ការប្រគំតន្រ្តីទោល ឱក សុគន្ធកញ្ញា បញ្ចប់យ៉ាងរលូនខណៈអ្នកគាំទ្រចង់ឱ្យ មាស សុខសោភា ធ្វើម្តង

ទោះបីជាតម្លៃសំបុត្រការប្រគំតន្រ្តីទោលកំពូលតារាចម្រៀង ឱក សុគន្ធកញ្ញា មានភាពចម្រូងចម្រាសបន្តិចក្តីប៉ុន្តែបញ្ចប់ទៅដោយភាពរលូនមានទស្សនិកជនចូលរួមគាំទ្រស្រែកច្រៀងតាមពេញហ៊ល។ ក្រោយបញ្ចប់ការប្រគំតន្រ្តីរបស់អ្នកនាង ឱក សុគន្ធកញ្ញា ភ្លាមហ្វេនៗក៏ដូចជាបុគ្គលល្បីឈ្មោះ Peypey Dy និងអ្នកនាង ផន សុផារី ជាដើមចង់ឱ្យអ្នកបន្ទាប់មានការប្រគំតន្រ្តីបែបនេះគឺជាតារាចម្រៀង មាស សុខសោភា។

នៅរាត្រីថ្ងៃទី១៤ ខែកញ្ញា ការប្រគំតន្រ្តីទោលរបស់អ្នកនាង ឱក សុគន្ធកញ្ញា កំពូលតារាចម្រៀងប្រចាំផលិតកម្មរស្មីហង្សមាសបានប្រព្រឹត្តទៅសាលមហោស្រពកោះពេជ្រ មានឆាកដ៏ទំនើប៣៦០ដឺក្រេដំបូងគេនៅស្រុកខ្មែរប្រកបដោយផាសុកភាព មានការចូលរួមពីតារាល្បីៗជាច្រើននាក់ចូលរួម បុគ្គលមានឥទ្ធិពលនៅលើបណ្តាញសង្គមជាដើម។ តាមរយៈរូបភាពនិងវីដេអូរបស់ហ្វេនៗចែករំលែកកំពូលតារាចម្រៀងរូបនេះពិតជាមិនធ្វើឱ្យអ្នកគាំទ្រខកបំណងសម្រាប់ការចូលរួមមានការច្រៀងផ្ទាល់រហូតដល់៣៧បទ មានចង្វាក់គ្រប់ប្រភេទដែលមានថេរៈវេលាជាង៣ម៉ោង។

រយៈពេលនៃការប្រគំតន្រ្តីទោលរបស់អ្នកនាង ឱក សុគន្ធកញ្ញា គឺពោរពេញដោយភាពសប្បាយរីករាយអមដោយការរំភើបព្រោះនេះជាអ្វីដែលអ្នកគាំទ្រចង់ឃើញមកជាយូរហើយ ខណៈនៅចុងបញ្ចប់នៃកម្មវិធី គឺសមាជិកគ្រួសាររបស់តារាចម្រៀងរូបនេះបានចូលរួមស៊ុបប្រាយថ្ងៃកំណើតអ្នកនាងផងដែរ។ សេចក្តីស្រលាញ់ពីហ្វេនៗតារាចម្រៀង ឱក សុគន្ធកញ្ញា ក៏បានលុតជង្គង់សំពះអរគុណហ្វេនៗដែលបានធ្វើឱ្យក្តីសុបិននៃការប្រគំតន្រ្តីនេះលកើតឡើងចំពោះរូបអ្នកនាងផ្ទាល់។ ការប្រគំតន្រ្តីទោលបញ្ចប់ទៅដោយរលូនរបស់តារាចម្រៀង ឱក សុគន្ធកញ្ញា ស្រាប់តែហ្វេនៗជាច្រើនបានសំណូមពរដល់តារាចម្រៀង មាស សុខសោភា មានការប្រគំតន្រ្តីផ្ទាល់ខ្លួនវិញម្តងក្នុងនោះក៏មានបុគ្គលល្បីចង់ឱ្យរឿងនេះកើតឡើងដូចគ្នា។

Peypey បានបង្ហោះនៅលើបណ្តាញសង្គមនៅថ្ងៃទី១៥ ខែកញ្ញា ដោយបានបង្ហាញសារឆាតទៅតារាចម្រៀង មាស សុខសោភា និងបានដាក់ចំណងជើងថា «ព្យាយាមម្តងទៀតសិន ក្រែងបានស្រែកជុំគ្នាទៀត ម៉ាក់ភា ទំលាក់SOLO Concertដែរមក»។ គួរឱ្យដឹងថា Peypey Dy នេះឯងជាអ្នកផ្តើមគំនិតឱ្យតារាចម្រៀង ឱក សុគន្ធកញ្ញា មានការប្រគំតន្រ្តីនេះឡើង។

ងាកទៅកាន់អ្នកនាង ផន សុផារី វិញបានបង្ហោះរូបអ្នកនាង មាស សុខសោភា បានដាក់ខ្លឹមសារថា បើសិនidol Meas Soksophea ចេញsolo concert អ្នកនាងនឹងស្រែកឱ្យបែកក្រឡើត ខណៈបានរៀបរាប់បទល្បីៗរបស់តារាចម្រៀងរូបនេះផងដែរ៕