ភព Martian ត្រូវបានគេស្គាល់ថា ជាភពអង្គារស្រាប់តែមានការរវិវឌ្ឍន៍ខ្លាំងមិនគួរឱ្យជឿ មានន័យថា ភពនេះគឺមានលក្ខណៈស្រដៀននឹងផែនដីខ្លាំងទៅៗ ដូចជាមានទឹករាវដ៏ច្រើនមហាសាល និងដែនម៉ាញេទិចដ៏រឹងមាំគ្រប់គ្រាន់ដើម្បីការពារអ្វីៗទាំងអស់ រួមទាំងជីវិតផងដែរ ពីផលប៉ះពាល់នៃវិទ្យុសកម្ម។

យោងតាមគេហទំព័រ Space.com កាលពីមុនអ្នកវិទ្យាសាស្ត្រភពផែនដីធ្លាប់គិតថា ដែនម៉ាញេទិចសកលរបស់ភពអង្គារបានបាត់បង់ជាង ៤.១ ពាន់លានឆ្នាំមុនមកម្លេះ។ នេះគឺដោយសារតែផលប៉ះពាល់ដ៏ធំត្រូវបានបង្កើតឡើងក្នុងអំឡុងពេលនៃការទម្លាក់គ្រាប់បែកពី ៤.២ ដល់ ៣.៧ ពាន់លានឆ្នាំមុន។

ទោះជាយ៉ាងណាការគិតទាំងនេះគឺខុសទាំងស្រុង ដោយគេបានរកឃើញថា ដែនម៉ាញេទិករបស់ភពអង្គារអាចមានរយៈពេលរហូតដល់ ២០០ លានឆ្នាំយូរជាងការគណនាពីមុនទៅទៀត ដែលរបបគំហើញនេះបង្ហាញថា ភពអង្គារមានការរវិវឌ្ឍន៍ខ្លាំងគួរឱ្យកត់សម្គាល់ គឺជាដំណឹងល្អក្នុងការបញ្ជូនមនុស្សទៅរស់នៅភពនេះកាន់តែលឿន។ យោងតាមអត្ថបទមួយដែលត្រូវបានចេញផ្សាយនៅក្នុងទស្សនាវដ្តីវិទ្យាសាស្ត្រ Nature Communications ក្រុមស្រាវជ្រាវដែលដឹកនាំដោយវេជ្ជបណ្ឌិត Sarah Steele មកពីសាកលវិទ្យាល័យ Harvard សហរដ្ឋអាមេរិក បាននិយាយថា៖

យើងពិតជាភ្ញាក់ផ្អើលខ្លាំងណាស់ ដោយសារការរកឃើញទាំងនេះគឺពិតជាមានសារៈសំខាន់ ពីព្រោះយើងអាចកំណត់ពេលវេលាច្បាស់លាស់ក្នុងការបញ្ជូនមនុស្សទៅរស់នៅភពនេះ។ ដូច្នេះហើយ ជីវិតនៅទីនេះមាន ២០០ លានឆ្នាំបន្ថែមទៀតនៃការរស់នៅក្នុងបរិយាកាសអំណោយផល ហើយប្រហែលជាមានពេលវេលាគ្រប់គ្រាន់ដើម្បីវិវត្តន៍ខ្លាំងជាងអ្វីដែលយើងធ្លាប់គិត។

លើសពីនេះ ប្រសិនបើវាលម៉ាញេទិកបានបាត់ទៅវិញនៅពេលក្រោយ បរិយាកាសនៅលើភពអង្គារក៏នឹងរក្សាស្ថានភាពស្រដៀងគ្នាទៅនឹងផែនដីបានយូរជាងនេះផងដែរ។ ដូច្នេះយើងជឿជាក់ថា មនុស្សនឹងអាចរស់នៅលើភពអង្គារបានលឿនបំផុត ដោយសារបរិយាកាសភពនេះគឺរវិវឌ្ឍន៍ខ្លាំងទៅៗស្រដៀននឹងផែនដី ហើយមនុស្សនឹងអាចរស់នៅទីនេះបានរហូតដល់ ២០០ លានឆ្នាំឬយូរជាងនេះ៕

ប្រទេសថៃ ៖ រយៈពេលប៉ុន្មានខែចុងក្រោយនេះ ខេត្តឈៀងម៉ៃ ប្រទេសថៃ បានរងគ្រោះយ៉ាងធ្ងន់ធ្ងរដោយសារទឹកជំនន់ និងបណ្តាលឱ្យខូចខាតទ្រព្យសម្បត្តិ និងលំនៅឋានពលរដ្ឋយ៉ាងច្រើនមហាសាល ។ លើសពីនេះ ផ្លូវធ្វើដំណើរ, អគារ និងទ្រព្យសម្បត្តិសាធារណៈក៏ខូចខាតអស់ច្រើនដែរ ដែលធ្វើឱ្យអាជ្ញាធរ និងរដ្ឋាភិបាលថៃខ្នះខ្នែងជួយដោះស្រាយបញ្ហា និងផ្តល់ប្រាក់ឧបត្ថម្ភឱ្យពលរដ្ឋសម្អាតលំនៅឋានឡើងវិញ ។

ប៉ុន្តែរហូតមកដល់ខែវិច្ឆិកា ឆ្នាំ២០២៤ ពលរដ្ឋខេត្តឈៀងម៉ៃ នៅតែរងគ្រោះដោយសារទឹកជំនន់បន្តទៀត ហើយទឹកជំនន់លើកនេះ ពុំមែនបណ្តាលមកពីឥទ្ធិពលខ្យល់ព្យុះ ឬទឹកហូរមកពីតំបន់ព្រៃភ្នំ ឬជំនន់ទឹកភ្លៀងទេ ប៉ុន្តែបណ្តាលមកពីទឹកហូរចេញពីក្រោមដី ។ កាលពីថ្ងៃទី១៣ ខែវិច្ឆិកា ឆ្នាំ២០២៤ សារព័ត៌មានថៃរាយការណ៍ថា តំបន់មួយចំនួននៅខេត្តឈៀងម៉ៃលិចទឹកជាច្រើនខែហើយ ដោយសារទឹកហូរចេញពីក្រោមដីមិនឈប់ឈរ។

ជាក់ស្តែង ទឹកហូរចេញពីក្រោមដីបានលិចចម្ការពោតនៅភូមិរីនលួង ឃុំមឿងណាក់ ស្រុកឈៀងដាវ ខេត្តឈៀងម៉ៃ អស់រយៈពេល២ខែហើយ រហូតដល់ចម្ការពោតនេះក្លាយជាបឹងយ៉ាងធំល្វឹងល្វើយ ។ លើសពីនេះ ជំនន់ដោយសារទឹកក្រោមដី ក៏បានលិចភូមិអរុណោថៃ ឃុំមឿងណាក់ ផងដែរ ដែលនៅឆ្ងាយពីភូមិរីនលួង ប្រមាណ៥គីឡូម៉ែត្រ ។

លើសពីនេះ ទឹកចេញពីក្រោមដីបានធ្វើឱ្យបរិមាណទឹកក្នុងអាងស្តុកទឹករបស់ភូមិ កើនឡើងជាង១ម៉ែត្រថែមទៀត និងលិចលំនៅឋានពលរដ្ឋនៅជុំវិញអាងស្តុកទឹកជាច្រើនខ្នង ។ ពលរដ្ឋម្នាក់និយាយថា ទឹកហូរពីក្រោមដីបណ្តាលឱ្យលិចភូមិស្រុកបែបនេះពុំកើតឡើងញឹកញាប់ទេ គឺកើតឡើងពី៥ឆ្នាំ ទៅ១០ឆ្នាំម្តង ប៉ុន្តែកន្លងមក ទឹកមិនលិចខ្លាំងដូចបច្ចុប្បន្នឡើយ ។

ទឹកជំនន់ក៏បានលិចផ្លូវធ្វើដំណើររបស់ពលរដ្ឋផងដែរ ហើយពលរដ្ឋត្រូវធ្វើដំណើរតាមផ្លូវផ្សេង និងចំណាយពេលយូរទើបទៅដល់គោលដៅ ។ អ្នកជំនាញនិយាយថា ទឹកនៅក្រោមដីកើតឡើងដោយសារការប្រមូលផ្តុំទឹកភ្លៀងក្នុងបរិមាណច្រើន ហើយវាក៏ផុសឡើងលើ និងស្រកទៅវិញឆាប់ៗ ។ រីឯទឹកចេញពីក្រោមដីលិចលំនៅឋានពលរដ្ឋជាច្រើនខែនេះ អ្នកជំនាញពុំជ្រាបពីមូលហេតុច្បាស់ទេ និងរង់ចាំការត្រួតពិនិត្យសិន ។

ដោយឡែក នៅខេត្តភាគខាងត្បូងប្រទេសថៃ ក៏មានទឹកជំនន់ដែរ ដោយសារទឹកហូរមកពីតំបន់ព្រៃភ្នំ ។ សារព័ត៌មានថៃរាយការណ៍ថា ទឹកជំនន់បានហូរផ្តាច់ស្ពានធ្វើដំណើរស្ថិតក្នុងឃុំយឺរុំ ស្រុកបេទុង ខេត្តយ៉ាឡា ដែលធ្វើឱ្យពលរដ្ឋចំនួន១៥១គ្រួសារ ស្មើជាង២០០នាក់ ជួបការលំបាកក្នុងការធ្វើដំណើរចេញ-ចូលភូមិយ៉ាងខ្លាំង ៕

ប្រទេសជប៉ុន ៖ ទីក្រុងអូសាកា ប្រទេសជប៉ុន បានប្រកាសហាមឃាត់ពលរដ្ឋជ.ក់បា.រីនៅតាមផ្លូវ និងពិន័យជាប្រាក់អ្នកមិនគោរពច្បាប់ ដោយអនុវត្តចាប់ពីថ្ងៃទី២៧ ខែមករា ឆ្នាំ២០២៥ តទៅ ប៉ុន្តែអាជ្ញាធរនឹងរៀបចំទីតាំងមួយចំនួនសម្រាប់ឱ្យពលរដ្ឋជ.ក់បា.រីនៅក្នុងទីក្រុង ។ នេះបើតាមការចេញផ្សាយរបស់សារព័ត៌មានបរទេស កាលពីថ្ងៃទី១២ ខែវិច្ឆិកា ឆ្នាំ២០២៤ ។

អាជ្ញាធរទីក្រុងអូសាកាប្រកាសថា ហាមពលរដ្ឋជក់បារីនៅតាមផ្លូវសាធារណៈ ដើម្បីថែរក្សាបរិស្ថាន និងកែលម្អសោភ័ណភាពទីក្រុង ។ អភិបាលក្រុងអូសាកា លោក Hideyuki Yokoyama បានប្រកាសអនុវត្តច្បាប់ហាមជក់បារីតាមផ្លូវក្នុងទីក្រុង នៅឆ្នាំ២០២៥ ខណៈបច្ចុប្បន្ន ទីក្រុងអូសាកាមានច្បាប់ហាមជក់បារីក្នុងតំបន់មួយចំនួនប៉ុណ្ណោះ ដូចជា ៖ តំបន់អ៊ុមេតាក់ និងមិដូស៊ុជិ ហើយអ្នកល្មើសច្បាប់នឹងត្រូវពិន័យជាប្រាក់ស្មើជាង៦ដុល្លារអាមេរិក ។

អាជ្ញាធរបានរៀបចំទីក្រុងអូសាកាឱ្យមានសណ្តាប់ធ្នាប់សម្រាប់ពិធី «Osaka-Kansai World Expo» ដែលនឹងរៀបចំឡើងនៅឆ្នាំ២០២៥ ទើបទីក្រុងនេះចេញច្បាប់ហាមពលរដ្ឋជក់បារី ។ ប៉ុន្តែអាជ្ញាធរបានរៀបចំទីតាំងជាង១៤០កន្លែងក្នុងទីក្រុងអូសាកាសម្រាប់ឱ្យពលរដ្ឋជក់បារី ដោយចៀសវាងជក់នៅតាមទីសាធារណៈ ឬកន្លែងមានមនុស្សច្រើន ។

លោក Hideyuki អភិបាលក្រុងអូសាកា និយាយថា ៖ «យើងបានកំណត់ថ្ងៃហាមពលរដ្ឋជក់បារីតាមផ្លូវសាធារណៈ នៅថ្ងៃទី២៧ ខែមករា ឆ្នាំ២០២៥ ដើម្បីឱ្យទីក្រុងមានសណ្តាប់ធ្នាប់ល្អ និងថែរក្សាបរិស្ថាន» ។ ក្រៅពីនេះ លោកអភិបាលក្រុងក៏មានគម្រោងបង្កើនចំនួនភ្នាក់ងារថែរក្សាសណ្តាប់ធ្នាប់ទីក្រុងឱ្យបាន១០០នាក់ ដើម្បីត្រួតពិនិត្យការជក់បារីក្នុងតំបន់នានា ។

គួរបញ្ជាក់ថា ទីក្រុងអូសាកាបានកំណត់ទីតាំងអនុញ្ញាតឱ្យពលរដ្ឋជក់បារី និងទីតាំងហាមឃាត់ ។ ប៉ុន្តែការជក់បារីនៅតាមផ្លូវសាធារណៈត្រូវបានហាមដាច់ខាត ហើយការជក់បារីនៅក្រៅអគារ ក៏ត្រូវបានចាត់ទុកថា ជាការជក់បារីនៅតាមផ្លូវដូចគ្នា ។ ក្រៅពីនេះ ការដើរ, អង្គុយ, ជិះកង់ និងជិះម៉ូតូជក់បារី ក៏ត្រូវហាមឃាត់ទាំងអស់ ។

កាលពីសម័យមុន ពលរដ្ឋជប៉ុនអាចជក់បារីនៅគ្រប់ទីកន្លែង ដូចជា ៖ ភោជនីយដ្ឋាន និងក្នុងអគារ ហើយបានប៉ះពាល់យ៉ាងខ្លាំងដល់អ្នកមិនជក់បារី តាមរយៈការស្រូបផ្សែងបារី និងខូចសុខភាពមិនខុសពីអ្នកជក់ ។ ហេតុនេះ ទើបការជក់បារីនាពេលបច្ចុប្បន្នត្រូវបានរឹតបន្តឹងខ្លាំងឡើង ៕

កូរ៉េខាងត្បូង៖ អេក្រង់ដែលអាចលាតសន្ធឹងបានច្រើនដំបូងបង្អស់របស់ LG អាចបង្កើនទំហំអេក្រង់ពី ១២ អ៊ីញដល់ ១៨ អ៊ីញ មានន័យថា អេក្រង់នេះអាចបត់ទៅមុខទៅក្រោយក៏បាន ទៅឆ្វេងទៅស្តាំក៏បាន ខណៈពេលដែលវាផ្តល់នូវគុណភាពបង្ហាញខ្ពស់ ១០០ ភីកសែលក្នុងមួយអ៊ីញ ជាមួយពណ៌ក្រហម បៃតង និងពណ៌ខៀវពេញ។

ថ្មីៗនេះក្រុមហ៊ុនផលិតអេក្រង់របស់កូរ៉េខាងត្បូង LG Display បានប្រកាសកាលពីថ្ងៃទី១១ ខែវិច្ឆិកាថា ខ្លួនបានទទួលជោគជ័យក្នុងការអភិវឌ្ឍន៍អេក្រង់ដែលអាចលាតសន្ធឹងបានច្រើនជាងគេដំបូងបង្អស់របស់ពិភពលោក ដែលអេក្រង់នេះប្រើបច្ចេកវិទ្យា microLED ជាមួយនឹងអត្ថប្រយោជន៍នៃការពង្រីកតំបន់ ៥០%។ យន្តការបំប្លែងពីទំហំ ១២ អ៊ីង ដល់ ១៨ អ៊ីង គឺដោយសារការប្រើប្រាស់សម្ភារៈមូលដ្ឋានប្លាស្ទិក។

ភីកសែល microLED ទំហំ ៤០ μm មានភាពជាប់បានយូរជាង ១០,០០០ ដងនៃការលាតសន្ធឹង និងរក្សាដង់ស៊ីតេភីកសែល ១០០ ppi ទោះបីជាស្ថិតក្នុងលក្ខខណ្ឌសីតុណ្ហភាពខ្លាំង ឬផលប៉ះពាល់ដូចជាដំណក់ទឹកក៏ដោយ។ ជាមួយនឹងអេក្រង់រួមបញ្ចូលគ្នាបានល្អឥតខ្ចោះ ដែលអនុញ្ញាតឱ្យលាតសន្ធឹង បត់ និងរមួលបាន ក្រុមហ៊ុន LG បាននិយាយថា អេក្រង់ទាំងនេះនឹងអនុវត្តយ៉ាងទូលំទូលាយនៅក្នុងឧស្សាហកម្មផ្សេងៗ ចាប់ពីម៉ូដសម្លៀកបំពាក់ និងឧបករណ៍ពាក់រហូតដល់ការចល័ត។

អេក្រង់ដែលអាចលាតសន្ធឹងបានច្រើនមិនត្រឹមតែស្តើង និងស្រាលប៉ុណ្ណោះទេ ថែមទាំងអាចប្រកាន់ខ្ជាប់នូវផ្ទៃកោងមិនទៀងទាត់ដូចជាសំបក និងស្បែកជាដើម។ បន្ទាប់ពីជោគជ័យក្នុងការអភិវឌ្ឍន៍អេក្រង់ដែលអាចលាតសន្ធឹងបានច្រើនជាងគេដំបូងបង្អស់របស់ពិភពលោក បច្ចុប្បន្នក្រុមហ៊ុន LG ក៏កំពុងកំណត់គោលដៅលើកម្មវិធីផ្សេងៗជាច្រើនទៀតផងដែរ ដូចជាអេក្រង់រថយន្តដែលមានប៊ូតុងប៉ះអណ្តែត ដែលអាចចុចដោយផ្ទាល់នៅលើអេក្រង់សម្រាប់បទពិសោធន៍ដ៏ឆ្លាតវៃនៅពេលបើកបរ ឬឯកសណ្ឋានអ្នកពន្លត់អគ្គីភ័យដែលមានបន្ទះបង្ហាញព័ត៌មានចាំបាច់ក្នុងពេលវេលាជាក់ស្តែង៕

សហរដ្ឋអាមេរិក៖ ក្តីស្រម៉ៃរបស់លោក Elon Musk ក្នុងការបញ្ជូនមនុស្សទៅកាន់ភពអង្គារ ទំនងក្លាយជាការពិតក្នុងពេលឆាប់ៗនេះ ក្រោមការគ្រប់គ្រងរបស់ប្រធានាធិបតីជាប់ឆ្នោត Donald Trump ដោយបង្ហាញពីការផ្លាស់ប្តូរសំខាន់ៗចំពោះកម្មវិធីព្រះច័ន្ទរបស់ NASA ។

កម្មវិធី Artemis របស់ NASA មានគោលបំណងប្រើប្រាស់រ៉ុក្កែត Starship របស់ SpaceX ដើម្បីបញ្ជូនមនុស្សទៅកាន់ឋានព្រះច័ន្ទជាមុនសិន ដែលនេះគឺជាមូលដ្ឋានគ្រឹះសម្រាប់បេសកកម្មនៅភពអង្គារនាពេលអនាគត។

ទោះបីជាបញ្ជូនមនុស្សទៅកាន់ឋានព្រះច័ន្ទនាពេលខាងមុខក៏ដោយ កម្មវិធីនេះគឺផ្តោតលើភពក្រហមនោះទេ មានន័យថា Elon Musk មានបំណងបញ្ជូនមនុស្សទៅកាន់ភពអង្គារតែមួយប៉ុណ្ណោះ ដូច្នេះព្រះច័ន្ទគ្រាន់តែជាការបាញ់បង្ហោះសម្រាប់គោលដៅរបស់លោកក្នុងការទៅដល់ភពព្រះអង្គារប៉ុណ្ណោះ។ ហេតុនេះលោកមានបំណងចង់គ្រប់គ្រងតែភពអង្គារមួយនោះទេ នេះបើយោងតាមប្រភពសារព័ត៌មាន Reuters ដែលបានចុះផ្សាយកាលពីថ្ងៃទី ១១ ខែវិច្ឆិកា។

លោក Doug Loverro ទីប្រឹក្សាឧស្សាហកម្មអវកាស ដែលបានដឹកនាំផ្នែករុករករបស់ NASA បាននិយាយថា មូលហេតុដែលជ័យជំនះរបស់ Trump អាចជួយឱ្យ Elon Musk សម្រេចក្ដីស្រម៉ៃក្នុងការបញ្ជូនមនុស្សទៅកាន់ភពអង្គារ គឺដោយសារ Trump មានគោលជំហររឹងមាំ និងមានផែនការភពអង្គារប្រាកដនិយមជាង ខណៈប្រធានាធិបតីផ្សេងទៀតមិនសូវគាំទ្រផែនការរបស់ Elon Musk ឡើយ។

គួរបញ្ជាក់ដែរថា កាលពីខែតុលាកន្លងទៅ Elon Musk បានចំណាយប្រាក់ចំនួន ១១៩ លានដុល្លារសម្រាប់យុទ្ធនាការរបស់លោក Trump និងបានផ្សព្វផ្សាយដោយជោគជ័យនូវគោលនយោបាយអវកាសរបស់ខ្លួន។ ដូច្នេះហើយនេះជាមូលហេតុដែលមហាសេដ្ឋីបច្ចេកវិទ្យាវ័យ ៥២ ឆ្នាំរូបនេះគាំទ្រ Trump និងបានជ្រៀតចូលក្នុងផ្នែកនយោបាយ៕