កាលពីថ្ងៃទី៨ ខែវិច្ឆិកា ឆ្នាំ២០២៤ សារព័ត៌មានបរទេសបានផ្សព្វផ្សាយពីការដេញថ្លៃនំខេកមួយចំណិត ដែលត្រូវបានគេធ្វើតាំងពី៧៧ឆ្នាំមុន សម្រាប់ពិធីរៀបអភិសេករបស់ព្រះមហាក្សត្រអង់គ្លេសដ៏ល្បីល្បាញលើពិភពលោក ។ អ្វីគួរឱ្យភ្ញាក់ផ្អើលបំផុតនោះ បើទោះជានំនេះបានផលិតអស់រាប់សិបឆ្នាំក្តី ប៉ុន្តែនៅតែអាចបរិភោគបាន ដោយសារមានគ្រឿងផ្សំសំខាន់ទាំងនេះ ។

តាមធម្មតា នំខេកសម្រាប់ពិធីខួបកំណើត ឬអាពាហ៍ពិពាហ៍ គឺពុំអាចរក្សាទុកបានយូរទេ ។ នាពេលថ្មីៗនេះ បុរសចិនម្នាក់បានចំណាយប្រាក់រហូតដល់ជិត៤ពាន់ដុល្លារអាមេរិកដើម្បីទិញនំខេកពីការដេញថ្លៃ ដោយសារមានពាក្យចចាមអារ៉ាមថា វាជានំកក្នុងពិធីរៀបអភិសេករបស់ព្រះមហាក្សត្រអង់គ្លេស ។

សារព័ត៌មានអង់គ្លេស The Times រាយការណ៍ថា បុរសចិនរូបនេះបានចំណាយប្រាក់ជិត៤ពាន់ដុល្លារអាមេរិកទិញនំខេកពីការដេញថ្លៃ កាលពីថ្ងៃទី៥ ខែវិច្ឆិកា ឆ្នាំ២០២៤ ដោយសារវាជានំមានអាយុច្រើនជាងគេ ។ ប៉ុន្តែមហាជនឆ្ងល់ថា ហេតុអ្វីនំខេករក្សាទុកបានយូររាប់សិបឆ្នាំនេះ អាចលក់ដេញថ្លៃក្នុងតម្លៃខ្ពស់? ក្រោយមក ទើបពួកគេដឹងថា វាជានំក្នុងពិធីរៀបអភិសេករបស់ម្ចាស់ក្សត្រី Elizabeth ទី២ និងព្រះអង្គម្ចាស់ Philip ។

កាលពីថ្ងៃទី២០ ខែវិច្ឆិកា ឆ្នាំ១៩៤៧ ម្ចាស់ក្សត្រី Elizabeth ទី២ និងព្រះអង្គម្ចាស់ Philip បានរៀបអភិសេកក្នុងព្រះរាជវាំង Buckingham ប្រទេសអង់គ្លេស ដោយមានភ្ញៀវមានឋានៈខ្ពង់ខ្ពស់ និងអ្នកជំនួញលំដាប់ពិភពលោក ចូលរួម ។ ពិធីអភិសេកនេះរៀបចំឡើងយ៉ាងអធិកអធម ព្រមទាំងមាននំខេកដ៏ស្រស់ស្អាតបំផុតមានកម្ពស់ជាង២ម៉ែត្រ, ទម្ងន់២២៦គីឡូក្រាម ដែលធ្វើដោយ Frederick Stang ប្រធានផលិតនំរបស់ក្រុមហ៊ុន McVitie & Price នាសម័យនោះ ។

នំខេកនេះត្រូវបានតុបតែងយ៉ាងល្អប្រណីត និងល្អិតល្អន់យ៉ាងខ្លាំងតាមបែបព្រះរាជវាំងអង់គ្លេស ។ រីឯគ្រឿងផ្សំសម្រាប់ធ្វើនំខេក រួមមាន ៖ ផ្លែឈើរបស់អូស្ត្រាលី, ស្រាអាហ្វ្រិកខាងត្បូង និងស៊ុត៧០០គ្រាប់ ហើយសម័យនោះ គេហៅនំនេះថា «The 10,000-mile Wedding Cake» ដោយសារគ្រឿងផ្សំរបស់វានាំចូលពីអូស្ត្រាលី និងអាហ្វ្រិកខាងត្បូង ។

ក្រោយបញ្ចប់ពិធីរៀបអភិសេក គេក៏បានកាត់នំខេកនេះជា២.០០០ចំណិត និងចែកឱ្យភ្ញៀវមកចូលរួមចំនួន១៤៦នាក់បរិភោគ ព្រមទាំងផ្តល់ទៅឱ្យអង្គការសប្បុរសធម៌, មន្ទីរពេទ្យ និងសាលារៀនផងដែរ ។ រីឯចំណិតនំខេកដែលបុរសចិនទិញពីការដេញថ្លៃ គឺជារបស់ Marion Paulson អ្នកថែទាំព្រះរាជវាំង Holyroodhouse នៅប្រទេសស្កុតឡេន ប៉ុន្តែម្ចាស់ខេកពុំព្រមបរិភោគ និងរក្សាទុកនៅក្រោមគ្រែ ។

អ្នករៀបចំកម្មវិធីដេញថ្លៃនំខេកនិយាយថា នំខេកផ្សំពីស្រាក្នុងបរិមាណច្រើន ទើបអាចរក្សាទុកបានរាប់សិបឆ្នាំ ហើយនៅតែអាចបរិភោគបាន ។ ប៉ុន្តែយើងពុំណែនាំឱ្យបរិភោគវាទេ ៕

ទីក្រុង Neft Daşları ស្ថិតក្នុងប្រទេសអាស៊ែបៃហ្សង់ អណ្តែតលើផ្ទៃសមុទ្រ Caspian គឺជាទីក្រុងដែលមានលក្ខណៈពិសេសជាច្រើនមិននឹកស្មានដល់។
ទីក្រុងនេះគឺជាបណ្តាញអណ្តូងប្រេង និងកន្លែងផលិតប្រេងដ៏សំខាន់មួយ ដែលតភ្ជាប់ដោយស្ពានជាច្រើនគីឡូម៉ែត្រឆ្លងកាត់សមុទ្រកាសព្យែន ដែលជាសមុទ្រដ៏ធំបំផុតរបស់ពិភពលោក។ វាមានចម្ងាយប្រហែល ៩៦.៥ គីឡូម៉ែត្រពីរដ្ឋធានី Baku របស់ប្រទេស Azerbaijan និងប្រហែល ៦ ម៉ោងតាមទូកពីដីគោក។

យោងតាមសៀវភៅកំណត់ត្រាហ្គីណេសទីក្រុង Neft Daşları គឺជាអណ្តូងប្រេងនៅឈូងសមុទ្រចំណាស់ជាងគេបំផុតរបស់ពិភពលោក។ កាលពីមុនទីក្រុងអណ្តែតទឹកនេះ គឺជាផ្ទះរបស់អ្នកស្រុកកជាង ៥០០០ នាក់ ប៉ុន្តែនៅក្នុងប៉ុន្មានទសវត្សរ៍ថ្មីៗនេះចំនួនប្រជាជននៃ Neft Daşları ក៏បានថយចុះជាលំដាប់ ហើយតំបន់ជាច្រើនបានក្លាយទៅជាទ្រុឌទ្រោម និងលិចចូលទៅក្នុងសមុទ្រ។ មូលហេតុគឺដោយសារកន្លែងប្រេងធំៗត្រូវបានអភិវឌ្ឍ ហើយតម្លៃប្រេងមានការប្រែប្រួល លើសពីនេះស្ពានសំខាន់ៗជាច្រើនក៏បានដួលរលំ ក្រោមឥទិ្ធពលនៃព្យុះនៅសមុទ្រកាសព្យែនផងដែរ។

ទោះជាយ៉ាងណាក៏ដោយ ទីក្រុងនេះនៅតែមានលក្ខណៈពិសេសជាច្រើន ដោយបានដើរតួជានិមិត្តរូបនៃការរុករកប្រេងជាប្រវត្តិសាស្ត្រដ៏យូរអង្វែងរបស់ប្រទេស Azerbaijan នៅតំបន់ Caspian ដែលជាតំបន់សមុទ្រដែលសម្បូរដោយឥន្ធនៈហ្វូស៊ីលច្រើនជាងគេ។ កាលពីមុនទីក្រុងអណ្តែតទឹក Neft Daşları បានផ្តល់លំនៅដ្ឋានសម្រាប់កម្មករ ហាងនំប៉័ង រោងមហោស្រព ហាងទំនិញ បរិក្ខារពេទ្យ ទីលានបាល់ទាត់ និងឧទ្ធម្ភាគចក្រ ដែលអាចផ្ទុកមនុស្សរាប់រយនាក់។ ទីក្រុងនេះថែមទាំងមានដើមឈើ និងសួនច្បារលើរចនាសម្ព័ន្ធដែកទៀតផង។ មនុស្សមួយចំនួននៅ Azerbaijan ហៅវាថាជា “អច្ឆរិយៈទី ៨ នៃពិភពលោក” ឬ “កោះនៃនាវាទី ៧” ។

វាក៏ជាមជ្ឈមណ្ឌលនៃការផលិតប្រេងដ៏ធំបំផុតមួយនៅក្នុងសមុទ្រកាសព្យែនផងដែរ ដោយបានផលិតប្រេងជិត ១៨០ លានតោនក្នុងរយៈពេល ៧៥ ឆ្នាំនៃអត្ថិភាពរបស់ខ្លួន។ ទោះបីជាបច្ចុប្បន្នទីក្រុងមួយនេះហាក់ទ្រុឌទ្រោមបន្តិចក៏ដោយ មនុស្សមួយចំនួនជឿជាក់ថា Neft Daşları អាចក្លាយជាគោលដៅទេសចរណ៍ ឬសារមន្ទីរដ៏ល្បីមួយ ដោយសារតែទីក្រុងនេះគឺជាលំយោលនៃការរុករកប្រេងនៅឯនាយសមុទ្រ និងជាផ្នែកមួយនៃបេតិកភណ្ឌរបស់ប្រទេស Azerbaijan៕

សហរដ្ឋអាមេរិក ៖ លោក Elon Musk ជាមហាសេដ្ឋី និង CEO របស់ក្រុមហ៊ុន Tesla នឹងទទួលបានផលប្រយោជន៍ផ្នែកសេដ្ឋកិច្ចយ៉ាងច្រើនមហាសាលពីទំនាក់ទំនងរបស់លោកជាមួយប្រធានាធិបតីអាមេរិក ដោយសារលោកបានចេញមុខគាំទ្រលោក Donald Trump ក្នុងពេលរកសំឡេងឆ្នោតកន្លងមក ។

តម្លៃភាគហ៊ុនរបស់ក្រុមហ៊ុន Tesla បានកើនឡើងរហូតដល់ជិត១៥% កាលពីថ្ងៃទី៦ ខែវិច្ឆិកា ឆ្នាំ២០២៤ ក្រោយពីលោក Trump ទទួលជោគជ័យក្នុងការបោះឆ្នោតជ្រើសរើសប្រធានាធិបតីអាមេរិក ។ ហេតុនេះ វាធ្វើឱ្យទឹកប្រាក់របស់ Tesla កើនឡើងប្រមាណ១២ម៉ឺនលានដុល្លារអាមេរិក ។

លោក Elon Musk បានចំណាយប្រាក់ចំនួន៧៥លានដុល្លារអាមេរិកឱ្យក្រុមឃោសនារកសំឡេងឆ្នោតគាំទ្រលោក Trump ។ លោក Trump និយាយថា នឹងបង្កើតគណៈកម្មការលើកកម្ពស់ប្រសិទ្ធភាពរបស់រដ្ឋាភិបាល ដើម្បីកាត់បន្ថយការចំណាយរបស់រដ្ឋាភិបាលកណ្តាល ហើយគណៈកម្មការនេះដឹកនាំដោយលោក Elon Musk ។

លោក Elon Musk នឹងមានឥទ្ធិពលកាន់តែខ្លាំង ក្រោយពីលោក Trump កាន់តំណែងជាប្រធានាធិបតីអាមេរិកថ្មី ខណៈបច្ចុប្បន្ន លោក Elon Musk ជាម្ចាស់ប្រព័ន្ធអ៊ីនធើរណេតតាមផ្កាយរណប Starlink និង CEO របស់ Tesla ។ កន្លងមក លោកបានទទួលផលប្រយោជន៍ពីគោលនយោបាយមួយចំនួនរបស់លោក Trump រួមទាំងគោលនយោបាយការផលិត និងប្រើប្រាស់ថាមពលព្រះអាទិត្យ និងរថយន្តអគ្គិសនី ដែលអនុម័តច្បាប់ដោយលោក ចូ បៃឌិន នៅឆ្នាំ២០២២ ។

លោកបានការពារហានិភ័យអាជីវកម្មរបស់ខ្លួន ដោយសហការជាមួយលោក Trump និងទទួលបានការយកចិត្តទុកដាក់ពីលោក Trump ។ បើទោះជា Tesla មានឧបសគ្គក្នុងការដំណើរការក្តី ប៉ុន្តែ Tesla នឹងអាចជម្នះឧបសគ្គទាំងអស់ ពេលមានលោក Trump នៅពីក្រោយខ្នង ។ រីឯតម្លៃភាគហ៊ុនរបស់ក្រុមហ៊ុនរថយន្តអគ្គិសនី Lucid Group និង Rivian Automotive របស់អាមេរិក បានធ្លាក់ចុះ៥,៣% និង៨,៣% ខណៈភាគហ៊ុនរបស់ក្រុមហ៊ុនចិន BYD ធ្លាក់ចុះ២,៣% ត្រឹមរយៈពេល១យប់ ។

អ្នកវិភាគនិយាយថា លោក Trump នឹងដំឡើងពន្ធរថយន្តអគ្គិសនីចិនដែលនាំចូលអាមេរិក ហើយនឹងជួយការពារ Tesla ពីការប្រកួតប្រជែង ។ ការលុបចោលបទប្បញ្ញត្តិផ្សេងៗ និងកាត់បន្ថយការចំណាយរបស់ Tesla នឹងធ្វើឱ្យលោក Elon Musk មានឥទ្ធិពលខ្លាំងនៅអាមេរិក ផ្នែកបច្ចេកវិទ្យា, ការស្រាវជ្រាវអវកាស និងរថយន្តអគ្គិសនី ហើយលោកនឹងទទួលផលប្រយោជន៍ដោយផ្ទាល់តាមរយៈ Tesla និងក្រុមហ៊ុនផ្សេងៗ ។

ហេតុនេះ លោក Elon Musk អាចព្យាយាមប្រើប្រាស់ឥទ្ធិពលរបស់ខ្លួន ដើម្បីបន្ធូរបន្ថយផ្នែកច្បាប់ពាក់ព័ន្ធនឹងអាជីវកម្មនានាដែលលោកគ្រប់គ្រង ។ កន្លងមក លោកនិយាយថា នឹងពន្លឿនការអនុម័តច្បាប់ពាក់ព័ន្ធនឹងបច្ចេកវិទ្យាបើកបររថយន្តដោយស្វ័យប្រវត្តិ ៕

សហរដ្ឋអាមេរិក៖ ជ័យជម្នះរបស់លោក Donald Trump នៅសេតវិមានបានធ្វើឱ្យមហាសេដ្ឋីកំពូលៗរបស់អាមេរិកជាច្រើននាក់កើនឡើងទ្រព្យសម្បត្តិភ្លាមៗ។
យោងតាមសារព័ត៌មានបរទេសធំៗបានចុះផ្សាយថា Donald Trump គឺបានក្លាយជាប្រធានាធិបតីទី ៤៧ របស់សហរដ្ឋអាមេរិកហើយ ខណៈមហាសេដ្ឋីកំពូលៗជាច្រើនមិនបង្ហាញការគាំទ្រគណបក្សណាមួយដូច Elon Musk ក៏ដោយ ក៏ទ្រព្យសម្បត្តិរបស់មហាសេដ្ឋីទាំងនេះបានកើនឡើងគួរឱ្យកត់សម្គាល់ផងដែរ។

ជាក់ស្តែងយោងតាមស្ថិតិរបស់ទស្សនាវដ្ដី Forbes ក្នុងរយៈពេល ២៤ ម៉ោងចុងក្រោយនេះ លោក Elon Musk ដែលជាមហាសេដ្ឋីមានជាងគេបំផុតនៅលើពិភពលោកសព្វថ្ងៃនេះ មានទ្រព្យសម្បត្តិបន្ថែមចំនួន ៤.៨ ពាន់លានដុល្លារ ដោយសារការកើនឡើងនៃតម្លៃភាគហ៊ុន។ នេះជួយបង្កើនទ្រព្យសម្បត្តិរបស់នាយកប្រតិបត្តិ Tesla ពី ២៤៧.៤ ពាន់លានដុល្លារ ដល់ ២៦៤.៧ ពាន់លានដុល្លារ។

ទន្ទឹមនឹងនេះថៅកែ Amazon លោក Jeff Bezos ដែលជាមហាសេដ្ឋីមួយក្នុងចំណោមមហាសេដ្ឋីទាំងប្រាំនៅលើពិភពលោក ក៏រកបាន ៣.៥ ពាន់លានដុល្លារ នៅថ្ងៃបោះឆ្នោតអាមេរិកផងដែរ។ យោងតាមទស្សនាវដ្តី Forbes ទ្រព្យសម្បត្តិសរុបរបស់លោក Jeff Bezos បច្ចុប្បន្នឈានដល់ ២១៦.៥ ពាន់លានដុល្លារហើយ។ លើសពីនេះលោក Larry Ellison សហស្ថាបនិក Oracle ក៏រកចំណូលបានបន្ថែមចំនួន ២.៧ ពាន់លានដុល្លារអាមេរិក ដែលជួយនាំយកទ្រព្យសម្បត្តិសរុបរបស់លោកដល់២០៩.១ ពាន់លានដុល្លារ។

រីឯថៅកែ Meta លោក Mark Zuckerberg វិញក៏ទើបតែទទួលបាន ៤ ពាន់លានដុល្លារបន្ថែមនៅថ្ងៃបោះឆ្នោតផងដែរ។ ចំនួននេះជួយបង្កើនទ្រព្យសម្បត្តិរបស់មហាសេដ្ឋីរូបនេះដល់ ១៩៨ ពាន់លានដុល្លារ។ បច្ចុប្បន្ននាយកប្រតិបត្តិ Meta គឺជាអ្នកមានបំផុតទីបួនក្នុងពិភពលោក នេះបើយោងតាមទស្សនាវដ្ដី Forbes។ ចំណែកនាយកប្រតិបត្តិ Nvidia លោក Jensen Huang ក៏ទើបតែទទួលបានប្រាក់បន្ថែមចំនួន ៣.៣ ពាន់លានដុល្លារ បន្ទាប់ពីថ្ងៃបោះឆ្នោត ដោយបានជួយបង្កើនទ្រព្យសម្បត្តិសរុបរបស់លោកដល់ ១២២.១ ពាន់លានដុល្លារអាមេរិក៕

ប្រទេសចិន៖ ក្នុងរដូវរងារនេះប្រទេសចិនបានបង្ហាញផែនការថ្មីមួយ ដើម្បីពង្រីកសេដ្ឋកិច្ចទឹកកក និងព្រិល ដោយផ្តោតលើកីឡារដូវរងា ទេសចរណ៍ និងការផលិតឧបករណ៍ ដែលជាកត្តាជំរុញដ៏សំខាន់នៃកំណើនសេដ្ឋកិច្ច ដោយមានគោលដៅនាំយកទំហំឧស្សាហកម្មនេះដល់ ១.៥ ពាន់ពាន់លានយន់ (ប្រហែល ២០៩ ពាន់លានដុល្លារ) ក្នុងឆ្នាំ ២០៣០។

នេះបើយោងតាម China Daily ប្រទេសចិននឹងបង្កើតរមណីយដ្ឋានទេសចរណ៍ទឹកកក និងព្រិលដ៏ល្បីល្បាញទូទាំងពិភពលោកចំនួន ៣-៥ ទៀតនៅក្នុងខេត្តដូចជាទីក្រុងប៉េកាំង ហឺប៉ី ហីឡុងជាំង… និងតំបន់ស្វយ័តអ៊ុយហ្គួ ក្នុងគោលបំណងទាក់ទាញភ្ញៀវទេសចរឱ្យមកទស្សនាព្រិលទឹកកកនៅទីនេះច្រើនជាងគេ ធ្វើឱ្យសេដ្ឋកិច្ចនេះក្លាយជាចំណុចក្តៅនៃកំណើនថ្មី។

លើសពីនេះវិធានការថ្មីនេះក៏រួមបញ្ចូលផងដែរនូវការលើកកម្ពស់ការចូលរួមរបស់យុវជនក្នុងកីឡាព្រិល និងទឹកកក ការពង្រឹងហេដ្ឋារចនាសម្ព័ន្ធ និងខ្សែសង្វាក់ឧស្សាហកម្ម ក៏ដូចជាការបង្កើតសហគ្រាសឈានមុខគេក្នុងវិស័យនេះផងដែរ។ លោក Li Jing អគ្គនាយករងនៃរដ្ឋបាលកីឡាជាតិនៃប្រទេសចិនបានមានប្រសាសន៍ថា ឯកសារកំណត់គោលដៅមានពីរដំណាក់កាល រួមមានឆ្នាំ ២០២៧ និងឆ្នាំ ២០៣០៖ «នៅឆ្នាំ ២០២៧ ហេដ្ឋារចនាសម្ព័ន្ធនៃកន្លែងប្រកួតនឹងរៀបចំឱ្យស្ថាប័នកីឡាទឹកកក និងព្រិលមានភាពពេញលេញ។

ដូច្នេះសេវាកម្មនឹងមានភាពប្រសើរឡើងគួរឱ្យកត់សម្គាល់ ហើយកីឡាទឹកកក និងព្រិលក៏ត្រូវបានដាក់ពង្រាយកាន់តែទូលំទូលាយផងដែរ ដូច្នេះទំហំសរុបនៃសេដ្ឋកិច្ចព្រិល និងទឹកកកនៅឆ្នាំ ២០២៧ នឹងឈានដល់ ១.២ ពាន់ពាន់លានយន់។ ហើយនៅឆ្នាំ ២០៣០ ខ្សែសង្វាក់ឧស្សាហកម្មចម្បងនៃសេដ្ឋកិច្ចព្រិល និងទឹកកកក៏សម្រេចបាននូវកម្រិតខ្ពស់នៃការអភិវឌ្ឍន៍ដែលសម្របសម្រួល និងរួមបញ្ចូលគ្នា ដែលធ្វើឱ្យវាក្លាយជាចំណុចរីកចម្រើនដ៏សំខាន់មួយក្នុងការពង្រីកតម្រូវការក្នុងស្រុក ហើយទំហំសេដ្ឋកិច្ចសរុបនៃសេដ្ឋកិច្ចទឹកកកក៏អាចឈានដល់ ១.៥ ពាន់ពាន់លានយន់ផងដែរ។

ហេតុនេះលោក Li Jing ជឿជាក់ថាគម្រោងជំរុញការអភិវឌ្ឍសេដ្ឋកិច្ចទឹកកក និងព្រិលនៅក្នុងប្រទេសចិន នឹងទទួលបានជោគជ័យនៅឆ្នាំ២០៣០។ គួរបញ្ជាក់ដែរថា ក្នុងអំឡុងពេលថ្ងៃឈប់សម្រាកចូលឆ្នាំថ្មីរយៈពេលបីថ្ងៃនៅដើមឆ្នាំនេះ ភ្ញៀវទេសចរចំនួន ៣.០៥ លាននាក់បានមកទីក្រុងហាប៊ីន ដែលត្រូវបានគេស្គាល់ថាជា “គុជខ្យងទឹកកក និងព្រិល” របស់ប្រទេសចិន ជាមួយនឹងប្រាក់ចំណូលពីវិស័យទេសចរណ៍មានចំនួន ៥.៩១ ពាន់លានយន់ ដែលឈានដល់កម្រិតខ្ពស់បំផុតក្នុងប្រវត្តិសាស្ត្រ ទាំងចំនួនអ្នកទស្សនា និងចំណូលសរុប៕

ប្រទេសថៃ ៖ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានបង្ហាញក្តីរីករាយទៅកាន់លោក Donald Trump ដែលបានជាប់ឆ្នោតក្លាយជាប្រធានាធិបតីអាមេរិកថ្មី ហើយលោកស្រីជឿជាក់ថា វានឹងក្លាយជាឱកាសល្អរបស់ថៃជំរុញឱ្យការនាំចេញទំនិញកើនឡើង, ជំរុញ Soft Power និងភាពយន្តថៃទៅអាមេរិក និងពិភពលោក ។

កាលពីថ្ងៃទី៧ ខែវិច្ឆិកា ឆ្នាំ២០២៤ នៅទីក្រុងគុនមីង ប្រទេសចិន លោកស្រី ផេថងថាន នាយករដ្ឋមន្ត្រីថៃបានបង្ហាញក្តីរីករាយទៅកាន់លោក Trump ប្រធានាធិបតីអាមេរិកថ្មីថា មិនមែនមានតែពលរដ្ឋអាមេរិកទេដែលរីករាយ ប៉ុន្តែពលរដ្ឋថៃក៏រីករាយដែរ ។ យើងបានតាមដានការបោះឆ្នោតនៅថ្ងៃទី៥ ខែវិច្ឆិកា កន្លងមក រហូតដល់ប្រកាសលទ្ធផលឆ្នោត ។

លោកស្រីបន្តថា មនុស្សម្នាក់ៗមានភាពឈ្លាសវៃរៀងៗខ្លួន ហើយការឡើងកាន់តំណែងជាប្រធានាធិបតីអាមេរិករបស់លោក Trump នឹងជួយដល់ការនាំចេញទំនិញថៃឱ្យកាន់តែច្រើន ពីព្រោះប្រធានាធិបតីអាមេរិករូបនេះផ្តោតលើសេដ្ឋកិច្ចយ៉ាងខ្លាំង ហើយថៃក៏មានទំនាក់ទំនងពាណិជ្ជកម្មជាមួយអាមេរិកច្រើន ។ ហេតុនេះ វានឹងជាឱកាសល្អ ហើយថៃនឹងរក្សាទំនាក់ទំនងល្អជាមួយអាមេរិកដើម្បីបើកឱកាសឱ្យប្រទេសថៃ ។

ប្រទេសថៃនឹងអាចជំរុញ Soft Power របស់ខ្លួនទៅអាមេរិក ប៉ុន្តែលោកស្រីពុំចង់និយាយជាមុនទេ ដោយសារលោក Trump ទើបតែបានជាប់ឆ្នោតថ្មីៗ ។ រឿង Soft Power ភាពយន្តថៃ គឺខាងអាមេរិកមានជំនាញផ្នែកនេះ ដូចជា ៖ ការដឹកនាំថតភាពយន្ត និងសរសេរសាច់រឿង ហើយថៃអាចរៀនសូត្រពីអាមេរិក និងលក់ភាពយន្តឱ្យអាមេរិក ក៏ដូចជាប្រទេសនានាលើពិភពលោក ។

ដូចគ្នានេះ រដ្ឋមន្ត្រីក្រសួងពាណិជ្ជកម្មថៃ លោក ភិឆ័យ ណារីតថាផាន់ មានទំនុកចិត្តថា ពេលលោក Trump កាន់តំណែងជាប្រធានាធិបតីអាមេរិក នឹងជួយឱ្យការនាំចេញទំនិញរបស់ថៃ និងផលិតផលក្នុងស្រុកសរុប (GDP) កើនឡើង ។ លោកបានស្នើទៅគ្រប់ស្ថាប័នទាំងអស់វិភាគស្ថានការណ៍សេដ្ឋកិច្ចបច្ចុប្បន្ន និងប្រញាប់ស្វែងរកឱកាសពាណិជ្ជកម្ម និងការវិនិយោគ ។

ប្រទេសថៃនឹងទទួលបានផលប្រយោជន៍ ដោយសារការនាំចូលទំនិញចិនរបស់អាមេរិកបានធ្លាក់ចុះជាបន្តបន្ទាប់ ហើយថៃនឹងអាចនាំចេញទំនិញច្រើនទៅអាមេរិក ជំនួសទំនិញចិន ។ នាពេលឆាប់ៗនេះ ការនាំចេញទំនិញថៃនឹងកើនឡើងពី៤% ទៅ៥% នឹងជំរុញឱ្យ GDP កើនឡើងដូចគ្នា ហើយក្រសួងពាណិជ្ជកម្មនឹងព្យាយាមទាក់ទាញវិនិយោគអាមេរិក និងវិនិយោគមកពីប្រទេសផ្សេងទៀតមកវិនិយោគ ៕