ប្រទេសថៃ ៖ វាបានធ្វើឱ្យអ្នកស្រុកភ្ញាក់ផ្អើលយ៉ាងខ្លាំងក្រោយពីមានការចែកចាយរូបភាពថតជាប់ប្រែ.ត ក្នុងថ្ងៃចេញព្រះវស្សានៅប្រទេសថៃ ដែលរូបភាពនេះមើលទៅ គួរឱ្យព្រឺសម្បុរខ្លាំងណាស់ ។ រីឯព្រះចៅអធិការវត្តមានសង្ឃដីកាថា នេះជារឿងធម្មតាទេ ដែលខ្មោ.ច ឬប្រែ.ត តែងតែចេញមកសុំបុណ្យ ។

កាលពីថ្ងៃទី៥ ខែវិច្ឆិកា ឆ្នាំ២០២៤ ក្រុមអ្នកសារព័ត៌មានបានធ្វើដំណើរទៅកាន់វត្តមួយកន្លែងនៅស្រុកឡង ខេត្តព្រែ ក្រោយមានអ្នកបង្ហោះរូបភាពប្រែតក្នុងបណ្តាញសង្គម និងសរសេរថា ប្រែតមានពិតប្រាកដ រីឯបុណ្យ-បាប ក៏មានពិតប្រាកដ ។ អ្នកលេងបណ្តាញសង្គមម្នាក់បានចូលបញ្ចេញមតិថា រូបភាពនេះថតនៅវត្តមួយក្នុងខេត្តព្រែ ។

អ្នកស្រុកបានជជែកគ្នាពីរឿងនេះនៅតាមហាងលក់ដូរ និងក្នុងវត្ត ហើយក្រុមការងារសារព័ត៌មានក៏បានជួបជាមួយព្រះចៅអធិការវត្ត និងព្រះសង្ឃ១អង្គ ដែលបានថតរូបជាប់ប្រែត ។ ព្រះអង្គរៀបរាប់ថា រូបភាពនេះថតកាលពីពេលយប់ថ្ងៃចេញព្រះវស្សា ថ្ងៃទី១៧ ខែតុលា ឆ្នាំ២០២៤ ។

ក្រោយពីព្រះអង្គនិមន្តពីសូត្រធម៌បុណ្យសព ក៏បានអង្គុយលើកៅអីថ្មក្បែរកុដ្ឋ ហើយយកទូរស័ព្ទដៃមកថតព្រះច័ន្ទពេញវង្ស និងថតបរិវេណក្បែរវត្ត ។ ពេលនោះ ព្រះអង្គឮសំឡេងសត្វស្លាបយំ ឆ្កែលូតាមផ្លូវ និងឃើញស្រមោលខ្មៅនៅទិសខាងកើត ទើបព្រះអង្គថតស្រមោលខ្មៅនេះ ។ ពេលបើកទូរស័ព្ទមើល ស្រាប់តែឃើញប្រែតក្នុងនោះ ទើបព្រះអង្គយករូបនេះមកឱ្យព្រះចៅអធិការវត្តមើល ។

ព្រះចៅអធិការវត្ត «ណាគេ» ព្រះនាម ប្រាសីទ វរ៉ាកាន មានសង្ឃដីកាថា វាជារឿងធម្មតាទេ ពីព្រោះប្រែតតែងតែបង្ហាញខ្លួនក្នុងវត្តយូរហើយ គឺព្រះចៅអធិការវត្តធ្លាប់បានឮសំឡេងប្រែតយំកាលពីឆ្នាំ២០០០ ។ ប្រែតនេះបានមកសុំបុណ្យ រហូតដល់វត្តរៀបចំពិធីសូត្រធម៌ឧទ្ទិសកុសលឱ្យ រីឯការថតជាប់ប្រែតលើកនេះ គឺពាក់ព័ន្ធនឹងការកើត ចាស់ ឈឺ ស្លាប់ ហើយបង្ហាញថា បុណ្យ-បាបមានពិតមែន ហើយឋានសួគ៌ និងនរក ក៏មានដែរ ។

វត្តនេះមានរឿងរ៉ាវប្លែកៗតាំងពីយូរមកហើយ ដោយអ្នកស្រុកនិយាយបន្តគ្នាថា កាលពីជាង១០០ឆ្នាំមុន ក្មេងវត្តម្នាក់បានយកធ្នូមកបាញ់សត្វព្រៃបណ្តាលឱ្យងាប់ រួចហើយយកសាច់របស់វាមកធ្វើម្ហូបបរិភោគជាមួយអ្នកស្រុក និងព្រះសង្ឃ រីឯព្រះចៅអធិការវត្តពុំជ្រាបទេ ។ ក្រោយមក អ្នកដែលបរិភោគសាច់សត្វ និងគ្រួសារពួកគេបានស្លាប់អស់ពាក់កណ្តាលភូមិ រហូតដល់អ្នកស្រុកខ្លាច និងផ្លាស់ប្តូរទីលំនៅ ។

អ្នកស្រុកបាននាំគ្នាធ្វើពិធីសុំខមាលទោសដើម្បីឱ្យមានសេចក្តីសុខក្នុងភូមិឡើងវិញ ហើយក៏មានការរៀបចំពិធីនៅក្បែររបងវត្តរហូតមកដល់បច្ចុប្បន្ន ដោយសារអ្នកស្រុកនៅតែមានជំនឿ ៕

Rolls-Royce Phantom Goldfinger គឺជារថយន្តទំនើបស្រោបដោយមាសមានតែមួយគត់ក្នុងលោក ជាមួយតម្លៃខ្ពស់បំផុតមិនគួរឱ្យជឿ។
រថយន្តដ៏ប្រណីតនេះមានតែមួយប៉ុណ្ណោះជាមួយនឹងជម្រើសពិសេសដែលត្រូវបានបំផុសគំនិតដោយរថយន្តបុរាណ ១៩៣៧ Phantom III Sedanca de Ville។ វាត្រូវបានដាក់បង្ហាញនៅក្នុងកម្មវិធីមួយ ដើម្បីអបអរសាទរខួបលើកទី ៦០ នៃការចេញផ្សាយខ្សែភាពយន្តខ្នាតធំ Goldfinger អំពីចារកម្ម James Bond 007 ។

រថយន្តនេះមានពីរពណ៌លាយគ្នាគឺលឿង និងខ្មៅ ដែលមានលក្ខណៈស្រដៀងនឹងរថយន្តបុរាណ Phantom III Sedanca de Ville។ នៅខាងមុខឡានផ្នែកខាងក្រៅ មានក្រឡាចត្រង្គដ៏ល្បីល្បាញជាមួយនិមិត្តសញ្ញា Spirit of Ecstasy ស្រោបដោយមាស ១៨ ការ៉ាត់។ មិនត្រឹមតែលេចធ្លោនៅផ្នែកខាងក្រៅប៉ុណ្ណោះទេ ផ្នែកខាងក្នុងរបស់ Rolls-Royce Phantom Goldfinger ក៏ត្រូវបានបង្កើតឡើងយ៉ាងល្អប្រណីតជាមួយនឹងព័ត៌មានលម្អិតអំពីមាសផងដែរ។

ដូច្នេះកន្លែងដែលលេចធ្លោបំផុតក្នុងរថយន្តនេះគឺរបារមាស ១៨ ការ៉ាត់ភ្លឺចាំង ត្រូវបានរក្សាទុកនៅក្នុងបន្ទប់សម្ងាត់នៅលើកុងសូល ហើយបន្ទប់ផ្ទុកខាងមុខ និងខាងក្រោយ ក៏ដូចជាបន្ទប់ស្រោមដៃក៏ត្រូវបានគ្របដណ្តប់ដោយពណ៌មាសផងដែរ។ ទន្ទឹមនឹងនេះតុបរិភោគអាហារក៏ស្រោបដោយមាស ២២ ការ៉ាត់ និងពិដាន Starlight បង្កើតមេឃផ្កាយដ៏អស្ចារ្យបំផុតផងដែរ ហើយបន្ទះជំហានទ្វារក៏ត្រូវបានរចនាឡើងដូចជារបារមាសទៀតផង។

លើសពីនេះ សំណាញ់ប្រព័ន្ធសំឡេង រន្ធខ្យល់ គ្រាប់ចុចមុខងារ និងចានកាតដែលឆ្លាក់ដោយលេខ VIN 007 សុទ្ធតែស្រោបដោយមាសទាំងអស់។ ផ្នែកខាងក្នុងរបស់ Rolls-Royce Phantom Goldfinger ប្រើស្បែកពណ៌ខៀវក្រម៉ៅ រួមបញ្ចូលគ្នាជាមួយឈើ Royal Walnut ដ៏ល្អឥតខ្ចោះ។ កៅអីខាងក្រោយរបស់រយន្តនេះក៏ត្រូវបានរចនាឡើងក្នុងការកំណត់រចនាសម្ព័ន្ធ Serenity ជាមួយនឹងថ្នេរផ្ទុយគ្នា និងនិមិត្តសញ្ញាពណ៌លឿងបង្កើតជារូបរាងស្រស់ស្អាតបំផុត។

Rolls-Royce Phantom Goldfinger ប្រើម៉ាស៊ីន 6.75L twin-turbo V12 ដែលផលិតបានកម្លាំងអតិបរមា ៥៧១ សេះ និងកម្លាំងបង្វិលជុំអតិបរមា ៩០០ Nm។ ហេតុនេះតម្លៃរបស់វាត្រូវបានគេដឹងថា មានតម្លៃប្រហែល ៦ លានដុល្លារអាមេរិកឡើងទៅ ដោយបច្ចុប្បន្នរថយន្តនេះត្រូវបានប្រគល់ឱ្យអ្នកប្រមូលរថយន្តដ៏ល្បីល្បាញម្នាក់នៅចក្រភពអង់គ្លេស៕

ប្រទេសចិន៖ កាលពីពេលថ្មីៗនេះប្រជាជននៅតំបន់លំនៅដ្ឋានមួយក្នុងទីក្រុង Dongguan ខេត្ត Guangdong ប្រទេសចិន មានការភ្ញាក់ផ្អើលយ៉ាងខ្លាំង ដោយសារបានឃើញត្រីចម្លែកមួយក្បាលលេចឡើងក្នុងបឹងសិប្បនិម្មិតនៃកន្លែងនេះ។

យោងតាមខ្លឹមសារនៃវីដេអូដែលបានចែករំលែកនៅលើ Weibo បានឱ្យដឹងថា នៅក្នុងបឹងសិប្បនិម្មិតនៃតំបន់លំនៅដ្ឋាន Dongguan ខេត្ត Guangdong ប្រទេសចិន គឺជាតំបន់មួយដែលមានត្រីទឹកសាបរស់នៅជាច្រើនប្រភេទ។ ជារៀងរាល់ថ្ងៃ មានមនុស្សជាច្រើនតែងតែមកឱ្យចំណីត្រី។

ទោះជាយ៉ាងណាក្នុងប៉ុន្មានថ្ងៃថ្មីៗនេះ គេសង្កេតឃើញថា ហ្វូងត្រីហាក់ដូចជាថយចុះ ដោយសារចំនួនត្រីមកបរិភោគចំណីមានតិចខុសធម្មតា។ ក្រោយមកអ្នកភូមិម្នាក់ក៏បានប្រទះឃើញសត្វចម្លែកមួយ ត្រូវបានគេស្គាល់ថាជាត្រីយក្ស Lepisosteus osseus ឬ billy gar ដែលត្រីនេះភាគច្រើនរកឃើញមានតែក្នុងអាមេរិកខាងជើងប៉ុណ្ណោះ។ billy gar ត្រូវបានអ្នកភូមិជនជាតិចិនចាប់បានចំនួន ៣ ក្បាលជាមួយទម្ងន់ជាង ១០០ គីឡូក្រាម និងប្រវែងជាង១ ម៉ែត្រ ដោយពួកវាមានមាត់វែង ធ្មេញមុតស្រួច និងរាងមូល។

ពួកវាត្រូវបានគេហៅថាជា “ឃាតករក្រោមទឹក” ដោយសារវាតែងតែសម្លា.ប់ និងបរបាញ់សត្វក្នុងទឹកជាច្រើនប្រភេទ។ ត្រីយក្ស billy gar មានសមត្ថភាពបំផ្លាញបរិស្ថានធម្មជាតិដោយបំផ្លាញត្រីតូចៗ និងសារពាង្គកាយផ្សេងៗទៀត។ ត្រីនេះច្រើនតែរស់នៅក្នុងភាពឯកោ ចូលចិត្តស្ងប់ស្ងាត់ ហើយជារឿយៗអសកម្ម ប៉ុន្តែនៅពេលឃ្លាន ពួកវាឈ្លានពានខ្លាំង។ មូលហេតុដែលត្រីនេះអាចលុកលុយចូលមកក្នុងទឹកដីប្រទេសចិនបានគឺដោយសារបរិយាកាសធម្មជាតិ។

គួរបញ្ជាក់ដែរថា ត្រីយក្ស Lepisosteus osseus ឬ billy gar មិនមែនជាត្រីចម្លែកនោះទេ ដោយសារត្រីនេះមានវត្តមាននៅអាមេរិកខាងជើងប្រហែល ១០០ លានឆ្នាំមកហើយ គឺជាប្រភេទត្រីចំណាស់ជាងគេបំផុតមួយ នេះបើយោងតាមកំណត់ត្រាវិទ្យាសាស្ត្រ។ billy gar គឺជាត្រីបុរាណ ដែលត្រូវបានគេស្គាល់ថាជាត្រីហ្វូស៊ីលមានជីវិត ឬត្រីបុព្វកាល ព្រោះវារក្សានូវលក្ខណៈរូបវន្តពីបុព្វបុរសបុរាណ។ ដូច្នេះហេតុផលដែលពួកវាអាចរស់បានក្នុងរយៈពេលដ៏យូរបែបនេះ មិនផុតពូជគឺដោយសាររចនាសម្ព័ន្ធរាងកាយពិសេសរបស់ពួកវា៕

ប្រទេសឥណ្ឌា៖ ប្រជាជននៅភាគខាងត្បូងប្រទេសឥណ្ឌាបានទៅព្រះវិហារបរិសុទ្ធ ដើម្បីថ្វាយបង្គំ និងបួងសួងឱ្យលោកស្រី ហារីស ជាប់ឆ្នោតក្លាយជាប្រធានាធិបតីដើមកំណើតឥណ្ឌាដំបូងគេរបស់សហរដ្ឋអាមេរិក។
យោងតាមគេហទំព័របរទេស Time បេក្ខជនប្រធានាធិបតីអាមេរិក Kamala Harris អាយុ ៥៩ឆ្នាំ មានដើមកំណើតអាស៊ី ដោយសារម្តាយរបស់នាងគឺជាជនអន្តោប្រវេសន៍មកពីប្រទេសឥណ្ឌា ហើយឪពុករបស់នាងបានកើតក្នុងគ្រួសារអាហ្វ្រិក-ហ្សាម៉ាអ៊ីក។

អស់រយៈពេលជាយូរមកហើយ អនុប្រធានាធិបតីអាមេរិករូបនេះ បាននិយាយថាខ្លួននាងជាជនជាតិស្បែកខ្មៅ និងអាស៊ី។ ដូច្នេះអ្នកភូមិ Thulasendrapuram ក្នុងរដ្ឋ Tamil Nadu ភាគខាងត្បូងប្រទេសឥណ្ឌា ដែលជាស្រុកកំណើតរបស់ម្តាយ Harris បានទៅព្រះវិហារហិណ្ឌូក្នុងតំបន់ដើម្បីថ្វាយផ្កា និងបួងសួងឱ្យលោកស្រី Harris ឈ្នះការបោះឆ្នោត ក្លាយជាប្រធានាធិបតីដើមកំណើតឥណ្ឌាដំបូងគេរបស់សហរដ្ឋអាមេរិក។

បច្ចុប្បន្នផ្ទាំងបដាដែលមានរូបភាពរបស់លោកស្រី Harris បានលេចឡើងនៅគ្រប់ទីកន្លែងនៅក្នុងភូមិ Thulasendrapuram ប្រទេសឥណ្ឌា។ លោក G. Manikandan ម្ចាស់ហាងតូចមួយបាននិយាយថា “យើងនឹងធ្វើពិធីបួងសួងពិសេសក្នុងព្រះវិហារនៅថ្ងៃនេះ ហើយនឹងប្រារព្ធពិធីមួយប្រសិនបើលោកស្រី Harris ឈ្នះឆ្នោត”។ នៅឯព្រះវិហារនោះ ឈ្មោះរបស់លោកស្រី Harris ត្រូវបានចារនៅលើផ្ទាំងថ្មធំៗ រួមជាមួយឈ្មោះម្តាយ និងជីតារបស់នាង។ នៅខាងក្រៅ អ្នកភូមិបានលើកបដាដ៏ធំមួយសរសេរថា៖ «ជូនពរកូនស្រីនៃស្រុកនេះឈ្នះឆ្នោត»។

លោកតា M. Natarajan ដែលជាបូជាចារ្យបាននិយាយថា “ចៅស្រីនៃភូមិនេះកំពុងឈរឈ្មោះជាប្រធានាធិបតីសហរដ្ឋអាមេរិក។ ព្រះនៅក្នុងព្រះវិហារបរិសុទ្ធមានថាមពលខ្លាំងណាស់ ប្រសិនបើអ្នកអធិស្ឋានដោយស្មោះព្រះនឹងជួយ Harris ឈ្នះឆ្នោតដោយនាំមកនូវដំណឹងល្អដល់ភូមិ” ។ គួររំលឹកដែរថា កាលពីឆ្នាំ ២០២០ អ្នកភូមិ Thulasendrapuram ក៏ទាក់ទាញការចាប់អារម្មណ៍ជាសកលផងដែរ នៅពេលដែលពួកគេបានរៀបចំការអធិស្ឋាន និងប្រារព្ធពិធីមួយ នៅពេលដែលលោកស្រី Harris ត្រូវបានជ្រើសរើសជាអនុប្រធានាធិបតីសហរដ្ឋអាមេរិក៕

សហរដ្ឋអាមេរិក ៖ កាលពីថ្ងៃទី៥ ខែវិច្ឆិកា ឆ្នាំ២០២៤ ពលរដ្ឋអាមេរិកបានបោះឆ្នោតជ្រើសរើសប្រធានាធិបតីរបស់ខ្លួន ដែលជាការប្រកួតប្រជែងរបស់បេក្ខជនមកពីគណបក្សធំៗ គឺលោក Donald Trump គណបក្ស Republican និងលោកស្រី Kamala Harris គណបក្ស Democrat ។ តើបេក្ខជនរូបណានឹងក្លាយជាប្រធានាធិបតីថ្មីរបស់ប្រទេសមហាអំណាច ទី១ លើពិភពលោក?

ការបោះឆ្នោតជ្រើសរើសប្រធានាធិបតីអាមេរិក ពុំមែនពលរដ្ឋបោះឆ្នោតដោយផ្ទាល់ទេ គឺតាមរយៈតំណាងបោះឆ្នោតក្នុងរដ្ឋនីមួយៗ ។ នៅថ្ងៃទី៦ ខែវិច្ឆិកា រដ្ឋជាច្រើនរបស់អាមេរិកចាប់ផ្តើមបើកហិបឆ្នោត ដូចជា ៖ រដ្ឋ Kentucky, រដ្ឋ Indiana, រដ្ឋ South Carolina, រដ្ឋ Vermont, រដ្ឋ Virginia និងរដ្ឋ Swing ហើយលោក Donald Trump និងលោកស្រី Kamala Harris ទទួលបានសំឡេងនាំមុខ ។

លទ្ធផលបោះឆ្នោតបឋម គឺពលរដ្ឋរស់នៅរដ្ឋ Indiana និងរដ្ឋ Kentucky បានបោះឆ្នោតគាំទ្រលោក Trump ។ រីឯពលរដ្ឋរស់នៅរដ្ឋ Vermont បានបោះឆ្នោតគាំទ្រលោកស្រី Harris ហើយលទ្ធផលបោះឆ្នោតឆ្នាំ២០២៤នេះ គឺដូចគ្នានឹងលទ្ធផលបោះឆ្នោតនាពេលកន្លងមក ។

ការរាប់សន្លឹកឆ្នោតរបស់អាមេរិក នៅថ្ងៃទី៦ ខែវិច្ឆិកា (ពេលវេលាប្រទេសកម្ពុជា) គឺលោក Trump ទទួលបានសំឡេងឆ្នោតខ្ពស់ជាងលោកស្រី Harris ។ ហេតុនេះ អ្នកទទួលបានសំឡេងឆ្នោតរហូតដល់២៧០សំឡេង នឹងក្លាយជាប្រធានាធិបតីថ្មីអាមេរិក ។

លោក Trump ធ្លាប់បាននិយាយវាយប្រហារលោកស្រី Harris ខ្លាំងៗ ហើយលោកនិយាយទៅកាន់ក្រុមអ្នកគាំទ្រថា លោកនឹងឈ្នះឆ្នោតលើកនេះ ។ ក្រោយជាប់ឆ្នោត លោកនឹងអនុវត្តទោសប្រហារជីវិតជនអន្តោប្រវេសន៍ ដែលសម្លាប់សមត្ថកិច្ច និងពលរដ្ឋអាមេរិក ។ លើសពីនេះ លោកនឹងជួយកាត់បន្ថយពន្ធនៅអាមេរិក និងអត្រាអតិផរណា, បញ្ចុះតម្លៃទំនិញ, ដំឡើងប្រាក់ខែពលរដ្ឋ និងទាក់ទាញឱ្យមានការសាងសង់រោងចក្ររាប់ពាន់បន្ថែមទៀត ។

នៅថ្ងៃរកសំឡេងឆ្នោតចុងក្រោយ លោកស្រី Harris ពុំបាននិយាយប្រហារគូប្រជែងមកពីគណបក្ស Republican ទេ ហើយលោកស្រីមានទំនុកចិត្តថា នឹងក្លាយជាប្រធានាធិបតីថ្មីរបស់អាមេរិក ។ លោកស្រីបានព្យាយាមប្រមូលសំឡេងគាំទ្រពីក្រុមយុវជន ដោយចុះទៅតាមគោលដៅនានា នាចុងសប្តាហ៍ ។

គួរបញ្ជាក់ថា ការបោះឆ្នោតជ្រើសរើសប្រធានាធិបតី ឆ្នាំ២០២៤ មានពលរដ្ឋអាមេរិកចូលរួមបោះឆ្នោតចំនួន២៤០លាននាក់ ហើយប្រធានាធិបតីថ្មីអាមេរិក ទី៦០ នឹងចូលកាន់តំណែងនៅថ្ងៃទី២០ ខែមករា ឆ្នាំ២០២៥ ៕

ប្រទេសវៀតណាម ៖ រយៈពេល៩ខែដំបូងក្នុងឆ្នាំ២០២៤ ខេត្ត Bac Ninh បានក្លាយជាគោលដៅទាក់ទាញការវិនិយោគផ្ទាល់ពីក្រៅប្រទេស (Foreign Direct Investmen) ច្រើនបំផុតនៅប្រទេសវៀតណាម ដែលទទួលបានទឹកប្រាក់វិនិយោគរហូតដល់ជាង៤ពាន់២រយលានដុល្លារអាមេរិក ។

កត្តាអំណោយផលដល់ការវិនិយោគនៅប្រទេសវៀតណាម រួមមាន ៖ ហេដ្ឋារចនាសម្ព័ន្ធគ្រប់គ្រាន់ និងពលរដ្ឋវៀតណាមមានជំនាញ គឺជាមូលហេតុចម្បងធ្វើឱ្យខេត្ត Bac Ninh ទទួលបានការចាប់អារម្មណ៍យ៉ាងខ្លាំងពីវិនិយោគិនបរទេស ។

នាយកដ្ឋានផែនការ និងវិនិយោគនៅខេត្ត Bac Ninh ឱ្យដឹងថា បណ្តាវិនិយោគិនបរទេសបានវិនិយោគស្មើទឹកប្រាក់១.៥៦០លានដុល្លារអាមេរិកសម្រាប់គម្រោងចំនួន៣៣៩ កើនឡើង៨២,២% ហើយចំនួនគម្រោងបានកើនឡើង២៨,៤% បើប្រៀបធៀបប្រចាំឆ្នាំ ។

បច្ចុប្បន្ន ខេត្ត Bac Ninh ទទួលបានការវិនិយោគពីក្រៅប្រទេស ជាង២.៤០០គម្រោង ស្មើទឹកប្រាក់សរុប២៩.៣០០លានដុល្លារអាមេរិក ។ កំណើនការវិនិយោគពីក្រៅប្រទេសបង្ហាញឱ្យឃើញពីយុទ្ធសាស្ត្រជោគជ័យក្នុងការទាក់ទាញវិនិយោគិនបរទេស ដោយមន្ត្រីរដ្ឋាភិបាលក្នុងតំបន់បានសហការយ៉ាងជិតស្និទ្ធជាមួយក្រុមហ៊ុនបរទេស ដូចជា ៖ Samsung និង Canon ដើម្បីកាត់បន្ថយឧបសគ្គវិនិយោគ និងលើកទឹកចិត្តក្រុមហ៊ុនក្រៅស្រុក ។

ក្រុមហ៊ុន Samsung Display មានគម្រោងវិនិយោគទឹកប្រាក់ចំនួន១ពាន់៨រយលានដុល្លារអាមេរិក ដើម្បីសាងសង់រោងចក្រផលិតកញ្ចក់កុំព្យូទ័រ OLED ទំនើប ។ ដូច្នេះ វានឹងធ្វើឱ្យទឹកប្រាក់វិនិយោគសរុបរបស់ក្រុមហ៊ុននេះនៅខេត្ត Bac Ninh កើនឡើងរហូតដល់៨ពាន់៣រយលានដុល្លារអាមេរិក ។

គួរបញ្ជាក់ថា ខេត្ត Bac Ninh ស្ថិតនៅតំបន់ដីសណ្តទន្លេក្រហម និងមានប្រព័ន្ធដឹកជញ្ជូនផ្លូវគោក-ផ្លូវទឹកខ្វាត់ខ្វែង ដែលជាកត្តាជួយពង្រឹងហេដ្ឋារចនាសម្ព័ន្ធសេដ្ឋកិច្ចរបស់ខេត្ត ។ លើសពីនេះ ខេត្តក៏ស្ថិតនៅមិនឆ្ងាយពីអាកាសយានដ្ឋាន Noi Bai International Airport អាចជួយកាត់បន្ថយការចំណាយថ្លៃដឹកជញ្ជូនផ្សេងៗ និងជំរុញឱ្យសេដ្ឋកិច្ចខេត្តរីកចម្រើនកាន់តែខ្លាំង នាថ្ងៃអនាគត ៕