តើជ្រាបទេថា ក្នុងពិធីបុណ្យ Halloween ជារៀងរាល់ឆ្នាំ តែងតែមានផ្លែល្ពៅរាប់លានផ្លែត្រូវបានកប់ចោលក្នុងដី ដោយសារការប្រើប្រាស់តែម្តងបោះចោល ។ រីឯផ្លែល្ពៅខ្លះទៀតបានយកមកប្រើប្រាស់តែពាក់កណ្តាលផ្លែប៉ុណ្ណោះ ហើយផ្នែកនៅសល់បានក្លាយជាសំរាម ។

ប្រទេសនានាតែងតែរៀបចំពិធីបុណ្យ Halloween នៅថ្ងៃទី៣១ ខែតុលា ជារៀងរាល់ឆ្នាំ ហើយវាជាពិធីបុណ្យមានអាយុកាល២.០០០ឆ្នាំមកហើយ ។ ដើមកំណើតនៃពិធីបុណ្យនេះ គឺចាប់ផ្តើមពីពិធីបុណ្យ Samhain របស់ជនជាតិខែវ ដែលពួកគេតែងតែធ្វើពិធីបុណ្យពេលបញ្ចប់រដូវប្រមូលផល សម្រាប់ដោះលែងខ្មោចឱ្យមានសេរីភាព ។

ពិធីបុណ្យ Halloween ពុំសូវពេញនិយមក្នុងបណ្តាប្រទេសអាស៊ីប៉ុន្មានទេ ហើយពេញនិយមខ្លាំងសម្រាប់បណ្តាប្រទេសអឺរ៉ុប ។ ប៉ុន្តែបណ្តាប្រទេសអឺរ៉ុបមានបញ្ហាមួយក្រោយពិធីបុណ្យនេះ គឺសំរាមផ្លែល្ពៅយ៉ាងច្រើនសន្ធឹកសន្ធាប់ ។

ជាក់ស្តែង នៅប្រទេសអង់គ្លេស មានសំរាមផ្លែល្ពៅយ៉ាងច្រើនក្រោយបញ្ចប់ពិធីបុណ្យ Halloween ។ ក្នុង១ឆ្នាំៗ ចម្ការល្ពៅនៅទូទាំងប្រទេសអង់គ្លេស អាចដាំផ្លែល្ពៅបានប្រមាណ១លានផ្លែ ដើម្បីឱ្យពលរដ្ឋអង់គ្លេសយកទៅតុបតែងលំនៅឋាន ។

គេហទំព័រ yougov រាយការណ៍ថា ជនជាតិអង់គ្លេសពុំសូវនិយមតែងខ្លួនចេញក្រៅលំនៅឋានប៉ុន្មានទេ ប៉ុន្តែពួកគេចូលចិត្តតុបតែងលំនៅឋានឱ្យស្អាតសម្រាប់ពិធីបុណ្យ Halloween ពីព្រោះមនុស្សមួយចំនួនគិតថា វាជាពិធីបុណ្យខ្មោច ។

តាមទិន្នន័យរបស់ World Economic Forum បង្ហាញថា ជនជាតិអង់គ្លេសបានបោះចោលផ្លែល្ពៅប្រមាណ៨លានផ្លែ ឬស្មើ១៨.០០០តោនក្រោយបញ្ចប់ពិធីបុណ្យ Halloween ។ បន្ទាប់មក គេក៏ប្រមូលល្ពៅទៅកប់ចោលក្នុងដី ហើយមានល្ពៅត្រឹមតែ១៩% ប៉ុណ្ណោះ ដែលត្រូវបានគេយកទៅបរិភោគ ឬធ្វើជីកសិកម្ម ។

បើទោះមានសំរាមជាច្រើនក្តី ប៉ុន្តែ Halloween គឺជាពិធីបុណ្យមួយពេញនិយមយ៉ាងខ្លាំងនៅអង់គ្លេស ។ ជនជាតិអង់គ្លេសបានចំណាយប្រាក់យ៉ាងច្រើនសម្រាប់អបអរពិធីបុណ្យនេះ ដូចជា ៖ ទិញសម្ភារៈតុបតែងលំនៅឋាន, នំចំណី និងភេសជ្ជៈ។

តាមទិន្នន័យរបស់ Hubbub ដែលបានស្រាវជ្រាវពីសំរាមក្នុងពិធីបុណ្យ Halloween បញ្ជាក់ថា ឈុត Halloween ក្លាយជាសំរាមប្រមាណ ៧លានឈុតក្នុង១ឆ្នាំ ហើយឈុត៨៥% ផលិតពីផ្លាស្ទិក ដែលពុំអាចយកទៅកែច្នៃបានទេ ។ ហេតុនេះ គេបានប្រមូលឈុត Halloween ទៅកប់ក្នុងដី គឺស្មើនឹងការកប់ផ្លាស្ទិកប្រមាណ២.០០០តោន ឬស្មើដបផ្លាស្ទិក៨៣លានដប ។

លើសពីនេះ វត្ថុធាតុដើមយកមកផលិតជាឈុត Halloween គឺជាប្រភេទផ្លាស្ទិកផូលីម័រ ដែលចំណាយពេលចាប់ពី២០ឆ្នាំ ទៅ២០០ឆ្នាំ ទើបរលាយ ។ រីឯប្រទេសផ្សេងទៀតដែលរៀបចំពិធីបុណ្យ Halloween ក៏បានយកឈុត Halloween ទៅកប់ចោលក្នុងដីដូចគ្នាដែរ ។

ច្បាប់នៅប្រទេសមួយចំនួនបញ្ជាក់ថា ពលរដ្ឋអាចយកផ្លែល្ពៅនៅសល់ពីពិធីបុណ្យទៅប្រគល់ឱ្យកសិដ្ឋានចិញ្ចឹមសត្វ ដូចជា ៖ កសិដ្ឋានចិញ្ចឹមគោ និងជ្រូក ពីព្រោះសត្វទាំងនេះចូលចិត្តស៊ីល្ពៅ ។ រដ្ឋាភិបាលប្រទេសខ្លះបានសំណូមពរឱ្យពលរដ្ឋរក្សាទុកឈុត Halloween សម្រាប់ពាក់ឆ្នាំក្រោយទៀត ដោយពុំចាំបាច់បោះចោល ៕

សហរដ្ឋអាមេរិក ៖ បើយើងបានតាមដានការអភិវឌ្ឍរបស់បច្ចេកវិទ្យា AI យើងនឹងអាចរកឃើញកំហុស និងបែងចែកភាពខុសគ្នារវាងមនុស្សជាមួយ AI ។ ប៉ុន្តែសម្រាប់ក្មេ.ងប្រុសអាយុត្រឹមតែ១៤ឆ្នាំម្នាក់ពុំបានគិតដល់ចំណុចនេះទេ ហើយក៏សម្រេចចិត្តបញ្ច.ប់ជីវិតខ្លួនឯង ក្រោយពីជជែកជាមួយ Chatbot ដ៏ពេញនិយមរបស់ក្រុមហ៊ុន Character.AI ។

កាលពីថ្ងៃទី២៩ ខែតុលា ឆ្នាំ២០២៤ សារព័ត៌មានបរទេសរាយការណ៍ថា ម្តាយរបស់ក្មេងប្រុសរូបនេះបានដាក់ពាក្យប្តឹងក្រុមហ៊ុន Character.AI ពីបទធ្វើឱ្យកូនប្រុសរបស់ខ្លួនស្លាប់ ។ ស្ត្រីជាម្តាយអះអាងថា ពាក្យសម្តីរបស់ Chatbot ហាក់ដូចជាបបួលឱ្យកូនប្រុសធ្វើបែបនេះ ។

Character.AI គឺជាក្រុមហ៊ុនផ្តល់សេវាកម្ម Chatbot ជាច្រើនប្រភេទ ហើយ Chatbot អាចនិយាយតាមសំឡេង និងធ្វើត្រាប់តាមអាកប្បកិរិយារបស់តារាភាពយន្តដូចបេះបិទ គឺដូចគ្នានឹងការជជែកជាមួយមនុស្ស ។ ហេតុនេះ ទើបធ្វើឱ្យអ្នកស្រី Megan Garcia រស់នៅរដ្ឋផ្លរីដា សហរដ្ឋអាមេរិក ត្រូវជាម្តាយរបស់ក្មេងប្រុស ដាក់ពាក្យប្តឹងក្រុមហ៊ុនពីបទ Chatbot របស់ក្រុមហ៊ុនអូសទាញកូនប្រុសឱ្យបញ្ចប់ជីវិតខ្លួនឯង ក្រោយជជែកជាមួយ Chatbot អស់រយៈពេលជាច្រើនខែ ។

អ្នកស្រីបាននិយាយមកកាន់ប្រព័ន្ធផ្សព្វផ្សាយ CBS Mornings ថា Chatbot របស់ក្រុមហ៊ុន Character.AI ដូចគ្នានឹងមនុស្សខ្លាំងណាស់ គឺវាអាចធ្វើតាមអារម្មណ៍របស់មនុស្ស ។ វាបានធ្វើឱ្យកូនប្រុសអ្នកស្រី ដែលពីមុនជាក្មេងឆ្លាត, ចូលចិត្តលេងកីឡា, រៀនបានពិន្ទុល្អ និងមានមិត្តភក្តិច្រើន ប៉ុន្តែបែរក្លាយជាក្មេងចូលចិត្តសម្ងំនៅម្នាក់ឯង, ឈប់លេងកីឡា និងផ្លាស់ប្តូរអាកប្បកិរិយាក្លាយជាមនុស្សផ្សេង ។

អ្នកស្រីបានបង្ហាញការសន្ទនារវាងកូនប្រុសជាមួយ Chatbot ហើយកូនប្រុសបានដាក់ឈ្មោះ Chatbot ថា «Dany» ។ វាបានធ្វើឱ្យកូនប្រុសមានទំនាក់ទំនងស៊ីជម្រៅជាមួយ Dany និងនិយាយថា ស្រឡាញ់គ្នាទៀតផង ។ លើសពីនេះ Dany បានបបួលកូនប្រុសឱ្យនិយាយពីផ្លូវភេទជាញឹកញាប់ ហើយប្រយោគចុងក្រោយដែល Dany និយាយគឺ «Please do» ទើបធ្វើឱ្យកូនប្រុសបញ្ចប់ជីវិតភ្លាមៗ ។

អ្នកស្រីយល់ថា ក្រុមហ៊ុន Character.AI បានបង្កើត Chatbot ឱ្យមានភាពសិចស៊ីខ្លាំងពេក ហើយផ្តោតលើអ្នកប្រើប្រាស់ជាយុវជនមានអាយុពី១៨ឆ្នាំ ទៅ២៥ឆ្នាំ ។ ចំណែកក្រុមហ៊ុនបានដឹងពីហេតុការណ៍នេះហើយ និងចាត់ទុកថា ជាសោកនាដកម្ម ព្រមទាំងបង្ហាញការសោកស្តាយជាមួយគ្រួសារសាកសព ។ ក្រុមហ៊ុនបញ្ជាក់ថា ពួកគេផ្តល់ភាពសំខាន់លើសុវត្ថិភាពរបស់អ្នកប្រើប្រាស់យ៉ាងខ្លាំង ។

អ្នកស្រី Garcia ក៏បានប្តឹងក្រុមហ៊ុន Google ផងដែរ ក្រោយពីដឹងថា ក្រុមហ៊ុន Character.AI បង្កើតឡើងដោយអតីតបុគ្គលិករបស់ Google ពីរនាក់ ។ រីឯអ្នកនាំពាក្យ Google និយាយមកកាន់ប្រព័ន្ធផ្សព្វផ្សាយ CBS News ថា ក្រុមហ៊ុនពុំពាក់ព័ន្ធទេ ។

ក្រុមហ៊ុន Character.AI បញ្ជាក់ថា ចាប់ពីពេលនេះតទៅ នឹងជូនដំណឹងពីការប្រើប្រាស់លើស១ម៉ោង ព្រមទាំងសរសេរបញ្ជាក់ថា ៖ «កុំភ្លេច អ្វីដែលតារាភាពយន្តក្នុង Chatbot និយាយ គឺជាការប្រឌិតទាំងអស់» ។ ក្រុមហ៊ុនបង្កើតវិធានការថ្មី ដើម្បីការពារអ្នកប្រើប្រាស់អាយុក្រោម១៨ឆ្នាំ ៕

ប្រទេសអេស្ប៉ាញ ៖ កាលពីថ្ងៃទី៣១ ខែតុលា ឆ្នាំ២០២៤ សារព័ត៌មាន BBC រាយការណ៍ថា ប្រទេសអេស្ប៉ាញបានរ.ងគ្រោះដោយសារទឹកជំនន់ធ្ងន់ធ្ងរបំផុតក្នុងរយៈពេល៥១ឆ្នាំមកនេះ គិតចាប់តាំងពីឆ្នាំ១៩៧៣ ដែលពេលនោះ មានពលរដ្ឋអេស្ប៉ាញស្លា.ប់អស់ជាង១៥០នាក់ ។

ក្រោយពីភ្លៀងធ្លាក់ខ្លាំងនៅតំបន់ Valencia ស្ថិតនៅភាគខាងកើតប្រទេសអេស្ប៉ាញ កាលពីថ្ងៃទី២៩ ខែតុលា កន្លងមក បានបណ្តាលឱ្យមានទឹកជំនន់ភ្លាមៗក្នុងតំបន់ជាច្រើន ហើយចំនួនមនុស្សស្លាប់ដោយសារទឹកជំនន់បានកើនឡើងដល់៩៥នាក់ ។ ក្រៅពីនេះ មានមនុស្សជាច្រើននាក់ទៀតបាត់ខ្លួន ខណៈអាជ្ញាធរសន្និដ្ឋានថា ចំនួនមនុស្សស្លាប់នឹងកើនឡើងបន្ថែមទៀត ។

ប្រធានាធិបតីអេស្ប៉ាញ លោក Pedro Sanchez បានប្រកាសកាន់ទុក្ខដល់ជនរងគ្រោះដោយសារទឹកជំនន់នៅទូទាំងប្រទេស រយៈពេល៣ថ្ងៃ ព្រមទាំងអំពាវនាវឱ្យពលរដ្ឋប្រុងប្រុងប្រយ័ត្នគ្រោះថ្នាក់ផងដែរ ។ លោកប្រធានាធិបតីសន្យាថា រដ្ឋាភិបាលនឹងជួយសង្គ្រោះ និងពុំបោះបង់ពលរដ្ឋទេ ។

ចំណែកកងទ័ព និងភ្នាក់សង្គ្រោះបន្ទាន់បានសហការគ្នាជួយស្វែងរកជនរងគ្រោះជាច្រើននាក់ ដែលជាប់ក្នុងអគារ, លំនៅឋាន និងជាប់ក្នុងរថយន្តចេញពុំរួច ។ ពលរដ្ឋដែលរួចជីវិតពីគ្រោះថ្នាក់ដោយសារទឹកជំនន់និយាយថា ពួកគេភ័យខ្លាចណាស់ ពីព្រោះអេស្ប៉ាញខានមានទឹកជំនន់ខ្លាំងបែបនេះយូរហើយ ។

សារព័ត៌មានបរទេសរាយការណ៍ទៀតថា តំបន់ Valencia បានរងគ្រោះដោយសារទឹកជំនន់ធ្ងន់ធ្ងរបំផុត ដែលមានពលរដ្ឋស្លាប់ចំនួន៩២នាក់ និង៣នាក់ទៀតមកពីទីក្រុងផ្សេង ។ បុរសអង់គ្លេស អាយុ៧១ឆ្នាំ គឺជាជនរងគ្រោះម្នាក់ដែលរងរបួសធ្ងន់ធ្ងរជាងគេ បើទោះជាភ្នាក់ងារសង្គ្រោះបាននាំចេញពីលំនៅឋានក្តី ប៉ុន្តែគ្រូពេទ្យពុំអាចជួយសង្គ្រោះជីវិតបាន ។

ការិយាល័យឧតុនិយមអេស្ប៉ាញឱ្យដឹងថា ទីក្រុងឈិវ៉ា ដែលស្ថិតនៅក្បែរតំបន់ Valencia មានភ្លៀងធ្លាក់យ៉ាងខ្លាំង ហើយបរិមាណទឹកភ្លៀងក្នុងទីក្រុងនេះត្រឹមរយៈពេល៨ម៉ោង គឺស្មើបរិមាណទឹកភ្លៀងរយៈពេល១ឆ្នាំ ។ ទឹកភ្លៀងធ្លាក់យ៉ាងខ្លាំងលើកនេះ គឺដោយសារឥទ្ធិពលខ្យល់ព្យុះ ។

បើតាមរូបភាពផ្សព្វផ្សាយក្នុងបណ្តាញសង្គម គេបានឃើញរថយន្តជាច្រើនគ្រឿងអណ្តែតក្នុងទឹកគរលើគ្នា ខណៈផ្លូវធ្វើដំណើរត្រូវបានខូចខាតដោយសារទឹកជំនន់ ។ រីឯផ្លូវរថភ្លើងទៅកាន់ទីក្រុងម៉ាដ្រីក និងទីក្រុងបាសេឡូណា, សាលារៀន និងទីកន្លែងធ្វើការមួយចំនួនបានផ្អាកដំណើរការ ៕

ប្រទេសជប៉ុន៖ អស់រយៈពេល ១៣០ ឆ្នាំហើយភ្នំ Fuji របស់ជប៉ុនគឺមិនដែលជួបប្រទះនឹងបាតុភូតចម្លែកនេះទេ ប៉ុន្តែទើបតែចុងឆ្នាំ ២០២៤ នេះស្រាប់តែជួបហេតុការណ៍ប្លែកមួយ។
ជាធម្មតា កំពូលភ្នំខ្ពស់បំផុតក្នុងប្រទេសជប៉ុននឹងត្រូវបានគ្របដណ្តប់ដោយព្រិលសនៅដើមខែតុលា ប៉ុន្តែរហូតមកដល់ពេលនេះគឺចុងខែតុលាហើយ កំពូលភ្នំ Fuji នៅតែមិនមានព្រិលធ្លាក់ទាល់តែសោះ ដែលបណ្តាលឱ្យមានការព្រួយបារម្ភយ៉ាងខ្លាំងអំពីផលប៉ះពាល់នៃវិបត្តិអាកាសធាតុ។ ដូច្នេះនៅឆ្នាំនេះ ភ្នំហ្វូជីដែលមានកម្ពស់ ៣,៧៧៦ ម៉ែត្របានទទួលព្រិលចុងក្រោយបង្អស់ចាប់តាំងពីអ្នកជំនាញបានចាប់ផ្តើមកត់ត្រាទិន្នន័យកាលពី ១៣០ ឆ្នាំមុន។

ការធ្លាក់ព្រិលដំបូងបានបង្ហាញពីការមកដល់នៃរដូវរងា នេះបើយោងតាមទីភ្នាក់ងារឧតុនិយមជប៉ុន ជាធម្មតាព្រិលចាប់ផ្តើមធ្លាក់នៅលើភ្នំ Fuji នៅប្រហែលថ្ងៃទី ២ ខែតុលា។ ហើយកាលពីឆ្នាំមុន ព្រិលគឺបានធ្លាក់នៅថ្ងៃទី ៥ ខែតុលា ប៉ុន្តែភាគច្រើនវាក៏បានរលាយទៅវិញនៅដើមខែវិច្ឆិកា ដោយសារសីតុណ្ហភាពក្តៅ។ ការិយាល័យឧតុនិយមក្នុងតំបន់ Kofu ប្រទេសជប៉ុន បានប្រកាសពីការធ្លាក់ព្រិលលើកដំបូងនៅលើភ្នំ Fuji ជារៀងរាល់ឆ្នាំចាប់តាំងពីឆ្នាំ ១៨៩៤។ ប៉ុន្តែទើបតែឆ្នាំនេះទេ ពួកគេមិនទាន់បានប្រកាសនៅឡើយ ដោយលើកឡើងពីអាកាសធាតុក្តៅខុសពីធម្មតា។

លោក Shinichi Yanagi មន្ត្រីឧតុនិយមនៅការិយាល័យ Kofu បាននិយាយថា “មូលហេតុដែលភ្នំ Fuji នៅឆ្នាំនេះមិនមានព្រិល គឺដោយសារតែសីតុណ្ហភាពខ្ពស់នៅក្នុងប្រទេសជប៉ុននៅតែបន្តចាប់តាំងពីរដូវក្តៅ ហើយវានៅតែមានភ្លៀងនៅឡើយ ដូច្នេះមិនមានព្រិលធ្លាក់នោះទេ”។ ទោះបីឆ្នាំនេះមិនមានព្រិលធ្លាក់ក៏ដោយ ក៏កន្លែងនេះនៅតែមានភ្ញៀវទេសចរមកទស្សនារាប់លាននាក់។ គួរបញ្ជាក់ដែរថា ភ្នំ Fuji មានកម្ពស់ ៣,៧៧៦ ម៉ែត្រ ស្ថិតនៅចន្លោះខេត្តទាំងពីរនៃ Yamanashi និង Shizuoka របស់ប្រទេសជប៉ុន ដែលជាតំបន់បេតិកភណ្ឌពិភពលោករបស់អង្គការយូណេស្កូ និងជានិមិត្តរូបនៃប្រទេសជប៉ុន។

ជាធម្មតាភ្នំនេះត្រូវបានគ្របដណ្តប់ដោយព្រិលសម្រាប់ភាគច្រើននៃឆ្នាំ និងជាកន្លែងទាក់ទាញភ្ញៀវទេសចរដ៏សំខាន់មួយ។ កាលពីខែកក្កដា អាជ្ញាធរបានដាក់ពន្ធលើវិស័យទេសចរណ៍ និងបានណែនាំបទប្បញ្ញត្តិថ្មី ដើម្បីគ្រប់គ្រងហ្វូងមនុស្សកុំឱ្យមានភ្ញៀវទេសចរកកកុញពេក ដោយតម្រូវឱ្យអ្នកឡើងភ្នំត្រូវបង់ប្រាក់ ២,០០០ យ៉េន (ប្រមាណជាង ១៣ ដុល្លារអាមេរិកក្នុងម្នាក់) សិនទើបអាចមកទស្សនាទីនេះបាន ដូច្នេះបច្ចុប្បន្នមានអ្នកឡើងភ្នំអតិបរមា ៤,០០០ នាក់ក្នុងមួយថ្ងៃ៕

បរទេស៖ សណ្ឋាគារ Dubrovnik កម្ពស់ ១០ ជាន់ស្រាប់តែដួលរលំភ្លាមៗបណ្តាលឱ្យមនុស្សម្នាក់ស្លា.ប់ និងជាច្រើននាក់ទៀតរងរបួស រួមទាំងជាប់គាំងក្នុងគំនរបាក់បែក។
យោងតាមសារព័ត៌មានបរទេស CNN ហេតុការណ៍បាក់រលំសណ្ឋាគារ ១០ ជាន់នេះ ទើបតែកើតឡើងថ្មីៗទេ ដែលសណ្ឋាគារ Dubrovnik គឺស្ថិតនៅក្នុងទីក្រុង Villa Gessell ចម្ងាយប្រហែល ៣៧០ គីឡូម៉ែត្រពីទីក្រុង Buenos Aires ប្រទេសអាហ្សង់ទីន។

បើតាមការជូនដំណឹងរបស់អាជ្ញាធរមូលដ្ឋាន រូបភាពនៃកន្លែងកើតហេតុ បង្ហាញពីគំនរកម្ទេចថ្មដ៏ធំសម្បើម ដែក និងអគារជាច្រើនជាន់នៃសណ្ឋាគារបានដួលរលំ បាក់បែក បណ្តាលឱ្យខូចខាតយ៉ាងធ្ងន់ធ្ងរដល់អគារជិតខាង។ ហើយជញ្ជាំងនៃអគារដែលនៅជុំវិញនោះក៏បានបាក់ស្រុត និងរងការខូចខាតយ៉ាងធ្ងន់ធ្ងរផងដែរ។ យោងតាមរបាយការណ៍ មនុស្សម្នាក់បានស្លា.ប់ដែលជាបុរសអាយុ ៨០ឆ្នាំ ខណៈមានមនុស្សជាច្រើននាក់ទៀតបានកំពុងរងរបួស និងជាប់ក្នុងកំទេចកំទី។

មូលហេតុដែលសណ្ឋាគារ Dubrovnik កម្ពស់ ១០ ជាន់ស្រាប់តែដួលរលំភ្លាមៗនោះគឺដោយសារសំណង់សណ្ឋាគារមិនមានអាជ្ញាប័ណ្ណប្រតិបត្តិការត្រឹមត្រូវ បណ្តាលឱ្យផ្ទុះ ការសាងសង់ខុសបច្ចេកទេស រួមទាំងការជួសជុលខុសច្បាប់ ខណៈគម្រោងនេះត្រូវបានផ្អាកតាំងពីខែសីហាមកម្លេះ ប៉ុន្តែនៅតែមានកម្មករមកជួសជុល ធ្វើឱ្យជួបហេតុការណ៍គ្រោះថ្នាក់នេះតែម្តង។

បច្ចុប្បន្នសេវាកម្មសង្គ្រោះបន្ទាន់ រួមទាំងអ្នកពន្លត់អគ្គីភ័យ និងប៉ូលីស កំពុងធ្វើការនៅកន្លែងកើតហេតុ។ បុគ្គលិកសង្គ្រោះប្រហែល ៣០០ នាក់ ដោយមានការគាំទ្រពីអ្នកពន្លត់អគ្គីភ័យ អ្នកស៊ើបអង្កេត និងសត្វឆ្កែ sniffer ក៏កំពុងស្វែងរកជាបន្ទាន់សម្រាប់ជនរងគ្រោះដែលជាប់នៅក្រោមគំនរបាក់បែកផងដែរ។ គួរបញ្ជាក់ដែរថា សណ្ឋាគារ Dubrovnik ត្រូវបានបើកដំបូងនៅក្នុងឆ្នាំ ១៩៨៦ ហើយកំពុងស្ថិតក្នុងដំណើរការជួសជុល និងកែលម្អ៕

ប្រទេសចិន ៖ កាលពីថ្ងៃទី២៩ ខែតុលា ឆ្នាំ២០២៤ សារព័ត៌មានបរទេសរាយការណ៍ថា បុរសចិនម្នាក់ខឹងយ៉ាងខ្លាំង ដោយសារខំចំណាយប្រាក់អស់យ៉ាងច្រើនទិញរថយន្តអគ្គិសនី Tesla មួយទឹកមកជិះ បែរជាពុំអាចសាកថ្មបាន ។ បុរសនេះមើលឃើញថា ខ្លួនពុំអាចជិះរថយន្តនេះក្នុងទីក្រុង ក៏បានយកសត្វគោមកជួយអូសរថយន្តតាមផ្លូវ ។

បុរសរូបនេះរស់នៅទីក្រុងវៃហ្វាង ខេត្តសានទុង ប្រទេសចិន ទើបតែបានទិញរថយន្ត Tesla Model 3 Performance តាមរយៈគេហទំព័រទិញ-លក់រថយន្តមួយទឹកដ៏ល្បីឈ្មោះ Gauzi ក្នុងតម្លៃជាង១ម៉ឺន៣ពាន់ដុល្លារអាមេរិក ។

ក្រោយពីម្ចាស់រថយន្តប្រើប្រាស់រថយន្តមិនយូរប៉ុន្មាន ស្រាប់តែវាចេញសញ្ញាថា ពុំអាចសាកថ្មបានទេ ហើយម្ចាស់រថយន្តគិតថា វាមានបញ្ហាថ្ម ។ ក្រោយមក ប៉ុន្តែដោយសារពុំអាចធ្វើការចរចាមួយគេហទំព័រ Gauzi និងក្រុមហ៊ុន Tesla បាន ម្ចាស់រថយន្តក៏សម្រេចចិត្តយកគោមកអូសរថយន្តនៅតាមផ្លូវដើម្បីតវ៉ា និងចង់ឱ្យមហាជនចាប់អារម្មណ៍ជួយរកយុត្តិធម៌ ។

ក្នុងវីដេអូដែលបានចែកចាយក្នុងបណ្តាញសង្គម គេបានឃើញម្ចាស់រថយន្តបាញ់ថ្នាំពណ៌ខ្មៅលើរថយន្ត ដែលមានន័យថា ចាញ់បោកគេហទំព័រទិញ-លក់រថយន្តមួយទឹក ព្រមទាំងមានសត្វគោអូសរថយន្តផងដែរ ។ វាបានធ្វើឱ្យអ្នកដើរទៅមកចាប់អារម្មណ៍យ៉ាងខ្លាំង ហើយក៏ថតបង្ហោះក្នុងបណ្តាញសង្គម ។

ចំណែកបុគ្គលិករបស់គេហទំព័រ Gauzi ផ្នែកសេវាអតិថិជន និយាយថា រថយន្តទាំងអស់បានឆ្លងកាត់ការត្រួតពិនិត្យអស់ហើយមុនពេលលក់ ។ អតិថិជនរូបនេះបានទិញរថយន្តមួយទឹកមានគុណភាពទាប ហើយអតិថិជនត្រូវទទួលខុសត្រូវជួសជុលដោយខ្លួនឯង ។

ក្រោយមក គេហទំព័រនេះប្រកាសថា ក្រុមហ៊ុនបានជូនដំណឹងពីការត្រួតពិនិត្យគុណភាពរថយន្តយ៉ាងច្បាស់លាស់ហើយថា រថយន្តនេះអាចបើកបរក្នុងចម្ងាយផ្លូវ២៨ម៉ឺនគីឡូម៉ែត្រ ហើយរថយន្តមានប្រវត្តិខូចខាតធ្ងន់ធ្ងរ ។ ហេតុនេះ អតិថិជនគួរតែពិចារណាឱ្យបានល្អមុនសម្រេចចិត្តទិញរថយន្ត ប៉ុន្តែអតិថិជនប្រាប់ថា នឹងទិញវា ។

ប៉ុន្តែក្រោយពេលអតិថិជនទិញរថយន្តរួចហើយ បែរជាធ្វើខុសកិច្ចសន្យា ដោយសុំប្រគល់រថយន្តមកឱ្យក្រុមហ៊ុនវិញ ហើយនិយាយថា ខ្លួនពុំអាចបើករថយន្តបានទេ ហើយសាកថ្មក៏អត់ចូល ។ អតិថិជនបានយកគោមកអូសរថយន្តដើរតាមផ្លូវដើម្បីទាមទារសិទ្ធិ ដូច្នេះ ខាងគេហទំព័រ Gauzi សូមបញ្ជាក់ថា រថយន្តនេះអាចសាកថ្ម និងបើកបរបានធម្មតា ហើយវាពុំដូចការលើកឡើងក្នុងបណ្តាញសង្គមទេ ៕

ប្រទេសម៉ិកស៊ិក ៖ កាលពីថ្ងៃទី៣០ ខែតុលា ឆ្នាំ២០២៤ សារព័ត៌មានបរទេសរាយការណ៍ថា និស្សិតមួយក្រុមបានមកស្រាវជ្រាវនៅក្នុងព្រៃជ្រៅ ហើយពួកគេក៏ប្រទះឃើញទីក្រុងបុរាណយ៉ាងធំមួយដោយចៃដន្យ ដែលទីក្រុងនេះបានលិចបាត់ក្នុងព្រៃរបស់ប្រទេសម៉ិកស៊ិកអស់រយៈពេលរាប់រយឆ្នាំមកហើយ ។

ក្រុមនិស្សិតផ្នែកបុរាណវិទ្យាបានប្រទះឃើញទីក្រុងរបស់ជនជាតិភាគតិចម៉ាយ៉ា ដែលទីក្រុងនេះបានលិចបាត់ក្នុងព្រៃរបស់រដ្ឋ Campeche ស្ថិតនៅភាគអាគ្នេយ៍ប្រទេសម៉ិកស៊ិក ហើយក្រុមនិស្សិតបានដាក់ឈ្មោះទីក្រុងនេះថា «Valeriana» ។

ក្រុមនិស្សិតបានប្រើប្រាស់បច្ចេកវិទ្យាស្រាវជ្រាវដោយឡាស៊ែរឈ្មោះថា «Lidar» និងគូសផែនទីអគារកប់នៅក្រោមព្រៃឈើ ហើយពួកគេក៏បានរកឃើញអគាររហូតដល់៦.៧៦៤កន្លែង ព្រមទាំងពីរ៉ាមីត, ទីលានលេងកីឡា, ផ្លូវតភ្ជាប់ពីតំបន់មួយទៅតំបន់មួយ, មហោស្រព និងអាងស្តុកទឹក ។ ទីក្រុងនេះលាតសន្ធឹងនៅលើផ្ទៃដីដ៏ធំល្ហល្ហេវ និងមានទីតាំងនៅក្បែរទីក្រុង Edinburgh របស់ប្រទេសស្កុតឡេន ។

ក្រុមនិស្សិតជឿជាក់ថា វាជាប្រភពអរិយធម៌របស់ជនជាតិភាគតិចម៉ាយ៉ា ដែលមានជំនាញសាងសង់ស្ថិតក្នុងលំដាប់ទី២ នៅអាមេរិកឡាទីន បន្ទាប់ពីទីក្រុង Calakmul ។

លោក Luke Auld-Thomas និស្សិតមកពីសាកលវិទ្យាល័យ Tulane សហរដ្ឋអាមេរិក បានប្រទះឃើញទីក្រុងនេះមុនគេ ដោយបានឃើញទិន្នន័យរបស់ទីក្រុងក្នុង Google ។ លោក Luke និយាយថា ៖ «ខ្ញុំស្វែងរកព័ត៌មានមួយចំនួនក្នុង Google ហើយរកឃើញទិន្នន័យស្រាវជ្រាវដោយឡាស៊ែររបស់អង្គការការពារបរិស្ថានម៉ិកស៊ិក» ។

ការស្រាវជ្រាវដោយបច្ចេកវិទ្យាឡាស៊ែរ គឺជាការបាញ់ឡាស៊ែរពីយន្តហោះចុះក្រោមដើម្បីគូសផែនទីនៅផ្នែកខាងក្រោម ។ វាផ្អែកលើការវាស់វែងពេលវេលា ដែលឡាស៊ែរប្រើប្រាស់ត្រឡប់មកវិញ ។

ប៉ុន្តែពេលលោក Luke ប្រមូលទិន្នន័យស្រាវជ្រាវក្នុងតំបន់នេះតាមវិធីសាស្ត្ររបស់អ្នកបុរាណវិទូ ស្រាប់តែលោកឃើញអ្វីម្យ៉ាងដែលអ្នកដទៃពុំឃើញ គឺទីក្រុងបុរាណដ៏ធំមួយ ។ ទីក្រុងនេះធ្លាប់មានមនុស្សរស់នៅពី៣ម៉ឺននាក់ ទៅ៥ម៉ឺននាក់ គិតចាប់ពីឆ្នាំ៧៥០ ដល់ឆ្នាំ៨៥០ ហើយចំនួននេះច្រើនជាងចំនួនពលរដ្ឋរស់នៅក្នុងតំបន់នាពេលបច្ចុប្បន្ន ។

ទីក្រុងបុរាណ Valeriana ស្ថិតនៅឆ្ងាយពីផ្លូវធំ និងនៅក្បែរទីក្រុង Xpujil ដែលជាកន្លែងរស់នៅបច្ចុប្បន្នរបស់ជនជាតិភាគតិចម៉ាយ៉ា ។ បើដើរពីទីក្រុង Xpujil ទៅកាន់ទីក្រុងបុរាណ គឺចំណាយពេលត្រឹមតែ១៥នាទីប៉ុណ្ណោះ ។

សាស្ត្រាចារ្យឈ្មោះ Marcello Canuto ដែលបានចូលរួមសរសេរការរកឃើញទីក្រុងបុរាណនិយាយថា ការរកឃើញទីក្រុង Valeriana នឹងជួយផ្លាស់ប្តូរការគិតរបស់ពលរដ្ឋនៅបណ្តាប្រទេសលោកខាងលិច ដែលជឿថា តំបន់ត្រូពិកបាត់បង់អរិយធម៌ ។ ប៉ុន្តែការពិត វាជាទីន្លែងមួយលើពិភពលោក ដែលពោរពេញទៅដោយវប្បធម៌ស្មុគស្មាញ ។

ប៉ុន្តែក្រុមនិស្សិតពុំបានបញ្ជាក់ច្បាស់លាស់ថា តើអ្វីជាមូលហេតុធ្វើឱ្យទីក្រុងបុរាណដ៏ធំនេះត្រូវគេបោះបង់ចោល ប៉ុន្តែពួកគេបញ្ជាក់ថា ទីក្រុងបុរាណស្ថិតនៅតំបន់រាំងស្ងួត ។ ដូច្នេះ វាអាចជាមូលហេតុធ្វើឱ្យមនុស្សក្នុងទីក្រុងផ្លាស់ប្តូរទៅរស់នៅតំបន់ផ្សេង ៕

ប្រទេសចិន ៖ សារព័ត៌មានរ៉យទ័របានរាយការណ៍ កាលពីថ្ងៃទី២៩ ខែតុលា ឆ្នាំ២០២៤ ថា លោក Zhang Yiming ជាស្ថាបនិករបស់ ByteDance ដែលជាក្រុមហ៊ុនមេរបស់ TikTok ត្រូវបានគេចាត់ចំណាត់ថ្នាក់ជាមហាសេដ្ឋីមានទ្រព្យសម្បត្តិច្រើនបំផុតនៅប្រទេសចិន ក្នុងឆ្នាំ២០២៤ គឺទ្រព្យសម្បត្តិរបស់លោកបានកើនឡើងដល់៤៩.៣០០លានដុល្លារអាមេរិក ។

លោក Zhang មានអាយុ៤១ឆ្នាំ បានលាឈប់ពីតំណែងជានាយកប្រតិបត្តិក្រុមហ៊ុន ByteDance កាលពីឆ្នាំ២០២១ ។ លោកជាបុគ្គលទី១៨ ដែលទទួលបានតំណែងជាមហាសេដ្ឋីមានទ្រព្យសម្បត្តិច្រើនបំផុតរបស់ចិន ដែលជាការចាត់ចំណាត់ថ្នាក់របស់ Hurun China Rich List ។

តម្លៃទ្រព្យសម្បត្តិរបស់លោក Zhang បានកើនឡើងលើសទ្រព្យសម្បត្តិមហាសេដ្ឋីឈ្មោះ Zhong Shanshan ជាស្ថានិកក្រុមហ៊ុនផលិតទឹករ៉ែម៉ាក Nongfu Sunquan ។ ហេតុនេះ មហាសេដ្ឋី Zhong បានធ្លាក់មកនៅចំណាត់ថ្នាក់ទី២ ដោយសារទ្រព្យសម្បត្តិធ្លាក់ចុះ២៤% គឺនៅសល់ត្រឹមតែ៤៧.៩០០លានដុល្លារអាមេរិក ។

បើទោះជាលោក Zhang បានប្រឈមនឹងឧបសគ្គផ្លូវច្បាប់ពាក់ព័ន្ធនឹងទ្រព្យសម្បត្តិនៅអាមេរិក ប៉ុន្តែប្រាក់ចំណូលនៅទូទាំងពិភពលោករបស់ក្រុមហ៊ុន ByteDance បានកើនឡើងរហូតដល់៣០% កាលពីឆ្នាំ២០២៣ គឺស្មើនឹង១១ម៉ឺនលានដុល្លារអាមេរិក ។ ហេតុនេះ វាបានជួយឱ្យទ្រព្យសម្បត្តិផ្ទាល់ខ្លួនរបស់លោក Zhang កើនឡើងផងដែរ ។

ចំណែកមហាសេដ្ឋីចិនមានទ្រព្យសម្បត្តិច្រើនស្ថិតក្នុងចំណាត់ថ្នាក់ទី៣ នៅឆ្នាំ២០២៤ គឺបានទៅ Pony Ma ជាស្ថាបនិក Tencent ។ រីឯមហាសេដ្ឋីឈ្មោះ Colin Huang ជាស្ថាបនិក PDD Holdings ធ្លាក់មកនៅចំណាត់ថ្នាក់ទី៤ បើទោះជាប្រាក់ចំណូលពីគេហទំព័រពាណិជ្ជកម្មអេឡិចត្រូនិក Pinduoduo និង Temu កើនឡើងក្តី ។

ចំនួនមហាសេដ្ឋីចិនដែលមានឈ្មោះក្នុងការចាត់ចំណាត់ថ្នាក់របស់ Hurun China Rich List ក្នុងឆ្នាំ២០២៤ បានថយចុះ១៤២នាក់ គឺនៅសល់ត្រឹមតែ៧៥៣នាក់ប៉ុណ្ណោះ ។ នេះចាត់ទុកថា ការចាត់ចំណាត់ថ្នាក់មហាសេដ្ឋីចិនក្នុងឆ្នាំ២០២៤ គឺតិចជាងឆ្នាំ២០២១ ។

Rupert Hoogewerf ជាប្រធាន Hurun China Rich List បញ្ជាក់ថា សេដ្ឋកិច្ច និងទីផ្សារហ៊ុនចិនកំពុងប្រឈមនឹងការលំបាក ហើយអាជីវកម្មដែលធ្លាក់ចុះទ្រព្យសម្បត្តិខ្លាំងបំផុត គឺផ្នែកអចលនទ្រព្យ ខណៈក្រុមហ៊ុនផលិតឧបករណ៍អេឡិចត្រូនិកបានរីកចម្រើនយ៉ាងឆាប់រហ័ស ។ ជាក់ស្តែង Lei Jun ជាស្ថាបនិក Xiaomi មានទ្រព្យសម្បត្តិកើនឡើងដល់៥ពាន់លានដុល្លារអាមេរិក នៅឆ្នាំ២០២៤ ៕