ប្រទេសថៃ ៖ សារព័ត៌មានថៃរាយការណ៍ថា ពលរដ្ឋថៃសប្បាយចិត្តយ៉ាងខ្លាំងក្រោយពីពួកគេទទួលបានប្រាក់ម្នាក់១ម៉ឺនបាតពីរដ្ឋាភិបាលថ្មី និងជូនពរឱ្យលោកស្រី ផេថងថាន ស៊ីណាវ៉ាត់ កាន់តំណែងជានាយករដ្ឋមន្ត្រីប្រទេសថៃជារៀងរហូត ។ ក្រៅពីនេះ ពួកគេក៏បានអរគុណដល់មន្ត្រីរដ្ឋាភិបាលទាំងអស់ផងដែរ ដែលផ្តល់ប្រាក់ជួយសង្គ្រោះពលរដ្ឋសម្រាប់ដោះស្រាយជីវភាព ។

រដ្ឋាភិបាលថៃចាប់ផ្តើមអនុវត្តគម្រោង Digital Wallet ដោយជំហានដំបូងនេះ គឺផ្តល់ប្រាក់ឱ្យក្រុមពលរដ្ឋងាយរងគ្រោះក្នុងម្នាក់ចំនួន១ម៉ឺនបាត (ឬស្មើជាង ៣០០ដុល្លារអាមេរិក) រួមមាន ៖ អ្នកមានប័ណ្ណក្រីក្រ និងជនពិការ ។ ការផ្តល់ប្រាក់នេះ គឺរដ្ឋាភិបាលបានផ្ញើប្រាក់ចូលគណនីធនាគាររបស់ពលរដ្ឋដោយផ្ទាល់ គិតចាប់ពីថ្ងៃទី២៥ ដល់ថ្ងៃទី៣០ ខែកញ្ញា ឆ្នាំ២០២៤ តាមរយៈប្រព័ន្ធ PromptPay ដែលភ្ជាប់ជាមួយលេខអត្តសញ្ញាណប័ណ្ណពលរដ្ឋ ។

នៅថ្ងៃទី២៥ ខែកញ្ញា ឆ្នាំ២០២៤ គឺជាថ្ងៃដំបូងដែលរដ្ឋាភិបាលថៃចាប់ផ្តើមផ្តល់ប្រាក់ឱ្យពលរដ្ឋ តាមរយៈគម្រោង Digital Wallet ។ ហេតុនេះ ធ្វើឱ្យបរិវេណមុខសាខាធនាគារ Krungthai នៅស្រុកព្រះនគរស្រីអយុធ្យា ខេត្តអយុធ្យា មានពលរដ្ឋអាយុច្រើន និងជនពិការ យកសៀវភៅធនាគារ និងកាត ATM ដកប្រាក់១ម៉ឺនបាត ដែលរដ្ឋាភិបាលបានផ្ញើចូលក្នុងគណនីធនាគារពួកគេ ។

ប៉ុន្តែដោយសារពលរដ្ឋអាយុច្រើន និងជនពិការពិបាកដកប្រាក់តាមទូរ ATM ទើបពួកគេចូលដកប្រាក់ក្នុងធនាគារតែម្តង ។ ហេតុនេះ ខាងធនាគារបានបន្ថែមកន្លែងដកប្រាក់ទៀត ដើម្បីកុំឱ្យពលរដ្ឋរង់ចាំយូរ ។ ពលរដ្ឋថៃទាំងនេះសប្បាយចិត្តយ៉ាងខ្លាំងក្រោយពីទទួលបានប្រាក់ម្នាក់១ម៉ឺនបាតពីរដ្ឋាភិបាល ហើយពួកគេនិយាយថា ប្រញាប់យកប្រាក់ទាំងនេះទៅទិញសម្ភារៈប្រើប្រាស់ចាំបាច់ ឬចំណាយថែទាំសាច់ញាតិ ហើយប្រាក់នេះអាចជួយកាត់បន្ថយការចំណាយក្នុងគ្រួសារយ៉ាងច្រើន ។

លោក សុមេឃ ផាត់សាឌុ អាយុ៥៨ឆ្នាំ និយាយថា រដ្ឋាភិបាលបានផ្ញើប្រាក់ចូលកុងធនាគារកូនប្រុសពិការរបស់លោករួចរាល់ហើយ ។ លោកនឹងយកប្រាក់នេះទុកឱ្យកូនរៀនសូត្របន្តទៀត ហើយប្រាក់នេះបានជួយគ្រួសារលោកយ៉ាងខ្លាំង ។ វាជាគម្រោងល្អរបស់រដ្ឋាភិបាល ដែលពលរដ្ឋអាចបើកប្រាក់ពីកុងធនាគារយកមកចាយ ។

រីឯលោកយាយ ចាំណង បុនឌី អាយុ៧៦ឆ្នាំ និយាយថា លោកយាយសប្បាយចិត្តខ្លាំងណាស់ ដែលដឹងថា រដ្ឋាភិបាលផ្ញើប្រាក់ចូលកុងធនាគារ ។ សព្វថ្ងៃនេះ លោកយាយបានទទួលប្រាក់សម្រាប់មនុស្សចាស់ និងពិការជារៀងរាល់ខែពីរដ្ឋាភិបាលទុកចាយវាយចិញ្ចឹមចៅ២នាក់ ហើយប្រាក់ខ្លះទៀតទិញថ្នាំពេទ្យ ។ រីឯប្រាក់១ម៉ឺនបាតនេះ លោកយាយឱ្យអ្នកជិតខាងជួយដកពីធនាគារតែ ៣ពាន់បាតសិន រីឯ ៧ពាន់បាតទៀត ទុកចាយពេលចាំបាច់ ។

លោកយាយនិយាយទាំងទឹកភ្នែក និងលើកដៃសំពះថា ៖ «សូមអរគុណនាយករដ្ឋមន្ត្រី ផេថងថាន ស៊ីណាវ៉ាត់ និងរដ្ឋាភិបាលខ្លាំងណាស់ ដែលបានចែកប្រាក់ជួយពលរដ្ឋ ។ សូមឱ្យនាយករដ្ឋមន្ត្រីដឹកនាំប្រទេសថៃជារៀងរហូត ។ ខ្ញុំចូលចិត្តតាំងពីជំនាន់លោក ថាក់ស៊ីន មកម៉្លេះ គឺលោកបានបង្ក្រាបថ្នាំញៀន ហើយបានកូនស្រីធ្វើជានាយករដ្ឋមន្ត្រី» ។

ចំណែកលោកតា រ៉ហៃ លិសេន អាយុ៦៨ឆ្នាំ អតីតទាហាន ដែលបច្ចុប្បន្នជាជនពិការ បានធ្វើដំណើរមកបើកប្រាក់១ម៉ឺនបាត និយាយថា រីករាយណាស់ដែលទទួលបានប្រាក់នេះ ។ វាមានប្រយោជន៍ខ្លាំងណាស់សម្រាប់ជនក្រីក្រដូចលោកតា ហើយលោកតានឹងយកប្រាក់ទៅចិញ្ចឹមចៅ និងកូនពិការផងដែរ ។ លោកតាប្រាប់ថា បើកប្រាក់ពីធនាគារសរុប១ម៉ឺនបាតតែម្តង និងមិនទុកក្នុងកុងធនាគារទេ ពីព្រោះពិបាកធ្វើដំណើរញឹកញាប់ ៕

ប្រទេសកូរ៉េខាងត្បូង ៖ កូរ៉េខាងត្បូង គឺស្ថិតក្នុងចំណោមប្រទេសអភិវឌ្ឍន៍ជឿនលឿនលើពិភពលោក ប៉ុន្តែកូរ៉េខាងត្បូងក៏ដូចប្រទេសផ្សេងៗដែរ គឺតែងតែមានពលរដ្ឋមានចំណូលតិច និងរស់នៅខុសប្លែកពីអ្នកមានចំណូលខ្ពស់ ។ អ្នកមានចំណូលតិចនៅកូរ៉េខាងត្បូងត្រូវរស់នៅក្នុងបន្ទប់ដ៏តូចចង្អៀតហៅថា «Goshitel និង Goshiwon» ។

លោក ឈីង ខាយូឌុង ជាជាងថតរូបម្នាក់នៅប្រទេសកូរ៉េខាងត្បូងនិយាយថា លោកជាមនុស្សម្នាក់ដែលបានរស់នៅក្នុងបន្ទប់តូចចង្អៀតប្រភេទ Goshiwon អស់រយៈពេល៥ឆ្នាំ ក្រោយពីលោកបានមកធ្វើការនៅទីក្រុងសេអ៊ូល ។ លោកក៏ចាប់ផ្តើមថតរូបអ្នកផ្សេងទៀតដែលរស់នៅក្នុងបន្ទប់តូចៗ ដែលលោកពុំធ្លាប់ឃើញពីមុនដើម្បីឱ្យគ្រប់គ្នាឃើញ ។

លោករៀបរាប់ថា ពេលលោកផ្លាស់មកធ្វើការនៅទីក្រុងសេអ៊ូលដំបូង គឺលោកគ្មានជម្រើសអ្វីផ្សេងក្រៅពីការជួលបន្ទប់តូចប្រភេទ Goshiwon មានតម្លៃថោក ។ ម្យ៉ាងទៀត ការស្នាក់នៅបន្ទប់នេះ លោកពុំចាំបាច់កក់ប្រាក់មុន ឬចំណាយប្រាក់ជួសជុលបន្ទប់ទេ ។

លោកបន្តថា ការពិត បន្ទប់ប្រភេទ Goshiwon ត្រូវបានសាងសង់ឡើងសម្រាប់ឱ្យនិស្សិតជួលអានសៀវភៅត្រៀមប្រឡង ឬបេក្ខជនត្រៀមប្រឡងចូលធ្វើការងាររដ្ឋ ។ ការរស់នៅបន្ទប់នេះងាយស្រួល ទើបលោករស់នៅទីនេះរហូតដល់៥ឆ្នាំក្នុងទីក្រុងសេអ៊ូល ។ បន្ទប់នេះស្រដៀងនឹងបន្ទប់ស្នាក់នៅក្នុងសាកលវិទ្យាល័យ ដែលមានផ្ទះបាយ និងបន្ទប់ទឹកនៅជាមួយគ្នា ទើបវាពេញនិយមសម្រាប់និស្សិត និងពលករបរទេស ។

រីឯបន្ទប់ប្រភេទ Goshitel វិញ គឺមានទំហំធំជាងបន្ទប់ Goshiwon បន្តិច ព្រមទាំងមានសម្ភារៈប្រើប្រាស់ច្រើនជាង ។ ប៉ុន្តែបន្ទប់ទាំង២ប្រភេទនេះសុទ្ធតែមានតម្លៃថោកដូចគ្នានៅកូរ៉េខាងត្បូង ។

លោក ឈីង ខាយូឌុង បន្តទៀតថា បច្ចុប្បន្ន បន្ទប់ប្រភេទ Goshiwon មិនគ្រាន់តែជាកន្លែងស្នាក់នៅរបស់និស្សិតទេ គឺមនុស្សទូទៅក៏អាចមកស្នាក់នៅទីនេះបានដែរ ។ ពេលខ្ញុំស្នាក់នៅក្នុងបន្ទប់ប្រភេទ Goshiwon តែងមានអ្នកសួរជានិច្ចថា តើលោកកំពុងត្រៀមប្រឡងនៅទីណា? ពេលឮសំណួរនេះ លោកមានអារម្មណ៍ប្លែកៗ និងពុំសូវពេញចិត្តទេ ។

មនុស្សគ្រប់គ្នាអាចគិតថា លោកកំពុងរស់នៅបន្ទប់ពុំសមរម្យ ទើបលោកថតពីការស្នាក់នៅក្នុងបន្ទប់ Goshiwon ឱ្យគ្រប់គ្នាបានឃើញថា មានមនុស្សច្រើនណាស់មករស់នៅទីនេះ មិនមែនមានតែនិស្សិតទេ ។ លោកគិតថា វាមានន័យណាស់សម្រាប់អ្នករស់នៅបន្ទប់ Goshiwon ៕

ប្រទេសជប៉ុន ៖ កាលពីឆ្នាំ២០២១ ពលរដ្ឋជប៉ុនភ្ញាក់ផ្អើលយ៉ាងខ្លាំង ពីព្រោះនៅសុខៗ ស្រាប់តែពួកគេឃើញក្បាលមនុស្សធំដូចយក្សយ៉ាងអាថ៌កំបាំងមួយផុសចេញពីសួនសាធារណៈឈ្មោះ «យ៉ូយ៉ូងិ» ក្នុងទីក្រុងតូក្យូ ។ លើសពីនេះ ក្បាលមនុស្សអាថ៌កំបាំងបានហោះកាន់តែខ្ពស់ឡើងលើខ្លាំងឡើង រហូតដល់ផុតចុងឈើ ។

ក្បាលមនុស្សដ៏ធំនេះមានពណ៌ស-ខ្មៅ និងមានផ្ទៃមុខស្រពោន ពុំនិយាយស្តីអ្វីទាំងអស់ ដែលធ្វើឱ្យអ្នកឃើញហើយមានអារម្មណ៍ព្រឺសម្បុរ ។ ប៉ុន្តែការពិត វាជាបាឡុងក្បាលមនុស្ស ដែលជាស្នាដៃសិល្បៈគម្រោងចុងក្រោយរបស់អ្នកសិល្បៈសម័យទំនើប ដែលគម្រោងនេះឈ្មោះថា «មិ» ហើយភាសាជប៉ុន មានន័យថា «កែវភ្នែក» ។

គម្រោងនេះមានឈ្មោះពេញថា «ម៉ាសាយូមិ» ដែលបានចាប់ផ្តើមតាំងពីឆ្នាំ២០១៩ មកម៉្លេះ ហើយនៅទីបំផុត ពួកគេក៏ធ្វើវាបានជោគជ័យ ។ ហេតុនេះ ពួកគេក៏បង្ហាញឱ្យមនុស្សម្នាបានឃើញតាមរយៈការបង្ហោះបាឡុងយក្សក្បាលមនុស្សចេញពីសួនសាធារណៈ ។

រីឯផ្ទៃមុខដែលមនុស្សគ្រប់គ្នាបានឃើញនេះ គឺបានជ្រើសរើសពីផ្ទៃមុខមនុស្សពិតប្រាកដប្រមាណ ១.៤០០នាក់ ហើយយកផ្ទៃមុខនេះមកបញ្ចូលគ្នា រហូតក្លាយជាផ្ទៃមុខដ៏ធំ ។ ការបង្ហោះបាឡុងក្បាលមនុស្ស គឺគ្មានការប្រកាសឱ្យដឹងមុនទេ ទើបធ្វើឱ្យមនុស្សម្នាក់ភ្ញាក់ផ្អើលខ្លាំង ប៉ុន្តែអ្នកខ្លះទៀតដែលធ្លាប់បានឮពីគម្រោងនេះ ពុំភ្ញាក់ផ្អើលទេ ។

ក្រុមអ្នកសិល្បៈដែលបានបង្កើតបាឡុងក្បាលមនុស្ស និយាយថា វាជាផ្ទៃមុខរបស់មនុស្សពិតប្រាកដ ដែលពួកគេបានប្រមូលពីអ៊ីនធើរណេត ។ ផ្ទៃមុខនេះនឹងសម្លឹងមើលមនុស្សម្នានៅខាងក្រោម ដែលពោរពេញដោយជំងឺកូវីដឆ្លងរាតត្បាត (នៅឆ្នាំ២០២១) ហើយចង់បង្ហាញថា ឱ្យពលរដ្ឋជប៉ុនចេះជួយខ្លួនឯងឱ្យរួចផុតពីជំងឺកូវីដឆ្លង រហូតដល់ពិភពលោក មានដំណោះស្រាយនាថ្ងៃអនាគត ។

បាឡុងមុខមនុស្សមានផ្ទៃមុខស្រពានហាក់បង្ហាញថា ពលរដ្ឋជប៉ុនកំពុងតែរងគ្រោះ និងអស់សង្ឃឹមយ៉ាងខ្លាំងក្នុងអំឡុងពេលជំងឺកូវីដឆ្លងរាតត្បាត ។ ក្រោយមក បាឡុងក្បាលមនុស្សត្រូវបានទម្លាក់ចុះក្រោមវិញ ហើយគេពុំដឹងថា វានឹងបង្ហាញម្តងទៀតនាពេលណាទេ ។ ចុះលោកអ្នកវិញគិតថា តើការបង្ហោះបាឡុងនេះមានន័យដូចម្តេច?

ប្រទេសជប៉ុន ៖ ជប៉ុន គឺជាប្រទេសមួយមានឈ្មោះល្បីល្បាញលើពិភពលោករឿងកោះឆ្មា គឺជប៉ុនមានកោះតូចៗប្រមាណជា១០កោះ បានដាក់ឈ្មោះថា «កោះឆ្មា» ។ ឆ្មាជាច្រើនក្បាលដែលរស់នៅលើកោះសុទ្ធតែគ្មានម្ចាស់ ហើយពលរដ្ឋចាស់ៗរស់នៅលើកោះបានជួយថែទាំពួកវា ។

កាលពីខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា Aoshima គឺជាកោះមួយស្ថិតក្នុងចំណោមកោះឆ្មាដ៏ល្បីល្បាញបំផុតរបស់ជប៉ុន ប៉ុន្តែអាជ្ញាធរកោះនេះប្រកាសថា នារយៈពេលប៉ុន្មានឆ្នាំខាងមុខ សត្វឆ្មាទាំងអស់ដែលរស់នៅលើកោះនឹងបាត់បង់ ។

កាលពី៦ឆ្នាំមុន អាជ្ញាធរកោះបានចាប់ឆ្មាទាំងអស់ក្រៀវតាមការណែនាំរបស់សមាគមគ្រប់គ្រងឆ្មានៅកោះ Aoshima ដោយសារចំនួនឆ្មាកើនឡើងរហូតដល់១៣០ក្បាល ។ នេះចាត់ទុកថា គឺជាចំនួនច្រើនបំផុត បើធៀបនឹងពលរដ្ឋជប៉ុនរស់នៅលើកោះនេះត្រឹមតែ១៣នាក់ប៉ុណ្ណោះ ដែលត្រូវមើលថែទាំឆ្មា ។ ម្យ៉ាងទៀត ពលរដ្ឋរស់នៅលើកោះខ្លះ មានអាយុច្រើនរហូតដល់៧៥ឆ្នាំ ។

លោកយាយរស់នៅលើកោះម្នាក់អាយុ៧៣ឆ្នាំ ត្រូវបានគេដាក់ឈ្មោះថា «លោកយាយ ខេតម៉ាម៉ា» ។ លោកយាយជាមនុស្សសំខាន់ម្នាក់ដែលបានថែទាំឆ្មាលើកោះ ដោយលោកយាយរង់ចាំសម្អាតអាចម៍ឆ្មានៅតាមផ្លូវទាំងអស់ ដើម្បីធ្វើឱ្យកោះនេះស្អាតសម្រាប់ភ្នែកភ្ញៀវទេសចរបរទេស ។

ភ្ញៀវទេសចរមកកម្សាន្តនៅកោះ Aoshima ចាប់ផ្តើមធ្លាក់ចុះជាបន្តបន្ទាប់ ដោយសារអាកាសធាតុអាក្រក់ ខណៈឆ្មាក៏ខ្វះខាតចំណីស៊ី ។ ហេតុនេះ លោកយាយ ខេតម៉ាម៉ា បានសន្សំសំចៃចំណីឆ្មាដើម្បីឱ្យវាស៊ីបាន១ឆ្នាំ ។ លោកយាយ ខេតម៉ាម៉ា និយាយថា លោកយាយអាយុកាន់តែច្រើន ពិបាកថែទាំឆ្មាទាំងនេះណាស់ ហើយបើលោកយាយស្លាប់នោះ នឹងគ្មានអ្នកណាមើលថែឆ្មាបន្តទៀតទេ ។

អាជ្ញាធរកោះនិយាយថា កោះឆ្មានេះនៅសល់រយៈពេលតែ២ឆ្នាំទៀតប៉ុណ្ណោះ បន្ទាប់មក នឹងគ្មានឆ្មាច្រើនទៀតទេ ដោយសារពលរដ្ឋជប៉ុនរស់នៅលើកោះមានអាយុកាន់តែច្រើន ហើយឆ្មាលើកោះក៏មានអាយុច្រើនដូចគ្នាដែរ ។ បច្ចុប្បន្ន ឆ្មាគ្រប់ក្បាលមានអាយុជាង៧ឆ្នាំហើយ ។

បរិវេណកោះ Aoshima មានភាពខុសប្លែកពីពេលមុនខ្លាំងណាស់ ហើយកាលពីឆ្នាំ១៩៦០ កោះនេះធ្លាប់មានមនុស្សរស់នៅរហូតដល់ ៦៥៥នាក់ ។ ប៉ុន្តែជាច្រើនឆ្នាំកន្លងមក អ្នករស់នៅលើកោះបានផ្លាស់ប្តូរទីលំនៅ ដោយបោះបង់ផ្ទះសម្បែងរបស់ពួកគេ និងទុកឆ្មាចោលលើកោះ ។ បច្ចុប្បន្ន មានមនុស្សរស់នៅលើកោះជាង១០នាក់ប៉ុណ្ណោះ ដែលជាចំនួនតិចតួចបំផុត ហើយចំនួនឆ្មាក៏បានធ្លាក់ចុះខ្លាំងដែរ ៕

“My Fair Princess”(១៩៩៨) ឬទស្សនិកស្គាល់ថាជារឿង «ព្រះនាងត្រចៀកកាំ»គឺជាស្នាដៃរឿងភាគបុរាណមួយនៃចិនដែលទទួលបានការគាំទ្រខ្លាំង។ នេះក៏ជារឿងភាគដែលចាប់យកតារាសម្ដែងវ័យក្មេងដូចជា Zhao Wei, Ruby Lin និង Alec Su បានបង្ហាញទេពកោសល្យការសម្តែងរបស់ខ្លួន។

បើតាម Sohu ទំនាក់ទំនងរវាងតារាសម្ដែងក្នុងរឿងនេះគឺល្អណាស់។ ជាពិសេស តារាសម្តែងស្រី Zhao Wei ត្រូវបានមិត្តរួមសម្តែងចូលចិត្តយ៉ាងខ្លាំង ដោយសារបុគ្គលិកលក្ខណៈឆ្លាតវៃ និងមានមន្តស្នេហ៍របស់នាង។ “អធិរាជ” Zhang Tielin ចូលចិត្ត Zhao Wei ជាញឹកញយ តែងតែសរសើរនាងចំពោះជំនាញសម្ដែងដ៏ល្អឥតខ្ចោះ និងរហ័សរហួន ដោយព្យាករណ៍ថានាងនឹងមានអនាគតជោគជ័យ ថែមទាំងក្លាយជាអ្នកដឹកនាំរឿងដ៏អស្ចារ្យទៀតផង។ មនុស្សតែម្នាក់គត់ដែលហ៊ានស្តីបន្ទោស Zhao Wei ដោយផ្ទាល់គឺគ្មាននរណាក្រៅពីលោកដូចគ្នាដែលមានទំនាក់ទំនងជិតស្និទ្ធដូចឪពុកនិងកូនស្រី។ លោក បានចែករំលែកថា “បរិយាកាសក្នុងរឿង My Fair Princess គឺអស្ចារ្យណាស់។ យើងមើលថែគ្នាដូចគ្រួសារ។ សូម្បីតែថ្ងៃនេះ ប្រសិនបើខ្ញុំថតនៅជិត Ruby Lin, Zhao Wei ឬ Fan Bingbing ពួកគេតែងតែមកលេងខ្ញុំ។ ពួកគេនៅតែហៅខ្ញុំថាអធិរាជ។ ទោះបីជាមានគម្លាតពីជំនាន់គ្នាក៏ដោយ ក៏យើងមានទំនាក់ទំនងជិតស្និទ្ធណាស់»។

ក្នុងឆ្នាំ ២០០១ នៅកម្រិតកំពូលនៃកិត្តិនាមរបស់នាង Zhao Wei បានក្លាយជារឿងអាស្រូវដ៏ធំមួយនៅពេលដែលនាងពាក់រ៉ូបដែលមានទង់ជាតិណាស៊ីជប៉ុន។ នាងត្រូវបានគេរិះគន់យ៉ាងខ្លាំងតាមប្រព័ន្ធអ៊ីនធឺណិតចំពោះការខ្វះការយល់ដឹងរបស់នាង ហើយថែមទាំងត្រូវបានគេវាយដំដោយសារកាកសំណល់នៅទីសាធារណៈ។ លោក Zhang Tielin បានការពារនាងដោយនិយាយថា “នាងប្រហែលជាមិនមែនជាកូនស្រីរបស់ខ្ញុំទេ ប៉ុន្តែខ្ញុំយកចិត្តទុកដាក់ចំពោះនាងដូចជាកូនស្រី។ ខ្ញុំបានប្រាប់នាងថាកុំបារម្ភពីមតិសាធារណៈ។ ក្នុងនាមជាតារាសម្ដែង យើងគ្រាន់តែត្រូវផ្ដោតលើការសម្ដែងរបស់យើង។ អ្វីដែលយើងពាក់មិនសំខាន់; យើងមិនគួរគិតច្រើនពេកទេ»។ នៅក្នុងខែឧសភា ឆ្នាំ ២០១៣ នៅពេលដែល Zhao Wei បង្ហាញខ្លួនជាលើកដំបូងរបស់នាងជាមួយ So Young ដែលជាជោគជ័យទាំងការរិះគន់ និងពាណិជ្ជកម្ម Zhang Tielin សប្បាយចិត្តជាខ្លាំងសម្រាប់ “កូនស្រី” ដោយនិយាយថា “ខ្ញុំសប្បាយចិត្តណាស់សម្រាប់ Zhao Wei” ។

ទោះជាយ៉ាងណាក៏ដោយ ទំនាក់ទំនងជិតស្និទ្ធបានធ្វើឱ្យមានការចាប់អារម្មណ៍នៅពេលដែល Zhao Wei ខកខានមិនបានចូលរួមក្រុមនៅសាលាភាពយន្តប៉េកាំងក្នុងខែមិថុនា ឆ្នាំ ២០១៣ ដែលលោក Zhang Tielin បានអញ្ជើញនាងដោយផ្ទាល់។ តូចចិត្តនឹងអវត្តមានរបស់នាង លោកបានចោទប្រកាន់នាងថាជាមនុស្សរមិលគុណ និងគ្មានការទទួលខុសត្រូវ។ នៅពេលសួរថាតើលោកបានឃើញ So Young ដែរឬទេ លោក Zhang បានឆ្លើយយ៉ាងខ្លាំងថា “ហេតុអ្វីបានជាខ្ញុំគួរមើលរឿងនោះ?

យោងតាម Sohu ក្រោយមក Zhao Wei បានទូរស័ព្ទទៅលោក Zhang ដើម្បីសូមទោស និងពន្យល់ពីស្ថានភាព។ ទោះបីជាទំនាក់ទំនងរបស់ពួកគេលែងស្និទ្ធស្នាលដូចកាលពីមុនក៏ដោយ ក៏មិនបានខូចខាតទាំងស្រុងដែរ។ ក្នុងឆ្នាំ ២០១៨ Zhao Wei ដែលធ្វើជាពិធីការិនីនៃភោជនីយដ្ឋានចិនបានអញ្ជើញ Zhang Tielin ឱ្យបង្ហាញខ្លួននៅក្នុងកម្មវិធីដែលត្រូវបានថតនៅប្រទេសបារាំង។ ពួកគេបានរំឮកពីពេលវេលារបស់ពួកគេក្នុងការថតរឿង ព្រះនាងត្រចៀកកាំ( My Fair Princess) ដោយមានវត្តមាន Alec Su (ព្រះអង្គម្ចាស់ទីប្រាំ) ក៏ចូលរួមដូចគ្នា។

ក្នុងឆ្នាំ ២០១៩ Zhao Wei បានអញ្ជើញតួសម្តែងក្នុងរឿង ព្រះនាងត្រចៀកកាំ ឱ្យបង្ហាញមុខក្នុងកម្មវិធីមួយជាមួយគ្នាដែលមានដូចជា Liu Qing និង Liu Hong រួមជាមួយ Zhang Tielin ។

យោងតាម Sohu ជារឿយៗ Zhao Wei ត្រូវបានគេសរសើរចំពោះភាពវៃឆ្លាតខាងផ្លូវអារម្មណ៍ និងនិស្ស័យល្អរបស់នាង ដែលធ្វើឱ្យនាងទទួលបានមិត្តភក្តិជាច្រើននៅក្នុងឧស្សាហកម្មកម្សាន្ត។ ទោះបីជានាងមានការប្រកួតប្រជែងខ្លាំងជាមួយ Fan Bingbing នៅចំណុចមួយក៏ដោយ ប៉ុន្តែក្រោយមកអ្នកទាំងពីរត្រូវបានគេឃើញសើចជាមួយគ្នានៅលើឆាក ដោយ Zhao Wei ថែមទាំងបានវិនិយោគលើខ្សែភាពយន្តមួយរបស់ Fan Bingbing ទៀតផង។ Zhao Wei និង Zhou Xun ដែលធ្លាប់មានពាក្យចចាមអារ៉ាមថាមានជម្លោះពេលកំពុងថតរឿងមួយ។ ទោះជាយ៉ាងណាក៏ដោយ នៅពេលដែលពួកគេបានជួបគ្នាក្នុងកម្មវិធីនានា ឬក្នុងពិធីមង្គលការ Zhao Wei តែងតែបង្ហាញភាពរួសរាយរាក់ទាក់ និងរីករាយ។

ធ្លាប់ជាតារាដ៏មានឥទ្ធិពលបំផុតនៅក្នុងឧស្សាហកម្មកម្សាន្តចិន Zhao Wei ត្រូវបានហាមឃាត់មិនឱ្យចូលសិល្បៈដោយសារហេតុផលផ្សេងៗ។ ពេលនេះនាងមានអាយុ ៤៨ឆ្នាំ មិនបានចូលរួមក្នុងសកម្មភាពសាធារណៈណាមួយឡើយប៉ុន្តែអ្នកគាំទ្រក៏រំពឹងថានាងនឹងត្រឡប់មកវិញនៅពេលណាមួយ។ Zhao Wei ត្រូវបានប្រព័ន្ធផ្សព្វផ្សាយចិនដាក់ក្នុងបញ្ជីខ្មៅនៅខែសីហា ឆ្នាំ២០២១។

ដោយឡែកសម្រាប់លោក Zhang Tielin មានអាយុ៦៧ឆ្នាំ បើទោះបីជាអាជីពសិល្បៈរបស់ខ្លួនជោគជ័យក៏ដោយ ក៏ជីវិតផ្ទាល់ខ្លួនរបស់លោកត្រូវបានរសាត់ទៅដោយរឿងអាស្រូវ រួមទាំងការចោទប្រកាន់ថាបានបោះបង់ចោលកូនស្រី និងគូស្នេហ៍របស់ខ្លួន។ វត្តមានដ៏ស័ក្តិសមលោកបានដើរតួជាអធិរាជជាញឹកញាប់៕