តារាសម្ដែង Wu Jinyan បង្កឱ្យមានពាក្យចចាមអារ៉ាមថាមានផ្ទៃពោះ

តារាសម្ដែងចិន Wu Jinyan ដែលល្បីល្បាញដោយសារការសម្ដែងក្នុងរឿង «ជម្លោះដំណាក់យ៊ានស៊ី (Story of Yanxi Palace)» ថ្មីៗនេះបានចែករំលែករូបថតរបស់នាងស្លៀកសម្លៀកបំពាក់រលុងៗ បញ្ឆេះពាក្យចចាមអារ៉ាមថានាងប្រហែលជាមានផ្ទៃពោះ។

កាលពីប៉ុន្មានថ្ងៃមុនតារាស្រី Wu Jinyan បានបង្ហោះរូបភាពនៅលើប្រព័ន្ធផ្សព្វផ្សាយសង្គម ដែលនាងបានពាក់អាវពណ៌សធំ និងខោខ្លីដែលលាក់ផ្នែកកណ្តាលរបស់នាង។ រឿងនេះបានធ្វើឱ្យអ្នកគាំទ្រជាច្រើនស្មានថានាងមានផ្ទៃពោះ ដោយមានអ្នកខ្លះថាបាន់ស្មានថានាងប្រហែលជាមានគ៌រ ៥ ខែ ។

មុននឹងការបង្ហោះរូបភាពនេះ វីដេអូមួយរបស់ Wu Jinyan ចែកចាយនំព្រះខែ ក៏បានធ្វើឱ្យមានការងឿងឆ្ងល់ផងដែរ ខណៈដែលអ្នកទស្សនាមួយចំនួនបានបញ្ចេញមតិថា ការដើររបស់នាងស្រដៀងទៅនឹងស្ត្រីមានផ្ទៃពោះ។ អ្នកគាំទ្របានកត់សម្គាល់បន្ថែមទៀតនូវការផ្លាស់ប្តូរនៅក្នុងការថតរូប Selfie របស់នាង ដោយអះអាងថាច្រមុះរបស់នាងហាក់ធំជាងមុន ដែលជាញឹកញាប់ចាត់ទុកជាសញ្ញានៃការមានផ្ទៃពោះ។

គួរឱ្យដឹងថា Wu Jinyan បានបញ្ជាក់ពីអាពាហ៍ពិពាហ៍របស់នាងជាមួយតារាសម្ដែង Hong Yao កាលពីថ្ងៃទី១៣ ខែកញ្ញា។ អ្នកទាំងពីរបានមានទំនាក់ទំនងជាមួយគ្នាជាសម្ងាត់អស់រយៈពេលជិត ៧ ឆ្នាំបន្ទាប់ពីបានសម្តែងរួមគ្នាក្នុងរឿង ជម្លោះដំណាក់យ៊ានស៊ី ។

ទោះជាយ៉ាងណាក៏ដោយ អាពាហ៍ពិពាហ៍របស់ពួកគេបានប្រឈមមុខនឹងការរិះគន់ ដោយមានអ្នករិះគន់ចោទសួរការសម្រេចចិត្តរបស់នាង ដោយសារតែទម្រង់ទាបរបស់ Hong Yao និងការចោទប្រកាន់កន្លងមកអំពីភាពមិនស្មោះត្រង់។ ការបង្ហោះនាពេលថ្មីៗនេះរបស់ Wu Jinyan ត្រូវបានជន់លិចជាមួយនឹងមតិយោបល់ជំរុញឱ្យនាងលែងលះ ដោយចោទប្រកាន់នាងថា «ជ្រើសរើសមនុស្សខុស»។

Wu Jinyan មិនទាន់បានបញ្ចេញមតិទាំងនេះនៅឡើយទេ ប៉ុន្តែអ្នកគ្រប់គ្រងរបស់នាងបានផ្តល់ការគាំទ្រដោយនិយាយថា «ផ្តោតលើការសម្ដែងរបស់អ្នក ហើយរស់នៅឱ្យបានល្អ ជីវិតពិតជាសំខាន់ មានតួនាទីសំខាន់ៗជាច្រើននៅខាងមុខសម្រាប់អ្នក សូមរីករាយជាមួយជីវិតដ៏សុខសាន្តដែលអ្នកមានឥឡូវនេះ»។

Wu Jinyan មានអាយុ ៣៤ ឆ្នាំ និង Hong Yao មានអាយុ ៣២ ឆ្នាំ ទទួលបានភាពល្បីល្បាញតាមរយៈតួនាទីរបស់ពួកគេនៅក្នុងរឿងភាគដ៏ពេញនិយម ជម្លោះដំណាក់យ៊ានស៊ី ឆ្នាំ២០១៧៕