តារារ៉េប វណ្ណដា ថាការស្រលាញ់ចូលចិត្តពីអ្នកគាំទ្រគឺជាកម្លាំងមហាសាលសម្រាប់លោក

តារាចម្រៀងរ៉េបល្បីលំដាប់ប្រទេស វណ្ណដា បានបង្ហាញពីចំណាប់អារម្មណ៍សម្រាប់ឆ្នាំ២០២៤ដោយបានជួបរឿងនឹកស្មានមិនដល់ជាច្រើនដែលសុទ្ធសឹងតែជាក្តីស្រមៃរបស់លោក ខណៈបទចម្រៀងរបស់តារាចម្រៀងរូបនេះមានអ្នកស្តាប់ដល់ទៅ១៧៣ប្រទេស។ ទោះយ៉ាងណា វណ្ណដា បានបញ្ជាក់ថារឿងអស្ចារ្យជាច្រើនមិនអាចកើតឡើងបាននោះទេបើសិនជាគ្មានការគាំទ្រ ការស្រលាញ់ពីទស្សនិកជនហើយនេះគឺជាកម្លាំងមហាសាលមួយសម្រាប់លោក ខណៈឆ្នាំ២០២៥ វណ្ណដា នឹងកាន់តែបង្ហាញខ្លួនញឹកជាមួយអ្នកគាំទ្រ។

តារាចម្រៀង វណ្ណដា បានបង្ហាញពីទិន្នន័យរបស់ខ្លួនពីតារាងតន្រ្តីពេញនិយម spotify ដែលបទចម្រៀងរបស់លោកមានអ្នកស្តាប់មកពី១៧៣ប្រទេសជុំវិញពិភពលោក ដែលមានការស្ទ្រីមដល់ទៅ១៥លាន ជាមួយអ្នកស្តាប់ចំនួនជាង៨០ម៉ឺននាក់ហើយបទដែលទទួលបានការគាំទ្រខ្លាំងគឺបទ «សង្គ្រាន្តស្គាល់ស្នេហ៍» ឬចំណងជើងជាភាសាអង់គ្លេស songkran magic ។

ជាមួយនឹងលទ្ធផលដែលបទចម្រៀងរបស់ខ្លួនមានអ្នកស្តាប់ដល់ទៅ១៧៣ប្រទេស វណ្ណដា ថាឆ្នាំ២០២៤ ជាឆ្នាំមួយដែលមានរឿងនឹកស្មានមិនដល់ជាច្រើនបានកើតឡើង ។ តារាចម្រៀងរ៉េបមានដើមកំណើតមកពីខេត្តព្រះសីហនុរូបនេះបានរៀបរាប់ពីអារម្មណ៍របស់ខ្លួននៅលើបណ្តាញសង្គមថា « ខ្ញុំបានចាប់ផ្តើមឆ្នាំនេះជាមួយអ្នកគាំទ្រទាំងអស់ ដោយបានចេញចម្រៀងជាមួយសិល្បករដែលមានសមត្ថភាពជាច្រើន ហើយក៏មានបទចូលឆ្នាំខ្មែរដែលឥឡូវនេះនៅតែកំពុងទទួលបានគាំទ្រយ៉ាងខ្លាំងក្លាពីបណ្តាប្រទេសនានានៅអាស៊ី និងបានឡើងសម្តែងនៅឆាកធំៗនៅក្រៅប្រទេសជាច្រើនដូចជា Sabaidee Fest នៅអាម៉េរិក និងបានឡើងសម្តែងនៅឆាកអូឡាំពិកប៉ារីស ២០២៤ ហើយជាពិសេសក៏បានឡើងសម្តែងដើម្បីអបអរសាទរពិធីបើកការប្រកួតជាផ្លូវការ នៃព្រឹត្តិការណ៍កីឡាជាតិ លើកទី ៤ និងកីឡាជាតិជនពិការ លើកទី២ ជូនបងប្អូនជនរួមជាតិទាំងអស់ផងដែរ ដោយទាំងនេះសុទ្ធតែជាក្តីស្រមៃដែលក្លាយជាការពិតសម្រាប់ខ្ញុំក្នុងឆ្នាំនេះ»។

វណ្ណដា បានសង្កត់ធ្ងន់ថា រឿងអស្ចារ្យទាំងអស់នេះនឹងមិនអាចកើតមានឡើយ បើលោកគ្មានការគាំទ្រដ៏ខ្លាំងក្លាពីពុកម៉ែបងប្អូនគ្រប់រូប ការស្រលាញ់ចូលចិត្តនេះ គឺជាកម្លាំងដ៏មហាសាលមួយសម្រាប់ខ្លួន។ វណ្ណដា ថា «ឆ្នាំក្រោយយើងនឹងបានជួបគ្នាញឹកបន្តិចហើយ»។

គួរឱ្យដឹងថា បច្ចុប្បន្នអ្នកគាំទ្ររបស់ វណ្ណដា កំពុងទន្ទឹងរង់ចាំអាល់ប៊ុមទី៣របស់តារាចម្រៀងរូបនេះ ខណៈទស្សនិកជនក៏រំភើបចិត្តរង់ចាំបទថ្មីដែល វណ្ណដា បានទៅថតវីដេអូចម្រៀងដោយផ្ទាល់នៅប្រាសាទលើទឹកដីខេត្តសៀមរាបផងដែរ៕

---