ប្រទេសអាមេរិក៖ សហរដ្ឋអាមេរិកកំពុងប្រឈមនឹងគ្រោះធម្មជាតិដ៏ធ្ងន់ធ្ងរបំផុត ខណៈព្យុះព្រិលខ្លាំងបានវាយប្រហារទីក្រុងញូវយ៉ក បណ្តាលឱ្យកកស្ទះចរាចរណ៍នៅនឹងមួយកន្លែងទៅណាមិនបាន។
ចាប់តាំងពីថ្ងៃទី ២៩ ខែវិច្ឆិការហូតមកដល់ពេលនេះ តំបន់ជាច្រើនក្នុងទីក្រុងញូវយ៉កគឺមានការធ្លាក់ព្រិលយ៉ាងខ្លាំង ធ្វើឱ្យសីតុណ្ហភាពកាន់តែត្រជាក់ទៅៗបានគ្របដណ្តប់តំបន់ដ៏ធំមួយនៃសហរដ្ឋអាមេរិក។

ការធ្លាក់ព្រិលដ៏សែនក្រាស់ដែលបានកត់ត្រារហូតដល់ ១.២ – ១.៨ ម៉ែត្រត្រូវបានព្យាករណ៍ថានឹងបន្តធ្លាក់លើទីក្រុង Watertown និងតំបន់ភាគខាងកើតនៃបឹង Ontario រហូតដល់ថ្ងៃទី ៤ ខែធ្នូ។ អ្នកជំនាញឧតុនិយមបានព្រមានថា ទីក្រុងផ្សេងទៀតក៏អាចទទួលបានព្រិលរហូតដល់ ៩០០ មីលីម៉ែត្រពេញមួយចុងសប្តាហ៍ផងដែរ ជាហេតុធ្វើឱ្យសហរដ្ឋអាមេរិកប្រកាសដាក់ប្រទេសក្នុងគ្រាអាសន្នតែម្តង។ វិធានការនេះអនុញ្ញាតឱ្យអាជ្ញាធររដ្ឋប្រមូលធនធាន និងដាក់ពង្រាយវិធានការសង្គ្រោះទាន់ពេលវេលា។

ហើយផ្លូវដឹកជញ្ជូនសំខាន់ៗជាច្រើនត្រូវបានបិទ ដោយសារព្យុះព្រិលដ៏ខ្លាំងក្លាមួយនេះ។ បច្ចុប្បន្នមនុស្សជាងពីរលាននាក់នៅខាងក្រោមបឹង Great Lakes ស្ថិតនៅក្រោមការព្រមានអំពីអាកាសធាតុរដូវរងាធ្ងន់ធ្ងរ។ ការព្រមានអំពីព្យុះរដូវរងាត្រូវបានចេញនៅបឹង Superior និង Michigan ហើយការព្រមានអំពីផលប៉ះពាល់លើបឹងត្រូវបានចេញនៅ Lake Erie និង Ontario ដោយមានព្រិលធ្លាក់ខ្លាំងបានរាយការណ៍កាលពីចុងសប្តាហ៍មុននៅទូទាំងតំបន់ Ohio រដ្ឋ Pennsylvania និង New York ។

ការព្រមានអំពីឥទ្ធិពលព្រិលនៅបឹងសម្រាប់ផ្នែកភាគខាងលិចនៃទីក្រុងញូវយ៉ក ភាគឦសាននៃរដ្ឋ Ohio និងភាគពាយ័ព្យរដ្ឋ Pennsylvania អាចនឹងបន្តដល់ថ្ងៃទី៤ ខែធ្នូនេះ ជាមួយអាកាសធាតុត្រជាក់ខ្លាំង ហើយ ៧០% នៃទ្វីបអាមេរិកនឹងទទួលបានអាកាសធាតុត្រជាក់នៃសីតុណ្ហភាពក្រោមសូន្យក្នុងរយៈពេលប៉ុន្មានថ្ងៃខាងមុខ។ ទីក្រុងជាច្រើនរួមមាន៖ ញូវយ៉ក ឈីកាហ្គោ អាត្លង់តា មីនីណាប៉ូលីស និងស៊ីនស៊ីនណាទី នឹងមានសីតុណ្ហភាពក្រោមសូន្យពេញមួយសប្តាហ៍តែម្តង៕

ប្រទេសហូឡង់ ៖ ប្រទេសហូឡង់បានបង្កើតសហគមន៍ឈ្មោះ Minitopia ដែលអនុញ្ញាតឱ្យពលរដ្ឋអាចសាងសង់ផ្ទះរស់នៅមានទំហំសមល្មមតាមចំណង់ចំណូលចិត្តរបស់ខ្លួន នៅលើដីដែលរដ្ឋាភិបាលជួលឱ្យដើម្បីដោះស្រាយបញ្ហាខ្វះខាតជម្រក ។ ប៉ុន្តែរដ្ឋាភិបាលបានកំណត់លក្ខខណ្ឌ គឺពលរដ្ឋត្រូវសង់ផ្ទះពុំប៉ះពាល់បរិស្ថាន ។

រដ្ឋាភិបាលបានជួលដីទំនេរក្នុងទីក្រុងជាច្រើនឱ្យពលរដ្ឋរស់នៅបង្កើតសហគមន៍ Minitopia ក្នុងតម្លៃចាប់ពី២៩៤ដុល្លារ ទៅ៤៤១ដុល្លារអាមេរិកក្នុង១ខែ ហើយតម្លៃជួលខុសៗគ្នាអាស្រ័យលើទំហំផ្ទះ ។ ពលរដ្ឋអាចសង់ផ្ទះរស់នៅបណ្តោះអាសន្នដោយខ្លួនឯង ចាប់ពី១៥ឆ្នាំ ទៅ៣០ឆ្នាំ ។

លក្ខខណ្ឌការសង់ផ្ទះនៅសហគមន៍នេះ គឺជាផ្ទះ២ជាន់មានទំហំសមល្មម និងមិនធំពេក ។ ផ្ទះត្រូវតែរចនាឱ្យមានពណ៌បៃតង និងមិនយកគំរូតាមផ្ទះផ្សេង ដោយប្រើប្រាស់សម្ភារៈសាងសង់ពុំប៉ះពាល់បរិស្ថាន ប៉ុន្តែមានសភាពរឹងមាំបំផុត ។ ក្រៅពីនេះ ក៏ត្រូវតែចំណាយថាមពលតិចក្នុងផ្ទះ និងមានស័ក្តិសមជាមួយបរិយាកាសជុំវិញ ។

ការជួលដីឱ្យពលរដ្ឋសង់ផ្ទះរស់នៅ គឺចាប់ផ្តើមពីទីក្រុង Den Bosch មុនគេ រួចហើយរដ្ឋាភិបាលក៏បានជួលដីក្នុងទីក្រុងផ្សេងៗ ដូចជា ៖ Eindhoven និង Roosendaal ។ ផ្ទះភាគច្រើនក្នុងសហគមន៍មានទំហំតូចៗត្រូវបានសង់លើដីមានកំណត់ដោយដំឡើងបន្ទះសូឡា និងអាចផ្លាស់ប្តូរទៅកាន់ទីតាំងថ្មី ឬដោះឧបករណ៍ផ្សេងៗបាន ។

ក្រៅពីនេះ ពលរដ្ឋបានជួយគ្នាដាំបន្លែបង្ការ, ធ្វើជីកសិកម្ម និងចិញ្ចឹមមាន់ ខណៈអ្នកខ្លះទៀត ត្រងទឹកភ្លៀងទុកប្រើប្រាស់ ។ បច្ចុប្បន្ន ចំនួនពលរដ្ឋហូឡង់បានកើនឡើងច្រើន ខណៈផ្ទៃដីសម្រាប់សាងសង់ផ្ទះមានចំនួនតិចតួច ។ វាធ្វើឱ្យដីធ្លី និងឈ្នួលផ្ទះនៅហូឡង់មានតម្លៃខ្ពស់ ទើបពលរដ្ឋទូទៅ ជាពិសេស អ្នកធ្វើការ និងយុវជន គ្មានផ្ទះសម្បែងផ្ទាល់ខ្លួន ក៏សម្រេចចិត្តមករស់នៅទីនេះ ។

ម្យ៉ាងទៀត ផ្ទៃដីភាគច្រើននៅប្រទេសហូឡង់ គឺជាផ្ទៃដីសម្រាប់បង្កបង្កើនផលកសិកម្ម និងតំបន់អភិរក្ស ទើបរដ្ឋាភិបាលជួលដីឱ្យពលរដ្ឋរស់នៅក្នុងសហគមន៍ និងសង់ផ្ទះពុំប៉ះពាល់បរិស្ថានដោយខ្លួនឯង ៕

ប្រទេសជប៉ុន ៖ យោងតាមក្រុមហ៊ុនស្រាវជ្រាវជប៉ុនបង្ហាញថា ក្រុមហ៊ុនផ្នែកអាហារនៅប្រទេសជប៉ុន រួមមាន ៖ ភោជនីយដ្ឋាន, ផ្សារទំនើប និងហាងទំនិញ នឹងដំឡើងថ្លៃអាហាររហូតដល់ជាង៣,៩០០មុខ នៅដើមឆ្នាំ២០២៥ ដោយសារក្រុមហ៊ុនទាំងនេះត្រូវចំណាយថ្លៃដើមខ្ពស់ ។ ប៉ុន្តែវាធ្វើឱ្យពលរដ្ឋបារម្ភខ្លាំងពីតម្លៃអាហារកើនឡើងម្តងទៀត ក្រោយពីក្រុមហ៊ុនទាំងនេះទើបតែដំឡើងថ្លៃអាហារចំនួន១២,៥២០មុខ នៅឆ្នាំ២០២៤ ។

ក្រុមហ៊ុនស្រាវជ្រាវ Teikoku Databank ឱ្យដឹងថា តម្លៃអាហារនៅជប៉ុនបានកើនឡើងជាបន្តបន្ទាប់ រហូតដល់ឆ្នាំ២០២៥ ។ បើតាមការសាកសួរទៅកាន់ភោជនីយដ្ឋាន, ផ្សារទំនើប និងហាងទំនិញជាច្រើនកន្លែងឱ្យដឹងថា ពួកគេនឹងដំឡើងថ្លៃអាហាររហូតដល់ជាង៣,៩០០មុខ គិតចាប់ពីខែមករា ដល់ខែមេសា ឆ្នាំ២០២៥ ។

ក្រុមហ៊ុនស្រាវជ្រាវបញ្ជាក់ថា បើទោះជាការដំឡើងថ្លៃអាហារបានជួយឱ្យក្រុមហ៊ុនទាំងនេះពុំរងផលប៉ះពាល់ដោយសារការចំណាយដើមទុនខ្ពស់ ប៉ុន្តែវានឹងប៉ះពាល់ពលរដ្ឋ ដោយសារពួកគេត្រូវចំណាយប្រាក់ច្រើនជាងមុន ។ ម្យ៉ាងទៀត បើតម្លៃអាហារ និងទំនិញកើនឡើងខ្ពស់ វាមិនងាយធ្លាក់ចុះវិញទេ ហើយពលរដ្ឋនឹងកាត់បន្ថយការចំណាយ ។

ក្រុមហ៊ុនអាហារជប៉ុន ចំនួន១៩៥ក្រុមហ៊ុន បានប្រកាសកាលពីចុងខែវិច្ឆិកា ឆ្នាំ២០២៤ ថា ពួកគេនឹងដំឡើងថ្លៃអាហារចំនួន៣,៩៣៣មុខ រួមមាន ៖ គ្រឿងស្រវឹង, ភេសជ្ជៈផ្អែមមានជាតិហ្គាស, នំប៉័ង, អាហារកែច្នៃ, អាហារក្លាសេ និងនំចណីជាច្រើនមុខ ។
ការចំណាយថ្លៃដើមខ្ពស់ក្នុងការទិញបន្លែបង្ការ និងត្រីសាច់ គឺជាមូលហេតុចម្បងដែលធ្វើឱ្យថ្លៃអាហារកើនឡើងនៅជប៉ុន ។ រីឯការចំណាយដើមទុនលើការដឹកជញ្ជូនអាហារ និងកម្លាំងពលកម្មកើនឡើង ក៏បានជំរុញឱ្យថ្លៃអាហារកើនឡើងផងដែរ ។ កត្តាទាំងនេះនឹងធ្វើឱ្យក្រុមហ៊ុនអាហារជប៉ុនដំឡើងថ្លៃអាហារកាន់តែខ្ពស់ នៅឆ្នាំ២០២៥ ។

តាមរបាយការណ៍បញ្ជាក់ថា ពេញមួយឆ្នាំ២០២៤នេះ អាហារជប៉ុនចំនួន១២,៥២០មុខ បានឡើងថ្លៃជាបន្តបន្ទាប់ ហើយអាហារចំនួន១០៩មុខ នឹងឡើងថ្លៃ នៅខែធ្នូ ឆ្នាំ២០២៤ ។ ដូច្នេះ វាធ្វើឱ្យពលរដ្ឋជប៉ុនបង្ហាញក្តីបារម្ភ ដោយសារពួកគេត្រូវចំណាយប្រាក់ច្រើនជាងមុនសម្រាប់ទិញទំនិញ និងអាហារប្រចាំថ្ងៃ ៕

ប្រទេសម៉ាឡេស៊ី ៖ សមាជិកសភាតំណាងរាស្ត្រគណបក្សប្រឆាំងមួយរូបនៅប្រទេសម៉ាឡេស៊ី ត្រូវបានមហាជនរិះ.គន់ ពេញបណ្តាញសង្គម ក្រោយពីស្នើរដ្ឋាភិបាលគាំទ្រឱ្យពលរដ្ឋមានប្តី-ប្រពន្ធច្រើន ដើម្បីដោះស្រាយបញ្ហាចំនួនពលរដ្ឋធ្លាក់ចុះ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២ ខែធ្នូ ឆ្នាំ២០២៤ ។

លោក Dato Rosol Wahid ជាសមាជិកសភាប្រចាំខេត្តទ្រាំងកានូ មកពីគណបក្សឥស្លាមម៉ាឡេស៊ី បានលើកឡើងក្នុងកិច្ចពិភាក្សាពីសេចក្តីព្រាងថវិកាឆ្នាំ២០២៥ នៅរដ្ឋសភា កាលពីថ្ងៃទី២៨ ខែវិច្ឆិកា កន្លងមកថា រដ្ឋាភិបាលគួរតែលើកទឹកចិត្តឱ្យយុវជនសម័យថ្មីរៀបការ និងមានកូនឱ្យច្រើន ពីព្រោះពួកគេពុំព្រមរៀបការបង្កើតគ្រួសារទេ ។

លោកបន្តថា តើក្រសួងកិច្ចការនារី និងអភិវឌ្ឍន៍សហគមន៍អាចធ្វើអ្វីបានខ្លះ ដើម្បីជំរុញឱ្យយុវជនម៉ាឡេស៊ីរៀបការមានកូន ដើម្បីឱ្យប្រទេសរបស់យើងមានចំនួនពលរដ្ឋកើនឡើង? ហេតុនេះ រដ្ឋាភិបាលគួរតែសាកល្បងជំរុញឱ្យពលរដ្ឋមានប្តី-ប្រពន្ធច្រើន ដើម្បីដោះស្រាយបញ្ហាអត្រាកំណើតធ្លាក់ចុះ នាពេលបច្ចុប្បន្ន ។

ក្រោយការលើកឡើងបែបនេះ បានធ្វើឱ្យសមាជិកសភាផ្សេងៗក្នុងរដ្ឋសភាសើចចំអក និងរិះគន់យ៉ាងច្រើន ។ លើសពីនេះ ក៏មានការជជែកវែកញែកពីមហាជនពេញបណ្តាញសង្គមផងដែរ ពាក់ព័ន្ធនឹងសំណើឱ្យពលរដ្ឋមានប្តី-ប្រពន្ធច្រើន ។ ប៉ុន្តែលោក Dato បញ្ជាក់ថា ប្រទេសមហាអំណាច ដូចជា ៖ ចិន, ឥណ្ឌា និងឥណ្ឌូណេស៊ី សុទ្ធតែមានពលរដ្ឋច្រើនទាំងអស់ ហើយដើម្បីក្លាយជាប្រទេសមួយអស្ចារ្យ ម៉ាឡេស៊ីត្រូវតែមានពលរដ្ឋច្រើនដូចគ្នា ។

រដ្ឋាភិបាលម៉ាឡេស៊ីក្រោមការដឹកនាំរបស់អតីតនាយករដ្ឋមន្ត្រី លោក Mahathir Mohamad ដែលធ្លាប់កំណត់គោលដៅកាលពីឆ្នាំ១៩៨២ ឱ្យម៉ាឡេស៊ីមានពលរដ្ឋរហូតដល់៧០លាននាក់ ប៉ុន្តែអត្រាកំណើតបានធ្លាក់ចុះជាបន្តបន្ទាប់ ។ ជាក់ស្តែង កាលពីឆ្នាំ២០១០ ស្ត្រីម្នាក់មានកូន២នាក់ ប៉ុន្តែនៅឆ្នាំ២០២០ ពួកនាងមានកូនតែម្នាក់ប៉ុណ្ណោះ ។

នេះជាបញ្ហាគួរឱ្យបារម្ភយ៉ាងខ្លាំង ហើយនៅឆ្នាំ២០៤៣ ម៉ាឡេស៊ីនឹងសម្បូរពលរដ្ឋអាយុច្រើន គឺពលរដ្ឋ១៥% នឹងមានអាយុលើស៦៥ឆ្នាំ ។ យើងប្រឈមនឹងបញ្ហាអត្រាកំណើតធ្លាក់ចុះខ្លាំង ហើយវានឹងប៉ះពាល់ដោយផ្ទាល់ចំពោះការអភិវឌ្ឍសង្គម និងសេដ្ឋកិច្ចជាតិ ។ នេះបើតាមការលើកឡើងរបស់លោក Dato ។

មហាជនពុំយល់ស្របនឹងការលើកឡើងរបស់សមាជិកសភារូបនេះទេ ដោយពួកគេនិយាយថា មូលហេតុធ្វើឱ្យអត្រាកំណើតធ្លាក់ចុះ ដោយសារបញ្ហាសេដ្ឋកិច្ច និងការចំណាយក្នុងជីវភាពរស់នៅខ្ពស់ ។ រីឯការមានប្តី-ប្រពន្ធច្រើននាក់ពុំអាចជួយអ្វីឡើយ ហើយរដ្ឋាភិបាលគួរតែលើកទឹកចិត្តឱ្យវិនិយោគិនបរទេសមកវិនិយោគនៅម៉ាឡេស៊ីឱ្យបានច្រើន ដើម្បីឱ្យពលរដ្ឋមានការងារធ្វើ និងបង្កើនឱកាសអាជីវកម្ម ៕