ប្រទេសជប៉ុន ៖ ការឡើងកំដៅផែនដីបានធ្វើឱ្យកម្រិតទឹកសមុទ្រកើនឡើងយ៉ាងខ្លាំងគួរឱ្យភ្ញាក់ផ្អើល ហើយបណ្តាលឱ្យទីក្រុងឆ្នេរសមុទ្រទូទាំងពិភពលោក ប្រឈមនឹងគ្រោះថ្នា.ក់ នៅឆ្នាំ២០៥០ ។ អ្នកជំនាញព្យាករថា មនុស្សជិត៣០០លាននាក់ដែលរស់នៅតំបន់ឆ្នេរសមុទ្រ នឹងរង.គ្រោះ ដោយសារទឹកលិចជារៀងរាល់ឆ្នាំ ។ ហេតុនេះ ក្រុមហ៊ុនជប៉ុនមួយឈ្មោះ N-Ark ក៏បានបង្កើតគម្រោងទីក្រុងអណ្តែតទឹកដែលមានអ្វីៗទាំងអស់ដើម្បីដោះស្រាយបញ្ហានេះ ។

Dogen City នឹងក្លាយជាទីក្រុងមានអង្កត់ផ្ចិតប្រមាណ១.៥៨គីឡូម៉ែត្រ និងមានប្រវែងព័ទ្ធជុំវិញទីក្រុង ប្រមាណ៤គីឡូម៉ែត្រ ។ ទីក្រុងនេះនឹងមានកម្ពស់២ជាន់ និងមានរាងជារង្វង់មូល ហើយទីក្រុងរង្វង់មូលនឹងការពារអ្នករស់នៅឱ្យចៀសផុតពីរលកយក្សស៊ូណាមិ ។ នៅជាន់លើបំផុតរបស់ទីក្រុងនឹងប្រើប្រាស់ថាមពលស្អាតសម្រាប់ឱ្យទីក្រុងអណ្តែតលើទឹកសមុទ្រដោយខ្លួនឯង ខណៈជាន់នៅក្រោមសមុទ្រ នឹងក្លាយជាមជ្ឈមណ្ឌលព័ត៌មានសមុទ្រសម្រាប់ការរៀបចំទីក្រុង, ការថែទាំសុខភាព និងការស្រាវជ្រាវវេជ្ជសាស្ត្រ ។

ទីក្រុងអណ្តែតទឹកនឹងទទួលឱ្យមនុស្សរស់នៅចំនួន១ម៉ឺននាក់ និងទទួលភ្ញៀវទេសចរចំនួន៤ម៉ឺននាក់ទៀត ហើយទីក្រុងនេះមានអ្វីៗគ្រប់យ៉ាង ដូចជា ៖ សាលារៀន, ពហុកីឡដ្ឋាន, ការិយាល័យធ្វើការ, សណ្ឋាគារ, កន្លែងរៀបចំពិធីសាសនា និងសួនច្បារសាធារណៈ ។ ចំណុចសំខាន់ អ្នករស់នៅទីក្រុងអណ្តែតទឹកនឹងអាចដាំដំណាំផ្សេងៗក្នុងកសិដ្ឋានទទួលទិន្នផលរហូតដល់៧.០០០តោនក្នុង១ឆ្នាំ ដោយការប្រើប្រាស់ទឹកសមុទ្រស្រោចស្រព ។

ក្រៅពីនេះ ក៏មានមន្ទីរពេទ្យសម្រាប់ព្យាបាលអ្នករស់នៅក្នុងទីក្រុងអណ្តែតទឹក ឬភ្ញៀវទេសចរអាចមកពិនិត្យសុខភាព ឬទទួលការព្យាបាលជំងឺបែបទំនើបនៅមន្ទីរពេទ្យ ។ ក្រុមហ៊ុនជប៉ុនថែមទាំងមានមហិច្ឆតាអភិវឌ្ឍទីក្រុង Dogen ឱ្យកាន់តែជឿនលឿនជាងនេះ គឺបង្កើតទីតាំងការហោះហើរ និងការចុះចតរបស់យានអវកាសសម្រាប់ផ្នែកអាកាសចរណ៍អវកាស ។

ក្រុមហ៊ុន N-Ark បានកំណត់គោលដៅថា នឹងបង្កើតទីក្រុងអណ្តែតទឹកនេះឱ្យរួចរាល់នៅឆ្នាំ២០៣០ ។ ប៉ុន្តែក្រុមហ៊ុននេះពុំទាន់បញ្ជាក់ព័ត៌មានលម្អិតសំខាន់ៗ ដូចជា ៖ ទីតាំង និងការចំណាយដើមទុនសម្រាប់ដំណើរការគម្រោងសាងសង់ទីក្រុងអណ្តែតទឹកទេ ។

គួរបញ្ជាក់ថា មិនមែនមានតែប្រទេសជប៉ុនមួយទេ ដែលមានគម្រោងបង្កើតទីក្រុងអណ្តែតទឹក កន្លងមក ប្រទេសកូរ៉េខាងត្បូងក៏បានប្រកាសពីគម្រោងបង្កើតទីក្រុងអណ្តែតទឹកនៅទីក្រុង Busan ដែរ ដែកនឹងទទួលមនុស្សឱ្យរស់នៅចំនួន១សែននាក់ ។ រីឯប្រទេសហូឡង់ បានបង្កើតទីក្រុងអណ្តែតទឹក និងសាងសង់ផ្ទះជាច្រើនខ្នងសម្រាប់ឱ្យពលរដ្ឋរស់នៅកាលពីឆ្នាំ២០២១ ៕

ដើម្បីទាក់ទាញអតិថិជន ភោជនីយដ្ឋានមួយក្នុងប្រទេសវៀតណាមដែលទើបនឹងបើកថ្មីៗ បានបង្កើតម៉ឺនុយអាហារប្លែកៗជាច្រើនដូចជា “មីទឹកដោះគោគុជ” ដែលបច្ចុប្បន្នកំពុងទទួលបានការចាប់អារម្មណ៍ខ្លាំងពេញបណ្តាញសង្គមទាំងក្នុង និងក្រៅប្រទេស។
ភោជនីយដ្ឋាន Yu Tang ដែលមានមូលដ្ឋាននៅទីក្រុងហាណូយ ប្រទេសវៀតណាម គឺកំពុងមានប្រជាប្រិយភាពខ្លាំងណាស់ ដោយសារម៉ឺនុយថ្មីគឺ “មីទឹកដោះគោគុជ” ជាមួយរសជាតិប្លែកមិនធ្លាប់មាន មនុស្សជាច្រើនបានសរសើរមិនដាច់ពីមាត់ថាមានរសជាតិឆ្ងាញ់អស្ចារ្យ។

តែទឹកដោះគោគុជ ឬ Bubble Milk tea គឺជាភេសជ្ជៈដ៏ពេញនិយមបំផុតមួយសម្រាប់យុវវ័យទូទាំងពិភពលោក ដោយសារតែវាមានរសជាតិប្លែកបូករួមជាមួយគុជខ្មៅដ៏ស្រទន់ បានកំពុងធ្វើឱ្យមនុស្សជាច្រើនញៀននឹងភេសជ្ជៈនេះខ្លាំងណាស់។ ខណៈពេលដែលភេសជ្ជៈនេះកំពុងល្បី ភោជនីយដ្ឋានវៀតណាមមួយក៏ព្យាយាមទាញយកអត្ថប្រយោជន៍ពីភេសជ្ជៈនេះ ដើម្បីទាក់ទាញអតិថិជន ជាមួយម៉ឺនុយថ្មីប្លែកគឺ “មីទឹកដោះគោគុជ”។ រូបមន្តគឺយកតែទឹកដោះគោគុជធ្វើជាស៊ុបក្តៅៗស្រូបលើមី អមជាមួយសាច់គោ និងគុជខ្មៅ គួបផ្សំនឹងយុទ្ធសាស្ត្រទីផ្សារគួរឱ្យចាប់អារម្មណ៍ បានធ្វើឱ្យមុខម្ហូបនេះល្បីខ្លាំងបំផុតក្នុងពិភពអ៊ីនធឺណិត។

ទោះជាយ៉ាងណាម៉ឺនុយថ្មីនេះក៏មានមតិចម្រុះផងដែរ ដោយអ្នកខ្លះថា វាមានរសជាតិមិនសូវឆ្ងាញ់នោះទេ ដោយសាររសជាតិនីមួយៗមិនចូលគ្នាទាល់តែសោះ មានន័យថា មីដោយមី ទឹកដោះគោដោយទឹកដោះគោ គុជដោយគុជទៅ ហើយអ្នកខ្លះទៀតក៏ថា ម៉ឺនុយថ្មីនេះគឺពិតជាមានរសជាតិឆ្ងាញ់ប្លែកដែលពួកគេមិនធ្លាប់សាកពីមុនមកឡើយ។ ហេតុនេះសម្រាប់អ្នកដែលធ្វើដំណើរទៅហាណូយ ហើយចង់ពិសោធរសជាតិនៃ “មីទឹកដោះគោគុជ” អ្នកអាចទៅភោជនីយដ្ឋាន Yu Tang ដោយម៉ឺនុយថ្មីនេះមានតម្លៃជិត ៤ ដុល្លារក្នុងមួយចាន។

គួរបញ្ជាក់ដែរថា នេះមិនមែនជាលើកទីមួយទេ ដែលភោជនីយដ្ឋានវៀតណាមបានបង្កើតម៉ឺនុយប្លែកនេះ។ កាលពីមុនហាងកាហ្វេមួយក្នុងប្រទេសចិនក៏បានបង្កើតម៉ឺនុយប្លែកដែរ គឺកាហ្វេស្លឹកខ្ទឹម ហើយហាងមួយទៀត ក៏បានបង្កើតម៉ឺនុយ កាហ្វេរស់ជាតិសាច់ជ្រូកផងដែរ ក្នុងគោលបំណងទាក់ទាញអតិថិជន៕

ទស្សនិកជនជាអ្នកគាំទ្ររបស់បវរកញ្ញាចក្រវាលកម្ពុជាឆ្នាំ២០១៨ រឿន ណាត និងបុរសឯកកម្ពុជា លាវ វេងហួរ មានការភ្ញាក់ផ្អើលជាមួយនឹងអារម្មណ៍រីករាយក្រោយពីគូស្នេហ៍ថ្មីថ្មោងនេះបានសុំគ្នារៀបការនៅមុខប្រាសាទអង្គរវត្តយ៉ាងផ្អែមល្អែម។ អ្នកទាំងពីរបានប្រកាសចំណងស្នេហ៍ជាសាធារណៈចេញពីមាត់តែម្តងកាលពីខែមិថុនា ខណៈផ្ទុះពាក្យចចាមអារ៉ាមស្នេហានៅខែមីនា ក្នុងឆ្នាំ២០២៤នេះ។

កាលពីថ្ងៃទី១២ ខែតុលា ឆ្នាំ២០២៤ លាវ វេងហួរ Mister Friendship International2023 បានបង្ហោះរូបភាពសុំ រឿន ណាត Miss universe Cambodia 2018 ជាមិត្តស្រីរៀបការនៅមុខប្រាសាទអង្គរវត្តហើយចំថ្ងៃខួបកំណើតរបស់លោកផងដែរ។ លាវ វេងហួរ បានសរសេរថា « ថ្ងៃកំណើតដ៏សែនពិសេស អរគុណអូនដែលបានចូលមកជីវិតបង ដែលបានធ្វើឱ្យជីវិតបងមានសម្រស់និងមានន័យ បងសន្យាថាបងនឹងការពារបេះដូងអូនអស់មួយជីវិត»។ ការសុំគ្នារៀបការនេះខាង រឿន ណាត បានឆ្លើយយល់ព្រមចំពោះសំណើររបស់មិត្តប្រុសនឹងដឹកដៃចូលរោងការ។

ចំណែកឯចិញ្ចៀនដែល លាវ វេងហួរ សុំស្រីស្អាត រឿន ណាត ត្រូវបានគេដឹងមានតួលេខខ្ទង់ជាង២ម៉ឺនដុល្លារឯណោះ។ ដំណឹងល្អអ្នកទាំងពីរអ្នកគាំទ្រជាច្រើនរួមទាំងអ្នកក្នុងចង្កោមសិល្បៈបានចូលរួមសម្តែងនូវក្តីត្រេកអរចំពោះអ្នកទាំងពីរទោះបីជាមានទំនាក់ទំនងគ្នាមិនយូរឆ្នាំក្តីប៉ុន្តែបង្ហាញពីភាពច្បាស់លាស់ចំពោះគ្នា។

គួរបញ្ជាក់ថា ស្នេហាប្រុសសង្ហា លាវ វេងហួរ និងស្រីស្អាត រឿន ណាត កាន់តែផ្អែមល្ហែមពីមួយថ្ងៃទៅមួយថ្ងៃធ្វើឱ្យអ្នកគាំទ្រច្រណែនមិនស្ទើរនោះទេសូម្បីតែឃ្លាតគ្នាមួយថ្ងៃក៏បង្ហោះសារនឹករលឹកគ្នាទៅហើយ។ អ្នកទាំងពីរបានធ្វើឱ្យមានពាក្យចចាមអារ៉ាមស្នេហាកាលពីខែមីនា ខណៈនៅខែមេសា វេងហួរ កាន់តែធ្វើឱ្យអ្នកគាំទ្រកាន់តែច្បាស់ពីទំនាក់ទំនងអ្នកទាំងពីរបន្ទាប់ពីលោកហៅ រឿន ណាតថាជា My Girlfriend ក្នុងពេលណែនាំនាងទៅកាន់បុរសឯកវៀតណាម។

អ្នកទាំងពីរក៏បានលាតត្រដាងទំនាក់ទំនងនិងប្រកាសពេញមាត់ៗតែម្តងថាជាគូស្នេហ៍នៅពេលអ្នកទាំងពីរបានចូលរួមផ្តល់បទសម្ភាសន៍ក្នុងកម្មវិធីកម្សាន្ត 3Fun កាលពីខែមិថុនា និងបានបង្ហើបដែរថាទំនាក់ទំនងបានចាប់ផ្តើមនៅពេលអ្នកទាំងពីរមានឱកាសសម្តែងខ្សែភាពយន្តខ្នាតធំជាមួយគ្នា៕

នាអំឡុងខែវិច្ឆិកាខាងមុខនេះ កម្មវីធីប្រកួតសម្រស់អន្តរជាតិមួយទៀត Miss Planet International បង្កើតឡើងដោយកូនខ្មែរ នឹងដឹកនាំបវរកញ្ញាមកពីជុំវិញពិភពលោក មកកាន់ទឹកដីអច្ឆរិយៈគឺព្រះរាជាណាចក្រកម្ពុជា ធានាថានឹងល្បីរន្ទឺខ្លាំង។

យោងតាមការគូសបញ្ជាក់ពីប្រភពក្រសួងទេសចរណ៍បានឲ្យដឹងថា«បវរកញ្ញាជាង ៧០ប្រទេស នឹងមកកម្ពុជា ប្រកួតបវរកញ្ញាភពផែនដីអន្តរជាតិ ឆ្នាំ២០២៤ នៅខែក្រោយ! ការប្រកួតបវរកញ្ញាភពផែនដីអន្តរជាតិ ឆ្នាំ២០២៤ ដែលកម្ពុជាទទួលធ្វើជាម្ចាស់ផ្ទះជាលើកទី៤ នឹងត្រូវប្រព្រឹត្តិទៅពីថ្ងៃទី១៩ ដល់ថ្ងៃទី២៧ ខែវិច្ឆិកា ឆ្នាំ២០២៤ ហើយនេះក៏ជាកម្មវិធីដែលបង្កើតឡើងដោយកូនខ្មែរយើងផងដែរ!»។

ប្រភពដដែលបានគូសបញ្ជាក់ថា «Miss Planet International ហៅកាត់ថា MPI គឺជាកម្មវិធីប្រកួតសម្រស់អន្តរជាតិប្រចាំឆ្នាំ ដែលមានមូលដ្ឋានក្នុងប្រទេសកម្ពុជា។ MPI គឺជាស្ថាប័នមួយ ដែលផ្អែកលើគោលដៅអភិវឌ្ឍប្រកបដោយចីរភាព របស់អង្គការសហប្រជាជាតិ (UN) ពោលគឺហេតុផលនេះហើយ ទើបគេបង្កើតកម្មវិធីប្រកួតប្រជែង ដើម្បីស្វែងរកឯកអគ្គរដ្ឋទូត សម្រាប់ប្រទេសនីមួយៗ! តាំងពីបង្កើតឡើងនៅឆ្នាំ២០១៩ MPI តែងតែត្រូវបានរៀបចំឡើងរៀងរាល់ឆ្នាំ លើកលែងតែឆ្នាំ២០២១ និង ២០២២ ដោយសារបញ្ហាជំងឺរាតត្បាត!»។

គួរបញ្ជាក់ថា Miss Planet Cambodia 2024 គឺបានទៅលើកញ្ញា ដេត ស្រីនាឌ , Miss Planet Thailand គឺបានទៅលើកញ្ញា Panida Kernjinda “Dinsorsee” , Miss Planet Vietnam គឺកញ្ញា Quynh Nguyen ដែលនឹងតំណាងប្រទេសរៀងៗខ្លួន ទៅចូលរួមប្រកួតលើឆាកអន្តរជាតិនៅក្នុងកម្មវិធី Miss Planet International នេះ។ បន្ថែមពីនេះក៏មានបវរកញ្ញាមកពីប្រទេសជាច្រើនទៀត ដូចជា សហរដ្ឋអាមេរិក អាល្លឺម៉ង់ ស្វីស កូរ៉េ បារំាង អេស្បាញ អ៊ីតាលី ឥណ្ឌូណេស៊ី មីយ៉ាន់ម៉ា ភីលីពីនជាដើមផងដែរ៕

ប្រទេសចិន ៖ ភូមិបុរាណមួយស្ថិតនៅទីក្រុង Shangrao ខេត្ត Jiangxi ប្រទេសចិន មានអាយុកាលជាង១.០០០ឆ្នាំមកហើយ ដែលភូមិនេះត្រូវបានបង្កើតឡើងនៅចុងសម័យរាជវង្សហាន ។ ពេលភ្ញៀវទេសចរមកកម្សាន្តនៅទីនេះ ពួកគេនឹងបានឃើញលំនៅឋានតូច-ធំសាងសង់នៅតាមច្រាំងថ្មភ្នំ ហើយពលរដ្ឋចិនហៅភូមិនេះថា «ជ្រលងភ្នំទេវតា វាំងឈៀនគូ» ។

ភាពល្បីល្បាញ និងភាពអស្ចារ្យរបស់ភូមិបុរាណជ្រលងភ្នំទេវតា វាំងឈៀនគូ គឺសម្បូរផ្ទះតូច-ធំសាងសង់ឡើងនៅតាមច្រាំងថ្មភ្នំ និងមានកម្ពស់ខ្ពស់ជាងកម្រិតទឹកសមុទ្រ ប្រមាណ១.០០០ម៉ែត្រ ។ លើសពីនេះ ភូមិបុរាណក៏បានបង្កប់នូវប្រវត្តិសាស្ត្រ និងវប្បធម៌បុរាណចិនដ៏យូរអង្វែងរួមបញ្ចូលគ្នាជាមួយវប្បធម៌ទំនើប ។

ភូមិបុរាណជ្រលងភ្នំទេវតា វាំងឈៀនគូ (Wangxian Valley) គឺជាតំបន់ទេសចរណ៍មួយក្នុងចំណោមតំបន់ទេសចរណ៍ចំនួន១០កន្លែង ដែលភ្ញៀវទេសចរបានមកទស្សនាទេសភាពដ៏ស្រស់ស្អាតបំផុតនៅប្រទេសចិន កាលពីឆ្នាំ២០២២ ។ ភូមិនេះអាចទាក់ទាញភ្ញៀវទេសចររហូតដល់ជាង២សែននាក់ កាលពីអំឡុងពិធីបុណ្យឈប់សម្រាកនិទាឃរដូវ ។

ក្រៅពីភាពខុសប្លែករបស់អគារ និងលំនៅឋាននៅតាមច្រាំងថ្មភ្នំ បច្ចុប្បន្ន ភូមិនេះបានផ្តល់ភាពងាយស្រួលដល់ពលរដ្ឋក្នុងតំបន់ និងភ្ញៀវទេសចរគ្រប់បែបយ៉ាង ដូចជា ៖ ហាងលក់ទំនិញ, ក្លិប, ហាងកាហ្វេ, អាហារតាមផ្លូវ និងសណ្ឋាគារ ដោយភ្ញៀវទេសចរអាចធ្វើដំណើរតាមយន្តហោះ, រថភ្លើង និងរថយន្តក្រុង ។ ភ្ញៀវទេសចរមកកម្សាន្តនៅទីនេះនិយាយថា ពួកគេរំភើបយ៉ាងខ្លាំង និងមានអារម្មណ៍ថា ហាក់បានត្រឡប់ទៅរកអតីតកាលដ៏រុងរឿង ។

កន្លងមក ភូមិទេសចរណ៍នេះបានទាក់ទាញភ្ញៀវទេសចរក្នុងស្រុកប៉ុណ្ណោះ ប៉ុន្តែនៅឆ្នាំ២០១១ មានក្រុមហ៊ុនទេសចរណ៍ចូលមកកែលម្អ និងរៀបចំភូមិនេះឱ្យមានលក្ខណៈស្តង់ដារ ដើម្បីផ្តល់ភាពងាយស្រួលដល់ភ្ញៀវទេសចរ ដូចជា ៖ សាងសង់ផ្លូវ, សណ្ឋាគារ, ហាងលក់ទំនិញ និងភោជនីយដ្ឋានជាច្រើនកន្លែង ។ បច្ចុប្បន្ន ភូមិនេះក៏បានក្លាយជាតំបន់ទេសចរណ៍លំដាប់ 4A ក្នុងខេត្ត Jiangxi ។

កាលពីចុងសម័យរាជវង្សហាន ពលរដ្ឋចិនបានចាប់ផ្តើមមកសង់លំនៅឋាននៅតាមច្រាំងថ្មភ្នំខ្ពស់ៗ ហើយមនុស្សទូទៅពិបាកធ្វើដំណើរមកដល់ទីនេះណាស់ ដោយសារពួកគេចង់ការពារខ្លួនពីសត្រូវ និងសត្វព្រៃ ។ ការរស់នៅទីនេះមានភាពងាយស្រួលសម្រាប់ពួកគេ ដោយសារសម្បូរធនធានធម្មជាតិ ដូចជា ៖ មានទឹកប្រើគ្រប់គ្រាន់, ព្រៃឈើ និងសត្វព្រៃ ។

បើទោះជាភូមិបុរាណបានកែលម្អបរិស្ថានឱ្យទំនើបទាន់សម័យក្តី ប៉ុន្តែភូមិនេះពុំបានបាត់បង់ធម្មជាតិពណ៌បៃតងទាំងអស់ទេ ពីព្រោះបរិយាកាសក្នុងតំបន់មួយចំនួនរបស់ភូមិនៅតែមានភាពស្ងប់ស្ងាត់ ដូចជា ៖ មានទន្លេហូរកាត់ជ្រលងភ្នំ និងតំបន់ស្រស់ស្អាតជាច្រើនសម្រាប់ភ្ញៀវទេសចរថតរូប ។ ភ្ញៀវទេសចរពុំគួរមើលរំលងភូមិបុរាណជ្រលងភ្នំទេវតា វាំងឈៀនគូ ទេ ពីព្រោះនៅទីនេះមានទេសភាពស្អាតៗ និងអាចស្រូបយកខ្យល់អាកាសបរិសុទ្ធ ។

ភ្ញៀវទេសចរអាចមកលេងភូមិនេះពេញមួយឆ្នាំ ប៉ុន្តែបើភ្ញៀវទេសចរណាចូលចិត្តអាកាសធាតុល្មម គឺមិនក្តៅខ្លាំងពេក ឬត្រជាក់ពេក និងពុំចាំបាច់បារម្ភពីអាកាសធាតុប្រែប្រួល ពួកគេអាចមកលេងនៅនិទាឃរដូវ (ចាប់ពីខែមីនា ដល់ខែឧសភា) និងរដូវស្លឹកឈើជ្រុះ (ចាប់ពីខែកញ្ញា ដល់វិច្ឆិកា) ពីព្រោះវាជាអំឡុងពេលងាយស្រួលបំផុតសម្រាប់ការដើរកម្សាន្ត ៕

ប្រទេសបារាំង ៖ កាលពីថ្ងៃទី១២ ខែតុលា ឆ្នាំ២០២៤ មានមនុស្សស្លា.ប់ ៤នាក់នៅភាគខាងលិចប្រទេសបារាំង ក្រោយពីរថយន្តអគ្គិសនី១គ្រឿងរបស់ក្រុមហ៊ុន Tesla ផ្ទុះឆេះដោយគ្មានមូលហេតុពេលកំពុងបើកបរនៅតាមផ្លូវ ។ វាធ្វើឱ្យមានការភ្ញាក់ផ្អើលយ៉ាងខ្លាំង និងចង់ដឹងពីមូលហេតុពិតប្រាកដថា តើបណ្តាលមកពីបច្ចេកវិទ្យាក្នុងរថយន្ត ឬយ៉ាងណា?

ហេតុការណ៍នេះបានកើតឡើងនៅក្រៅទីក្រុង Dior ដែលធ្វើឱ្យម្ចាស់រថយន្ត Tesla និងអ្នករួមដំណើរ៣នាក់ទៀតស្លាប់ ហើយពួកគេជាបុគ្គលិកធ្វើការក្នុងភោជនីយដ្ឋានមួយកន្លែងនៅទីក្រុង Melle ស្ថិតនៅក្បែរទីក្រុង Dior ។ នេះបើតាមការលើកឡើងរបស់សមត្ថកិច្ច និងប្រភពព័ត៌មានជិតស្និទ្ធ ។

សារព័ត៌មាន AFP រាយការណ៍ថា ៖ «សមត្ថកិច្ចបានស៊ើបអង្កេតពីមូលហេតុភ្លើងឆេះរថយន្តអគ្គិសនីដែលបណ្តាលឱ្យមនុស្សស្លាប់នេះ ហើយក៏បានស្នើឱ្យអ្នកជំនាញផ្នែកយានជំនិះមកជួយត្រួតពិនិត្យរថយន្តផងដែរ» ។

តាមការស៊ើបអង្កេតបឋមបង្ហាញថា រថយន្តអគ្គិសនីនេះបានបើកបរក្នុងល្បឿនយ៉ាងលឿន និងបុកស្លាកសញ្ញាចរាចរណ៍ជាច្រើននៅតាមផ្លូវ បន្ទាប់មក រថយន្តក៏បានផ្ទុះឆេះភ្លាមៗដោយពុំដឹងមូលហេតុ ។ ពេលក្រុមភ្នាក់ងារសង្គ្រោះបន្ទាន់ធ្វើដំណើរមកដល់កន្លែងកើតហេតុឃើញថា ម្ចាស់រថយន្ត Tesla និងអ្នករួមដំណើរផ្សេងទៀតបានស្លាប់ទាំងអស់ ។

រថយន្តរបស់ក្រុមហ៊ុន Tesla ជារបស់លោក Elon Musk មហាសេដ្ឋីលំដាប់ពិភពលោក បានធ្វើការត្រួតពិនិត្យសុវត្ថិភាពការបើកបររបស់រថយន្តជាញឹកញាប់នាពេលកន្លងមក ។ កាលពីខែមេសា ឆ្នាំ២០២៤ ក្រុមហ៊ុន Tesla បានដោះស្រាយបញ្ហាជាមួយគ្រួសារវិស្វករម្នាក់ ដែលបានស្លាប់ក្នុងហេតុការណ៍រថយន្ត Tesla X មានគ្រោះថ្នាក់ក្នុងឆ្នាំ២០១៨ នៅតំបន់ Silicon Valley រដ្ឋកាលីហ្វ័រញ៉ា សហរដ្ឋអាមេរិក ដើម្បីចៀសវាងការដោះស្រាយក្នុងតុលាការ ។

សារព័ត៌មានបរទេសរាយការណ៍ថា អ្នកបើកបររថយន្តរូបនេះបានប្រើប្រាស់ Auto Filter របស់ Tesla ពេលកំពុងបើករថយន្តតាមផ្លូវនៅរដ្ឋកាលីហ្វ័រញ៉ា សហរដ្ឋអាមេរិក ហើយរថយន្តក៏បានបុករបាំងស៊ីម៉ងត៍នៅកណ្តាលផ្លូវ ។

គួរបញ្ជាក់ថា កាលពីខែធ្នូ ឆ្នាំ២០២៣ ក្រុមហ៊ុន Tesla ធ្លាប់បានប្រមូលរថយន្តជាង២លានគ្រឿងនៅសហរដ្ឋអាមេរិក និងកាណាដា ដើម្បីត្រួតពិនិត្យគ្រោះថ្នាក់ផ្សេងៗពាក់ព័ន្ធនឹងកម្មវិធី AutoFlight ដោយសារកម្មវិធីនេះធ្វើឱ្យរថយន្តមានគ្រោះថ្នាក់នៅតាមផ្លូវ ៕

បន្ទាប់ពីបាត់ខ្លួនជាងមួយសតវត្សមក ថ្មីៗនេះអ្នកវិទ្យាសាស្ត្រទើបតែបានរកឃើញសត្វចម្លែកមួយក្បាលដែលមានឈ្មោះថា Voeltzkow នៅក្នុងឧទ្យានជាតិម៉ាដាហ្គាស្កា នៃប្រទេសម៉ាដាហ្គាស្កា ដែលនេះគឺជាលើកដំបូងហើយដែលសត្វដ៏កម្រមួយប្រភេទនេះបានលេចឡើងឱ្យមនុស្សយើងបានឃើញវាម្តងទៀត។

Voeltzkow បានបាត់ខ្លួន ១០០ ឆ្នាំហើយដោយអ្នកវិទ្យាសាស្ត្រគិតថា សត្វនេះទំនងជាផុតពូជបាត់ទៅហើយ។ វាគឺជាសត្វដ៏កម្របំផុតមួយនៅក្នុងពិភពធម្មជាតិ ដោយសារសត្វប្រភេទនេះពិបាកចាប់ណាស់ ព្រោះវាមិនងាយបង្ហាញខ្លួនឱ្យមនុស្សយើងបានឃើញងាយៗនោះទេ ហើយភាគច្រើនចេញតែក្នុងរដូវវស្សា បន្តពូជ និងលូតលាស់លឿនណាស់ ដូច្នេះអាយុរបស់វាក៏ខ្លីខ្លាំងណាស់ដែរ។

ក្នុងចំណោមសត្វឆ្អឹងកងជើងបួនទាំងអស់ សត្វមួយប្រភេទនេះគឺមានអាយុកាលខ្លីបំផុតមិនធ្លាប់មាន ដែលអាយុវែងបំផុតរបស់ពួកវាគឺត្រឹមតែ ៣ ខែប៉ុណ្ណោះ។ តាមពិតទៅ អ្នកស្រាវជ្រាវបានចាប់ផ្តើមស្វែងរកវត្តមានរបស់សត្វ Voeltzkow នៅក្នុងព្រៃនៃប្រទេសម៉ាដាហ្គាស្ការក្នុងខែមីនា ឆ្នាំ ២០១៨ ឯណោះប៉ុន្តែមិនមានលទ្ធផលណាមួយគួរឱ្យកត់សម្គាល់នោះទេ រហូតមកដល់ពេលថ្មីៗនេះ ទើបអ្នកវិទ្យសាស្ត្របានរកឃើញពួកវា ដែលនេះគឺជាដំណឹងដ៏ល្អបំផុតមួយរបស់ពួកគេ។

ពួកគេបានរកឃើញសត្វ Voeltzkow ៩-១០ ក្បាលនៅក្នុងព្រៃជាមួយកាយសម្បទាដ៏រឹងមាំ និងមានសុខភាពល្អបំផុត។ ដោយសារតែសត្វនេះមានអាយុខ្លីជាងគេ និងមិនងាយបង្ហាញខ្លួនឱ្យមនុស្សឃើញ ថែមទាំងបាត់ខ្លួនជាង ១០០ ឆ្នាំរួមទាំងជម្រកធម្មជាតិក៏កំពុងបន្តធ្លាក់ចុះផងដែរនោះ អ្នកវិទ្យសាស្ត្រក៏បានគិតថាពួកវាបានផុតពូជបាត់ទៅហើយ។ ទោះជាយ៉ាងណានៅពេលដែលឃើញវត្តមានរបស់ពួកវានាពេលថ្មីៗនេះ អ្នកវិទ្យសាស្ត្រសន្មត់ថា ពួកវានៅតែមានជីវិត ហើយទំនងជាមិនងាយផុតពូជនោះទេ។

Voeltzkow មានភាពល្បីល្បាញដោយសារសមត្ថភាពក្លែងបន្លំដ៏ប៉ិនប្រសប់របស់វា ដោយសារស្បែករបស់វាអាចផ្លាស់ប្តូរពណ៌បានយ៉ាងឆាប់រហ័សទៅតាមបរិយាកាសធម្មជាតិដោយមានពណ៌បៃតងខ្ចី ខៀវ បៃតងចាស់ ស្វាយ ទឹកក្រូច ខ្មៅ និងស ដែលពណ៌ទាំងអស់នេះនឹងត្រូវបានលាយបញ្ចូលគ្នានៅក្នុងលំនាំតែមួយគត់នៅលើស្បែក ដោយហេតុនេះជួយឱ្យពួកវាងាយស្រួលក្នុងការបរបាញ់ និងជាពិសេសនោះគឺគេចចេញពីសត្រូវតែម្តង៕

វត្តភូដែលជាប្រាសាទដ៏ពិសិដ្ឋមួយមានអាយុកាល ១,០០០ ឆ្នាំក្នុងប្រទេសឡាវបានកំពុងអង្រួនចិត្តភ្ញៀវទេសចរទាំងក្នុងស្រុក និងក្រៅស្រុកឱ្យមកទស្សនានូវទិដ្ឋភាពទីក្រុងបែបបុរាណយ៉ាងច្រើនកុះករពីមួយឆ្នាំទៅមួយឆ្នាំ។
ប្រាសាទវត្តភូគឺជាអតីតប្រាសាទមួយរបស់ខ្មែរ ដែលត្រូវបានកសាងឡើងនៅកំឡុងពាក់កណ្តាលស.វទី ១០ ក្នុងរាជ្យព្រះបាទយសោវរ្ម័នទី១ ពោលគឺកសាងមុនប្រាសាទអង្គរវត្តទៅទៀត។ បច្ចុប្បន្នប្រាសាទនេះមានទីតាំងនៅលើចង្កេះភ្នំភូកៅនៃតំបន់វប្បធម៌ប៉ាក់សេ ខេត្តចំប៉ាសាក់ របស់សាធារណរដ្ឋប្រជាមានិតឡាវ។

ប្រាសាទវត្តភូ គឺជាគ្រាប់ពេជ្រវប្បធម៌ខ្មែរមួយដែលបានរបូតបាត់នាសម័យក្រោយអង្គរ ត្រូវបានសាងសង់ក្នុងរាជ្យព្រះរាជាច្រើនអង្គ ដូចជាព្រះបាទយសោវរ្ម័នទី១ ព្រះបាទសូរ្យវរ្ម័នទី១ ព្រះបាទសូរ្យវរ្ម័នទី២ និងព្រះបាទភវវរ្ម័នទី១ ដែលរូបរាងនៃប្រាសាទគឺពិតជាស្រដៀងគ្នាយ៉ាងខ្លាំងទៅនឹងប្រាសាទព្រះវិហាររបស់ខ្មែរយើងខ្លាំងណាស់។ ប្រាសាទនេះគឺជាទីគោរពបូជារបស់សត្វមានជីវិតជាច្រើន ដែលជានិមិត្តរូបនៃព្រះសិវៈក្នុងសាសនាហិណ្ឌូ។ ប៉ុន្តែក្នុងសតវត្សទី ១៣ ប្រាសាទនេះក៏បានប្រែក្លាយទៅជាវត្តព្រះពុទ្ធសាសនា ហើយក៏ក្លាយទៅជាទីសក្ការៈបូជារបស់ពុទ្ធសាសនិករហូតមកដល់សព្វថ្ងៃនេះផងដែរ។

ប្រាសាទវត្តភូគឺជាប្រាសាទភ្នំ ដែលបែរមុខទៅទិសខាងកើតមានរាងជាក្រចាប់សេះ ហើយស្ថាបត្យកម្មដែលមានភាពអស្ចារ្យជាងគេនោះគឺជណ្ដើរបុរាណថ្មដាជាថ្នាក់ៗមានប្រវែង ១៣០០ ម៉ែត្រប្រកបដោយក្បាច់រចនាយ៉ាងល្អឥតខ្ចោះ។ ប្រសិនបើបងប្អូនប្រជាពលរដ្ឋចង់ទៅទស្សនាប្រាសាទមួយនេះយើងអាចធ្វើដំណើរតាមរយ:រថយន្តបានដោយ មានចម្ងាយប្រហែល ៦៦០ គីឡូម៉ែត្រពីរាជធានីភ្នំពេញ ឬចម្ងាយ ៣០០ គីឡូម៉ែត្រពីទីរួមខេត្តស្ទឹងត្រែងប្រទេសកម្ពុជាយើង។

បន្ទាប់មកយើងត្រូវធ្វើដំណើរដោយម៉ូតូឬរថយន្តក៏បាននូវចម្ងាយ ៤៥ គ.ម ឬ ៥០ នាទីពីទីក្រុងប៉ាក់សេ តាមបណ្ដោយទន្លេមេគង្គ។ ពិសេសជាងនេះទៅទៀត តាមផ្លូវធ្វើដំណើរភ្ញៀសទេសចរនឹងបានគយគន់ផ្ទះ បែបជនបទនិងទេសភាពវាលស្រែខៀវស្រងាត់ ជាមួយសកម្មភាពដកស្ទូងរបស់ប្រជាកសិករឡាវ អមជាមួយភ្នំហំព័ទ្ធដោយផ្សែងអ័ព្ទនៅខាងក្រោយដាច់កន្ទុយភ្នែកគួរឱ្យចាប់អារម្មណ៍បំផុត។ ដូច្នេះបច្ចុប្បន្នប្រាសាទដ៏ល្អឯកមួយនេះបានកំពុងឆក់យកបេះដូងភ្ញៀវទេសចររាប់ពាន់នាក់ឱ្យមកទស្សនានូវទិដ្ឋភាពទីក្រុងបែបបុរាណយ៉ាងច្រើនកុះករ៕

ប្រទេសថៃ ៖ រដ្ឋាភិបាលថៃតែងតែលើកទឹកចិត្ត ឬលើកលែងទិដ្ឋាការសម្រាប់ភ្ញៀវទេសចរបរទេស ដើម្បីឱ្យពួកគេមកកម្សាន្តនៅប្រទេសថៃឱ្យបានច្រើន ដូចជា ៖ តាមផ្លូវអាកាស ផ្លូវគោក និងផ្លូវទឹក ។ លើសពីនេះ ថៃក៏បានកែលម្អអាកាសយានដ្ឋានរបស់ខ្លួនឱ្យកាន់តែធំ និងទំនើបផងដែរ ដោយសង្ឃឹមថា ជនបរទេសនឹងមានភាពងាយស្រួលពេលធ្វើដំណើរមកដល់ថៃ ។

ប៉ុន្តែជនបរទេសលើកឡើងថា ពួកគេពិបាកប្រើប្រាស់ជណ្តើរយន្តនៅអាកាសយានដ្ឋានថៃខ្លាំងណាស់ ។ ពេលពួកគេឃើញជណ្តើរយន្តថៃម្តងៗ ស្ទើរតែកើតរោគចិត្តគ្រប់គ្នា ពីព្រោះវាជាជណ្តើរយន្តអន់បំផុត ដែលពួកគេពុំធ្លាប់ជួបប្រទះកន្លងមក ។ ហេតុអ្វីជនបរទេសនិយាយបែបនេះ?

នាពេលថ្មីៗនេះ អ្នកលេងបណ្តាញសង្គមនៅបរទេសជាច្រើនបានចែកចាយរូបភាពជណ្តើរយន្តអាកាសយានដ្ឋានប្រទេសថៃ នៅក្រុមជជែកក្នុងហ្វេសប៊ុក Hello Thailand ហើយនិយាយថា ពិបាកប្រើប្រាស់ណាស់ ។ ក្រោយការចែកចាយរូបភាពទាំងនេះ ក៏មានជនបរទេសរាប់រយនាក់ចូលមកបញ្ចេញមតិគាំទ្រការលើកឡើងខាងលើ និងចុច Emoji យំទៀតផង ។

ជនបរទេសម្នាក់បានបង្ហោះរូបភាពជណ្តើរយន្តក្នុងអាកាសយានដ្ឋានមួយកន្លែងនៅប្រទេសថៃ និងសរសេរថា «ជណ្តើរយន្តគួរឱ្យភ័យខ្លាចបំផុត» ។ ក្រោយមក ក៏មានជនបរទេសផ្សេងទៀតចូលមកបញ្ចេញមតិយល់ស្របជាមួយការលើកឡើងនេះ ពីព្រោះពួកគេមើលឃើញថា ជណ្តើរយន្តនៅអាកាសយានដ្ឋានថៃធ្លាប់មានបញ្ហាជាច្រើនកន្លងមក ។

ជនបរទេសម្នាក់និយាយថា ៖ «ការប្រើប្រាស់ជណ្តើរយន្តនេះ គឺដូចគ្នានឹងការដើរចូលក្នុងពន្ធនាគារដែរ និងជាជណ្តើរយន្តអន់បំផុត» ។ ជនបរទេសខ្លះទៀតថា ៖ «ស្អប់ជណ្តើរយន្តនេះណាស់ ពីព្រោះវាដូចជាផ្លូវនាំខ្លួនចុះពីឋានសួគ៌ ទៅកាន់ឋាននរក» ។

ជនបរទេសផ្សេងទៀតថា ៖ «វាជាជណ្តើរធ្វើដំណើរទៅកាន់ជំងឺផ្លូវចិត្ត ខ្ញុំស្អប់ជណ្តើរនេះណាស់ ខ្ញុំចង់ស្រក់ទឹកភ្នែក ពេលឃើញជណ្តើរម្តងៗ» ។ ដូចគ្នានេះ មតិមួយទៀតថា ៖ «មែនហើយ ខ្ញុំបានកើតរោគចិត្តភ្លាមៗ ក្រោយពីប្រើប្រាស់ជណ្តើររួចមក» ។

Hello Thailand គឺជាក្រុមជជែកក្នុងហ្វេសប៊ុកសម្រាប់ចែករំលែកចំណេះដឹង និងបទពិសោធន៍ផ្សេងៗរបស់ភ្ញៀវទេសចរបរទេសពេលធ្វើដំណើរមកប្រទេសថៃ ។ ជនបរទេសតែងតែបង្ហោះរឿងរ៉ាវដែលពួកគេបានជួបប្រទះ និងបញ្ចេញមតិវែកញែកក្នុងក្រុមនេះយ៉ាងច្រើន ។

គួរបញ្ជាក់ថា ជណ្តើរយន្តនៅអាកាសយានដ្ឋានប្រទេសថៃតែងតែមានបញ្ហាជាបន្តបន្ទាប់ ដូចជា ៖ កាលពីថ្ងៃទី៧ ខែវិច្ឆិកា ឆ្នាំ២០២៣ ជណ្តើរយន្តនៅអាកាសយានដ្ឋានដនមឿងខូច និងបណ្តាលឱ្យអ្នកដំណើរម្នាក់ជាប់ជើងក្នុងជណ្តើរយន្ត រហូតពិការជើងអស់មួយជីវិត ។ នៅខែដដែលនេះ ភ្ញៀវទេសចរចិនភ័យប៉ះសក់ម្តងហើយ ដោយសារជណ្តើរយន្តនៅផ្សារទំនើបថៃដំណើរការខុសប្រក្រតី ទើបជនបរទេសលើកឡើងថា ជណ្តើរយន្តថៃពិបាកប្រើប្រាស់ ៕