ប្រទេសជប៉ុន ៖ ការរស់នៅក្នុងពន្ធនា.គារ ធ្វើឱ្យអ្នកទោ.ស ទាំងអស់កាត់ផ្តាច់ពីជីវិតខាងក្រៅ ហើយពេលពួកគេរួចផុតពីទោ.ស និងត្រូវបានដោះលែងឱ្យចេញពីពន្ធនា.គារ អ្នកទោ.ស ភាគច្រើនពុំអាចសម្របខ្លួនជាមួយសង្គមបានទេ ។ ហេតុនេះ ពួកគេក៏ប្រព្រឹត្តបទល្មើ.ស និងដើរតាមគន្លងផ្លូវចាស់ម្តងទៀត ។

Nippon Foundation បានសហការជាមួយក្រសួងយុត្តិធម៌ជប៉ុន និងក្រុមហ៊ុនឯកជនជាច្រើនទៀត ដើម្បីបង្កើតពន្ធនាគារឥតជញ្ជាំងនៅទូទាំងប្រទេសជប៉ុន ។ ពន្ធនាគារនេះនឹងផ្តោតលើការបណ្តុះបណ្តាលជំនាញការងារ និងមុខរបរដល់អ្នកទោស ព្រមទាំងបណ្តុះបណ្តាលឱ្យអ្នកទោសអាចពឹងពាក់ខ្លួនឯងបានពេលចេញពីពន្ធនាគារ ។

ជាមួយគ្នានេះ ការរស់នៅក្នុងពន្ធនាគារឥតជញ្ជាំង គឺជាការបង្កើតបរិយាកាសឱ្យអ្នកទោសអាចរស់នៅក្នុងសង្គមជាក់ស្តែងផងដែរ ដើម្បីឱ្យពួកគេក្លាយជាមនុស្សល្អពេលរួចផុតពីទោស ។ ពេលអ្នកទោសត្រូវបានដោះលែងចេញពីពន្ធនាគារ ពួកគេនឹងមានការងារធ្វើ និងកន្លែងរស់នៅសមរម្យ ។

យោងតាមទិន្នន័យរបស់ក្រសួងយុត្តិធម៌បង្ហាញថា មានអ្នកទោសរួចពីពន្ធនាគារ Matsuyama ត្រឹមតែ៦,៤% ប៉ុណ្ណោះបានប្រព្រឹត្តបទល្មើសជាថ្មី និងត្រូវតុលាការកាត់ទោសឱ្យជាប់ពន្ធនាគារម្តងទៀត ។ វាជាចំនួនតិចតួចបំផុ បើប្រៀបធៀបនឹងពន្ធនាគារផ្សេងៗនៅប្រទេសជប៉ុន ។

ទោះយ៉ាងណា គម្រោងនេះត្រូវបានមតិផ្សេងៗរិះគន់ថា គ្មានសុវត្ថិភាព និងពុំអាចឃាត់ឃាំងអ្នកទោសបានទេ ។ ជាក់ស្តែង កាលពីឆ្នាំ២០១៨ អ្នកទោសម្នាក់បានរត់គេចខ្លួនចេញពីពន្ធនាគារឥតជញ្ជាំង ហើយហេតុការណ៍នេះធ្វើឱ្យមនុស្សទូទៅភ័យខ្លាច និងបារម្ភយ៉ាងខ្លាំង ។

បច្ចុប្បន្ន ការជាប់ពន្ធនាគារនៅប្រទេសជប៉ុនមានភាពខុសប្លែកគ្នា និងបែងចែកក្រុមអ្នកទោសអាចធ្វើការបាន និងពុំអាចធ្វើការ ។ ពន្ធនាគារនឹងប្រមូលផ្តុំអ្នកទោសទាំង២ក្រុមនេះជាក្រុមតែមួយ ហើយបណ្តុះបណ្តាលអ្នកទោសឱ្យមានជំនាញការងារ និងផ្តល់ចំណេះដឹង ដើម្បីឱ្យពួកគេរស់នៅក្នុងសង្គមប្រកបដោយភាពថ្លៃថ្នូរ ឬពុំប្រព្រឹត្តបទល្មើសម្តងទៀតពេលចេញពីពន្ធនាគារ ៕

ប្រទេសថៃ ៖ ឥទ្ធិពលខ្យល់ព្យុះបានធ្វើឱ្យខេត្តមួយចំនួនរបស់ប្រទេសថៃលិចលង់ខ្លាំងដោយសារទឹកជំនន់ និងខូចខាតទ្រព្យសម្បត្តិពលរដ្ឋយ៉ាងច្រើន ហើយវាជាការលិចលង់ខ្លាំងក្នុងរយៈពេល៥០ឆ្នាំកន្លងមក ។ លើសពីនេះ សាលាក្រុងបាងកកក៏បានប្រកាសអាសន្នឱ្យអាជ្ញាធរ និងពលរដ្ឋទាំងអស់ត្រៀមខ្លួនទប់ទល់ទឹកជំនន់នាពេលឆាប់ៗផងដែរ ។

កាលពីថ្ងៃទី៧ ខែតុលា ឆ្នាំ២០២៤ សាលាក្រុងបាងកកប្រកាសថា កម្រិតទឹកទន្លេចៅព្រះយ៉ាបានកើនឡើងខ្ពស់ ព្រមទាំងឱ្យពលរដ្ឋប្រុងប្រយ័ត្នទប់ទល់ស្ថានការណ៍ទឹកជំនន់នឹងមកដល់នាពេលឆាប់ៗ គឺចាប់ពីថ្ងៃទី១៣ ដល់ថ្ងៃទី២៣ ខែតុលា ឆ្នាំ២០២៤ ។ ក្រៅពីនេះ ពលរដ្ឋរស់នៅក្បែរទន្លេនេះត្រូវប្រញាប់ប្រមូលសម្ភារៈប្រើប្រាស់ដាក់នៅលើទីខ្ពស់, ត្រួតពិនិត្យឌុយដោតភ្លើងក្នុងលំនៅឋាន និងតាមដានស្ថានការណ៍ទឹកជំនន់យ៉ាងដិតដល់ ។

លោក Ekwaranyu Amrapal មន្ត្រីនាំពាក្យសាលាក្រុងបាងកកលើកឡើងថា ភាគខាងជើង, ភាគកណ្តាល, ទីក្រុងបាងកក និងតំបន់ជុំវិញទីក្រុងមានអាកាសធាតុប្រែប្រួល គឺមានភ្លៀងធ្លាក់ខ្លាំង និងខ្យល់កន្ត្រាក់ជាបន្តបន្ទាប់ ហើយកម្រិតទឹកទន្លេចៅព្រះយ៉ាកើនឡើងយ៉ាងឆាប់រហ័ស ជាពិសេស ចាប់ពីថ្ងៃទី១៣ ដល់ថ្ងៃទី២៣ ខែតុលា ឆ្នាំ២០២៤ ។

លោក Ekwaranyu Amrapal បន្តទៀតថា អាជ្ញាធរពាក់ព័ន្ធទាំងអស់ត្រូវត្រៀមខ្លួនទប់ទល់ស្ថានការណ៍ទឹកជំនន់ និងប្រកាសឱ្យពលរដ្ឋរស់នៅតាមមាត់ទន្លេចៅព្រះយ៉ាប្រញាប់ប្រមូលសម្ភារៈដាក់លើទីខ្ពស់ជាបន្ទាន់ ។ ក្រៅពីនេះ អាជ្ញាធរត្រូវរៀបចំបាវខ្សាច់, ស្ពានឈើ និងថ្នាំពេទ្យចាំបាច់ទុកចែកចាយឱ្យពលរដ្ឋរងគ្រោះដោយសារទឹកជំនន់ ។

រីឯលោក Chatchart Sitthiphan អភិបាលក្រុងបាងកកនិយាយថា បណ្តាខេត្តមួយចំនួនរបស់ប្រទេសថៃមានទឹកជំនន់លិចលង់ខ្លាំង ជាពិសេស ខេត្តនៅភាគខាងជើង ដោយសារអាកាសធាតុប្រែប្រួល ។ ក្រៅពីនេះ លោកក៏បានបញ្ជាឱ្យអាជ្ញាធរគ្រប់ជាន់ថ្នាក់ត្រៀមទប់ទល់ស្ថានការណ៍ទឹកជំនន់ និងជួយសង្គ្រោះពលរដ្ឋរស់នៅតាមមាត់ទន្លេចៅព្រះយ៉ា ដោយសារកម្រិតទឹកទន្លេកើនឡើងយ៉ាងឆាប់រហ័ស ។

លោកអភិបាលក្រុងបន្តថា អាជ្ញាធរត្រូវត្រៀមកម្លាំង និងឧបករណ៍ផ្សេងៗសម្រាប់ជួយសង្គ្រោះពលរដ្ឋរងផលប៉ះពាល់ដោយសារទឹកជំនន់ ដោយលោកអភិបាលក្រុងបាងកកបានបញ្ជាឱ្យសាលាខណ្ឌបញ្ជូនបាវខ្សាច់ទៅកាន់តំបន់គោលដៅនានា ។ ក្រៅពីនេះ បើពលរដ្ឋណាត្រូវការឧបករណ៍ ឬម៉ាស៊ីនបូមទឹក ឬមានបញ្ហាផ្សេងៗ សូមផ្តល់ដំណឹងមកកាន់មជ្ឈមណ្ឌលគ្រប់គ្រងទឹកជំនន់ តាមរយៈលេខទូរស័ព្ទ២៤ម៉ោងលើ២៤ម៉ោង ៕

ប្រទេសចិន៖ ថ្មីៗនេះតៃវ៉ាន់បានរកឃើញថា ការដឹកជញ្ជូនសាច់មាន់ដែលនាំចូលពីប្រទេសថៃសម្រាប់ខ្សែសង្វាក់អាហាររហ័ស KFC គឺមានផ្ទុកសារធាតុហាមឃាត់អេទីឡែនអុកស៊ីដ ដែលបច្ចុប្បន្ននេះការដឹកជញ្ជូនទាំងមូលត្រូវបានរារាំង ក៏ដូចជាបញ្ឈប់វាពីការចូលទៅក្នុងព្រំដែនរបស់តៃវ៉ាន់។

យោងតាមគេហទំព័របរទេស Focus Taiwan នៅថ្ងៃដដែលនេះ រដ្ឋបាលចំណីអាហារ និងឱសថតៃវ៉ាន់ (TFDA) បានប្រកាសបញ្ជីមុខទំនិញចំនួន ១១ ដែលបានរកឃើញថាមិនស្របតាមស្តង់ដារគុណភាព បន្ទាប់ពីការត្រួតពិនិត្យព្រំដែន។

បញ្ជីនេះរួមបញ្ចូលទាំងការនាំចេញគ្រឿងទេសមាន់ចំនួន ២,០២៤,៤២ គីឡូក្រាម (ប្រមាណជាង ២ តោន) ពីប្រទេសថៃ ដោយមានជាតិគីមីអេទីឡែនអុកស៊ីត ០,១ មិល្លីក្រាម/គីឡូក្រាម។

អេទីឡែនអុកស៊ីដគឺជាសារធាតុគីមីម្យ៉ាងសម្រាប់សម្លាប់សត្វល្អិត ហើយនៅក្នុងឧស្សាហកម្មវាយនភណ្ឌ វាជាសារធាតុសាប៊ូ សារធាតុរំលាយ និងសារធាតុស្អិត។ ដូច្នេះវាត្រូវបានចាត់ថ្នាក់ដោយទីភ្នាក់ងារគីមីអឺរ៉ុប (ECHA) ជាសារធាតុ mutagen អាចបង្កមហារីក និងអាចប៉ះពាល់ដល់ការមានកូន។

ហេតុនេះហើយអគ្គនាយករង TFDA លោក Lin Chin-fu បាននិយាយថា អ្នកនាំចូលគ្រឿងទេសនេះ ដែលប្រតិបត្តិការទាំង KFC និង Pizza នៅតៃវ៉ាន់ នឹងត្រូវត្រួតពិនិត្យយ៉ាងតឹងរ៉ឹងបំផុតលើការដឹកជញ្ជូននីមួយៗ សម្រាប់សមាសធាតុនាំចូលទាំងអស់។

លោក Lin បានមានប្រសាសន៍ថា ផលិតផលដែលនាំចូលពីមុនរបស់ក្រុមហ៊ុន Jardine Food Service Co., Ltd មានអត្រាត្រួតពិនិត្យកើនឡើងដល់ ៥០% បើធៀបនឹងកម្រិតធម្មតា ២០%។ អគ្គនាយករងនៃ TFDA បានបង្ហាញថា គ្រឿងទេស និងរសជាតិដែលនាំចូលពីប្រទេសថៃដោយក្រុមហ៊ុនផ្សេងទៀតក៏នឹងបន្តត្រូវបានត្រួតពិនិត្យជាមួយនឹងប្រេកង់ខ្ពស់រហូតដល់ចុងឆ្នាំ ២០២៤ ផងដែរ៕

តើលោកអ្នកត្រៀមខ្លួនហើយឬនៅ? សម្រាប់ការទស្សនាបាតុភូតដ៏អស្ចារ្យបំផុតនៃផ្កាយដុះកន្ទុយ Tsuchinshan-Atlas (C/2023 A3) ដែលជាផ្កាយដ៏កម្របំផុតមួយនឹងហោះកាត់ផែនដីនៅថ្ងៃទី៩ ដល់ថ្ងៃទី១៤ ខែតុលា ឆ្នាំ២០២៤ ខាងមុខនេះ។

Tsuchinshan-Atlas (C/2023 A3) គឺជាផ្កាយដុះកន្ទុយដែលត្រូវបានគេរកឃើញកាលពីឆ្នាំមុន ហើយអ្នកវិទ្យសាស្ត្រសន្មត់ថាវាបានវិលជុំវិញព្រះអាទិត្យរៀងរាល់ ៨ ម៉ឺនឆ្នាំម្តង ដូច្នេះប្រសិនបើអ្នកខកខានមើលបាតុភូតដ៏អស្ចារ្យនេះ ៨ ម៉ឺនឆ្នាំខាងមុខទៀតទើបអ្នកអាចទស្សនាវាម្តងទៀតបាន។

យោងតាមគេហទំព័របរទេស Theguardian ផ្កាយដុះកន្ទុយអាចមើលដោយភ្នែកទទេរបាន ដែលនេះត្រូវបានគេចាត់ទុកថាជារឿងដ៏កម្រមួយ ខណៈបាតុភូតលើអាកាសផ្សេងៗសុទ្ធតែតម្រូវឱ្យពាក់វែនតាការពារភ្នែក ឬពាក់ឧបករណ៍បច្ចេកវិទ្យាទំនើបៗជាច្រើនទៀត។ ដូច្នេះប្រទេសទាំងអស់នៅទូទាំងពិភពលោកគឺអាចទស្សនាមើលបាតុភូតដ៏អស្ចារ្យបំផុតនៃផ្កាយដុះកន្ទុយ Tsuchinshan-Atlas (C/2023 A3) ដោយភ្នែកទទេរបានចាប់ពីថ្ងៃទី៩ ដល់ថ្ងៃទី១៤ ខែតុលា ឆ្នាំ២០២៤ ខាងមុខនេះ។

យោងតាមប្រភពដដែលបានឱ្យដឹងទៀតថា ដើម្បីទស្សនាបាតុភូតដ៏កម្រ ៨ ម៉ឺនឆ្នាំមានម្តងនេះបាន លោកអ្នកត្រូវតែមើលទៅទិសខាងកើតនៅពេលព្រឹកព្រលឹម មុនពេលថ្ងៃរះ ឆ្ពោះទៅក្រុមតារានិករ Sextans។ ទោះជាយ៉ាងណាឱកាសល្អបំផុតគឺនៅថ្ងៃទី១៤ ខែតុលា ដោយសារផ្កាយនឹងហោះកាត់ផែនដីនៅពេលល្ងាចបន្ទាប់ពីថ្ងៃលិច ដោយលោកអ្នកត្រូវមើលទៅខាងលិចឆ្ពោះទៅក្រុមតារានិករ Boötes។

អ្នកវិទ្យាសាស្ត្រ Gregory Brown បាននិយាយថា ផ្កាយដុះកន្ទុយ Tsuchinshan-Atlas (C/2023 A3) គឺមានពន្លឺភ្លឺខ្លាំង និងមានទំហំធំល្មមដែលលោកអ្នកអាចមើលឃើញដោយភ្នែកទទេរបានយ៉ាងច្បាស់ ដូច្នេះកុំភ្លេចចូលរួមទស្សនាមើលផ្កាយដុះកន្ទុយទាំងអស់គ្នានៅថ្ងៃទី៩ ដល់ថ្ងៃទី១៤ ខែតុលា ឆ្នាំ២០២៤ ខាងមុខនេះ៕

យោងតាមការសិក្សាថ្មីរបស់អ្នកស្រាវជ្រាវមកពីសាកលវិទ្យាល័យ College London បញ្ជាក់ថា ការបាត់បង់បរិមាណដីក្នុងទន្លេ Arun ដែលស្ថិតនៅឆ្ងាយពីគ្នាប្រមាណ៧៥គីឡូម៉ែត្រ គឺជាមូលហេតុធ្វើឱ្យកំពូលភ្នំខ្ពស់បំផុតលើពិភពលោក គឺភ្នំអេវឺរេស (Everest) កើនឡើងរហូតដល់២មីល្លីម៉ែត្រក្នុង១ឆ្នាំ ។

Adam Smith អ្នកចូលរួមស្រាវជ្រាវបាននិយាយមកកាន់សារព័ត៌មាន BBC ថា ៖ «វាដូចជាការលើកទំនិញចុះពីកប៉ាល់ គឺកប៉ាល់នឹងស្រាលជាងមុន និងអណ្តែតខ្ពស់ជាងមុនបន្តិច ។ វាដូចគ្នានឹងពេលសំបកផែនដីកាន់តែស្រាល គឺវាអណ្តែតឡើងខ្ពស់» ។

កម្លាំងនៃការប៉ះទង្គិចគ្នារវាងសំបកផែនដី និងអឺរ៉ាស៊ី កាលពី៤០លាន ទៅ៥០លានឆ្នាំមុន បានបង្កើតជាជួរភ្នំហិម៉ាល័យ ។ ដូច្នេះ ការធ្វើចលនារបស់សំបកផែនដី គឺជាមូលហេតុចម្បងធ្វើឱ្យភ្នំអេវឺរេស និងភ្នំនៅក្បែរគ្នាមានកម្ពស់កាន់តែខ្ពស់ ។

អ្នកស្រាវជ្រាវមកពីសាកលវិទ្យាល័យ College London បញ្ជាក់ទៀតថា បរិមាណទឹកក្នុងទន្លេ Arun ក៏មានចំណែកធ្វើឱ្យភ្នំអេវឺរេសខ្ពស់ជាងមុនផងដែរ គឺពេលទឹកទន្លេនេះហូរកាត់ភ្នំហិម៉ាល័យ វានឹងច្រោះដី និងអ្វីៗគ្រប់យ៉ាង ។ បន្ទាប់មក វានឹងកាត់បន្ថយសម្ពាធរបស់ស្រទាប់ជាប់សំបកផែនដី ហើយធ្វើឱ្យសំបកផែនដីកាន់តែស្តើង និងបត់បែន ។

បាតុភូតនេះហៅថា «Isostatic Rebound» ដែលធ្វើឱ្យកំពូលភ្នំអេវឺរេស និងកំពូលភ្នំនៅក្បែរៗ ដូចជា ៖ ភ្នំ Lhotse និងភ្នំ Makalu ដែលជាកំពូលភ្នំខ្ពស់លំដាប់ទី៤ និងទី៥ លើពិភពលោក មានកម្ពស់ខ្ពស់ ។ នេះបើតាមការស្រាវជ្រាវចេញផ្សាយក្នុង Nature Geoscience ។

អ្នកស្រាវជ្រាវបញ្ជាក់ថា ៖ «តាមការវាស់វែងដោយឧបករណ៍ GPS ឃើញថា កំពូលភ្នំអេវឺរេស និងភ្នំនៅក្បែរគ្នាមានកម្ពស់ខ្ពស់ជាងមុន ប្រមាណ២មីល្លីម៉ែត្រក្នុង១ឆ្នាំ» ។ ប៉ុន្តែមតិផ្សេងទៀតនិយាយថា ការលើកឡើងខាងលើនេះពុំទាន់ប្រាកដប្រជាទេ ។

លោកសាស្ត្រាចារ្យ Hugh Sinclair មកពីសាកលវិទ្យាល័យ Edinburgh ពុំបានចូលរួមស្រាវជ្រាវនិយាយថា ការអះអាងរបស់អ្នកស្រាវជ្រាវនៅសាកលវិទ្យាល័យ College London គឺសមហេតុផល ប៉ុន្តែការអះអាងថា បរិមាណ និងរយៈពេលហូរច្រោះរបស់ទន្ល បានធ្វើឱ្យភ្នំមានកម្ពស់កាន់តែខ្ពស់នោះ គឺមិនប្រាកដប្រជាទេ ។ នេះជាទិន្នន័យស៊ីជម្រៅ និងគួរឱ្យរំភើប ។

គួរបញ្ជាក់ថា ភ្នំអេវឺរេសស្ថិតនៅលើព្រំដែនរវាងប្រទេសចិន និងនេប៉ាល់ ដោយផ្នែកខាងជើងនៃកំពូលភ្នំស្ថិតនៅចិន ។ រីឯទឹកទន្លេ Arun បានហូរពីទីបេមកប្រទេសនេប៉ាល់ និងរួមបញ្ចូលគ្នាជាមួយទឹកទន្លេចំនួន២ទៀត ហើយក្លាយជាទន្លេ Koshi ។ ទឹកទន្លេ Koshi បានហូរទៅកាន់ភាគខាងជើងប្រទេសឥណ្ឌា និងហូរចូលក្នុងទន្លេគង្គា ៕

ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៤-២០២៥ នឹងចាប់ផ្តើមនាថ្ងៃទី៨ ខែតុលា ឆ្នាំ២០២៤ នេះ ដោយសង្កេតឃើញថា មុនថ្ងៃប្រឡងប៉ុន្មានថ្ងៃ បេក្ខជនមួយចំនួនបានធ្វើការបន់ស្រន់នៅទីតាំងស័ក្តិសិទ្ធនានា ស្របតាមជំនឿរបស់ប្រជាជនខ្មែរតំាងពីបុរាណកាលមក ដើម្បីសុំសេចក្តីសុខចម្រើន ក៏ដូចជាប្រកបកិច្ចការអ្វីមួយបានដោយរលូន។

យោងតាមការគូសបញ្ជាក់ពី Anti Corruption Unit បានឲ្យដឹងថានាព្រឹកថ្ងៃទី ៧ ខែតុលា ឆ្នាំ២០២៤ បេក្ខជនប្រឡងបាក់ឌុបខេត្តសៀមរាប នាំគ្នាមកបួងសួងសុំពរជ័យនៅព្រះអង្គចេកព្រះអង្គចម នៅមុនការប្រឡងស្អែកនេះ។

ទោះជាយ៉ាងណា នៅតាមកន្លែងបន់ស្រន់ជាច្រើនទៀត ដូចជា ព្រះអង្គដងកើ មុខព្រះបរមរាជវាំង, រូបសំណាក់តាមមណ្ឌលប្រឡងនានា ក៏មានការគោរពបួងសួងជាហូរហែរ ក្នុងចំណោមបេក្ខជនប្រឡងផងដែរ។

តាមរយៈទិដ្ឋភាពទាំងនេះ អ្នកលេងបណ្តាញសង្គមជាច្រើនក៏បានចូលទៅបញ្ចេញមតិព្រោងព្រាត ដោយអ្នកខ្លះបានលើកឡើងថា «មិនអាចលេងសើច ឬក៏សើចចំអកបានទេ ការបន់ស្រន់ក៏ជាផ្នែកមួយដែលធ្វើឲ្យស្មារតីនិងទឹកចិត្តរបស់យើងរឹងមាំកាត់បន្ថយការភ័យខ្លាច នឹងបញ្ហាដែលកើតឡើងមិនអាចព្រៀងទុកមុនបាន ដែរកំឡុងពេលប្រឡង..ព្រោះគ្រប់គ្នាសុទ្ធតែដឹងសមត្ថភាពរៀងៗខ្លួន ចេះគឺជាប់ ស៊ូៗអូនៗ»។

ម្នាក់ទៀតថា«វាមិនបានអ្វីមែនតែវាបានជាសេចក្ដីសុខផ្លូវចិត្ត មិនជាខុសឆ្គងអ្វីទេ បូករួមជាមួយសមត្ថភាពខ្លួនឯង វាជាទំនៀមទម្លាប់យើងតាំងពីដើមហើយ គេជឿលើព្រះជាម្ចាស់យើងជឿលើ អារក្ស អ្នកតា»។ រីឯម្នាក់ទៀតថា«កាលខ្ញុំប្រលងក៏បន់ដែរ បន់ឲ្យសុខសប្បាយតាមផ្លូវទៅមក កុំឲ្យមានឈឺពេលប្រលង កុំឲ្យមានឧបសគ្គមើលមិនឃើញ សុំឲ្យអាកាសធាតុល្អងាយស្រួលប្រលង សុំឲ្យចិត្តស្ងប់មិនមានទុក្ខភ័យ»។

គួរបញ្ជាក់ថា ការខិតខំប្រឹងប្រែងរៀនសូត្ររយៈពេល១២ ឆ្នាំ ដើម្បីបានបញ្ចេញសមត្ថភាពរយៈពេលត្រឹមតែ២ថ្ងៃនេះពិតជាសំខាន់សម្រាប់សិស្សានុសិស្សគ្រប់ៗរូប តែទោះជាយ៉ាងណា មុនថ្ងៃប្រឡង បេក្ខជនទាំងអស់ត្រូវតែថែរក្សាសុខភាពឲ្យបានល្អ ញ៉ាំអាហារដែលមានជីវជាតិ និងសម្រាកឲ្យបានគ្រប់គ្រាន់ ទើបជាការប្រសើរ។ ជាចុងក្រោយក៏សូមជូនពរអោយបេក្ខជនទាំងអស់ធ្វើដំណើរឆ្ពោះទៅកាន់សមរភូមិប្រឡងប្រកបដោយសុវត្ថិភាព និងប្រឡងជាប់គ្រប់ៗគ្នាផងដែរ៕