅថ្ងៃទី១២ ខែកញ្ញា ឆ្នាំ២០២៤ សារព័ត៌មាន Nikkei Asia រាយការណ៍ថា ប្រទេសឥណ្ឌាមានគម្រោងដំឡើងពន្ធបំពង់ដែកនាំចូលពីប្រទេសចិន និងវៀតណាម រហូតដល់៣០% សម្រាប់រយៈពេល៥ឆ្នាំ ។ កាលពីខែសីហា ឆ្នាំ២០២៤ រដ្ឋាភិបាលឥណ្ឌាក៏បានស៊ើបអង្កេតដែកមួយចំនួនដែលនាំចូលពីវៀតណាមផងដែរ ដើម្បីការពារឧស្សាហកម្មដែកឥណ្ឌា ។

ក្រសួងការបរទេសឥណ្ឌានឹងដំឡើងពន្ធដែកមួយចំនួនដែលនាំចូលពីប្រទេសចិន និងវៀតណាម គឺចាប់ពី១២% ដល់៣០% ដើម្បីការពារ និងលើកកម្ពស់ឧស្សាហកម្មដែកក្នុងស្រុក ។ រដ្ឋាភិបាលឥណ្ឌាបានចេញបទបញ្ជាកាលពីថ្ងៃទី១០ ខែកញ្ញា កន្លងមក គឺកំណត់ឱ្យបំពង់ដែកផលិតនៅចិន និងវៀតណាម ដែលជាប្រទេសផលិតដែកដ៏ធំលើពិភពលោក ត្រូវបង់ពន្ធនាំចូលខ្ពស់ក្នុងរយៈពេល៥ឆ្នាំ គិតចាប់ពីឆ្នាំ២០២៤ តទៅ ។

គេសង្កេតឃើញថា ទំនាក់ទំនងរវាងប្រទេសឥណ្ឌា និងចិន គឺកាន់តែមានភាពតានតឹងខ្លាំងឡើង តាំងពីមានការប៉ះទង្គិចគ្នារវាងកងទ័ពប្រទេសទាំងពីរនៅបរិវេណជាយដែនហិម៉ាល័យ កាលពីឆ្នាំ២០២០ ។ ហេតុការណ៍នេះធ្វើឱ្យរដ្ឋាភិបាលឥណ្ឌាត្រួតពិនិត្យគោលនយោបាយការបរទេសឡើងវិញ ជាពិសេស ទំនាក់ទំនងជាមួយចិន ។

ក្រៅពីនេះ រដ្ឋាភិបាលឥណ្ឌាក៏បានរឹតបន្តឹង និងត្រួតពិនិត្យការវិនិយោគរបស់ចិន ព្រមទាំងប្រកាសផ្អាកគម្រោងសាងសង់សំខាន់ៗរបស់ចិន ។ លោក សុរ៉ាម៉ាន់យាប់ ចៃឆាំងកា រដ្ឋមន្ត្រីក្រសួងការបរទេសឥណ្ឌា បាននិយាយពីទំនាក់ទំនងសេដ្ឋកិច្ចរវាងឥណ្ឌា និងចិន ថា ឥណ្ឌាពុំបានហាមឃាត់ការធ្វើអាជីវកម្មជាមួយចិនទេ ប៉ុន្តែឥណ្ឌានឹងពិចារណាយ៉ាងលម្អិតថា តើចិននឹងវិនិយោគផ្នែកណា និងស្ថិតក្រោមលក្ខខណ្ឌអ្វីខ្លះ ៕