ប្រទេសកូរ៉េខាងត្បូង ៖ កាលពីថ្ងៃទី១៣ ខែកញ្ញា ឆ្នាំ២០២៤ សារព័ត៌មាន Yonhap រាយការណ៍ថា កងទ័ពកូរ៉េខាងត្បូងបានដោះកាមេរ៉ាសុវត្ថិភាពប្រមាណ១.៣០០គ្រឿងចេញពីមូលដ្ឋានទ័ព ក្រោយពីរកឃើញថា កាមេរ៉ាសុវត្ថិភាពទាំងនេះផលិតនៅចិន ។ កូរ៉េខាងត្បូងបារម្ភថា វានឹងប៉ះពាល់ដល់សន្តិសុខជាតិ ដោយសារកាមេរ៉ាទាំងនេះបានភ្ជាប់ប្រព័ន្ធ Server រាយការណ៍ទៅចិន ។

យោងតាមប្រភពពុំបញ្ចេញឈ្មោះឱ្យដឹងថា ក្រុមហ៊ុនកូរ៉េខាងត្បូងមួយបានទិញកាមេរ៉ាសុវត្ថិភាពទាំងនេះមកលក់ឱ្យកងទ័ពកូរ៉េខាងត្បូង ប៉ុន្តែកងទ័ពទើបតែជ្រាបពីប្រភពរបស់វាថា ផលិតនៅប្រទេសចិន ក្នុងអំឡុងពេលពួកគេត្រួតពិនិត្យឧបករណ៍កងទ័ព កាលពីដើមឆ្នាំ២០២៤ ។

កាមេរ៉ាសុវត្ថិភាពទាំងអស់ពុំទាន់បានប្រើប្រាស់ក្នុងការងារសន្តិសុខជាតិនៅឡើយទេ ដូចជា ៖ ប្រើប្រាស់នៅតំបន់គ្មានកងទ័ពរវាងប្រទេសកូរ៉េទាំងពីរ ដែលជាតំបន់រឹតបន្តឹងយ៉ាងខ្លាំង ។ ប៉ុន្តែតំបន់នេះត្រូវបានប្រើប្រាស់សម្រាប់ការហ្វឹកហាត់យោធា និងដំឡើងកាមេរ៉ាសុវត្ថិភាពលើរបងជុំវិញមូលដ្ឋានទ័ព ។

ក្រសួងការពារជាតិកូរ៉េខាងត្បូងប្រកាសថា ក្រសួងបានដកហូតកាមេរ៉ាសុវត្ថិភាពផលិតនៅក្រៅប្រទេស ដើម្បីប្តូរមកប្រើប្រាស់កាមេរ៉ាសុវត្ថិភាពផលិតនៅកូរ៉េខាងត្បូងវិញ ។ ប៉ុន្តែក្រសួងការពារជាតិពុំបានបញ្ជាក់ថា តើកាមេរ៉ាសុវត្ថិភាពទាំងនេះផលិតនៅប្រទេសណាទេ ។

ក្រសួងការពារជាតិនឹងចាត់វិធានការតាមច្បាប់ ដោយប្តឹងទាមទារប្រាក់សំណងពីក្រុមហ៊ុនកូរ៉េខាងត្បូង ដែលលក់កាមេរ៉ាទាំងនេះមកឱ្យកងទ័ពកូរ៉េខាងត្បូង ។ ប៉ុន្តែក្រុមហ៊ុនអះអាងថា វាជាការយល់ខុសទាំងស្រុង ពីព្រោះកាមេរ៉ាសុវត្ថិភាពសុទ្ធតែផលិតនៅក្នុងស្រុក ។

រីឯកងទ័ពកូរ៉េខាងត្បូងបញ្ជាក់ថា កាមេរ៉ាសុវត្ថិភាពទាំងអស់ដែលបំពាក់នៅមូលដ្ឋានទ័ពបានផលិតមកសម្រាប់តភ្ជាប់ជាមួយប្រព័ន្ធ Server រាយការណ៍ទៅចិន ។ ប៉ុន្តែព័ត៌មានកងទ័ពកូរ៉េខាងត្បូងពុំទាន់បែកធ្លាយទៅចិននៅឡើយទេ ចាប់ពីបានដំឡើងកាមេរ៉ាសុវត្ថិភាពនៅមូលដ្ឋានទ័ពកូរ៉េខាងត្បូង កាលពីឆ្នាំ២០១៤ ។ ហេតុនេះ ស្ថាប័នពាក់ព័ន្ធរបស់កូរ៉េខាងត្បូងត្រូវតែដោះវាចេញជាបន្ទាន់ដើម្បីសុវត្ថិភាព ហើយចាប់ពីពេលនេះទៅ ពួកគេនឹងប្រើប្រាស់ CCTV ផលិតនៅកូរ៉េខាងត្បូងជំនួសវិញ ៕

ប្រទេសវៀតណាម ៖ ប្រទេសវៀតណាមបានរីកចម្រើនយ៉ាងឆាប់រហ័ស ហើយការវិនិយោគរបស់ក្រុមហ៊ុនបរទេសក្នុងផ្នែកបច្ចេកវិទ្យា, យានយន្ត និងកសិកម្ម បានធ្វើឱ្យផលិតផលក្នុងស្រុកសរុប (GDP) របស់វៀតណាមនៅឆ្នាំ២០២២ កើនឡើងរហូតដល់៨,០២% ។ គេចាត់ទុកថា នេះជាការកើនឡើងខ្លាំងបំផុត បើគិតចាប់ពីឆ្នាំ១៩៩៧ ។

វាបានក្លាយជាកត្តាសំខាន់ជួយទាក់ទាញក្រុមហ៊ុនបរទេសឱ្យមកវិនិយោគនៅវៀតណាម ដោយក្រុមហ៊ុនបរទេសសង្ឃឹមថា នឹងប្រមូលចំណូលនៅវៀតណាមឱ្យបានច្រើន ។ ក្រុមហ៊ុនកាហ្វេអាមេរិក Starbucks ក៏ស្ថិតក្នុងចំណោមក្រុមហ៊ុនទាំងនេះដែរ ដោយ Starbucks បានមកវិនិយោគអាជីវកម្មកាហ្វេនៅវៀតណាមអស់ជាង១០ឆ្នាំហើយ ដោយសារឃើញជនជាតិវៀតណាមចូលចិត្តផឹកកាហ្វេ ។

ប៉ុន្តែក្រុមហ៊ុន Starbucks ពុំអាចប្រកួតប្រជែងឈ្នះកាហ្វេវៀតណាម ឬទាក់ទាញចំណាប់អារម្មណ៍ជនជាតិវៀតណាមទេ ហើយចំណូលក្រុមហ៊ុនពុំស្មើគោលដៅដូចការរំពឹងទុក ។ Starbucks បានបើកអាជីវកម្មកាហ្វេនៅវៀតណាមអស់១០ឆ្នាំ ប៉ុន្តែមានសាខាមិនដល់១០០កន្លែង តើវាបណ្តាលមកពីមូលហេតុអ្វី?

តាមទិន្នន័យរបស់ Nikkei Asia បង្ហាញថា ប្រទេសវៀតណាមមានហាងកាហ្វេរហូតដល់១៩.០០០កន្លែង និងស្ថិតក្នុងចំណាត់ថ្នាក់ទី៤ លើពិភពលោក បន្ទាប់ពីអាមេរិក, ចិន និងកូរ៉េខាងត្បូង ។ កាហ្វេក្នុងស្រុកនៅតែគ្រប់គ្រងទីផ្សារ និងលក់ដាច់ជាងកាហ្វេបរទេស ព្រមទាំងពង្រីកសាខាកាន់តែច្រើន ។

ម្ចាស់ហាងកាហ្វេវៀតណាមនិយាយថា វៀតណាមមានទម្លាប់បរិភោគអាហារក្នុងភោជនីយដ្ឋានរួចហើយ ពួកគេទៅជជែកគ្នាបន្តនៅហាងកាហ្វេ ។ អ្នកខ្លះចូលចិត្តអង្គុយផឹកកាហ្វេតាមផ្លូវបណ្តើរ និងមើលការរកស៊ីលក់ដូរបណ្តើរ ខណៈហាងកាហ្វេមានទំនាក់ទំនងជិតស្និទ្ធជាមួយអតិថិជន ដែលវាជាចំណុចខ្លាំងមួយ ហើយជនបរទេសពុំយល់ទេ ។

នេះជាមូលហេតុដែលអាជីវកម្មរបស់ Starbucks មិនរីកចម្រើននៅវៀតណាម ៖

១-វៀតណាមមិនចូលចិត្តរសជាតិកាហ្វេ Starbucks ៖ អ្នកនាង Trang Do សិល្បករមកពីទីក្រុងដាណាង និយាយថា បើទោះនាងផឹកកាហ្វេ ៣កែវក្នុង១ថ្ងៃ ប៉ុន្តែនាងពុំធ្លាប់ផឹកកាហ្វេ Starbucks ទេ ដោយសារគ្មានរសជាតិច្រើន ។ កាហ្វេ Starbucks មានរសជាតិសាបខ្លាំង មិនដូចកាហ្វេវៀតណាមទេ ។ នាងថា ៖ «កាហ្វេវៀតណាមខាប់ជាង ឈ្ងុយជាង ហើយការឆុងកាហ្វេវៀតណាម ក៏ល្អជាងដែរ» ។

២-កាហ្វេ Starbucks មានតម្លៃថ្លៃ ៖ កាហ្វេ Starbucks មានតម្លៃថ្លៃជាងការចំណាយក្នុងជីវភាពប្រចាំថ្ងៃរបស់ជនជាតិវៀតណាម ទើបពួកគេស្ទាក់ស្ទើរទិញកាហ្វេ Starbucks ផឹក បើទោះមានរសជាតិថ្មីប្លែកក្តី ។ កាហ្វេ Starbucks មានតម្លៃប្រមាណ ៣.៨ដុល្លារអាមេរិក បានក្លាយជាឧបសគ្គដ៏ធំសម្រាប់អតិថិជនវៀតណាម ដែលមានប្រាក់ចំណូលជាមធ្យមត្រឹមតែ ៣៤៥ដុល្លារអាមេរិកក្នុ១ខែ ។

៣-វៀតណាមចូលចិត្តកាហ្វេ Robusta ជាង Arabica ៖ វៀតណាមចូលចិត្តកាហ្វេ Robusta ដោយសារវាខាប់ជាង និងមានជាតិកាហ្វេអ៊ីនច្រើនជាង ។ Starbucks បានប្រើប្រាស់កាហ្វេ Arabica ១០០% ព្រោះគិតថា វាមានរសជាតិឆ្ងាញ់ ប៉ុន្តែការស្រាវជ្រាវបង្ហាញថា ជនជាតិវៀតណាមម្នាក់បានផឹកកាហ្វេ២គីឡូក្រាមក្នុង១ឆ្នាំ ហើយជាកាហ្វេ Robusta ។

វៀតណាមមិននិយមកាហ្វេ Starbucks ហើយពួកគេចូលចិត្តផឹកកាហ្វេក្នុងស្រុកជាងកាហ្វេបរទេស ។ ជាក់ស្តែង កាហ្វេដាក់ស៊ុត ដែលមានដើមកំណើតនៅទីក្រុងហាណូយ តាំងពីឆ្នាំ១៩៤០ អំឡុងពេលវៀតណាមមានសង្គ្រាម និងខ្វះខាតទឹកដោះគោ ទើបវៀតណាមយកស៊ុតដាក់កាហ្វេជំនួសទឹកដោះគោ ។ កាហ្វេស៊ុតទទួលបានការគាំទ្រខ្លាំង ដែល Starbucks ពុំអាចយកឈ្នះ ។

បច្ចុប្បន្ន ហាងកាហ្វេវៀតណាមព្យាយាមបង្កើតរសជាតិកាហ្វេថ្មីៗបន្ថែមទៀតដើម្បីទាក់ទាញអតិថិជន ដោយយកយៅអ៊ួ និងផ្លែឈើផ្សេងៗដាក់ក្នុងកាហ្វេ ។ កាហ្វេពេញនិយមបំផុត គឺកាហ្វេដូង ដែលផ្សំពីគ្រីមដូង, ទឹកដោះគោ និងទឹកកក ។

៤-វៀតណាមផលិតកាហ្វេច្រើនលើពិភពលោក ៖ វៀតណាមជាប្រទេសផលិតកាហ្វេលំដាប់ទី២ លើពិភពលោក បន្ទាប់ពីប្រេស៊ីល ។ កាហ្វេ៩៧% ដែលផលិតនៅវៀតណាម ជាកាហ្វេ Robusta និង ៣% ជាកាហ្វេ Arabica ។ ហេតុនេះ ហាងកាហ្វេក្នុងស្រុកពុំចាំបាច់នាំចូលកាហ្វេពីក្រៅប្រទេសមកលក់ទេ ដោយសារកាហ្វេ Robusta នៅវៀតណាមមានតម្លៃថោក ហើយពួកគេអាចលក់ក្នុងតម្លៃសមរម្យ ៕

យើងគ្រប់គ្នាប្រាកដជាបានឃើញនូវវីដេអូជាច្រើនទាក់ទងនឹងរបៀបរស់នៅរបស់ប្រជាជនកុលសម្ព័ន្ធ Kayan Lahwi ហើយមែនទេ? លោកអ្នកប្រាកដជាឆ្ងល់ហើយថា ហេតុអ្វីបានជាកុលសម្ព័ន្ធមួយក្រុមនេះចូលចិត្តពាក់ខ្សែកច្រើនជាន់ ដែលបណ្តាលឱ្យ ក របស់ពួកគេម្នាក់ៗវែងខុសពីមនុស្សទូទៅ។ ជាការពិតណាស់ពាក្យថាកុលសម្ព័ន្ធគឺជាក្រុមមនុស្សដែលចូលចិត្តរស់នៅក្នុងព្រៃ មានទំនៀមទំលាប់ប្លែកៗ និងអាកប្បកិរិយាចម្លែកៗទៀតផង។ ដូច្នេះក្នុងអត្ថបទនេះយើងនឹងនាំប្រិយមិត្តមកដឹងពីមូលហេតុដែលកុលសម្ព័ន្ធ Kayan Lahwi របស់មីយ៉ាន់ម៉ាចូលចិត្តពាក់ខ្សែកច្រើនជាន់។

កុលសម្ព័ន្ធ Kayan Lahwi មានដើមកំណើតមកពីប្រទេសមីយ៉ាន់ម៉ា ចូលចិត្តតាំងលំនៅដ្ឋានលើភ្នំតាមព្រំដែនឆ្លងកាត់ពីភាគខាងជើងប្រទេសថៃ។ កុលសម្ព័ន្ធនេះគឺជាក្រុមរងនៃជនជាតិ Karenni ដែលជាក្រុមជនជាតិភាគតិចទីបេ-ភូមានៃប្រទេសមីយ៉ាន់ម៉ា។ ក្នុងអំឡុងចុងទសវត្សរ៍ឆ្នាំ ១៩៨០ ប្រជាជន Kayan ជាច្រើនបានភៀសខ្លួននៅភាគខាងជើងប្រទេសថៃ ខណៈដែលពួកគេបានគេចចេញពីជម្លោះរវាងកងទ័ពមីយ៉ាន់ម៉ា និងកងកម្លាំងឧទ្ទាម។ ដូច្នេះបច្ចុប្បន្នកុលសម្ព័ន្ធ Kayan គឺអាចរកឃើញទាំងនៅក្នុងប្រទេសមីយ៉ាន់ម៉ា និងប្រទេសថៃ ហើយស្ត្រីត្រូវបានគេទទួលស្គាល់ច្រើនបំផុតសម្រាប់ការតុបតែងខ្លួននៅជុំវិញ ក របស់ពួកគេ។

ស្ត្រីនៃកុលសម្ព័ន្ធ Kayan តែងពាក់ស្ពាន់នៅជុំវិញ ក របស់ពួកគេជាមួយទម្ងន់ ២០ គីឡូក្រាម ដោយពួកគេចាប់ផ្តើមពាក់ខ្សែទាំងនេះចាប់ពីអាយុ ៥ ឬ ៦ ឆ្នាំមកម្លេះ ហើយបន្តពាក់ខ្សែកស្ពាន់ជាបន្តបន្ទាប់។ មូលហេតុដែលពួកគេធ្វើបែបនេះគឺដោយសារពួកគេជឿថា ការពាក់ខ្សែកច្រើនជាន់ ឬហៅថា Dzilla គឺជានិមិត្តរូបនៃភាពស្រស់ស្អាត ខ្លាំងក្លា មានអំណាច អាចការពារពួកគេពីការវាយប្រហាររបស់ខ្លា ឈ្នះអស់មារសត្រូវ និងជានិមិត្តរូបនៃទ្រព្យសម្បត្តិ។ លើសពីនេះពួកគេក៏ជឿថា ទំនៀមទំលាប់ពាក់ខ្សែកច្រើនជាន់ ក៏ទាក់ទងនឹងពពួកអាទិទេពដែលមានពណ៌នាក្នុងសាសនាកាន់ក្វាន់ និងរឿងព្រេងភូមាផងដែរ។

ការពាក់ Dzilla មានប្រវត្តិតាំងពីយូរយារណាស់មកហើយ ដោយបន្តរហូតមកដល់បច្ចុប្បន្ននេះ បានកំពុងទាក់ទាញការចាប់អារម្មណ៍យ៉ាងខ្លាំងពីសំណាក់ភ្ញៀវទេសចរជុំវិញពិភពលោក។ ទោះជាយ៉ាងណា វប្បធម៌នេះហាក់ធ្លាក់ចុះបន្តិចម្តងៗដោយសារសម័យជឿនលឿន ពួកគេក៏ចាប់ផ្តើមផ្លាស់ប្តូររបៀបរស់នៅឱ្យទាន់នឹងសង្គមផងដែរ៕

Samsung ត្រូវបានគេនិយាយថានឹងមានគម្រោងកាត់បន្ថយបុគ្គលិកនៅអង្គភាពជុំវិញពិភពលោក រួមទាំងនាយកដ្ឋានមួយចំនួនដែលនឹងត្រូវកាត់បន្ថយចំនួន ៣០%។
យោងតាមការចុះផ្សាយរបស់ Reuters កាលពីថ្ងៃទី១១ ខែកញ្ញា ឆ្នាំ២០២៤ បានឱ្យដឹងថា ផែនការនេះនឹងអនុវត្តនៅចុងឆ្នាំនេះ ដោយអនុវត្តចំពោះបុគ្គលិកនៃ ក្រុមហ៊ុនបុត្រសម្ព័ន្ធ Samsung នៅអាមេរិក អឺរ៉ុប អាស៊ី និងអាហ្វ្រិក ដែលការកែសម្រួលនេះនឹងផ្តោតលើបុគ្គលិកផ្នែកលក់ និងទីផ្សារ ដោយកាត់បន្ថយប្រហែល ១៥% និងបុគ្គលិករដ្ឋបាលចំនួន ៣០% ។

ទោះជាយ៉ាងណាវាមិនច្បាស់ទេថាតើផែនការនេះនឹងត្រូវអនុវត្តនៅក្នុងទីផ្សារនីមួយៗរបស់ក្រុមហ៊ុន ឬត្រូវបានអនុវត្តនៅក្នុងប្រទេសកំណើតរបស់ខ្លួនគឺប្រទេសកូរ៉េដែរឬទេ។ ទោះបីជាយ៉ាងណាក៏ដោយ ប្រភពមួយបាននិយាយថា សំណើសម្រាប់ការកាត់បន្ថយបុគ្គលិកជាសកលបានចាប់ផ្តើមមកក្នុងរយៈពេលបីសប្តាហ៍មុន។ បុគ្គលិកកម្រិតមធ្យមជាច្រើននៅ Samsung India ត្រូវបានគេនិយាយថា បានទទួលប្រាក់បំណាច់ក្នុងប៉ុន្មានសប្តាហ៍ថ្មីៗនេះ។ ក្រុមហ៊ុនអាចនឹងបញ្ឈប់បុគ្គលិកប្រហែល ១,០០០ នាក់ក្នុងចំណោមបុគ្គលិក ២៥,០០០ នាក់នៅក្នុងទីផ្សារនេះ។ ទន្ទឹមនឹងនេះ នៅក្នុងប្រទេសចិន បុគ្គលិកផ្នែកលក់ប្រហែល ៣០% អាចនឹងត្រូវបញ្ឈប់ពីការងារផងដែរ។

យោងតាមរបាយការណ៍ គិតត្រឹមដំណាច់ឆ្នាំ ២០២៣ ក្រុមហ៊ុនអេឡិចត្រូនិកកូរ៉េ មានបុគ្គលិកសរុប ២៦៧,៨០០ នាក់ ក្នុងនោះ ១៤៧,០០០ នាក់ធ្វើការនៅបរទេស។ ការងារភាគច្រើននៅក្នុងផ្នែកផលិតកម្ម ការស្រាវជ្រាវ និងការអភិវឌ្ឍន៍ ខណៈដែលក្រុមលក់ និងទីផ្សារមានប្រហែល ២៥,១០០ នាក់ ហើយមនុស្ស ២៧,៨០០ នាក់ទៀតធ្វើការក្នុងផ្នែកផ្សេងទៀតនៃការងារ។ ក្រុមហ៊ុន Samsung មិនបានធ្វើអត្ថាធិប្បាយលើតួលេខនេះទេ ប៉ុន្តែបាននិយាយថា ការកែសម្រួលកម្លាំងពលកម្មនៅក្រៅប្រទេសរបស់ខ្លួន គឺដើម្បីធ្វើឱ្យប្រសើរឡើងនូវប្រសិទ្ធភាព ដោយអះអាងថា វានឹងមិនមានផលប៉ះពាល់ដល់ក្រុមផលិតរបស់ក្រុមហ៊ុននោះទេ។

ព័ត៌មានអំពីការកាត់បន្ថយបុគ្គលិកកើតឡើងនៅក្នុងបរិបទដែល Samsung កំពុងប្រឈមមុខនឹងបញ្ហាជាច្រើននៅក្នុងវិស័យដែលខ្លួនចូលរួម។ នៅក្នុងទីផ្សារស្មាតហ្វូន បន្ថែមពីលើ Apple ជាមួយ iPhone 16 ដែលទើបនឹងចេញថ្មី Samsung ក៏ប្រឈមមុខនឹងគូប្រជែងដែលត្រលប់មកវិញគឺ Huawei ខណៈពេលដែលចំណែកទីផ្សាររបស់ខ្លួនបានថយចុះមកតិចជាង ១% នៅក្នុងទីផ្សារចិនដែលមានប្រជាជនរាប់ពាន់លាននាក់។ យោងតាមប្រភពមួយចំនួន ការកាត់បន្ថយនេះអាចជាមធ្យោបាយមួយសម្រាប់ក្រុមហ៊ុនក្នុងការរៀបចំសម្រាប់ដំណាក់កាលដ៏អាប់អួរបន្ទាប់នៃទីផ្សារបច្ចេកវិទ្យាពិភពលោក នៅពេលដែលសេដ្ឋកិច្ចទូទៅលូតលាស់យឺត។ លើសពីនេះ វិធីសាស្ត្រនេះក៏ជួយសន្សំសំចៃថ្លៃដើម និងបង្កើនប្រាក់ចំណេញផងដែរ៕

មិនមែនសត្វទាំងអស់នៅផែនដីយើងសុទ្ធតែមានខួរក្បាលនោះទេ សត្វខ្លះក៏គ្មានខួរក្បាលដែរ ដូច្នេះតើពួកវារស់នៅយ៉ាងដូចម្តេច? ខួរក្បាល គឺជាបណ្ដុំណឺរ៉ូន‌ឯកទេសពោរពេញទៅដោយកោសិកាសរសៃប្រសាទ ដែលដើរតួនាទីយ៉ាងសំខាន់ក្នុងការត្រួតពិនិត្យ និងគ្រប់គ្រងមុខងារទាំងអស់នៃរាងកាយ។ មិនថាមនុស្ស ឬសត្វទេភាគច្រើនសុទ្ធតែមានខួរក្បាល ហើយសម្រាប់សត្វដែលគ្មានខួរក្បាលវិញនោះគឺមានទំនោរទៅជាសត្វសាមញ្ញបំផុត ដោយពួកវាប្រើលក្ខណៈជីវសាស្រ្តជាមូលដ្ឋានដើម្បីរស់។

មានន័យថា សត្វដែលគ្មានខួរក្បាលគឺវាមិនអាចចល័តបាននោះទេ គឺនៅតែមួយកន្លែង ខណៈសត្វដែលមានខួរក្បាលវិញគឺពួកវាអាចដើរចល័តបានគ្រប់ទើសទី។ នេះស្រដៀងនឹងបច្ចេកវិទ្យារបស់យើងដែរដូចជា កុំព្យូទ័រ ឬស្មាតហ្វូន ពួកវាមិនមានខួរក្បាលទេ ប៉ុន្តែមានលក្ខណៈពិសេសជាច្រើន។ ហេតុនេះសត្វដែលគ្មានខួរក្បាលក៏ដំណើរការក្នុងលក្ខណៈដូចគ្នា ដោយអនុញ្ញាតឱ្យពួកវាធ្វើកិច្ចការដែលពួកវាត្រូវការដើម្បីរស់។ ខាងក្រោមនេះគឺជាបញ្ជីសត្វចំនួន ៣ ដែលគ្មានខួរក្បាល៖

១. Starfish ឬត្រីផ្កាយ៖ គឺជាសត្វសមុទ្រមួយប្រភេទដែលមិនចេះហែលទឹក តែងតែរស់នៅបាតសមុទ្រមួយកន្លែង ហើយពេលខ្លះដោយសារបាតុភូតធម្មជាតិមួយចំនួន ក៏បានបោកបក់ពួកវាមកលើដីគោក ដែលមនុស្សភាគច្រើនតែងតែឃើញពួកវា។ Starfish ស៊ីសត្វល្អិតៗតូចៗដែលហោះក្បែរវាជាអាហារ ហើយវាប្រើឧបករណ៍ចាប់សញ្ញាជាមូលដ្ឋាន ដើម្បីប្រុងប្រយ័ត្នចំពោះសត្រូវ និងអាហារ។ សត្វនេះមានជាង ២០០០ ប្រភេទ ត្រូវបានគេរកឃើញវានៅគ្រប់សមុទ្រទាំងអស់ជុំវិពិភពលោកតែម្តង។

២. Jellyfish ឬចាហួយសមុទ្រ៖ គឺជាពពួកសត្វដែលគ្មានខួរក្បាល ដោយជារឿយៗពួកវាផ្លាស់ទីជាមួយចរន្តទឹកសមុទ្រ ហើយចំណាយជីវិតទាំងមូលរបស់ពួកវានៅកន្លែងតែមួយ។ ចាហួយសមុទ្រមានសមត្ថភាពរុញខ្លួនពួកវាទៅរកសត្វតូចៗជាអាហារ ដោយពួកវាអាចផ្លាស់ទីបានតិចតួច នៅពេលដែលពួកវាត្រូវបានសត្វសាហាវមកធ្វើបាប។ Jellyfish ក៏មានសមត្ថភាពបញ្ចេញក្លិនស្អុយ និងជាតិពុលដើម្បីសម្លាប់សត្រូវរបស់ពួកវាផងដែរ។

៣. Oysters៖ អយស្ទ័រដែលយើងញ៉ាំរាល់ថ្ងៃនេះ ពួកវាក៏គ្មានខួរក្បាលដែរ។ អយស្ទ័រមានឈ្មោះល្បីល្បាញសម្រាប់ការដាក់គុជខ្យងដ៏មានតម្លៃនៅក្នុងសម្បករបស់វា។ វាមិនត្រឹមជាអាហារឈ្ងុយឆ្ងាញ់របស់មនុស្សនោះទេ ថែមទាំងមានសមត្ថភាពផលិតគុជខ្យងយ៉ាងល្អឥតខ្ចោះទៀតផង។ Oysters ស៊ីពពួក Plankton ជាអាហារ ហើយពួកវាច្រោះទឹកបានរហូតដល់ ៥០ លីត្រក្នុងមួយថ្ងៃ ដោយផ្តល់ឱ្យពួកវានូវអាហារគ្រប់គ្រាន់សម្រាប់រយៈពេលយូរ៕