លោកតា Marjorie Fiterman អាយុ ១០២ ឆ្នាំនិងលោកយាយ Bernie Littman អាយុ ១០០ ទើបតែបានរៀបការជាមួយគ្នា នៅឯផ្ទះថែទាំមួយបន្ទាប់ពីពួកគាត់មានទំនាក់ទំនងស្នេហាអស់រយៈពេល ៩ ឆ្នាំ។
កាលពីពេលថ្មីៗនេះ Guinness World Records បានទទួលស្គាល់លោកតា Fiterman និងលោកយាយ Littman ថាជាគូស្នេហ៍ទើបនឹងរៀបការថ្មីថ្មោង ដែលមានវ័យចំណាស់ជាងគេបំផុតក្នុងពិភពលោកដែលមានអាយុរួមគ្នា ២០២ ឆ្នាំ។

ជាច្រើនទសវត្សរ៍មុន ពួកគាត់បានចូលរៀននៅសកលវិទ្យាល័យ Pennsylvania ជាមួយគ្នា ប៉ុន្តែមិនដែលស្គាល់គ្នាទេ។ លោកយាយជាគ្រូបង្រៀន ហើយលោកតាជាវិស្វករ ក្រោយមកពួកគាត់បានរស់នៅក្នុងមណ្ឌលថែទាំមួយនៅទីក្រុង Philadelphia សហរដ្ឋអាមេរិក។ លោក Fiterman បានជួបលោកស្រី Littman ក្នុងពិធីជប់លៀងមួយនៅមណ្ឌលថែទាំ ហើយអ្នកទាំងពីរក៏បានចាប់ផ្តើមទំនាក់ទំនងគ្នាភ្លាមៗ។

ពួកគាត់បានបង្កើតទំនាក់ទំនងរបស់ពួកគាត់តាមរយៈអាហាររួមគ្នា និងការចូលរួមក្នុងការប្រគុំតន្ត្រីដែលរៀបចំដោយមណ្ឌលថែទាំ។ អ្នកទាំងពីរបានរៀបការកាលពីខែឧសភា ឆ្នាំ២០២៤ បន្ទាប់ពីរាប់អានគ្នាអស់រយៈពេល ៩ ឆ្នាំ ប៉ុន្តែទើបតែបាន Guinness World Records ទទួលស្គាល់ថ្មីៗនេះទេ។ Sarah Sicherman ក្មួយស្រីរបស់លោក Fiterman បាននិយាយថា ពួកគាត់ទាំងពីរសុទ្ធតែធ្លាប់មានប្តីប្រពន្ធរៀងៗខ្លួន ប៉ុន្តែនៅពេលប្តីប្រពន្ធរបស់ពួកគាត់លាចាកលោក លោកតា Fiterman និងលោកយាយ Littman ក៏ប្តូទៅរស់នៅមណ្ឌលថែទាំ ហើយក៏បានជួបស្នេហាម្តងទៀតនៅអាយុ ១០០ ឆ្នាំតែម្តង។

គួរបញ្ជាក់ដែរថា ពិធីមង្គលការរបស់អ្នកទាំងពីរកាលពីខែឧសភា គឺល្បីល្បាញខ្លាំងណាស់ ដោយមានមនុស្សជាច្រើនចង់ដឹងពីរបៀបថែទាំសុខភាពរបស់ពួកគេ។ លោកតា Fiterman បានមានប្រសាសន៍ថា លោកមានអាយុយឺនយូរ និងស្វែងរកសុភមង្គល ដោយសារការអានសៀវភៅ និងតាមដានព័ត៌មានថ្មីៗ។ រីឯលោកយាយ Littman Fiterman ជឿថាអាថ៌កំបាំងក្នុងការរស់នៅបានយូរអង្វែង គឺការផឹកទឹកដោះគោដែលមានជាតិ fermented៕

ប្រទេសថៃ ៖ សារព័ត៌មានថៃរាយការណ៍ថា កាលពីយប់ថ្ងៃទី១២ ខែធ្នូ ឆ្នាំ២០២៤ សមត្ថកិច្ចថៃបានធ្វើប្រតិបត្តិការចា.ប់ ខ្លួនក្រុមអ្នកសុំទានថៃ និងបរទេស សរុបចំនួន១២នាក់ នៅទីក្រុងបាងកក ស្រាប់តែសមត្ថកិច្ចរកឃើញអ្នកសុំទានម្នាក់មានប្រាក់ជាប់ខ្លួនជាង៣សែនបាត និងប្រាក់ក្នុងធនាគារ១លានបាតទៀត ។

សមត្ថកិច្ចបានចុះត្រួតពិនិត្យក្រុមអ្នកសុំទាននៅតំបន់សេដ្ឋកិច្ចសុខុមវីត ក្រោយពីពលរដ្ឋរាយការណ៍ថា មានក្រុមអ្នកសុំទានជាច្រើននាក់មកអង្គុយសុំទាននៅតំបន់នេះ ដែលធ្វើឱ្យប៉ះពាល់មុខមាត់ប្រទេសថៃ ។ ក្រោយការត្រួតពិនិត្យ សមត្ថកិច្ចក៏បានចាប់អ្នកសុំទានថៃ ៨នាក់, ខ្មែរ ២នាក់, ឡាវម្នាក់ និងមីយ៉ាន់ម៉ាម្នាក់ ហើយអ្នកសុំទានបរទេសទាំងនេះបានស្នាក់នៅប្រទេសថៃដោយគ្មានការអនុញ្ញាត ។

ក្នុងចំណោមអ្នកសុំទានទាំងអស់ គឺមាននារីសុំទានម្នាក់ជាជនជាតិថៃ មានប្រាក់ជាប់ខ្លួនយ៉ាងច្រើនបានពីការសុំទាន គឺរហូតដល់ជាង៣សែនបាត ព្រមទាំងមានប្រាក់ក្នុងធនាគារប្រមាណ១លានបាតទៀត ។ បន្ទាប់មក សមត្ថកិច្ចក៏បបញ្ជូនអ្នកសុំទានទាំងអស់ទៅកាន់ការិយាល័យស៊ើបអង្កេតនៅស្ថានីយប៉ូលិស Lumphini ទីក្រុងបាងកក ដើម្បីចាត់វិធានការបន្តតាមច្បាប់ ។

ការចាប់ខ្លួនក្រុមអ្នកសុំទានលើកនេះ បានធ្វើឱ្យមហាជនភ្ញាក់ផ្អើលយ៉ាងខ្លាំងក្រោយពីសមត្ថកិច្ចរកឃើញថា នារីសុំទានថៃម្នាក់មានប្រាក់ជាប់ខ្លួនយ៉ាងច្រើនសន្ធឹកសន្ធាប់ ។ អ្នកសុំទានទាំងនេះតែងតែធ្វើឱ្យខ្លួនលំបាកវេទនា ហើយមកអង្គុយនៅតាមទីប្រជុំជននានា ដើម្បីឱ្យពលរដ្ឋថៃឃើញហើយអាណិតអាសូរ និងផ្តល់ប្រាក់ឱ្យច្រើនៗ ។

បើតាមពលរដ្ឋថៃនៅបរិវេណនេះប្រាប់ថា អ្នកសុំទានភាគច្រើនបាននាំក្រុមគ្រួសារមកអង្គុយសុំប្រាក់ពីអ្នកដំណើរ និងភ្ញៀវទេសចរដើរឆ្លងកាត់ ហើយអ្នកសុំទានខ្លះបានយកក្មេង និងសត្វឆ្កែ-ឆ្មាមកជាមួយផង ។ នៅពេលសមត្ថកិច្ចចុះមកត្រួតពិនិត្យ ពួកគេក៏ទៅអង្គុយសុំប្រាក់នៅកន្លែងផ្សេង រហូតដល់សមត្ថកិច្ចត្រឡប់ទៅវិញ ទើបពួកគេមកអង្គុយនៅកន្លែងដើម ។

រីឯអាជីវករថៃម្នាក់និយាយថា អ្នកសុំទានទាំងនេះបានសហការគ្នាជាក្រុម និងផ្លាស់ប្តូរពេលវេលាសុំប្រាក់ពីពលរដ្ឋថៃ ហើយពួកគេអង្គុយតែមួយភ្លែតទទួលបានប្រាក់រហូតដល់១ម៉ឺនបាត ដែលខុសពីអាជីវកររកប្រាក់១ថ្ងៃ បានតែជាង១០០បាតប៉ុណ្ណោះ ។

ដូច្នេះ សូមសំណូមពរឱ្យពលរដ្ឋថៃឈប់អាណិត ឬផ្តល់ប្រាក់ឱ្យអ្នកសុំទានដែលមានកាយសម្បទានគ្រប់គ្រាន់ ដោយសារពួកគេអាចជួញដូរមនុស្សយកក្មេងមកសុំប្រាក់ ដែលមិនមែនជាកូនរបស់ខ្លួនពិតប្រាកដ ៕

ប្រទេសចិន ៖ សារព័ត៌មានបរទេសបានរាយការណ៍កាលពីថ្ងៃទី១៣ ខែធ្នូ ឆ្នាំ២០២៤ ថា មេរោគថ្មីឈ្មោះ Norovirus កំពុងឆ្លងរាតត្បាតខ្លាំងនៅប្រទេសចិន ហើយការបា.ញ់ អាល់កុលពុំអាចការពារមេរោគនេះទេ ដែលធ្វើឱ្យចំនួនអ្នកឆ្លងកើនឡើងជាបន្តបន្ទាប់ ។ បច្ចុប្បន្ន ពុំទាន់មានថ្នាំព្យាបាល និងវ៉ាក់សាំងការពារនៅឡើយ ។

កាលពីថ្ងៃទី១១ ខែធ្នូ កន្លងមក សារព័ត៌មានម៉ាឡេស៊ីឈ្មោះ World of Buzz បានរាយការណ៍ពីស្ថានការណ៍ជំងឺ Norovirus ថា នៅតំបន់ជាច្រើនរបស់ចិនមានការឆ្លងរាតត្បាតជំងឺនេះគួរឱ្យបារម្ភ ដោយសារវាងាយឆ្លងពីមនុស្សម្នាក់ទៅមនុស្សម្នាក់ ហើយសូម្បីតែអាល់កុល ក៏ពុំអាចការពារការឆ្លងបានដែរ ។

ចាប់ពីខែតុលា ឆ្នាំ២០២៤ កូនសិស្សចិនជាច្រើននាក់បានឆ្លងជំងឺ Norovirus ដូចជា ៖ កូនសិស្ស ចំនួន៣បន្ទប់ ដែលរៀននៅសាលាបឋមសិក្សាមួយកន្លែងនៅតំបន់ Zhangwan ទីក្រុងស៊ីយ៉ាន ខេត្តហ៊ូបេ បានឆ្លងជំងឺនេះ ដែលធ្វើឱ្យសាលារៀនទាំងមូលបិទទ្វារបណ្តោះអាសន្ន ។ រីឯមជ្ឈមណ្ឌលកុមារតូចនៅទីក្រុងស៊ីអាន ខេត្តសានស៊ី មានកុមារតូចឆ្លងជំងឺនេះចំនួន៤៨នាក់ កាលពីពាក់កណ្តាលខែតុលា ឆ្នាំ២០២៤ ។

បច្ចុប្បន្ន មេរោគនេះបានឆ្លងរាលដាលកាន់តែខ្លាំង ហើយមជ្ឈមណ្ឌលជាតិគ្រប់គ្រង និងបង្ការជំងឺរបស់ចិនបានចេញគោលការណ៍ណែនាំឱ្យពលរដ្ឋប្រយ័ត្នជំងឺនេះ ហើយអ្នកឆ្លងត្រូវនៅដាច់ដោយឡែកពីអ្នកដទៃ ។ ពលរដ្ឋត្រូវលាងដៃជាមួយសាប៊ូ យ៉ាងហោចណាស់២០វិនាទី មុនពេលបរិភោគអាហារ និងក្រោយពេលបន្ទោរបង់ ។

លើសពីនេះ គួរតែចម្អិនអាហារឱ្យឆ្អិនមុនពេលបរិភោគ និងសម្អាតបរិវេណដែលប៉ះពាល់ញឹកញាប់ ដោយប្រើប្រាស់ថ្នាំសម្លាប់មេរោគផ្សំពីសារធាតុក្លរីន ។ ពលរដ្ឋត្រូវសុំច្បាប់សម្រាកពីការងារករណីឆ្លងជំងឺនេះ និងទៅមន្ទីរពេទ្យជាបន្ទាន់ ។

ចំណែកអ្នកជំនាញមកពីមជ្ឈមណ្ឌលការពារ និងបង្ការជំងឺនិយាយថា Norovirus នឹងបណ្តាលឱ្យរលាកក្រពះ ឬពោះវៀន ហើយមេរោគអាចឆ្លងពេញមួយឆ្នាំ ប៉ុន្តែវាឆ្លងខ្លាំងបំផុត គឺចាប់ពីខែតុលា ដល់ខែមីនា ។ កុមារឆ្លងជំងឺនេះនឹងមានអាការៈក្អួតចង្អោរខ្លាំង រីឯមនុស្សពេញវ័យមានអាការៈចុកពោះ, គ្រុនក្តៅ និងឈឺសាច់ដុំ ។

ទោះជាអ្នកជំងឺភាគច្រើនអាចជាសះស្បើយ ចាប់ពី២ថ្ងៃ ទៅ៣ថ្ងៃក្តី ប៉ុន្តែកុមារតូច និងមនុស្សចាស់ នឹងខ្វះខាតទឹកខ្លាំង ហើយត្រូវថែទាំឱ្យបានដិតដល់ ។ វិធីការងារជំងឺនេះ គឺការលាងដៃឱ្យស្អាតដោយសាប៊ូ និងទឹក នៅមុនពេល និងក្រោយពេលបរិភោគអាហារ ក៏ដូចជាពេលចេញពីបន្ទប់ទឹក ។ អ្នកឆ្លងគួរនៅដាច់ដោយឡែកពីគេ ហើយបើទោះជាសះស្បើយ ក៏ត្រូវនៅឆ្ងាយពីគេ ចាប់ពី២ថ្ងៃ ទៅ៣ថ្ងៃ ដើម្បីការពារការឆ្លងរាលដាល ៕

ប្រទេសវៀតណាម៖ កាលពីល្ងាចថ្ងៃទី១៣ ខែធ្នូភ្លៀងមួយមេធំ និងខ្យល់ព្យុះកំបុតត្បូងបានបោកបក់ពេញក្រុង Nga Nam ប្រទេសវៀតណាម បណ្ដាលឱ្យផ្ទះចំនួន ៦៤ ខ្នងដួលរលំ ដំបូលបាក់បែកធ្លុះធ្លាយ មនុស្សម្នាក់បានរងរបួស និងដើមឈើជាច្រើនបានបាក់។

យោងតាមការចុះផ្សាយរបស់ Vnexpress ភ្លៀង និងផ្គររន្ទះបានកើតឡើងនៅឃុំ My Binh និង My Quoi បណ្តាលឱ្យខូចខាតផ្ទះ ៦៤ ខ្នង ក្នុងនោះផ្ទះ ១៥ ខ្នងដួលរលំទាំងស្រុង រីឯផ្ទះ ៤៩ ខ្នងទៀតរលំដំបូល និងរងការខូចខាតយ៉ាងធ្ងន់ធ្ងរ។

ខ្យល់ព្យុះនេះក៏បានបណ្តាលឱ្យមនុស្សម្នាក់រងរបួស ហើយដើមឈើជាច្រើននៅតំបន់នោះក៏បានបាក់រលំបិទផ្លូវ បង្កឱ្យមានការកកស្ទះចរាចរណ៍យ៉ាងខ្លាំង។ ខ្យល់ព្យុះបានកើតឡើងភ្លាមៗ ហើយអូសបន្លាយប្រហែល ១៥ នាទី។ អ្នកស្រី Ngoc Hue នៅឃុំ My Quoi បាននិយាយថា គ្រួសារជាច្រើនគ្មានពេលប្រតិកម្មទេនៅពេលនោះ ប្រជាពលរដ្ឋដឹងតែលាក់ខ្លួននៅក្នុងផ្ទះ មិនហ៊ានចេញក្រៅទេ ព្រោះអ្វីៗបានហោះគ្រប់កន្លែងគួរឱ្យភ័យខ្លាចបំផុត។

បច្ចុប្បន្នស្ថានភាពហាក់ធូរស្រាលបន្តិចហើយ ទោះជាយ៉ាងណាតំបន់នេះត្រូវបានគេព្យាករណ៍ថា នឹងបន្តភ្លៀងឥតឈប់ឈរដល់ចុងខែនេះ។ ប៉ូលិសនិងអាជ្ញាធរមូលដ្ឋានបានចល័តកម្លាំងចុះទៅកន្លែងកើតហេតុដើម្បីជួយប្រជាពលរដ្ឋឱ្យរួចផុតពីផលវិបាក។ យោងតាមគណៈកម្មាធិការប្រជាជនទីក្រុង Nga Nam ខ្យល់ព្យុះកំបុតត្បូងត្រឹមមួយល្ងាចសោះ បានបណ្តាលឱ្យខូចខាតសរុបជាង ២ ពាន់លានដុង (ប្រមាណជាង ៧៨.០០០ ដុល្លារអាមេរិក)។

គួរបញ្ជាក់ដែរថា មូលហេតុដែលធ្វើឱ្យប្រទេសវៀតណាមប្រឈមនឹងគ្រោះធម្មជាតិច្រើនជាងគេក្នុងរយៈពេល ១ ឆ្នាំកន្លងមកនេះ គឺដោយសារកត្តាដី ជម្រាលភូគព្ភសាស្ត្រ និងផលប៉ះពាល់នៃការប្រែប្រួលអាកាសធាតុ ការកាប់បំផ្លាញព្រៃឈើ ជាមួយនឹងភ្លៀងធ្លាក់ខ្លាំងបន្ទាប់ពីព្យុះ ដែលនេះហើយជាហេតុធ្វើឱ្យប្រទេសអាស៊ីអាគ្នេយ៍មួយនេះជួបប្រទះនឹងគ្រោះធម្មជាតិឥតឈប់ឈរ៕

យោងតាមបញ្ជីដែលទើបតែចេញផ្សាយដោយ Bloomberg Billionaires Index ថ្មីៗនេះបានឱ្យដឹងថា ក្នុងឆ្នាំ ២០២៤ គ្រួសារដែលមានជាងគេបំផុតនៅលើពិភពលោកនោះ គឺបានទៅលើគ្រួសារ Sam Walton ដែលជាម្ចាស់ក្រុមហ៊ុនលក់រាយ Walmart របស់សហរដ្ឋអាមេរិក ជាមួយទ្រពសម្បត្តិសរុប ៤៣២.៤ ពាន់លានដុល្លារបើប្រៀបធៀបទៅនឹងឆ្នាំមុន ទ្រព្យសម្បត្តិសរុបរបស់សមាជិកគ្រួសារ Walton បានកើនឡើង ១៧២.៧ ពាន់លានដុល្លារអាមេរិក ដោយសារការកើនឡើង ៨០% នៅក្នុងភាគហ៊ុន Walmart នៅឆ្នាំនេះ។ បច្ចុប្បន្នសមាជិកម្នាក់ៗនៃគ្រួសារនេះមានទ្រព្យសម្បត្តិជាង ១០០ ពាន់លានដុល្លារអាមេរិក។

ចំណាត់លេខ ២ បានទៅលើគ្រួសារ Al Nahyan ដែលជាគ្រួសារមានឥទ្ធិពលបំផុតនៅលើពិភពលោក។ គ្រួសារនេះបានគ្រប់គ្រងប្រទេសអារ៉ាប់រួមអស់ជាច្រើនទសវត្សរ៍មកហើយ តាំងពីមុនពេលប្រេងបានផ្លាស់ប្តូរសេដ្ឋកិច្ចទៅទៀត។ បច្ចុប្បន្នលោក Mohammed bin Zayed Al Nahyan ក៏ជាប្រធានាធីបតីរបស់ប្រទេសនេះផងដែរ ជាមួយទ្រពសម្បត្តិ ៣២៣.៩ ពាន់លានដុល្លារអាមេរិក។

រីឯចំណាត់ថ្នាក់លេខ ៣ គឺបានទៅលើគ្រួសារ Al Thani ជាមួយទ្រព្យសម្បត្តិសរុប ១៧២,៩ ពាន់លានដុល្លារ។ អាល់ថានីគឺជាគ្រួសាររាជវង្សគ្រប់គ្រងប្រទេសកាតាចាប់តាំងពីនគរត្រូវបានបង្កើតឡើងក្នុងសតវត្សទី ១៩ ហើយប្រេងត្រូវបានរកឃើញនៅឆ្នាំ ១៩៤០ ដោយបានផ្លាស់ប្តូរសេដ្ឋកិច្ចយ៉ាងខ្លាំង និងជួយគ្រួសាររាជវង្សអាល់ថានីមានទ្រព្យសម្បត្តិយ៉ាងច្រើន។ បច្ចុប្បន្នសមាជិកគ្រួសារនីមួយៗកាន់មុខតំណែងសំខាន់ៗជាច្រើននៅក្នុងរដ្ឋាភិបាល ក៏ដូចជាជាម្ចាស់អាជីវកម្មជាច្រើន ចាប់ពីសណ្ឋាគារ រហូតដល់ក្រុមហ៊ុនធានារ៉ាប់រង។

ចំណែកចំណាត់ថ្នាក់លេខ ៤ គឺបានទៅលើគ្រួសារ Hermes របស់ប្រទេសបារាំង ជាមួយទ្រព្យសម្បត្តិសរុប ១៧០,៦ ពាន់លានដុល្លារ។ លោក Jean-Louis Dumas បានប្រែក្លាយ Hermes ទៅជាអាណាចក្រទំនិញប្រណីតសកល។ ក្រុមហ៊ុននេះល្បីខាងកាបូបម៉ាក Birkin ដែលមានតម្លៃរហូតដល់រាប់សែនដុល្លារ។ បច្ចុប្បន្នសមាជិកជាច្រើននៃគ្រួសារ Hermes ធ្វើការនៅក្នុងក្រុមហ៊ុន ដូចជានាយកច្នៃប្រឌិត Pierre-Alexis Dumas និងប្រធាន Axel Dumas ។

ចំណាត់ថ្នាក់ចុងក្រោយ បានទៅលើគ្រួសារ Koch ដែលជាគ្រួសារមានឥទ្ធិពលបំផុតទី ៥ នៅលើពិភពលោក ជាមួយទ្រពសម្បត្តិ ១៤៨,៥ ពាន់លានដុល្លារ។ គ្រួសារនេះបានបង្កើតក្រុមហ៊ុនចម្រាញ់ប្រេងដែលជាចក្រភពពហុឧស្សាហកម្មមានប្រាក់ចំណូលប្រចាំឆ្នាំចំនួន ១២៥ ពាន់លានដុល្លារអាមេរិក៕

គំនូរ គឺជាសិល្បៈមួយប្រភេទដែលបង្ហាញពីវប្បធម៌របស់ជាតិសាសន៍នីមួយៗ គំនូរដែលមានតម្លៃខ្ពស់ភាគច្រើនគឺបង្កប់អត្ថន័យជ្រៅ មានអាយុកាលយូរឆ្នាំ មានការរចនាស្អាត ប៉ុន្តែរូបខ្លះក៏មិនស្អាតផងដែរ ខណៈគំនូរខ្លះមនុស្សធម្មតាមើលមិនយល់នោះទេ។ ដូច្នេះខាងក្រោមនេះគឺជាគំនូរទាំង ៥ ដែលមានតម្លៃថ្លៃជាងគេបំផុតនៅលើពិភពលោក៖

១. L’empire des lumières៖ គឺជាគំនូរដែលគូតាំងពីឆ្នាំ ១៩៥៤ ដោយវិចិត្រករ René Magritte។ ផ្ទាំងគំនូរនេះបង្ហាញពីពេលវេលាផ្ទុយគ្នាពីរ ខាងក្រោមគឺជាពេលយប់ ហើយនៅពីលើផ្ទះគឺជាមេឃពណ៌ខៀវស្រឡះ មានតម្លៃរហូតដល់ ១២១ លានដុល្លារអាមេរិកនៅឯការដេញថ្លៃរបស់ Christie កាលពីថ្ងៃទី ២១ ខែវិច្ឆិកា ឆ្នាំ២០២៤។ មូលហេតុដែលរូបគំនូរនេះថ្លៃកប់ពពកគឺដោយសារ វាជាស្នាដៃកម្មសិទ្ធិរបស់វិចិត្រករ ២៧ នាក់ដែលមានឈ្មោះដូចគ្នាៗ។

២. Ten-Cent Western Being Torn in Half៖ គឺជាគំនូរគូតាំងពីឆ្នាំ ១៩៦៤ ដោយវិចិត្រករ Ed Ruscha ជាប់ចំណាត់ថ្នាក់លេខ ២ នៅលើពិភពលោក ជាមួយតម្លៃ ៦៨.២ លានដុល្លារអាមេរិក។ រូបនេះបង្ហាញពីស្ថានីយ៍ប្រេងឥន្ធនៈ Standard Oil ដ៏ធំល្វឹងល្វើយគួរឱ្យចាប់អារម្មណ៍ នៅពេលវិចិត្រករ Ed Ruscha បានទៅដល់ភាគខាងលិចអាមេរិក។ បន្ទាប់ពីនោះ វិចិត្រកររូបនេះក៏បានគូគំនូរចំនួន ៦ នៃស្ថានីយ៍ប្រេងឥន្ធនៈ ប៉ុន្តែក្នុងចំណោម ៦ នោះគំនូរ Ten-Cent Western Being Torn in Half គឺជាគំនូរថ្លៃបំផុតរបស់លោក។

៣.Nymphéas៖ គំនូរផ្កាលីលីដែលធ្វើដោយវិចិត្រករដ៏ល្បីល្បាញ Claude Monet កំឡុងឆ្នាំ ១៨៩៧-១៨៩៩ មានតម្លៃរហូតដល់ ៦៥.៥ លានដុល្លារអាមេរិក។ គំនូរនេះ វិចិត្រករផ្តោតលើការពណ៌នាការឆ្លុះបញ្ចាំងលើទឹក ដែលបង្ហាញពីអន្តរកម្មរវាងពន្លឺ និងពណ៌ មិនដូចផ្ទាំងគំនូរផ្សេងទៀតទេដែលពណ៌នាផ្កាលីលី និងទឹកនៅលើផ្ទៃបឹង។ មូលហេតុដែលវិចិត្រករ Claude Monet គូររូបនេះគឺដោយសារ លោកបានបង្កើតសួនតូចមួយដែលមានស្រះទឹកពោរពេញដោយផ្កាលីលី និងស្ពានកោងនៅក្រោយផ្ទះ។ លំហនេះបានក្លាយជាប្រភពនៃការបំផុសគំនិតដ៏សំខាន់សម្រាប់លោកក្នុងអំឡុងពេល ៣០ ឆ្នាំចុងក្រោយនៃជីវិតរបស់លោក ដោយបានជួយឱ្យវិចិត្រកររូបនេះ បង្កើតគំនូរចំនួន ២០០ នៃបឹងផ្កាលីលី ដែលភាគច្រើនទទួលបានតម្លៃខ្ពស់។

៤. Untitled (ELMAR)៖ គឺជាគំនូរទី ៤ ដែលមានតម្លៃខ្ពស់បំផុតនៅលើពិភពលោក ប្រចាំឆ្នាំ ២០២៤ ដោយមានតម្លៃ ៤៦.៤៨ លានដុល្លារអាមេរិក។ គំនូរនេះត្រូវបានបង្កើតឡើងក្នុងឆ្នាំ ១៩៨២ ជាស្នាដៃរបស់លោក Jean -Michel Basquiat ដោយពណ៌នាអំពីតួអង្គ Icarus ចុះពីលើមេឃ ខណៈដែលអ្នកបាញ់ព្រួញបានបាញ់ព្រួញពីរមកលើគាត់។

៥. L’ami intime៖ គឺជាគំនូរថ្លៃបំផុតទី ៥ ក្នុងលោក គូដោយវិចិត្រករ René Magritte ដែលមានតម្លៃ ៤២.១២ លានដុល្លារអាមេរិក បង្ហាញពីបុរសម្នាក់ពាក់មួក Bowler ដែលជារូបរបស់វិចិត្រករនេះតែម្តង ដោយលោក René Magritte គឺជាវិចិត្រករល្បីល្បាញម្នាក់របស់បែលហ្ស៊ិកក្នុងអំឡុងឆ្នាំ ១៨០០ ជាង៕

ជាធម្មតាទឹកជ្រោះតែងតែហូរចុះក្រោមពីច្រាំងថ្មចោត ប៉ុន្តែទឹកជ្រោះមួយកន្លែងនៅប្រទេសអៀរឡង់វិញ ស្រាប់តែហូរឡើងទៅលើ ធ្វើឱ្យអ្នកទស្សនាភ្ញាក់ផ្អើលខ្លាំងសឹងមិនជឿនឹងភ្នែក។
ថ្មីៗនេះទឹកជ្រោះ Moher កម្ពស់ ២១៤ ម៉ែត្រដ៏មហិមា ដែលមានទីតាំងនៅលើច្រាំងថ្មចោទនៃឆ្នេរសមុទ្រភាគខាងលិច ប្រទេសអៀរឡង់ ស្រាប់តែហូរបញ្ច្រាសឡើងទៅលើ បង្ហាញនូវទិដ្ឋភាពដ៏ចម្លែកសឹងមិនគួរឱ្យជឿ។

ទឹកនេះហាក់ដូចជាប្រឆាំងនឹងច្បាប់ទាំងអស់នៃរូបវិទ្យា ដោយសារវាលែងហូរទៅក្នុងសមុទ្រទៀតហើយ ផ្ទុយទៅវិញបែរជាហក់ឡើងទៅលើ ដូចជាផ្សែងហុយចេញពីទីជ្រៅបំផុតនៃផែនដីអ៊ីចឹង។ យោងតាមគេហទំព័រ HuffPost បាតុភូតដ៏អស្ចារ្យនេះគឺដោយសារតែព្យុះ Darragh ជាមួយនឹងខ្យល់បក់ដ៏គួរឱ្យភ័យខ្លាចដែលបានលើកទឹកនេះឡើងទៅលើ បង្កើតជាឈុតឆាក “ទឹកជ្រោះ backflow” ដ៏កម្រមួយ។

ទោះជាយ៉ាងណាក៏ដោយ បាតុភូតដ៏អស្ចារ្យនេះមានរយៈពេលតែមួយភ្លែតប៉ុណ្ណោះដែលតម្រូវឱ្យមានការរួមបញ្ចូលគ្នាដ៏ល្អឥតខ្ចោះនៃខ្យល់បក់ខ្លាំងនិងលក្ខខណ្ឌធម្មជាតិពិសេសជាច្រើនទៀត។ ដូច្នេះហើយ មិនមែនគ្រប់គ្នាសុទ្ធតែមានសំណាងគ្រប់គ្រាន់ក្នុងការធ្វើជាសាក្សី និងកត់ត្រាពេលវេលាវេទមន្តនេះទេ។ ព្យុះ Darragh ដែលគេស្គាល់ថាជាព្យុះកំណាចមួយ បានបង្កើតបាតុភូតទឹកជ្រោះនេះមក ក៏បានបណ្តាលឱ្យមានទឹកជំនន់ និងដាច់ចរន្តអគ្គិសនីនៅក្នុងចក្រភពអង់គ្លេស និងអៀរឡង់ផងដែរ ដែលរំខានដល់អាយុជីវិតមនុស្សរាប់ម៉ឺននាក់។

ទឹកជ្រោះ Moher គឺជាទឹកជ្រោះដែលមានទេសភាពស្អាតបំផុតប្រចាំទ្វីបអឺរ៉ុប ដែលបានស្វាគមន៍ភ្ញៀវទេសចរឱ្យមកទស្សនារាប់ម៉ឺននាក់ជារៀងរាល់ឆ្នាំ។ នៅពីលើច្រាំងថ្មចោទ និងពីលើប៉ម អ្នកទស្សនាក៏អាចឃើញកោះផ្សេងទៀតនៅក្បែនោះដូចជាកោះ Aran នៅ Galway Bay ជួរភ្នំ Maumturks និង Twelve Pins នៅភាគខាងជើងក្នុង County Galway និង Loop Head ទៅភាគខាងត្បូងផងដែរ។ ដូច្នេះទឹកជ្រោះ Moher គឺស្ថិតនៅក្នុងចំណោមតំបន់ទេសចរណ៍ដែលមានអ្នកទស្សនាច្រើនបំផុតនៅក្នុងប្រទេសអៀរឡង់ ដោយមានអ្នកចូលទស្សនាប្រហែល ១.៥ លានដងក្នុងមួយឆ្នាំ៕