សហរដ្ឋអាមេរិក ៖ ក្រុមអ្នកស្រាវជ្រាវមកពី National Institute of Standards and Technology (NIST) របស់អាមេរិកបានបង្កើតប្រព័ន្ធ AI ដ៏ទំនើបបំផុត ដែលមានតួនាទីជូនដំណឹងមុនពេលកើតហេតុភ្លើងឆេះរថយន្តអគ្គិសនី ។ បច្ចេកវិទ្យានេះនឹងអាចជួយការពារគ្រោះថ្នា.ក់ ដោយសារការផ្ទុះថ្ម (lithium-ion battery) ក្នុងរថយន្ត ហើយអ្នកបើកបរអាចគេចខ្លួនទាន់ពេលវេលា ។

ចំណុចចាប់ផ្តើមរបស់ការស្រាវជ្រាវនេះ គឺអ្នកស្រាវជ្រាវម្នាក់មកពីវិទ្យាស្ថាន NIST បានឮសំឡេងប្លែកក្នុងវីដេអូផ្ទុះថ្មមុនពេលភ្លើងឆេះ ដែលសំឡេងនេះមានប្រភពពីសន្ទះសុវត្ថិភាពត្រូវបានរចនាឡើងដើម្បីបញ្ចេញសម្ពាធក្នុងថ្មរឹង ពេលប្រតិកម្មគីមីកើតឡើងនៅផ្នែកខាងក្នុង ។ ចាប់ពីពេលនោះមក អ្នកស្រាវជ្រាវក៏ចាប់ផ្តើមយកបច្ចេកវិទ្យា AI មកប្រើប្រាស់ចាប់សំឡេងដើម្បីដោះស្រាយបញ្ហា ។

មូលហេតុដែលត្រូវប្រើប្រាស់បច្ចេកវិទ្យា AI ពីព្រោះសំឡេងលើពិភពលោក មានច្រើនខុសៗគ្នា ហើយសំឡេងខ្លះស្រដៀងនឹងសំឡេងសន្ទះសុវត្ថិភាព ដូចជា ៖ សំឡេងបើកគំរបដបភេសជ្ជៈ និងកឹបក្រដាស ជាដើម ។ ហេតុនេះ ទើបអ្នកជំនាញប្រើប្រាស់ AI ដើម្បីបែងចែកសំឡេង ហើយវានឹងជូនដំណឹងជាមុនអំពីគ្រោះថ្នាក់កើតឡើង ។

សាកលវិទ្យាល័យវិទ្យាសាស្ត្រ និងបច្ចេកវិទ្យា បានសាកល្បងបំផ្ទុះថ្មក្នុងបន្ទប់ ចំនួន៣៨ដុំ និងថតសំឡេងផ្ទុះថ្មនីមួយៗ ។ បន្ទាប់មក ពួកគេក៏កែតម្រូវល្បឿន និងកម្រិតសំឡេង រហូតបង្កើតបានសំឡេងជាង១,០០០ប្រភេទ ដើម្បីឱ្យ AI ចងចាំសំឡេងបន្ទះសុវត្ថិភាពយ៉ាងត្រឹមត្រូវ ។

លទ្ធផលការសាកល្បងបង្ហាញថា Algorithm AI នឹងអាចចាប់សំឡេងបន្ទះសុវត្ថិភាពត្រឹមត្រូវរហូតដល់៩៤% ហើយមានតែសំឡេងតិចតួចប៉ុណ្ណោះ ដែលធ្វើឱ្យ AI យល់ច្រឡំ ។ ជាទូទៅ បន្ទះសុវត្ថិភាពនឹងដាច់រហែកមុនពេលថ្មរថយន្តអគ្គិសនីផ្ទុះប្រមាណ២នាទី ដែលវាជាពេលវេលាសំខាន់បំផុតសម្រាប់អ្នកបើកបររថយន្តមានពេលវេលារត់គេចខ្លួន ។

ក្រោយពីអ្នកស្រាវជ្រាវអាមេរិកបង្ហាញលទ្ធផលសាកល្បង ក៏មានមតិផ្សេងៗលើកឡើងថា តើយើងអាចការពារគ្រោះថ្នាក់ដូចម្តេច ឬវាគ្រាន់តែជាឧបករណ៍ប្រាប់ឱ្យយើងគេចខ្លួនមុនពេលផ្ទុះថ្មឆេះរថយន្តអគ្គិសនី ៕

ទោះបីជាបច្ចុប្បន្ននេះរថយន្តអគ្គិសនី និងរថយន្តកូនកាត់កំពុងនាំមុខគេក្នុងពិភពលោក មានការពេញនិយមខ្លាំងក៏ដោយ ក៏រថយន្តប្រើហ្គាស និងរថយន្តប្រើសាំងនៅតែមានប្រជាប្រិយភាពដដែល។ ទោះជាយ៉ាងណា មានការជជែកវែកញែកថា ការប្រើប្រាស់រថយន្តប្រភេទហ្គាស (LPG) អាចបង្កឱ្យមានការឆាបឆេះ បណ្តាលឱ្យមានគ្រោះ.ថ្នាក់ច្រើនជាងរថយន្តប្រើសាំង។ ដូច្នេះហើយតើការលើកឡើងទាំងនេះជាការពិតដែរឬទេ?

សម្រាប់ចម្លើយនោះគឺ “មិនពិតនោះទេ” នេះបើផ្អែកតាមបទពិសោធន៍អ្នកប្រើប្រាស់ និងតាមបច្ចេកទេសរបស់យានយន្តដែលប្រើហ្គាស បានលើកឡើងថា រថយន្តដែលប្រើហ្គាសគឺមិនអាចបង្កឱ្យមានការឆាបឆេះ ឬបណ្តាលឱ្យមានគ្រោះថ្នាក់ដល់អ្នកប្រើប្រាស់ឡើយ។ ផ្ទុយទៅវិញរថយន្តប្រើហ្គាសអាចល្អជាងរថយន្តប្រើសាំងទៅទៀត នេះក៏ដោយសារធុងផ្ទុកហ្គាស LPG ផលិតពីដែកសុទ្ធដែលមានដង់ស៊ីតេខ្ពស់ អាចទ្រាំទ្រនឹងសម្ពាធខ្ពស់បានយ៉ាងល្អបំផុត។

ជាទូទៅធុងផ្ទុកហ្គាសមានកម្រាស់ពី ៣ ម.ម ទៅ ៦ ម.ម ដែលអាចប្រើប្រាស់សម្រាប់ផ្ទុកហ្គាសបានយ៉ាងមានប្រសិទ្ធភាព ហើយវាមិនងាយរងការខូចខាត និងលេចធ្លាយនោះទេ ទោះបីជាមានការប៉ះទង្គិចធ្ងន់ធ្ងរក៏ដោយ ក៏ធុងហ្គាសនៅតែភាពរឹងមាំ។ លើសពីនេះប្រព័ន្ធការពារពីការចាក់ហៀរ ធុងហ្គាសសម្រាប់យានយន្ត ក៏ត្រូវបានភ្ជាប់មកនូវជាមួយប្រព័ន្ធ Automatic Fill Limiter (AFL) ដែលនឹងផ្ដាច់ការបញ្ចូលហ្គាសភ្លាមៗ មិនឱ្យមានការបញ្ចូលច្រើនហួសកម្រិតពេកទេ ដែលនេះធ្វើឱ្យរថយន្តប្រើហ្គាសកាន់តែមានសុវត្ថិភាព។

ម៉្យាងទៀតបើប្រៀបធៀបជាមួយនឹងធុងសាំងវិញ បើយើងចាក់សាំងហៀរបន្តិចបន្តួច សាំងនឹងហូរចេញមកក្រៅ អាចប៉ះពាល់ថ្នាំរថយន្ត និងអាចឆាបឆេះបានលឿនទៀតផង ខុសពីហ្គាសប្រសិនបើចាក់លើស វានឹងហើរចេញទៅបាត់មិនបន្សល់ស្លាកស្នាមឡើយ។ ទន្ទឹមនឹងនេះ ធុងហ្គាសសម្រាប់យានយន្តក៏មានប្រព័ន្ធភ្លើងសុវត្ថិភាពសម្រាប់បិទការបង្ហូរហ្គាសដោយស្វ័យប្រវត្តិទៅក្នុងម៉ាស៊ីន ពេលវាលែងដំណើរការផងដែរ។ ការផលិតរថយន្តប្រើហ្គាសគឺដើម្បីទប់ទល់នឹងស្ថានភាពលំបាក ដូច្នេះវាមិនអាចអាចបង្កឱ្យមានការឆាបឆេះ ឬបណ្តាលឱ្យមានគ្រោះ.ថ្នាក់ដល់អ្នកប្រើប្រាស់ឡើយ។

សរុបមកវិញ រថយន្តដែលប្រើហ្គាសគឺមិនងាយនឹងឆាបឆេះដូចរថយន្តដែលប្រើសាំងនោះទេ។ បើតាមការពិសោធនោះ រថយន្តដែលប្រើសាំងឆាប់ឆេះដោយឯកឯងនៅសីតុណ្ហភាពចាប់ពី ២៤៦ អង្សារសេ ខណៈពេលដែលរថយន្តប្រើហ្គាស LPG ឆាបឆេះដោយឯកឯងនៅសីតុណ្ហភាពចាប់ពី ៤៧០ អង្សារសេឯណោះ។ នេះសបញ្ជាក់ឱ្យឃើញថា សាំងពិតជាងាយឆាបឆេះជាងហ្គាស LPG ទ្វេដង ដូច្នេះលោកអ្នកមិនចាំបាច់ភ័យបារម្ភអំពីសុវត្ថិភាពរបស់រថយន្តប្រើហ្គាសឡើយ ការជ្រើសរើសរថយន្តប្រើហ្គាសគឺល្អបំផុត៕

ប្រទេសវៀតណាម ៖ ខេត្ត Hung Yen របស់វៀតណាមបានទាក់ទាញចំណាប់អារម្មណ៍របស់បណ្តាវិនិយោគិនបរទេសយ៉ាងខ្លាំង ជាពិសេស វិនិយោគិនជប៉ុន, ចិន និងកូរ៉េខាងត្បូង ។ បច្ចុប្បន្ន មានគម្រោងវិនិយោគពីបរទេសក្នុងខេត្តនេះ ចំនួន៥៨៨គម្រោង និងទឹកប្រាក់វិនិយោគបានចុះបញ្ជីស្មើជាង៧,៦០០លានដុល្លារអាមេរិក ។

កំណែទម្រង់រដ្ឋបាល គឺជាគោលការណ៍សំខាន់ដែលខេត្ត Hung Yen ផ្តល់ភាពសំខាន់ខ្លាំងបំផុតដើម្បីលើកកម្ពស់បរិយាកាសអាជីវកម្ម និងជំរុញសមត្ថភាពប្រកួតប្រជែងរបស់ខេត្ត ។ ចាប់ពីខែមករា ដល់ខែកញ្ញា ឆ្នាំ២០២៤ ខេត្តនេះទទួលបានប្រាក់វិនិយោគពីក្រៅប្រទេស ស្មើនឹង១,៧០០លានដុល្លារអាមេរិក ។

វាជាចំនួនទឹកប្រាក់ច្រើនបំផុត ខណៈកាលពីឆ្នាំ២០២៣ ខេត្តទទួលបានប្រាក់វិនិយោគពីក្រៅប្រទេស ស្មើជាង១,០០០លានដុល្លារអាមេរិកប៉ុណ្ណោះ ក្នុងនោះមានគម្រោងវិនិយោគរបស់ក្រុមហ៊ុនបរទេសជាច្រើន ដូចជា ៖ Toto Vietnam Co., Ltd., Hyundai Aluminium ViNa, Hoya Glass Disk Vietnam II Co., Ltd. និង Mektec Manufacturing Co., Ltd. (Vietnam) ។

ខេត្តនេះមានទីតាំងស្ថិតនៅកណ្តាលដីសណ្តទន្លេក្រហម និងនៅឆ្ងាយពីទីក្រុងហាណូយ ប្រមាណ៦០គីឡូម៉ែត្រ ។ ទីតាំងរបស់ខេត្ត គឺមានប្រៀបផ្នែកភូមិសាស្ត្រជាងបណ្តាខេត្តផ្សេងៗ ហើយខេត្តក៏ទទួលបានប្រយោជន៍ដោយសារនៅជិតមជ្ឈមណ្ឌលឧស្សាហកម្ម ព្រមទាំងកំពង់ផែ និងអាកាសយានដ្ឋានអន្តរជាតិ ។ ដូច្នេះ ទីតាំងយុទ្ធសាស្ត្រនេះធ្វើឱ្យខេត្តមានអំណោយផលផ្នែកពាណិជ្ជកម្មយ៉ាងខ្លាំង ។

សក្តានុពលវិនិយោគរបស់ខេត្ត Hung Yen កើតឡើងដោយសារកត្តាជាច្រើន រួមមាន ៖ ហេដ្ឋារចនាសម្ព័ន្ធរឹងមាំ, ការចំណាយក្នុងអាជីវកម្មតិច, សម្បូរធនធានមនុស្ស, បរិយាកាសអាជីវកម្មអំណោយផលដល់ការវិនិយោគ និងតម្លាភាព ។ ខេត្តនេះបានវិនិយោគប្រាក់សាងសង់មជ្ឈមណ្ឌលឧស្សាហកម្មលំដាប់ពិភពលោកជាបន្តបន្ទាប់ ហើយបច្ចុប្បន្ន បានបញ្ចប់ការសាងសង់មជ្ឈមណ្ឌលឧស្សាហកម្ម ចំនួន១៧កន្លែង ។

ខេត្តមិនត្រឹមតែផ្តោតលើការពង្រីកមជ្ឈមណ្ឌលឧស្សាហកម្មប៉ុណ្ណោះទេ ប៉ុន្តែក៏បានជំរុញគុណភាព និងនិរន្តរភាពមជ្ឈមណ្ឌលឧស្សាហកម្មផងដែរ ។ ក្រៅពីនេះ ខេត្តក៏បានផ្តល់ភាពសំខាន់លើការទាក់ទាញឧស្សាហកម្មបច្ចេកវិទ្យាខ្ពស់ រួមមាន ៖ អេឡិចត្រូនិក, ទូរគមនាគមន៍ និងការផលិត Semiconductor ។

ហេតុនេះ ដោយសារខេត្តបន្តលើកកម្ពស់បរិយាកាសវិនិយោគ និងកសាងមជ្ឈមណ្ឌលឧស្សាហកម្មជាច្រើនកន្លែងបានធ្វើឱ្យខេត្តមានតួនាទីយ៉ាងសំខាន់ក្នុងការរីកចម្រើនផ្នែកឧស្សាហកម្ម និងសេដ្ឋកិច្ចវៀតណាម ៕

វ៉ែនតាបានលក់ដាច់យ៉ាងខ្លាំងនៅលើពិភពលោក ដោយសារម៉ាកវ៉ែនតានីមួយៗត្រូវបានផលិតឱ្យកាន់តែទំនើប និងមានទំហំតូចជាងមុនដើម្បីឱ្យងាយស្រួលប្រើប្រាស់ ។ នៅខែវិច្ឆិកា ឆ្នាំ២០២៤ ក្រុមហ៊ុន Amazon ក៏ផលិតវ៉ែនតាដែរ ហើយវ៉ែនតារបស់ Amazon បានបំពាក់ប្រព័ន្ធ GPS បង្ហាញផ្លូវ ជាពិសេស វាស័ក្តិសមជាមួយអ្នកប្រកបរបរដឹកជញ្ជូនទំនិញ ។

តាមប្រភពមិនបញ្ចេញឈ្មោះឱ្យដឹងថា Amazon បានផលិតវ៉ែនតាដ៏ទំនើបសម្រាប់អ្នកដឹកជញ្ជូន ដើម្បីឱ្យពួកគេអាចដឹកទំនិញទៅកាន់គោលដៅផ្សេងៗ ថែមទាំងចំណេញពេលជាច្រើននាទីពេលដឹកទំនិញឱ្យអតិថិជន១ជើង និងពុំចាំបាច់បើកមើលផែនទី ។ រីឯអ្នកមិនប្រកបមុខរបរដឹកជញ្ជូន ក៏អាចពាក់វ៉ែនតានេះបានដែរ ដោយវានឹងបង្ហាញផ្លូវបត់ពេលចេញពីជណ្តើរយន្ត និងចៀសវាងឧបសគ្គ ដូចជា ៖ ទ្វារដែក និងឆ្កែកាច ។

បើទោះជាអ្នកខ្លះគិតថា វាគ្មានប្រយោជន៍អ្វីច្រើន ប៉ុន្តែបើយើងត្រូវដឹកទំនិញជារៀងរាល់ថ្ងៃ វ៉ែនតានេះនឹងអាចជួយបានច្រើន ដោយពុំចាំបាច់បើកមើល GPS ហើយយើងនឹងអាចលើកទំនិញច្រើនជាងមុន ។ វ៉ែនតានេះត្រូវបានផលិតឡើង បន្ទាប់ពីវ៉ែនតាទំនើបម៉ាក Echo Frames របស់ Amazon ដែលអាចស្តាប់សំឡេង និងបញ្ជាដោយសំឡេងតាមប្រព័ន្ធ Alexa ។

បច្ចុប្បន្ន Amazon កំពុងអភិវឌ្ឍន៍បច្ចេកវិទ្យាវ៉ែនតា ប៉ុន្តែមានបញ្ហារឿងថ្មដែលត្រូវប្រើប្រាស់រយៈពេល៨ម៉ោង ហើយវ៉ែនតាត្រូវមានទម្ងន់ស្រាលងាយស្រួលពាក់ ។ ក្រៅពីនេះ ការប្រមូលទិន្នន័យសរុប ដូចជា ៖ លំនៅឋាន, ផ្លូវថ្មើរជើង, ផ្លូវធំ, ចិញ្ចើមផ្លូវ និងផ្លូវសម្រាប់រថយន្តបើកចូលផ្ទះនីមួយៗ គឺអាចចំណាយពេលជាច្រើនឆ្នាំ ។

លើសពីនេះ ក៏ត្រូវពិចារណាពីការប្រើប្រាស់ផងដែរ ពីព្រោះពេលខ្លះ ការពាក់វ៉ែនតាងាយស្រួលក្តី ប៉ុន្តែបុគ្គលិកដឹកជញ្ជូនទំនិញមួយចំនួនអាចមិនចាប់អារម្មណ៍នឹងវ៉ែនតានេះ ដោយសារពួកគេគិតថា វាស្មុគស្មាញ ។ វាបានក្លាយជាបញ្ហាពិបាកដោះស្រាយ ហើយការលក់វ៉ែនតាទៅឱ្យអតិថិជននាពេលណានោះ គឺត្រូវរង់ចាំតាមដានបន្តទៀត ៕