កន្លងមកអ្នកគាំទ្រមានការរំភើបចិត្តបន្ទាប់ពីក្រុមចម្រៀងដ៏ល្បី Enhypen បានចែករំលែកបន្តវីដេអូអ្នកគាំទ្រកម្ពុជារួមទាំងតារាសម្តែង ដេវិដ អ៊ឹងហាវ នៅលើ Story។ យ៉ាងណាមិញអ្វីដែលកាន់តែធ្វើឱ្យអ្នកគាំទ្ររំភើបចិត្តមួយកម្រិតទៀតនោះគឺបានឃើញសមាជិក Enhypen បានរាំបទ «Pop out» របស់ N.John ។
នៅរសៀលថ្ងៃទី២២ ខែមីនា បណ្តាញសង្គម Enhypen ដែលមានដូចជាទិកតុក ហ្វេកប៊ុក អ៊ីនស្រ្តាក្រាម យូធូប ជាដើមដែលមានអ្នកតាមដានរាប់លាននាក់បានបង្ហោះវីដេអូរបស់សមាជិក Ni-ki បានរាំបទ «Pop out» របស់ N.John ដែលជាបទចម្រៀងមួយទទួលបាននូវភាពល្បីល្បាញយ៉ាងខ្លាំង។
តារា K-Popដែលមានដើមកំណើតជប៉ុនរូបនេះបានធ្វើឱ្យអ្នកគាំទ្រដែលជា Engene រំភើបចិត្តជាខ្លាំងដោយចូលរួមបញ្ចេញមតិយោបល់បង្ហាញការស្រលាញ់ជាច្រើននាក់រួមទាំងអ្នកគាំទ្រទូទៅផងដែរ។ វីដេអូរបស់ Ni-ki ដែលបង្ហោះនេះគឺស្របពេលអវត្តមានជាមួយសមាជិកដទៃទៀតដែលធ្វើដំណើរទៅកាន់ប្រទេសចិនដោយសារតែហេតុផលនយោបាយ។
ទោះយ៉ាងណា សកម្មភាពភ្ជាប់ទំនាក់ទំនងរវាងក្រុមនេះនិងអ្នកគាំទ្របានជំរុញឱ្យពួកគេរំពឹងថានាថ្ងៃអនាគតក្រុមចម្រៀង Enhypen អាចនឹងមានឱកាសណាមួយមកប្រគំតន្រ្តីនៅព្រះរាជាណាចក្រកម្ពុជា។ គេចាំបានថាកាលពីពេលថ្មីៗនេះ ក្រុមអ្នកគាំទ្រក៏បានសាមគ្គីគ្នាយ៉ាងខ្លាំងដោយបានប្រមូលថវិកាដើម្បីបញ្ជូលឡានតវ៉ាទៅកាន់មុខអាគារ HYBE ដើម្បីឱ្យ Heeseung ត្រឡប់ចូលក្រុមវិញ។ 
គួរបញ្ជាក់ផងដែរថា កន្លងមកបទ «Pop out» របស់ N.John ត្រូវបានតារាល្បីៗយកទៅរាំមានដូចជា Ahyeon សមាជិក BABYMONSTER , Kino សមាជិក Pentagon , Leo និង Sangwon សមាជិក Alpha Drive One (ALD1)រួមទាំង Yuchan និង Juyoung សមាជិក Nchive ជាដើម៕
