សហរដ្ឋអាមេរិក៖ អ្នកជំនាញ Gad Levanon ដែលជាប្រធានសេដ្ឋវិទូនៃក្រុមហ៊ុនស្រាវជ្រាវការងារ The Burning Glass Institute បានព្យាករណ៍ថា សេដ្ឋកិច្ចអាមេរិកនឹងបន្តដឹកនាំពិភពលោកក្នុងរយៈពេល ២០ ឆ្នាំខាងមុខទៀត ដោយសារការរីកលូតលាស់ឈានមុខគេក្នុងវិស័យវិទ្យាសាស្ត្រ និងបច្ចេកវិទ្យា ទោះបីចិនកំពុងវ៉ាដាច់ក្នុងឧស្សាហកម្មផ្សេងៗក៏ដោយ ក៏អាមេរិកនៅតែជាប្រទេសមហាអំណាចសេដ្ឋកិច្ចទី ១ របស់ពិភពលោកដដែល។

យោងតាមសារព័ត៌មានបរទេសចុះផ្សាយថា ចិនដែលជាប្រទេសមហាអំណាចទី ២ លើពិភពលោក គឺមានមហិច្ចតាចង់ក្លាយជាមហាអំណាចសេដ្ឋកិច្ចទី ១ ដោយទម្លាក់អាមេរិក ក្នុងរយៈពេល ២០ ឆ្នាំខាងមុខទៀត ប៉ុន្តែអ្នកជំនាញព្យាករណ៍ថា មិនអាចទៅរួចទេ។ យោងតាមលោក Levanon ភាពជឿនលឿននៃបញ្ញាសិប្បនិមិត្ត (AI) របស់អាមេរិក បច្ចុប្បន្នបានកំពុងជំរុញផលិតភាពការងារ ក៏ដូចជាជួយឱ្យសេដ្ឋកិច្ចអាមេរិករីកចម្រើនលឿនជាងប្រទេសជឿនលឿនដទៃទៀត។

ទោះបីជាចិនមានបច្ចេកវិទ្យាជឿនលឿនប៉ុណ្ណាក៏ដោយ ក៏មិនអាចយកឈ្នះអាមេរិកបានដែរ។ លោកបាននិយាយថា AI នឹងជួយពន្លឿនការស្រាវជ្រាវ និងការអភិវឌ្ឍន៍ក្នុងទ្រង់ទ្រាយធំ ដោយបង្កើតផលិតផលឈានមុខគេជាច្រើននៅក្នុងវិទ្យាសាស្ត្រ និងវិស័យជាច្រើនទៀត។ ដូច្នេះសហរដ្ឋអាមេរិកត្រូវបានគេរំពឹងថានឹងក្លាយជាអ្នកទទួលផលដ៏ធំបំផុតដោយសារតែភាពលេចធ្លោរបស់ខ្លួននៅក្នុងបច្ចេកវិទ្យា និងបរិយាកាសអាជីវកម្មប្រកបដោយថាមពល។

ទោះជាយ៉ាងណាក៏ដោយ AI អាចមានផលប៉ះពាល់អវិជ្ជមានលើការងារប្រើខួរក្បាលជាងការងារប្រើកម្លាំង ព្រោះថា AI ត្រូវបានគេរំពឹងថានឹងលុបបំបាត់ការងារជាច្រើនដែលបច្ចុប្បន្នកាន់កាប់ដោយមនុស្សដែលមានសញ្ញាបត្រមហាវិទ្យាល័យ។ ប៉ុន្តែ AI នឹងមានឥទ្ធិពលតិចតួចលើការងារដោយកម្លាំងក្នុងមុខរបរដូចជាជាងអគ្គិសនី ឬជាងទឹក។ អ្នកជំនាញនេះព្យាករណ៍ថា នៅថ្ងៃអនាគតការងារប្រើកម្លាំងអាចបង្កើនប្រាក់ឈ្នួលខ្ពស់ជាងពេលបច្ចុប្បន្ន។

លោក Levanon បាននិយាយថា ក្នុងរយៈពេលពីរទសវត្សរ៍ខាងមុខបញ្ហាប្រឈមដ៏ធំបំផុតសម្រាប់រដ្ឋាភិបាលសហរដ្ឋអាមេរិកគឺការធានាឱ្យមានកំណើនសេដ្ឋកិច្ច អមដោយការធ្វើឱ្យប្រសើរឡើងនូវកម្រិតជីវភាពសម្រាប់ប្រជាជនទាំងអស់។ ទោះបីជាត្រូវប្រឈមនឹងបញ្ហាធំៗទាំងនេះក៏ដោយ ក៏អាមេរិកនៅតែអាចយកឈ្នះបាន ដូច្នេះអ្នកជំនាញជឿជាក់ថា សេដ្ឋកិច្ចអាមេរិកនឹងបន្តគ្របដណ្ដប់លើពិភពលោកក្នុងរយៈពេល ២ ទសវត្សរ៍ខាងមុខ៕

បរទេស៖ ប្រទេសអេហ្ស៊ីបបានសាងសង់អគារកីឡាដ៏មិនគួរឱ្យជឿមួយនៅកណ្តាលវាលខ្សាច់ក្នុងតម្លៃ ៤៣ លានដុល្លារអាមេរិក ជាមួយនឹងក្តីសង្ឃឹមនៃការធ្វើជាម្ចាស់ផ្ទះកីឡាអូឡាំពិកនៅឆ្នាំ ២០៣៦។

ដូច្នេះគម្រោងដ៏ស្មុគស្មាញមានតម្លៃរាប់លាននាក់ដុល្លារនេះនឹងត្រូវបានសម្ពោធជាផ្លូវការនៅឆ្នាំ ២០២៥ ខាងមុខ ក្នុងគោលបំណងដេញថ្លៃធ្វើជាម្ចាស់ផ្ទះកីឡាអូឡាំពិកនៅឆ្នាំ ២០៣៦ និងដើម្បីបង្កើតប្រវត្តិសាស្ត្រសម្រាប់ទ្វីបអាហ្រ្វិក នេះបើយោងតាមការចុះផ្សាយរបស់សារព័ត៌មានបរទេស Express។

គម្រោងអគារកីឡានៅក្នុងប្រទេសអេហ្ស៊ីបត្រូវបានសាងសង់តាំងពីឆ្នាំ ២០១៥ រួមមានកន្លែងហ្វឹកហាត់ដ៏ធំ សាលធំពីរ អាងហែលទឹក និងអគារទំនើបៗជាច្រើនទៀត ជាមួយសមត្ថភាពផ្ទុកមនុស្សបានជាង ៩៣,០០០ នាក់ ដែលធ្វើឱ្យវាក្លាយជាកីឡដ្ឋានដ៏ធំបំផុតរបស់ប្រទេស និងធំជាងគេទីពីរនៅទ្វីបអាហ្វ្រិក។ កីឡដ្ឋាននេះក៏នឹងជំនួសកីឡដ្ឋានអន្តរជាតិ Cairo ជាកីឡដ្ឋានជាតិថ្មីរបស់ប្រទេសអេហ្សីបផងដែរ។ វាត្រូវបានគេរាយការណ៍ថាអគារកីឡាទាំងមូលនេះមានតម្លៃប្រហែល ៤៣.៩ លានដុល្លារអាមេរិក។

ប្រសិនបើប្រទេសអេហ្ស៊ីបបានធ្វើជាម្ចាស់ផ្ទះកីឡាអូឡាំពិកឆ្នាំ ២០៣៦ ពិតមែនវានឹងក្លាយជាពេលវេលាប្រវត្តិសាស្ត្រដ៏អស្ចារ្យមួយសម្រាប់ទ្វីបអាហ្រ្វិក ខណៈដែលគ្មានប្រទេសអាហ្រ្វិកណាមួយធ្លាប់ធ្វើជាម្ចាស់ផ្ទះរបស់កីឡាអូឡាំពិកនោះទេ មានន័យថាអេហ្ស៊ីបនឹងបង្កើតប្រវត្តិសាស្ត្រក្នុងពេលឆាប់ៗនេះ។ បច្ចុប្បន្នប្រទេសអេហ្ស៊ីបមិនត្រឹមតែកំពុងពិចារណាធ្វើជាម្ចាស់ផ្ទះកីឡាអូឡាំពិកឆ្នាំ ២០៣៦ ប៉ុណ្ណោះទេ ថែមទាំងកំពុងពិចារណាលើការប្រកួតកីឡាអូឡាំពិកឆ្នាំ ២០៤០ ផងដែរ។

ប្រធានសមាគមគណៈកម្មាធិការជាតិអូឡាំពិកអាហ្រ្វិក (ANOCA) លោក Mustapha Berraf បាននិយាយថា ប្រទេសអេហ្ស៊ីបបានខិតខំប្រឹងប្រែងរួចមកហើយដើម្បីរៀបចំសម្រាប់សក្តានុពលនៃការធ្វើជាម្ចាស់ផ្ទះព្រឹត្តិការណ៍អន្តរជាតិដ៏សំខាន់នេះ ដូច្នេះលោកជឿជាក់ថា “អាហ្វ្រិកមានសមត្ថភាពគ្រប់គ្រាន់ក្នុងការធ្វើម្ចាស់ផ្ទះកីឡាអូឡាំពិកនៅឆ្នាំ ២០៣៦” ។ គួរបញ្ជាក់ដែរថា កន្លងទៅប្រទេសអេហ្ស៊ីបក៏ធ្លាប់ធ្វើជាម្ចាស់ផ្ទះព្រឹត្តិការណ៍កីឡាសំខាន់ៗដែរដូចជា Africa Cup of Nations និង World Handball Championship ប៉ុន្តែកីឡាអូឡាំពិកគឺជាព្រឹត្តិការណ៍ថ្មីទាំងស្រុងដែលប្រទេសមួយនេះមិនធ្លាប់បានធ្វើជាម្ចាស់ផ្ទះនោះឡើយ៕

តើលោកអ្នកជ្រាបទេថា យើងចាប់ផ្តើមប្រើប្រាស់ QR code តាំងពីពេលណាមក? ហើយប្រទេសណាជាអ្នកបង្កើតវា? ពិភពលោកចាប់ផ្តើមប្រើប្រាស់ QR code ឬ Quick Response code តាំងពីឆ្នាំ១៩៩៤ មកម៉្លេះ ដែលវាត្រូវបានបង្កើតឡើងដើម្បីបង្កើនប្រសិទ្ធភាពគ្រប់គ្រងក្នុងដំណើរការផលិតរបស់រោងចក្ររថយន្តនៅជប៉ុន ។

ក្រុមអ្នកស្រាវជ្រាវក្នុងក្រុមហ៊ុនរថយន្ត Denso Wave ដឹកនាំដោយលោក Masahiro Hara បានបង្កើត QR code មានចំនួន២ពណ៌ គឺពណ៌ស និងខ្មៅ ដែល Denso Wave គឺជាសាខារបស់ក្រុមហ៊ុន Denso នៅប្រទេសជប៉ុន ។

មុនដំបូង គេប្រើប្រាស់ QR code សម្រាប់ផ្តល់ភាពងាយស្រួលក្នុងការប្រមូល និងកំណត់បរិមាណគ្រឿងបន្លាស់រថយន្ត ហើយប្រើប្រាស់ជំនួស Barcode ដែលបិទនៅលើប្រអប់គ្រឿងបន្លាស់រថយន្តនីមួយៗ ។ ក្រៅពីនេះ គេប្រើប្រាស់វាដើម្បីបង្កើនប្រសិទ្ធភាពក្នុងដំណើរការផលិត រហូតដល់ការបញ្ជូនទំនិញ ។

នៅឆ្នាំ២០០២ ពលរដ្ឋជប៉ុនបានប្រើប្រាស់ QR code យ៉ាងច្រើន ហើយការលក់ទូរស័ព្ទដៃនានាបានផ្សព្វផ្សាយឱ្យអតិថិជនស្កេន QR code ដើម្បីចូលទៅគេហទំព័រ ឬស្កេនទទួលគូប៉ុងបញ្ចុះតម្លៃទំនិញ ជាដើម ។ ភាពងាយស្រួលនេះធ្វើឱ្យ QR code ទទួលបានការពេញនិយមយ៉ាងខ្លាំង រហូតក្រុមហ៊ុននានាពុំអាចខ្វះបាន ។

ក្រោយមក វាក៏ត្រូវគេប្រើប្រាស់ក្នុងជីវិតប្រចាំថ្ងៃ ដូចជា ៖ សំបុត្រយន្តហោះមានប្រព័ន្ធ QR code នៅអាកាសយានដ្ឋាន ។ បើទោះជា QR code គឺជាកម្មសិទ្ធិរបស់ក្រុមហ៊ុន Denso Wave ក្តី ប៉ុន្តែក្រុមហ៊ុនប្រកាសថា នឹងពុំចាត់វិធានការចំពោះអ្នកប្រើប្រាស់ទេ ។ បច្ចុប្បន្ន វាក៏បានក្លាយជា code សាធារណៈដែលមនុស្សនៅទូទាំងពិភពលោក អាចប្រើប្រាស់គ្រប់គ្នា ។

ចំណែកនៅតំបន់អាស៊ីបានប្រើប្រាស់ QR code សម្រាប់ការផ្ទេរប្រាក់ក្នុងគណនីធនាគារ, ការទូទាត់ថ្លៃទំនិញ និងសេវាកម្មផ្សេងៗ ព្រមទាំងការទទួលប្រាក់តាមរយៈទូរស័ព្ទដៃ ។ ហេតុនេះ QR code ទទួលបានការពេញនិយមយ៉ាងខ្លាំងសម្រាប់ប្រតិបត្តិការហិរញ្ញវត្ថុនៅប្រទេសឥណ្ឌូណេស៊ី, វៀតណាម, សិង្ហបុរី, ម៉ាឡេស៊ី, កម្ពុជា, ថៃ និងហុងកុង ៕

ប្រសិនបើយើងពេញចិត្តនឹងការរស់នៅក្នុងជីវិតដ៏ល្អប្រសើរនាពេលបច្ចុប្បន្ន គឺយើងនឹងចង់រស់នៅលើពិភពលោកនេះឱ្យបានយូរបំផុត ប៉ុន្តែអ្នកខ្លះទៀតបែរជាចង់ដឹងពីថ្ងៃស្លា.ប់របស់ខ្លួន ដោយសារអន់ចិត្តនឹងជីវិត ។ មនុស្សម្នាក់ៗពុំអាចគេចផុតពីសេចក្តីស្លា.ប់ ទេ គ្រាន់តែពុំដឹងថា តើវានឹងមកដល់នៅពេលណា?

App មួយឈ្មោះ «Death Clock» ត្រូវបានបង្កើតឡើងដើម្បីឱ្យអ្នកប្រើប្រាស់ដឹងថា តើពួកគេនឹងស្លាប់នៅពេលណា? អ្នកបង្កើត App ប្រាប់ថា វានឹងអាចឆ្លើយសំណួរដែលមនុស្សគ្រប់គ្នាចង់ដឹងបាន តាមរយៈការប្រើប្រាស់បច្ចេកវិទ្យា AI ។

អ្នកបង្កើត App ថ្មីជឿថា វាអាចប្រាប់ពីពេលវេលាស្លាប់របស់មនុស្សម្នាក់ៗបាន ដោយការប្រើប្រាស់ព័ត៌មានផ្ទាល់ខ្លួនដែលយើងបានបំពេញក្នុងកម្មវិធី ។ បន្ទាប់មក វានឹងវិភាគព័ត៌មានផ្ទាល់ខ្លួនអ្នកប្រើប្រាស់ជាមួយទិន្នន័យស្រាវជ្រាវរហូតដល់ជាង១,២០០ប្រភេទ ពាក់ព័ន្ធនឹងអាយុមនុស្ស ហើយ AI នឹងប្រាប់ពីថ្ងៃស្លាប់យ៉ាងត្រឹមត្រូវដោយផ្អែកតាមទិន្នន័យ ។

បើអ្នកប្រើប្រាស់ចង់ឱ្យបច្ចេកវិទ្យា AI ក្នុង App «Death Clock» ប្រាប់ពីពេលវេលាស្លាប់យ៉ាងត្រឹមត្រូវ គឺត្រូវតែបំពេញព័ត៌មានផ្ទាល់ខ្លួន ដូចជា ៖ អាយុ, ជាតិសាសន៍, ការហាត់ប្រាណ និងទម្លាប់ការបរិភោគអាហារប្រចាំថ្ងៃ ។ វាមិនត្រឹមតែប្រាប់ពីពេលវេលាស្លាប់យ៉ាងត្រឹមត្រូវប៉ុណ្ណោះទេ ប៉ុន្តែវាអាចជួយណែនាំឱ្យអ្នកប្រើប្រាស់ពន្យារអាយុផងដែរ ។ វានឹងមានប្រយោជន៍យ៉ាងខ្លាំងសម្រាប់អ្នកចង់មានអាយុវែង ដោយសារការណែនាំរបស់ Appខុសប្លែកពីការណែនាំរបស់មនុស្ស ។

ប៉ុន្តែ App ឈ្មោះ «Death Clock» ពុំទាន់ទូលំទូលាយនៅឡើយទេ គឺអនុញ្ញាតឱ្យតែពលរដ្ឋរស់នៅប្រទេសមួយចំនួនដោនឡូតប៉ុណ្ណោះ ។ អ្នកប្រើប្រាស់ត្រូវតែបំពេញព័ត៌មានផ្ទាល់ខ្លួនយ៉ាងលម្អិតចូលក្នុង App ជាមុនសិន ដើម្បីឱ្យវាប្រាប់ពីពេលវេលាស្លាប់ដោយពុំគិតថ្លៃ ។ នេះបើតាមការលើកឡើងរបស់អ្នកបង្កើត App ៕