កាលពីយប់មិញ អ្នកលេងបណ្តាញសង្គម ជាពិសេសគឺក្រុមអ្នកលេងហ្គេ.មអាជីព Esports និងអ្នកលេងហ្គេ.មទូរស័ព្ទដៃ ហាក់ប្រតិក.ម្មយ៉ាងខ្លាំងទៅលើវីដេអូមួយដែលបានដាក់បង្ហោះដោយក្រុមហ៊ុន Mobile Legend បង្ហាញឡូហ្កូរូបប្រាសាទអង្គវត្តខ្មែរ ភ្ជាប់មកជាមួយនឹងពាក្យថា Thailand។

កាលពីរាត្រីថ្ងៃទី ១៦ ខែធ្នូ ឆ្នាំ២០២៤នេះ គេហទំព័រ Mobile Legend បានបង្ហាញវីដេអូខ្លីមួយ ដែលផលិតដោយ Moontoon។ ក្នុងវីដេអូនោះ មានភ្ជាប់មកជាមួយនឹងឡូហ្កូតំណាងប្រទេសមួយចំនួន ដែលនឹងត្រូវចូលរួមប្រកួត MLBB នាពេលខាងមុខ។ អ្វីដែលធ្វើមហាជនប្រតិកម្មខ្លាំងនោះ ឡូហ្កូដែលត្រូវបានគេស្គាល់យ៉ាងច្បាស់ថាជារូបប្រាសាទអង្គវត្តរបស់ខ្មែរ តែបែរជាសរសេរថាពាក្យថា Thailand តំណាងប្រទេសថៃទៅវិញ។

ជាមួយគ្នានោះ ទាំងអ្នកហ្គេមអាជីព Esports ព្រមជាមួយអ្នកលេងហ្គេមទូរស័ព្ទដៃជាច្រើនបានធ្វើ Reaction តវ៉ានិងបង្ហោះសារព្រោងព្រាត ហាក់ខឹងសម្បារ និងខកចិត្តយ៉ាងខ្លាំងចំពោះការធ្វេសប្រហេសរបស់ក្រុមការងារ Mobile Legend។

យ៉ាងណា បន្ទាប់ពីវីដេអូខាងលើបានដាក់បង្ហោះត្រឹមរយៈពេលប្រមាណ ២ ម៉ោង ដោយទទួលបានមតិរិះគន់និងដឹងកំហុស ក្រុមហ៊ុនហ្គេមខាងលើបានកែសម្រួលដករូបប្រាសាទអង្គរវត្តចេញរួចរាល់ហើយ ព្រមទាំងគូសបញ្ជាក់ជាមួយនឹងខ្លឹមសារយ៉ាងដូនច្នេះថា«ក្នុងនាមយើងជាក្រុមការងារ យើងសូមអភ័យទោសចំពោះមាតិកាដែលបានបង្ហោះចេញកាលពីពេលមុននេះ។ បន្ទាប់ពីទទួលការបញ្ចេញមតិពីខាងអ្នកលេងរបស់យើង ក្រុមការងារយើងបានធ្វើការលុប ហើយកែប្រែនូវមាតិកាដែលមានកំហុសឆ្គងនោះភ្លាមៗ។ តែយ៉ាងណាមិញ តាំងនាមឲ្យក្រុមការងារយើងសូមទោសសារជាថ្មីចំពោះកំហុសឆ្គងមួយនេះ។ អរគុណចំពោះការបន្តការគាំទ្រមកកាន់ MLBB និងអត់ទោសចំពោះកំហុសឆ្គងមួយនេះ»៕

វិស័យភាគយន្តគឺជាវិស័យមួយដែលរកចំណូលបានច្រើនជាងគេ មិនថាក្នុងប្រទេស ឬក្រៅប្រទេសនោះទេ គេតែងតែចំណាយលុយយ៉ាងច្រើនសម្រាប់ការផលិតខ្សែភាពយន្តនីមួយៗឱ្យកាន់តែមានភាពទាក់ទាញ និងលេចធ្លោ ដោយឡែកក្នុងឆ្នាំ២០២៤ មានភាពយន្តជាច្រើនដែលមានអ្នកទស្សនារាប់លាននាក់។ ប៉ុន្តែក្នុងចំណោមរឿងល្បីៗទាំងអស់នោះមានតែ ៥ ប៉ុណ្ណោះរកចំណូលបានខ្ពស់បំផុតនៅលើពិភពលោក៖

១.Inside Out 2៖ គឺជាភាពយន្តគំនូរជីវចលរបស់ Disney ដែលទទួលបានភាពជោគជ័យខ្លាំងបំផុតក្នុងឆ្នាំ ២០២៤ នេះ ជាមួយនឹងប្រាក់ចំណូល ១,៧ ពាន់លានដុល្លារអាមេរិក។ ភាពយន្តនេះនិយាយអំពីដំណើរកម្សាន្ត ការផ្សងព្រេងលាយឡំវេទមន្ត និងវិទ្យាសាស្ត្រ។

២. Deadpool & Wolverine៖ គឺជាភាពយន្តទី ២ ប្រចាំឆ្នាំ ២០២៤ ដែលរកចំណូលបានរហូតដល់ ១,៣ ពាន់លានដុល្លារ បន្ទាប់ពីភាពយន្តគំនូរជីវចល Inside Out 2។ យោងតាម Variety ភាពជោគជ័យនៃខ្សែភាពយន្ត Deadpool បង្ហាញថា ខ្សែភាពយន្តប្រភេទ Superhero នៅតែទាក់ទាញអ្នកទស្សនា ជាពិសេសភាពយន្តដែលមានសកម្មភាពកំប្លែង និងធាតុបំបែកច្បាប់។

៣. Despicable Me 4៖ គឺជាភាពយន្តគំនូរជីវចលដែលទទួលបានជោគជ័យយ៉ាងខ្លាំងបើធៀបនឹងភាពយន្តវគ្គមុនៗ។ នៅវគ្គទី ៤ ខ្សែភាពយន្តគំនូរជីវចលនេះរកចំណូលបានខ្ពស់បំផុតជាមួយប្រាក់ចំណូល ៩៦៩.៥ លានដុល្លារ ក្លាយជាស៊េរីគំនូរជីវចលដ៏កំពូលប្រចាំឆ្នាំ។

៤.Moana 2៖ ខ្សែភាពយន្តនេះត្រូវបានចេញផ្សាយកាលពីចុងខែវិច្ឆិកា ដោយឈរនៅលើកំពូលតារាង Box Office របស់អាមេរិកខាងជើងរយៈពេលបីសប្តាហ៍ជាប់ៗគ្នា។ ជោគជ័យរបស់ Moana វគ្គ 2 កើតចេញពីឥទ្ធិពលនៃវគ្គទីមួយ បង្កើតឱ្យមានទស្សនិកជនជាច្រើនទន្ទឹងរង់ចាំមើលភាគបន្ទាប់។ បច្ចុប្បន្នភាពយន្តល្បីល្បាញនេះរកចំណូលបានរហូតដល់ ៧១៧.៨ លានដុល្លារអាមេរិក។

៥.Dune: Part Two៖ គឺជាភាពយន្តហូលីវូដបែបប្រឌិតវិទ្យាសាស្ត្រ ឈរនៅចំណាត់ថ្នាក់លេខ ៥ លើពិភពលោក ដែលរកចំណូលបានច្រើនបំផុតរហូតដល់ ៧១៤.៤ លានដុល្លារ។ Dune: Part Two ទទួលបានប្រាក់ចំណូលច្រើនជាងគេបំផុតក្នុងរយៈពេល ៣ ខែដំបូងនៃឆ្នាំនេះ ដែលជួយឱ្យ Box Office ហូលីវូដរីកចម្រើនខ្លាំងគួរឱ្យកត់សម្គាល់៕

ប្រទេសថៃ ៖ កាលពីថ្ងៃទី១៦ ខែធ្នូ ឆ្នាំ២០២៤ សារព័ត៌មានថៃរាយការណ៍ថា តុលាការមីយ៉ាន់ម៉ាបានកាត់ក្តីឱ្យអ្នកនេសាទថៃ៤នាក់ ជាប់ពន្ធនា.គារ រយៈពេល៤ឆ្នាំ និងបង់ប្រាក់ពិន័យ ករណីចូលនេសាទក្នុងដែនទឹកមីយ៉ាន់ម៉ាខុសច្បាប់ ។ លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃជឿថា មីយ៉ាន់ម៉ានឹងដោះលែងអ្នកនេសាទថៃក្រោយឆ្លងឆ្នាំសកល ។

ថ្មីៗនេះ នាវាចម្បាំងមីយ៉ាន់ម៉ាបានបាញ់ទូកនេសាទថៃ ព្រមទាំងចាប់ខ្លួនអ្នកនេសាទថៃ និងមីយ៉ាន់ម៉ា សរុប៣១នាក់ នៅបរិវេណកោះយ៉ានឈឿកខាងមីយ៉ាន់ម៉ា ហើយបណ្តាលឱ្យមានអ្នករងរបួស២នាក់ និងស្លាប់ម្នាក់ កាលពីយប់ថ្ងៃទី២៩ ខែវិច្ឆិកា ឆ្នាំ២០២៤ ។ នៅថ្ងៃទី៣០ ខែវិច្ឆិកា មីយ៉ាន់ម៉ាប្រកាសថា នឹងដោះលែងអ្នកនេសាទថៃ៤នាក់ ក្រោយពីមានការអន្តរាគមន៍ពីក្រសួងការបរទេស និងកងទ័ពជើងគោកថៃជាមួយរដ្ឋាភិបាលមីយ៉ាន់ម៉ា ប៉ុន្តែមីយ៉ាន់ម៉ាពុំដោះលែងអ្នកនេសាទថៃតាមការស្នើសុំទេ ។

រហូតមកដល់នៅថ្ងៃទី១៦ ខែធ្នូ តុលាការមីយ៉ាន់ម៉ាបានកាត់ក្តីម្ចាស់ទូកនេសាទថៃឱ្យជាប់ពន្ធានាគាររយៈពេល៥ឆ្នាំ ពីបទលួចចូលនេសាទខុសច្បាប់ក្នុងដែនទឹកមីយ៉ាន់ម៉ា និងជាប់ពន្ធនាគារ១ឆ្នាំទៀតពីបទចូលប្រទេសមីយ៉ាន់ម៉ាខុសច្បាប់ ។ ដូច្នេះ ម្ចាស់ទូកនេសាទថៃនឹងជាប់ពន្ធនាគារ៦ឆ្នាំ និងបង់ប្រាក់ពិន័យ ។

រីឯអ្នកនេសាទថៃ៣នាក់នឹងជាប់ពន្ធនាគាររយៈពេល៣ឆ្នាំ ពីបទចូលនេសាទខុសច្បាប់ ព្រមទាំងជាប់ពន្ធនាគារ១ឆ្នាំទៀតករណីចូលប្រទេសមីយ៉ាន់ម៉ាខុសច្បាប់ ។ ហេតុនេះ អ្នកនេសាទថៃទាំង៣នាក់នឹងជាប់ពន្ធនាគាររយៈពេល៤ឆ្នាំ និងបង់ប្រាក់ពិន័យ ។ ស្ថានទូតថៃនៅទីក្រុងយ៉ាំងហ្គន បានព្យាយាមចរចាជាមួយមីយ៉ាន់ម៉ាឱ្យដោះលែងអ្នកនេសាទរបស់ខ្លួន ។

នៅអាកាសយានដ្ឋានដនមឿង ទីក្រុងបាងកក លោកស្រី ផេថងថាន ស៊ីណាវ៉ាត់ បាននិយាយទៅកាន់ប្រព័ន្ធផ្សព្វផ្សាយ ករណីមីយ៉ាន់ម៉ាចាប់អ្នកនេសាទថៃដាក់ពន្ធនាគារថា លោកស្រីទទួលដំណឹងនេះពីលោក ម៉ារីស សាងៀមផុង អនុរដ្ឋមន្ត្រីក្រសួងការបរទេស ។ ការដាក់ពន្ធនាគារនេះធ្វើឡើងតាមនីតិវិធី ប៉ុន្តែយើងបានពិភាក្សារួចហើយពីបញ្ហានេះ ហើយមីយ៉ាន់ម៉ានឹងលើកលែងទោសអ្នកនេសាទថៃក្រោយឆ្លងឆ្នាំសកល ។

ការដាក់ពន្ធនាគារអ្នកនេសាទថៃ គឺមីយ៉ាន់ម៉ាធ្វើឡើងតាមនីតិវិធីច្បាប់ ប៉ុន្តែមីយ៉ាន់ម៉ាមានទំនាក់ទំនងល្អជាមួយថៃ ។ ហេតុនេះ ថៃអាចស្នើសុំឱ្យមីយ៉ាន់ម៉ាលើកលែងទោសពលរដ្ឋថៃនាពេលឆាប់ៗ ៕

ប្រទេសវៀតណាម៖ ហាងកាហ្វេដែលទើបនឹងបើកថ្មីនៅស្រុក Hoang Mai ប្រទេសវៀតណាម គឺមានភាពលេចធ្លោខ្លាំងណាស់ជាមួយនឹងធ្នើសៀវភៅទំហំ ៧៥ ម៉ែត្រការ៉េ ដែលមានផ្ទុកសៀវភៅចំនួន ៣ តោនកំពុងទាក់ទាញភ្ញៀវទេសចរអន្តរជាតិ។

ហាងកាហ្វេ Tiny Revolution បានបើកដំណើរការកាលពីចុងខែវិច្ឆិកា ដោយបានទាក់ទាញយុវជនជាច្រើន រួមទាំងភ្ញៀវបរទេស ដោយសារតែធ្នើសៀវភៅដ៏ធំរបស់វាមានទីតាំងនៅក្រោមពន្លឺដ៏ស្រស់ស្អាត អាចផ្ទុកសៀវភៅចំនួន ៣ តោន ស្មើនឹងសៀវភៅ ៦ ទៅ ៧ ពាន់ក្បាល ពោរពេញទៅដោយអតិថិជនរាប់រយនាក់ក្នុងពេលតែមួយ។

កន្លែងដាក់សៀវភៅយក្សក៏ត្រូវបានគេប្រើជាកន្លែងសម្រាប់ការសម្តែងតន្ត្រីដោយឥតគិតថ្លៃនៅចុងសប្តាហ៍ផងដែរ។ តន្ត្រីត្រូវបានជ្រើសរើសក្នុងស្ទីលបែបស្រទន់ ស្រណុកសុខស្រួលសម្រាប់លំហ និងស្មារតីរបស់ហាង។ ហាងកាហ្វេនេះមានសៀវភៅចម្រុះគ្រប់ប្រភេទ ដែលភាគច្រើនគឺសម្បូរទៅដោយសៀវភៅភាសាអង់គ្លេស។ នៅទីនេះមានកន្លែងធំទូលាយ កក់ក្ដៅ មានសាឡុង និងទូសៀវភៅធំ សមរម្យសម្រាប់ភ្ញៀវទេសចរគ្រប់ជាតិសាសន៍។

ក្រៅពីកន្លែងដាក់សៀវភៅយក្ស ហាងក៏មានជ្រុងតុបតែងជាច្រើនទៀត ដែលភាគច្រើនមានវត្ថុបុរាណដូចជា ព្យាណូ ទូរស័ព្ទ កាមេរ៉ា ឬគំនូរអរូបីជាដើម។ លើសពីនេះហាងកាហ្វេនេះក៏មានសេវាកម្មរហ័ស និងកាហ្វេឆ្ងាញ់ ដែលភេសជ្ជះរបស់ហាងមានជាចម្បងគឺ កាហ្វេ តែ និងម៉ាតឆា ជាមួយគុណភាពភេសជ្ជៈគឺល្អ ងាយស្រួលផឹក រសជាតិលេចធ្លោ។ ភ្ញៀវទេសចរក៏អាចទស្សនា ថតរូបជាមួយសៀវភៅ និងវត្ថុបុរាណគ្រប់ប្រភេទយ៉ាងសប្បាយរីករាយផងដែរ។

ជាការពិតណាស់ក្រៅពីបណ្ណាល័យ ហាងកាហ្វេក៏អាចតុបតែងសៀវភៅបានដែរ ប្រសិនបើហាងកាហ្វេទាំងអស់តុបតែងសៀវភៅច្រើនបែបនេះ ទំនងទាក់ទាញភ្ញៀវទេសចរបានច្រើន។ ការអានសៀវភៅមិនត្រឹមផ្តល់អត្ថប្រយោជន៍ដល់សុខភាពរាងកាយទាំងមូលប៉ុណ្ណោះទេ ថែមទាំងធ្វើឱ្យដំណើរការខួរក្បាលមានភាពរស់រវើកទៀតផង។ ចំពោះប្រយោជន៍មួយដែលសំខាន់បំផុតនោះគឺការអានបានពង្រឹងខួរក្បាល ក៏ដូចជាការគិត តាមរយៈប្រព័ន្ធដំណើរការទាំងមូលនៃរាងកាយបានផ្តោតទៅលើទំព័រសៀវភៅដែលកំពុងតែអាន រួមជាមួយការអានបណ្តើ ផឹកកាហ្វេក្តៅៗបណ្តើគឺថាស្រស់បំព្រងម្តង៕

នៅលើផែនដីយើងនេះ មានកោះប្រមាណជាង ១០០ ពាន់កោះ ក្នុងនោះមានមនុស្សប្រមាណ ១០ ភាគរយនៃចំនួនប្រជាជនលើពិភពលោក រស់នៅលើដែនដីកោះទាំងនេះ។ ក្នុងចំណោម ១០០ ពាន់កោះមានកោះចំនួន ៥ ប៉ុណ្ណោះដែលត្រូវបានគេចាត់ទុកថា មានសម្រស់ស្អាត និងទាក់ទាញភ្ញៀវទេសចរច្រើនជាងគេបំផុតលើពិភពលោក។

១.កោះ Bora Bora៖ កោះដ៏ស្រស់ស្អាតនេះ មានទីតាំងស្ថិតនៅភាគខាងត្បូងនៃមហាសមុទ្រប៉ាស៊ីហ្វីក ប្រទេសបារាំង។ កោះតំបន់ត្រូពិចនេះគឺ បឹងទឹកប្រៃដ៏ស្រស់ស្អាត ជាមួយនឹងពណ៌បៃតងឆ្លុះ។ នៅទីនេះអ្នកអាចឃើញពពួកមច្ឆា អណ្តើក ត្រីឆ្លាម បបែលហែលលេងក្នុងទឹកថ្លាឆ្លុះដល់បាត។ ភ្ញៀវទេសចរណ៍ដែលនិយមមុជទឹក និងជិះក្តារស្គី ពិតជាអាចរីករាយជាមួយនឹងការកំសាន្តនៅក្បែរតំបន់ថ្មប៉ប្រះទឹក។ ប្រសិនបើអ្នកមានលទ្ធភាព គួរតែទៅកំសាន្តនៅទីនោះ ដោយស្នាក់នៅក្នុងបង់ហ្កាឡូបណ្តែតលើទឹកជាមួយអារម្មណ៍ស្រស់ថ្លា។

២.កោះ Fiji៖ ប្រទេសដីកោះ Fiji មានទីតាំងសិ្ថតនៅមហាសមុទ្រប៉ាស៊ីហ្វិកខាងត្បូង ជាតំបន់បុរាណវិទ្យាដែលប្រមូលផ្តុំដោយកោះប្រមាណជាង ៣០០។ ភាពល្បីល្បាញនៃកោះនេះ បានដោយទេសភាពនៃកោះរដិបរដុប ឆ្នេរដែលមានរាងដូចជាម្រាមដៃ និងផ្កាថ្មប៉ប្រះទឹក ព្រមទាំងផ្ទៃទឹកថ្លាឈ្វង់។

៣.កោះ Bali៖ កោះ Bali ក្នុងប្រទេសឥណ្ឌូនេស៊ី គឺមានភាពល្បីល្បាញដោយសារវាជាភ្នំភ្លើងគ្របដណ្តប់ដោយព្រៃឈើ វាលស្រែធ្វើលើភ្នំ ឆ្នេរសមុទ្រ និងផ្កាថ្មប៉ប្រះទឹក។ កោះនេះជាបណ្តុំនៃទីតាំងសាសនា ដែលមានដូចជាវិហារ Uluwatu ដែលស្ថិតនៅចំណោទកោះជាដើម។ ទីក្រុង Kuta ដែលស្ថិតនៅតាមបណ្តោយឆ្នេរនៅភាគខាងត្បូងនៃកោះ Bali ក៏សម្បូរដោយក្លឹបរាត្រី ចំណែកក្រុង Seminyak Sanur និង Nusa Dua ជារមណីយដ្ឋានដ៏ពេញនិយមមួយ។ កោះនេះក៏មានភាពល្បីល្បាញក្នុងនាមជាកន្លែងហាត់ Yoga និងកន្លែងសង្រួមផ្លូវចិត្តផងដែរ។

៤.កោះ Maldives៖ ប្រទេស Maldives ជាប្រជុំនៃកម្រងកោះដែលស្រស់ស្អាតជាងគេលើពិភពលោក ផ្ទៃទឹកសមុទ្រពណ៌ខៀវស្រងាត់ ជាផ្នែកមួយជម្រុញឱ្យកោះទាំងនេះកាន់តែលេចឡើង។ Maldives ជាប្រជុំកោះដែលប្រមូលផ្តុំដោយកោះផ្កាថ្មធម្មជាតិចំនួន២៦ និងមានផ្ទៃដីទាបជាងគេបំផុតនៅលើពិភពលោក ដោយនៅត្រង់ចំណុចខ្ពស់បំផុត ផ្ទៃដីមានកម្ពស់មិនខ្ពស់ជាង ៣ ម៉ែត្រឡើយពីនីវ៉ូសមុទ្រ។ នៅពីក្រោមផ្ទៃទឹកដ៏ស្រស់ស្អាត សម្បូរទៅដោយផ្កាថ្មដុះប៉ប្រះទឹក ដែលបានទាក់ទាញភ្ញៀវទេសចរជុំវិញពិភពលោកមកកំសាន្តនៅទីនេះ។

៥.កោះ Palawan៖ កោះ Palawan នេះជាឋានសួគ៌ក្រោមមេឃ ស្ថិតនៅក្នុងប្រទេសហ្វីលីពីន។ ខេត្តដីកោះនេះ លាតសន្ធឹងលើតំបន់ភាគនិរតីទៅកាន់កោះ Borneo ជាមួយនឹងថ្មបាយក្រៀមផុសឡើងចេញពីផ្ទៃសមុទ្រ។ ពីលើកោះនេះ អ្នកអាចឃើញសកម្មភាពរបស់ពួកមច្ឆាហែលទឹកលេងបានយ៉ាងច្បាស់ អ្វីដែលទាក់ទាញបំផុតរបស់កោះ Palawan នេះគឺសួនឧទ្យានជាតិ Puerto Princesa Subterranean River ដែលត្រូវបានគេដាក់បញ្ជូនក្នុងបញ្ជីបេតិកភណ្ឌពិភពលោក៕