នៅពេលនិយាយពីរថយន្តទំនើប ទាន់សម័យ និងមានតម្លៃថ្លៃលោកអ្នកប្រាកដជាគិតថាជារថយន្ត Cybertruck, Bugatti, Ferrari, Koenigsegg និង Pagani ហើយ…ប៉ុន្តែការគិតទាំងនេះគឺខុសស្រឡះ ដោយសាររយន្តដែលអ្នកគិតនោះគឺមិនជាថ្លៃពេកនោះទេ ប៉ុន្តែរថយន្តខាងក្រោមនេះវិញទេដែលថ្លៃជាងគេបំផុតក្នុងលោក ទោះធ្វើការ ១០-២០ ឆ្នាំខាងមុខទៀតក៏គ្មានលុយទិញដែរ ហើយក៏មិនហ៊ានប្រាថ្នាខ្ពស់ពេកដែរ ប៉ុន្តែប្រសិនបើអ្នកស្រឡាញ់ហើយ ត្រូវតែព្យាយាមយកវាឱ្យបាន។ ខាងក្រោមនេះគឺជាប្រភេទរថយន្តដែលមានតម្លៃថ្លៃជាងគេបំផុតនៅលើភពផែនដី៖

១.Rolls-Royce La Rose Noire Droptail៖ Rolls-Royce បានបញ្ចេញរថយន្តមួយគ្រឿងដែលមានឈ្មោះថា La Rose Noire Droptail ផលិតឡើងដោយក្រុមហ៊ុន Rolls-Royce Motor Cars ។ វាត្រូវបានណែនាំនៅក្នុងខែសីហា ឆ្នាំ ២០២៣ ជាមួយតម្លៃរហូតដល់ទៅ ៣២ លានដុល្លារអាមេរិក គឺជារថយន្តថ្លៃជាងគេបំផុតក្នុងចំណោមរថយន្តប្រណិតៗទាំងអស់នៅលើពិភពលោក ហើយមានតែ ៤ គ្រឿងប៉ុណ្ណោះ។

២.Rolls-Royce Boat Tail៖ ជាមួយនឹងតម្លៃរហូតដល់ទៅ ២៨ លានដុល្លារអាមេរិក បានធ្វើឱ្យ Rolls-Royce Boat Tail ក្លាយជារថយន្តថ្លៃជាងគេទីពីរនៅលើពិភពលោកសម្រាប់ឆ្នាំ ២០២៤។ រថយន្តនេះមានផ្នែកខាងក្រៅពីរពណ៌គឺខៀវ និងខ្មៅដ៏ភ្លឺចែងចាំង បូករួមនឹងលក្ខណៈពិសេសជាច្រើនរាប់មិនអស់។

៣.Bugatti La Voiture Noire៖ គឺជារថយន្តស៊េរីថ្មីដែលទំនើប និងប្រណីតបំផុតរបស់ក្រុមហ៊ុនផលិតរថយន្តបារាំង Bugatti ជាមួយតម្លៃខ្ពស់បំផុតមិនធ្លាប់មានរហូតដល់ ១៣,៤ លានដុល្លារអាមេរិក។ សម្រាប់លក្ខណៈពិសេសរបស់វាគឺមានរូបរាងកាយ រហ័សរហួន ថ្មីស្រឡាង នៅក្នុងសរសៃកាបូន ភ្លឺចាំង គឺធ្វើឡើងដោយដៃទាំងស្រុងនៅរោងចក្រ Bugatti ក្នុងទីក្រុង Alsace ប្រទេសបារាំង រួមទាំងមានភាពអស្ចារ្យជាច្រើនទៀត។

៤.Rolls-Royce Sweptail៖ ចំណាត់ថ្នាក់លេខ ៤ គឺបានទៅលើប្រភេទរថយន្ត Rolls-Royce ទៀតហើយ ដោយរថយន្តប្រណីត Rolls-Royce Sweptail មានតម្លៃរហូតដល់ ១២,៨ លានដុល្លារអាមេរិក ជាមួយកម្លាំង ៤៥៣ សេះ និងមានលក្ខណៈពិសេសជាច្រើនផ្សេងទៀតរាប់មិនអស់។

៥. Bugatti Centodieci៖ Bugatti Centodieci ត្រូវបានបង្ហាញខ្លួនជាផ្លូវការកាលពីឆ្នាំ ២០២០ កន្លងទៅ ហើយវាមានតម្លៃខ្ទង់ ៩ លានដុល្លារ សម្រាប់មួយគ្រឿងគឺជារថយន្តទំនើបនិងថ្លៃជាងគេបំផុតទី ៥ នៅលើពិភពលោក។ Bugatti Centodieci បានបំពាក់ម៉ាស៊ីន 8L W16 មានសមត្ថភាពអាចបង្កើតកម្លាំងអតិបរមាបាន ១,១៧៥ kW (1,577hp) ជាមួយកម្លាំងបង្វិលកង់អតិបរមា ១,៦០០ N⋅m និងមានល្បឿនអតិបរមា ៥២៤ km/h (326mph) ក៏ដូចជាអាចស្ទុះពី ០ ទៅដល់ ៩៦ km/h (60mph) ចំណាយពេលខ្ទង់ ២.៤ វិនាទីប៉ុណ្ណោះ៕

ក្រុមអ្នកវិទ្យាសាស្ត្រដែលមកពីសកលវិទ្យាល័យ Complutense នៃទីក្រុងម៉ាឌ្រីដ ប្រទេសអេស្ប៉ាញ បានរកឃើញថា ភពផែនដីរបស់យើងអាចនឹងមានព្រះច័ន្ទថ្មីមួយទៀត ដែលនឹងគោចរជុំវិញផែនដីចាប់ពីខែកញ្ញាដល់ខែវិច្ឆិកា ត្រូវបានគេស្គាល់ថាជាព្រះច័ន្ទទីពីរ។

យោងតាមការចុះផ្សាយរបស់ Earth Sky កាលពីពេលថ្មីៗនេះបានឱ្យដឹងថា ព្រះច័ន្ទទីពីរនោះតាមពិតទៅគឺជាអាចម៍ផ្កាយដែលមានអង្កត់ផ្ចិតប្រហែល ១០ ម៉ែត្រមានឈ្មោះថា 2024 PT5 ត្រូវបានគេរកឃើញនៅថ្ងៃទី ៧ ខែសីហា ឆ្នាំ ២០២៤ ដោយវានឹងវិលជុំវិញផែនដីចាប់ពីថ្ងៃទី ២៩ ខែកញ្ញា រហូតដល់ថ្ងៃទី ២៥ ខែវិច្ឆិកា ឆ្នាំ ២០២៤។

ហើយអ្នកវិទ្យសាស្ត្រនឹងអាចឃើញព្រះច័ន្ទពីរវិលជុំវិលផែនដីក្នុងពេលតែមួយ ដែលនេះគឺជាព្រឹត្តិការណ៍សេឡេស្ទាលដ៏កម្របំផុត បង្ហាញពីថាមពលនៃទំនាញផែនដី។ ទោះជាយ៉ាងណាមនុស្សមិនអាចឃើញព្រះច័ន្ទពីរដោយភ្នែកទទេរបាននោះទេ ដោយសារវាមានភាពស្រអាប់ខ្លាំងពេកក្នុងការសង្កេតមើលដោយភ្នែកទទេ ឬតេឡេស្កុបភាគច្រើន។ ជាមួយនឹងទំហំ ២២ រ៉ិចទ័រ អាចម៍ផ្កាយ 2024 PT5 នឹងអាចមើលឃើញតែចំពោះអ្នកសង្កេតការណ៍កម្រិតខ្ពស់ប៉ុណ្ណោះ។

ការរកឃើញអាចម៍ផ្កាយ 2024 PT5 ដែលនឹងវិលជុំវិញផែនដីនេះបានផ្តល់នូវការយល់ដឹងដ៏មានតម្លៃជាច្រើនចំពោះសក្ដានុពលនៃវត្ថុនៅជិតផែនដី។ វាអាចជួយអ្នកតារាវិទូកែលម្អគំរូនៃអន្តរកម្មទំនាញ និងកែលម្អការព្យាករណ៍សម្រាប់របៀបដែលអាចម៍ផ្កាយផ្សេងទៀតអាចមានឥរិយាបទនៅពេលឆ្លងកាត់ជិតភពផែនដីរបស់យើង។ ដូច្នេះយើងអាចដឹងរឿងអាថ៌កំបាំងជាច្រើនអំពីភពផែនដី ហើយនឹងមានឱកាសស្រាវជ្រាវលំហកាន់តែស៊ីជម្រៅសម្រាប់គោលបំណងសាងសង់លំនៅដ្ឋាននៅលើភពផ្សេងៗក្រៅពីផែនដី។

មូលហេតុដែលគេហៅអាចម៍ផ្កាយ 2024 PT5 ថាជាព្រះច័ន្ទតូច ឬព្រះច័ន្ទទីពីរគឺដោយសារវាជាវត្ថុមួយនៅជិតផែនដី មានលក្ខណៈសម្បត្តិស្រដៀងព្រះច័ន្ទ និងជាផ្នែកមួយនៃបណ្តុំដែលមានគន្លងស្រដៀងនឹងផែនដី។ ហើយល្បឿនទាបរបស់វា នឹងអនុញ្ញាតឱ្យទំនាញផែនដីផ្លាស់ប្តូរផ្លូវរបស់វាជាបណ្តោះអាសន្ន ដែលបណ្តាលឱ្យវាក្លាយជាព្រះច័ន្ទតូច ឬព្រះច័ន្ទទីពីរនេះឯង។ បន្ទាប់ពីវាបានវិលជុំផែនដីក្នុងរយៈពេលពីរខែរួច 2024 PT5 នឹងរួចផុតពីឥទ្ធិពលទំនាញផែនដី ហើយនឹងត្រឡប់ទៅគោចរជុំវិញព្រះអាទិត្យវិញ៕

ប្រទេសចិន៖ បន្ទាប់ពីរងគ្រោះដោយសារឥទ្ធិពលព្យុះយ៉ាហ្គីយ៉ាងធ្ងន់ធ្ងរ ឥឡូវនេះប្រទេសចិនក៏កំពុងប្រឈមមុខនឹងឥទ្ធិពលព្យុះទីហ្វុង Bebinca វិញម្តងដែលនឹងបោកបក់មកដល់ប្រទេសនេះក្នុងពេលឆាប់ៗ។ ទោះជាយ៉ាងណាប្រទេសមហាអំណាចទី ២ បាននឹងសាងសង់មូលដ្ឋាននៅលើឋានព្រះច័ន្ទជាបណ្តើរៗហើយ ក្នុងគោលបំណងនាំយកមនុស្សទៅរស់នៅលើភពព្រះច័ន្ទ ដើម្បីជៀសវាងពីគ្រោះមហន្តរាយផ្សេងៗ។

នេះបើយោងតាម Live Science ដែលបានចុះផ្សាយកាលពីថ្ងៃទី១៥ ខែកញ្ញា ឆ្នាំ២០២៤ ថាប្រទេសចិនបានបង្ហាញផែនការសាងសង់មូលដ្ឋាននៅលើប៉ូលខាងត្បូងរបស់ព្រះច័ន្ទនៅឆ្នាំ ២០៣៥ ដោយទីបំផុតបានបង្កើតចំណុចតភ្ជាប់ជាបន្តបន្ទាប់នៅលើផ្ទៃភពផែនដីហើយ។ ផែនទីថ្មីនេះគឺជាភាពដៃគូរវាងប្រទេសចិន និងរុស្ស៊ី ដែលប្រទេសទាំងពីរបានប្រកាសពីគម្រោងសាងសង់មូលដ្ឋានមេកានិចនៅភពព្រះច័ន្ទ ដែលដំណើរការដោយមនុស្សយន្តតាមរយៈរ៉ុក្កែតធុនធ្ងន់ចំនួនប្រាំ និងបើកដំណើរការរវាងឆ្នាំ ២០៣០ និងឆ្នាំ ២០៣៥។

បច្ចុប្បន្នប្រទេសចិនបាននាំមុខគេលើគម្រោងនេះហើយ ដោយបានបង្ហាញពីផែនការជាបន្តបន្ទាប់ចំនួនពីរដំណាក់កាល ដែលដំណាក់កាលដំបូងនឹងត្រូវបញ្ចប់នៅប្រហែលឆ្នាំ ២០៣៥ នៅជិតប៉ូលខាងត្បូងរបស់ព្រះច័ន្ទ ហើយដំណាក់កាលទីពីរស្ថានីយ៍ស្រាវជ្រាវព្រះច័ន្ទអន្តរជាតិ (ILRS) នឹងសាងសង់គំរូពង្រីកនៅឆ្នាំ ២០៥០ ដែលគំរូពង្រីកនេះនឹងក្លាយជា “បណ្តាញស្ថានីយ៍ដែលប្រើគន្លងព្រះច័ន្ទជាមជ្ឈមណ្ឌល និងស្ថានីយប៉ូលខាងត្បូងជាមូលដ្ឋានសំខាន់ ហើយវានឹងរួមបញ្ចូលកន្លែងរុករកនៅលើអេក្វាទ័រតាមច័ន្ទគតិ និងផ្នែកឆ្ងាយនៃព្រះច័ន្ទ”។

យោងតាមលោក Wu Yanhua ប្រធានអ្នករចនាគម្រោងរុករកអវកាសរបស់ប្រទេសចិន ក៏បាននិយាយដែរថា គំរូស្ថានីយ៍ស្រាវជ្រាវព្រះច័ន្ទអន្តរជាតិ (ILRS) ដែលបានពង្រីកនេះ ក៏នឹងជួយដាក់គ្រឹះសម្រាប់ការចុះចតមនុស្សនៅលើភពអង្គារនាពេលអនាគតផងដែរ។ គួរបញ្ជាក់ដែរថា ប្រទេសចិនបាននឹងកំពុងទាក់ទាញដៃគូជាច្រើនសម្រាប់គម្រោង ILRS។ ក្នុងអំឡុងសន្និសីទនោះ ប្រទេសសេណេហ្គាល់គឺបានក្លាយជាប្រទេសទី ១៣ ហើយដែលចូលរួមក្នុងគម្រោងនេះ។ ទន្ទឹមនឹងនេះអង្គការ NASA ក៏កំពុងដឹកនាំ Artemis ដែលជាកម្មវិធីស្របគ្នា ដើម្បីបញ្ជូនមនុស្សទៅឋានព្រះច័ន្ទផងដែរ។ ដូច្នេះហើយទាំងចិន និងអាមេរិក គឺសុទ្ធតែមានគោលបំណងបញ្ជូនអវកាសយានិកទៅឋានព្រះច័ន្ទមុនដំណាច់ទសវត្សរ៍នេះ៕

វត្តមានរបស់ Speed នៅលើទឹកដីអង្គរ កាលពីយប់មិញនេះរយៈពេលតែប៉ុន្មានម៉ោង ប៉ុន្តែបានធ្វើឲ្យកម្ពុជាចំណេញមិនស្ទើរទេ ក្នុងការបង្ហាញអត្តសញ្ញាណជាតិចំនួន ៣ ធំៗ ទៅកាន់ពិភពលោក ដែលរួមមានទង់ជាតិខ្មែរ អប្សរា និងនំអាកោរត្នោត។

កាលពីថ្ងៃទី ១៦ ខែកញ្ញាម្សិលមិញនេះ ក្នុងព្រឹត្តិការណ៍ Gumball 3000 នៅលើទឹកដីនៃខេត្តសៀមរាប, វត្តមានរបស់ IShowSpeed បានបង្កឲ្យមានការចាប់អារម្មណ៍យ៉ាងខ្លាំង។ ខណៈលោកក៏បានធ្វើការ Stream នៅលើ Channel YouTube ផ្លូវការរបស់លោកដែលមានអ្នកទស្សនារហូតដល់ទៅរាប់សែននាក់ តាមបណ្តាប្រទេសនានាជុំវិញសកលលោក។

អ្វីដែលធ្វើឲ្យគ្រប់គ្នាចាប់អារម្មណ៍ខ្លាំងនោះ នៅក្នុងការឡាយ Speed បានធ្វើការលើកបង្ហាញទង់ជាតិខ្មែរពេញៗដៃ ដោយទឹកមុខញញឹមស្រស់បំព្រង ហាក់មានមោទនភាពយ៉ាងខ្លាំង ព្រមជាមួយនឹងវត្តមានកូនខ្មែរគ្រប់ៗរូបនៅទីនោះ។ បន្ថែមពីនេះ Speed ក៏បានធ្វើការភ្លក់នំអាកោរត្នោតរបស់ខ្មែរ ថែមទាំងលាន់មាត់សរសើរនិងទឹកមុខសរបញ្ជាក់ថា លោកមិនដែលទទួលទាននំណាឆ្ងាញ់បែបនេះពីមុនមកនោះទេ។ កាន់តែពិសេស តួអង្គអប្សរា តំណាងវប្បធម៌ខ្មែរ ក៏បានបង្ហាញខ្លួនក្នុងការឡាយជាមួយនឹង Speed ផងដែរ។

យ៉ាងណាមិញ ១០ ប្រទេសនៅក្នុងអាស៊ាន គឺមានតែកម្ពុជាមួយទេ ដែល Speed បានលើកយកទង់ជាតិមកបង្ហាញពេញៗដៃបែបនេះ អាចចាត់ទុកថាជាកិត្តិយស និងជាការផ្សព្វផ្សាយទៅកាន់ពិភពលោកឲ្យបានស្គាល់និងឈ្វេងយល់ពីកម្ពុជាកាន់តែច្រើនឡើង។

គួរបញ្ជាក់ថា ទឹកដីអច្ឆរិយៈខេត្តសៀមរាប ក៏បានធ្វើឲ្យ Speed សម្រេចតាមបំណង ទទួលបានបាន ៣០ លាន Subscriber លើ YouTube ដែលបណ្តាលឲ្យលោកសប្បាយចិត្តចិត្តឥតឧបមា ហើយលោកក៏បានធ្វើការអរគុណចំពោះប្រទេសកម្ពុជា ប្រទេសតំបន់អាស៊ី និងប្រទេសនានាជុំវិញសកលលោក ហើយលោកប្តេជ្ញាថានឹងយកនឹង ៤០ លាន Subscriber ឲ្យបានក្នុងឆ្នាំ ២០២៥ ផងដែរ៕

ប្រទេសជប៉ុន ៖ Influencer ជនជាតិជប៉ុនម្នាក់រៀបរាប់ថា នាងបានចំណាយប្រាក់អស់ជាង២០លានយ៉េន (ឬជាង១៤ម៉ឺនដុល្លារអាមេរិក) ដើម្បីវះកាត់មុខមាត់របស់ខ្លួនឱ្យក្លាយជាស្រីស្អាត ដោយសារមិត្តភក្តិចំអ.ន់ ខ្លាំងពេក ។ ក្រោយវះកាត់រួច ជីវិតរបស់នាងក៏បានផ្លាស់ប្តូរក្លាយជាមនុស្សថ្មីម្នាក់ទៀតមិនគួរឱ្យជឿ ហើយនាងទទួលបានឱកាសការងារល្អៗផងដែរ ។

យុវតីរូបនេះឈ្មោះ Hirase Airi បានបង្ហោះរូបភាពរបស់ខ្លួនកាលពីមុន និងក្រោយពេលវះកាត់រួច ដើម្បីប្រៀបធៀបគ្នាក្នុង YouTube កាលពីប៉ុន្មានខែមុន ។ វាធ្វើឱ្យអ្នកគាំទ្រនាងក្នុងបណ្តាញសង្គមភ្ញាក់ផ្អើលយ៉ាងខ្លាំងពីរូបសម្ឆស្សរបស់នាងផ្លាស់ប្តូរខ្លាំងបែបនេះ ។

នាងរៀបរាប់ថា តាំងពីក្មេងរហូតដល់ធំ នាងត្រូវបានមិត្តភក្តិចំអន់ថា មុខមិនស្អាតសោះ ។ នាងក៏ប្រាប់ខ្លួនឯងថា ពេលធំឡើង និងមានប្រាក់គ្រប់គ្រាន់ នាងនឹងផ្លាស់ប្តូរមុខមាត់ខ្លួនឯង ។ ក្រោយបញ្ចប់ការសិក្សាកម្រិតមធ្យមសិក្សា នាងក៏ចាប់ផ្តើមធ្វើការ និងទទួលបានប្រាក់ខែមិនច្រើនទេ ដូចជា ៖ ការងារសន្តិសុខ និងភ្នាក់ងារជញ្ជូនសម្ភារៈ ។ ប៉ុន្តែនាងបានសន្សំសំចៃប្រាក់រហូតមក ដើម្បីវះកាត់មុខមាត់អាក្រក់ ។

ពេលសន្សំប្រាក់បាន១០លានយ៉េន នាងក៏សម្រេចចិត្តទៅហាងកែសម្ឆស្សជាលើកដំបូង ហើយក៏វះកាត់ជាបន្តបន្ទាប់ រហូតដល់អស់ប្រាក់ចំនួន២០លានយ៉េន ។ ប៉ុន្តែនាងប្រាប់ថា បើទោះចំណាយប្រាក់ច្រើនក្តី តែនាងចំណេញបានកើតជាមនុស្សថ្មីម្តងទៀត ព្រោះកន្លងមក នាងធ្លាប់ធ្វើការបានប្រាក់ខែតិចតួច ប៉ុន្តែពេលនេះ នាងមានឱកាសបង្ហាញមុខតាមទូរទស្សន៍ល្បីៗ និងក្លាយជាអាយដលរបស់មនុស្សរាប់លាននាក់ ។

ទោះបីមតិខ្លះលើកឡើងថា ការកែសម្ឆស្សនឹងមានគ្រោះថ្នាក់ និងចំណាយប្រាក់ច្រើនក្តី ប៉ុន្តែនាងគិតខុសពីនេះ ហើយនាងគាំទ្រឱ្យនារីៗកែសម្ឆស្ស បើយល់ថាខ្លួនមានចំណុចខ្វះខាត ។ នាងថា នារីៗគួរតែសាកល្បងកែសម្ឆស្ស ដើម្បីផ្តល់ទំនុកចិត្តដល់ខ្លួនឯង ។

បច្ចុប្បន្ន នាង Hirase Airi មានចំនួនអ្នកតាមដានក្នុងបណ្តាញសង្គមរហូតដល់ជាង២លាននាក់ ហើយនាងត្រូវបានគេអញ្ជើញឱ្យទៅចូលរួមកម្មវិធីទូរទស្សន៍ជាញឹកញាប់ ។ ក្នុងកម្មវិធីប្រកួតផ្សេងៗ នាងតែងតែផ្តល់កម្លាំងចិត្តដល់អ្នកមានមុខមាត់មិនស្អាត ឬមិនសង្ហាថា នាងជាភស្តុតាងមានជីវិតដែលអាចបញ្ជាក់ថា ការកែសម្ឆស្សពិតជាអាចផ្លាស់ប្តូរជីវិតមនុស្សឱ្យល្អប្រសើរ ៕

ប្រទេសមីយ៉ាន់ម៉ា ៖ ទីក្រុងណៃពិដោ ប្រទេសមីយ៉ាន់ម៉ា បានលិចទឹកខ្លាំងក្រោយពីភ្លៀងចាប់ផ្តើមធ្លាក់ខ្លាំងតាំងពីថ្ងៃទី៩ ខែកញ្ញា ហើយរហូតមកដល់ថ្ងៃទី១១ ខែកញ្ញា ទឹកលិចខ្លាំងដល់កម្ពស់៥ម៉ែត្រនៅតំបន់ខ្លះ ដោយសារឥទ្ធិពលខ្យល់ព្យុះ Yagi ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១២ ខែកញ្ញា ឆ្នាំ២០២៤ ។

ទឹកជំនន់បានលិចដល់ដំបូលផ្ទះពលរដ្ឋរាប់រយខ្នងនៅទីក្រុងណៃពិដោ រីឯផ្ទះមួយចំនួនទៀតបានខូចខាត និងបាក់រលំដោយសារកម្លាំងទឹកហូរ ។ ពលរដ្ឋរាប់ពាន់នាក់ពុំអាចចាកចេញពីតំបន់ទឹកជំនន់បានទេ ហើយពួកគេបានអង្គុយលើដំបូលផ្ទះរបស់ខ្លួនរង់ចាំអាជ្ញាធរមកជួយសង្គ្រោះ ។

ពលរដ្ឋមីយ៉ាន់ម៉ាបានរាយការណ៍មកវិទ្យុបរទេសថា ពួកគេនៅជាប់លើដំបូលផ្ទះ ដោយសារទឹកជំនន់ហូរមកភ្លាមៗពុំអាចចាកចេញបាន ។ បើទោះជាពួកគេព្យាយាមទូរស័ព្ទប្រាប់អាជ្ញាធរឱ្យមកជួយសង្គ្រោះជាច្រើនលើកក្តី ប៉ុន្តែពុំឃើញអាជ្ញាធរមកជួយទេ ។

ដោយឡែក រដ្ឋឆាន ស្ថិតនៅភាគខាងជើងប្រទេសមីយ៉ាន់ម៉ា ក៏រងគ្រោះដោយសារទឹកជំនន់ដូចគ្នាដែរ ហើយពលរដ្ឋរស់នៅរដ្ឋនេះគ្មានអគ្គិសនីប្រើប្រាស់ និងខ្វះការទំនាក់ទំនងជាមួយអាជ្ញាធរ ។

រីឯរដ្ឋកាឈីន ស្ថិតនៅភាគខាងត្បូងប្រទេសវិញ ទឹកទន្លេមឺយ បានហក់ឡើងខ្ពស់បណ្តាលឱ្យលិចផ្ទះពលរដ្ឋក្នុងទីក្រុងមីវវ៉ាឌី ដែលជាទីក្រុងជាយដែនរបស់មីយ៉ាន់ម៉ា តាំងពីថ្ងៃទី១០ ខែកញ្ញា កន្លងមក ។ ពលរដ្ឋនាំគ្នាជម្លៀសចេញពីផ្ទះទៅរស់នៅតាមវត្ត និងសាលារៀនបណ្តោះអាសន្ន ហើយជំហ៊ានដំបូង មានពលរដ្ឋប្រមាណ៥.០០០នាក់ បានរងគ្រោះដោយសារទឹកជំនន់ ។

ក្រុមភ្នាក់ងារសង្គ្រោះដែលបានចុះជួយជនរងគ្រោះដោយសារទឹកជំនន់នៅទីក្រុងមីវវ៉ាឌី និយាយថា ទឹកបានកើនឡើងខ្ពស់យ៉ាងឆាប់រហ័ស ហើយហូរខ្លាំងបំផុត ដែលពួកគេពុំធ្លាប់ឃើញពីមុន នៅទីក្រុងមីវវ៉ាឌី ។ ដូចគ្នានេះ នៅតំបន់ទំនាប ទឹកបានលិចដល់ដំបូលផ្ទះ ហើយអាជ្ញាធរសន្និដ្ឋានថា ទឹកជំនន់នឹងលិចរហូតដល់តំបន់ដីសណ្តភាគខាងត្បូងប្រទេស ដោយសារទឹកបានហូរតាមទន្លេអ៊ីរ៉ាវ៉ាឌី ។

រហូតមកដល់ថ្ងៃទី១២ ខែកញ្ញា វិទ្យុបរទេសពុំអាចទាក់ទងជាមួយភ្នាក់ងារគ្រប់គ្រងគ្រោះមហន្តរាយរបស់រដ្ឋាភិបាលយោធាមីយ៉ាន់ម៉ា ដើម្បីសាកសួរព័ត៌មានស្ថានការណ៍ទឹកជំនន់ និងការជួយសង្គ្រោះពលរដ្ឋនៅឡើយទេ ៕

ប្រទេសសិង្ហបុរី ៖ យោងតាមរបាយការណ៍របស់ BloombergNEF បង្ហាញថា ប្រទេសសិង្ហបុរីបានកំណត់គោលដៅប្រើប្រាស់រថយន្តអគ្គិសនីឯកជនច្រើនជាងគេក្នុងតំបន់អាស៊ីអាគ្នេយ៍ នៅឆ្នាំ២០៤០ ឬរយៈពេល១៦ឆ្នាំទៀត ។

របាយការណ៍នេះបញ្ជាក់ថា រថយន្តឯកជនប្រមាណជាង៨០% នៅសិង្ហបុរីនឹងផ្លាស់ប្តូរជារថយន្តអគ្គិសនីនៅឆ្នាំ២០៤០ បើធៀបនឹងមធ្យមភាគប្រើប្រាស់រថយន្តអគ្គិសនីក្នុងតំបន់ គឺស្មើត្រឹមតែ២៤% ប៉ុណ្ណោះ ។ បន្ទាប់មក គឺប្រទេសថៃស្ថិតក្នុងចំណាត់ថ្នាក់ទី២ ស្មើ៤១%, វៀតណាម ស្មើ៣១%, ឥណ្ឌូណេស៊ី ស្មើ២៥%, ម៉ាឡេស៊ី ស្មើ១៥% និងហ្វីលីពីន ស្មើ១០% ។

ប្រទេសសិង្ហបុរីបានប្រើប្រាស់រថយន្តអគ្គិសនីច្រើនជាងគេ ក្នុងចំណោមប្រទេសអាស៊ានទាំងនេះ ។ ជាក់ស្តែង កាលពីឆ្នាំ២០២៣ ការប្រើប្រាស់រថយន្តអគ្គិសនីស្មើប្រមាណ១៩% នៃចំនួនរថយន្តសរុបដែលលក់នៅប្រទេសសិង្ហបុរី ។

លោកស្រី Komal Kareer អ្នកសរសេររបាយការណ៍រថយន្តអគ្គិសនីនៅសិង្ហបុរីនិយាយថា ថ្មរថយន្តអគ្គិសនីមានតម្លៃថោកនឹងជួយកាត់បន្ថយការចំណាយដើមទុន ។ វាធ្វើឱ្យរថយន្តអគ្គិសនីអាចប្រកួតប្រជែងជាមួយរថយន្តប្រើប្រាស់ប្រេងឥន្ធនៈបាន ។

កាលពីឆ្នាំ២០២៣ ចំនួនលក់រថយន្តអគ្គិសនីឯកជននៅតំបន់អាស៊ីអាគ្នេយ៍បានកើនឡើងរហូតដល់៣ដង អស់រយៈពេល២ឆ្នាំជាប់ៗគ្នា ដោយសារគោលនយោបាយគាំទ្រ និងការកើនឡើងរបស់ក្រុមហ៊ុនផលិតរថយន្តចិនក្នុងតំបន់ ។ ក្រុមហ៊ុនទាំងនេះទទួលបានការបន្ធូរបន្ថយពន្ធ និងគោលនយោបាយផ្សេងៗពីរដ្ឋាភិបាលបណ្តាប្រទេសអាស៊ាន ។

មូលហេតុចម្បងធ្វើឱ្យការប្រើប្រាស់រថយន្តអគ្គិសនីនៅសិង្ហបុរីកើនឡើង គឺដោយសាររដ្ឋាភិបាលសិង្ហបុរីផ្តល់សិទ្ធិទៅឱ្យម្ចាស់យានយន្ត ហើយគាំទ្រម្ចាស់រថយន្តអាចផ្លាស់ប្តូររថយន្តរបស់ខ្លួនរៀងរាល់១០ឆ្នាំម្តង ។ ផ្ទុយពីនេះ ប្រទេសផ្សេងៗក្នុងតំបន់អាស៊ីអាគ្នេយ៍ គឺម្ចាស់រថយន្តនឹងប្រើប្រាស់រថយន្តរហូតដល់ជាង១០ឆ្នាំ ឬលក់រថយន្តក្នុងផ្សារលក់រថយន្តមួយតឹក ពេលពួកគេប្រើប្រាស់រថយន្តលែងកើត ។

ក្រៅពីនេះ រដ្ឋាភិបាលសិង្ហបុរីបានកំណត់គោលនយោបាយថ្មី គឺចាប់តាំងពីឆ្នាំ២០២៥ តទៅ នឹងមិនតម្រូវឱ្យពលរដ្ឋចុះបញ្ជីថ្មីសម្រាប់រថយន្តឯកជន ឬរថយន្តតាក់ស៊ីដែលប្រើប្រាស់ប្រេងម៉ាស៊ូតទេ ។ ហេតុនេះ ទើបការប្រើប្រាស់រថយន្តអគ្គិសនីនៅសិង្ហបុរីកើនឡើងខ្ពស់ជាងមធ្យមភាគប្រើប្រាស់រថយន្តក្នុងតំបន់អាស៊ីអាគ្នេយ៍យ៉ាងខ្លាំង ៕