ឆ្មា គឺជាសត្វចិញ្ចឹមគួរឱ្យស្រឡាញ់សម្រាប់មនុស្សមួយចំនួន ប៉ុន្តែមិនមែនមនុស្សគ្រប់គ្នាសុទ្ធតែស្រឡាញ់ឆ្មាទាំងអស់ទេ ជាពិសេស ឆ្មាគ្មានម្ចាស់ថែទាំ ។ ពួកវាតែងតែលួចចំណីអាហារ, រត់លើដំបូលផ្ទះឮសំឡេងខ្លាំងៗរំខានការសម្រាក និងបន្ទោរបង់លើសម្លៀកបំពាក់ធ្វើឱ្យធុំក្លិនមិនល្អ ជាដើម ។

លោកអ្នកគួរតែសាកល្បងអនុវត្តវិធីខាងក្រោមនេះដើម្បីបណ្តេញឆ្មាកុំឱ្យមករំខានក្នុងផ្ទះ រួមមាន ៖

១-កុំឱ្យចំណីឆ្មាគ្មានម្ចាស់ ៖ ការផ្តល់ចំណីនឹងធ្វើឱ្យវាមករំខានក្នុងផ្ទះ ពេលខ្លះ យើងពុំបានឱ្យចំណីវាស៊ី ប៉ុន្តែអ្នកជិតខាងឱ្យ ។ ហេតុនេះ យើងអាចប្រាប់ទៅអ្នកជិតខាងថា ចូរកុំផ្តល់ចំណីឱ្យឆ្មានៅក្បែរផ្ទះយើង ពីព្រោះនឹងធ្វើឱ្យវាចូលផ្ទះ ឬអាចផ្តល់ចំណីនៅកន្លែងឆ្ងាយ ។

២-ប្តូរទីតាំងធុងសំរាម ៖ ក្រៅពីការចៀសវាងផ្តល់អាហារឱ្យឆ្មាគ្មានម្ចាស់ គួរតែប្តូរទីតាំងធុងសំរាមផងដែរ ដើម្បីការពារកុំឱ្យឆ្មាចូលផ្ទះ ។ ចូរបិទគំរបធុងសំរាមឱ្យជិត ហើយបើមានកន្លែងលក់អាហារក្បែរផ្ទះ គឺត្រូវតែសុំការសហការពីគេដើម្បីជួយការពារ ឬយកចិត្តទុកដាក់ថែទាំធុងសំរាមកុំឱ្យក្លាយជាប្រភពអាហារឆ្មា ។

៣-កុំធ្វើឱ្យផ្ទះក្លាយជាកន្លែងរស់នៅរបស់ឆ្មា ៖ ឆ្មាចូលចិត្តរស់នៅកន្លែងស្ងួត ឬកក់ក្តៅ ចូរត្រួតពិនិត្យបរិវេណផ្សេងៗ ដូចជា ៖ យ៉មុខផ្ទះ, ដំបូល, ចំណតរថយន្ត និងបន្ទប់ដាក់អីវ៉ាន់ ។ គួរបិទកន្លែងទាំងនេះឱ្យជិត កុំឱ្យមានប្រហោងតូចៗដែលឆ្មាអាចចូលបាន ។

៤-ចិញ្ចឹមឆ្កែ ៖ ការចិញ្ចឹមឆ្កែ គឺជាវិធីបណ្តេញឆ្មាតាមធម្មជាតិដែលមនុស្សទូទៅតែងតែអនុវត្ត ពីព្រោះឆ្កែ និងឆ្មា ជាសត្រូវនឹងគ្នា ។

៥-ដំឡើងឧបករណ៍បាញ់ទឹកស្វ័យប្រវត្តិ ៖ ឆ្មាមិនចូលចិត្តទឹកទេ ចូរដំឡើងឧបករណ៍បាញ់ទឹកស្វ័យប្រវត្តិនៅលើវាលស្មៅដែលឆ្មាចូលចិត្តរត់លេង ។

៦-រោយម្រេចនៅបរិវេណក្បែរផ្ទះ ឬកន្លែងឆ្មាឆ្លងកាត់ ៖ យកម្រេចមករោយនៅយ៉មុខផ្ទះ, បរិវេណខាងក្រោយផ្ទះ ឬកន្លែងណាដែលឆ្មាចូលចិត្តដើរ និងដេក ។

ក្រៅពីនេះ គ្រឿងផ្សំមួយចំនួនក្នុងផ្ទះបាយ ក៏អាចបណ្តេញឆ្មាបានដែរ ដូចជា ៖ ស្លឹកក្រូចសើច, ទឹកខ្មេះ, ម្រេច, សំបកក្រូចឆ្មា និងម្ទេចហ្មត់ ដោយសារវាពុំចូលចិត្តក្លិនគ្រឿងផ្សំទាំងនេះទេ ។ រីឯផលប៉ះពាល់បណ្តាលមកពីឆ្មាចូលផ្ទះ រួមមាន ៖

-ខូចខាតទ្រព្យសម្បតិ្តដោយសារក្រចកឆ្មា ដូចជា ៖ ជញ្ជាំង និងសម្ភារៈផ្សេងៗ
-សម្រាកពុំគ្រប់គ្រាន់នៅពេលយប់ ដោយសារសំឡេងរំខានរបស់ឆ្មា
-ប្រមូលផ្តុំមេរោគ មានក្លិនមិនល្អ និងក្លិនសត្វងាប់ដោយសារឆ្មាខាំ
-ប្រឈមនឹងជំងឺហឺត ដោយសាររោមឆ្មានៅតាមបរិវេណផ្សេងៗ ៕

នៅពេលទស្សនាប្រាសាទអង្គរវត្ត ភ្ញៀវទេសចរច្រើនមើលរំលងនូវចេតិយតូចមួយ ស្ថិតនៅទិសខាងកើតនៃថែវទី៣។

ចេតិយ​នេះ មានឈ្មោះថា ជ័យនន្ទ មានអាយុកាលប្រមាណជាង៣០០ឆ្នាំ សាងសង់ឡើងនៅឆ្នាំ១៧០១ នៃគ.ស។

បើតាមសិលាចានៅលើប្រាសាទ ចេតិយ​នេះ បានរៀបរាប់ពីទុក្ខសោករបស់មន្រ្តីខ្ពង់ខ្ពស់ម្នាក់ឈ្មោះ​ ជ័យនន្ទ ដែលបានបាត់បង់ប្រពន្ធ និងកូន និងបាននាំសាក​សព​មកបញ្ចុះក្នុងចេតិយនៅអង្គរវត្ត។

នៅសម័យនោះ ជ័យនន្ទ មិនដឹងយកសាកសពទៅបញ្ចុះនៅទីណាឱ្យស័ក្តិសម លោកក៏សម្រេចយកមកបញ្ចុះនៅអង្គរវត្ត ដែលជាទីសក្ការៈដ៏ខ្ពង់ខ្ពស់ ដើម្បីភ្ជាប់និស្ស័យដោយសារលោកគិតថាអង្គរគឺជាឋានព្រះ ឋានអាទិទេព។

ជំនឿនេះ បានធ្វើឱ្យពលរដ្ឋនៅសម័យនោះ គោរពប្រតិបត្តិតជារហូតមក ដោយអ្នកស្រុកតែងយកធាតុទៅបញ្ចុះនៅបរិវេណប្រាសាទអង្គរវត្ត ផ្អែកទៅតាមធាតុ និងឆ្អឹងដែលអ្នកស្រាវជា្រវបុរាណវិទ្យាធ្លាប់បានរកឃើញការពីពេលកន្លងទៅ។

ក្រុមហ៊ុនអាកាសចរណ៍ជាតិ “កម្ពុជាអង្គរអ៊ែរ” បានផ្លាស់ប្ដូរឈ្មោះទៅជា “អាកាសចរណ៍ជាតិកម្ពុជា”។

ក្រុមហ៊ុននេះ ត្រូវបានវិនិយោគរួមគ្នារវាងរាជរដ្ឋាភិបាលកម្ពុជាដែលមានភាគហ៊ុន ៥១ភាគរយនិងក្រុមហ៊ុនអាកាសចរណ៍ Vietnam Airlinesដែលមានភាគហ៊ុន ៤៩ភាគរយ។

កម្ពុជាអង្គរអ៊ែរ មានទីស្នាក់ការកណ្ដាលនៅរាជធានីភ្នំពេញ ដោយបានចាប់ផ្ដើមប្រតិបត្តិការរបស់ខ្លួននៅថ្ងៃទី២៨ កក្កដា ឆ្នាំ២០០៩។

ក្រុមហ៊ុនអាកាសចរណ៍ជាតិ កម្ពុជាអង្គរអ៊ែរ ត្រូវបានបង្កើតឡើងនៅថ្ងៃ ៣១ ខែកក្កដា ឆ្នាំ១០០៩ និងដែលបានជំនួសក្រុមហ៊ុនអាកាសចរណ៍ជាតិ រ៉ូយ៉ាល់អ៊ែរកាំបូដ Royal Air Cambodge ដែលបានក្ស័យធននៅឆ្នាំ២០០១។

ក្រុមហ៊ុន នេះផ្តោតសំខាន់ក្នុងការបម្រើការធ្វើដំណើររបសស់ភ្ញៀវទេសចណ៍ ជាពិសេសការទស្សនាប្រាសាទអង្គរវត្ត៕

ថ្មីៗនេះ ពលរដ្ឋរស់នៅ​ខេត្តកំពត​ បានបង្ហោះ និងចែកចាយរូបភាពរុក្ខជាតិម៉្យាង ដោយអះអាងថាជារុក្ខជាតិផ្ការាំ ទឹករាំ។

ផ្ការាំ ទឹករាំ ជារុក្ខជាតិមួយប្រភេទ ដែលគេប្រទះឃើញក្នុងរឿងប្រឡោមលោកខ្មែរមួយ ដែលជារឿងបែបមន្តអាគម អា​ភី​និ​ហា​ដ៏​​​ល្បី និងត្រូវបានគេផលិតជាខ្សែភាពយន្តថែមទៀតផង។

​បើតាមអ្នកជំនាញជីវចម្រុះ​នៅ​ប្រទេស​កម្ពុជា​ បាន​បញ្ជាក់ច្បាស់ៗថា៖” ផ្ការាំទឹករាំ មិនមែនជារុក្ខជាតិពិតនោះទេ ដោយវាមានតែនៅក្នុងរឿងព្រេងនិទានប៉ុណ្ណោះ ហើយរុក្ខជាតិដែលគេកំពុងល្បីនោះមានឈ្មោះ​ផ្លូវការ​ថា”ប​ល្ល័​ង្គ ន​ពារ​ក្ស​ ឬប្រទាល​១០០​គុណ​”។

ប​ល្ល័​ង្គ ន​ពារ​ក្ស​  ជាបរាសិតជាតិម្យ៉ាង ដែលច្រើនរស់នៅនិងអាស្រ័យលើរុក្ខជាតិដ៏ទៃជាអ្នកជួយចិញ្ចឹមជីវិតពួកវាដោយការស្រូបយកសារធាតុចិញ្ចឹមតាមប្រព័ន្ធឬសពីរុក្ខជាតិដ៏ទៃ។

ជាទូទៅផ្កានេះ ដុះនៅក្នុងខែត្រជាក់ ដោយមានជីវិតចន្លោះពី១០ថ្ងៃទៅ១៥ថ្ងៃ ក្រោយមកវនឹង​ក្រៀម​ស្វិតទៅវិញុ។

នៅប្រទេសកម្ពុជាយើង ដើមនេះមានវត្តមាននៅតាមតំបន់ព្រៃធំស្ទើរទូទាំងប្រទេស ពិសេសនៅតំបន់ព្រៃដែលមានសំណើមខ្ពស់ ក្នុងរយៈកម្ពស់រហូតដល់ចាប់ពី ២០០ – ១៥០០ម ពីនេវូទឹកសមុទ្រ៕

វត្តមានកូនខ្មែរទាំង ១០ ដួង ដែលសុទ្ធសឹងតែមានប្រេនផ្ទាល់ខ្លួនក្នុងស្រុកដ៏ល្បីរន្ទឺរ ដោយកាលពីពេលថ្មីៗនេះ បានបង្ហាញខ្លួនយ៉ាងលេចធ្លោនៅលើផ្លូវពាណិជ្ជកម្មដ៏មមាញឹក Times Square ទីក្រុង New York សហរដ្ឋអាមេរិក។

យោងតាមការដាក់បង្ហោះរបស់ Grab កាលពីពេលថ្មីៗនេះ បានឲ្យដឹងថា«យើងមានមោទនភាពយ៉ាងខ្លាំងក្នុងការបង្ហាញមុខ ហាងល្បីៗទាំង ១០ ក្នុងស្រុកដែលមានដូចជា ហឹរ ខនណើរ – Hel Corner, Ta Seth Canteen-អាហារដ្ឋាន តាសេត, Soul Coffee Cambodia, MIXT COFFEE, Mama Wong’s Dumpling & Noodle House, កូនស៊ុប40 , មីគាវ សៀមរាប, ភូមិនំបញ្ចុក (សៀមរាប), មីកូឡា សៀមរាប, និង Dialogue Coffee ទៅកាន់ពិភពលោកដ៏អស្ចារ្យម្តងទៀតនៅក្នុងឆ្នាំនេះ»។

សូមជម្រាបថា Times Square គឺជាផ្លូវពាណិជ្ជកម្មដ៏សំខាន់ក្នុងទីក្រុងញូយ៉ក និងជាតំបន់ថ្មើរជើងដ៏មមាញឹកមួយលើពិភពលោកផងដែរ។ នៅទីនោះទទួលបាននូវការពេញនិយមខ្លាំង ព្រោះថាប្រជុំទៅដោយយីហោល្បីៗ ក៏ដូចជាហាងប្រណិតៗនិងមជ្ឈមណ្ឌលកម្សាន្តដ៏សម្បូរបែប។ Times Square គឺមានបំពាក់ទៅដោយបដាឌីជីថល យ៉ាងភ្លឺត្រចាំងត្រចាចពេញផ្លូវតែម្តង ក្នុងការផ្សព្វផ្សាយពីពាណិជ្ជកម្មជាច្រើនលើពិភពលោក។

ដូច្នេះហើយ ចំពោះវត្តមានកូនខ្មែរទាំង ១០ដួងនៅទីនោះ គឺប្រៀបបានជាការបង្ហាញមុខមាត់ប្រទេសកម្ពុជា ក្នុងការផ្សព្វផ្សាយពីផលិតផលខ្មែរទៅកាន់ពិភពលោក ជាពិសេសគឺទាក់ទងនឹងរសជាតិ, គុណភាព និងគុណតម្លៃនៃម្ហូបអាហារខ្មែរ៕

ផ្សារទំនើបអ៊ីអនម៉លមានជ័យ ដែលត្រូវបានគេស្គាល់ថា ផ្សារអ៊ីអន៣ តែងតែលើកយកនូវទម្រង់សិល្បៈវប្បធម៌ខ្មែរ មកសម្តែងជូនទស្សនិកទស្សនាជារៀងរាល់សប្តាហ៍មិនដែលខកខានឡើយ។ ហើយសម្រាប់ចុងសប្តាហ៍នេះក៏ដូចគ្នា អ្នករាជធានីភ្នំពេញបើមិនដឹងទៅណា អាចវេចកន្ទេលទៅអង្គុយមើលល្ខោនក្នុងផ្សារទំនើបដ៏មានផាសុខភាពនេះបាន។

យោងតាមការដាក់បង្ហោះរបស់ផ្សារទំនើបអ៊ីអនម៉លមានជ័យបានគូសបញ្ចាក់កាលពីព្រឹកថ្ងៃទី ១៤ ខែធ្នូនេះថា «ឆ្លៀតក្នុងឱកាសដ៏វិសេសនៃខួបគម្រប់ ២ឆ្នាំ ល្ងាចនេះ ផ្សារទំនើបអ៊ីអនម៉លមានជ័យ នឹងនាំមកជូនផ្ទាំងទស្សនីយភាពការសម្ដែង ល្ខោនស្រមោលស្បែកធំ រឿងរាមកេរ្ដិ៍ ដកស្រង់ត្រង់ឈុត “សុកច្ចា” ដែលជាសម្បត្តិបេតិកភណ្ឌវប្បធម៌អរូបីនៃមនុស្សជាតិ។

ហើយសម្រាប់នៅថ្ងៃទី ១៥ ខែធ្នូនេះ ពុកម៉ែបងប្អូនអាចអញ្ជើញទៅចូលរួមទស្សនាទម្រង់សិល្បៈខ្មែរមួយបែបទៀត ដែលមានទាំងរបាំលក្ម្សីបុទុម និង របាំព្រៃប្រសិទ្ធ រួមជាមួយនឹងផ្ទាំងទស្សនីយភាពការសម្ដែង ល្ខោនខោល រឿងរាមកេរ្ដិ៍ ដកស្រង់ត្រង់ឈុត “ចំណងស្នេហ៍ ហនុមាន និងនាងមច្ឆា” ដែលសម្ដែងដោយ Royal University of Fine Arts – សាកលវិទ្យាល័យភូមិន្ទវិចិត្រសិល្បៈ។

ដូច្នេះ សូមអញ្ជើញអ៊ំពូមីងបងប្អូន រីករាយទស្សនាដោយសេរី និងចូលរួមគាំទ្រលើកស្ទួយកេរដំណែលដ៏វិសេសមួយនេះ ឲ្យបានច្រើនកុះករ។ ចំពោះទីតាំងសម្តែងល្ខោនគឺស្ថិតនៅជាន់ផ្ទាល់ដីនៃផ្សារទំនើបអ៊ីអនម៉លមានជ័យ នៅវេលាម៉ោង ៥ ល្ងាច នាថ្ងៃទី ១៤និង១៥ ខែធ្នូ ឆ្នាំ២០២៤។

សូមជម្រាបថា ផ្សារទំនើបអ៊ីអនម៉លមានជ័យ បានបើកដំណើរការសាកល្បងជាផ្លូវការអំឡុងខែធ្នូ ឆ្នាំ ២០២២ ដែលមានទីតាំងស្ថិតនៅតាមបណ្តោយមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ) ស្ថិតក្នុងសង្កាត់ចាក់អង្រែក្រោម ខណ្ឌមានជ័យ ភាគខាងត្បូងនៃរាជធានីភ្នំពេញ៕