ស្របពេលអ្នកក្នុងចង្កោមសិល្បៈសម្រេចចិត្តរៀបការជាបន្តបន្ទាប់ ជាពិសេសមិត្តភក្តិស្នាលក៏ចូលរោងការច្រើនតារាចម្រៀង ជី ដេវីត ថាឆ្នាំក្រោយនឹងរៀបការឱ្យផ្អើលកម្ពុជា។ ការបង្ហើបដូចនេះបន្ទាប់ពី ទេព បូព្រឹក្ស ត្អូញត្អែរដាក់ ជី ដេវីត មិនទាន់សុំខ្លួនរៀបការប្រយ័ត្ននាងជាអ្នកសុំវិញ។ លើសពីនេះ ទេព បូព្រឹក្ស បង្ហាញទៀតថាគម្រោងគឺរៀបចំរួចហើយ ហើយចំណុចពិសេសដែលមិនអាចខ្វះបានក្នុងការចូលរួមគឺហ្វេន។

កាលពីល្ងាចថ្ងៃទី៧ វិច្ឆិកា តារាចម្រៀងល្បីឈ្មោះ ទេព បូព្រឹក្ស បានបង្ហោះរូបភាព ៤សន្លឹកដោយបានដាក់ខ្លឹមសារថា « ប៉ា Albert ហា គ្នាសុំសួរឯងមួយណាគេរៀបការអស់ហើយ ចុះកាលសុំអូនរៀបការ តែយូរពេកប្រយ័ត្នអូនសុំវិញណា»។ ឃើញម្តាយរបស់កូនប្រុសខ្លួនបង្ហើរយ៉ាងដូច្នេះ ជី ដេវីត បានចូលទៅខម្មិនថា «ឆ្នាំក្រោយការឱ្យផ្អើលកម្ពុជា » ។ នេះមិនមែនជាលើកទី១ នោះទេដែល ទេព បូព្រឹក្ស និយាយពីរឿងរៀបការរបស់ខ្លួន ប៉ុន្តែពេលវេលាមិនទាន់មកដល់។

ជាមួយការបង្ហាញយ៉ាងដូច្នេះដែលទំនងនឹងអាចរៀបពិធីមង្គលការក្នុងឆ្នាំ២០២៥ ទេព បូព្រឹក្ស ក៏បានបង្ហាញទៀតថាការរៀបការរបស់អ្នកទាំងពីរមិនអាចខ្វះហ្វេនបាន។ «ចាសមានគំរោងហើយៗខ្វះអីខ្វះបានតែថ្ងៃការខ្ញុំមិនអាចខ្វះហ្វេនបានទេ តែហ្វេនអត់ទៅខឹងវិញ ឈប់និយាយរកទាំងអស់គ្នាម៉ង ហើយគ្មានជាការលួងអីទាំងអស់»។ ទេព បូព្រឹក្ស បានបង្ហោះយ៉ាងដូច្នេះ។

គេចាំបានថាកាលពីខែសីហា កន្លងមកនេះ ទេព បូព្រឹក្ស បានចូលរួមផ្តល់បទសម្ភាសន៍ក៏បាននិយាយពីជីវិតឯកជនជាមួយ ជី ដេវីត ពីរឿងរៀបការដូចគ្នាថាអ្នកទាំងពីរមានគម្រោងគ្រាន់តែពេលវេលាមកទាន់មកដល់។ ទេព បូព្រឹក្ស បាននិយាយថា ជី ដេវីត រកតែរៀបការរហូតប៉ុន្តែដោយសារតែរវល់ច្រើន ការងារច្រើន ទើបមិនទាន់បានរៀបចំហើយ ជី ដេវីត ចាំតែសម្រេចលើខ្លួនប៉ុន្តែ។

អ្នកនាង ទេព បូព្រឹក្ស ក៏បានបង្ហាញដែរថាជីវិតឯកជនរបស់អ្នកទាំងពីរពេលខ្លះនាងមិនចង់បង្ហាញនោះទេ ដោយបានទម្លាយថាអ្នកទាំងពីរធ្លាប់សែនព្រេនជាមួយគ្នា ចុះអេតាស៊ីវិលជាមួយគ្នាហើយ។ គួរបញ្ជាក់ថា បច្ចុប្បន្នជី ដេវីត និង ទេព បូព្រឹក្ស មានកូនប្រុសដ៏គួរឱ្យស្រលាញ់ម្នាក់ដែលបានកើតកាលពីខែកុម្ភៈ ឆ្នាំ២០២៣៕

ប្រាសាទ ដាវីន បវរកញ្ញាចក្រវាលកម្ពុជាឆ្នាំ២០២៤ បាននាំកម្ពុជាយកឈ្នះជាមួយនឹងបេក្ខភាព១៩អ្នកផ្សេងទៀតពីការឈ្នះ Best Make Up ក្នុងកម្មវិធី Miss Universe ដោយនាងនឹងទទួលឈុត Make Up ដែលមានតម្លៃរហូតដល់ទៅ៣០០០ដុល្លារពី Brand កម្មវិធីនេះផ្ទាល់។ គួរឱ្យដឹងតួលេខសរុបបេក្ខភាពដែលចូលរួមប្រកួត Miss Universe នេះគឺមានរហូតដល់១៣០ប្រទេសឯណោះ។

អ្នកគាំទ្រកម្ពុជាបានបង្ហាញអារម្មណ៍សប្បាយចិត្តនិងបានចែករំលែកជាច្រើនពីការឈ្នះរបស់ ប្រាសាទ ដាវីន បេក្ខភាពតំណាងប្រទេសកម្ពុជានៅលើឆាក Miss Universe ដែលជាប់ក្នុងបញ្ជីTOP20 Best Make Up ក្នុងកម្មវិធី Miss Universe ។ នេះជាដំណឹងល្អរបស់កម្ពុជាខណៈ ប្រាសាទ ដាវីន គឺទទួលបានការចាប់អន្តរជាតិជាច្រើនបណ្តា fan page ជាច្រើនសុទ្ធតែព្យាករណ៍ថាបេក្ខភាពតំណាងកម្ពុជាឆ្នាំនេះនឹងចូល TOP នៃការប្រកួត។

ចំពោះការឈ្នះ Best Make Up តាមការចែករំលែកនៅលើប្រព័ន្ធផ្សព្វផ្សាយសង្គម ប្រាសាទ ដាវីន នឹងទទួលបានឈុត Make Up ដែលមានតម្លៃរហូតដល់៣០០០ដុល្លារឯណោះពិតជាមិនធម្មតានោះទេ។ មិនត្រឹមតែរឿងនេះទេ Miss Universe Cambodia 2024 ទទួលបានការសរសើរជាច្រើនពីការស្ទះស្ទារទៅជួយបវរកញ្ញាចក្រវាលអូស្រា្តលី មានបញ្ហាសុខភាព។ គួរបញ្ជាក់ថា ND Miss Universe Cambodia 2024 ក៏បានទៅលើកទឹកចិត្ត ប្រាសាទ ដាវីន ដោយផ្ទាល់នៅប្រទេសម៉ិកស៊ិកផងដែរ។

ថ្ងៃផ្តាច់ព្រ័ត្រ Miss Universe 2024 លើកទី៧៣នេះនឹងប្រព្រឹត្តិទៅនៅថ្ងៃទី១៧ ខែវិច្ឆិកា ឆ្នាំ២០២៤។ កម្ពុជាមិនទាន់អាចបំបែកប្រវត្តិសាស្រ្តចូល TOP នៅក្នុងកម្មវិធីប្រកួតសម្រស់នេះបាននៅឡើយទេចាប់តាំងពីប្រកួតនៅឆ្នាំ២០១៧មក។ បេក្ខភាពដែលតំណាងកម្ពុជាចូលរួមប្រកួតកម្មវិធីសម្រស់នេះកន្លងមកមានដូចជា ប៊ី សុធារី , រឿន ណាត , សំណាង អេលីណា , រ៉េត សារីតា, ងិន ម៉ារ៉ាឌី, ហង្ស ម៉ានីតា ,ចន សុទីម៉ា ខណៈប្រាសាទ ដាវីន គឺជាស្រ្តីដែលជាម្តាយដំបូងគេចូលប្រកួត Miss Universe និងមានការព្យាករណ៍ជាច្រើនថានឹងបើកទ្វារកម្ពុជាចូលTOP៕

ជា ឧត្ដមហ្វីឌែល Mister Friendship Cambodia 2024 នឹងតំណាងឱ្យកម្ពុជាចូលរួមប្រកួតនៅលើឆាកអន្តរជាតិលើទឹកដីតៃវ៉ាន់នាពេលខាងមុខ បន្ទាប់ពីតំណែងឆ្នាំមុន លាវ វេងហួរ បានយកជម្នះជូនប្រទេសជាតិ។ បុរសឯករូបនេះជាកូនខ្មែរមកពីប្រទេសបារាំង ខណៈលោកធ្វើការនៅក្នុងមន្ទីរពេទ្យផងដែរ។

ដើមឡើយក្នុងការប្រកួត Mister Friendship International ក្នុងឆ្នាំនេះខាងកម្ពុជាអក់ខានបញ្ចូនបេក្ខជនតំណាងប្រទេស ប៉ុន្តែក្រោយមកបានរៀបចំជ្រើសរើសនិងបានរកឃើញ Mister Friendship Cambodia 2024 ដោយបានទៅលើ ជា ឧត្ដមហ្វីឌែល។ ក្នុងការក្លាយជាបេក្ខភាពតំណាងប្រទេសបុរសសង្ហារូបនេះបានប្តេជ្ញានឹងធ្វើឱ្យអស់ពីសមត្ថភាពក្នុងពេលតំណាងប្រទេសកម្ពុជាប្រកួតនៅលើឆាកអន្តរជាតិ។

ជាមួយនឹងតំណែងថ្មីរបស់ខ្លួន ជា ឧត្ដមហ្វីឌែល ក៏បានទម្លាយដែរថាជ័យជម្នះកំពូលរបស់ លាវ វេងហ៊ួរ Mister Friendship International 2023 គឺជាការបំផុសគំនិតរបស់លោកផ្ទាល់ក្នុងការចូលរួមប្រកួតនេះ។ សម្រស់ដ៏ស្រស់សង្ហារបស់ ជា ឧត្ដមហ្វីឌែល បានធ្វើឱ្យអ្នកគាំទ្រពិភាក្សាយ៉ាងទូលំទូលាយ។ ក្នុងនោះក៏មានការលើកឡើងដែរថាកម្ពុជាអាចនឹងយកជ័យជម្នះលើឆាកអន្តរជាតិម្តងទៀតបានដែរឬទេក្នុងការប្រកួតនៅតៃវ៉ាន់នេះ។

កាលពីឆ្នាំមុនប្រជាជនកម្ពុជាជាច្រើនបានបង្ហាញអារម្មណ៍មានមោទនភាពយ៉ាងខ្លាំងចំពោះ លាវ វេងហួរ បានក្លាយជា Mister Friendship International 2023 នៅលើទឹកដីប្រទេសថៃបានសាងមុខមាត់ជូនកម្ពុជាយ៉ាងខ្លាំងបញ្ជាក់ពីសមត្ថភាពរបស់កម្ពុជាមិនអន់នោះទេក្នុងការប្រកួតប្រជែងជាមួយនឹងបេក្ខភាពមកពីប្រទេសនានាជុំវិញពិភពលោក។

ជា ឧត្ដមហ្វីឌែល មានឪពុកម្តាយជាជនជាតិខ្មែរធំធាត់នៅប្រទេសបារាំងនិងបានមករស់នៅប្រទេសកម្ពុជាជាង១ឆ្នាំមកហើយ។ ដ្បិតតែរស់នៅអឺរ៉ុបក្តីប៉ុន្តែអាចប្រាស្រ័យទាក់ទងភាសាជាតិបានច្រើនគួរឱ្យកត់សម្គាល់។ លើសពីនេះស្នាដៃថតរូបរបស់ Mister Friendship Cambodia 2024 គឺមានទឹកដៃមិនធម្មតានោះទេ៕

តារាសម្តែង មាន សូនីតា ថ្វីបើបច្ចុប្បន្នពុំទាន់វិលត្រឡប់មកការសម្តែងពីវិស័យភាពយន្តក្តី ប៉ុន្តែតារាស្រីរូបនេះបានបង្ហាញពីទិដ្ឋភាពផ្សេងៗតាមរយៈការថតរូប វីដេអូ ចែកជូនទៅដល់ហ្វេនៗទស្សនា។ ជាក់ស្តែងថ្មីៗនេះស្របពេលព្រះរាជពិធីបុណ្យ អុំទូក ជិតចូលមកដល់ មាន សូនីតា មិនរួញរាទោះជួបឧបសគ្គ ការភ័យខ្លាចយ៉ាងណាក្តី ផ្តិតយករូបភាពដើម្បីបង្ហាញទៅកាន់ទេសចរអន្តរជាតិ។

តាមរយៈវីដេអូដែលចែករំលែកនៅលើបណ្តាញសង្គមរយៈពេលជិត២នាទី ទស្សនិកជនបានឃើញ មាន សូនីតា ស្លៀកឈុតប្រពៃណីខ្មែរយ៉ាងស្រស់ស្អាតបង្ហាញពី «ស្នាមញញឹមនារីកម្ពុជាលើដងទន្លេសាប»។

ក្នុងនាមជាសិល្បការនីខ្មែរមួយរូប មាន សូនីតា ថា នាងពិតជាមានក្ដីសោមនស្ស ក្នុងការចូលរួមអបអរសាទរ និងផ្សព្វផ្សាយពីព្រះរាជពិធីបុណ្យ អុំទូក បណ្តែតប្រទីប និងសំពះព្រះខែ អកអំបុក ឱ្យកូនខ្មែរ និងភ្ញៀវបរទេសបានដឹង និងជ្រួតជ្រាបពី ភាពស្រស់ស្អាត ភាពអស្ចារ្យ និងការដឹងគុណដល់ដូនតាខ្មែរ ដែលបានបង្កើតព្រះរាជពិធីបុណ្យនេះឡើងដើម្បីជាការជួបជុំក្រុមគ្រួសារ និងមិត្តភក្តិដ៏រីករាយក្អាកក្អាយ។

ជាមួយគ្នានេះ តារាសម្តែង មាន សូនីតា ក៏បានបង្ហាញដែរថា ការថតវីដេអូនេះជួបនូវឧបសគ្គច្រើនយ៉ាងណាក្ដី ក៏ឆន្ទៈជាកូនខ្មែរបានរុញច្រាននាងឱ្យបង្កើត និងផលិតវីដេអូមួយនេះដោយជោគជ័យជូនបងប្អូនជនរួមជាតិបានទស្សនា។

ព្រះរាជពិធីបុណ្យ អុំទូក បណ្តែតប្រទីប និងសំពះព្រះខែ អកអំបុក តែងតែប្រារព្ធរយៈពេល ០៣ ថ្ងៃ គឺចាប់ពីថ្ងៃ ១៤កើត ១៥កើត និងថ្ងៃ ១រោច ខែកត្តិក នៅតាមទន្លេសាប ហើយសម្រាប់ឆ្នាំនេះ ត្រូវប្រារព្ធឡើងនៅថ្ងៃទី ១៤-១៥-១៦ ខែ វិច្ឆិកា ឆ្នាំ ២០២៤។ ព្រះរាជពិធីបុណ្យ អុំទូក បណ្តែតប្រទីប និងសំពះព្រះខែ អកអំបុក មានតាំងពីបូរមបុរាណ យូរលង់មកហើយ ដែលមានចែងក្នុងឯកសារ របស់ប្រវត្តិវិទូបរទេស ក៏ដូចជាតាមសិលាចារឹក នៃប្រាសាទអង្គរផងដែរ៕