Cassius ដែលជាក្រពើទឹកប្រៃប្រវែងជាង ៥ ម៉ែត្រនិងមានអាយុជាង ១១០ ឆ្នាំឥឡូវនេះវាបានបាត់.បង់.ជីវិតហើយដោយសារបញ្ហាសុខភាព។
Cassius ដែលជាក្រពើធំជាងគេបំផុតរបស់ពិភពលោកបានស្លា.ប់បន្ទាប់ពីសុខភាពរបស់វាបានធ្លាក់ចុះយ៉ាងឆាប់រហ័សនៅពាក់កណ្តាលខែតុលា នេះបើយោងតាមការចុះផ្សាយរបស់សារព័ត៌មានបរទេស BBC។ ក្រពើទឹកប្រៃប្រវែង ៥.៤៨ ម៉ែត្រ បានទទួលកំណត់ត្រាពិភពលោក Guinness សម្រាប់ក្រពើដ៏ធំបំផុតនៅលើពិភពលោកក្នុងឆ្នាំ ២០១១។

Cassius បានរស់នៅក្នុងសួនសត្វ Marineland Melanesia Crocodile Habitat លើកោះ Green របស់ប្រទេសអូស្ត្រាលីតាំងពីឆ្នាំ ១៩៨៧ មកម្លេះ។ វាត្រូវបានគេចាប់បាននៅលើទន្លេ Finniss ក្បែរ Darwin ក្នុងឆ្នាំ ១៩៨៤ ដោយសារតែចរិតកាចសា.ហាវរបស់វាសម្លាប់មនុស្សច្រើន ដូច្នេះទើបវាត្រូវបានគេចាប់ចូលទ្រុង។ អ្នកតំណាងម្នាក់របស់ Marineland Melanesia បាននិយាយថា “ក្រពើយក្សនេះបានបង្កបញ្ហាគ្រប់ប្រភេទពីការចាប់ និងស៊ីសាច់សត្វ រហូតដល់ការវាយលុកទូក”។

បន្ទាប់ពីថែទាំវាអស់រយៈពេលជាច្រើនឆ្នាំ ក្រពើយក្ស Cassius ក៏មានបញ្ហាសុខភាព ហើយក៏ត្រូវបានផ្លាស់ទៅកន្លែងថែទាំជំនួយផ្សេងទៀតនៅទីក្រុង Cairns ប្រទេសអូស្ត្រាលី មិនយូររប៉ុន្មានវាក៏បានបាត់បង់ជីវិត។ យោងតាមអ្នកជំនាញក្រពើនេះ មានអាយុច្រើនណាស់ ដោយពួកគេគិតថា ក្រពើយក្សអាចមានអាយុលើសពី ១១០ ឆ្នាំនៅពេលដែលវាងាប់ ព្រោះនៅពេលចាប់ខ្លួន Cassius ត្រូវបានគេប៉ាន់ស្មានថាមានអាយុចន្លោះពី ៣០ ទៅ ៨០ ឆ្នាំហើយ។

ទោះជាយ៉ាងណា Toody Scott បុគ្គលិកម្នាក់ដែលមើលថែ Cassius នៅ Marineland Crocodile Park បាននិយាយថា “មិនមានវិធីណាដើម្បីដឹងពីអាយុពិតរបស់ Cassius ទេ ពីព្រោះវាបានកើតនៅក្នុងព្រៃ ហើយអាយុរបស់វាគ្រាន់តែជាការប៉ាន់ស្មានប៉ុណ្ណោះ” ។ ថ្វីត្បិតតែវាមានទំហំធំក៏ដោយ Cassius មិនមែនជាក្រពើធំបំផុតក្នុងប្រវត្តិសាស្ត្រនោះទេ។ កំណត់ត្រាក្រពើទឹកប្រៃធំបំផុតក្នុងប្រវត្តិសាស្ត្រនោះគឺបានទៅលើក្រពើ Lolong ដែលចាប់បានក្នុងប្រទេសហ្វីលីពីនក្នុងខែកញ្ញា ឆ្នាំ ២០១១ ជាមួយប្រវែង ៦,១៧ ម៉ែត្រ មុននឹងស្លាប់ក្នុងឆ្នាំ ២០១៣៕

សហរដ្ឋអាមេរិក ៖ កាលពីថ្ងៃទី១៦ ខែធ្នូ ឆ្នាំ២០២៤ លោក Donald Trump ប្រធានាធិបតីអាមេរិកថ្មីបានប្រាប់ទៅលោក Volodymyr Zelenskyy ប្រធានាធិបតីអ៊ុយក្រែន ថា គួរតែត្រៀមខ្លួនចរចាបញ្ចប់សង្គ្រា.ម ជាមួយប្រធានាធិបតីរុស្ស៊ី លោក Vladimir Putin ដោយសារសង្គ្រា.ម នេះបានអូសបន្លាយពេលជិត៣ឆ្នាំ ។

លោក Trump ថ្លែងថា ត្រូវតែចរចាគ្នាបញ្ចប់សង្គ្រាម ហើយលោកនឹងជជែកជាមួយប្រធានាធិបតីរុស្ស៊ី និងអ៊ុយក្រែន ដើម្បីបញ្ចប់សង្គ្រាម ។ លោកមានអារម្មណ៍ទុក្ខព្រួយពេលឃើញរូបភាពការសម្លាប់រង្គាលក្នុងសង្គ្រាម ហើយវាធ្វើឱ្យលោកនឹកឃើញដល់សង្គ្រាមនៅអាមេរិក ចាប់ពីឆ្នាំ១៨៦១ ដល់ឆ្នាំ១៨៦៥ ។ យើងនឹងចំណាយពេលរហូតដល់១០០ឆ្នាំ ដើម្បីស្តារទីក្រុងខូចខាតដោយសារសង្គ្រាមឡើងវិញ ។

លោក Trump ចង់ឱ្យសង្គ្រាមរវាងអ៊ុយក្រែន និងរុស្ស៊ីបញ្ចប់ឆាប់ៗ ។ លោកបានផ្តល់សម្ភាសន៍ជាមួយទស្សនាវដ្តីដែលបានផ្សព្វផ្សាយកាលពីសប្តាហ៍ទី២ ខែធ្នូ នេះថា លោកមានផែនការបញ្ចប់សង្គ្រាម ប៉ុន្តែបើនិយាយចេញ គឺផែនការរបស់លោកនឹងគ្មានប្រយោជន៍ ។

ក្រោយការបង្ហាញគោលជំហររបស់ខ្លួនពីសង្គ្រាមនៅអ៊ុយក្រែន លោក Trump បាននិយាយមកកាន់សារព័ត៌មានក្នុងថ្ងៃដដែលថា លោកនឹងពុំអញ្ជើញប្រធានាធិបតីអ៊ុយក្រែនមកចូលរួមពិធីកាន់តំណែងរបស់លោក នៅថ្ងៃទី២០ ខែមករា ឆ្នាំ២០២៥ ដែលគ្រោងរៀបចំនៅអគាររដ្ឋសភាក្នុងទីក្រុងវ៉ាស៊ីនតោនទេ ។ លោកថា ៖ «ខ្ញុំពុំបានអញ្ជើញលោក Volodymyr ប៉ុន្តែលោកអាចមកចូលរួមបាន បើចង់» ។

សារព័ត៌មានអាមេរិករាយការណ៍ថា លោក Trump បានអញ្ជើញមេដឹកនាំចិន លោក ស៊ី ជិនពីង មកចូលរួមពិធីកាន់តំណែងរបស់ខ្លួន តាំងពីដើមខែវិច្ឆិកា ឆ្នាំ២០២៤ ក្រោយពីលោកឈ្នះឆ្នោត ។ ប៉ុន្តែគេពុំដឹងថា តើមេដឹកនាំចិននឹងមកចូលរួមតាមការអញ្ជើញដែរឬទេ? គេរំពឹងថា ឯកអគ្គរដ្ឋទូតចិននៅអាមេរិក នឹងនាំភរិយាមកចូលរួមពិធីកាន់តំណែងរបស់លោក Trump ៕

ប្រទេសដែលមានសុខសន្តិភាពគឺផ្អែកលើត្តាធំៗចំនួន ៩ រួមមាន៖ សេរីភាពក្នុងការរស់នៅ, ប្រាក់ចំណូលប្រជាជន, កត្តាសុខភាព, ការគាំទ្រពីសង្គម, ភាពសប្បុរសធម៌របស់ប្រជាជនទូទៅ, គ្មានអំពើពុករលួយ, អត្រាឧក្រិដ្ឋកម្មទាប, គ្មានអំពើហិង្សាផ្នែកនយោបាយ ក៏ដូចជាគ្មានអំពើហិង្សាជាតិសាសន៍ជាដើម។ នេះបើយោងតាមការចុះផ្សាយរបស់ Visual Capitalist បានឱ្យដឹងថា ក្នុងចំណោម ១៩៥ ប្រទេសមានតែ ១០ ប៉ុណ្ណោះដែលស្ថិតក្នុងបញ្ជីប្រទេសមានសុខសន្តិភាពបំផុតក្នុងពិភពលោកប្រចាំឆ្នាំ ២០២៤ ដែលក្នុងនោះរួមមាន៖

១.ប្រទេសអ៊ីស្លង់៖ គឺជាប្រទេសដែលមានសុខសន្តិភាពបំផុតនៅលើពិភពលោក ឈរនៅលេខរៀងទីមួយប្រចាំឆ្នាំ ២០២៤។ ប្រទេសនេះត្រូវបានគេចាត់ទុកថា ជាប្រទេសដែលមានការរីកចម្រើនខ្លាំង មានអត្រាអ្នកចេះអក្សរ៩៩% មានលទ្ធិប្រជាធិបតេយ្យកម្រិតខ្ពស់ គោរពសមភាពយេនឌ័រ ហើយអ្នកជាប់ពន្ធនាគាមានកម្រិតទាបបំផុត។

២.ប្រទេសអៀរឡង់៖ ប្រទេសអៀរឡង់មិនខុសពីប្រទេសអ៊ីស្លង់ប៉ុន្មានទេ ប្រទេសនេះមានការយល់ដឹងខ្ពស់ មានកម្រិតទាបនៃឧក្រិដ្ឋកម្ម មានការគំរាមកំហែងតិចតួចនៃអំពើហឹង្សាវប្បធម៌ ឬអំពើភេរវកម្ម។ ដូច្នេះភ្ញៀវទេសចរគឺមានសុវត្ថិភាពបំផុតក្នុងការដើរលេងជុំវិញប្រទេសអៀរឡង់គ្រប់ពេលវេលាដោយមិនមានការភ័យខ្លាច។

៣.ប្រទេសអូទ្រីស៖ គឺជាប្រទេសដែលមានសុខសន្តិភាពបំផុតទី ៣ ក្នុងពិភពលោកសម្រាប់ឆ្នាំ ២០២៤។ ប្រទេសស្ថិតក្នុងតំបន់អឺរ៉ុបនេះ គឺជាកន្លែងល្អប្រសើរក្នុងការរស់នៅ ដោយសារតែប្រទេសនេះមានបទល្មើសទាប និងអត្រាមនុស្សឃាតតិចតួច។ ប្រទេសអូទ្រីស ត្រូវបានគេដឹងថា មានការថែរក្សាអនាម័យ និងការការពារបរិស្ថានខ្ពស់។ ភាពស្រស់ស្អាត និងប្រវត្តិសាស្រ្តនៃស្ថាបត្យកម្ម ប្រទេសអូទ្រីសបានទាក់ទាញភ្ញៀវទេសចររាប់លាននាក់ជារៀងរាល់ឆ្នាំ។

៤.ប្រទេសនូវែលសេឡង់៖ នូវែលសេឡង់មានការរីកចម្រើនជឿនលឿនយ៉ាងពិតប្រាកដ។ អ្នកជាប់ពន្ធនាគារក្នុងប្រទេសនេះមានតិចតួចណាស់ ហើយប្រទេសនេះក៏មានទំនាក់ទំនងល្អជាមួយប្រទេសជិតខាងផងដែរ។ ប្រទេសនូវែលសេឡង់ មានប្រព័ន្ធអប់រំលំដាប់ពិភពលោក និងការថែទាំសុខភាពកម្រិតខ្ពស់ ធ្វើឱ្យប្រទេសនេះក្លាយជាប្រទេសមានសុខសន្តិភាពបំផុតក្នុងពិភពលោកសម្រាប់ឆ្នាំ ២០២៤។

៥.ប្រទេសសិង្ហបុរី៖ ប្រទេសអាស៊ីអាគ្នេយ៍មួយនេះវិញក៏មិនធម្មតាដែរ មានអត្រាឧក្រិដ្ឋកម្មទាបបំផុតមួយក្នុងពិភពលោក ប្រហែលដោយសារតែការពិន័យធ្ងន់ធ្ងរដែលត្រូវបានចេញសម្រាប់ឧក្រិដ្ឋកម្មតូចតាច។ រដ្ឋាភិបាល និងប៉ូលីសគ្រប់គ្រងយ៉ាងតឹងរ៉ឹងនូវកាំភ្លើង និងអាវុធផ្សេងទៀត ហើយឧក្រិដ្ឋកម្មហិង្សា និងការប្រឈមមុខដាក់គ្នាគឺកម្រមានណាស់នៅក្នុងប្រទេសសិង្ហបុរី។

៦.ប្រទេសស្វីស៖ អ្នកណាមិនស្គាល់ប្រទេសស្វីសតែងតែឈនៅតំណែងខ្ពស់ជានិច្ច ទោះជាយ៉ាងណានៅឆ្នាំនេះប្រទេសស្វីសឈរត្រឹមចំណាត់ថ្នាក់លេខ ៦ ប៉ុណ្ណោះ។ ប្រទេសស្វីសជាកន្លែងដែលមានប្រព័ន្ធអប់រំល្អ ពិសេសវិស័យសុខាភិបាល។ ស្វីសជាប្រទេសដែលចូលចិត្តប្រភពថាមពលកកើតឡើងវិញ និងថែរក្សាបរិស្ថាន។

៧.ប្រទេសព័រទុយហ្គាល់៖ ដែនដីកំណើតរបស់កំពូលកីឡាករឆ្នើម Cristiano Ronaldo ជាប់ចំណាត់ថ្នាក់ទី ៧ ក្នុងចំណោមប្រទេសដែលមានសន្តិភាពបំផុតសម្រាប់ឆ្នាំ ២០២៤។ ប្រទេសព័រទុយហ្គាល់បានងើបឡើងវិញនៃសេដ្ឋកិច្ច ដោយបានកាត់បន្ថយអត្រាគ្មានការងារធ្វើរបស់ខ្លួនពីជាង ១៧% ទៅក្រោម ៧%។ ព័រទុយហ្កាល់ជាប់ចំណាត់ថ្នាក់ជាប្រទេសល្អបំផុតសម្រាប់ការចូលនិវត្តន៍។

៨.ប្រទេសដាណឺម៉ាក៖ ចំណាត់ថ្នាក់លេខ ៨ បានទៅលើប្រទេសដាណឺម៉ាក គឺជាប្រទេសមួយដែលមានសុខសន្តិភាព និងរីករាយបំផុតនៅក្នុងពិភពលោក។ ដាណឺម៉ាកគឺជាប្រទេសមានកម្រិតសមភាពខ្ពស់ និងស្មារតីទទួលខុសត្រូវរួមចំពោះសុខុមាលភាពសង្គម ដែលជាគុណសម្បត្តិពីររួមចំណែកដល់អារម្មណ៍សុវត្ថិភាព និងសុភមង្គលរបស់ពលរដ្ឋរបស់ខ្លួន។ អំពើពុករលួយគឺកម្រមានណាស់នៅក្នុងអាជីវកម្ម ឬនយោបាយរបស់ដាណឺម៉ាក ដោយសារភាពស្មោះត្រង់ និងទំនុកចិត្តគឺជាអាទិភាពចម្បង ជាហេតុធ្វើឱ្យប្រទេសនេះជាប់ឈ្មោះជាប្រទេសមានសុខសន្តិភាពបំផុតក្នុងពិភពលោកឆ្នាំ ២០២៤។

៩.ប្រទេសស្លូវេនី៖ ស្លូវេនីជាប្រទេសមួយដែលមានសុវត្ថិភាពបំផុតក្នុងការធ្វើដំណើរ និងសុវត្ថិភាពចរាចរណ៍។ ប្រទេសនេះបានផ្តោតលើការកែលម្អគុណភាពនៃជីវិតក្នុងវិស័យជាច្រើន រួមទាំងសុវត្ថិភាព និងនិរន្តរភាពផងដែរ។ ជាហេតុធ្វើឱ្យប្រទេសស្លូវេនី ស្ថិតក្នុងចំណោមប្រទេសមានសន្តិភាពបំផុតក្នុងលោកប្រចាំឆ្នាំ ២០២៤។

១០.ប្រទេសម៉ាឡេស៊ី៖ ជាមួយនឹងការរស់នៅដែលមានតម្លៃសមរម្យ និងការថែទាំសុខភាពដ៏ល្អឥតខ្ចោះ ម៉ាឡេស៊ីជាប់ចំណាត់ថ្នាក់លេខមួយនៅអាស៊ី និងលេខ ១០ នៅលើពិភពលោក ជាប្រទេសមានសុខសន្តិភាពបំផុតក្នុងឆ្នាំ ២០២៤។ ប្រទេសនេះមានតម្លៃទាបនៃការរស់នៅ បូករួមប្រព័ន្ធថែទាំសុខភាពដ៏ល្អឥតខ្ចោះ សក្តិសមសម្រាប់អ្នកចូលនិវត្តន៍ ដោយផ្តល់ជូននូវការថែទាំប្រកបដោយគុណភាពក្នុងតម្លៃសមរម្យបំផុត បើធៀបនឹងបណ្តាប្រទេសលោកខាងលិច៕

ប្រទេសឥណ្ឌា ៖ ការស្រាវជ្រាវថ្មីមួយបង្ហាញថា បរិយាកាសកខ្វក់នឹងប៉ះពាល់សុខភាពមនុស្សរយៈពេលយូរ ហើយការស្រាវជ្រាវនេះបានអំពាវនាវឱ្យប្រទេសនានាអនុវត្តវិធានការតឹងរ៉ឹងលើការគ្រប់គ្រងគុណភាពអាកាសធាតុ ។ បើមិនដូច្នោះទេ បរិយាកាសកខ្វក់នឹងបំផ្លាញសុខភាពពលរដ្ឋខ្លាំង ដូចជា ពលរដ្ឋឥណ្ឌាស្លា.ប់ អស់១៦លាននាក់ត្រឹមរយៈពេល១០ឆ្នាំ ដោយសារបរិយាកាសមិនល្អ ។

កាលពីថ្ងៃទី១៧ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា សាលារៀនជាច្រើននៅទីក្រុងញូវដែលីបានបិទទ្វារក្នុងរដូវរងា យ៉ាងហោចណាស់២សប្តាហ៍ ដោយសារបរិយាកាសកខ្វក់ខ្លាំងបណ្តាលមកពីការដុតចម្ការក្រោយពេលប្រមូលផលដំណាំ, ការធ្វើចរាចរ, ផ្សែងចេញពីរោងចក្រឧស្សាហកម្ម និងការដុតសំរាម ។ សកម្មភាពទាំងនេះធ្វើឱ្យមានផ្សែងយ៉ាងក្រាស់គ្របដណ្តប់ពេញទីក្រុង និងពិបាកដកដង្ហើម ។

ចំណែកមន្ទីរពេទ្យត្រូវព្យាបាលអ្នកជំងឺផ្លូវដង្ហើម និងសរសៃឈាមបេះដូងកាន់តែច្រើន ក្រោយពីអ្នកជំងឺទទួលធូលីពុលច្រើន ។ ការស្រាវជ្រាវជាច្រើនបង្ហាញថា ធូលីពុល គឺជាឃាតករលាក់មុខយូរមកហើយ ហើយវាបានបំផ្លាញជីវិតមនុស្សរាប់លាននាក់លើពិភពលោក ។

លោក Petter Ljungman សាស្ត្រាចារ្យផ្នែកជំងឺរាតត្បាតនៅវិទ្យាស្ថាន Karolinska និយាយថា ៖ «ខ្ញុំ និងក្រុមការងារបានស្រាវជ្រាវពីការទទួលធូលីពុលនឹងបណ្តាលឱ្យមនុស្សស្លាប់ដូចម្តេចក្នុងប្រទេសមានពលរដ្ឋច្រើន និងខ្យល់ពុលច្រើនបំផុតលើពិភពលោក គឺឥណ្ឌា ។ ពលរដ្ឋឥណ្ឌាស្លាប់ច្រើនបែបនេះ គួរឱ្យភ្ញាក់ផ្អើលយ៉ាងខ្លាំង» ។

ទស្សនាវដ្តី The Lancet: Planetary Health ផ្សព្វផ្សាយថា ពលរដ្ឋឥណ្ឌារស់នៅជាមួយបរិយាកាសកខ្វក់ ហើយពួកគេឆាប់ស្លាប់ដោយសារទទួលធូលីពុលជាច្រើនឆ្នាំ ។ រយៈពេល១០ឆ្នាំមកនេះ ពលរដ្ឋឥណ្ឌាស្លាប់អស់១៦លាននាក់ព្រោះតែបរិយាកាសកខ្វក់ និងកខ្វក់ជាងការកំណត់របស់អង្គការសុខភាពពិភពលោក ចំនួន៨ដង ។

ចំណែកវិធានការគ្រប់គ្រងអាកាសធាតុនៅតំបន់អឺរ៉ុប និងអាមេរិកខាងជើង បានជួយឱ្យពលរដ្ឋមានសុខភាពល្អ និងស្លាប់តិច ហើយរដ្ឋាភិបាលឥណ្ឌា និងប្រទេសនានាគួរតែយកគំរូតាមដើម្បីកុំឱ្យពលរដ្ឋអាយុខ្លីដោយសារបរិយាកាសមិនល្អ ៕

ប្រទេសវៀតណាម ៖ សារព័ត៌មានវៀតណាមបានរាយការណ៍កាលពីពាក់កណ្តាលខែធ្នូ ឆ្នាំ២០២៤ ថា វៀតណាមត្រូវការប្រាក់ជិត១ម៉ឺន៤ពាន់លានដុល្លារអាមេរិក សម្រាប់អភិវឌ្ឍន៍បណ្តាញស្ថានីយសាករថយន្តអគ្គិសនី ហើយរដ្ឋាភិបាលព្យាយាមជំរុញឱ្យពលរដ្ឋប្រើប្រាស់រថយន្តអគ្គិសនីដើម្បីសម្រេចគោលដៅការដឹកជញ្ជូនពុំប៉ះពាល់បរិស្ថាន ។ វានឹងជួយជំរុញដល់សេដ្ឋកិច្ចវៀតណាម ជាពិសេស កាត់បន្ថយការនាំចូលប្រេងឥន្ធនៈ ។

ការអភិវឌ្ឍបច្ចេកវិទ្យាយ៉ាងឆាប់រហ័សរបស់រថយន្តអគ្គិសនី និងការដឹកជញ្ជូនពុំប៉ះពាល់បរិស្ថាន នឹងជំរុញឱ្យតម្រូវការរថយន្តអគ្គិសនីកើនឡើងយ៉ាងខ្លាំង នាពេលឆាប់ៗ ។ វៀតណាមរំពឹងថា ចំនួនការលក់រថយន្តអគ្គិសនី ចាប់ពីឆ្នាំ២០២៤ ដល់ឆ្នាំ២០៣៥ នឹងស្មើជាង២លាន៨សែនគ្រឿង ហើយចំនួននឹងកើនឡើងដល់៣លានគ្រឿង ចាប់ពីឆ្នាំ២០៣៦ ដល់ឆ្នាំ២០៥០ បើវៀតណាមបង្កើនស្ថានីយសាករថយន្តអគ្គិសនី ពីព្រោះស្ថានីយនេះមានតួនាទីសំខាន់ជួយឱ្យការប្រើប្រាស់រថយន្តអគ្គិសនីកើនឡើង ជាពិសេស ក្រុមអ្នកទិញរថយន្តលើកដំបូង ។

VinFast គឺជាក្រុមហ៊ុនផលិតរថយន្តអគ្គិសនីនាំមុខរបស់វៀតណាម មិនត្រឹមតែជំរុញការប្រើប្រាស់រថយន្តអគ្គិសនីប៉ុណ្ណោះទេ ប៉ុន្តែក្រុមហ៊ុនក៏បានលើកកម្ពស់និរន្តរភាពឧស្សាហកម្មរថយន្តអគ្គិសនីផងដែរ ។ ការសហការរវាងរដ្ឋាភិបាល និងផ្នែកឯកជន គឺជាគន្លឹះសំខាន់ក្នុងការទាក់ទាញការវិនិយោគសាងសង់ស្ថានីយសាករថយន្តអគ្គិសនី ។

ហេតុនេះ រដ្ឋាភិបាលវៀតណាមត្រូវតែកំណត់គោលនយោបាយច្បាស់លាស់មួយ ដើម្បីផ្តល់ភាពងាយស្រួលដល់ក្រុមហ៊ុនឯកជននានាអាចចូលរួមចំណែកជំរុញការប្រើប្រាស់រថយន្តអគ្គិសនី ហើយរដ្ឋាភិបាលនឹងសម្រេចគោលដៅការដឹកជញ្ជូនពុំប៉ះពាល់បរិស្ថាន ។

ការស្រាវជ្រាវកម្រិតអន្តរជាតិបង្ហាញថា ការបង្កើនស្ថានីយសាករថយន្តអគ្គិសនី គឺមានប្រសិទ្ធភាពជាងការឧបត្ថម្ភប្រាក់ទិញរថយន្តអគ្គិសនី រហូតដល់៦ដង ។ បើរដ្ឋាភិបាលវៀតណាមផ្តោតលើការបង្កើនចំនួនស្ថានីយសាកថ្ម គឺវៀតណាមនឹងក្លាយជាប្រទេសប្រើប្រាស់រថយន្តអគ្គិសនីច្រើន ព្រមទាំងអាចកាត់បន្ថយការពឹងផ្អែកលើប្រេងឥន្ធនៈ ៕