ថ្មីៗនេះ មហាជនជាច្រើនហាក់មានការចាប់អារម្មណ៍យ៉ាងខ្លាំងទៅលើកុមារា-កុមារី ដែលជាជនជាតិដើមភាគតិចកួយ រស់នៅក្នុងខេត្តកំពង់ធំ បានបញ្ចេញក្បាច់រាំតាមចង្វាក់ប្រពៃណីខ្មែរ និងគ្រងឈុតសម្លៀកបំពាក់យ៉ាងសមសួន។
យោងតាមការដាក់បង្ហោះនៅលើបណ្តាញសង្គម Tik Tok ដោយគណនីស្តេចកួយ បានបង្ហាញវីដេអូជាច្រើនទាក់ទងនឹងសកម្មភាពរបស់កុមារា-កុមារី ដែលមានឆន្ទៈមុះមុតក្នុងការហាត់រាំចង្វាក់ប្រពៃណីខ្មែរ ដើម្បីក្លាយជាអ្នកស្នងមរតកវប្បធម៌នាពេលអនាគត។ បើតាមការគូសបញ្ជាក់ ពួកគេគឺស្ថិតនៅក្នុងក្រុមពន្លឺរស្មី ជាតិជនជាតិដើមភាគតិចកួយ រស់នៅក្នុងឃុំវិស័យ ស្រុកប្រាសាទបល្ហ័ង្គ ខេត្តកំពង់ធំ។
តាមរយៈវីដេអូដែលបានដាក់បង្ហោះដោយគណនីខាងលើ ដោយសង្កេតឃើញថា ក្មេងៗទាំងប្រុសនិងស្រីដ៏គួរឲ្យស្រលាញ់ នៅក្នុងឥរិយាបថទន់ភ្លន់ សុភាពរាបសារ រាំតាមចង្វាក់ភ្លេងយ៉ាងរស់រវើក។ ជាមួយគ្នានោះ ពួកគេក៏បានធ្វើការតុបតែងខ្លួននិងស្លៀកសម្លៀកបំពាក់បែបប្រពៃណីខ្មែរយ៉ាងសមសួនថែមទៀតផង។ 
ដោយមានទឹកចិត្តស្រលាញ់និងចង់មើលថែសិល្បៈវប្បធម៌ខ្មែរ ពួកគេបានយកចិត្តទុកដាក់ ហាត់រៀនរាំឲ្យស្របតាមចម្រៀងនិងបទភ្លេងជាច្រើនក្នុងទម្រង់ប្លែកៗពីគ្នា ក្នុងនោះមានទាំងបទកន្ទ្រឹម បទរាំវង់ និងរបាំជូនពរជាដើម។
ដោយមើលឃើញពីកិច្ចខិតខំប្រឹងប្រែងនិងទេពកោសល្យរបស់កុមារាកុមារីទាំងនេះ មហាជនខ្មែរជាច្រើននៅលើបណ្តាញសង្គមក៏បានចូលទៅបញ្ចេញមតិកោតសរសើរព្រោងព្រាត ដោយបានលើកឡើងថា ពួកគេគឺពិតជាទំពាំងស្នងឬស្សីដ៏មានគុណភាពពិតមែន៕
