យោងតាមការស្រាវជ្រាវបង្ហាញថា អ្នកដែលមានតួនាទីក្នុងផ្នែកគ្រប់គ្រងក្រុមហ៊ុន ស្មើនឹង៣៧% ចូលចិត្តធ្វើខ្លួនឱ្យរវល់ ឬបង្ហាញឥរិយាបថឱ្យគេមើលឃើញថា ខ្លួនកំពុងមមាញឹកនឹងការងារខ្លាំង (ហៅថា Fauxductivity) រហូតប៉ះពាល់ដល់ប្រសិទ្ធភាពការងារក្នុងក្រុម ឬលទ្ធផលការងារធ្លាក់ចុះ ។

ក្នុងសម័យដែលការងារផ្លាស់ប្តូរយ៉ាងឆាប់រហ័ស ជាពិសេស ក្រោយការឆ្លងរាតត្បាតរបស់ជំងឺកូវីដ-១៩ បញ្ហាប្រសិទ្ធភាពការងារនៅកន្លែងធ្វើការបានក្លាយជាបញ្ហាសំខាន់ដែលក្រុមហ៊ុននានាផ្តល់ភាពសំខាន់ ។ ចំណុចមួយគួរឱ្យចាប់អារម្មណ៍យ៉ាងខ្លាំង គឺ «Fauxductivity» ឬជាការបង្ហាញឱ្យគេឃើញថា ខ្លួនកំពុងធ្វើការ ហើយវាពុំត្រឹមតែកើតឡើងចំពោះបុគ្គលិកទូទៅទេ ប៉ុន្តែវាក៏បានកើតឡើងចំពោះអ្នកមានតួនាទីធំៗក្នុងក្រុមហ៊ុនផងដែរ ។

តាមការស្ទង់មតិរបស់ Workhuman បង្ហាញថា នាយកគ្រប់គ្រងក្រុមហ៊ុនជាង៤៨% យល់ឃើញថា ឥរិយាបថ «Fauxductivity» គឺជាបញ្ហាក្នុងក្រុមការងារ ។ អ្វីគួរឱ្យភ្ញាក់ផ្អើលនោះ គឺប្រធានក្រុមការងាររហូតដល់៣៧% ទទួលស្គាល់ថា ពួកគេធ្វើខ្លួនឱ្យរវល់ ឬធ្វើដូចជាកំពុងមមាញឹកនឹងការងារខ្លាំង បើធៀបនឹងបុគ្គលិកធម្មតា គឺស្មើត្រឹមតែ៣២% ។

ចំនួននេះកាន់តែខ្ពស់ថែមទៀតសម្រាប់អ្នកមានតួនាទីជានាយកប្រតិបត្តិជាន់ខ្ពស់ គឺស្មើរហូតដល់៣៨% ។ វាបង្ហាញថា ឥរិយាបថ «Fauxductivity» គឺជាបញ្ហាចាក់ឫសក្នុងវប្បធម៌ក្រុមហ៊ុន ជាពិសេស វាកើតឡើងក្នុងក្រុមហ៊ុនដែលធ្វើការតាមបែប «Always-on» ដែលផ្តោតលើការធ្វើការគ្រប់ពេលវេលា រហូតដល់ក្លាយជាការដាក់សម្ពាធ និងតានតឹងដល់បុគ្គលិក ។

ឥរិយាបថ «Fauxductivity» អាចបង្ហាញចេញមកក្រៅជារូបភាពផ្សេងៗ រួមមាន ៖

-Coffee Badging ៖ គឺជាការចូលការិយាល័យធ្វើការដើម្បីផឹកកាហ្វេ និងជជែកគ្នាជាមួយមិត្តរួមការងារ រួចហើយ ត្រឡប់ទៅផ្ទះវិញ
-Quiet Quitting ៖ គឺជាការប្រើប្រាស់កម្មវិធីអ្វីមួយដើម្បីឱ្យអ្នកដទៃមើលឃើញថា ខ្លួនកំពុងអនឡាញធ្វើការគ្រប់ពេលវេលា ។

ឥរិយាបថទាំងនេះ ក្រៅពីធ្វើឱ្យប៉ះពាល់ដល់ប្រសិទ្ធភាពការងារក្នុងក្រុមហ៊ុនហើយ វាក៏ធ្វើឱ្យមានឥទ្ធិពលវិជ្ជមានលើខ្លួនឯងរយៈពេលវែងផងដែរ ដូចជា ៖ ភាពតានតឹង, រងសម្ពាធ និងអស់កម្លាំងធ្វើការ ។

Meisha-ann Martin ជានាយកជាន់ខ្ពស់ផ្នែកវិភាគបុគ្គលិកលក្ខណៈ និងបានចូលរួមការស្រាវជ្រាវរបស់ Workhuman និយាយថា នាយកគ្រប់គ្រងមានតួនាទីសំខាន់ក្នុងការបង្កើតវប្បធម៌ក្រុមហ៊ុន និងលើកទឹកចិត្តឱ្យបុគ្គលិកហ៊ានបញ្ចេញមតិពេលជួបបញ្ហាការងារ ព្រមទាំងពុំចាំបាច់មានសម្ពាធការងារគ្រប់ពេលវេលា ។

ប៉ុន្តែការបង្កើតបរិយាកាសការងារបើកចំហ, ស្មោះត្រង់ និងផ្តល់ភាពសំខាន់លើតុល្យភាពរវាងជីវិតផ្ទាល់ខ្លួន និងការងារ វានឹងអាចជួយកាត់បន្ថយឥរិយាបថ «Fauxductivity» និងជំរុញឱ្យបុគ្គលិកបំពេញការងារយ៉ាងមានប្រសិទ្ធភាព ព្រមទាំងរីករាយនឹងការងារកាន់តែខ្លាំង ៕

ត្បូងពេជ្រ និងត្បូងមរកត គឺជាត្បូងដ៏ពេញនិយម និងមានតម្លៃថ្លៃបំផុតនៅលើពិភពលោក។ បើនិយាយពីត្បូងពេជ្រ និងត្បូងមរកតមួយណាជាត្បូងកម្រជាង? ច្បាស់ណាស់ប្រាកដជាត្បូងមរកតកម្រជាងហើយ។ យោងតាមគេហទំព័របរទេស Live Science នៅលើផែនដីយើងនេះសំណង់ថ្មដែលផ្ទុករ៉ែមរកតគឺមានតែ ៤៩ ប៉ុណ្ណោះ ខណៈសំណង់ថ្មដែលផ្ទុកត្បូងពេជ្រគឺមានប្រហែល ១០០០ ឯណោះ។ នេះមានន័យថា ពេជ្រគឺជាត្បូងដែលបង្កើតនៅជម្រៅដ៏ធំបំផុតលើភពផែនដី ប្រហែល ១៥០ ទៅ ២០០ គីឡូម៉ែត្រ ដូច្នេះត្បូងពេជ្រមិនពិបាកក្នុងការជីកយករ៉ែដូចត្បូងមរកតឡើយ។

ជារៀងរាល់ឆ្នាំ ត្បូងពេជ្រចំនួន ១០០ ទៅ ១៥០ លានការ៉ាត់ ស្មើនឹងប្រហែល ២០ ទៅ ៣០ តោន ត្រូវបានផលិតទូទាំងពិភពលោក ដោយសារតែឧស្សាហកម្មពេជ្រមានការរីកចម្រើនខ្លាំងជាង។ ទន្ទឹមនឹងនេះត្បូងមរកតមានត្រឹមតែ ៦ ទៅ ៩ តោនប៉ុណ្ណោះដែលត្រូវផលិតនៅក្នុងឆ្នាំ ២០១៥ ដោយសារតែឧស្សាហកម្មត្បូងមរកតកម្រ និងមិនសូវមានការរីកចម្រើននោះទេ ទើបបច្ចុប្បន្ននេះមិនសូវមានប្រទេសណាផលិតត្បូងមរកតឡើយ។

លើសពីនេះយោងតាមក្រុមហ៊ុន Gemfields បានឱ្យដឹងថា ការផលិតត្បូងផ្សេងៗទៀតក្រៅពីត្បូងពេជ្រគឺពិបាកណាស់ ព្រោះត្បូងផ្សេងទៀត ឬត្បូងមរកតត្រូវបានបង្កើតឡើងតាមរយៈដំណើរការស្មុគស្មាញបំផុត។ ត្បូងមរកតបង្កើតបានជារចនាសម្ព័ន្ធភូមិសាស្ត្រស្មុគ្រស្មាញជាងត្បូងពេជ្រ សមរម្យសម្រាប់ការជីកយករ៉ែដោយដៃខ្នាតតូច ខណៈត្បូងពេជ្យអាចជីកយករ៉ែខ្នាតធំបានយ៉ាងងាយស្រួល។ ត្បូងមរកតត្រូវបានគេរកឃើញជាញឹកញាប់នៅក្នុង “តំបន់ប៉ះពាល់” ដូចជាភ្នំ ដែលជាកន្លែងដែលចាន tectonic បុកគ្នា និងបរិយាកាសភូមិសាស្ត្រផ្សេងៗគ្នា។

ខណៈត្បូងពេជ្រត្រូវបានគេរកឃើញជុំវិញពិភពលោកតែម្តង ហើយទ្វីបដែលសម្បូរពេជ្រច្រើនជាងគេគឺទ្វីបអាហ្វ្រិក។ សរុបមកវិញរវាងត្បូងពេជ្រ និងត្បូងមរកតមួយណាជាត្បូងកម្រជាង? ច្បាស់ណាស់គឺត្បូងមរកតកម្រជាងហើយ នេះបើយោងតាមការចុះផ្សាយរបស់សារព័ត៌មានបរទេស Live Science៕

យោងតាមទិន្នន័យរបស់ Time Doctor បង្ហាញថា ប្រាក់ខែជាមធ្យមនៅតំបន់អាស៊ីអាគ្នេយ៍ គឺស្មើប្រមាណ១២.៨៨៣ដុល្លារអាមេរិកក្នុង១ឆ្នាំ ។ បើទោះជានៅតំបន់នេះមានកម្រិតប្រាក់ខែខុសគ្នាក្នុងប្រទេសនីមួយៗក្តី ប៉ុន្តែពលរដ្ឋរស់នៅក្នុងតំបន់មានឱកាសច្រើន និងមានជីវភាពសមរម្យ ។

Time Doctor បានចាត់ចំណាត់ថ្នាក់ឈ្មោះបណ្តាប្រទេសក្នុងតំបន់អាស៊ីអាគ្នេយ៍ដែលពលរដ្ឋទទួលបានប្រាក់ខែខ្ពស់ ក្នុងនោះប្រទេសថៃបានជាប់ចំណាត់ថ្នាក់ទី២ ដែលពលរដ្ឋថៃទទួលបានប្រាក់ខែជាមធ្យម ចាប់ពី២ម៉ឺនបាត ទៅ២ម៉ឺន៥ពាន់បាត (សម្រាប់និស្សិតទើបបញ្ចប់ការសិក្សា) ។ បើតួនាទីការងារខ្ពស់ គឺពលរដ្ឋថៃនឹងទទួលបានប្រាក់ខែជាមធ្យម ចាប់ពី៥ម៉ឺនបាត ទៅ១០ម៉ឺនបាត ។

ខាងក្រោមនេះ គឺជាឈ្មោះបណ្តាប្រទេសក្នុងតំបន់អាស៊ីអាគ្នេយ៍ដែលផ្តល់ប្រាក់ខែខ្ពស់ឱ្យពលរដ្ឋ ៖

១-សិង្ហបុរី ៖ ជាប្រទេសមានសេដ្ឋកិច្ចរឹងមាំបំផុតនៅតំបន់អាស៊ីអាគ្នេយ៍ ដោយសារសិង្ហបុរីជាមជ្ឈមណ្ឌលហិរញ្ញវត្ថុ និងបច្ចេកវិទ្យា ទើបធ្វើឱ្យប្រទេសនេះទាក់ទាញបុគ្គលិកធ្វើការមានបទពិសោធន៍មកពីជុំវិញពិភពលោក ។ ប្រាក់ខែជាមធ្យមនៅសិង្ហបុរីខ្ពស់ជាងប្រាក់ខែជាមធ្យមលើពិភពលោក គឺស្មើនឹង៦.៣៣២ដុល្លារអាមេរិកក្នុង១ខែ ។

២-ថៃ ៖ ជាប្រទេសមានទំហំសេដ្ឋកិច្ចធំលំដាប់ទី២ ក្នុងតំបន់អាស៊ីអាគ្នេយ៍ ហើយពលរដ្ឋថៃទទួលបានប្រាក់ខែជាមធ្យម ចាប់ពី២ម៉ឺនបាត ទៅ២ម៉ឺន៥ពាន់បាតក្នុង១ខែ (សម្រាប់តួនាទីចាប់ផ្តើមការងារ) ។ រីឯបុគ្គលិកមានជំនាញ និងបទពិសោធន៍ទទួលបានប្រាក់ខែចាប់ពី៥ម៉ឺនបាត ទៅ១០ម៉ឺនបាតក្នុង១ខែ ។

៣-ព្រុយណេ ៖ បើទោះប្រទេសនេះមានចំនួនពលរដ្ឋតិចក្តី ប៉ុន្តែព្រុយណេមានធនធានធម្មជាតិដ៏សម្បូរបែប ជាពិសេស ប្រេងឥន្ធនៈ និងឧស្ម័នធម្មជាតិ ។ កត្តាទាំងនេះជួយជំរុញព្រុយណេអាចផ្តល់ប្រាក់ខែខ្ពស់ឱ្យពលរដ្ឋ គឺប្រាក់ខែជាមធ្យមស្មើនឹង៣.២៣០ដុល្លារព្រុយណេក្នុង១ខែ (ឬស្មើ២.៦៣៦ដុល្លារអាមេរិក) ។

៤-ម៉ាឡេស៊ី ៖ គឺជាប្រទេសមួយទៀតដែលផ្តល់ប្រាក់ខែខ្ពស់ឱ្យពលរដ្ឋ ដោយពលរដ្ឋម៉ាឡេស៊ីមានឱកាសធ្វើការជាច្រើនផ្នែកគួរឱ្យចាប់អារម្មណ៍ ។ ប្រាក់ខែជាមធ្យមនៅម៉ាឡេស៊ី គឺស្មើនឹង៦.៦១០រីងហ្គីតក្នុង១ខែ (ឬស្មើ១.៥៤៥ដុល្លារអាមេរិក) ។

៥-ហ្វីលីពីន ៖ មានសេដ្ឋកិច្ចរីកចម្រើនយ៉ាងឆាប់រហ័សក្នុងតំបន់អាស៊ីអាគ្នេយ៍ និងជាប្រទេសគោលដៅពេញនិយមសម្រាប់ជនបរទេសមកធ្វើការ ដោយសារសម្បូរបុគ្គលិកមានជំនាញ និងមានការប្រកួតប្រជែងប្រាក់ឈ្នួល ។ ប្រាក់ខែជាមធ្យម គឺស្មើនឹង៤៤.៨០០ប៉េសូក្នុង១ខែ (ឬស្មើ៨៤៨ដុល្លារអាមេរិក) ។

៦-ឥណ្ឌូណេស៊ី ៖ ជាប្រទេសធំបំផុតនៅតំបន់អាស៊ីអាគ្នេយ៍ដែលមានពលរដ្ឋច្រើន និងសម្បូរធនធានធម្មជាតិ ។ បើទោះប្រាក់ខែនៅឥណ្ឌូណេស៊ីតិចជាងសិង្ហបុរី និងព្រុយណេ ប៉ុន្តែសេដ្ឋកិច្ចឥណ្ឌូណេស៊ីបានរីកចម្រើនជាបន្តបន្ទាប់ ។ ប្រាក់ឈ្នួលអប្បបរមាជាមធ្យម គឺស្មើនឹង៥.០៧លានរូពៀក្នុង១ខែ (ឬស្មើ៣៤៨ដុល្លារអាមេរិក) ខណៈប្រាក់ខែជាមធ្យម ស្មើនឹង១២.២លានរូពៀក្នុង១ខែ (ឬស្មើ៨៤៨ដុល្លារអាមេរិក) ។

៧-វៀតណាម ៖ ជាប្រទេសទាក់ទាញវិនិយោគិនពីក្រៅប្រទេសក្នុងរយៈពេលប៉ុន្មានឆ្នាំកន្លងមកនេះ ជាពិសេស ផ្នែកផលិត និងបច្ចេកវិទ្យា ។ ក្រៅពីនេះ វៀតណាមល្បីល្បាញមានទេសភាពស្រស់ស្អាត, ប្រវត្តិសាស្ត្រយូរអង្វែង និងជាមជ្ឈមណ្ឌលអាជីវកម្ម និងការវិនិយោគ ។ ប្រាក់ឈ្នួលអប្បបរមា ស្មើនឹង៤.៩៦១ដុងក្នុង១ខែ និងប្រាក់ឈ្នួលជាមធ្យម ស្មើនឹង១៧.៣លានដុងក្នុង១ខែ (ឬស្មើ៧២៧ដុល្លារអាមេរិក) ។

៨-ឡាវ ៖ ជាប្រទេសផ្តល់ប្រាក់ខែឱ្យពលរដ្ឋទាបជាងប្រទេសផ្សេងៗក្នុងតំបន់អាស៊ីអាគ្នេយ៍ ប៉ុន្តែដោយសារកំណើនសេដ្ឋកិច្ចឡាវមានស្ថិរភាព និងការវិនិយោគពីក្រៅប្រទេសកើនឡើង បានធ្វើឱ្យប្រាក់ចំណូលជាតិកើនឡើង ។ ប្រាក់ខែជាមធ្យម គឺចាប់ពី៩សែនគីប ទៅ១២សែនគីប (ឬស្មើពី៤៥ដុល្លារ ទៅ៦០ដុល្លារអាមេរិក) ។

៩-កម្ពុជា ៖ ក្នុងរយៈពេលប៉ុន្មានឆ្នាំមកនេះ សេដ្ឋកិច្ចកម្ពុជាបានកើនឡើងយ៉ាងឆាប់រហ័ស ជាពិសេស ក្នុងវិស័យទេសចរណ៍ និងការផលិត ។ បច្ចុប្បន្ន ប្រាក់ខែជាមធ្យមនៅកម្ពុជា គឺចាប់ពី១៥០ដុល្លារ ទៅ២០០ដុល្លារអាមេរិក ។

១០-មីយ៉ាន់ម៉ា ៖ ប្រាក់ឈ្នួលជាមធ្យមនៅមីយ៉ាន់ម៉ា គឺតិចជាងប្រទេសជាច្រើនក្នុងតំបន់ ដោយសារកត្តាសេដ្ឋកិច្ច និងសង្គម ។ ប្រាក់ខែជាមធ្យម គឺស្មើនឹង៣១១.០០០ចាតក្នុង១ខែ (ឬស្មើ១៦៣ដុល្លារអាមេរិក) ។

១១-ទីម័រខាងកើត ៖ ជាប្រទេសកំពុងអភិវឌ្ឍន៍ប្រព័ន្ធសេដ្ឋកិច្ចក្រោយពីទទួលបានឯករាជ្យពីឥណ្ឌូណេស៊ី កាលពីឆ្នាំ២០០២ ។ ប្រាក់ឈ្នួលអប្បបរមា ទៅប្រាក់ឈ្នួលមធ្យម គឺចាប់ពី១៥០ដុល្លារ ទៅ២៥០ដុល្លារអាមេរិកក្នុង១ខែ ៕

ហ្វីលីពីន៖ ផុតពីព្យុះត្រូពិក Bebinca ឥឡូវនេះប្រទេសហ្វីលីពីនកំពុងប្រឈមមុខនឹងព្យុះថ្មីមួយទៀតហើយគឺព្យុះត្រពិក Trami ដែលនឹងបោកបក់មកលើតំបន់ជាច្រើនក្នុងប្រទេសនេះបង្កឱ្យមានទឹកជំនន់ធ្ងន់ធ្ងរបំផុត។

យោងតាមសារព័ត៌មានបរទេស Reuters នៅថ្ងៃទី២៣ ខែតុលា ឆ្នាំ២០២៤ បានឱ្យដឹងថា បច្ចុប្បន្នប្រទេសហ្វីលីពីនបានប្រកាសអាសន្នអំពីហានិភ័យគ្រោះមហន្តរាយនៅតំបន់ចំនួន ៧ ក៏ដូចជាបានផ្អាកការងាររដ្ឋាភិបាល និងបិទសាលារៀន ហើយធនាគារកណ្តាលរបស់ខ្លួនក៏បានបញ្ឈប់ការជួញដូររូបិយប័ណ្ណបរទេសជាបណ្តោះអាសន្នផងដែរ ដោយសារព្យុះត្រូពិច Trami ខិតជិតមកដល់ ដែលអាចបង្កឱ្យមានទឹកជំនន់ខ្លាំងបំផុតមិនធ្លាប់មាន។

អ្នកព្យាករណ៍អាកាសធាតុរដ្ឋ Pag-asa បាននិយាយថា ឥទ្ធិពលព្យុះត្រូពិក Trami នឹងមកដល់ប្រទេសហ្វីលីពីននៅល្ងាចថ្ងៃទី២៣ ដល់ព្រឹកថ្ងៃទី ២៤ ខែតុលានេះហើយ ដែលនឹងបក់បោកក្នុងល្បឿន ៨៥ គីឡូម៉ែត្រក្នុងមួយម៉ោង ដោយបង្ខំឱ្យរដ្ឋាភិបាលក្នុងតំបន់ចំនួន ៧ ត្រូវជម្លៀសអ្នកស្រុកចេញជាបន្ទាន់។ គិតត្រឹមម៉ោង ៨:៥០ នាទីយប់ថ្ងៃទី២២ ខែតុលា តំបន់មួយចំនួនត្រូវបានជន់លិចដោយសារតែភ្លៀងធ្លាក់ខ្លាំងជាបន្តបន្ទាប់ និងខ្យល់បក់ខ្លាំងបាត់ទៅហើយ ទម្រាំតែព្យុះ Trami បានមកដល់ទៀត ប្រទេសហ្វីលីពីននឹងរងការខូចខាតធ្ងន់ធ្ងរបំផុត។

យោងតាមក្រសួងសុខុមាលភាពសង្គម និងអភិវឌ្ឍន៍បានប៉ាន់ប្រមាណថា មនុស្សជាង ៣៣.៥ លាននាក់អាចនឹងរងផលប៉ះពាល់ដោយព្យុះត្រូពិក Trami ដែលជាព្យុះកាចសាហាវបំផុតមិនធ្លាប់មាន។ គួរបញ្ជាក់ដែរថា កាលពីខែមុនប្រទេសអាស៊ីអាគ្នេយ៍មួយនេះក៏ជួបប្រទះនឹងឥទ្ធិពលព្យុះត្រូពិច Bebinca ដែលបានបោកបក់បំផ្លាញតំបន់ជាច្រើនធ្វើឱ្យខូចខាតហេដ្ឋារចនាសម្ព័ន្ធខ្លាំងផងដែរ។ ក្រៅពីប្រទេសហ្វីលីពីន ប្រទេសមួយចំនួនទៀតដូចជាថៃ និងវៀតណាមក៏រងឥទ្ធិពលខ្យល់ព្យុះនេះផងដែរ៕

យើងគ្រប់គ្នាដឹងហើយថា គ្រប់សមុទ្រទាំងអស់នៅលើពិភពលោកសុទ្ធតែមានទឹកប្រៃ គ្មានសមុទ្រណាដែលគ្មានទឹកប្រៃនោះទេ។ ប៉ុន្តែបើយោងតាមគេហទំព័របរទេស Science News Explores បានឱ្យដឹងថា នៅលើផែនដីយើងនេះកាលពីជាង ៣៥ លានឆ្នាំមុនធ្លាប់មានសមុទ្រមួយដែលគ្មានទឹកប្រៃ ពោលគឺមហាសមុទ្រអាក់ទិច ដែលពីមុនមកគឺជាបឹងទឹកសាបដ៏ធំមួយខាន់ចែកដោយដីជាមួយនឹងមហាសមុទ្រអាត្លង់ទិច។

រាប់រយលានឆ្នាំមុន មហាសមុទ្រអាក់ទិក គឺជាបឹងទឹកសាបដ៏ធំមួយ ត្រូវបានគេស្គាល់ថាជា បឹងទឹកសាបអាក់ទិច។ ប៉ុន្តែដោយសារកត្តាធម្មជាតិដូចជាគ្រោះរញ្ជួយដី ផ្ទុះភ្នំភ្លើង ព្រំដែនដីគោកដែលខាន់ដាច់រវាងបឹងទឹកសាបអាកទិច និងមហាសមុទ្រអាត្លង់ទិចបានបាក់ស្រុតចូលគ្នា ដែលបណ្ដាលឱ្យសារជាតិប្រៃពីមហាសមុទ្រអាត្លង់ទិចហូរចូលស្រោបលើបឹងទឹកសាបអាកទិច បង្កើតបានជាមហាសមុទ្រអាក់ទិចនេះតែម្តង។

ទោះបីមានឈ្មោះជាមហាសមុទ្រអាក់ទិកក៏ដោយ ក៏សារធាតុអំបិលក្នុងទឹករបស់អាក់ទិច មានត្រឹមតែ ៥០ ម៉ែត្រពីផ្ទៃទឹកប៉ុណ្ណោះ ខណៈជម្រៅចាប់ពីជាង ៥០ ម៉ែត្រចុះក្រោមទៅគឺជាទឹកសាបដដែល។ បច្ចុប្បន្នមហាសមុទ្រអាកទិច មានទំហំ ១៤,០៦ លានគីឡូម៉ែត្រការ៉េ និងលាតសន្ធឹងលើព្រំដែនប្រទេសចំនួន ៥ រួមមាន៖ សហរដ្ឋអាមេរិក, រុស្សី, កាណាដា, ហ្គ្រីនឡែន និងន័រវែសជាដើម។

គួរបញ្ជាក់ដែរថា ក្រៅពីមហាសមុទ្រអាក់ទិកដែលមានជាតិប្រៃតិច ក៏មានមហាសមុទ្រផ្សេងទៀតមានជាតិប្រៃតិចផងដែរ ដូចជាសមុទ្រកាសព្យែន ដែលពីមុនមកគឺជាប្រភពទឹកសាប។ បច្ចុប្បន្នសមុទ្រនេះមានជាតិប្រៃត្រឹមតែ ៣៥% ប៉ុណ្ណោះ គឺជាសមុទ្រដែលមានជាតិប្រៃទាបជាងទឹកសមុទ្រផ្សេងទៀតនៅលើពិភពលោក។ មូលហេតុគឺដោយសារស្ថានភាពភូមិសាស្ត្រ និងជលសាស្ត្ររបស់វា៕

DJ Wukong ដែលធ្លាប់មកសម្តែងនៅប្រទេសកម្ពុជាជាច្រើនដងមកនេះបានជាប់ក្នុងបញ្ជី TOP100DJ ដែលប្រមូលផ្តុំទៅដោយDJ ល្បីៗនៅទូទាំងពិភពលោក។ DJ Wukong ក៏ត្រៀមមកសម្តែងនៅប្រទេសកម្ពុជាម្តងទៀតនាថ្ងៃទី២៦ ខែតុលា ឆ្នាំ២០២៤ ឆាប់ៗខាងមុខផងដែរ។

ជឿជាក់ថាអ្នកគាំទ្រកម្ពុជាមួយចំនួនគឺបានស្គាល់ DJ ជាជនជាតិសង្ហិបុរី Wukong មិនខានដោយលោកធ្លាប់មកសម្តែងនៅប្រទេសកម្ពុជាជាច្រើនដងជាពិសេសគឺលោកតែងតែផ្តល់ភាពសប្បាយរីករាយជូនអ្នកគាំទ្រនិងបង្ហាញពីការស្រលាញ់ហ្វេនៗនៅប្រទេសខ្មែរ។ អ្វីដែលកាន់តែចាប់អារម្មណ៍ថ្មីៗនេះ DJ Wukong បានសាងសមិទ្ធផលដ៏ល្អមួយជាប់នៅក្នុងបញ្ជីកំពូលDJ នៅទូទាំងពិភពលោកមួយរូបក្នុងឆ្នាំ២០២៤នេះ។

តាមការប្រកាសរបស់ DJ Wukong នាថ្ងៃទី២០ តុលា នេះលោកបានជាប់ TOP100DJ ដែលស្ថិតនៅលេខរៀងទី៨៧ ជាមួយនឹងកំពូល DJ ជាច្រើនទៀតនៅទូទាំងពិភពលោកដែលជាមុខមាត់មួយសម្រាប់ DJ នៅតំបន់អាស៊ី ក៏ដូចជាអាស៊ីអាគ្នេយ៍ផងដែរ។ លទ្ធផលគឺស្ថិតនៅក្នុងរយៈពេលមួយឆ្នាំទៀតពីការស្ទង់មតិដ៏សំខាន់បំផុតពីឌីជេកំពូលទាំង ១០០ ផ្តល់នូវ ប្រជាប្រិយភាពរបស់ឌីជេទូទាំងពិភពលោកនៅលើគេហទំព័រ DJ Mag។ សមិទ្ធផលដ៏ធំនេះ DJ Wukong ក៏បានបង្ហាញអារម្មណ៍សប្បាយរីករាយផងដែរ។

ជាមួយនឹងជោគជ័យក្លាយជា TOP DJ មួយរូបនៅទូទាំងពិភពលោក DJ Wukong ក៏ត្រៀមមកជួបអ្នកគាំទ្រកម្ពុជាដូចគ្នា។ ទស្សនិកជនគ្រាន់តែចំណាយថ្លៃសំបុត្រធម្មតាចាប់ពី១៥ដុល្លារ ឡើងទៅមានឱកាសជួប DJ Wukong ដោយផ្ទាល់និងរាំលេងកម្សាន្តជាច្រើនម៉ោងជាមួយនឹងចង្វាក់ EDM និងការសម្តែងបទល្បីៗរយៈពេលរហូតដល់៧ម៉ោងឯណោះ។ កម្មវិធីដែល DJ Wukong មកសម្តែងនេះមានឈ្មោះថា Afterlife: Into Wonderland នៅថ្ងៃ Halloween ធំជាងគេនៅប្រទេសកម្ពុជាក្រោមការសហការរវាងក្រុមហ៊ុន Khmer Beverages និង EDM Cambodia។

កម្មវិធីដ៏ធំសម្បើមអបអរថ្ងៃ Halloween នឹងប្រព្រឹត្តទៅនៅថ្ងៃទី២៦ ខែតុលា ឆ្នាំ២០២៤ ចាប់ពីម៉ោង៤ល្ងាចរហូតដល់ម៉ោង១១យប់នៅ Hotel Cambodiana ។ មិនត្រឹមតែ DJ Wukong ប៉ុណ្ណោះទេដែលនឹងមានវត្តមានក្នុងកម្មវិធីដែលរៀបចំដោយក្រុមហ៊ុន Khmer Beverages ក្នុងនោះ DJ MOJI ក៏នឹងមកអង្រួនផ្តល់ភាពសប្បាយទស្សនិកជនកម្ពុជាដូចគ្នាត្រៀមតែកម្លាំងទុកសប្បាយឱ្យហើយទៅ៕

ប្រទេសនូវែលសេឡង់ ៖ កាលពីថ្ងៃទី២២ ខែតុលា ឆ្នាំ២០២៤ សារព័ត៌មានបរទេសរាយការណ៍ថា អាកាសយានដ្ឋាននៅប្រទេសនូវែលសេឡង់ បានកំណត់រយៈពេលឱ.បលាគ្នារបស់អ្នកដំណើរនៅបរិវេណខាងមុខអាកាសយានដ្ឋាន ត្រឹមតែ៣នាទីប៉ុណ្ណោះ ។ ប៉ុន្តែបើអ្នកដំណើរណាចង់ឱ.បគ្នាឱ្យបានយូរជាងនេះ ពួកគេអាចទៅឱ.បបន្តនៅចំណតរថយន្ត ។

អាកាសយានដ្ឋានរំពឹងថា ការកំណត់រយៈពេលឱបលាគ្នារបស់អ្នកដំណើរនេះ នឹងអាចជួយកាត់បន្ថយចំនួនមនុស្សប្រមូលផ្តុំគ្នាណែនចង្អៀត និងកាត់បន្ថយការកកស្ទះចរាចរណ៍នៅបរិវេណអគារសម្រាប់អ្នកដំណើរឡើងយន្តហោះ ។

អាកាសយានដ្ឋាន Dunedin International Airport ស្ថិតនៅកោះខាងត្បូងនៃប្រទេសនូវែលសេឡង់ បានបិទស្លាកប្រកាសឱ្យអ្នកដំណើរឱបលាគ្នាមិនលើសពីរយៈពេល៣នាទី ហើយស្លាកសញ្ញានេះបញ្ជាក់ថា បើអ្នកដំណើរណាចង់ឱបលាគ្នាយូរជាងនេះ សូមទៅឱបគ្នានៅចំណតរថយន្តបន្តទៀត ។

ការកំណត់រយៈពេលឱបគ្នារបស់អ្នកដំណើរ ត្រូវបានគេចាត់ទុកថា គឺជាការព្យាយាមបង្កើនវិធានការសុវត្ថិភាព និងកាត់បន្ថយការកកស្ទះចរាចរណ៍នៅបរិវេណអគារអ្នកដំណើរឡើងយន្តហោះ ។ វាជាបម្រាមយ៉ាងតឹងរ៉ឹងរបស់អាកាសយានដ្ឋាន Dunedin International Airport ហើយបើអ្នកណាម្នាក់ពុំអនុវត្តតាមទេនោះ គឺនឹងត្រូវបានពិន័យជាប្រាក់ ហើយវាជាករណីដែលអាកាសយានដ្ឋានពុំចង់ឱ្យកើតឡើងទេ ។

នាយកអាកាសយានដ្ឋាន Dunedin International Airport បញ្ជាក់ថា នៅបរិវេណអគារអ្នកដំណើរ តែងតែមានអ្នកដំណើរ និងក្រុមគ្រួសារខ្លះនិយាយលាផ្តាំផ្ញើគ្នាយូរបន្តិច ហើយវាធ្វើឱ្យអ្នកដំណើរផ្សេងទៀតពុំអាចលាក្រុមគ្រួសាររបស់ខ្លួនបាន ។ ដូច្នេះ អាកាសយានដ្ឋានក៏បង្កើតបម្រាមនេះដើម្បីឱ្យក្រុមគ្រួសារផ្សេងមានឱកាសលាគ្នា ។

ក្រោយពីអាកាសយានដ្ឋាននៅប្រទេសនូវែលសេឡង់ប្រកាសពីបម្រាមនេះ បានធ្វើឱ្យមហាជនរិះគន់អាកាសយានដ្ឋាននេះយ៉ាងខ្លាំង ប៉ុន្តែខាងអាកាសយានដ្ឋានបញ្ជាក់ថា អាកាសយានដ្ឋានពុំបានកំណត់រយៈពេលឱបលាគ្នារបស់អ្នកដំណើរតាមនាទីកំណត់យ៉ាងត្រឹមត្រូវទេ ប៉ុន្តែចង់ឱ្យអ្នកដំណើរទុកកន្លែងឱ្យអ្នកផ្សេងទៀត ។ បើអ្នកដំណើរណាចង់និយាយលាគ្នាលើសពី៣នាទី ភ្នាក់ងារអាកាសយានដ្ឋាននឹងអញ្ជើញពួកគេទៅកាន់ចំណតរថយន្ត ៕

សហរដ្ឋអាមេរិក ៖ កាលពីថ្ងៃទី១៨ ខែតុលា ឆ្នាំ២០២៤ សារព័ត៌មានបរទេសរាយការណ៍ថា សហរដ្ឋអាមេរិកបានរៀបចំពិធីប្រកួតផ្លែល្ពៅយក្សសម្រាប់ពិធីបុណ្យ Halloween ដោយប្រគល់ប្រាក់រង្វាន់ទៅឱ្យអ្នកឈ្នះតាមទម្ងន់របស់ផ្លែល្ពៅ ។ ផ្លែល្ពៅនីមួយៗដែលកសិករអាមេរិកបានយកមកប្រកួត គឺសុទ្ធតែមានទម្ងន់ជាង១ពាន់គីឡូក្រាម ដោយសារពួកគេបានថែទាំយ៉ាងល្អ ។

លោក Travis Gienger ជាកសិករមកពីទីក្រុង Anoka រដ្ឋមីនីសូតា សហរដ្ឋអាមេរិក បានទទួលប្រាក់ចំនួន២២.២៣៩ដុល្លារអាមេរិក ពីកម្មវិធីប្រកួតផ្លែល្ពៅយក្សសម្រាប់ពិធីបុណ្យ Halloween លើកទី៥១ ។ ផ្លែល្ពៅរបស់លោកមានទំហំរហូតដល់៦ម៉ែត្រ និងទម្ងន់២.៤៧១ Pounds (ឬស្មើនឹង១.១២០គីឡូក្រាម) ។

លោក Travis Gienger និយាយថា នេះជាការទទួលពានរង្វាន់ផ្លែល្ពៅយក្ស លើកទី៤ របស់លោក ។ ការប្រកួតផ្លែល្ពៅមានទំហំធំជាងគេលើកនេះ គឺលោកទទួលបានទឹកប្រាក់ចំនួន៩ដុល្លារអាមេរិក សម្រាប់ផ្លែល្ពៅមានទម្ងន់ ១ Pounds ។ ការប្រកួតប្រជែងនេះមានអ្នកចូលរួមទស្សនាជាច្រើននាក់បានអបអរសាទរនឹងជ័យជម្នះរបស់លោក ដែលអាចដាំល្ពៅមានទំហំធំជាងគេ ។

អ្នកចូលរួមប្រកួតផ្លែល្ពៅយក្សផ្សេងទៀតឈ្មោះ រ៉េនឌុន រ៉ូសាន់ និយាយថា ការដាំផ្លែល្ពៅឱ្យមានទំហំធំៗ គឺត្រូវតែមានការថែទាំយ៉ាងយកចិត្តទុកដាក់បំផុត និងចំណាយធនធានច្រើន ។ ជាក់ស្តែង ការថែទាំដើមល្ពៅ១ដើម ឬថែទាំល្ពៅ១ផ្លែ គឺចំណាយផ្ទៃដីធំណាស់ ហើយត្រូវស្រោចទឹក២លើកក្នុង១ថ្ងៃ ។

អ្នកចូលរួមប្រកួតរូបនេះបន្តថា ការស្រោចទឹកល្ពៅច្រើនលើកបែបនេះ គឺជាការលំបាកសម្រាប់កសិករដាំល្ពៅនៅរដ្ឋកាលីហ្វ័រញ៉ា ដោយសារអាជ្ញាធររដ្ឋនេះត្រូវការឱ្យពលរដ្ឋជួយសន្សំសំចៃទឹក ។ នៅខែតុលា ឆ្នាំ២០២៤ យើងនឹងបានឃើញផ្លែល្ពៅជាញឹកញាប់ ពីព្រោះជិតដល់ពិធីបុណ្យ Halloween ។

ដោយឡែក អ្នកចូលរួមទស្សនាការប្រកួតផ្លែល្ពៅម្នាក់និយាយថា ខ្លួនពុំធ្លាប់ឃើញផ្លែល្ពៅមានទំហំធំបែបនេះទេពីមុនមក ហើយស្ទើរតែពុំជឿថា មានល្ពៅយក្សជាច្រើនផ្លែបែបនេះ។

គួរបញ្ជាក់ថា ការប្រកួតនេះបានរៀបចំនៅទីក្រុង Half Moon Bay រដ្ឋកាលីហ្វ័រញ៉ា សម្រាប់ពិធីបុណ្យ Halloween នៅសហរដ្ឋអាមេរិក កាលពីថ្ងៃទី១៤ ខែតុលា ឆ្នាំ២០២៤ ។ ផ្លែល្ពៅយក្សឈ្នះការប្រកួតមានឈ្មោះថា «Mammoth Minnesota» ជារបស់កសិករឈ្មោះ Travis Gienger ហើយវាក៏ជាការបំបែកកំណត់ត្រាពិភពលោក ផងដែរ ៕