ប្រទេសចិន៖ ទុរេនគឺជាផ្លែឈើមួយប្រភេទដែលប្រជាជនចិនភាគច្រើនចូលចិត្តបំផុតដោយសារតែវាមានរសជាតិឆ្ងាញ់ ផ្អែមមុត និងក្លិនឈ្ងុយ ធ្វើឱ្យហាងមួយចំនួនយកផ្លែនេះមកធ្វើជាភីហ្សា កំពុងទទួលបានការចាប់អារម្មណ៍ពេញបណ្តាញសង្គម។

លោក Joey Wat នាយកប្រតិបត្តិ Yum China ដែលជាក្រុមហ៊ុនភោជនីយដ្ឋានអាហាររហ័សចិនបាននិយាយថា ភីហ្សាទុរេនរបស់ខ្លួន បច្ចុប្បន្នគឺបានជាប់ចំណាត់ថ្នាក់លេខ ១ ក្លាយជាភីហ្សាលំដាប់កំពូលទូទាំងប្រទេសហើយ ដូច្នេះគិតមកដល់ពេលនេះ យើងលក់ភីហ្សាទុរេនបានជិត ៣០ លាន ដោយរកចំណូលបានរាប់ម៉ឺនដុល្លារជារៀងរាល់ថ្ងៃ។

ក្នុងរយៈពេលប៉ុន្មានឆ្នាំចុងក្រោយនេះ ប្រទេសចិនគឺបានក្លាយជាអ្នកប្រើប្រាស់ទុរេននាំមុខគេនៅអាស៊ី និងជាប្រទេសនាំចូលទុរេនធំជាងគេលើពិភពលោក ដោយបាននាំចូលទុរេនចំនួន ១.៤ លានតោនក្នុងឆ្នាំ ២០២៣ ដោយប្រទេសនេះបានបង្កើតនូវការកើនឡើង ៤០០% នៃតម្រូវការទុរេនទូទាំងពិភពលោក។ ទុរេនត្រូវបានគេចាត់ទុកថាជាអាហារប្រណីតនៅក្នុងប្រទេសចិន ដោយសារមនុស្សភាគច្រើននៅទីនោះពួកគេចូលចិត្តញ៉ាំផ្លែទុរេនណាស់ ប៉ុន្តែទោះជាយ៉ាងណាក៏មានមនុស្សមួយចំនួនតូចមិនចូលចិត្តផ្លែនេះដែរ។

គួរបញ្ជាក់ដែរថា ភីហ្សាទុរេនមិនមែនជាម៉ឺនុយថ្មីនោះទេ ក្រុមហ៊ុន Yum China បានដាក់លក់ភីហ្សាទុរេនតាំងពីប្រាំបីឆ្នាំមុនមកម្លេះ។ នៅក្នុងរបាយការណ៍ប្រចាំឆ្នាំ ២០២៣ ពួកគេបាននិយាយថា ម៉ឺនុយនេះបាននាំមកនូវប្រាក់ចំណូលយ៉ាងហោចណាស់ ១០០ លានដុល្លារចាប់តាំងពីពេលនោះមក។ កាលពីខែសីហា ប៊ឺហ្គឺសាច់គោដែលធ្វើពីម្សៅភីហ្សាដាក់ជាមួយទុរេន និងម្នាស់ក៏បានបង្ហាញខ្លួននៅលើមុខម្ហូប Pizza Hut នៅក្នុងប្រទេសចិនផងដែរ ហើយក្រុមហ៊ុនបាននិយាយថាវាលក់អស់យ៉ាងឆាប់រហ័សបន្ទាប់ពីការចេញលក់មានកំណត់។

ក្រុមហ៊ុនបច្ចុប្បន្នកំពុងព្យាយាមយ៉ាងសកម្មក្នុងការពង្រីកវិសាលភាពរបស់ខ្លួនទៅកាន់អ្នកប្រើប្រាស់ថ្នាក់កណ្តាលរបស់ប្រទេស ដោយបានសាងសង់ហាង KFC និង Pizza Hut ថ្មីជិត ១,៧០០ នៅឆ្នាំ ២០២៣ និងគ្រោងបើកហាងបន្ថែមទៀតពី ១,៥០០ ទៅ ១,៧០០ នៅឆ្នាំក្រោយនេះ៕

ប្រទេសហ្វីលីពីន ៖ កាលពីថ្ងៃទី៨ ខែវិច្ឆិកា ឆ្នាំ២០២៤ សារព័ត៌មានបរទេសរាយការណ៍ថា ត្រីរាប់ពាន់ក្បាលបានលោតពេញទឹកសមុទ្រព្រមៗគ្នានៅប្រទេសហ្វីលីពីន ហើយពលរដ្ឋក៏នាំគ្នាមកចាប់ត្រីច្រកស្បោងយកទៅបរិភោគ ។ ប៉ុន្តែពលរដ្ឋខ្លះទៀតបែរជាបារម្ភពីគ្រោះធម្មជាតិអាចនឹងកើតឡើងនៅប្រទេសហ្វីលីពីន នាពេលឆាប់ៗ ។

ក្នុងវីដេអូ គេបានឃើញត្រីតូចៗរាប់ពាន់ក្បាលនៅកោះសេប៊ូ (Cebu) លោតពេញទឹកសមុទ្រ ដែលបង្កឱ្យមានការភ្ញាក់ផ្អើលយ៉ាងខ្លាំងដល់ពលរដ្ឋហ្វីលីពីន និងភ្ញៀវទេសចរ ។ អ្នកខ្លះបានរត់ទៅចាប់ត្រីក្នុងទឹក និងត្រីលើឆ្នេរសមុទ្រដែលត្រូវទឹករលកបោក ខណៈអ្នកខ្លះទៀតប្រើប្រាស់ឧបករណ៍ផ្សេងៗចាប់ត្រីយ៉ាងសប្បាយរីករាយ ។

ពលរដ្ឋរស់នៅក្នុងតំបន់និយាយថា ហេតុការណ៍នេះបានកើតឡើងកាលពីព្រឹកថ្ងៃទី៣ ខែវិច្ឆិកា ឆ្នាំ២០២៤ ហើយគ្រប់គ្នាសប្បាយចិត្តណាស់ ដែលបានចាប់ត្រីយកទៅធ្វើម្ហូប ដោយពួកគេចាប់ត្រីបណ្តើរ ស្រែកហ៊ោបណ្តើរពេញឆ្នេរសមុទ្រ ។ ប៉ុន្តែអ្នកខ្លះទៀតបែរជាបារម្ភពីហេតុការណ៍នេះអាចកើតគ្រោះធម្មជាតិនៅលើពិភពលោក ឬជាប្រផ្នូលប្រាប់ពីហេតុការណ៍មិនល្អ ។

អ្នកជំនាញនិយាយថា គ្មានអ្វីត្រូវបារម្ភឡើយ ពីព្រោះវាតែងតែកើតឡើងតាមធម្មជាតិ ដោយសារការផ្លាស់ប្តូរអាកាសធាតុក្នុងសមុទ្រ ដូចជា ៖ ការផ្លាស់ប្តូរសីតុណ្ហភាព និងទិសដៅរលកសមុទ្រ ។ នៅកោះសេប៊ូ ប្រទេសហ្វីលីពីន ទើបតែមានខ្យល់ព្យុះបោកបក់យ៉ាងខ្លាំងក្លា ហើយរលកសមុទ្រមានកម្លាំងខ្លាំង ឬទឹកសមុទ្រកើនឡើងខ្ពស់ ទើបរុញហ្វូងត្រីទាំងនេះមកកាន់ឆ្នេរសមុទ្រ ។ ពេលខ្លះ ត្រីនឹងជាប់ក្នុងទឹករាក់ ឬត្រូវរលកសមុទ្ររុញមកលើឆ្នេរខ្សាច់ ។

គួរបញ្ជាក់ថា ពលរដ្ឋហ្វីលីពីនហៅត្រីតូចៗទាំងនេះថា «Lupoy» ដែលតែងតែរស់នៅជាហ្វូងក្នុងសមុទ្រភាគខាងលិចប្រទេសហ្វីលីពីន ។ ក្រៅពីនេះ វាក៏បានរស់នៅកន្លែងផ្សេងទៀតផងដែរ ដែលភ្ញៀវទេសចរចូលចិត្តមកជ្រមុជទឹក ៕

ភ្ញៀវទេសចររាប់ពាន់គឺចូលចិត្តទៅទស្សនាព្រៃក្លូនដ៏ធំមួយនេះណាស់ ព្រោះវាមានលក្ខណៈពិសេសជាច្រើនដែលយើងគួរតែស្វែងយល់។ Pando aspen គឺជាព្រៃតែមួយគត់ដែលបង្កើតឡើងដោយដើមឈើក្លូនរាប់ម៉ឺនដើម លាតសន្ធឹងលើផ្ទៃដី ១០៦ ហិចតា ក្នុងរដ្ឋ Utah ប្រទេសអាមេរិក។ ដើមឈើក្លូននៅទីនេះមានប្រហែល ៤៧,០០០ ដើមដែលតភ្ជាប់ដោយប្រព័ន្ធឫសដ៏ធំ មើលទៅដូចជាព្រៃធម្មតា។

យោងតាមអ្នកវិទ្យាសាស្ត្រសហរដ្ឋអាមេរិក បានបញ្ជាក់ថាព្រៃ Pando aspen ក្នុងរដ្ឋ Utah មានអាយុកាល ១៦,០០០ ទៅ ៨០,០០០ ឆ្នាំហើយ គឺជាព្រៃក្លូនដ៏ធំមានតែមួយគត់ក្នុងលោក និងជាព្រៃមួយក្នុងចំណោមព្រៃចំណាស់ជាងគេបំផុតនៅលើភពផែនដី។ ក្លូនគឺជាបច្ចេកវិទ្យាដែលអ្នកវិទ្យសាស្រ្តប្រើដើម្បីបង្កើតសារពាង្គកាយមួយរឺច្រើនដែលមានព័ត៌មានសេនេទិច រឺលក្ខណៈដូចគ្នាបេះបិទទៅនឹងសារពាង្គកាយដើម។

នេះមានន័យថាគេអាចក្លូនហ្សែន កោសិកា ឬជាលិកាដើមឈើណាដែលផុតពូជរាប់លានឆ្នាំ ឱ្យកើតឡើងជាថ្មីម្តងទៀត ដែលនេះហើយជាលក្ខណៈពិសេសរបស់វាបានកំពុងទាក់ទាញភ្ញៀវទេសចររាប់ពាន់នាក់។ ដូច្នេះប្រសិនបើលោកអ្នកចង់ឃើញដើមឈើចំណាស់ៗ និងធំៗមានអាយុកាលរាប់ពាន់ឆ្នាំ អាចមកទស្សនាព្រៃ Pando aspen នេះបាន។

នៅកំឡុងពេលរដូវក្តៅ អ្នកទស្សនាអាចដើរលេងក្នុងព្រៃ Pando aspen ជាមួយនឹងស្លឹកពណ៌បៃតងដ៏រស់រវើក ហើយនៅពេលរដូវរងារអ្នកទស្សនាអាចឃើញស្លឹកលឿងភ្លឺចែងចាំង បង្កើតឱ្យមានបទពិសោធន៍ដ៏ល្អឥតខ្ចោះដែលមិនអាចបំភ្លេចបាន។ បច្ចុប្បន្នព្រៃនេះគឺត្រូវបានគេថែទាំយ៉ាងដិតដល់បំផុត ដោយសារវាជាព្រៃក្លូនមានតែមួយគត់ក្នុងលោក ជាមួយលក្ខណៈពិសេស ប្លែកពីគេបានកំពុងទាក់ទាញភ្ញៀវទេសចរជុំវិញពិភពលោកឱ្យមកទស្សនាតំបន់នេះឥតឈប់ឈរជារៀងរាល់ថ្ងៃ៕

ប្រទេសចិន ៖ នៅដើមខែវិច្ឆិកា ឆ្នាំ២០២៤ ហាងកាហ្វេ «Gushi Cliff Coffee» ស្ថិតនៅទីក្រុងហ្វូចូវ ខេត្តហ្វូចៀន ប្រទេសចិន បានប្រកាសអញ្ជើញអតិថិជនដែលមិនខ្លា.ចទីខ្ពស់ មកទទួលយករសជាតិកាហ្វេនៅកណ្តាលច្រាំងថ្មភ្នំមានកម្ពស់ខ្ពស់ជាងអគារ២០ជាន់ ។ ប៉ុន្តែអតិថិជនមួយចំនួនពុំពេញចិត្តនឹងតម្លៃកាហ្វេរបស់ហាងទេ ។

រយៈពេល១ខែកន្លងមក ហាងកាហ្វេ «Gushi Cliff Coffee» បានល្បីល្បាញយ៉ាងខ្លាំងក្នុងបណ្តាញសង្គមចិន ដោយសារហាងនេះលក់កាហ្វេថ្លៃកប់ពពក និងស្ថិតនៅទីតាំងខ្ពស់បំផុត ។ អតិថិជនមកផឹកកាហ្វេនៅទីនេះនិយាយថា ពួកគេស្រៀវឆ្អឹងខ្នងខ្លាំងណាស់ ។ កាហ្វេ Americano ១កែវ មានតម្លៃរហូតដល់៥៦ដុល្លារអាមេរិក ហើយកែវកាហ្វេ និងកាហ្វេ គ្មានអ្វីពិសេសឡើយ ប៉ុន្តែអតិថិជនអាចគយគន់ទេសភាពនៅជុំវិញហាងដ៏ស្រស់ស្អាតពីទីខ្ពស់ ។

ហាងនេះស្ថិតនៅលើច្រាំងថ្មភ្នំកម្ពស់១៣០ម៉ែត្រ និងជាប់សមុទ្រ ហើយអតិថិជនអាចឡើងមកផឹកកាហ្វេតាមជណ្តើរដែក បន្ទាប់មក អង្គុយសំយ៉ុងជើងចុះក្រោមមើលទឹកសមុទ្រ ។ ភ្ញៀវទេសចរខ្លះអាចពេញចិត្តនឹងកាហ្វេតម្លៃខ្ពស់នេះ ពីព្រោះបានបានគយគន់ផ្ទៃទឹកសមុទ្រ និងឆ្នេរសមុទ្រពេលផឹកកាហ្វេ ។

អ្នកនាង យេ គុនគុន អាយុ៣០ឆ្នាំ ជាភ្ញៀវទេសចរ និយាយថា ៖ «បើចង់មកផឹកកាហ្វេនៅទីនេះ ត្រូវចុះពីលើច្រាំងថ្មភ្នំកម្ពស់១៣០ម៉ែត្រ ឬស្មើអគារ២០ជាន់ ដោយមានមគ្គុទ្ទេសក៍ទេសចរជួយប្រាប់ផ្លូវ ។ ពីដំបូង ខ្ញុំខ្លាចខ្លាំងណាស់ពេលឃើញច្រាំងថ្មភ្នំ តែខ្ញុំឈប់ភ័យដោយសារមានមគ្គុទ្ទេសក៍ទេសចរ» ។

នាងបានចំណាយពេល៣០នាទី ទើបទៅដល់ហាងកាហ្វេនៅកណ្តាលច្រាំងថ្មភ្នំ ។ ហាងកាហ្វេ «Gushi Cliff Coffee» បើកកាលពីថ្ងៃទី១ ខែតុលា ឆ្នាំ២០២៤ និងដាក់ឈ្មោះតាមទីក្រុងនៅក្បែរនេះ គឺទីក្រុង Gushi ។ កាលពីមុន គ្មានអ្នកណាស្គាល់ទីនេះទេ ពីព្រោះវាសម្បូរដោយថ្មនៅក្បែរឆ្នេរសមុទ្រ ប៉ុន្តែក្រោយមក ក៏មានហាងលក់ភេសជ្ជៈ និងកន្លែងបោះតង់ ហើយអាជ្ញាធរព្យាយាមជំរុញទីនេះឱ្យក្លាយជាតំបន់ទេសចរណ៍ ។

ក្រោយពីអ្នកនាង យេ បានរៀបរាប់ពីបទពិសោធន៍របស់ខ្លួនក្នុងបណ្តាញសង្គម អ្នកលេងបណ្តាញសង្គមផ្សេងទៀតចង់មកផឹកកាហ្វេនៅទីនេះដែរ ប៉ុន្តែអ្នកខ្លះពុំចង់ផឹកឡើយ ដោយសារទីតាំងគ្មានសុវត្ថិភាព ។

ចំណែកម្ចាស់ហាងកាហ្វេនិយាយថា មានអតិថិជនប្រមាណ៥០នាក់មកផឹកកាហ្វេក្នុងថ្ងៃធម្មតា ហើយនៅថ្ងៃចុងសប្តាហ៍ មានអតិថិជនច្រើនជាងនេះទ្វេដង ប៉ុន្តែអតិថិជនត្រូវកក់១ថ្ងៃមុន ។ កាហ្វេមានតម្លៃរហូតដល់៥៦ដុល្លារអាមេរិក គឺអតិថិជននឹងទទួលបានការធានាសុវត្ថិភាព, ឧបករណ៍ការពារខ្លួន, ភេសជ្ជៈ, មគ្គុទ្ទេសក៍ទេសចរ និងបទពិសោធន៍ថ្មី ។ លើសពីនេះ អតិថិជននឹងអាចមើលឃើញច្រកសមុទ្រតៃវ៉ាន់ ដែលបែងចែកចិន និងតៃវ៉ាន់ ។

អតិថិជនខ្លះបានមកជប់លៀង ឬមកសុំសង្សាររៀបការក៏មាន ហើយម្ចាស់ហាងសង្ឃឹមថា វានឹងជួយជំរុញភ្ញៀវទេសចរមកកម្សាន្តនៅតំបន់ជនបទកាន់តែច្រើន ។ បើទោះជាមានមតិខ្លះរិះគន់ពីតម្លៃកាហ្វេក្តី ប៉ុន្តែម្ចាស់ហាងបញ្ជាក់ថា ហាងរបស់ខ្លួនផ្តល់នូវបទពិសោធន៍ខ្ពស់បំផុត និងអារម្មណ៍ប្លែកតែមួយគត់លើពិភពលោក ៕

ប្រទេសប្រេស៊ីល៖ សត្វខ្យាដំរីជាច្រើនក្បាលបានកំពុងកើនឡើងខ្លាំងគួរឱ្យកត់សម្គាល់នៅក្នុងប្រទេសប្រេស៊ីល ដែលបង្កឱ្យមានការព្រួយបារម្ភ និងបង្កគ្រោះ.ថ្នាក់ដល់មនុស្ស។

យោងតាម Yahoo News ខ្យាដំរីគឺជាសត្វពិសដ៏សាហាវបំផុតកំពុងគំរា.មកំហែ.ងប្រទេសប្រេស៊ីល ដែលបង្ខំឱ្យប្រទេសនេះត្រូវផលិតថ្នាំជាបន្ទាន់ និងបង្កើនតម្រូវការថ្នាំបន្សាបយ៉ាងឆាប់រហ័សបំផុត។

Thiago Chiariello អ្នកសម្របសម្រួលផលិតកម្មនៅនាយកដ្ឋានពិសោធន៍ថ្នាំខ្យាដំរីនៅវិទ្យាស្ថាន Butantan ក្នុងទីក្រុង Sao Paulo បាននិយាយថា មូលហេតុដែលសត្វខ្យាដំរីកើនឡើងគឺដោយសារបរិយាកាសក្តៅ ដូច្នេះការរំលាយអាហាររបស់សារពាង្គកាយទាំងនេះក៏កើនឡើង ធ្វើឱ្យពួកវាកាន់តែសកម្ម បរិភោគកាន់តែច្រើន និងបន្តពូជឥតឈប់ឈរ។ លើសពីនេះ ទីក្រុងក៏បង្កើនចំនួនសត្វកន្លាតដើម្បីកាត់បន្ថយសត្វមួយចំនួន ខណៈពេលដែលសត្វនេះគឺជាអាហារឆ្ងាញ់សម្រាប់ខ្យាដំរី ដែលនេះធ្វើឱ្យស្ថានភាពកាន់តែធ្ងន់ធ្ងរ។

ទន្ទឹមនឹងនេះទីក្រុងក៏បង្កើនកាកសំណល់ ធ្វើឱ្យខ្យាដំរីមានឱកាសក្នុងការរីករាលដាលខ្លាំង ដែលបង្កគ្រោះថ្នាក់កាន់តែច្រើនដល់មនុស្ស។ កាលពីឆ្នាំមុន មានអ្នកស្លាប់ចំនួន ១៥២ នាក់ដោយសារខ្យាដំរីខាំនៅក្នុងប្រទេសប្រេស៊ីល ខណៈដែលចំនួនពស់ចឹកមានចំនួន ១៤០ ក្បាល។ ហើយក្នុងឆ្នាំ ២០១៩ ក៏មានអ្នកស្លាប់ដោយសារខ្យាដំរីខាំដែរ ប៉ុន្តែមានត្រឹមតែ ៩៥ នាក់ប៉ុណ្ណោះ។ យោងតាមក្រសួងសុខាភិបាលរបស់ប្រទេសប្រេស៊ីល សត្វខ្យាដំរីសរុបចំនួនជាង ២០០,០០០ ក្បាលត្រូវបានកត់ត្រាកាលពីឆ្នាំមុន ពោលគឺកើនឡើង ២៥០% ធៀបនឹងទសវត្សរ៍មុន។ ដូច្នេះជាមធ្យមពួកវាកើនឡើងជិត ៥៥០ ក្បាលក្នុងមួយថ្ងៃ។

គួរបញ្ជាក់ដែរថា នៅពេលខ្យាដំរីខាំមនុស្សពេញវ័យដែលមានសុខភាពល្អអាចជួបប្រទះនឹងរោគសញ្ញាស្រាលទៅមធ្យម រួមទាំងការឈឺចាប់ ក្អួត បែកញើសខ្លាំង និងញ័រ។ ប៉ុន្តែមានរោគសញ្ញាធ្ងន់ធ្ងរជាងនេះទៀត ដូចជាការប្រកាច់ ការប្រមូលផ្តុំសារធាតុរាវនៅក្នុងសួត ជំងឺខ្សោយបេះដូង និងគាំងបេះដូង ដែលអាចបណ្តាលឱ្យស្លាប់បាន ជាពិសេសចំពោះកុមារ និងមនុស្សចាស់។ ទោះជាយ៉ាងណា បច្ចុប្បន្នប្រទេសនេះកំពុងផលិតថ្នាំបន្សាបហើយ ដើម្បីកាត់បន្ថយអត្រាមនុស្សស្លាប់៕

ប្រទេសឡាវ ៖ ការដាំដំណាំទុរេននៅប្រទេសឡាវបានទទួលជោគជ័យហើយនៅឆ្នាំ២០២៤ ក្រោយពីបានព្យាយាមអស់រយៈពេលជាច្រើនឆ្នាំកន្លងមក ។ បច្ចុប្បន្ន ឡាវកំពុងតែស្វែងរកឱកាសនាំចេញទុរេនទៅប្រទេសចិន ដែលជាទីផ្សារមានតម្រូវការទុរេនច្រើនបំផុតលើពិភពលោក ។

បើទោះជាការដាំដុះ និងការនាំចេញទុរេនបានកើនឡើងយ៉ាងឆាប់រហ័សក្នុងប្រទេសជាច្រើននៅតំបន់អាស៊ីអាគ្នេយ៍ក្តី ប៉ុន្តែប្រទេសឡាវទើបតែចាប់ផ្តើមដាំទុរេនក្នុងចម្ការធំៗកាលពីប៉ុន្មានឆ្នាំចុងក្រោយនេះ ។

លោក Bounthieng Latthanavong នាយកសមាគមធុរកិច្ចកសិកម្មឡាវ បានថ្លែងក្នុងអំឡុងពេលប្រជុំរវាងសមាគមជាមួយអ្នកតំណាងកសិករដាំទុរេន និងអ្នកតំណាងនាំចូលទិន្នផលកសិកម្មចិន កាលពីខែសីហា ឆ្នាំ២០២៤ ថា ការដាំទុរេននៅប្រទេសឡាវ គឺអនុវត្តតាមជំនាញបច្ចេកទេសច្រើនជាងមុន ។ ហេតុនេះ ឡាវកំណត់គោលដៅថា នឹងជំរុញឱ្យទុរេនឡាវអាចនាំចេញទៅកាន់ពិភពលោក ។

បើទោះជាការដាំទុរេននៅឡាវអនុវត្តតាមបច្ចេកទេស និងរីកចម្រើនជាងមុនក្តី ប៉ុន្តែឡាវពុំទាន់ទទួលបានការអនុញ្ញាតឱ្យនាំចេញទុរេនទៅចិននៅឡើយទេ ។ ទោះយ៉ាងណា ឡាវជឿជាក់ថា គោលដៅរបស់ខ្លួននៅមិនឆ្ងាយ គឺឡាវនឹងអាចនាំចេញទុរេនទៅចិន នាពេលឆាប់ៗ ។

លោក Bounchanh Kombounyasith មន្ត្រីអគ្គនាយកដ្ឋានកសិកម្មឡាវនិយាយថា ឯកសារសុំការអនុញ្ញាតនាំចេញទុរេនទៅក្រៅប្រទេស គឺយើងបានត្រៀមរួចរាល់អស់ហើយ មិនយូរទេ ទុរេនឡាវនឹងបាននាំចេញទៅចិន ។

ចិនជាប្រទេសនាំចូលទុរេនច្រើនបំផុតលើពិភពលោក បានកុម្ម៉ង់ទិញទុរេនរហូតដល់១លាន៤សែនតោន ស្មើទឹកប្រាក់៦ពាន់៧រយលានដុល្លារអាមេរិកកាលពីឆ្នាំ២០២៣ ហើយប្រទេសលក់ទុរេនឱ្យចិនច្រើនបំផុត គឺថៃ និងវៀតណាម ។ នៅត្រីមាសទី២ ឆ្នាំ២០២៤ ចិនបានទិញទុរេនថៃរហូតដល់៧៥% ខណៈទុរេន២៥% ទៀត ជារបស់វៀតណាម ។

តម្រូវការទុរេនកាន់តែច្រើនរបស់ចិនបានជួយជំរុញដល់ការដាំដុះទុរេននៅតំបន់អាស៊ីអាគ្នេយ៍ ក្នុងនោះកសិករវៀតណាម និងថៃ កំពុងតែបើកប្រាក់ពីមុខរបរដាំទុរេនលក់ឱ្យចិន ។ ដូចគ្នានេះ វានឹងជួយជំរុញដល់ការដាំទុរេននៅឡាវក្នុងទ្រង់ទ្រាយធំផងដែរ ដើម្បីជួយដល់សេដ្ឋកិច្ចឡាវ នាថ្ងៃអនាគត ៕