ប្រទេសថៃ ៖ កាលពីថ្ងៃទី២២ ខែតុលា ឆ្នាំ២០២៤ សារព័ត៌មានថៃរាយការណ៍ថា សមត្ថកិច្ចបានរឹបអូ.ស យកទ្រព្យសម្បត្តិរបស់ជនពាក់ព័ន្ធសំខាន់ៗជាមួយក្រុមហ៊ុន The iCON GROUP ស្មើទឹកប្រាក់សរុប៤០០លានបាត ។ ជំហ៊ានបន្ទាប់ សមត្ថកិច្ចនឹងប្រមូលភស្តុតាងដើម្បីចា.ប់ ខ្លួនក្រុមជនពាក់ព័ន្ធផ្សេងទៀតបញ្ជូនមកឱ្យតុលាការកាត់ទោ.ស តាមច្បាប់ ។

ក្រោយការចូលរួមប្រជុំតាមដានរឿងក្តីរបស់ក្រុមហ៊ុន The iCON GROUP សមត្ថកិច្ចថៃនិយាយថា មានជនរងគ្រោះប្រមាណ៥០នាក់ បាននាំគ្នាមកដាក់ពាក្យប្តឹងក្រុមហ៊ុននេះនៅស្ថានីយប៉ូលិស ។ រីឯចំនួនជនរងគ្រោះសរុបនៅទូទាំងប្រទេស ដែលបានដាក់ពាក្យប្តឹងក្រុមហ៊ុននៅការិយាល័យស៊ើបអង្កេតកណ្តាល និងស្ថានីយប៉ូលិសនានា ចាប់ពីថ្ងៃទី១០ ដល់ថ្ងៃទី២១ ខែតុលា ឆ្នាំ២០២៤ គឺស្មើនឹង ៦.៩៧៩នាក់ ដែលពួកគេបានខាតបង់ប្រាក់សរុបអស់ជាង២.០៤៦លានបាត ។

បច្ចុប្បន្ន ក្រុមជនពាក់ព័ន្ធជាមួយក្រុមហ៊ុន The iCON GROUP ចំនួន១៨នាក់ ត្រូវបានបញ្ជូនមកកាន់ពន្ធនាគារពិសេស ហើយសមត្ថកិច្ចបានចុះត្រួតពិនិត្យ ១១ទីតាំងរបស់ជនពាក់ព័ន្ធ និងមនុស្សជិតស្និទ្ធជាមួយជនពាក់ព័ន្ធសំខាន់ៗទាំង១៨នាក់ ។ បច្ចុប្បន្ន សមត្ថកិច្ចកំពុងត្រួតពិនិត្យ និងពុំទាន់បានរាយការណ៍លទ្ធផល ដោយសារចង់លាក់បាំងព័ត៌មាន ឬភស្តុតាងផ្សេងៗដែលមានប្រយោជន៍សម្រាប់រឿងក្តី ។

ចំណែកការចាប់ខ្លួនក្រុមពាក់ព័ន្ធផ្សេងទៀត គឺស្ថិតក្នុងការស៊ើបអង្កេត និងប្រមូលភស្តុតាង-សាក្សី ហើយការពាក់ព័ន្ធនឹង១១ទីតាំង ដែលសមត្ថកិច្ចបានចុះត្រួតពិនិត្យនោះ គឺអាស្រ័យលើភស្តុតាង ។ បើរកឃើញភស្តុតាងច្បាស់លាស់ សមត្ថកិច្ចនឹងអនុវត្តតាមច្បាប់បន្តទៀត ។

រីឯករណីមហាជនសង្ស័យថា លោក វ៉ារ៉ាត់ផុន វ៉ារ៉ាត់វរ៉ាគុន (ហៅថៅកែ ផុន) នាយកគ្រប់គ្រងក្រុមហ៊ុន The iCON GROUP ពុំមែនជាជនជាតិថៃ ដោយសារលេខអត្តសញ្ញាប័ណ្ណរបស់លោកចាប់ផ្តើមដោយលេខ៥ គឺសមត្ថកិច្ចបញ្ជាក់ថា លោក វ៉ារ៉ាត់ផុន វ៉ារ៉ាត់វរ៉ាគុន បានចុះឈ្មោះក្នុងសៀវភៅគ្រួសារក្រោយគេ ហើយលោកពុំមែនជាជនបរទេសទេ ។ ទោះយ៉ាងណា សមត្ថកិច្ចនឹងស៊ើបអង្កេតករណីនេះបន្ថែមទៀតថា តើលោកជាជនជាតិថៃ ឬជនបរទេស ។

ជំហ៊ានដំបូង សមត្ថកិច្ចបានរឹបអូសយកអចលនទ្រព្យ, រថយន្ត និងទ្រព្យសម្បត្តិផ្សេងៗរបស់ក្រុមជនពាក់ព័ន្ធសំខាន់ៗជាមួយក្រុមហ៊ុន The iCON GROUP ទាំង១៨នាក់ បានចំនួនជាង៤០០លានបាត ។ ដោយឡែក មានពាក្យចចាមអារ៉ាមថា ក្រុមជនជាប់ចោទបានប្តូរប្រាក់របស់ពួកគេទៅជាប្រាក់ឌីជីថលនោះ ករណីនេះសមត្ថកិច្ចបានសាកសួរផ្ទាល់មាត់ និងស៊ើបអង្កេតរួចហើយ ។

ប៉ុន្តែសមត្ថកិច្ចសូមសំណូមពរទៅកាន់បុគ្គលល្បីៗ ឬ Influencer នានា គួរតែពិនិត្យឱ្យបានច្បាស់លាស់ មុននឹងនិយាយរឿងនេះផ្សព្វផ្សាយជាសាធារណៈ ពីព្រោះវានឹងធ្វើឱ្យពលរដ្ឋវាយតម្លៃថា ហេតុអ្វីសមត្ថកិច្ចគ្មានចំណាត់ការ ។ បច្ចុប្បន្ន សមត្ថកិច្ចកំពុងស៊ើបអង្កេតរឿងនេះ និងប្រកាសលទ្ធផលនាពេលឆាប់ៗ ប៉ុន្តែបើជនណាម្នាក់ផ្សព្វផ្សាយព័ត៌មានក្លែងក្លាយជាសាធារណៈ ជននោះនឹងទទួលខុសត្រូវចំពោះមុខច្បាប់ ៕

ទោះបីជាបណ្តាញ 5G ទើបតែត្រូវបានដាក់ឱ្យប្រើប្រាស់ទូទាំងសកលលោកនាពេលថ្មីៗនេះក៏ដោយ បច្ចុប្បន្នអ្នកស្រាវជ្រាវគឺបានចាប់ផ្តើមអភិវឌ្ឍបណ្តាញ 6G ជំនាន់ក្រោយរួចទៅហើយ ជាមួយនឹងសមិទ្ធិផលល្បឿនដ៏គួរឱ្យចាប់អារម្មណ៍បំផុត។

យោងតាមការសិក្សាមួយដែលធ្វើឡើងដោយក្រុមអ្នកស្រាវជ្រាវមកពីសាកលវិទ្យាល័យ College London របស់ចក្រភពអង់គ្លេសបានឱ្យដឹងថា ពួកគេទើបតែសម្រេចបាននូវការបញ្ជូនល្បឿនលឿនបំផុតរហូតដល់ ៩៣៨ ជីហ្គាបៃក្នុងមួយវិនាទី (Gbps) ដែលស្មើនឹងការកើនឡើងប្រហែល ៩,០០០ ដងលឿនជាងបណ្តាញ 5G បច្ចុប្បន្ន។

ដើម្បីយល់កាន់តែច្បាស់ ក្នុងល្បឿននេះ អ្នកប្រើប្រាស់អាចទាញយកភាពយន្តបានជាង ២០ ភាពយន្តក្នុងរយៈពេលត្រឹមតែមួយវិនាទីប៉ុណ្ណោះ នេះមានន័យថាល្បឿន 6G នាពេលអនាគតគឺលឿនខ្លាំងណាស់។ ទន្ទឹមនឹងនេះអ្នកស្រាវជ្រាវចិន ក៏បាននិយាយដែរថា ពួកគេក៏សម្រេចបាននូវបណ្តាញ 6G ក្នុងល្បឿនលឿនមិនគួរឱ្យជឿផងដែរ ដោយសន្យាថានឹងនាំយកបច្ចេកវិទ្យានេះមកប្រើប្រាស់ទូទាំងប្រទេសក្នុងពេលឆាប់ៗទៀតផង។

ជាមួយគ្នានេះ ក្រុមហ៊ុនដឹកជញ្ជូននៅក្នុងប្រទេសជប៉ុនក៏កំពុងធ្វើការដើម្បីអភិវឌ្ឍបណ្តាញ 6G ជាមួយនឹងឧបករណ៍ដែលមានសមត្ថភាពបញ្ជូនទិន្នន័យលឿនជាង 5G ដល់ទៅ ២០ ដង ដោយឈានដល់ល្បឿន 100 Gbps ក្នុងចម្ងាយរហូតដល់ ១០០ ម៉ែត្រផងដែរ។ ទោះបីជាល្បឿននេះមិនគួរឱ្យចាប់អារម្មណ៍ដូចលទ្ធផលនៅទីក្រុងឡុងដ៍ក៏ដោយក៏វានៅតែជាការកែលម្អគួរឱ្យកត់សម្គាល់លើបច្ចេកវិទ្យាបច្ចុប្បន្ន។ ជាមួយនឹងសមិទ្ធិផលខាងលើ បណ្តាញ 6G សន្យាថានឹងនាំមកនូវការផ្លាស់ប្តូរដ៏ធំនៅក្នុងវិស័យបច្ចេកវិទ្យាជាច្រើន។ ហេតុនេះហើយ គេរំពឹងថាបណ្តាញ 6G នឹងដាក់ពង្រាយយ៉ាងទូលំទូលាយនៅលើពិភពលោកក្នុងឆ្នាំ ២០៣០៕

យើងដឹងហើយថាផែនដី វិលជុំវិញព្រះអាទិត្យ មានរយៈពេល ២៤ ម៉ោងក្នុងមួយថ្ងៃ ជាមួយនឹងពន្លឺព្រះអាទិត្យប្រហែល ១២ ម៉ោង ហើយម៉ោងដែលនៅសល់នោះគឺជាពេលយប់។ ប៉ុន្តែតើអ្នកដឹងទេថា ប្រទេសទាំង ៦ ខាងក្រោមនេះគឺគ្មានពេលយប់រហូតដល់ទៅជាង ៧០ ថ្ងៃឯណោះ។ ដូច្នេះហើយ តើអំឡុងពេលនោះភាវៈមានជីវិតនឹងរស់នៅបែបណាប្រសិនបើគ្មានពេលយប់បែបនេះ?

១.ប្រទេសន័រវេស (Norway)៖ ន័រវេស គឺជាប្រទេសដែលស្ថិតក្នុងរង្វង់តំបន់អាក់ទិក ត្រូវបានគេស្គាល់ថា ជាដែនដីព្រះអាទិត្យនៅកណ្តាលអធ្រាត។ បាតុភូតនេះកើតឡើងដល់ទៅ ៦ តំបន់នៅក្នុងប្រទេសន័រវ៉េស ដែលធ្វើឱ្យប្រទេសនេះគ្មានពេលយប់ដល់ទៅ ៧៦ ថ្ងៃ ពោលគឺចន្លោះពីថ្ងៃទី ២០ ខែមេសា ដល់ថ្ងៃទី ២២ ខែសីហា។ អ្នកវិទ្យាសាស្ត្តបានពន្យល់ថា “បាតុភូតនេះកើតឡើងដោយសារតែ ផែនដីបានបង្វិលតាមអ័ក្សលំអៀងនឹងព្រះអាទិត្យ នៅក្នុងអំឡុងរដូវក្តៅនៃប៉ូលខាងជើង។ ហេតុនេះហើយ អស់រយៈពេលជាច្រើនសប្តាហ៍ ព្រះអាទិត្យមិនដែលលិចពីលើរង្វង់អាកទិកនោះទេ”។

២.ប្រទេសកាណាដា (Canada)៖ នៅក្នុងប្រទេសកាណាដាមានតំបន់មួយឈ្មោះថា NUNAVUT ដែលតំបន់នេះក៏ស្ថិតក្នុងជួរអ័ក្សអាកទិច ២ ដឺក្រេផងដែរ។ ក្នុងអំឡុងពេល ២ ខែមាន ៧ ថ្ងៃដែលមានពន្លឺព្រះអាទិត្យរហូត គ្មានពេលយប់នោះទេ ប៉ុន្តែបើខែរងារវិញគឺងងឹតឈឹងរយៈពេល ៣០ ថ្ងៃជាប់ៗគ្នាតែម្តង។

៣.ប្រទេសអ៊ីស្លង់ (Iceland)៖ អ៊ីស្លង់ គឺជាប្រទេសដែនកោះដ៏ធំមួយនៅអឺរ៉ុប ហើយក៏ត្រូវបានគេទទួលស្គាល់ផងដែរថាជាប្រទេសដែលគ្មានមូស។ ក្នុងអំឡុងពេលរដូវក្តៅចាប់ពីខែមេសា ដល់ខែមិថុនា នៅទីនោះគឺគ្មានពេលយប់នោះទេ ដោយអ្នកអាចមើលឃើញពន្លឺព្រះអាទិត្យបានយ៉ាងច្បាស់ជារៀងរាល់ថ្ងៃ។

៤.តំបន់ BARROW រដ្ឋអាឡាស់ស្កា៖ តំបន់ BARROW រដ្ឋអាឡាស់ស្កានេះស្ថិតនៅក្នុងប្រទេសសហរដ្ឋអាមេរិក ដែលនៅតំបន់នោះពិតជាចម្លែកខ្លាំងណាស់ ព្រោះចាប់ពីចុងខែឧសភា ដល់ចុងខែកក្កដា ព្រះអាទិត្យនឹងមិនរះនោះទេ តែក្រោយមកនៅដើមខែវិច្ឆិកា ព្រះអាទិត្យក៏ចាប់ផ្តើមរះពេញ ៣០ ថ្ងៃតែម្តង។ បាតុភូតនេះ ត្រូវបានគេហៅថា រាត្រីដំបន់ប៉ូល ដោយនៅរដូវរងារក៏វាងងឹងសូន្យឈឹងគ្មានពន្លឺថ្ងៃផងដែរ។

៥.ប្រទេសហ្វាំងឡង់ (Finland)៖ ដែនដីដែលសម្បូរទៅដោយកោះ និងបឹងរាប់ពាន់នេះ គឺគ្មានពេលយប់រយៈពេល ៧៣ ថ្ងៃក្នុងរដូវក្តៅ។ មនុស្សនៅទីនោះចូលចិត្តគេងតិចនៅរដូវក្តៅ និងគេងច្រើននៅរដូវរងារវិញ។ អ្នករស់នៅតំបន់នោះគឺពួកគេចូលចិត្តជិះស្គីទឹកកក និងលំហែកាយក្នុងផ្ទះកញ្ចក់ igloos ណាស់។

៦.ប្រទេសស៊ុយអែត (Sweden)៖ ចាប់ពីដើមខែឧសភា រហូតដល់ចុងខែសីហា ប្រទេសស៊ុយអ៊ែតនឹងមើលឃើញថ្ងៃលិចនៅពាក់កណ្តាលអធ្រាត្រហើយរះមកវិញប្រហែលម៉ោង ៤ ព្រឹក។ នៅទីនោះ ព្រះអាទិត្យអាចមានវត្តមានថេររហូតដល់ ៦ ខែក្នុង ១ ឆ្នាំ។ ដូច្នេះប្រជាជនដែលរស់នៅតំបន់នោះ តែងតែចំណាយពេលវេលាភាគច្រើនទៅលើការវាយកូនហ្គោល ស្ទូចត្រី និងដំណើរផ្សងព្រេងឡើងភ្នំជាដើម៕

ប្រទេសអង់គ្លេស ៖ នៅខែតុលា ឆ្នាំ២០២៤ ភ្នាក់ងារបរិស្ថានប្រទេសអង់គ្លេសរាយការណ៍ថា ត្រីសាលម៉ុនរស់នៅតាមធម្មជាតិប្រឈមនឹងការផុតពូ.ជនាពេលឆាប់ៗ ដោយសារចំនួនត្រីសាលម៉ុនធ្លាក់ចុះមកកម្រិតទាបបំផុត ។ ហេតុនេះ វាពុំគ្រប់គ្រាន់សម្រាប់ការបរិភោគ ឬការលក់ពូជត្រីបង្កា.ត់ ពូជទេ បើប្រទេសនានាពុំអនុវត្តច្បាប់នេសាទតឹងរ៉ឹង ។

Alan Lowell ប្រធានភ្នាក់ងារបរិស្ថាននិយាយថា កាលពី៤០ឆ្នាំមុន មានត្រីសាលម៉ុនប្រមាណ១លាន៤សែនក្បាល ហែលមកកាន់ទន្លេនៅប្រទេសអង់គ្លេសជារៀងរាល់ឆ្នាំ ប៉ុន្តែបច្ចុប្បន្ន នៅសល់ត្រីតែ១ភាគ៣ ប៉ុណ្ណោះ ។ វាជាការធ្លាក់ចុះចំនួនត្រីជាថ្មី ហើយនេះបញ្ជាក់ថា ពិភពលោក មានបញ្ហាផ្នែកជីវចម្រុះកាន់តែខ្លាំង ។

កាលពីចុងឆ្នាំ២០២៣ សហភាពអន្តរជាតិសម្រាប់ការអភិរក្សធម្មជាតិបានផ្លាស់ប្តូរស្ថានភាពត្រីសាលម៉ុនអាត្លង់ទិកពី «គួរឱ្យបារម្ភបំផុត» មកជា «ត្រីជិតផុតពូជ» ដោយសារចំនួនត្រីសាលម៉ុននៅអង់គ្លេស បានធ្លាក់ចុះពី៣០% ទៅ៥០% គិតចាប់ពីឆ្នាំ២០០៦ ។ លើសពីនេះ វាបានធ្លាក់ចុះពី៥០% ទៅ៨០% ចាប់ពីឆ្នាំ២០១០ ដល់ឆ្នាំ២០២៥ ។

រីឯ Dylan Robert ប្រធានផ្នែកនេសាទមកពី Game & Wildlife Conservation Trust និយាយថា នៅអង់គ្លេសមានទន្លេជាច្រើនធ្លាប់មានត្រីសាលម៉ុនអាត្លង់ទិករស់នៅ ចាប់ពី២ម៉ឺនក្បាល ទៅ៣ម៉ឺនក្បាល ប៉ុន្តែពេលនេះ នៅសល់ត្រឹមតែពី១.០០០ក្បាល ទៅ២.០០០ក្បាលប៉ុណ្ណោះ ។ រីឯនៅទន្លេខ្លះទៀតនៅសល់ត្រីសាលម៉ុន ប្រមាណ២០០ក្បាលប៉ុណ្ណោះ ។

*ហេតុអ្វីត្រីសាលម៉ុនអាត្លង់ទិកជិតផុតពូជ?
កន្លែងរស់នៅរបស់ត្រីសាលម៉ុនទូទាំងពិភពលោក បានប្រឈមនឹងការគំរាមកំហែងជាច្រើន ដូចជា ៖ ការបំពុលផ្នែកកសិកម្ម, សារធាតុគីមីចេញពីរោងចក្រឧស្សាហកម្ម, ការបង្ហូរទឹកស្អុយ, ការសាងសង់ស្ពានឆ្លងទន្លេ ដែលរំខានដល់ការបម្លាស់ទីរបស់ត្រី និងសីតុណ្ហភាពមហាសមុទ្រកើនឡើងខ្ពស់ដោយសារបម្រែបម្រួលអាកាសធាតុ បានធ្វើឱ្យប៉ះពាល់ប្រព័ន្ធអេកូឡូស៊ីរបស់ត្រីសាលម៉ុន ។

*ការចិញ្ចឹមត្រីសាលម៉ុនអាចធ្វើឱ្យស្ថានការណ៍កាន់តែអាក្រក់ ៖
បើទោះជាការចិញ្ចឹមត្រីសាលម៉ុនអាចជួយឱ្យអ្នកនេសាទចៀសវាងការចាប់ត្រីសាលម៉ុនធម្មជាតិ និងរកចំណូលបានច្រើនចូលប្រទេសក្តី ប៉ុន្តែអ្នកជំនាញនិយាយថា ការចិញ្ចឹមត្រីសាលម៉ុនច្រើនពេកនៅកន្លែងតូចចង្អៀត នឹងធ្វើឱ្យត្រីនេះឆ្លងជំងឺផ្សេងៗ ។ បើត្រីសាម៉ុនចិញ្ចឹមទាំងនេះរួចចូលក្នុងទន្លេធម្មជាតិ វានឹងបង្កាត់ពូជជាមួយត្រីសាលម៉ុនធម្មជាតិ ព្រមទាំងចម្លងមេរោគបាន ។

ចំណែកការជំរុញឱ្យកាត់បន្ថយការបរិភោគត្រីសាលម៉ុន គឺពុំមែនជាដំណោះស្រាយពិតប្រាកដទេ ។ បច្ចុប្បន្ន ភ្នាក់ងារផ្សេងៗបានព្យាយាមសហការគ្នាចិញ្ចឹមត្រីសាលម៉ុនក្នុងចំនួនសមស្រប ហើយវាអាចអភិរក្សប្រព័ន្ធអេកូឡូស៊ីផងដែរ ហើយគេរំពឹងថា ប្រទេសនានានឹងអនុវត្តច្បាប់នេសាទយ៉ាងតឹងរ៉ឹង ដើម្បីរក្សាចំនួនត្រីសាលម៉ុននាពេលបច្ចុប្បន្ន និងបង្កើនចំនួនត្រីនាថ្ងៃអនាគត ៕

បន្ទាប់ពីធូរស្បើយនៃជំងឺរាតត្បាតកូវីត ១៩ ប្រទេសអាស៊ីទាំងពីរគឺចិន និងជប៉ុនបានចាប់ផ្តើមបើកព្រំដែនរបស់ពួកគេឡើងវិញ ដើម្បីស្វាគមន៍ភ្ញៀវទេសចរអន្តរជាតិ។ ទោះជាយ៉ាងណាយើងសង្កេតឃើញថា ចាប់តាំងពីបើកវិស័យទេសចរណ៍របស់ពួកគេមក ប្រទេសជប៉ុនបានស្តារទេសចរណ៍យ៉ាងឆាប់រហ័សបំផុត ខណៈដែលប្រទេសចិននៅតែស្វែងរកមធ្យោបាយទាក់ទាញភ្ញៀវទេសចរ។

ប្រទេសជប៉ុនបានបើកព្រំដែនរបស់ខ្លួនដើម្បីស្វាគមន៍ភ្ញៀវអន្តរជាតិតាំងពីខែតុលាឆ្នាំ ២០២២ ហើយប្រទេសចិនបានបើកចាប់ពីខែមករាឆ្នាំ ២០២៣។ ប៉ុន្តែគន្លងការស្ទុះងើបឡើងវិញនៃវិស័យទេសចរណ៍នៃប្រទេសទាំងពីរនេះគឺខុសគ្នាទាំងស្រុង។ ជានិច្ចកាលនៅក្នុងបញ្ជីនៃ “គោលដៅទេសចរណ៍ល្អបំផុតរបស់ពិភពលោក” ដែលត្រូវបានបោះឆ្នោតដោយអ្នកសរសេរប្លុកទេសចរណ៍ និងសារព័ត៌មានអន្តរជាតិជាច្រើន ប្រទេសជប៉ុនកំពុងស្ថិតនៅលើផ្លូវដើម្បីស្វាគមន៍ចំនួនអ្នកទស្សនាច្រើនបំផុតនៅឆ្នាំ ២០២៤។

ប៉ុន្តែប្រទេសចិនដែលជាចំណុចលេចធ្លោរ មានវប្បធម៌សម្បូរបែប ប្រវត្តិសាស្រ្តអស្ចារ្យ ម្ហូប និងទេសភាពដ៏ស្រស់ស្អាត ស្រាប់តែគ្មានឈ្មោះក្នុងបញ្ជីទេសចរណ៍ល្បីៗទៅវិញ ហើយគិតមកដល់ពេលនេះចំនួនភ្ញៀវអន្តរជាតិដែលមកទស្សនាប្រទេសចិនគឺតិចណាស់បើធៀបជាមួយប្រទេសជប៉ុន។ មុនការរាតត្បាតនៃជំងឺកូវីត ១៩ ប្រទេសចិនបានស្វាគមន៍ភ្ញៀវអន្តរជាតិចំនួន ៤៩.១ លាននាក់ ខណៈនៅឆ្នាំនេះ ប្រទេសចិនបានស្វាគមន៍ភ្ញៀវទេសចរប្រហែល ១៧.២៥ លាននាក់ប៉ុណ្ណោះ។

ចំណែកប្រទេសជប៉ុនវិញ ចាប់តាំងពីបើកវិស័យទេសចរណ៍មកក៏ជួបការលំបាកដែរ ប៉ុន្តែមិនមែនដោយសារភ្ញៀវអន្តរជាតិតិចនោះទេ គឺដោយសារភ្ញៀវលើសទម្ងន់។ យោងតាមទិន្នន័យរបស់ទីភ្នាក់ងារផ្សព្វផ្សាយទេសចរណ៍ជប៉ុន (JNTO) ក្នុងរយៈពេល ៧ ខែដំបូងនៃឆ្នាំ ២០២៤ នេះ ប្រទេសជប៉ុនបានស្វាគមន៍ភ្ញៀវអន្តរជាតិជាង ២១ លាននាក់។ ចាប់តាំងពីខែមីនា រហូតមកដល់ពេលនេះ ជាមធ្យមមានភ្ញៀវទេសចរជាងបីលាននាក់បានមកទស្សនាប្រទេសនេះក្នុងមួយខែៗ ដែលជាការកើនឡើងគួរឱ្យកត់សម្គាល់បើធៀបនឹងឆ្នាំ ២០១៩។

នេះមានន័យថាមុនការរាតត្បាតនៃជំងឺកូវីត ១៩ ប្រទេសចិនគឺមានកំណើនភ្ញៀវទេសចរបរទេស ខណៈជប៉ុនមិនសូវមាននោះទេ។ ប៉ុន្តែបន្ទាប់ពីធូរស្បើយនៃជំងឺរាតត្បាតកូវីត ១៩ មកប្រទេសជប៉ុនស្រាប់តែមានភ្ញៀវទេសចរបរទេសមកទស្សនាច្រើនជាងប្រទេសចិនទៅវិញ ខណៈប្រទេសចិនបច្ចុប្បន្នកំពុងស្វែងរកមធ្យោបាយដើម្បីទាក់ទាញភ្ញៀវទេសចរឱ្យមកទស្សនាច្រើនដូចមុន៕

សហរដ្ឋអាមេរិក ៖ មន្ត្រីជំនាញផ្នែកច្បាប់បោះឆ្នោតលើកឡើងថា ករណីលោក Elon Musk ស្វែងរកសំឡេងឆ្នោតដោយប្រកាសផ្តល់ប្រាក់រង្វាន់ចំនួន១លានដុល្លារអាមេរិកដល់អ្នកគាំទ្រការធ្វើវិសោធនកម្មរដ្ឋធម្មនុញ្ញនៅសហរដ្ឋអាមេរិក គឺជាទង្វើខុ.សច្បាប់យ៉ាងខ្លាំង ហើយលោកប្រឈមនឹងការជាប់ពន្ធនា.គារ និងបង់ប្រាក់ពិន័យ ។

សារព័ត៌មានបរទេសរាយការណ៍ថា ក្នុងពេលឡើងលើវេទិកាស្វែងរកសំឡេងឆ្នោតឱ្យអតីតប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី១៩ ខែតុលា ឆ្នាំ២០២៤ លោក Elon Musk ជាមហាសេដ្ឋីនៃឧស្សាហកម្មបច្ចេកវិទ្យាបានប្រកាសថា លោកនឹងផ្តល់ប្រាក់ចំនួន១លានដុល្លារអាមេរិកជារៀងរាល់ថ្ងៃ រហូតដល់ថ្ងៃបោះឆ្នោត (គឺថ្ងៃទី៥ ខែវិច្ឆិកា) ដល់អ្នកមានសិទ្ធិបោះឆ្នោតនៅរដ្ឋ Battleground (ឬរដ្ឋ Swing State) ។

លោក Elon Musk បាននិយាយក្នុងពេលរកសំឡេងឆ្នោតនៅទីក្រុង Harrisburg រដ្ឋ Pennsylvania ថា ៖ «យើងកំណត់គោលដៅប្រមូលឈ្មោះអ្នកគាំទ្រការធ្វើវិសោធនកម្មរដ្ឋធម្មនុញ្ញ ដើម្បីផ្តល់សេរីភាពក្នុងការបញ្ចេញមតិ និងមានសិទ្ធិគ្រប់គ្រងអាវុធនៅរដ្ឋ Battleground ឱ្យបានជាង១លាននាក់ ឬ២លាននាក់ ។ អ្នកសំណាងល្អនឹងទទួលបានប្រាក់១លានដុល្លារអាមេរិក ដែលនឹងជ្រើសរើសពីបញ្ជីឈ្មោះអ្នកគាំទ្រធ្វើវិសោធនកម្មនៅអាមេរិក ចាប់ពីថ្ងៃប្រកាសនេះ រហូតដល់ថ្ងៃបោះឆ្នោត» ។

ការចាប់រង្វាន់លើកដំបូងបានធ្វើឡើងកាលពីថ្ងៃទី១៩ ខែតុលា ឆ្នាំ២០២៤ ហើយអ្នកឈ្នះមុនគេបានទទួលប្រាក់ក្នុងពេលលោក Elon Musk ប្រកាសរកសំឡេងឆ្នោតនៅទីក្រុង Harrisburg រដ្ឋ Pennsylvania ។ រីឯអ្នកឈ្នះម្នាក់ទៀតបានទទួលមូលប្បទានប័ត្រ (ឬសែក) នៅថ្ងៃទី២០ ខែតុលា ក្នុងពេលប្រកាសរកសំឡេងឆ្នោតនៅទីក្រុង Pittsburgh រដ្ឋ Pennsylvania ។

លោក Elon Musk បានផ្តល់ប្រាក់ចំនួន៧៥លានដុល្លារអាមេរិកដល់ក្រុមអ្នកគាំទ្រអតីតប្រធានាធិបតីអាមេរិក លោក ដូណាល់ត្រាំ ហើយលោករំពឹងថា ការផ្តល់ប្រាក់របស់លោក នឹងជួយលើកទឹកចិត្តឱ្យអ្នកគាំទ្រលោក ដូណាល់ ត្រាំ ចុះឈ្មោះបោះឆ្នោត ។

អភិបាលរដ្ឋ Pennsylvania លោក Josh Shapiro ដែលជាសមាជិកគណបក្ស Democrat បានផ្តល់កិច្ចសម្ភាសន៍ជាមួយស្ថានីយទូរទស្សន៍ NBC កាលពីថ្ងៃទី២០ ខែតុលា ថា ការផ្តល់ប្រាក់របស់លោក Elon Musk គួរឱ្យបារម្ភយ៉ាងខ្លាំង ហើយមន្ត្រីអនុវត្តច្បាប់គួរត្រួតពិនិត្យករណីនេះ ។

ចំណែកអតីតមន្ត្រីក្រសួងយុត្តិធម៌ ដែលទទួលខុសត្រូវផ្នែកសិទ្ធិបោះឆ្នោតនិយាយថា ការផ្តល់រង្វាន់សម្រាប់អ្នកមានសិទ្ធិបោះឆ្នោតនៅរដ្ឋ Battleground នឹងធ្វើឱ្យប៉ះពាល់ដល់លទ្ធផលបោះឆ្នោត ។ វាជាភស្តុតាងបង្ហាញថា លោក Elon Musk មានចេតនាធ្វើឱ្យខ្លួនមានឥទ្ធិពលដល់ការបោះឆ្នោតជ្រើសរើសប្រធានាធិបតីអាមេរិក ហើយវាអាចមានបញ្ហាផ្នែកច្បាប់ ។

ដូចគ្នានេះ អ្នកជំនាញផ្នែកច្បាប់បោះឆ្នោតមកពីសាកលវិទ្យាល័យ California, Los Angeles និយាយថា ទង្វើរបស់លោក Elon Musk គឺជាការទិញសំឡេងឆ្នោតយ៉ាងខុសច្បាប់ ។ យោងតាមច្បាប់ចែងថា ការផ្តល់ប្រាក់ ឬគម្រោងផ្តល់ប្រាក់ និងការទទួលប្រាក់ដើម្បីចុះឈ្មោះបោះឆ្នោត ឬកាត់បន្ថយសំឡេងឆ្នោត គឺជាទង្វើខុសច្បាប់ និងត្រូវផាកពិន័យជាប្រាក់ចំនួន១ម៉ឺនដុល្លារអាមេរិក ឬជាប់ពន្ធនាគារមិនលើស៥ឆ្នាំ ៕

ប្រទេសថៃ ៖ កាលពីថ្ងៃទី១៦ ខែតុលា ឆ្នាំ២០២៤ សារព័ត៌មានថៃរាយការណ៍ថា លោក Poonphong Naiyanaphakorn ប្រធានការិយាល័យគោលនយោបាយ និងយុទ្ធសាស្ត្រពាណិជ្ជកម្មបានលើកឡើងថា ការចិញ្ចឹមឆ្កែ និងឆ្មា ក្នុងទីក្រុងនានានៅប្រទេសចិន គឺស្មើរហូតដល់ជាង១២០លានក្បាល ក្នុងនោះការចិញ្ចឹមឆ្មា ស្មើ៧០លានក្បាល និងឆ្កែ ស្មើ៥២លានក្បាល ដែលធ្វើឱ្យតម្រូវការចំណីសត្វនៅចិនកើនឡើង ។

យោងតាមទិន្នន័យនៅឆ្នាំ២០២៣ បញ្ជាក់ថា ការទិញចំណីឆ្មានៅចិន កើនឡើង៧,៦% ស្មើទឹកប្រាក់៧១.០០០លានយាន់ (ឬស្មើ១ម៉ឺនលានដុល្លារអាមេរិក) ។ រីឯការទិញចំណីឆ្កែនៅចិន កើនឡើង៤% ស្មើទឹកប្រាក់៧៤.៨០០លានយាន់ (ឬស្មើ១០.៥០០លានដុល្លារអាមេរិក) ។

ចំណែកចំនួនម្ចាស់សត្វចិញ្ចឹមក្នុងទីក្រុងលំដាប់ទី២ (Second-Tier Cities) មានច្រើនបំផុត គឺស្មើនឹង៤១% ។ រីឯចំនួនម្ចាស់សត្វចិញ្ចឹមក្នុងទីក្រុងលំដាប់ទី១ (First-Tier Cities) និងទីក្រុងលំដាប់ទី៣ (Third-Tier Cities) គឺស្មើនឹង២៩% និង៣០% តាមលំដាប់ ។

ទីក្រុងធំៗទាំងអស់ស្ថិតនៅភាគឦសានប្រទេសចិន គឺសុទ្ធតែជាទីក្រុងលំដាប់ទី២ ព្រមទាំងបណ្តាខេត្ត-ក្រុងធំៗជាច្រើនទៀត រួមមាន ៖ ទីក្រុងហាប៊ីន, ទីក្រុងឆាងឈុន, ទីក្រុងសេនយ៉ាង, ខេត្តហីឡុងជាំង, ខេត្តជីលីន, និងខេត្តលៀវនីង គឺជាទីតាំងមានតម្រូវការចំណីសត្វច្រើន ។

ហេតុនេះ ក្រុមហ៊ុនផលិត និងនាំចេញចំណីសត្វរបស់ថៃអាចរកទីផ្សារគោលដៅថ្មី ដែលស្ថិតនៅភាគឦសានប្រទេសចិន ហើយក្រុមហ៊ុនថៃគួរតែឈ្វេងយល់ពីតម្រូវការរបស់អតិថិជនចិនផងដែរ ។ បន្ទាប់មក ក្រុមហ៊ុនថៃនឹងអាចកែសម្រួលដំណាក់កាលផលិតចំណីសត្វឱ្យមានគុណភាពល្អ ស្របតាមតម្រូវការសង្គម, បរិស្ថាន និងកម្លាំងពលកម្ម ខណៈអតិថិជនបានផ្តោតលើកត្តាទាំងនេះកាន់តែខ្លាំង ។

ខាងក្រោមនេះ គឺជាកត្តាសំខាន់ៗដែលធ្វើឱ្យចំណីសត្វនាំចូលពីក្រៅប្រទេសលូតលាស់បានល្អនៅចិន រួមមាន ៖

១-នាំចេញចំណីសត្វទៅចិនជាប្រចាំ កុំឱ្យខ្វះខាតក្នុងទីផ្សារ
២-នាំចេញចំណីសត្វទើបផលិតថ្មីៗ ដោយសារអតិថិជនចិនផ្តល់សំខាន់លើថ្ងៃផុតសុពលភាព
៣-គ្រប់គ្រងតម្លៃចំណីសត្វ កុំឱ្យខុសគ្នាច្រើននៅតាមទីផ្សារនីមួយៗ ដោយសារទីផ្សារចំណីសត្វនៅចិនប្រកួតប្រជែងគ្នាខ្លាំង និង
៤-វេចខ្ចីចំណីសត្វឱ្យមានភាពស្រស់ស្អាតដើម្បីទាក់ទាញអតិថិជន ព្រមទាំងបញ្ជាក់ពីសារៈប្រយោជន៍របស់ចំណីសត្វ ។

លោក Poonphong Naiyanaphakorn ប្រធានការិយាល័យគោលនយោបាយ និងយុទ្ធសាស្ត្រពាណិជ្ជកម្មបន្តថា កាលពីឆ្នាំ២០២៣ ប្រទេសថៃ បានទទួលចំណូលពីការនាំចេញចំណីសត្វ ស្មើទឹកប្រាក់២.០៩២លានដុល្លារអាមេរិក ធ្លាក់ចុះ១៥% បើធៀបនឹងឆ្នាំ២០២២ ។ រីឯទីផ្សារនាំចេញចំណីសត្វសំខាន់ៗរបស់ថៃ រួមមាន ៖ សហរដ្ឋអាមេរិក, ជប៉ុន, ម៉ាឡេស៊ី, អ៊ីតាលី និងអូស្ត្រាលី ។

ដោយឡែក រយៈពេល៨ខែដំបូងនៃឆ្នាំ២០២៤នេះ ប្រទេសថៃបានទទួលចំណូលពីការនាំចេញចំណីសត្វទៅក្រៅប្រទេស ស្មើទឹកប្រាក់១.៧៦៩លានដុល្លារអាមេរិក កើនឡើង៣៤,២% ៕