កាលពីថ្ងៃទី៧ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា ខ្យល់ព្យុះឈ្មោះ Darragh បានបោកបក់មកលើប្រទេសអង់គ្លេស និងអៀរឡង់ ហើយរដ្ឋាភិបាលប្រទេសទាំងពីរបានប្រកាសអាសន្នពីកម្រិតគ្រោះថ្នា.ក់ ពណ៌ក្រហម (Red Warning) ដើម្បីឱ្យពលរដ្ឋរាប់លាននាក់កុំចាកចេញពីលំនៅឋាន និងលុបចោលជើងហោះហើរជាច្រើន ។

ឥទ្ធិពលខ្យល់ព្យុះកាលពីថ្ងៃទី៧ ខែធ្នូ កន្លងមក បានធ្វើឱ្យឆ្នេរសមុទ្រភាគខាងលិចប្រទេសអង់គ្លេសមានអាកាសធាតុមិនល្អ និងខ្យល់បក់លាយខ្សាច់គ្របដណ្តប់លើតំបន់ទេសចរណ៍ ។ លើសពីនេះ អ្នកបើកបររថយន្តដឹកអ្នកដំណើរបានស្លាប់ដោយសារដើមឈើបាក់សង្កត់នៅតាមផ្លូវ ។

កាលពីថ្ងៃទី៦ ខែធ្នូ កន្លងមក អាជ្ញាធរអង់គ្លេសបានជូនដំណឹងឱ្យពលរដ្ឋសម្ងំនៅក្នុងលំនៅឋាន ដោយត្រៀមស្បៀងអាហារ និងសម្ភារៈប្រើប្រាស់ចាំបាច់ ពីព្រោះខ្យល់ព្យុះអាចបណ្តាលឱ្យដើមឈើបាក់រលំ និងទឹករលកខ្លាំងនៅបរិវេណឆ្នេរសមុទ្រ ។ តំបន់មួយចំនួននឹងដាច់ចរន្តអគ្គិសនី ហើយពលរដ្ឋពុំអាចប្រើប្រាស់ទូរស័ព្ទបាន។

តាមរបាយការណ៍បញ្ជាក់ថា លំនៅឋាន និងហាងលក់ទំនិញជាង៤សែនកន្លែង គ្មានអគ្គិសនីប្រើប្រាស់ ខណៈផ្លូវធ្វើដំណើរ និងស្ពាន ត្រូវបិទដំណើរការបណ្តោះអាសន្ន ។ អង់គ្លេសបានលុបចោលជើងហោះហើរមួយចំនួន ដោយសារខ្យល់ព្យុះនេះមានកម្លាំងខ្លាំងរហូតដល់១៥០គីឡូម៉ែត្រក្នុង១ម៉ោង ដែលបណ្តាលឱ្យមានភ្លៀង និងព្រិលធ្លាក់ខ្លាំង ។

ប្រទេសអង់គ្លេសបានរងផលប៉ះពាល់ដោយសារខ្យល់ព្យុះជារៀងរាល់ឆ្នាំ ហើយតែងតែកើតឡើងនៅរដូវស្លឹកឈើជ្រុះ និងរដូវរងា ក្នុងនោះចំនួនខ្យល់ព្យុះអាចខុសគ្នានៅតាមឆ្នាំនីមួយៗអាស្រ័យលើកត្តាផ្សេងៗ ។ ជាក់ស្តែង ខ្យល់ព្យុះ Darragh គឹជាខ្យល់ព្យុះទី៤ ដែលបានបោកបក់មកលើអង់គ្លេស តាំងពីដើមឆ្នាំ២០២៤ ។

ដោយឡែក ឥទ្ធិពលខ្យល់ព្យុះនេះក៏បានប៉ះពាល់ដល់ភាគខាងជើងប្រទេសអៀរឡង់ផងដែរ គឺមានដើមឈើបាក់នៅតាមផ្លូវ និងបាក់របង ដែលបណ្តាលឱ្យដាច់ចរន្តអគ្គិសនីក្នុងតំបន់មួយចំនួន ។ អាជ្ញាធរអៀរឡង់ បានប្រកាសលុបចោលការរៀបចំកម្មវិធីសំខាន់ៗ ខណៈអាកាសយានដ្ឋាននៅភាគខាងជើងអៀរឡង់ បានលុបចោលជើងហោះហើរជាច្រើន។

ខ្យល់ព្យុះនៅអង់គ្លេស និងអៀរឡង់ បានធ្វើឱ្យប្រទេសនានាបារម្ភថា ចាប់ពីពេលនេះតទៅ ពិភពលោក នឹងជួបគ្រោះធម្មជាតិធ្ងន់ធ្ងរ និងញឹកញាប់ ។ គ្រោះធម្មជាតិ គឺជាសញ្ញាប្រាប់ឱ្យពិភពលោក ប្រញាប់ស្វែងរកវិធានការដោះស្រាយបម្រែបម្រួលអាកាសធាតុ (Climate Change) ដែលនឹងកើតឡើង នាថ្ងៃអនាគត ៕

ប្រទេសចិន ៖ សារព័ត៌មាន Bloomberg បានរាយការណ៍កាលពីដើមខែធ្នូ ឆ្នាំ២០២៤ ថា ក្រុមហ៊ុនផលិតរថយន្តអគ្គិសនីជាច្រើន រួមទាំងក្រុមហ៊ុន Tesla និង BYD បានប្រជែងគ្នាបញ្ចុះតម្លៃដើម្បីលក់រថយន្តដាច់ច្រើននាចុងឆ្នាំ២០២៤ នៅប្រទេសចិន ។ នៅឆ្នាំ២០២៤ Tesla បានបញ្ចុះតម្លៃរថយន្តជាបន្តបន្ទាប់នៅចិន ហើយនៅខែធ្នូនេះ Tesla បានបញ្ចុះតម្លៃរហូតដល់ជាង១ពាន់ដុល្លារ ។

តាមការប្រកាសរបស់ Tesla នៅលើគេហទំព័រ Weibo គឺក្រុមហ៊ុននេះបានបញ្ចុះតម្លៃរថយន្តច្រើនបំផុត រហូតដល់១ម៉ឺនយាន់ (ឬស្មើ១,៣៨២ដុល្លារអាមេរិក) សម្រាប់រថយន្ត SUV ម៉ាក Model Y រហូតដល់ដាច់ខែធ្នូ ឆ្នាំ២០២៤ ។ រីឯក្រុមហ៊ុនគូប្រជែង គឺ BYD ក៏បានបញ្ចុះតម្លៃរថយន្តនៅចិនដែរ គឺចាប់ពី១,០០០យាន់ ទៅ៣,០០០យាន់ (ឬចាប់ពី១៣៨ដុល្លារ ទៅ៤១១ដុល្លារអាមេរិក) សម្រាប់រថយន្តមួយចំនួន ។

BYD បានលក់រថយន្តដាច់លើសគោលដៅ បន្ទាប់ពីក្រុមហ៊ុននេះទើបតែលក់រថយន្តបានច្រើនបំផុត កាលពីខែវិច្ឆិកា ឆ្នាំ២០២៤ គឺស្មើនឹង ៥០ម៉ឺន ៤ពាន់គ្រឿង កើនឡើង៦៧% បើធៀបនឹងខែវិច្ឆិកា ឆ្នាំ២០២៣ ។

ការលក់រថយន្តអគ្គិសនី និងរថយន្ត Hybrid បានកើនឡើងក្រោយពីរដ្ឋាភិបាលក្រុងប៉េកាំង ផ្តល់ប្រាក់ឧបត្ថម្ភសម្រាប់ការយករថយន្តចាស់មកប្តូររថយន្តថ្មី ។ ទីផ្សារលក់រថយន្តនៅចិនបានប្រកួតប្រជែងគ្នាយ៉ាងខ្លាំង ហើយមានក្រុមហ៊ុនជាច្រើនបានប្រកាសបញ្ចុះតម្លៃរថយន្តអគ្គិសនីនៅចុងឆ្នាំ២០២៤ ដើម្បីប្រជែងជាមួយ BYD ។

ក្រុមហ៊ុន Zhejiang Leap Motor Technology ដែលសហការជាមួយក្រុមហ៊ុន Stellantis របស់អាមេរិក បានសម្រេចគោលដៅប្រចាំប្រចាំឆ្នាំមុនកំណត់ ដោយលក់រថយន្តបានចំនួន៤០,១៦៩គ្រឿង នៅខែវិច្ឆិកា ឆ្នាំ២០២៤ ។ ដូច្នេះ វាធ្វើឱ្យចំនួនលក់រថយន្តសរុបរបស់ក្រុមហ៊ុន ចាប់ពីដើមឆ្នាំ២០២៤ កើនឡើងរហូតដល់ ២៥១,២០៧គ្រឿង ខណៈគោលដៅការលក់ត្រឹមតែ ២៥ម៉ឺនគ្រឿង ។

ចំណែកនាយកក្រុមហ៊ុន Xiaomi និយាយថា ក្រុមហ៊ុនបានលក់រថយន្តម៉ាក SU7 EV ស្មើជាង២ម៉ឺនគ្រឿង កាលពីខែតុលា និងខែវិច្ឆិកា ឆ្នាំ២០២៤ ។ លើសពីនេះ ក្រុមហ៊ុននឹងបង្កើនគោលដៅលក់រថយន្ត ចាប់ពី១២ម៉ឺនគ្រឿង ទៅ១៣ម៉ឺនគ្រឿង ។

ប៉ុន្តែក្រុមហ៊ុនរថយន្តផ្សេងទៀតនៅតែប្រឈមនឹងសម្ពាធ នាចុងឆ្នាំ២០២៤ ដូចជា ៖ រថយន្តអគ្គិសនីម៉ាក Zeekr របស់ក្រុមហ៊ុន Zhejiang Geili Holding Group លក់រថយន្តបានតែ ២ម៉ឺន ៧ពាន់គ្រឿងប៉ុណ្ណោះនៅខែវិច្ឆិកា ។ រីឯក្រុមហ៊ុន Li Auto បានលក់រថយន្តឱ្យអតិថិជន ស្មើជាង ៤៤ម៉ឺន ១ពាន់គ្រឿង នៅខែវិច្ឆិកា ហើយក្រុមហ៊ុនត្រូវបង្កើនការលក់រថយន្តឱ្យបាន៦ម៉ឺនគ្រឿងទៀតនៅខែធ្នូ ដើម្បីសម្រេចគោលដៅចំនួន៥០ម៉ឺនគ្រឿង ៕

ប្រទេសបារាំង ៖ ក្រុមហ៊ុនមួយនៅប្រទេសបារាំងបានបង្ហាញរូបរាងកង់អាគុយបំពាក់ដំបូលការពារភ្លៀង និងកំដៅថ្ងៃ ព្រមទាំងឧបករណ៍ទំនើបៗសម្រាប់ជាជម្រើសថ្មីរបស់អ្នកហាត់ប្រាណ ។ កង់អាគុយនេះមានកង់សរុបចំនួន៣ ហើយក្រៅពីការប្រើប្រាស់អាគុយ អ្នកប្រើប្រាស់អាចធាក់វាដោយជើងក៏បាន និងអង្គុយរាងទ្រេតបន្តិច ។

ក្រុមហ៊ុនឈ្មោះ VeMoo បញ្ជាក់ថា វាអាចធ្វើដំណើរក្នុងចម្ងាយរហូតដល់១០០គីឡូម៉ែត្រ សម្រាប់ការសាកអាគុយម្តង ។ រីឯឧបករណ៍ផ្សេងៗរបស់កង់ គឺបានមកពីក្រុមហ៊ុននានា ដូចជា ៖ ក្រុមហ៊ុន RockShox, SunRace, Sturmey-Archer, Schwalbe និងក្រុមហ៊ុន Actia ។ ក្រៅពីនេះ អ្នកប្រើប្រាស់អាចដាក់សម្ភារៈផ្សេងៗនៅផ្នែកខាងក្រោយ និងសាកថ្មទូរស័ព្ទក្នុងអំឡុងពេលធ្វើដំណើរ ។

កង់អាគុយមិនត្រឹមតែជួយឱ្យអ្នកប្រើប្រាស់អាចការពារខ្លួនពីទឹកភ្លៀង និងកំដៅថ្ងៃប៉ុណ្ណោះទេ គឺវាត្រូវបានបំពាក់ដោយឧបករណ៍ទំនើបៗជាច្រើនប្រភេទ ដើម្បីផ្តល់ភាពងាយស្រួលគ្រប់បែបយ៉ាង ។ ឧបករណ៍ទំនើបទាំងនេះនឹងជួយឱ្យអ្នកប្រើប្រាស់ពុំសូវចំណាយកម្លាំងធាក់ដោយជើង ហើយវានឹងបម្លាស់ទីទៅមុខបានយ៉ាងឆាប់រហ័ស ។

ចំណែកដំបូលរបស់វាវិញអាស្រ័យតាមចំណង់ចំណូលចិត្តរបស់មនុស្សម្នាក់ៗ គឺអាចបំពាក់ដំបូលក៏បាន ឬដោះចេញក៏បាន ។ ក្រុមហ៊ុន VeMoo រំពឹងថា កង់១គ្រឿងនឹងមានតម្លៃ១២,៦៥៥ដុល្លារអាមេរិក ហើយអ្នកចាប់អារម្មណ៍ទិញកង់នេះ ត្រូវតែកក់ប្រាក់មុនចំនួន២,១០៩ដុល្លារអាមេរិក ទើបក្រុមហ៊ុនផលិត និងបញ្ជូនវាទៅឱ្យអតិថិជន នៅឆ្នាំ២០២៥ ។

ប៉ុន្តែក្រុមហ៊ុននេះពុំបានបញ្ជាក់ថា រហូតមកដល់ដើមខែធ្នូ ឆ្នាំ២០២៤ តើមានអតិថិជនប៉ុន្មាននាក់ចាប់អារម្មណ៍កង់អាគុយនេះខ្លះ? គ្រាន់តែប្រាប់ថា វាជាជម្រើសថ្មីសម្រាប់អ្នកចូលចិត្តហាត់ប្រាណ និងពុំប៉ះពាល់បរិស្ថាន ៕

សហរដ្ឋអាមេរិក ៖ នៅឆ្នេរសមុទ្ររដ្ឋកាលីហ្វ័រញ៉ារបស់អាមេរិកបានកើតគ្រោះរញ្ជួយដីខ្លាំងក្នុងកម្រិត៧រិចទ័រ ហើយអាជ្ញាធរបានប្រកាសឱ្យពលរដ្ឋប្រយ័ត្នតរលកយក្សស៊ូណាមិនៅតាមឆ្នេរសមុទ្រ ដែលមានមនុស្សរស់នៅប្រមាណ ៤លាន ៧សែននាក់ អាចនឹងរងផលប៉ះពាល់ ។ ប៉ុន្តែពុំទាន់មានសេចក្តីរាយការណ៍អំពីការខូចខាតនៅឡើយទេ ។

មន្ត្រីផ្នែកគ្រប់គ្រងអាកាសធាតុអាមេរិកបានឱ្យដឹងកាលពីថ្ងៃទី៥ ខែធ្នូ ឆ្នាំ២០២៤ ថា អាជ្ញាធរបានប្រកាសឱ្យពលរដ្ឋប្រមាណ ៤លាន ៧សែននាក់ ប្រយ័ត្នគ្រោះថ្នាក់ដោយសាររលកយក្សស៊ូណាមិ នៅតាមឆ្នេរសមុទ្ររដ្ឋកាលីហ្វ័រញ៉ា ក្រោយពីកើតគ្រោះរញ្ជួយដីកម្រិត៧រិចទ័រ នៅទីក្រុង Ferndale រដ្ឋកាលីហ្វ័រញ៉ា ។ ក្រៅពីនេះ អាជ្ញាធរក៏បានប្រកាសឱ្យពលរដ្ឋជម្លៀសទៅកាន់តំបន់ខ្ពស់ជាបន្ទាន់ ។

ភ្នាក់ងារអង្កេតផ្នែកភូមិសាស្ត្រអាមេរិកបញ្ជាក់ថា គ្រោះរញ្ជួយដីនៅឆ្នេរសមុទ្រភាគខាងជើងរដ្ឋកាលីហ្វ័រញ៉ាលើកនេះ គឺមានជម្រៅរហូតដល់១០គីឡូម៉ែត្រ ទើបមានការប្រកាសពីរលកយក្សស៊ូណាមិ ។ ទោះយ៉ាងណា ពុំមានសេចក្តីរាយការណ៍ថា គ្រោះរញ្ជួយដីនេះបណ្តាលឱ្យខូចខាតទ្រព្យតិច ឬច្រើនប៉ុនណាទេ ។ បើតាមពលរដ្ឋរស់នៅរដ្ឋកាលីហ្វ័រញ៉ា ដែលបាននិយាយមកកាន់សារព័ត៌មាន BBC ក្រោយគ្រោះរញ្ជួយដីថា ក្នុងអគារដែលខ្លួនស្ថិតនៅនោះ ហាក់មានគ្រាប់បែកផ្ទុះនៅគ្រប់បន្ទប់ ។

យោងតាមសេចក្តីរាយការណ៍ គឺមានគ្រោះរញ្ជួយដីបានកើតឡើងជាបន្តបន្ទាប់ទៀត ក្រោយពីកើតគ្រោះរញ្ជួយដីខ្លាំងនៅថ្ងៃទី៥ ខែធ្នូ ឆ្នាំ២០២៤ ដែលបណ្តាលឱ្យពលរដ្ឋនៅតំបន់ Humboldt County គ្មានភ្លើងអគ្គិសនីប្រើប្រាស់ ។ ក្រោយពីកើតគ្រោះរញ្ជួយដីនៅឆ្នេរសមុទ្រ អភិបាលរដ្ឋកាលីហ្វ័រញ៉ា លោក Gavin Newsom បានប្រជុំជាមួយមន្ត្រីពាក់ព័ន្ធភ្លាមៗដើម្បីទប់ទល់នឹងស្ថានការណ៍នេះ ។

ក្រោយមក អាមេរិកក៏បានលុបចោលសេចក្តីប្រកាសពីរលកយក្សស៊ូណាមិ ក្នុងតំបន់ចំនួន២ គឺនៅបរិវេណជាប់ឆ្នេរសមុទ្រភាគខាងជើងរដ្ឋកាលីហ្វ័រញ៉ា និងភាគខាងត្បូងរដ្ឋអូរីហ្គន ដែលតំបន់ទាំង២នេះមានមនុស្សរស់នៅប្រមាណ ៤លាន ៧សែននាក់ ៕

ប្រទេសថៃ ៖ កាលពីថ្ងៃទី៥ ខែធ្នូ ឆ្នាំ២០២៤ សារព័ត៌មានថៃរាយការណ៍ថា នេះជាដំណឹងដ៏គួរឱ្យរីករាយយ៉ាងខ្លាំងសម្រាប់ពលរដ្ឋនៅទូទាំងប្រទេស គឺថៃបញ្ចុះតម្លៃប្រេងម៉ាស៊ូតចំនួន១បាតក្នុង១លីត្រ (ឬស្មើនឹង១០០រៀល) រយៈពេល១ខែ ដោយគិតចាប់ពីថ្ងៃទី៥ ខែធ្នូ ឆ្នាំ២០២៤ រហូតដល់ថ្ងៃទី៥ ខែមករា ឆ្នាំ២០២៥ ដើម្បីអបអរទិវាលោកឪពុក ត្រូវនឹងថ្ងៃទី៥ ខែធ្នូ ។

លោក ភីរ៉ាផាន់ សាលីរ៉ាត់វិផាក ឧបនាយករដ្ឋមន្ត្រី និងរដ្ឋមន្ត្រីក្រសួងថាមពលនិយាយថា ក្រសួងថាមពល និងក្រុមហ៊ុន SUSCO បានសហការគ្នាបញ្ចុះតម្លៃប្រេងម៉ាស៊ូតចំនួន១បាតក្នុង១លីត្រ រយៈពេល១ខែ គិតចាប់ពីថ្ងៃទី៥ ខែធ្នូ ឆ្នាំ២០២៤ រហូតដល់ថ្ងៃទី៥ ខែមករា ឆ្នាំ២០២៥ ។ ហេតុនេះ ពលរដ្ឋអាចមកចាក់ប្រេងម៉ាស៊ូតនៅតាមស្ថានីយប្រេងរបស់ក្រុមហ៊ុន SUSCO និង SINOPEC ចំនួន១៥៨កន្លែង ដើម្បីអបអរទិវាលោកឪពុក និងជាកាដូឆ្នាំថ្មីសម្រាប់ពលរដ្ឋគ្រប់រូប ។

លោក ភីរ៉ាផាន់ បញ្ជាក់ថា ក្រសួងថាមពលបានប្តេជ្ញាចិត្ត និងអនុវត្តគោលនយោបាយគ្រប់ផ្នែកដើម្បីកាត់បន្ថយបន្ទុកចំណាយរបស់ពលរដ្ឋ ជាពិសេស កាត់បន្ថយការចំណាយផ្នែកថាមពល ដូចជា ៖ តម្លៃអគ្គិសនី, ប្រេងឥន្ធនៈ និងឧស្ម័ន ដើម្បីផ្តល់សេចក្តីសុខ និងសុភមង្គលជូនពលរដ្ឋ ។ បើទោះជាតម្លៃប្រេងឥន្ធនៈបានកើនឡើងតាមទីផ្សារពិភពលោក ដែលហួសពីការគ្រប់គ្រងរបស់ក្រសួងថាមពលក្តី ប៉ុន្តែកន្លងមក ក្រសួងពុំបានព្រងើយកន្តើយទេ ហើយព្យាយាមរកវិធីបញ្ចុះតម្លៃប្រេងនៅថៃជាបន្តបន្ទាប់ ។

លើសពីនេះ ក្រសួងថាមពលក៏បានស្វែងរកការសហការពីគ្រប់ផ្នែកផងដែរ ដើម្បីកាត់បន្ថយការចំណាយលើថាមពលរបស់ពលរដ្ឋនៅទូទាំងប្រទេសឱ្យទទួលបានតម្លៃប្រេងឥន្ធនៈសមរម្យ ។ ក្រសួងសូមអរគុណដល់ក្រុមហ៊ុន SUSCO និងលោក ម៉ុងឃុន ស៊ិម៉ារ៉ូជ ប្រធានក្រុមប្រឹក្សាភិបាលក្រុមហ៊ុន SUSCO យ៉ាងខ្លាំង ដែលបានចូលរួមកាត់បន្ថយការចំណាយរបស់ពលរដ្ឋមួយចំណែក ។

ចំណែកលោក ម៉ុងឃុន ស៊ិម៉ារ៉ូជ ប្រធានក្រុមប្រឹក្សាភិបាលក្រុមហ៊ុន SUSCO និយាយថា ក្រុមហ៊ុនបានសហការជាមួយក្រសួងថាមពល បញ្ចុះតម្លៃប្រេងម៉ាស៊ូតរយៈពេលមួយខែ ដើម្បីអបអរថ្ងៃទិវាលោកឪពុក ឬរំលឹកគុណដល់អតីតព្រះមហាក្សត្រថៃ ព្រះបាទមហាភូមិបុល អាឌុលយ៉ាដេត ។ វាជាការផ្តល់ប្រយោជន៍ និងក្តីសុខ ព្រមទាំងជួយពលរដ្ឋតាមគោលនយោបាយរបស់ក្រសួងថាមពល ក្រោមការដឹកនាំរបស់លោក ភីរ៉ាផាន់ ។ ដូច្នេះ កសិករ, ផ្នែកឧស្សាហកម្ម, ផ្នែកដឹកជញ្ជូន ព្រមទាំងពលរដ្ឋទាំងអស់អាចចាក់ប្រេងក្នុងតម្លៃថោកតាមពេលវេលាកំណត់នេះ ៕

ប្រទេសចិន៖ បេក្ខជនជាង ២.៥ លាននាក់បានប្រលងចូលមន្ត្រីរាជការ នៅមណ្ឌលប្រលងទូទាំងប្រទេសចិន ដែលជាចំនួនដ៏ច្រើនបំផុតក្នុងរយៈពេលជាងមួយទសវត្សរ៍។
ក្នុងចំណោមបេក្ខជនចំនួន ២.៥ លាននាក់ មានតែ ៣៩,៧០០ នាក់ប៉ុណ្ណោះដែលត្រូវបានជ្រើសរើសឱ្យធ្វើការនៅក្នុងទីភ្នាក់ងាររដ្ឋឆ្នាំ ២០២៥ ដូច្នេះនេះគឺជាការប្រកួតប្រជែងដ៏ស្វិតស្វាញបំផុតមួយនៅក្នុងប្រទេសចិន។

ដើម្បីក្លាយជាមន្ត្រីរាជការ បេក្ខជនត្រូវដាក់ពាក្យសុំតំណែងណាដែលទំនេរ ក្រោយពីពិនិត្យពាក្យសុំ បេក្ខជនដែលមានសមត្ថភាពត្រូវប្រលងសរសេរ រួមទាំងទ្រឹស្តីនយោបាយដល់ចំណេះទូទៅ។ អ្នកដែលប្រលងជាប់ត្រូវសម្ភាស ហើយត្រូវពិនិត្យសុខភាព និងប្រវត្តិរបស់ខ្លួន។ ក្រៅពីការជ្រើសរើសមន្ត្រីរាជការថ្នាក់ជាតិ មូលដ្ឋានក៏មានដំណើរការជ្រើសរើសបុគ្គលិករបស់ខ្លួនផងដែរ។

នៅក្នុងប្រទេសចិន ការធ្វើជាមន្ត្រីរាជការត្រូវបានចាត់ទុកថាជាជម្រើសអាជីពដ៏ល្អមួយ ដោយសារតែប្រាក់ចំណូល និងអត្ថប្រយោជន៍មានស្ថេរភាព ជាមួយនឹងហានិភ័យតិចតួចនៃភាពអត់ការងារធ្វើ។ ទោះបីប្រទេសនេះជាមហាអំណាចសេដ្ឋកិច្ចទី ២ លើពិភពលោកក៏ដោយ ភាពអត់ការងាររបស់យុវជននៅតែមាន ហើយបន្តកើនឡើងឥតឈប់ឈរ។ នៅពេលដែលជំងឺរាតត្បាតកើតឡើង សេដ្ឋកិច្ចជួបការលំបាក ហើយអាជីវកម្មក៏ធ្លាក់ចុះ បណ្តាលឱ្យក្រុមហ៊ុនឯកជនជាច្រើនសម្រេចចិត្តកាត់បន្ថយបុគ្គលិក ធ្វើឱ្យពួកគេគ្មានការងារធ្វើ។

ដូច្នេះយុវជនចិនក៏ចង់ក្លាយជាមន្ត្រីរាជការ ហើយក៏បាននាំគ្នាសម្រុកដាក់ពាក្យប្រលងចូលមន្ត្រីរាជការតែម្តង ដែលជាចំនួនធំបំផុតមិនធ្លាប់មាន។ ចំនួនបេក្ខជនប្រលងចូលបម្រើការងាររដ្ឋឆ្នាំ ២០២៤ នេះនៅប្រទេសចិនគឺបានកើនឡើងទ្វេដងធៀបនឹងបួនឆ្នាំមុន។ នេះបង្ហាញថា ស្ថានភាពការងារក្នុងវិស័យឯកជនកាន់តែអាក្រក់ទៅៗ ដោយមានការងារល្អតិចជាងមុន និងមិនសូវមានស្ថិរភាព។

បច្ចុប្បន្នវិស័យឯកជនដែលផ្តល់ការងារជាង ៨០% នៃកម្លាំងពលកម្មនៅទីក្រុង កំពុងទទួលរងការកាត់ប្រាក់ខែ និងបញ្ឈប់ការងារ ដោយសារវិបត្តិសេដ្ឋកិច្ច។ យោងតាមទិន្នន័យពីសហព័ន្ធឧស្សាហកម្ម និងពាណិជ្ជកម្មចិនទាំងអស់ បានឱ្យដឹងថា ក្នុងឆ្នាំ ២០២៣ ក្រុមហ៊ុនឯកជនចំនួន ៥០០ របស់ប្រទេសចិនបានកាត់បន្ថយការងារជាង ៣០០,០០០ បើធៀបនឹងឆ្នាំមុន៕