ថៃងាកទៅរុស្ស៊ីភ្លាម ពេលកម្ពុជាឈប់ប្រើប្រាស់ផលិតផលខ្លួន

គ្មានជម្រើសផ្សេងទៀតទេ បន្ទាប់ពីថៃបានបរាជ័យក្នុងតំបន់ ជាពិសេស ទំនាក់ទំនងល្អជាមួយនឹងបណ្តាប្រទេសជិតខាង រួមមាន កម្ពុជា ម៉ាឡេស៊ី និងភូមា។ល។ វិបត្តិនេះបានធ្វើឱ្យថៃមានឱនភាពសេដ្ឋកិច្ចខ្លាំងបំផុតមិនធ្លាប់ជួប។ ការបិទព្រំដែនកម្ពុជា ការបិទការនាំចេញពីម៉ាឡេស៊ី និងភូមា។ល។ បានធ្វើឱ្យការនាំចេញរបស់ថៃជួបបញ្ហាផ្ទួនៗ ដែលបញ្ហានេះបានធ្វើឱ្យលោកនាយករដ្ឋមន្ត្រី Anutin Charnvirakul ប្តូរយុទ្ធសាស្ត្រងាករករុស្ស៊ី ទាំងដែលរុស្ស៊ីកំពុងប្រឈមនឹងទណ្ឌក.ម្មពេញពិភពលោក ពីមហាអំណាចអាមេរិក។ តើការងាកទៅរកទីផ្សារ​រុស្សុីនេះ អាចនឹងនាំឱ្យសេដ្ឋកិច្ចថៃបានប្រសើរដូចកាលមិនទាន់មានសង្គ្រា.មឈ្លា.នពានមកលើព្រំដែនកម្ពុជាដែរឬទេ?

ពេលការនាំចេញទំនិញថៃកំពុងតែជាប់គាំង នាយករដ្ឋមន្ត្រីថៃ លោក Anutin​ បានសម្រេចចិត្តបោះជំហានការទូតសេដ្ឋកិច្ច ដោយត្រៀមខ្លួនប្រើប្រាស់កិច្ចប្រជុំកំពូលរំឭកខួបអនុស្សាវរីយ៍អាស៊ាន-រុស្ស៊ី ដែលនឹងប្រព្រឹត្តទៅចាប់ពីថ្ងៃទី១៧ ដល់ថ្ងៃទី១៨ ខែមិថុនា ឆ្នាំ២០២៦ នៅទីក្រុងកាហ្សាន ប្រទេសរុស្ស៊ី ដើម្បីស្វែងរកទីផ្សារថ្មីជួយស្រោចស្រង់សេដ្ឋកិច្ចដែលកំពុងដាំក្បាលចុះឱ្យងើបឡើងវិញ។

តាមការចុះផ្សាយរបស់សារព័ត៌មានថៃ គឺថៃនឹងប្រើប្រាស់ឱកាសនៃកិច្ចប្រជុំនេះដើម្បីជជែកពីនាំចេញកសិផល គ្រឿងសមុទ្រ និងគ្រឿងបន្លាស់យានយន្ត ទៅកាន់ទីផ្សាររុស្ស៊ី និងបណ្តាប្រទេសសមាជិកសហភាពសេដ្ឋកិច្ចអឺរ៉ាស៊ី (EAEU) ដោយសារបច្ចុប្បន្ន សេដ្ឋកិច្ចថៃបានធ្លាក់ចុះយ៉ាងខ្លាំង ព្រោះតែប្រឈមនឹងហានិភ័យពីភាពមិនប្រាកដប្រជាដែលកើតឡើងដោយសារស្ថានការណ៍ពិភពលោក និងគ្មានទីផ្សារនាំចេញទំនិញ។ វាជាការបង្វែរទិសដៅពាណិជ្ជកម្មទៅកាន់ទីផ្សារថ្មីៗដែលថៃចាត់ទុកថាមានសក្តានុពលខ្ពស់ ដើម្បីប៉ះប៉ូវការនាំចេញទំនិញធ្លាក់ចុះទៅកាន់ទីផ្សារប្រទេសជិតខាង។

អ្នកនាំពាក្យរដ្ឋាភិបាលថៃ អ្នកស្រី រ៉ាជឆាដា ថាណាឌិរេក ឱ្យដឹងថា លោក Anutin នឹងដឹកនាំមន្ត្រីពាក់ព័ន្ធទៅចូលរួមកិច្ចប្រជុំនេះ ក្នុងគោលបំណងបង្កើតឱកាសសេដ្ឋកិច្ច ទាំងការស្វែងរកទីផ្សារថ្មី ការស្វែងរកវិនិយោគិន និងការជំរុញពាណិជ្ជកម្ម។ លោក Anutin សង្ឃឹមថា នឹងអាចជួបជជែកពីការធ្វើពាណិជ្ជកម្មជាមួយបណ្តាមេដឹកនាំប្រទេសអាស៊ាន រួមទាំងប្រធានាធិបតីរុស្ស៊ី លោក Vladimir Putin ផងដែរ។

គួរបញ្ជាក់ថា ការនាំចេញទំនិញរបស់ថៃទៅកាន់ទីផ្សារប្រទេសជិតខាងក្នុងតំបន់អាស៊ាន បាននិងកំពុងដាំក្បាលចុះយ៉ាងខ្លាំងក្នុងឆ្នាំ២០២៥ និងឈានចូលមកដល់ឆ្នាំ២០២៦នេះ។ ជាក់ស្តែង ការនាំចេញទំនិញមកកម្ពុជា បានធ្លាក់ចុះដោយសារថៃបិទព្រំដែនជាឯកតោភាគី។ ពលរដ្ឋកម្ពុជាដែលធ្លាប់ទិញទំនិញថៃពីមុន ពេលនេះ បានពហិការមិនប្រើប្រាស់ទំនិញថៃ និងងាកទៅប្រើប្រាស់ទំនិញប្រទេសផ្សេងវិញដែលមានគុណភាពល្អជាង។

ស្ថានភាពសេដ្ឋកិច្ចថៃនាពេលបច្ចុប្បន្ន កំពុងតែជួបវិបត្តិសេដ្ឋកិច្ចយ៉ាងធ្ងន់ធ្ងរ និងសមត្ថភាពប្រកួតប្រជែងលើវិស័យផលិតកម្មបានចុះខ្សោយ។ ការនាំចេញទំនិញថៃមកកាន់ប្រទេសកម្ពុជា តាមរយៈផ្លូវគោកជួបការលំបាក ដរាបណាបញ្ហាជម្លោះព្រំដែនមិនទាន់ត្រូវបានដោះស្រាយរួចរាល់នៅឡើយ។ ហេតុនេះ នាយករដ្ឋមន្ត្រីថៃក៏ព្យាយាមបង្កើនទំនាក់ទំនងការទូតជាមួយប្រទេសនានា ដូចជា វៀតណាម និងរុស្ស៊ី ដើម្បីជួយស្រោចស្រង់សេដ្ឋកិច្ចឡើងវិញ៕