ថ្មីៗនេះ គឺមានការចែករំលែកជាច្រើនទាក់ទងនឹងករណីឆបោ.កតាមប្រព័ន្ធអន.ឡាញ ដូចជាតាមរយៈការហៅទូរស័ព្ទ ការផ្ញើសារ ការភ្ជាប់តំណរ Link ផ្សេងៗ ដើម្បីមានឱកាសឈ្នះរង្វាន់ទឹកប្រាក់ពីធនាគារ ក៏ដូចជាទទួលបានប្រាក់ឧបត្ថម្ភជាដើម។
កាលពីថ្ងៃទី ១៦ ខែធ្នូ គណនី Eii Lin បានធ្វើការចែករំលែកឃ្លីបវីដេអូខ្លីមួយនៅលើបណ្តាញសង្គមអំពីករណីឆបោក។ តាមរយៈវីដេអូ គឺមានការហៅទូរស័ព្ទពីជនឆបោក ដែលបន្លំធ្វើជាបុគ្គលិកធនាគារ ហើយប្រាប់ឲ្យម្ចាស់គណនីបង្ហើបពីលេខកូដសង្ងាត់ ដើម្បីឲ្យគេធ្វើការដកប្រាក់រហ័សជូន។ ជនឆបោកបានអះអាងថា ការដកប្រាក់រហ័សនេះគឺគេនឹងដកពីខាងធនាគារជូនទៅកាន់ម្ចាស់គណនី មិនមែនដកពីគណនីយើងទៅឲ្យអ្នកផ្សេងទេ (តែនេះគឺផ្ទុយពីការពិតទាំងស្រុង)។ សូមជម្រាបថា មុននឹងឈានដល់ការហៅទូរស័ព្ទពីជនបោកប្រាស់នេះ ដំបូងឡើយ គឺមានគណនីធនាគារក្លែងក្លាយមួយ ផ្ញើសារតាមតេឡេក្រាមថា គាត់បានឈ្នះរង្វាន់ទឹកប្រាក់ ១,០០០,០០០រៀល ដែលជាប្រាក់លើកទឹកចិត្តពីធនាគារ។ 
ទោះជាយ៉ាងណា នេះគឺគ្រាន់តែជាស្តាយ៍បោកមួយរបៀបប៉ុណ្ណោះ ដោយនាពេលកន្លងមកគឺមានការចែករំលែកជាច្រើនទៀតនៃការបោកតាមរបៀបផ្សេងៗ ដូចជាការផ្ញើសារ ការភ្ជាប់តំណរលីង ឬការបំពេញព័ត៌មានលម្អិតផ្សេងៗទាក់ទងនឹងគណនីធនាគាររបស់យើង ដើម្បីទទួលបានប្រាក់រង្វាន់ ឬប្រាក់ឧបត្ថម្ភនានា។
ដូច្នេះហើយ សូមបងប្អូនប្រជាពលរដ្ឋខ្មែរយើងទាំងអស់បង្កើននូវការប្រុងប្រយ័ត្នឲ្យបានខ្លាំងបំផុតពាក់ព័ន្ធជាមួយនឹងករណីឆបោក។ បងប្អូនមិនត្រូវចុចលើតំណរលីងផ្តេសផ្តាស ឬក៏អនុវត្តតាមពាក្យណែនាំរបស់ជនមិនស្គាល់មុខដែលហៅទូរស័ព្ទចូលមកនោះទេ។ ម៉្យាងទៀត សូមចងចាំថា រាល់បុគ្គលិកធនាគារទាំងអស់ ដាច់ខាតគឺនឹងមិនហៅទូរស័ព្ទឬផ្ញើសារ ក្នុងការស្នើសុំលេខកូដសម្ងាត់ពីអតិថិជនដើម្បីផ្ទៀងផ្ទាត់ព័ត៌មានទេ ទោះស្ថិតក្នុងលក្ខខណ្ឌណាដោយ៕
