ឯកអគ្គរាជទូតជប៉ុនប្រចាំប្រទេសកម្ពុជា លោក UENO Atsushi នៅដើមខែកុម្ភៈ ឆ្នាំ២០២៦ បានអំពាវនាវឱ្យកម្ពុជា និងថៃ ដោះស្រាយជម្លោះតាមរយៈការចរចាដោយសន្តិវិធី និងបើកព្រំដែនផ្លូវគោកឡើងវិញដើម្បីសន្តិភាព សន្តិសុខក្នុងតំបន់ ហើយការបិទព្រំដែនផ្លូវគោករវាងប្រទេសទាំងពីរជាច្រើនខែធ្វើឱ្យប៉ះពាល់បណ្តាញផលិតកម្មក្នុងតំបន់ ជាពិសេស ក្រុមហ៊ុនជប៉ុនប្រតិបត្តិការអាជីវកម្មបែប Thailand-Plus-One ជួបការពិបាកយ៉ាងខ្លាំង ដោយសារត្រូវចំណាយដើមទុនខ្ពស់ជាងមុនលើថ្លៃដឹកជញ្ជូនទំនិញ និងភាពមិនប្រាកដប្រជាផ្នែកហិរញ្ញវត្ថុ ។

នេះជាការអំពាវនាវជាថ្មីរបស់ជប៉ុន បន្ទាប់ពីកាលពីខែកញ្ញា ឆ្នាំ២០២៥ រដ្ឋាភិបាលជប៉ុន និងវិនិយោគិនជប៉ុនបានអំពាវនាវឱ្យកម្ពុជា-ថៃបើកព្រំដែនផ្លូវគោកឡើងវិញដើម្បីស្តារពាណិជ្ជកម្ម និងកុំឱ្យក្រុមហ៊ុនជប៉ុនផ្លាស់ប្តូរទីតាំងផលិតទំនិញ ។ កងទ័ពថៃបានបិទព្រំដែនជាមួយកម្ពុជាជាឯកតោភាគីក្រោមហេតុផលការពារអធិបតេយ្យរបស់ខ្លួន និងចោទប្រកាន់កម្ពុជាជាទីតាំងឆបោកអនឡាញ ខណៈថៃខ្លួនឯងជាទីតាំងឆបោកអនឡាញដ៏ធំបំផុតលើពិភពលោក ។

លោក UENO Atsushi ឯកអគ្គរាជទូតជប៉ុនថា ការបិទព្រំដែនកម្ពុជា-ថៃរយៈពេលជាច្រើនខែបណ្តាលឱ្យប៉ះពាល់ខ្សែសង្វាក់ផ្គត់ផ្គង់ ក្រុមហ៊ុនជប៉ុនជួបការពិបាកយ៉ាងខ្លាំងដែលធ្វើអាជីវកម្មនៅប្រទេសទាំងពីរ លោកបារម្ភពីវិនិយោគិនបាត់បង់ទំនុកចិត្តក្នុងការវិនិយោគដោយសារស្ថានការណ៍ព្រំដែនតានតឹង ។ ការដឹកទំនិញតាមព្រំដែនផ្លូវគោកកម្ពុជា-ថៃមានសារៈសំខាន់ណាស់សម្រាប់ក្រុមហ៊ុនជប៉ុន ប៉ុន្តែគួរឱ្យសោកស្តាយដែលព្រំដែនកម្ពុជា-ថៃបានបិទតាំងពីខែមិថុនា ឆ្នាំ២០២៥ គឺជាការគំរាមកំហែងក្រុមហ៊ុនជប៉ុនដែលប្រតិបត្តិការអាជីវកម្មបែប Thailand-Plus-One ។

លោកបន្តថា ក្រុមហ៊ុនជប៉ុនត្រូវបង្ខំចិត្តជ្រើសរើសផ្លូវដឹកជញ្ជូនទំនិញថ្មី ដែលពិបាក និងចំណាយដើមទុនខ្ពស់ជាងមុន ដូចជា ៖ ដឹកជញ្ជូនតាមផ្លូវទឹក និងផ្លូវអាកាស ពេលខ្លះ ក្រុមហ៊ុនជប៉ុនបានដឹកទំនិញក្នុងផ្លូវដ៏ឆ្ងាយ គឺដឹកពីប្រទេសថៃទៅឡាវ រួចហើយដឹកបន្តទៅវៀតណាម ទើបមកដល់កម្ពុជា ។ លោក និងឯកអគ្គរាជទូតជប៉ុនប្រចាំទីក្រុងបាងកក បានសំណូមពរឱ្យរដ្ឋាភិបាលកម្ពុជា-ថៃពិភាក្សាពីការបើកព្រំដែនឡើងវិញក្នុងកិច្ចប្រជុំគណៈកម្មការព្រំដែន ។

ឯកអគ្គរាជទូតជប៉ុនប្រចាំប្រទេសកម្ពុជា ជឿជាក់លើទំនាក់ទំនងល្អរវាងកម្ពុជា-ថៃពិតជាមានសារៈសំខាន់យ៉ាងខ្លាំងដល់សន្តិភាព និងសន្តិសុខក្នុងតំបន់អាស៊ីអាគ្នេយ៍ ហេតុនេះ ជប៉ុនសូមអំពាវនាវឱ្យប្រទេសទាំងពីរស្វែងរកដំណោះស្រាយតាមរយៈការចរចាដោយសន្តិវិធី ។ ជប៉ុនបានផ្តល់ប្រាក់ជំនួយដល់ពលរដ្ឋប្រទេសទាំងពីរដែលរងផលប៉ះពាល់ដោយសារជម្លោះព្រំដែន ក៏ដូចជាសហការជាមួយអង្គការអន្តរជាតិ និងកំពុងពិចារណាផ្តល់ការគាំទ្របន្ថែមទៀតដល់ពលរដ្ឋរងផលប៉ះពាល់ ។

គួរបញ្ជាក់ថា រដ្ឋាភិបាលថៃ និងកងទ័ពថៃបានបិទព្រំដែនផ្លូវគោកជាមួយកម្ពុជាជាឯកតោភាគីតាំងពីខែមិថុនា ឆ្នាំ២០២៥ ក្រោមហេតុផលការពារអធិបតេយ្យរបស់ខ្លួន និងចោទប្រកាន់កម្ពុជាជាទីតាំងឆបោកអនឡាញ ខណៈថៃខ្លួនឯងជាទីតាំងឆបោកអនឡាញដ៏ធំបំផុតលើពិភពលោក ។ រហូតមកដល់ខែកុម្ភៈ ឆ្នាំ២០២៦ ព្រំដែនផ្លូវគោកកម្ពុជា-ថៃទាំងអស់នៅតែបន្តបិទក្រោមហេតុផលដដែល និងធ្វើឱ្យថៃបាត់បង់ប្រាក់ចំណូលសេដ្ឋកិច្ចយ៉ាងខ្លាំង គ្មានភ្ញៀវទេសចរ អាជីវកម្មថៃនៅព្រំដែនដួលរលំ មិនថាសណ្ឋាគារ ភោជនីយដ្ឋាន ការលក់ដូរទំនិញ ពលរដ្ឋថៃបាត់បង់ការងារ ។

ការបិទច្រកព្រំដែនកម្ពុជា-ថៃ ក្រៅពីថៃខាតបង់ចំណូលសេដ្ឋកិច្ចយ៉ាងធ្ងន់ធ្ងរ ក៏ប៉ះពាល់ដល់ការនាំចេញបន្លែ ផ្លែឈើ និងទំនិញប្រើប្រាស់ផ្សេងៗរបស់ថៃផងដែរ ។ កន្លងមក សភាពាណិជ្ជកម្មថៃនៅតាមបណ្តាខេត្តជាប់កម្ពុជា បានសំណូមពរឱ្យរដ្ឋាភិបាល និងកងទ័ពថៃបើកព្រំដែនឡើងវិញដើម្បីជួយស្រោចស្រង់សេដ្ឋកិច្ចថៃធ្លាក់ចុះ ប៉ុន្តែនាយករដ្ឋមន្ត្រីថៃចាំផ្ទះ លោក Anutin Charnvirakul ថា ព្រំដែននឹងបិទបន្តទៀត ប្រសិនបើគណបក្សភូមិចៃថៃឈ្នះឆ្នោត ដោយសារពលរដ្ឋថៃជ្រុលនិយមប្រឆាំងការបើកព្រំដែន ៕

ប្រទេសកូរ៉េខាងត្បូង ៖ កាលពីថ្ងៃទី២២ ខែមករា ឆ្នាំ២០២៦ ប្រទេសកូរ៉េខាងត្បូងបានប្រកាសអនុវត្តច្បាប់មូលដ្ឋានគ្រប់គ្រងបច្ចេកវិទ្យា AI (AI Basic Act) មុនគេនៅលើពិភពលោក ដើម្បីទប់ស្កាត់ហានិភ័យផ្សេងៗរបស់បច្ចេកវិទ្យាដែលមានផលប៉ះពាល់ដល់អ្នកប្រើប្រាស់ ។ ក្រុមហ៊ុនបច្ចេកវិទ្យានានាត្រូវកំណត់ឱ្យទប់ស្កាត់ខ្លឹមសារបង្កើតឡើងដោយបច្ចេកវិទ្យា AI ឬព័ត៌មានក្លែងក្លាយ និងបង់ប្រាក់ពិន័យរហូតដល់ជាង២ម៉ឺន ៥ពាន់ដុល្លារ ប្រសិនបើល្មើសច្បាប់ ។

ក្រុមហ៊ុនបច្ចេកវិទ្យានានាត្រូវតែត្រួតពិនិត្យឱ្យប្រាកដចិត្តថា តើបានគ្រប់គ្រងបច្ចេកវិទ្យា AI ដែរឬទេ ជាពិសេស ការប្រើប្រាស់បច្ចេកវិទ្យាណាមួយដែលមានហានិភ័យខ្ពស់ចំពោះអ្នកប្រើប្រាស់ គឺក្រុមហ៊ុនត្រូវត្រួតពិនិត្យសុវត្ថិភាព និងជូនដំណឹងឱ្យអ្នកប្រើប្រាស់បានជ្រាបពីគ្រោះថ្នាក់ ។

ក្រៅពីនេះ ក្រុមហ៊ុនបច្ចេកវិទ្យាក៏ត្រូវទប់ស្កាត់ការផ្សព្វផ្សាយព័ត៌មានក្លែងក្លាយក្នុងអ៊ីនធើរណេត និងបញ្ជាក់ពីខ្លឹមសារ ឬរូបភាព ឬវីដេអូ ដែលបង្កើតឡើងដោយបច្ចេកវិទ្យា AI ដើម្បីការពារការបោកប្រាស់អ្នកប្រើប្រាស់ និងលុបបំបាត់ព័ត៌មានក្លែងក្លាយ ។

ក្រុមហ៊ុនបច្ចេកវិទ្យាទាំងអស់ រួមទាំងក្រុមហ៊ុនបច្ចេកវិទ្យាធំៗ ដូចជា ៖ Google និង OpenAI នឹងតម្រូវឱ្យបញ្ជូនអ្នកតំណាងរបស់ខ្លួនមកកាន់ប្រទេសកូរ៉េខាងត្បូង ដើម្បីត្រួតពិនិត្យខ្លឹមសារផ្សេងៗក្នុងបណ្តាញសង្គមដែលបង្កគ្រោះថ្នាក់ខ្លាំង ។

ប្រសិនបើល្មើសច្បាប់គ្រប់គ្រងបច្ចេកវិទ្យា AI ក្រុមហ៊ុនបច្ចេកវិទ្យានានានឹងត្រូវបង់ប្រាក់ពិន័យរហូតដល់៣០លានវ៉ុន (ឬស្មើជាង ២ម៉ឺន ៥ពាន់ដុល្លារ) ។ ប៉ុន្តែកូរ៉េខាងត្បូងនឹងទុករយៈពេលអនុគ្រោះចំនួន១ឆ្នាំ សម្រាប់ឱ្យក្រុមហ៊ុនបច្ចេកវិទ្យាមានពេលវេលាចាត់ចែង និងសម្របខ្លួនតាមច្បាប់កូរ៉េខាងត្បូង ។

គួរបញ្ជាក់ថា ការបង្កើតច្បាប់គ្រប់គ្រងបច្ចេកវិទ្យា AI ធ្វើឱ្យកូរ៉េខាងត្បូងក្លាយជាប្រទេសនាំមុខគេក្នុងការកំណត់ស្តង់ដារគ្រប់គ្រងបច្ចេកវិទ្យា AI លើសាកលលោក និងចាត់ទុកជាការដាក់ទោសក្រុមហ៊ុនបច្ចេកវិទ្យាដែលល្មើសច្បាប់យ៉ាងធ្ងន់ធ្ងរ ។ លើសពីនេះ កូរ៉េខាងត្បូងបាននាំមុខការអនុវត្តច្បាប់មូលដ្ឋានគ្រប់គ្រងបច្ចេកវិទ្យា AI (AI Basic Act) របស់សហភាពអឺរ៉ុប ដែលគ្រោងនឹងអនុវត្តនៅឆ្នាំ២០៣០ ៕

ប្រទេសបារាំង ៖ រដ្ឋាភិបាលបារាំងប្រកាសឈប់ប្រើប្រាស់កម្មវិធីប្រជុំអនឡាញដ៏ពេញនិយមរបស់អាមេរិក ដូចជា ៖ Zoom និង Microsoft Teams ចាប់ពីឆ្នាំ២០២៧ ដោយសារបារម្ភពីសុវត្ថិភាព និងការទំនាក់ទំនងគ្នាតាមអ៊ីនធើរណេតរបស់ស្ថាប័នរដ្ឋអាចបែកធ្លាយការសម្ងាត់ ។ ក្រៅពីនេះ បារាំងលើកឡើងពីហេតុផលឈប់ប្រើប្រាស់ដោយសារកម្មវិធីទាំងពីរនេះបង្កើតឡើងដោយអាមេរិក ដែលមិនមែនជាសមាជិកសហភាពអឺរ៉ុប ។

ប្រទេសជាច្រើនពេញនិយមប្រើប្រាស់កម្មវិធីដ៏ពេញនិយម Zoom និង Microsoft Teams សម្រាប់ចូលរួមប្រជុំ និងសិក្សាតាមអនឡាញ ពីព្រោះកម្មវិធីទាំងពីរអនុញ្ញាតឱ្យមានអ្នកចូលរួមច្រើន និងឃើញមុខគ្នាច្បាស់ៗ ប៉ុន្តែបារាំងនឹងឈប់ប្រើប្រាស់កម្មវិធីទាំងពីរ ហើយចាប់ផ្តើមប្រើប្រាស់កម្មវិធីបង្កើតដោយខ្លួនឯង ។ នេះជាយុទ្ធសាស្ត្រមួយរបស់បារាំងដើម្បីកាត់បន្ថយការប្រើប្រាស់កម្មវិធីអ៊ីនធើរណេតដែលបង្កើតឡើងដោយអាមេរិក និងកាត់បន្ថយការចំណាយប្រាក់សម្រាប់ប្រើប្រាស់កម្មវិធីអ៊ីនធើរណេតក្នុងស្ថាប័នរដ្ឋ ។

តាមការចុះផ្សាយរបស់សារព័ត៌មានបរទេសកាលពីថ្ងៃទី២៨ ខែមករា ឆ្នាំ២០២៦ ស្ថាប័នរដ្ឋនៅប្រទេសបារាំងនឹងឈប់ប្រើប្រាស់កម្មវិធី Zoom និង Microsoft Teams ចាប់ពីឆ្នាំ២០២៧ ដើម្បីកាត់បន្ថយការចំណាយប្រាក់រហូតដល់១លានអឺរ៉ូបក្នុង១ឆ្នាំ (ស្មើជាង១លាន ២សែនដុល្លារ) និងងាកមកប្រើប្រាស់កម្មវិធីបង្កើតដោយខ្លួនឯងដែលមានសុវត្ថិភាពជាង ។

បារាំងនឹងប្រើប្រាស់ Visio គឺជាកម្មវិធីប្រជុំតាមអនឡាញបង្កើតឡើងដោយខ្លួនឯង និងបានសាកល្បងប្រើប្រាស់កាលពីឆ្នាំ២០២៥ ដែលវាមានមុខងារប្រើប្រាស់ស្រដៀងនឹងកម្មវិធី Zoom និង Microsoft Teams ដែរ ថែមទាំងមានបច្ចេកវិទ្យា AI ជួយសម្រួលដល់ការផ្ញើសារជាអក្សរ និងសំឡេង ។ បច្ចុប្បន្ន នៅប្រទេសបារាំងមានអ្នកប្រើប្រាស់កម្មវិធី Visio ប្រមាណ៤ម៉ឺននាក់ ។

តាមការលើកឡើងរបស់រដ្ឋមន្ត្រីក្រសួងមុខងារសាធារណៈ និងកំណែទម្រង់បារាំង លោក David Amiel ការបង្កើតកម្មវិធីប្រជុំតាមអនឡាញ Visio ក្នុងគោលបំណងឈប់ប្រើប្រាស់កម្មវិធីអ៊ីនធើរណេតរបស់អាមេរិក ដែលមិនមែនបង្កើតឡើងដោយបណ្តាប្រទេសសមាជិកអឺរ៉ុប ។ កម្មវិធី Visio មានសុវត្ថិភាព និងអាចរក្សាការសម្ងាត់នៃការទំនាក់ទំនងគ្នាតាមអ៊ីនធើរណេតរបស់ស្ថាប័នរដ្ឋ ។

គួរបញ្ជាក់ថា ការបង្កើតកម្មវិធីប្រជុំអនឡាញ Visio គឺស្ថិតក្នុងគម្រោង Suite Numerique ដែលរដ្ឋាភិបាលបារាំងជំរុញឱ្យបង្កើតកម្មវិធីអនឡាញដោយខ្លួនឯងដើម្បីជំនួសកម្មវិធីរបស់អាមេរិក ។ នាថ្ងៃអនាគត បារាំងនឹងឈប់ប្រើប្រាស់កម្មវិធីអនឡាញជាច្រើនទៀតរបស់អាមេរិក ក្នុងនោះក៏មានកម្មវិធីផ្ញើអ៊ីម៉ែលផងដែរ ៕

ប្រទេសថៃឥឡូវនេះស្ថិតក្នុងចំណោមប្រទេសចំនួន ដែលក្រសួងរតនាគារសហរដ្ឋអាមេរិកបានដាក់ចូលទៅក្នុង “បញ្ជីឃ្លាំមើលពិសេស” លើរូបិយប័ណ្ណរបស់ខ្លួន ដែលជាផ្នែកមួយនៃការពិនិត្យឡើងវិញពាក់កណ្តាលឆ្នាំនៃការអនុវត្តការប្តូរប្រាក់បរទេសក្នុងចំណោមដៃគូពាណិជ្ជកម្មសំខាន់ៗ នេះបើយោងតាមរបាយការណ៍ចុងក្រោយបំផុតដែលបានបង្ហាញនៅចុងខែមករា ឆ្នាំ២០២៦។

យោងតាមការចុះផ្សាយរបស់ Reuters ការបន្ថែមប្រទេសថៃចូលក្នុងបញ្ជីតាមដានរូបិយប័ណ្ណនេះ គឺដោយសារតែពាណិជ្ជកម្មរបស់ថៃដែលនាំចូលអាមេរិកមានចំនួនច្រើនលើស និងទឹកប្រាក់សេសសល់ច្រើន។ ដូចគ្នានេះដែរ សហរដ្ឋមេរិកនឹងត្រួតពិនិត្យកាន់តែខ្លាំងឡើងលើការអនុវត្តរូបិយប័ណ្ណ និងគោលនយោបាយអត្រាប្តូរប្រាក់របស់ប្រទេសថៃ។

គួរជម្រាបថា បញ្ជីតាមដានរូបិយប័ណ្ណ គឺជាបញ្ជីត្រួតពិនិត្យផ្លូវការដែលក្រសួងរតនាគារសហរដ្ឋអាមេរិកប្រើប្រាស់ ដើម្បី តាមដានប្រទេស ដែលអាចអនុវត្តគោលនយោបាយរូបិយវត្ថុ ឬអត្រាប្តូរប្រាក់ ដែលមិនយុត្តិធម៌ ឬអាចប៉ះពាល់ដល់ ពាណិជ្ជកម្មអន្តរជាតិ។ ឯការណ៍ដែលប្រទេសថៃត្រូវបានបញ្ចូលទៅក្នុងបញ្ជីនេះ គឺដោយសារតែកំណើនគណនីចរន្ត (Current Account) និងអតិរេកពាណិជ្ជកម្មទ្វេភាគីជាមួយសហរដ្ឋអាមេរិក។

ការបន្ថែមថៃចូលក្នុងបញ្ជីនេះមានន័យថា ប្រទេសដែលជាប់ក្នុងបញ្ជីតាមដានជាមួយគ្នា នឹងកើនដល់ ១០ ដែលរួមបញ្ចូលទាំងចិន ជប៉ុន កូរ៉េខាងត្បូង តៃវ៉ាន់ សិង្ហបុរី វៀតណាម អាល្លឺម៉ង់ អៀរឡង់ និងស្វីស។ យ៉ាងណាមិញ របាយការណ៍របស់ក្រសួងរតនាគារមិនបានចាត់ថ្នាក់ប្រទេសណាមួយថាជា «ប្រទេសបន្លំភ្នែករូបិយប័ណ្ណ» ទេ ហើយជាធម្មតា ប្រទេសណាដែលរងការចាត់ថ្នាក់បែបនេះ អាចរងទណ្ឌកម្មពីសហរដ្ឋអាមេរិក។

ដោយឡែកចំពោះប្រទេសចិន បើទោះជាមិនត្រូវបានកំណត់ថាជាអ្នករៀបចំរូបិយប័ណ្ណក៏ដោយ ប៉ុន្តែក្រសួងរតនាគារអាមេរិកបានវា.យប្រហា.រចិនម្តងហើយម្ដងទៀត ដោយចាត់ទុកថា «ប្រទេសនេះលេចធ្លោខ្លាំងក្នុងចំណោមដៃគូពាណិជ្ជកម្មសំខាន់ៗរបស់អាមេរិក ដោយសារកង្វះតម្លាភាពជុំវិញគោលនយោបាយ និងការអនុវត្តអត្រាប្តូរប្រាក់»។

របាយការណ៍នេះក៏បានតាមដានលើប្រទេសដែលមានអតិរេកពាណិជ្ជកម្មច្រើនទាក់ទងនឹងសហរដ្ឋអាមេរិក និងអ្នកដែលធ្វើអន្តរាគមន៍យ៉ាងសកម្មនៅក្នុងទីផ្សារប្តូរប្រាក់បរទេស ដើម្បីទទួលបានអត្ថប្រយោជន៍ពីការប្រកួតប្រជែងផងដែរ៕

តូក្យូ ៖ ក្រុមអ្នកស្រាវជ្រាវនៅសាកលវិទ្យាល័យតូក្យូ ប្រទេសជប៉ុន បានបង្កើតវ៉ាក់សាំងមួយប្រភេទដើម្បីឈានដល់ការប្រយុទ្ធប្រឆាំងនឹងវីរុស Nipah ដែលកំពុងបង្កការភ័យខ្លាចដល់មនុស្សទូទាំងពិភពលោក។ ក្រោយការពិសោធទទួលបានជោគជ័យ គេរំពឹងថាវ៉ាក់សាំងនេះនឹងត្រូវបានដាក់ឲ្យប្រើប្រាស់សាកល្បងនៅខែមេសាខាងមុខនេះ។ នេះបើតាមការចុះផ្សាយរបស់សារព័ត៌មាន Nikkei Asia របស់ជប៉ុនកាលពីចុងសប្ដាហ៍មុន។

តាមរយៈរបាយការណ៍ដែលបានបង្ហាញ វ៉ាក់សាំងនេះមានមូលដ្ឋានព្យាបាលផ្អែកលើវីរុសកញ្ជ្រឹល។ នៅពេលចាក់ចូលទៅក្នុងខ្លួនមនុស្ស វានឹងជំរុញការផលិតប្រូតេអ៊ីនស្រដៀងគ្នាទៅនឹងវីរុស Nipah ដែលនឹងពង្រឹងប្រព័ន្ធភាពស៊ាំ និងអាចការពារការវិវត្តនៃការឆ្លងមេរោគក្នុងករណីរាងកាយរបស់មនុស្សដែលចាក់វ៉ាក់សាំងនោះមានការឆ្លងមេរោគ។

សាកលវិទ្យាល័យតូក្យូបានបញ្ជាក់អំពីប្រសិទ្ធភាព និងសុវត្ថិភាពនៃវ៉ាក់សាំងនេះ តាមរយៈការធ្វើតេស្តទៅលើសត្វ hamster និងសត្វដទៃទៀត ដោយប្រសិនបើដំណាក់កាលសាកល្បងដំបូងប្រទេសបែលហ្ស៊ិក ទទួលបានជោគជ័យ នោះដំណាក់កាលបន្ទាប់នៃការសាកល្បងសុវត្ថិភាព និងប្រសិទ្ធភាពនៃវ៉ាក់សាំងចំពោះមនុស្សពេញវ័យ និងកុមារនឹងត្រូវធ្វើឡើងនៅប្រទេសបង់ក្លាដែសនៅពាក់កណ្តាលឆ្នាំ 2027។

ជាមួយគ្នានេះ សារព័ត៌មាន Nikkei Asia បានរាយការណ៍ថា ការអភិវឌ្ឍវ៉ាក់សាំងនេះគឺជាផ្នែកមួយនៃការជំរុញដ៏ទូលំទូលាយរបស់ប្រទេសជប៉ុនក្នុងការពង្រឹងការត្រៀមខ្លួនសម្រាប់ជំងឺរាតត្បាតនាពេលអនាគត ជាពិសេសជំងឺដែលបណ្តាលមកពីជំងឺ zoonotic ដែលចម្លងពីសត្វទៅមនុស្ស។ អ្នកស្រាវជ្រាវដែលពាក់ព័ន្ធនឹងគម្រោងនេះសង្ឃឹមថាការសាកល្បងនេះនឹងផ្តល់នូវទិន្នន័យសំខាន់ៗដែលផ្នែកវេជ្ជសាស្រ្តត្រូវការដើម្បីឈានទៅរកការសិក្សាធំៗ និងនៅទីបំផុតទទួលបានការអនុម័តពីនិយតករ។

អ្នកជំនាញសុខភាពសាធារណៈបានព្រមានជាយូរមកហើយថា វីរុស Nipah បង្កហានិភ័យធ្ងន់ធ្ងរជាសកលលោកដោយសារតែភាពធ្ងន់ធ្ងរ និងសក្តានុពលរបស់វាសម្រាប់ការចម្លងពីមនុស្សទៅមនុស្ស។ ប្រសិនបើវ៉ាក់សាំងរបស់សាកលវិទ្យាល័យតូក្យូទទួលបានជោគជ័យ វាអាចក្លាយជាឧបករណ៍ដ៏សំខាន់មួយក្នុងការទប់ស្កាត់ការផ្ទុះឡើង និងបង្កើនការត្រៀមខ្លួនជាអន្តរជាតិប្រឆាំងនឹងជំងឺឆ្លងដែលកំពុងលេចចេញជាថ្មី៕