ប្រទេសចិន ៖ អ្នកស្រាវជ្រាវចិនបានទទួលជោគជ័យក្នុងការដាំពូជស្រូវនៅលើអវកាស គឺទិន្នផលស្រូវមានគុណភាពល្អ បើធៀបនឹងពូជស្រូវដែលដាំនៅលើផែនដី ហើយវាក៏ជាជោគជ័យយ៉ាងធំធេងសម្រាប់ការស្រាវជ្រាវពីការផលិតស្បៀងលើអវកាសផងដែរ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៣ ខែវិច្ឆិកា ឆ្នាំ២០២៤ ។

ស្ថានីយទូរទស្សន៍ CCTV របស់ចិនរាយការណ៍ថា ពូជស្រូវ 59 ដាំនៅស្ថានីយអវកាសជាតិរបស់ចិន គឺជាពូជស្រូវដំបូងគេដែលបានដាំក្នុងបន្ទប់គ្រប់គ្រងអាកាសធាតុយ៉ាងល្អ ។ បើប្រៀបធៀបរវាងពូជស្រូវដាំលើអវកាសជាមួយពូជស្រូវលើផែនដីឃើញថា ពូជស្រូវលើអវកាសមានភាពរឹងមាំល្អជាងស្រូវលើដី ។

អ្នកស្រាវជ្រាវចិនអាចកែប្រែហ្សែនរុក្ខជាតិលើអវកាសតាមរយៈម៉ូលេគុល ដើម្បីឱ្យវាមានលក្ខណៈស្រដៀងនឹងស្រូវដាំនៅលើដី ហើយអាហារូបត្ថម្ភរបស់ស្រូវលើអវកាសបានផ្លាស់ប្តូរ ។ ស្រូវលើអវកាសមានរសជាតិផ្អែម និងផ្តល់នូវបរិមាណប្រូតេអ៊ីនខ្ពស់ជាងស្រូវលើដី ហើយសាច់ម្សៅក្នុងគ្រាប់ស្រូវក៏ខុសប្លែកគ្នាដែរ ។

គួរបញ្ជាក់ថា ការសាកល្បងដាំស្រូវចំនួន១២០ថ្ងៃ នៅលើស្ថានីយអវកាសរបស់ចិនកាលពីឆ្នាំ២០២២ គឺជាភាពជោគជ័យដំបូងគេលើពិភពលោក ពីព្រោះកន្លងមក ការសាកល្បងលើស្ថានីយអវកាសធ្វើបានត្រឹមតែការដាំគ្រាប់សណ្តែក, ស្រូវសាឡី និងរុក្ខជាតិខ្លះៗ ។ ការសាកល្បងដាំរុក្ខជាតិលើអវកាសរបស់ចិនបានជួបបញ្ហាជាច្រើន ដូចជា ៖ ចេញផ្កាយឺតយ៉ាវ, ផ្លែនៅជាប់ដើមតិច និងគុណភាពគ្រាប់ធ្លាក់ចុះ ហើយចិនទទួលបានគ្រាប់ពូជរុក្ខជាតិលើអវកាសតិចតួចប៉ុណ្ណោះ ។

រហូតមកដល់ឆ្នាំ២០២៤នេះ អ្នកស្រាវជ្រាវចិនទទួលបានជោគជ័យក្នុងការដាំស្រូវលើអវកាស ហើយលទ្ធផលការសាកល្បងលើកនេះ គឺអ្នកជំនាញអាចយកគ្រាប់ស្រូវលើអាកាសមកដាំលើផែនដីបាន ។ ដូច្នេះ វាជាជោគជ័យយ៉ាងខ្លាំងក្នុងការស្រាវជ្រាវពាក់ព័ន្ធនឹងការផលិតស្បៀងក្រៅផែនដី ។

នៅថ្ងៃទី១៥ ខែវិច្ឆិកា ឆ្នាំ២០២២ អង្គការសហប្រជាជាតិបានប្រកាសជាផ្លូវការថា ពលរដ្ឋលើពិភពលោក មានចំនួនរហូតដល់៨ពាន់លាននាក់ ហើយនឹងកើនឡើងដល់១ម៉ឺនលាននាក់ នារយៈពេល៦០ឆ្នាំទៀត ។ ថ្ងៃអនាគត មនុស្សនឹងធ្វើសង្គ្រាមដណ្តើមធនធានធម្មជាតិ ដើម្បីឱ្យពូជពង្សរបស់ខ្លួនអាចរស់នៅបន្តទៀតបាន ។

ហេតុនេះ អាមេរិក រុស្ស៊ី និងចិនបានព្យាយាមស្វែងរកវិធីផលិតស្បៀងនៅក្រៅផែនដី ដោយសារមានសារធាតុរ៉ែជាច្រើននៅតាមភពផ្សេងៗសម្រាប់ឱ្យមនុស្សប្រើប្រាស់ជាប្រយោជន៍ ។ មនុស្សនឹងមានឱកាសប្រើប្រាស់ធនធានធម្មជាតិលើអវកាសនារយៈពេល១០០ឆ្នាំខាងមុខ បើវិទ្យាសាស្ត្រ, បច្ចេកវិទ្យា និងចំណេះដឹងពីអវកាសរីកចម្រើនជាងនេះ ៕

ប្រទេសជប៉ុន ៖ កាលពីថ្ងៃទី៥ ខែវិច្ឆិកា ឆ្នាំ២០២៤ សារព័ត៌មានបរទេសរាយការណ៍ថា ផ្កាយរណបផលិតពីឈើដំបូងគេរបស់អ្នកស្រាវជ្រាវជប៉ុន ត្រូវបានបង្ហោះទៅលើអវកាសហើយ ។ វាជាការសាកល្បងជំហានដំបូងពាក់ព័ន្ធនឹងការប្រើប្រាស់ឈើក្នុងភារកិច្ចស្រាវជ្រាវនៅឋានព្រះច័ន្ទ និងភពអង្គារ ។

ផ្កាយរណបឈើនេះឈ្មោះ «LignoSat» ផលិតដោយអ្នកជំនាញមកពីសាកលវិទ្យាល័យតូក្យូ សហការជាមួយក្រុមហ៊ុនកែច្នៃឈើ និងសាងសង់លំនៅឋាន Sumitomo Forestry ព្រមទាំងបញ្ជូនទៅស្ថានីយអវកាសសម្រាប់ការងាររបស់ក្រុមហ៊ុន Space X ។ បន្ទាប់មក ផ្កាយរណបឈើក៏ត្រូវបង្ហោះទៅលើគន្លងអវកាស ដែលមានកម្ពស់៤០០គីឡូម៉ែត្រពីផែនដី ។ ផ្កាយរណប LignoSat គឺដាក់ឈ្មោះតាមភាសាឡាតាំង ដែលបានយកឈើទៅសាកល្បងប្រើប្រាស់លើអវកាស ខណៈមនុស្សកំពុងស្រាវជ្រាវពីការរស់នៅទីនោះ ។

លោក ថាខាអុ ដូអិ អាកាសយានិកធ្លាប់ធ្វើដំណើរតាមយានអវកាសដើម្បីស្រាវជ្រាវពីសកម្មភាពមនុស្សក្នុងលំហ មកពីសាកលវិទ្យាល័យតូក្យូ បញ្ជាក់ថា ឈើជាវត្ថុដែលមនុស្សអាចផលិតបាន និងយកទៅប្រើប្រាស់សម្រាប់សាងសង់លំនៅឋានរស់នៅ និងអគារធ្វើការលើអវកាស ។

ក្រុមអ្នកស្រាវជ្រាវមានគម្រោង៥០ឆ្នាំ ក្នុងការដាំដើមឈើ និងសាងសង់លំនៅឋានលើឋានព្រះច័ន្ទ និងភពអង្គារ ។ ដូច្នេះ ក្រុមអ្នកស្រាវជ្រាវបានសម្រេចចិត្តផលិតផ្កាយរណបឈើដោយមានការទទួលស្គាល់ពីអង្គការអាកាសចរណ៍ជាតិ និងអវកាសអាមេរិក (NASA) ដើម្បីពិសោធន៍ពីវត្ថុអាចប្រើប្រាស់នៅលើអវកាសបានពិតប្រាកដ ។

ចំណែកលោក ខូជិ មុរ៉ាតាក់ សាស្ត្រាចារ្យផ្នែកវិទ្យាសាស្ត្រព្រៃឈើនៅសាកលវិទ្យាល័យតូក្យូ និយាយថា កាលពីឆ្នាំ១៩០០ មានយន្តហោះផលិតពីឈើ ហេតុនេះ ផ្កាយរណបក៏អាចផលិតពីឈើបានដែរ ។ ឈើនៅលើអវកាសរឹងមាំជាងឈើលើផែនដី ពីព្រោះអវកាសគ្មានទឹក ឬអុកស៊ីសែន ដែលធ្វើឱ្យឈើខូចគុណភាពទេ ហើយផ្កាយរណបឈើអាចជួយកាត់បន្ថយផលប៉ះពាល់បរិស្ថាន ។

រីឯផ្កាយរណបលោហៈបានបង្កើតភាគល្អិតអុកស៊ីតអាលុយមីញ៉ូមលើអវកាស ហើយគេអាចឈប់ប្រើប្រាស់វានាថ្ងៃអនាគត បើពិសោធន៍ឃើញថា ផ្កាយរណបឈើអាចដំណើរការបាន ។ ផ្កាយរណប LignoSat ផលិតពីឈើហូណូគិ មានដើមកំណើតនៅជប៉ុន ដែលអាចប្រើប្រាស់លើអវកាសបានក្រោយការសាកល្បងនៅស្ថានីយអវកាសរយៈពេល១០ខែ ។ ផ្កាយរណបនឹងហោះជុំវិញផែនដី៦ខែ ដើម្បីសាកល្បងភាពរឹងមាំរបស់ឈើលើអវកាសដែលមានសីតុណ្ហភាព -១០០អង្សារសេ ទៅ១០០អង្សារសេ នៅរៀងរាល់៤៥នាទី ៕

បើទោះលោក Mark Zuckerberg គឺជា CEO ក្រុមហ៊ុន Meta ដ៏ល្បីល្បាញលំដាប់ពិភពលោក ធ្វើដំណើរទៅកន្លែងណាក៏ដោយ ដូចជា ៖ សួនច្បារសាធារណៈ និងឡើងលើវេទិកានានា គឺគេតែងតែឃើញលោកពាក់អាវយឺតពណ៌ប្រផេះ កមូល ដៃខ្លី និងស្លៀកខោខូវប៊យ ពុំផ្លាស់ប្តូរសោះ ។ ហេតុអ្វីមហាសេដ្ឋីបច្ចេកវិទ្យាដែលមានទ្រព្យសម្បត្តិច្រើន រហូតដល់ជាង១១ម៉ឺន១ពាន់លានដុល្លារអាមេរិករូបនេះ ពាក់អាវយឺតដដែលរាល់ថ្ងៃ?

លោក Mark បាននិយាយមកកាន់សារព័ត៌មានថា ៖ «ខ្ញុំចង់រស់នៅក្នុងជីវិតដែលអាចសម្រេចចិត្តជាមួយរឿងរ៉ាវផ្សេងៗឱ្យតិចបំផុតតាមដែលអាចធ្វើបាន ។ មានទ្រឹស្តីផ្នែកចិត្តវិទ្យាជាច្រើនពាក់ព័ន្ធនឹងការសម្រេចចិត្តជ្រើសរើសរឿងតូចតាចនៅជុំវិញខ្លួន ដូចជា ៖ សម្លៀកបំពាក់ និងម្ហូបអាហារ ។ រីឯទស្សនៈខ្ញុំ គឺខ្ញុំស្ថិតនៅចំណុចល្អមួយដែលអាចជួយមនុស្សរហូតដល់១ពាន់លាននាក់ ហើយខ្ញុំពុំអាចធ្វើការបានទេ បើរវល់តែចំណាយពេលលើរឿងតូចតាច ។ ខ្ញុំបានចំណាយកម្លាំងទាំងអស់ក្នុងការបង្កើតលទ្ធផល និងសេវាកម្មដ៏ល្អបំផុតដើម្បីសម្រេចគោលដៅជួយឱ្យមនុស្សលើពិភពលោក អាចទំនាក់ទំនង និងផ្ញើក្តីស្រឡាញ់ ក្តីបារម្ភឱ្យគ្នាទៅវិញទៅមក នេះហើយជាអ្វីដែលខ្ញុំផ្តោតខ្លាំង» ។

បើទោះជាស្តាប់ទៅល្ងង់ក្តី ប៉ុន្តែវាជាមូលហេតុធ្វើឱ្យលោក Mark ពាក់អាវយឺតពណ៌ប្រផេះរៀងរាល់ថ្ងៃ ពីព្រោះការពាក់អាវធំ និងក្រវ៉ាត់ក ពុំបានធ្វើឱ្យលោកមានមោទនភាពទេ ។ ហេតុនេះ ការតុបតែងខ្លួនពុំបានបញ្ជាក់ថា មនុស្សម្នាក់ៗជាមនុស្សបែបណា ឬទទួលបានជោគជ័យទេ ប៉ុន្តែការធ្វើអ្វីដែលខ្លួនចូលចិត្ត និងមានចក្ខុវិស័យច្បាស់លាស់ ទើបអាចបញ្ជាក់ពីភាពជោគជ័យរបស់បុគ្គល ។ វាជាមូលហេតុដូចគ្នាជាមួយលោក Steve Jobs ដែលតែងតែពាក់អាវយឺតពណ៌ខ្មៅរាល់ថ្ងៃ ពីព្រោះលោកពុំចាំបាច់ចំណាយពេលជ្រើសរើសសម្លៀកបំពាក់ពេលព្រឹក ។

អ្វីដែលមនុស្សភាគច្រើនពុំជ្រាបនោះ គឺអាវយឺតធម្មតាពណ៌ប្រផេះ កមូល ដៃខ្លី ដែលស្ថាបិក Facebook រូបនេះតែងតែពាក់ជាប្រចាំនោះ គឺម៉ាក Brunello Cucinelli ដ៏ប្រណីតផលិតនៅប្រទេសអ៊ីតាលី ។ លោក Mark បានកុម្ម៉ង់ទិញអាវយឺតតាំងពីឆ្នាំ២០១៦ មកម៉្លេះ ហើយអាវយឺត១ មានតម្លៃចាប់ពី៣០០ដុល្លារ ទៅ៤០០ដុល្លារអាមេរិក ដែលជាប្រភេទអាវយឺតកុម្ម៉ង់ឱ្យកាត់សម្រាប់តែលោក Mark ម្នាក់គត់ ៕

ប្រទេសចិន៖ ការក្លាយជាមហាសេដ្ឋីមិនមែនជារឿងសប្បាយរីករាយដូចមនុស្សជាច្រើនគិតនោះទេ នេះបើតាមសម្តីរបស់ Jack Ma ដែលជាស្ថាបនិក Alibaba។
Jack Ma គឺជាមហាសេដ្ឋីម្នាក់ក្នុងចំណោមអ្នកមានបំផុតនៅលើពិភពលោក។ យោងតាមទស្សនាវដ្តី Forbes គិតត្រឹមថ្ងៃទី ១ ខែវិច្ឆិកា ឆ្នាំ ២០២៤ ទ្រព្យសម្បត្តិរបស់លោកមានចំនួន ២៤.៧ ពាន់លានដុល្លារអាមេរិក។ ទោះជាយ៉ាងណាក៏ដោយ យោងតាម Business Insider បុរសជោគជ័យម្នាក់នេះធ្លាប់ចង់ត្រលប់ទៅអតីតកាលវិញ នៅពេលដែលលោករកបានត្រឹមតែ ១២ ដុល្លារក្នុងមួយខែ ដោយសារហេតុផលធំៗទាំងនេះ។

ហេតុផលទីមួយគឺការគ្រប់គ្រងហិរញ្ញវត្ថុ៖ Jack Ma ធ្លាប់បាននិយាយថា កាលពីអតីតកាលលោកមិនសូវគិតច្រើនដូចពេលនេះនោះទេ។ លោកបានចែករំលែកថា កាលពីលោកធ្វើការជាគ្រូបង្រៀនភាសាអង់គ្លេសនៅទីក្រុង Hangzhou ប្រទេសចិនក្នុងឆ្នាំ ១៩៨៨ លោកទទួលបានប្រាក់ចំណូលតិចតួចណាស់ ប៉ុន្តែពេលវេលានោះគឺមានក្តីសុខ ដោយសារលោកអាចតាមដានយ៉ាងងាយនូវរបៀបដែលលោកចំណាយ និងគ្រប់គ្រងហិរញ្ញវត្ថុយ៉ាងស្រួលបំផុត។

ទោះជាយ៉ាងណានៅពេលដែល Jack Ma បានក្លាយជាស្ថាបនិក Alibaba ប្រាក់ចំណូលរបស់គាត់គឺកាន់តែច្រើនទៅៗ ដែលធ្វើឱ្យគាត់ត្រូវតែមានទំនួលខុសត្រូវខ្ពស់ចំពោះទ្រព្យសម្បត្តិទាំងនោះ។ មហាសេដ្ឋីវ័យ ៦០ ឆ្នាំរូបនេះបាននិយាយថា លោកតែងតែគិតអំពីរបៀបដែលគាត់រួមចំណែកដល់ការអភិវឌ្ឍន៍សង្គមជានិច្ច និងតែងតែគិតពីហិរញ្ញវត្ថុជាធំ ព្រោះបើកាលណាប្រាក់ទាំងនោះបានថយចុះ សេដ្ឋកិច្ចសង្គមក៏ជួបនឹងវិបត្តិផងដែរ ហើយមនុស្សជាច្រើននឹងគ្មានការងារធ្វើ ដូច្នេះហើយយើងត្រូវធ្វើយ៉ាងម៉េចដើម្បីគ្រប់គ្រងហិរញ្ញវត្ថុទាំងនោះឱ្យបានល្អបំផុត ក៏ដូចជាព្យាយាមស្វែងរកវិធីផ្សេងៗដើម្បីគ្រប់គ្រងវាឱ្យនៅស្ថិតស្ថេរ ឬកើនឡើងបន្ថែមទៀត។

Jack Ma បានបន្ថែមថា ការក្លាយជាមហាសេដ្ឋីគឺពិតជាពិបាកណាស់ មិនមែនជារឿងសប្បាយរីករាយដូចមនុស្សជាច្រើនគិតនោះទេ។ កាលពីចុងឆ្នាំ ២០២០ Jack Ma បានបាត់ខ្លួនពីទិដ្ឋភាពសាធារណៈ ដោយសារការបង្កាច់បង្ខូចជាមួយនិយតករចិន ហើយ ក្រុមហ៊ុនរបស់លោកក៏ត្រូវទទួលទណ្ឌកម្មលើសកម្មភាពអាជីវកម្មរបស់ខ្លួនផងដែរ។ ចាប់តាំងពីពេលនោះមក រហូតមកដល់បច្ចុប្បន្ន លោកបានបង្ហាញខ្លួនម្តងម្កាលប៉ុណ្ណោះ នៅវិទ្យាស្ថានស្រាវជ្រាវកសិកម្មបច្ចេកវិទ្យាខ្ពស់ជុំវិញពិភពលោក៕

តារាសម្តែងជនជាតិអាម៉េរិកដើមកំណើតចិន Liu Yifei ថ្មីៗនេះបានទាក់ទាញទស្សនិកជនជាមួយនឹងភាពស្រស់ស្អាតរបស់នាង ដោយទាក់ទាញការចូលមើលចំនួន ៣៥ លានដង និងមតិរាប់ពាន់នាក់នៅលើការបង្ហោះបណ្តាញសង្គមរបស់នាង។

ប្រព័ន្ធផ្សព្វផ្សាយចិន Sohu បានរាយការណ៍ថា Liu Yifei បានចែករំលែករូបថតពីវិស្សមកាលរបស់នាងនៅប្រទេសថៃ ដោយបានឈរយ៉ាងប្រណីតនៅមាត់សមុទ្រក្នុងសម្លៀកបំពាក់សាមញ្ញ ប៉ុន្តែឡូយ។ អ្នកគាំទ្របានសរសើរសម្រស់ក្មេងជាងវ័យ និងសម្រស់ធម្មជាតិជាមួយនឹងការបញ្ចេញមតិសរសើរសម្រស់របស់នាង។ ស្ថិតក្នុងវ័យ៣៧ ឆ្នាំ Liu Yifei ដឹកនាំជីវិតស្ងប់ស្ងាត់ និងកាត់បន្ថយងលើការងារ។ ឥឡូវនេះនាងផ្តោតលើគម្រោងមួយក្នុងមួយឆ្នាំ ឬតិចជាងនេះ ដោយចំណាយពេលទំនេររបស់នាងធ្វើដំណើរកម្សាន្ត រីករាយជាមួយមិត្តភក្តិ និងក្រុមគ្រួសារ និងមើលថែទាំឆ្មារបស់នាង។ ការថតរូបក៏ជាចំណង់ចំណូលចិត្តដែលអនុញ្ញាតឱ្យនាងថតយកពេលវេលាដ៏ស្រស់ស្អាត។

បន្ទាប់ពីការងាររបស់នាងនៅក្នុងរឿងភាគទូរទស្សន៍ «The Tale of Rose» បានបញ្ចប់ក្នុងខែវិច្ឆិកា ឆ្នាំ២០២៣ Liu Yifei មិនបានប្រកាសគម្រោងថ្មីទេ ប៉ុន្តែនៅតែមានឥទ្ធិពល ដែលត្រូវបានគេស្គាល់ថាសម្រាប់សម្រស់ធម្មជាតិ និងអាកប្បកិរិយាដ៏ទន់ភ្លន់របស់នាង។ នាងជៀសវាងតុបតែងមុខដោយគ្រឿងសម្អាង ជ្រើសបែបធម្មជាតិ និងសុខភាពជំនួសវិញ។ ក្នុងការសម្តែងជាតួ Huang Yi Mei នាងមានតម្លៃខ្លួនប្រមាណ ៣.៤ លានដុល្លារអាម៉េរិក។

Liu Yifei បានបង្ហាញខ្លួននៅលើកញ្ចក់ទូរទស្សន៍ជាលើកដំបូងក្នុងឆ្នាំ ២០០៣ ក្នុងរឿងមនោសញ្ចេតនាសម័យ The Story of a Noble Family។ ស៊េរីនេះបានលេចចេញជាកម្មវិធីដែលមានការវាយតម្លៃខ្ពស់បំផុតក្នុងឆ្នាំនោះនៅលើទូរទស្សន៍ជាតិចិន CCTV ដែលជំរុញឱ្យនាងក្លាយជាតារា។ ក្នុងឆ្នាំ ២០០៨ នាងបានផ្លាស់ប្តូរទៅថតកុន ហើយចាប់តាំងពីពេលនោះមកបានបង្ហាញខ្លួននៅក្នុងខ្សែភាពយន្តចិន និងហូលីវូដជាច្រើន។ បើតាម St Headline បានឱ្យដឹងថាទ្រព្យសម្បត្តិរបស់ Liu Yifei មានលើសពី ១.២៣ ពាន់លានយន់ ប្រមាណ១៧០លានដុល្លារ។ នាងមានផ្ទះវីឡាដ៏ធំនៅទីក្រុងប៉េកាំង ប្រទេសចិន និងវីឡាមួយនៅអាម៉េរិក៕