ក្រុមហ៊ុន Apple ត្រូវបានគេនិយាយថាកំពុងធ្វើការជាមួយក្រុមហ៊ុនផលិតអេក្រង់ដើម្បីធ្វើឱ្យ iPhone ដែលអាចបត់បានក្លាយទៅជាការពិត។
ក្នុងរយៈពេលប៉ុន្មានឆ្នាំចុងក្រោយនេះ ខណៈពេលដែលដៃគូប្រកួតប្រជែងបានចេញលក់ស្មាតហ្វូនអេក្រង់បត់ជាបន្តបន្ទាប់ Apple នៅតែប្រកាន់ខ្ជាប់នូវយុទ្ធសាស្រ្តរបស់ខ្លួនក្នុងការចេញលក់ iPhone ស៊េរី monolithic ដដែល។ ទោះជាយ៉ាងណាក៏ដោយ របាយការណ៍ថ្មីៗនេះបានបង្ហាញថា Apple បានចូលដល់ដំណាក់កាលនៃការអភិវឌ្ឍន៍ទូរស័ព្ទ iPhone អេក្រង់បត់ជាផ្លូវការហើយ ដោយមានកិច្ចសហការពីក្រុមហ៊ុនផលិតអេក្រង់ឈានមុខគេ។

នេះបើយោងតាមការចុះផ្សាយរបស់ TechRadar ដែលជាគេហទំព័របច្ចេកវិទ្យាដ៏ល្បីល្បាញមួយ បានឱ្យដឹងថា បច្ចុប្បន្នក្រុមហ៊ុន Apple កំពុងវិនិយោគយ៉ាងខ្លាំងលើខ្សែផលិតផល iPhone អេក្រង់បត់។ ទោះជាយ៉ាងណាការផលិតស្មាតហ្វូនអេក្រង់បត់ ត្រូវបានគេនិយាយថា នឹងជួបបញ្ហាប្រឈមដ៏ធំបំផុតមួយគឺការដោះស្រាយផ្នត់នៅលើអេក្រង់នៅពេលបត់។ ទោះបីជាយ៉ាងនេះក្តី រូបរាងរបស់ Apple នៅក្នុងទីផ្សារស្មាតហ្វូនអេក្រង់បត់អាចជាកត្តាជំរុញការអភិវឌ្ឍន៍ដ៏លេចធ្លោបំផុតនៃខ្សែផលិតផលនេះ។

ថ្មីៗនេះគេហទំព័រ The Information ក៏បាននិយាយដែរថា Apple កំពុងតែបង្កើត iPhone ដែលអាចបត់បានដែលមានលេខកូដ ‘V68’ ត្រូវបានគេរំពឹងថានឹងមានការរចនា clamshell ស្រដៀងទៅនឹង Galaxy Z Flip របស់ Samsung ឬ Motorola’s Razr ។ ព័ត៌មានបានព្យាករណ៍ថា iPhone ដែលអាចបត់បានដំបូងរបស់ Apple ទំនងជាបង្ហាញខ្លួននៅឆ្នាំ ២០២៦ ខណៈពេលដែលគេហទំព័រ The Elec ជឿជាក់ថា Apple នឹងបង្ហាញផលិតផលនេះនៅឆ្នាំ ២០២៧ ស្របពេលជាមួយនឹងខួបគម្រប់ ២០ ឆ្នាំនៃការចេញលក់ iPhone និងខួបលើកទី ១០ នៃ iPhone ដំបូងដែលប្រើអេក្រង់ OLED។

យោងតាមរបាយការណ៍របស់ Counterpoint Research នៅក្នុងខែឧសភា ទីផ្សារទូរស័ព្ទដែលអាចបត់បានសកលបានកើនឡើង ៤៩% នៅក្នុងត្រីមាសទី ១ បើធៀបនឹងរយៈពេលដូចគ្នាកាលពីឆ្នាំមុន ដែលជាអត្រាកំណើនខ្ពស់បំផុតក្នុងរយៈពេលប្រាំមួយត្រីមាស។ ទោះបីជាកាលបរិច្ឆេទនៃការចេញលក់ជាផ្លូវការនៅតែមិនទាន់ដឹងក៏ដោយ ប៉ុន្តែការចូលរួមរបស់ Apple នៅក្នុងទីផ្សារស្មាតហ្វូនដែលអាចបត់បានសន្យាថានឹងបង្កើតបដិវត្តន៍ថ្មីមួយនៅក្នុងឧស្សាហកម្មស្មាតហ្វូន ដូចអ្វីដែល iPhone ជំនាន់ទីមួយបានធ្វើដែរ៕

កាលពីថ្ងៃទី២៩ ខែវិច្ឆិកា តារាសម្តែង Jung Woo Sung បានបង្ហាញខ្លួនជាសាធារណៈលើកដំបូងក្នុងកម្មវិធីប្រគល់ពានរង្វាន់ Blue Dragon Film Awards លើកទី៤៥ ចាប់តាំងពីមានផ្ទុះរឿងអាស្រូវកំណើតកូនប្រុសរបស់លោកជាមួយតារាម៉ូដែល Moon Gabi ដោយបានយកវេទិកានេះសូមទោសសាធារណជននិងប្តេជ្ញាក្នុងនាមជាឪពុកនឹងទទួលខុសត្រូវដល់ទីបញ្ចប់។

ការបង្ហាញខ្លួនរបស់ Jung Woo Sung នៅក្នុងព្រឹត្តិការណ៍នេះគឺមានភាពមិនច្បាស់លាស់បន្ទាប់ពីតារាសម្តែងរូបនេះមានកូនប្រុសដែលបានក្លាយទៅជារឿងចម្រូងចម្រាសយ៉ាងខ្លាំងដោយសារតែលោកនិង Moon Gabi មិនបានរៀបការ។ នេះបានធ្វើឱ្យសាធារណជនកូរ៉េភ្ញាក់ផ្អើល ហើយបានប្រែក្លាយជីវិតផ្ទាល់ខ្លួន និងប្រវត្តិរបស់ោកទៅជារឿងអាស្រូវដ៏ធំមួយ។ ទោះបីជាមានសេចក្តីរាយការណ៍ដំបូងថា លោក គ្រោងនឹងលុបចោលការបង្ហាញខ្លួនក្នុងកម្មវិធីនេះ ប៉ុន្តែតារាសម្តែងវ័យ៥១ឆ្នាំរូបនេះបានសម្រេចចិត្តបង្ហាញខ្លួនវិញបន្ទាប់ពីមានការពិភាក្សាយ៉ាងយូរជាមួយអ្នករៀបចំ។

Jung Woo Sung បានបង្ហាញខ្លួនជាលើកដំបូងនៅលើឆាកក្នុងនាមជាអ្នកធ្វើបទបង្ហាញសម្រាប់ពានរង្វាន់ភាពយន្តដែលមានប្រជាប្រិយបំផុត។ លោកបានឡើងលើឆាកជាលើកទីពីរដើម្បីទទួលយកពានរង្វាន់សម្រាប់ខ្សែភាពយន្តរបស់ខ្លួនមានចំណងជើងថា «12:12: The Day» ។ សុន្ទរកថាទទួលយករបស់លោកបាននិយាយដោយផ្ទាល់អំពីភាពចម្រូងចម្រាសដែលកំពុងកើតឡើងទាក់ទងនឹងជីវិតផ្ទាល់ខ្លួនរបស់លោក ខណៈដែលលោកបានសំណូមពរទស្សនិកជនកុំដោយសារតែបញ្ហារបស់លោកប៉ះពាល់ដល់ការខិតខំប្រឹងប្រែងរបស់អ្នកផ្សេងទៀតដែលពាក់ព័ន្ធនឹងភាពយន្ត។

តារាសម្តែងរូបនេះក៏បានសូមទោសដល់អ្នកគាំទ្រផងដែរសម្រាប់ការ ធ្វើឱ្យពួកគេខកចិត្ត ជាមួយនឹងភាពចម្រូងចម្រាសនេះ ហើយបានប្តេជ្ញាថានឹងទទួលខុសត្រូវទាំងអស់នៃភាពជាឪពុក លោកនឹងទទួលយករាល់ការរិះគន់។ ក្នុងនាមជាឪពុក លោកនឹងទទួលខុសត្រូវទាំងអស់របស់កូនលោករហូតដល់ទីបញ្ចប់។

គួរបញ្ជាក់ថា Jung Woo Sung បានបញ្ជាក់ថាលោកគឺជាឪពុកបង្កើតរបស់កូនប្រុសដែលទើបនឹងកើតរបស់ Moon Gabi កាលពីថ្ងៃទី ២៤ ខែវិច្ឆិកា។ យោងតាមសេចក្តីរាយការណ៍ អ្នកទាំងពីរមិនដែលណាត់ជួបទេ ប៉ុន្តែបន្ទាប់ពីនាងមានផ្ទៃពោះ Moon Gabi ចង់រៀបការ ខណៈដែលតារាប្រុសរូបនេះបានជំទាស់នឹងគំនិតនេះគ្មានបំណងចង់រៀបការឡើយ៕

Asaro គឺជាក្រុមកុលសម្ព័ន្ធមួយដែលមានភាពល្បីល្បាញខ្លាំងនៅប៉ាពួញូហ្គីណេ ដោយសារតែរបាំងមុខគួរឱ្យខ្លា.ច និងចរិតលក្ខណៈដ៏ចម្លែករបស់ពួកគេ។ ក្រុមកុលសម្ព័ន្ធនេះបានទាក់ទាញការចាប់អារម្មណ៍ខ្លាំងពីអ្នកជំនាញ និងភ្ញៀវទេសចរជុំវិញពិភពលោក ដោយសារពួកគេមើលទៅខុសពីក្រុមកុលសម្ព័ន្ធផ្សេងទៀត។ ជាទូទៅពួកគេតែងតែពាក់របាំងមុខធ្វើពីភក់ជារូបយក្ស ឬបិសាច ពាក់ក្រចកដៃវែងៗ ដើរប្រមាញ់សត្វនៅក្នុងព្រៃ មើលទៅគួរឱ្យខ្លាច និងចម្លែកបំផុត។

Asaro មានឈ្មោះក្រៅហៅថា “បុរសភក់” រស់នៅភាគខាងកើតនៃប្រទេស ក្បែរទន្លេអាសារ៉ូ ដូច្នេះឈ្មោះរបស់ពួកគេគឺដាក់តាមទន្លេនេះ។ យោងតាមរឿងព្រេងនិទានថា ជនជាតិអាសារ៉ូបានចាញ់ក្នុងសមរភូមិដោយកុលសម្ព័ន្ធខ្ពង់រាបមួយទៀត ហើយពួកគេក៏ភៀសខ្លួនទៅទន្លេអាសារ៉ូ។ នៅពេលដែលធ្លាក់ចូលទៅក្នុងទន្លេ អ្នកចម្បាំង Asaro ត្រូវបានគ្របដណ្ដប់ដោយភក់ពណ៌ស ដែលធ្វើឱ្យកុលសម្ព័ន្ធគូប្រជែងមានការភ័យខ្លាច ពីព្រោះពួកគេគិតថា ទាំងនេះគឺជាព្រលឹងដែលត្រលប់មកសងសឹកវិញ។

ចាប់ពីពេលនោះមកប្រជាជន Asaro ក៏បានចាប់ផ្តើមធ្វើរបាំងភក់ និងក្លែងធ្វើចលនារបស់ខ្មោច ដើម្បីបន្លាចសត្រូវទាំងអស់។ យោងតាមការសិក្សា ការពាក់របាំងមុខធ្វើពីភក់ជារូបយក្ស ឬបិសាច អាចធ្វើឱ្យសត្រូវភ័យខ្លាច ឈ្នះគ្រប់កិច្ចការ ដោយសាររបាំងមុខនេះតំណាងឱ្យព្រលឹងវិញ្ញាណរបស់បុព្វបុរសជំនាន់មុន។ ទោះជាយ៉ាងណា អ្នកជំនាញមិនទាន់ដឹងថាក្រុមកុលសម្ព័ន្ធនេះកើតឡើងតាំងពីពេលណានោះទេ ព្រោះប្រវតិ្តរបស់ប៉ាពួញូហ្គីណេកម្រកត់ត្រាទុកណាស់ ធ្វើឱ្យមនុស្សជាច្រើនមិនដឹងថាពួកគេមានអាយុប៉ុន្មាននោះទេ ដោយសារថ្ងៃខែឆ្នាំកំណើតរបស់ពួកគេមិនត្រូវបានកត់ត្រាទុក។

កាលពីមុនកុលសម្ព័ន្ធមួយក្រុមនេះមានចរិតកាចសាហាវខ្លាំងណាស់ ប៉ុន្តែនៅពេលដែលពិភពលោកជឿនលឿន អ្វីៗក៏បានប្រែប្រួលធ្វើឱ្យកុលសម្ព័ន្ធមួយនេះក្លាយជាក្រុមមនុស្សដែលលែងចូលរួមក្នុងសង្គ្រាម ឬធ្វើឃាតទៀតហើយ។ ក្រៅពីបម្រើភ្ញៀវទេសចរ កុលសម្ព័ន្ធនេះក៏ល្បីខាងជំនាញធ្វើស្រែចម្ការ ជាពិសេសការដាំដំឡូងផ្អែម។ ដូច្នេះភ្ញៀវទេសចរដែលចង់ដឹងចង់ឃើញពីជីវិតរស់នៅប្រចាំថ្ងៃរបស់ Asaro អាចទៅប្រទេសប៉ាពួញូហ្គីណេ ចូលរួមក្នុងពិធីបុណ្យ Mount Hagen ដែលជាកន្លែងកុលសម្ព័ន្ធនៅ Papua New Guinea ប្រមូលផ្តុំគ្នាដើម្បីសំដែង ឬទៅ Goroka ផ្ទះរបស់ប្រជាជនភក់ Asaro តែម្តងក៏បាន៕

កាលពីថ្ងៃទី១ ខែធ្នូ ឆ្នាំ២០២៤ សារព័ត៌មាន Reuters រាយការណ៍ថា ខ្យល់ព្យុះ Fengal បានបោកបក់មកកាន់តំបន់ភាគខាងត្បូងប្រទេសឥណ្ឌា បន្ទាប់ពីខ្យល់ព្យុះនេះបោកបក់លើប្រទេសស្រីលង្កា ដែលបណ្តាលឱ្យមានទឹកជំនន់ធ្ងន់ធ្ងរក្នុងតំបន់ជាច្រើន និងបណ្តាលឱ្យពលរដ្ឋប្រទេសទាំងពីរស្លា.ប់ យ៉ាងហោចណាស់ ១៩នាក់ ។

ឥទ្ធិពលខ្យល់ព្យុះនេះបណ្តាលឱ្យមានទឹកជំនន់នៅរដ្ឋ Tamil Nadu និងតំបន់ Puducherry ស្ថិតនៅភាគខាងកើតប្រទេសឥណ្ឌា បន្ទាប់ពីវាបានប្តូរទិសដៅពីឈូងសមុទ្រ Bengal កាលពីថ្ងៃទី៣០ ខែវិច្ឆិកា កន្លងមក ។

តំបន់ Puducherry មានភ្លៀងធ្លាក់យ៉ាងខ្លាំងក្នុងរយៈពេល៣០ឆ្នាំ ដោយសារឥទ្ធិពលខ្យល់ព្យុះ ហើយតំបន់មួយចំនួនរបស់ទីក្រុង Chennai លិចនៅក្រោមទឹក ដែលធ្វើឱ្យពលរដ្ឋ៣នាក់ស្លាប់ដោយសារខ្សែភ្លើងឆក់ ។ វាប៉ះពាល់ដល់ការធ្វើដំណើរតាមផ្លូវសាធារណៈទាំងអស់ ហើយជើងហោះហើរក្នុងទីក្រុងនេះបានផ្អាកបណ្តោះអាសន្ន កាលពីថ្ងៃទី៣០ ខែវិច្ឆិកា និងដំណើរការឡើងវិញនៅព្រឹកថ្ងៃទី១ ខែធ្នូ ក្រោយពីភ្លៀងធ្លាក់តិចជាងមុន ។

រដ្ឋាភិបាលឥណ្ឌាបានបញ្ជាឱ្យកងទ័ពបង្កើនកម្លាំងជួយសង្គ្រោះពលរដ្ឋរងគ្រោះដោយសារទឹកជំនន់ ក្នុងតំបន់គ្រីសាណាថា ស្មើជាង៥០០គ្រួសារ ដែលទឹកបានលិចលំនៅឋានពួកគេក្នុងកម្ពស់ជាង១៥០សង់ទីម៉ែត្រ ។ រហូតមកដល់ថ្ងៃទី១ ខែធ្នូ នេះ កងទ័ពបានជួយជម្លៀសពលរដ្ឋជាង១០០នាក់ ចេញពីលំនាឋានទៅកាន់កន្លែងមានសុវត្ថិភាព ។

គួរបញ្ជាក់ថា ខ្យល់ព្យុះ Fengal បានបម្លាស់ទីយឺតៗនៅភាគខាងជើងរដ្ឋ Tamil Nadu និងឆ្នេរសមុទ្រតំបន់ Puducherry ហើយវាក៏ចាប់ផ្តើមខ្សោយកម្លាំង ។ កន្លងមក ខ្យល់ព្យុះនេះបានបោកបក់មកលើប្រទេសស្រីលង្កា បណ្តាលឱ្យភ្លៀងធ្លាក់ខ្លាំងប៉ះពាល់ពលរដ្ឋចំនួន១៣៨,៩៤៤គ្រួសារ និងមានមនុស្សស្លាប់១៦នាក់ ។

បើទោះជាកម្រិតទឹកទន្លេចាប់ផ្តើមស្រកចុះក្តី ប៉ុន្តែភ្នាក់ងារសង្គ្រោះ និងកងទ័ពជើងទឹកស្រីលង្កានៅតែបន្តជួយសង្គ្រោះពលរដ្ឋ ដោយសហការជាមួយរដ្ឋាភិបាល និងផ្នែកឯកជន ។ មជ្ឈមណ្ឌលគ្រប់គ្រងគ្រោះមហន្តរាយស្រីលង្ការាយការណ៍ថា ខ្យល់ព្យុះបណ្តាលឱ្យមានទឹកជំនន់ធ្ងន់ធ្ងរ, បាក់ដី និងខ្យល់កន្ត្រាក់ ៕