ប្រទេសជប៉ុន ៖ បើទោះជាភ្ញៀវទេសចរបរទេសមកកម្សាន្តនៅប្រទេសជប៉ុនកើនឡើងជាបន្តបន្ទាប់ក្តី ប៉ុន្តែពលរដ្ឋជប៉ុនបែរជានិយាយថា ពួកគេពុំចង់ដើរកម្សាន្តនៅក្រៅប្រទេសទេ និងចង់សម្រាកនៅផ្ទះ ឬដើរកម្សាន្តក្នុងប្រទេសច្រើនជាង ។ ហេតុអ្វីទើបពលរដ្ឋជប៉ុននិយាយបែបនេះ?

មូលហេតុចម្បងដែលធ្វើឱ្យពលរដ្ឋជប៉ុនបច្ចុប្បន្នពុំនិយមធ្វើដំណើរកម្សាន្តនៅក្រៅប្រទេស គឺបណ្តាលមកពីកត្តាច្រើនយ៉ាង ដូចជា ៖ ពួកគេពិបាកសុំច្បាប់ឈប់សម្រាកពីការងារ, គ្មានប្រាក់សម្រាប់ដើរកម្សាន្ត និងឧបសគ្គផ្នែកភាសាបរទេស ។

គេហទំព័រ Nikkei Asia ផ្សព្វផ្សាយថា ដំណើរកម្សាន្ត គឺជាការសម្រាកដ៏ពេញនិយមរបស់ពលរដ្ឋជប៉ុន តាំងពីសេដ្ឋកិច្ចជប៉ុនរីកចម្រើនខ្លាំងមកម៉្លេះ ។ កាលពីឆ្នាំ២០២៣ ពលរដ្ឋជប៉ុនបានដើរកម្សាន្តក្នុងប្រទេសច្រើនបំផុត ប៉ុន្តែការដើរកម្សាន្តទៅក្រៅប្រទេសរបស់ពួកគេ ស្មើត្រឹមតែ៦០% នៃអំឡុងពេលជំងឺកូវីដ-១៩ ឆ្លងរាតត្បាត ។ ជាមួយគ្នានេះ ដំណើរកម្សាន្តឆ្លងយប់ក្នុងប្រទេសបានធ្លាក់ចុះយ៉ាងខ្លាំង បើធៀបពីមួយឆ្នាំទៅមួយឆ្នាំ តាំងពីរដូវស្លឹកឈើជ្រុះ ។

បច្ចុប្បន្ន ពលរដ្ឋជប៉ុននិយមដើរកម្សាន្តតែម្នាក់ឯង ដោយសារប្រាក់យ៉េនធ្លាក់ថ្លៃ និងការចំណាយប្រាក់សម្រាប់ដំណើរកម្សាន្តកើនឡើង ។ ប៉ុន្តែឧបសគ្គធំបំផុតសម្រាប់ដំណើរកម្សាន្តក្រៅប្រទេស គឺពិបាកសុំច្បាប់សម្រាកពីការងារ ទើបពួកគេសម្រេចចិត្តដើរកម្សាន្តក្នុងប្រទេស និងស្នាក់នៅមិនលើស២យប់ ។ រីឯដំណើរកម្សាន្តក្រៅប្រទេស គឺតិចតួចប៉ុណ្ណោះក្នុង១ឆ្នាំ ដែលផ្ទុយគ្នាពីពលរដ្ឋអឺរ៉ុបអាចសុំច្បាប់ឈប់សម្រាកបានយូរថ្ងៃ ។

នាយក Hoshino Resorts និយាយថា ៖ «បើក្រុមហ៊ុនអនុញ្ញាតឱ្យបុគ្គលិកឈប់សម្រាកបានច្រើនថ្ងៃ នឹងធ្វើឱ្យពួកគេងាយស្រួលទៅលេងនៅក្រៅប្រទេស ហើយធ្វើឱ្យវិស័យទេសចរណ៍ជប៉ុនកើនឡើងផងដែរ» ។

លទ្ធផលស្ទង់មតិរបស់គណៈរដ្ឋមន្ត្រី ឆ្នាំ២០១៨ បង្ហាញថា អ្នកឆ្លើយតបចាប់ពីអាយុ១៣ឆ្នាំ ទៅ២៩ឆ្នាំ ស្មើរហូតដល់៥៣% មិនចង់ទៅសិក្សានៅក្រៅប្រទេសទេ ខណៈអ្នកឆ្លើយតបនៅកូរ៉េខាងត្បូង និងលោកខាងលិចពុំចង់ទៅសិក្សានៅក្រៅប្រទេស ស្មើពី២០% ទៅជាង៣០% ប៉ុណ្ណោះ ។ រីឯយុវជនលោកខាងលិចដែលនិយាយភាសាអង់គ្លេស ពួកគេបានទៅលេងក្រៅប្រទេសក្រោយបញ្ចប់ថ្នាក់មធ្យមសិក្សា ។

មន្ត្រីតំណាងអង្គការទេសចរណ៍ជាតិជប៉ុននិយាយថា ពលរដ្ឋជប៉ុនទៅលេងក្រៅប្រទេសធ្លាក់ចុះ នឹងធ្វើឱ្យប៉ះពាល់ដល់ការទាក់ទាញភ្ញៀវទេសចរបរេសមកលេងជប៉ុន ។ រដ្ឋាភិបាលជប៉ុនបានពិចារណាគោលនយោបាយជំរុញឱ្យយុវជនទៅដើរលេងក្រៅប្រទេសឱ្យបានច្រើន ដូចជា ៖ ឱ្យអាជ្ញាធរមូលដ្ឋានបង់ថ្លៃលិខិតឆ្លងដែន ជាដើម ។

រីឯលទ្ធផលស្ទង់មតិពលដ្ឋជប៉ុនចាប់ពីអាយុ១៥ឆ្នាំ ទៅ២៤ឆ្នាំ កាលពីឆ្នាំ២០២៣ ដោយក្រុមហ៊ុនស្រាវជ្រាវទីផ្សារ Shibuya 109 Lab ក្នុងទីក្រុងតូក្យូបង្ហាញថា មូលហេតុសំខាន់ចំនួន៣ ដែលធ្វើឱ្យយុវជនជប៉ុនពុំចង់ទៅក្រៅប្រទេស រួមមាន ៖ ប្រាក់, សុវត្ថិភាព និងជំនាញភាសា ៕

ប្រទេសចិន ៖ យុវជនម្នាក់រស់នៅភាគខាងកើតប្រទេសចិន ត្រូវគេថតរូបបានក្នុងពេលយុវជននេះកំពុងតែធ្វើបា.ប ម្តាយរបស់ខ្លួននៅទីសាធារណៈ ដោយសារម្តាយពុំព្រមឱ្យប្រាក់ ។ វាបានធ្វើឱ្យអ្នកលេងបណ្តាញសង្គមចិនហួសចិត្តយ៉ាងខ្លាំងពីទង្វើពុំសមរម្យរបស់កូន ហើយមានចំនួនចូលមើលវីដេអូ រហូតដល់ជាង៥លានលើក ។

សារព័ត៌មានចិនរាយការណ៍ថា មហាជនបានថតវីដេអូពេលយុវជនរូបនេះធ្វើបាបម្តាយ កាលពីថ្ងៃទី១៥ ខែកញ្ញា ឆ្នាំ២០២៤ នៅបរិវេណខាងក្រៅផ្ទះក្នុងទីប្រជុំជនមួយក្នុងខេត្តសានដុង ។ យុវជននេះបានស្រែកជេរប្រមាថ និងលោតធាក់ម្តាយ រហូតដល់ភ្នាក់ងារសន្តិសុខមកជួយអន្តរាគមន៍ ព្រមទាំងទូរស័ព្ទប្តឹងសមត្ថកិច្ចផងដែរ ។

បើទោះជាភ្នាក់ងារសន្តិសុខហាមឃាត់យ៉ាងណា ប៉ុន្តែយុវជននេះនៅតែស្រែកជេរម្តាយមិនឈប់ ។ ក្រោយមក រូបគេក៏អាចគ្រប់គ្រងអារម្មណ៍ខ្លួនឯងបាន នៅពេលសមត្ថកិច្ចចូលមកហាមឃាត់ ។

អាជីវករលក់អីវ៉ាន់នៅក្បែរនោះនិយាយថា យុវជនខាងលើខឹងសម្បារយ៉ាងខ្លាំង និងចាប់ផ្តើមវាយតប់ម្តាយ ក្រោយពីម្តាយមិនព្រមឱ្យលុយ ។ ក្រោយពីស្ត្រីជាម្តាយបានលែងលះជាមួយឪពុក គាត់ចិញ្ចឹមកូនឱ្យធ្វើអ្វីស្រេចតែចិត្ត ទើបកូនក្លាយជាបែបនេះ ។ បើទោះកូនវាយខ្លាំងប៉ុនណា ក៏ស្ត្រីជាម្តាយមិនតដៃដែរ ហើយថែមទាំងប្រាប់អ្នកឃើញហេតុការណ៍កុំមករវល់ជាមួយខ្លួនទៀតផង ។

ចំណែកអ្នកលេងបណ្តាញសង្គមបារម្ភពីវាសនារបស់ស្ត្រីជាម្តាយនាថ្ងៃខាងមុខ ហើយកូននឹងធ្វើបាបទៀតមិនខាន ។ លើសពីនេះ យុវជនខាងលើនឹងបង្កគ្រោះថ្នាក់ដល់សង្គមផងដែរ បើគ្មានការដាក់ទោស និងអប់រំទេនោះ ។

បើតាមច្បាប់របស់ប្រទេសចិនចែងថា បើបុគ្គលណាម្នាក់ធ្វើបាបរាងកាយអ្នកដទៃឱ្យមានរបួសស្នាម បុគ្គលនោះនឹងត្រូវបានឃុំខ្លួនចាប់ពី៥ថ្ងៃ ទៅ១០ថ្ងៃ ព្រមទាំងត្រូវពិន័យជាប្រាក់ពី២០០យាន់ ទៅ៥០០យាន់ ។ ប៉ុន្តែបើជនល្មើសជាយុវជន គឺអាចមានទោសស្រាលជាងនេះ ៕

លោក Elon Musk បានបង្ហោះវីដេអូមួយក្នុងបណ្តាញសង្គម X កាលពីថ្ងៃទី២៤ ខែកញ្ញា ឆ្នាំ២០២៤ និងនិយាយថា រថយន្ត Tesla របស់អ្នកពេលនេះ អាចបើកបរដោយស្វ័យប្រវត្តិចេញពីចំណតរថយន្តមករកម្ចាស់របស់វា ។ ហេតុនេះ ម្ចាស់រថយន្តគ្រាន់តែឈរចាំនៅបរិវេណខាងមុខអគារប៉ុណ្ណោះ ហើយបច្ចេកវិទ្យាថ្មីនេះអាចជួយកាត់បន្ថយបញ្ហាម្ចាស់ពិបាកស្វែងរករថយន្តរបស់ខ្លួនក្នុងចំណត ។

សារព័ត៌មានអាមេរិក Benzinga រាយការណ៍ថា លោក Elon Musk ជា CEO របស់ក្រុមហ៊ុន Tesla បង្ហោះពីបច្ចេកវិទ្យាថ្មីរបស់រថយន្ត Tesla ដែលធ្វើឱ្យមនុស្សជាច្រើនភ្ញាក់ផ្អើល ដោយសារសុបិនរបស់ពួកគេក្លាយជាការពិត ។ លោកនិយាយថា ៖ «ពេលនេះ រថយន្ត Tesla អាចបើកបរដោយស្វ័យប្រវត្តិចេញពីចំណតរថយន្តដ៏ចម្អៀត ដើម្បីមករកម្ចាស់របស់វា ដោយគ្រាន់តែម្ចាស់ប្រើប្រាស់ប្រព័ន្ធបញ្ជាហៅរថយន្តប៉ុណ្ណោះ» ។

ក្នុងវីដេអូរបស់លោក Elon Musk គេបានឃើញចង្កូតរថយន្ត Tesla បើកបរដោយស្វ័យប្រវត្តិ និងបើកថយក្រោយយ៉ាងមានទំនុកចិត្តចេញពីចំណតរថយន្តក្នុងផ្សារទំនើប COSTCO ដែលមានមនុស្សដើរចុះឡើង និងមានរថយន្តជាច្រើនកំពុងចត ។ បន្ទាប់មក វាក៏បើកត្រង់យឺតៗយ៉ាងប្រុងប្រយ័ត្នទៅកាន់បរិវេណខាងមុខផ្សារទំនើប និងចតពេលឃើញម្ចាស់ដើរមក ។

វីដេអូនេះគួរឱ្យចាប់អារម្មណ៍យ៉ាងខ្លាំង និងគួរឱ្យរីករាយផងដែរសម្រាប់អ្នកបើករថយន្តពេលប្រញាប់ ហើយស្វែងរករថយន្តរបស់ខ្លួនក្នុងចំណតពុំឃើញ ។ ការបំពាក់បច្ចេកវិទ្យា Summon និង Smart Summon គឺដើម្បីឱ្យរថយន្ត Tesla អាចបម្លាស់ទីដោយខ្លួនឯង ឬចេញ-ចូលក្នុងចំណតរថយន្តបានចម្ងាយ១២ម៉ែត្រ ។

បច្ចេកវិទ្យា Smart Summon អាចបញ្ជាឱ្យរថយន្ត Tesla បើកនៅកន្លែងដែលអ្នកជ្រើសរើស ឬបើកត្រង់ទៅរកម្ចាស់ ហើយបច្ចេកវិទ្យានេះអាចឱ្យរថយន្តបើកបរឆ្លងកាត់ឧបសគ្គ និងឈប់តាមតម្រូវការ ។ រីឯបច្ចេកវិទ្យា Summon គឺម្ចាស់អាចបញ្ជារថយន្ត Tesla តាមរយៈ App លើទូរស័ព្ទដៃ ដើម្បីឱ្យរថយន្តបើកត្រង់ទៅមុខ ឬអាយ៉ែថយក្រោយ ប៉ុន្តែការប្រើប្រាស់បច្ចេកវិទ្យានេះនៅមានកំណត់ ។

ការបង្ហាញបច្ចេកវិទ្យាថ្មីរបស់រថយន្ត Tesla គឺជាព្រឹត្តិការណ៍ដ៏សំខាន់មួយសម្រាប់ការអភិវឌ្ឍបច្ចេកវិទ្យាបើកបររថយន្តដោយស្វ័យប្រវត្តិនាពេលបច្ចុប្បន្ន ខណៈ Tesla មាន Google ជាគូប្រជែងដ៏សំខាន់ និងជាម្ចាស់រថយន្តតាក់ស៊ីបើកបរដោយស្វ័យប្រវត្តិឈ្មោះ WAYMO ។

កាលពីដើមខែកញ្ញា ឆ្នាំ២០២៤ ក្រុមហ៊ុន Tesla បានបង្ហាញបច្ចេកវិទ្យា Actually Smart Summon ដែលម្ចាស់អាចហៅរថយន្ត Tesla បើកមករកពួកគេ តាមរយៈទូរស័ព្ទស្មាតហ្វូន ។ រីឯបច្ចេកវិទ្យាចុងក្រោយ Summon និង Smart Summon ក្រុមហ៊ុននឹងអនុញ្ញាតឱ្យអតិថិជនប្រើប្រាស់ជាបណ្តើរៗ ៕

ពិតណាស់មនុស្សភាគច្រើនទូទាំងពិភពលោកសុទ្ធតែចូលចិត្តផឹកកាហ្វេ ខណៈអ្នកខ្លះផឹកកាហ្វេជារៀងរាល់ថ្ងៃទៀតក៏មាន។ ការផឹកកាហ្វេគឺពិតជាល្អខ្លាំងណាស់ចំពោះរាងកាយរបស់យើង ប៉ុន្តែប្រសិនបើផឹកច្រើនពេក ឬញឹកញាប់ពេកក៏មិនល្អចំពោះសុខភាពដែរ។ ទោះជាយ៉ាងណាតើលោកអ្នកមានដឹងទេថា គ្រាប់កាហ្វេប្រភេទណាដែលត្រូវបានគេចាត់ទុកថាល្អ ស្តង់ដារខ្ពស់ និងមានរសជាតិឈ្ងុយឆ្ងាញ់ជាងគេបំផុតក្នុងលោក? ដូច្នេះអត្ថបទនេះយើងនឹងនាំប្រិយមិត្តមកស្គាល់ប្រភេទគ្រាប់កាហ្វេចំនួន ៤ ដែលត្រូវបានគេចាត់ទុកថាល្អឥតខ្ចោះ។

១.Jamaica Blue Mountain Coffee៖ គឺជាគ្រាប់កាហ្វេដ៏កម្របំផុតដែលបានមកពីតំបន់ Blue Mountain ប្រទេសហ្សាម៉ាអ៊ីក ដែលតំបន់នេះមានសីតុណ្ហភាពត្រជាក់ខ្លាំង ក្នុងមួយឆ្នាំៗ មិនសូវមានការប្រមូលផលច្រើនទេ ហើយការដាំដុះដំណាំនៅទីនេះ ក៏ទាមទារការប្រឹងប្រែងច្រើន ព្រោះដីចោតខ្លាំង ទន្ទឹមនឹងនេះដើមឈើទាំងអស់ក៏ត្រូវរើសដោយដៃដោយប្រុងប្រយ័ត្នផងដែរ។ ដូច្នេះសម្រាប់តម្លៃគឺថ្លៃ និងពិបាករកខ្លាំងណាស់ បន្ថែមពីតម្លៃវាក៏ត្រូវបានចាត់ទុកថាជាកាហ្វេដ៏ល្អបំផុតមួយក្នុងពិភពលោក ដោយសាវាមានភាពរលោងខ្លាំងជាមួយនឹងពណ៌ភ្លឺ អាស៊ីតតិច មានតុល្យភាព សម្បូរបែប និងឆ្ងាញ់ខុសប្លែកពីកាហ្វេផ្សេងទៀត។

២.កាហ្វេស៊ូម៉ាត្រាន៖ គឺជាកាហ្វេល្អលំដាប់ទីពីរក្នុងលោក ដែលមកពីកោះស៊ូម៉ាត្រា ប្រទេសឥណ្ឌូនេស៊ី។ ជាមួយទីតាំងភូមិសាស្ត្រល្អ ដីភ្នំភ្លើងមានជីជាតិ នៅជិតខ្សែអេក្វាទ័រ និងរយៈកម្ពស់សមរម្យ កាហ្វេស៊ូម៉ាត្រានត្រូវបានគេចាត់ទុកថាមានគុណភាពខ្ពស់ និងក្លិនឈ្ងុយក្រអូបគ្មានពីរ ក៏ដូចជាផ្តល់នូវរសជាតិដ៏សម្បូរបែប លាយក្លិនឈើធម្មជាតិ។

៣.កាហ្វេ Arabica៖ គឺជាកាហ្វេដ៏គួរឱ្យចាប់អារម្មណ៍បំផុត ដោយសារវាមានលក្ខណៈសម្បូរបែប ក្លិនឈ្ងុយ និងរសជាតិឆ្ងាញ់។ កាហ្វេអារ៉ាប៊ីកាត្រូវបានគេជឿថាជាពូជកាហ្វេដំបូងគេដែលត្រូវបានដាំដុះ ហើយបច្ចុប្បន្នជាពូជលេចធ្លោ ដែលតំណាងឱ្យប្រហែល ៦០% នៃផលិតកម្មពិភពលោក។ កាហ្វេនេះផលិតចេញពីសណ្តែក Robusta ដែលមានជាតិអាស៊ីតតិច ជូរចត់ និងមានជាតិកាហ្វេអ៊ីនច្រើន វាបង្កើតបានភាគច្រើននៃផលិតកម្មកាហ្វេដែលនៅសល់ក្នុងពិភពលោក។

៤.Kona Coffee៖ គឺជាកាហ្វេមានរសជាតិស្រាល និងឆ្ងាញ់ ដែលមកពីកោះមួយក្នុងចំណោមកោះធំជាងគេនៅ Hawaii ហើយត្រូវបានសរសើរជាបន្តបន្ទាប់សម្រាប់ការផលិតកាហ្វេដ៏ល្អបំផុតនៅក្នុងពិភពលោក។ នៅទីនេះកាហ្វេត្រូវបានដាំដុះនៅកម្ពស់ប្រហែល 2,000ft ពីលើនីវ៉ូទឹកសមុទ្រ នៅលើជម្រាលភ្នំភ្លើង Mauna Loae និង Hualalai ។ តំបន់នេះមាន microclimate ដែលបង្កើតលក្ខខណ្ឌលូតលាស់ល្អឥតខ្ចោះសម្រាប់រុក្ខជាតិកាហ្វេ ហេតុនេះ Kona គឺជាកាហ្វេឆ្ងាញ់ជាងគេទីបួនក្នុងលោក៕