ប្រទេសជប៉ុន ៖ ព្រិលបានធ្លាក់យ៉ាងខ្លាំងមិនធ្លាប់មាននៅប្រទេសជប៉ុនតាំងពីខែមករា ឆ្នាំ២០២៦ បណ្តាលឱ្យមនុស្សស្លា.ប់កើនឡើងរហូតដល់៣០នាក់ ក្នុងនោះខេត្តអាអូមូរិ មានព្រិលធ្លាក់ខ្លាំងជាងគេកម្ពស់ជាង៤ម៉ែត្រ ។ នាយករដ្ឋមន្ត្រីជប៉ុន លោកស្រី Sanae Takaichi បានកោះប្រជុំបន្ទាន់ជាមួយរដ្ឋមន្ត្រីមកពីក្រសួងនានាដើម្បីស្វែងរកដំណោះស្រាយកុំឱ្យពលរដ្ឋស្លា.ប់បន្ថែមទៀត និងបង្ការគ្រោះថ្នាក់ដោយសារព្រិល ។

តាមការចុះផ្សាយរបស់សារព័ត៌មានបរទេសនៅថ្ងៃទី៣ ខែកុម្ភៈ ឆ្នាំ២០២៦ ជប៉ុនមានព្រិលធ្លាក់យ៉ាងខ្លាំងខុសធម្មតាតាំងពីថ្ងៃទី២០ ខែមករា ឆ្នាំ២០២៦ បណ្តាលឱ្យមនុស្សស្លាប់រហូតដល់៣០នាក់ ក្នុងចំណោមនេះ មានស្ត្រីចាស់ជរាម្នាក់ អាយុ៩១ឆ្នាំ បានស្លាប់ក្រោមគំនរព្រិលកម្ពស់៣ម៉ែត្រ នៅខាងក្រៅផ្ទះក្នុងទីក្រុងអាជិកាសាវ៉ាក់ ខេត្តអាអូមូរិ ។ តាមការសន្និដ្ឋាន ស្ត្រីជរានេះអាចត្រូវព្រិលធ្លាក់ពីលើដំបូលផ្ទះសង្កត់ ទើបគ្មានខ្យល់ដកដង្ហើម និងបាត់បង់ជីវិតតែម្តង ដែលគេបានឃើញប៉ែលចូកព្រិលនៅក្បែរសាកសពផងដែរ ។

អាជ្ញាធរក្នុងតំបន់ប្រាប់ថា នៅពេលអាកាសធាតុក្តៅបណ្តាលឱ្យព្រិលលើដំបូលផ្ទះរលាយធ្លាក់ចុះមកក្រោម ហើយអ្នកឈរនៅក្រោមដំបូលផ្ទះមានគ្រោះថ្នាក់ខ្លាំងណាស់ ។ ម៉ាស់ខ្យល់ត្រជាក់ខ្លាំងបណ្តាលឱ្យតំបន់ឆ្នេរសមុទ្ររបស់ជប៉ុនប្រឈមនឹងព្រិលធ្លាក់យ៉ាងខ្លាំង ហើយតំបន់ខ្លះទៀតមានព្រិលធ្លាក់ខ្លាំងជាងពេលធម្មតាទ្វេដង ។

លោកស្រី Sanae Takaichi នាយករដ្ឋមន្ត្រីជប៉ុនបានកោះប្រជុំគណៈរដ្ឋមន្ត្រីពិសេសកាលពីព្រឹកថ្ងៃទី៣ ខែកុម្ភៈ ដើម្បីណែនាំឱ្យរដ្ឋមន្ត្រីមកពីក្រសួងនានារកវិធីការពារកុំឱ្យពលរដ្ឋស្លាប់បន្ថែមទៀត និងបង្ការគ្រោះថ្នាក់ដោយសារព្រិល ។ ក្រៅពីនេះ ក៏បានបញ្ជូនកងកម្លាំងមកជួយសង្គ្រោះពលរដ្ឋរស់នៅខេត្តអាអូមូរិ គឺជាខេត្តមានព្រិលធ្លាក់ខ្លាំងបំផុតកម្ពស់ជាង៤ម៉ែត្រនៅតាមផ្លូវ ។

កាលពីថ្ងៃទី២ ខែមករា អភិបាលខេត្តអាអូមូរិ លោក សូអិជិរ៉ូ មិយ៉ាសិតាក់ បានស្នើសុំកងកម្លាំងមកជួយសង្គ្រោះពលរដ្ឋ និងស្នើឱ្យកងទ័ពមកជួយជម្លៀសមនុស្សចាស់ដែលរស់នៅផ្ទះតែម្នាក់ឯង ខណៈទីកន្លែងជាច្រើនក្នុងខេត្ត ព្រិលមានកម្ពស់ខ្ពស់ៗងាយនឹងបង្កគ្រោះថ្នាក់ ។ ពេលនេះ នៅតាមផ្លូវ និងទីប្រជុំជនផ្សេងៗគ្របដណ្តប់ដោយព្រិលយ៉ាងក្រាស់ អាជ្ញាធរទប់ទល់លែងឈ្នះហើយ ៕

សូមជួយស៊ែរឲ្យអន្តរជាតិបានដឹង! កាលពីថ្មីៗនេះអង្គភាពឧក្រិដ្ឋកម្មហិង្សានៃស្ថានីយ៍ប៉ូលីស Pocheon របស់កូរ៉េខាងត្បូងបានទទួលបានបណ្ដឹ.ងពាក់ព័ន្ធនឹងការចាប់ជំរឹតមួយករណីទៀតលើបុរសម្នាក់ ក្រោយត្រូវបានគេទាក់ទងឲ្យទៅធ្វើការនៅប្រទេសថៃ។ នេះបើតាមការចុះផ្សាយរបស់សារព័ត៌មាន The JoongAnn របស់កូរ៉េខាងត្បូង។

យោងតាមស្ថានីយ៍ប៉ូលីស Pocheon ក្នុងខេត្ត Gyeonggi នៅថ្ងៃទី 1 ខែកុម្ភៈ ពួកគេបានទទួលការរាយការណ៍តាមទូរស័ព្ទពីស្រ្តីវ័យចំណាស់ម្នាក់ថាកូនប្រុសរបស់គាត់វ័យ 30ឆ្នាំ ដែលបានទៅធ្វើការនៅទីក្រុងបាងកក ប្រទេសថៃ បានលួចទាក់ទងមកគាត់ដើម្បីស្នើសុំជំនួយព្រោះពេលនេះខ្លួនត្រូវបានគេបោ.កប្រាស់ និងបង្ខំឲ្យធ្វើការងារខុសច្បាប់។

បើតាមសម្ដីម្ដាយរបស់បុរសរងគ្រោះបានរៀបរាប់ប្រាប់ប៉ូលីសថា កូនប្រុសរបស់គាត់បានចាកចេញទៅកាន់ទីក្រុងបាងកក ប្រទេសថៃ កាលពីថ្ងៃទី 26 ខែមករា បន្ទាប់ពីគេបានឃើញការផ្សាយពាណិជ្ជកម្មលើ Telegram ពាក់ព័ន្ធនឹង “ការងារដែលមានប្រាក់ខែខ្ពស់នៅក្រុមហ៊ុនរចនាមួយក្នុងប្រទេសថៃ”។ ទោះជាយ៉ាងណាក៏ដោយ ភ្លាមៗបន្ទាប់ពីមកដល់ទីនោះ គាត់ត្រូវបានគេនាំទៅកាន់ម៉ូតែលមួយក្នុងទីក្រុងបាងកក ដែលត្រូវបានឃុំខ្លួននៅក្នុងបន្ទប់មួយ ហើយក្រោយមកត្រូវបានគេបង្ខំឱ្យទទួលការបណ្តុះបណ្តាលទាក់ទងនឹងការតេទូរស័ព្ទឆបោ.ក។

ភ្លាមៗបន្ទាប់ពីទទួលបានដំណឹងនេះ ប៉ូលីសកូរ៉េខាងត្បូងបានទាក់ទងទៅកាន់ស្ថានកុងស៊ុលកូរ៉េប្រចាំប្រទេសថៃតាមរយៈបណ្តាញការទូត និងបានស្នើសុំជំនួយពីប៉ូលីសក្នុងស្រុករបស់ថៃ និងក្រោយមកទៀត បុរសរងគ្រោះក៏ត្រូវបានជួយសង្រ្គោះនិងបញ្ជូនទៅប្រទេសកូរ៉េវិញបានដោយសុវត្ថិភាព។

គួរជម្រាបថា នេះពុំមែនជាករណីដំបូងនោះទេ ដែលជនបរទេសឬជនជាតិកូរ៉េត្រូវបានគេបោ.កបញ្ឆោតឲ្យទៅធ្វើការងារខុសច្បាប់ ឬត្រូវបានបង្ខាំងទុកដោយក្រុមឧក្រិដ្ឋជនបែបនេះ។ តែទោះជាយ៉ាងណាក៏ដោយ ព័ត៌មានទាំងនេះហាក់មិនសូវជាត្រូវបានប្រព័ន្ធផ្សព្វផ្សាយនានាយកទៅចុះផ្សាយព្រោងព្រាតឡើយ ដែលនេះឆ្លុះបញ្ចាំងពីភាពលម្អៀងនិងអយុត្តិធម៌ជាខ្លាំងសម្រាប់ប្រទេសកម្ពុជា ព្រោះថានៅពេលមានករណីស្រដៀងគ្នានេះកើតឡើងនៅកម្ពុជា នោះច្បាស់ជាសារព័ត៌មានទាំងកូរ៉េ និងថៃ នាំគ្នាយកទៅចុះផ្សាយលាបពណ៌កម្ពុជាយ៉ាងផុសផុលមិនខាន៕

ប្រទេសចិន ៖ តុលាការចិនបានកាត់ទោ.សលោក Tang Yijun អតីតរដ្ឋមន្ត្រីក្រសួងយុត្តិធម៌ អាយុ៦៤ឆ្នាំ ឱ្យជាប់ពន្ធនា.គារមួយជីវិត ពីបទស៊ីសំណូកស្មើទឹកប្រាក់រហូតដល់ជាង១៣៧លានយាន់ (ឬជាង១៩លាន ៧សែនដុល្លារ) ព្រមទាំងរឹបអូសទ្រព្យសម្បត្តិទាំងអស់ និងដកហូតសិទ្ធិនយោបាយជារៀងរហូត ។ នេះជាការអនុវត្តច្បាប់យ៉ាងតឹងរ៉ឹងនៅប្រទេសចិនប្រឆាំងនឹងបទល្មើសសូកប៉ាន់ ដោយដាក់ទោ.សចាប់ពីមន្ត្រីថ្នាក់ក្រោម រហូតដល់ថ្នាក់លើ ។

តាមការចុះផ្សាយរបស់សារព័ត៌មានបរទេសកាលពីថ្ងៃទី២ ខែកុម្ភៈ ឆ្នាំ២០២៦ ការប្រឆាំងអំពើពុករលួយរបស់ចិនបានធ្វើឡើងជាបន្តបន្ទាប់! តុលាការខេត្តហ្វូចៀនបានកាត់ទោសលោក Tang Yijun អតីតរដ្ឋមន្ត្រីក្រសួងយុត្តិធម៌ អាយុ៦៤ឆ្នាំ ឱ្យជាប់ពន្ធនាគារមួយជីវិត ពីបទស៊ីសំណូក និងប្រើប្រាស់អំណាចខុសច្បាប់ ដែលផ្តល់ផលប្រយោជន៍ដល់បុគ្គល និងស្ថាប័នឯកជនជាច្រើន ។

លោក Tang អតីតរដ្ឋមន្ត្រីក្រសួងយុត្តិធម៌បានប្រើប្រាស់តួនាទីនយោបាយ និងប្រព័ន្ធយុត្តិធម៌ ដើម្បីស្វែងរកផលប្រយោជន៍ផ្ទាល់ខ្លួន ចាប់ពីឆ្នាំ២០០៦ ដល់ឆ្នាំ២០២២ សរុបមានរយៈពេល១៦ឆ្នាំ ដោយប្រាក់ដែលលោកទទួលបានពីការស៊ីសំណូក សរុបស្មើជាង១៣៧លានយាន់ (ឬជាង១៩លាន ៧សែនដុល្លារ) ។

ក្រៅពីការកាត់ទោសឱ្យជាប់ពន្ធនាគារមួយជីវិត តុលាការក៏បានរឹបអូសទ្រព្យសម្បត្តិទាំងអស់របស់លោក Tang និងដកហូតសិទ្ធិការធ្វើនយោបាយជារៀងរហូត ដោយគ្មានការបន្ធូរបន្ថយទោស ឬព្យួរទោសឡើយ ពីព្រោះលោកបានប្រព្រឹត្តបទល្មើសធ្ងន់ធ្ងរ និងធ្វើឱ្យប៉ះពាល់ដល់ទំនុកចិត្តក្នុងប្រព័ន្ធយុត្តិធម៌ ។

លោក Tang ធ្លាប់បម្រើការងារជាមន្ត្រីរាជការជាន់ខ្ពស់មានតួនាទីសំខាន់នៅប្រទេសចិន ដោយលោកធ្វើការក្នុងវិស័យច្បាប់ និងសន្តិសុខ ។ ការដាក់ទោសអតីតរដ្ឋមន្ត្រីក្រសួងយុត្តិធម៌ត្រូវបានចាត់ទុកជាការអនុវត្តច្បាប់យ៉ាងតឹងរ៉ឹងរបស់ចិន ពីព្រោះទោសកំហុសរបស់លោក Tang ពាក់ព័ន្ធនឹងការផ្តល់ផលប្រយោជន៍ក្នុងកិច្ចសន្យាគម្រោងរបស់រដ្ឋាភិបាល ព្រមទាំងការពារផលប្រយោជន៍របស់អាជីវកម្មមួយចំនួន ជាថ្នូរនឹងការផ្តល់ប្រាក់ និងទ្រព្យសម្បត្តិផ្សេងៗ ។

ការកាត់ទោសរបស់តុលាការចិនលើអតីតមន្ត្រីជាន់ខ្ពស់ ស្របពេលប្រទេសចិនអនុវត្តគោលនយោបាយ «បង្ក្រាបមន្ត្រីរាជការពុករលួយ» បង្កើតឡើងដោយលោកប្រធានាធិបតី Xi Jinping ដែលគោលនយោបាយនេះបង្ក្រាបចាប់ពីមន្ត្រីថ្នាក់ក្រោម រហូតដល់ថ្នាក់លើ ។ ជាច្រើនឆ្នាំមកនេះ មានអតីតថ្នាក់ដឹកនាំក្រសួង កងទ័ព និងមន្ត្រីរាជការចិន ត្រូវបានតុលាការកាត់ទោសជាបន្តបន្ទាប់ ហើយគ្មានមន្ត្រីណាម្នាក់រួចផុតពីការដាក់ទោសតាមច្បាប់ទេ ប្រសិនបើប្រព្រឹត្តបទល្មើស ៕

ប្រធានាធិបតីកូរ៉េខាងត្បូងលោក លី ជេម្យុង កាលពីថ្ងៃចន្ទម្សិលមិញបានធ្វើការលុបសំណេរគំរា.មកំហែងជាភាសាខ្មែរដែលលោកបានបង្ហោះនៅលើបណ្ដាញសង្គម X ចេញវិញ ក្រោយមានការតវ៉ាពីរាជរដ្ឋាភិបាលកម្ពុជា និងទទួលបានការរិះគ.ន់ច្រើនពីសំណាក់ប្រជាជនកូរ៉េរបស់ខ្លួន។

យោងតាមការចុះផ្សាយរបស់សារព័ត៌មាន JTBC របស់កូរ៉េកាលពីថ្ងៃទី២ ខែកុម្ភៈ បានឲ្យដឹងថា សម្ដីរបស់លោកប្រធានាធិបតី លី ត្រូវបានលុបចោលហើយនៅថ្ងៃទី២នេះ។ ហើយនៅពេលមានការសួរនាំថា «ហេតុអ្វីបានជាសម្ដីនេះត្រូវបានលុបចោល» អ្នកនាំពាក្យវិមានខៀវកូរ៉េខាងត្បូង លោក កាង យូជុង បាននិយាយថា “វាត្រូវបានលុបចោល ពីព្រោះវាបង្កឲ្យមានការជជែកដេញដោលច្រើនលើសលប់ពេក”។

ការលុបចោលនេះ ធ្វើឡើងក្រោយពេលរដ្ឋាភិបាលកម្ពុជាបានកោះហៅឯកអគ្គរដ្ឋទូតកូរ៉េ គីម ចាងរីយ៉ុង ឲ្យចូលរួមកិច្ចប្រជុំមួយទាក់ទងនឹងការបង្ហោះជាភាសាខ្មែររបស់ប្រធានាធិបតី លី ជេម្យុង ដោយចោ.ទសួរថា «ហេតុអ្វីបានជាប្រធានាធិបតី លី បង្ហោះសារបែបនេះជាភាសាខ្មែរ?» លោក Kim Chang-ryong បានឆ្លើយតបថា “ដោយសារក្រុមឧក្រិដ្ឋជនទំនងជាមិនយល់ភាសាអង់គ្លេស ឬភាសាកូរ៉េ ទើបលោកបានផ្ញើសារព្រ.មានជាភាសាខ្មែរដូចនេះ”។

គួររំលឹកថា កាលពីថ្ងៃទី៣០ ខែមករា ឆ្នាំ ២០២៦ ប្រធានាធិបតីកូរ៉េខាងត្បូងបានបង្ហោះសារព្រ.មានជាភាសាមួយដែលមានន័យថា៖ «បើហ៊ានប៉ះពាល់ជនជាតិកូរ៉េ នឹងត្រូវវិនាសអន្តរាយ… នេះមិនមែនជាការគំរាមកំហែង លេងៗទេ! ប្រទេសកូរ៉េខាងត្បូង បើថាធ្វើហើយ គឺធ្វើដល់ទីបញ្ចប់!» ជាមួយនឹងពាក្យសម្ដីទាំងនេះ ក្រោយមកត្រូវបានក្រសួងការបរទេសកូរ៉េខាងត្បូងបកស្រាយថា គឺសំដៅលើអង្គការឧក្រិដ្ឋកម្មឆបោ.កតាមអ៊ីនធឺណិតដែលកំពុងប្រតិបត្តិការនៅក្នុងប្រទេសកម្ពុជាប៉ុណ្ណោះ ពុំមែនគំរា.មកំហែងលើកម្ពុជានោះទេ។

យ៉ាងណាក៏ដោយ សកម្មភាពខាងលើនេះត្រូវបានគេមើលឃើញថា បានប៉ះពាល់យ៉ាងខ្លាំងដល់មុខមាត់របស់ប្រទេសកម្ពុជា ខណៈដែលបទល្មើសភាគច្រើនបង្កឡើងដោយជនបរទេសដែលឆបោ.កជនបរទេសគ្នាឯងឲ្យរងគ្រោះ មិនមែនប្រជាជនកម្ពុជាជាអ្នកបោ.កប្រាស់ជនជាតិកូរ៉េ ឬជនបរទេសណាឡើយ។

ទន្ទឹមនឹងប្រតិកម្មរបស់កម្ពុជា ក៏មានប្រជាជនកូរ៉េមួយចំនួនបង្ហាញការមិនពេញចិត្តរបស់ពួកគេចំពោះលោក លី ផងដែរ ដោយពួកគេរិះគ.ន់ពីភាពខ្វះការពិចារណារបស់ប្រធានាធិបតីរូបនេះមុននឹងសម្រេចចិត្តធ្វើអ្វីមួយ ដែលអាចនាំឲ្យប៉ះពាល់យ៉ាងខ្លាំងដល់ទំនាក់ទំនងការទូតរវាងប្រទេសនឹងប្រទេស៕