តើលោកអ្នកធ្លាប់ឈឺក្បាលដែរឬទេ នៅពេលចូលបន្ទប់ទឹកម្តងៗហើយធុំក្លិនស្អុយ ជាពិសេស បន្ទប់ទឹកសាធារណៈមួយចំនួនដែលខ្វះការលាងសម្អាត ។ សារព័ត៌មាន KBN សូមបង្ហាញនូវវិធីមួយចំនួនដើម្បីបំបាត់ក្លិនស្អុយក្នុងបន្ទប់ទឹកយ៉ាងមានប្រសិទ្ធភាព ដោយការប្រើប្រាស់គ្រឿងផ្សំក្នុងផ្ទះបាយ ។

១-ផ្លែក្រូចសើច ៖ ផ្លែក្រូចសើច គឺស័ក្តិសមបំផុតសម្រាប់ប្រើប្រាស់ក្នុងបន្ទប់ទឹក ពីព្រោះវាជាឱសថធម្មជាតិមានក្លិនក្រអូប និងគ្មានគ្រោះថ្នាក់ដល់សុខភាព ។ ចូរពុះវាជា២ផ្នែក រួចហើយយកទៅដាក់នៅតាមចំណុចផ្សេងៗក្នុងបន្ទប់ទឹក ហើយសំបកក្រូចសើចនឹងបញ្ចេញក្លិនក្រអូប បង្កើតអារម្មណ៍ស្រស់ស្រាយ ។

២-សាប៊ូលាងចាន ៖ យកសាប៊ូលាងចានមកលាយជាមួយទឹកធម្មតា និងចាក់វាចូលក្នុងដបមានគំរបសម្រាប់បាញ់ ។ យើងអាចបាញ់សាប៊ូលាងចាននៅលើចានបង្គន់ដើម្បីដុសសម្អាត និងលាងចេញដោយទឹកស្អាតដើម្បីបំបាត់ក្លិនស្អុយក្នុងបន្ទប់ទឹក ។

៣-ទឹកក្រូចឆ្មារលាយម្សៅ Baking Soda ៖ យកទឹកក្រូចឆ្មារមកលាយជាមួយម្សៅ Baking Soda រួចហើយចាក់វានៅលើចានបង្គន់ ។ បន្ទាប់មក ដុសសម្អាតចានបង្គន់ឱ្យស្អាតដើម្បីបំបាត់ក្លិនមិនល្អ ។

៤-អំបិល ៖ អំបិលក៏អាចបំបាត់ក្លិនស្អុយក្នុងបន្ទប់ទឹកបានដែរ ដោយគ្រាន់តែយកវាមកលាយជាមួយទឹក បន្ទាប់មក យកទឹកអំបិលទៅចាក់ក្នុងចានបង្គន់ និងទុកវាចោលពី២០នាទី ទៅ៣០នាទី ទើបចុចទឹកបង្គន់ ។ ការធ្វើបែបនេះដើម្បីឱ្យអំបិលកម្ចាត់មេរោគដែលជាមូលហេតុបណ្តាលឱ្យបង្គន់ស្អុយ ។

៥-ផ្កាក្រៀម ឬប្រេងក្រអូប ៖ យើងយកប្រើប្រាស់ផ្កាក្រៀម និងប្រេងក្រអូបមានក្លិនក្រូច, ផ្កាឡាវេនឌឺ និងផ្កាកុលាប មកដាក់ក្នុងថូរកែវព្យួរក្នុងបន្ទប់ទឹក ។ បើគ្មានផ្កាក្រៀម គឺអាចប្រើប្រាស់ឈើអែម ឬផ្កាក្លាំពូ ឬបន្តក់ប្រេងក្រអូបលើក្រដាសអនាម័យក្នុងបន្ទប់ទឹក ដើម្បីឱ្យវាសាយភាយក្លិនចេញក្រៅ ។

៦-បោកគក់កម្រាលជូតជើង ៖ កុំភ្លេចបោកគក់កម្រាលជូតជើងក្នុងបន្ទប់ទឹកឱ្យបានញឹកញាប់ ពីព្រោះវាជាប្រភពមេរោគ និងបណ្តាលឱ្យមានក្លិនស្អុយ ។

សរុបមក អ្វីៗនៅជុំវិញខ្លួនយើងសុទ្ធតែមានប្រយោជន៍ទាំងអស់ ហើយកុំភ្លេចអនុវត្តតាមវិធីទាំងនេះផង ដើម្បីធ្វើឱ្យបន្ទប់ទឹកមានក្លិនក្រអូប ជាពិសេស នៅពេលមានភ្ញៀវមកលេងផ្ទះ ៕

ជិវិតមនុស្សយើងជោគជ័យ ឬបរាជ័យគឺអាស្រ័យទៅលើបុគ្គលដែលយើងកំពុងតែសេពគប់។ ដូច្នេះយើងគួរតែជ្រើសរើសសេពគប់មនុស្សដែលធ្វើឱ្យជីវិតមានភាពរីកចម្រើន និងសុខសាន្ត មិនមែនសេពគប់ហើយធ្វើឱ្យយើងកាន់តែស្មុគស្មាញជួបប្រទះតែភាពបរាជ័យនៅក្នុងជីវិតនោះទេ។ ខាងក្រោមនេះគឺជាមនុស្ស ៥ ប្រភេទដែលអ្នកគួរផ្តាច់ទំនាក់ទំនង ប្រសិនបើចង់ឱ្យជីវិតអ្នកប្រសើរឡើង។

១.មនុស្សអាត្មានិយម៖ មនុស្សអាត្មានិយមមើលឃើញតែផលប្រយោជន៍របស់យើងនោះទេ ទោះបីអ្នកធ្វើអំពើល្អ ជួយយកអាសាជាច្រើនដងក៏ដោយ ក៏គេមិនចាំដែរ ហើយអ្វីដែលគេចាំនោះគឺពេលដែលយើងមិនបានជួយគេ។

២.មនុស្សចាស់តែចរិតក្មេង៖ មនុស្សដែលធ្វើអត្តចរិតដូចកូនក្មេងយកតែចិត្ត គិតតែអារម្មណ៍ខ្លួនឯង មិនមានហេតុផល មិនមានភាពចាស់ទុំ មនុស្សបែបនេះនៅរួមសង្គមជាមួយនរណាបានមិនយូរទេ បើនៅជិតកាន់តែយូរកាន់តែមានផលវិបាកដល់យើងកាន់តែច្រើន។

៣.មនុស្សគិតខ្លី៖ មនុស្សដែលខ្ជិល ព្រងើយកន្តើយ មិនខ្វល់ពីអនាគត មិនមានគោលដៅច្បាស់លាស់ រកបានប៉ិនណា ហូបប៉ិននឹង ពេលសេពគប់យូរៗទៅអ្នកនឹងក្លាយទៅជាមនុស្សដូចគេ ដូច្នេះគួរគម្បីនៅឱ្យឆ្ងាយល្អជាង។

៤.មនុស្សមិនស្មោះត្រង់៖ អ្នកធ្លាប់មានអារម្មណ៍បែបនេះជាមួយនរណាម្នាក់ទេ មិនថាសេពគប់មកយូរប៉ុណ្ណា ក៏មិនដែលមានអារម្មណ៍ថាទុកចិត្តគេឡើយ ព្រោះថាគេចូលចិត្តនិយាយរឿងអាថ៌កំបាំងរបស់អ្នកដទៃអោយអ្នកស្តាប់ជាញឹកញយ ឬនិន្ទានរណាម្នាក់អោយអ្នកស្តាប់រហូត បើជួបមនុស្សបែបនេះនៅឆ្ងាយវាជាជម្រើសល្អបំផុត។

៥.មនុស្សចិត្តចង្អៀត ពូកែគុំគួន៖ មនុស្សដែលមានគំនិតគំនំគុំគួន មានអ្វីតិចតួចក៏យកមកគិត ខឹង មិនពេញចិត្ត ព្យាបាទ មិននិយាយត្រង់ៗ មនុស្សបែបនេះអ្នកគួរតែនៅឆ្ងាយជីវិតរបស់អ្នកល្អជាង បើនៅក្បែអ្នកនឹងមិនមានក្តីសុខទេ៕

កាលពីម្សិលមិញនេះគឺជាពិធីរៀបអាពាហ៍ពិពាហ៍ធំជាងគេមួយនៅស្រុកខ្មែរ និងជាមង្គលការត្រកូលអភិជនដ៏កក្រើកនាចុងឆ្នាំ២០២៤។ ជាមួយគ្នានោះ មហាជនខ្មែរជាច្រើនហាក់មានការចាប់អារម្មណ៍ និងចង់ដឹងទៅលើសាវតារបស់កូនកំលោះនិងកូនក្រមុំ ដែលជាគូរដ៏សាកសមនេះ។

ពិធីមង្គលការអភិជន ដែលបានរៀបចំឡើងកាលពីថ្ងៃទី ១១ ខែធ្នូ ឆ្នាំ២០២៤នេះ បង្កឲ្យមហាជនខ្មែរទូទាំងប្រទេសមានការស្ងើចសរសើរទាំងទៅលើការរៀបចំកម្មវិធីដ៏ប្រណិត ក៏ដូចជាភាពសាកសមគ្នានិងរូបសម្បត្តិល្អឥតទាស់របស់កូនកំលោះនិងកូនក្រមុំ រហូតដល់មានការចែកចាយពេញបណ្តាញសង្គម។

ជាការពិតណាស់ កូនកំលោះនិងកូនក្រមុំគឺជាកូនរបស់រដ្ឋមន្ត្រីចំនួន ២រូបនៃប្រទេសកម្ពុជា។កូនក្រមុំនាម អូន ព័ន្ធមណីលក្ស្មី ដែលត្រូវជាកូនស្រី ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ និងលោកជំទាវ អ៊ឹម ប៉ូលីកា។ចំណែកកូនកំលោះមាននាម ឡាំ ជុងហាវ គឺជាកូនប្រុសរបស់ ឯកឧត្តម ឡាំ ហេងហួត រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានគណៈកម្មាធិការជាតិគ្រប់គ្រងគ្រោះមហន្តរាយ និងលោកជំទាវ ស៊ឹម ជួង។

សូមជម្រាបថា អ្នកទាំងពីរបានភ្ជាប់ពាក្យ ភ្ជាប់និស្ស័យជាមួយគ្នាតាំងពីឆ្នាំ ២០២០ មកម្លេះ ដែលនេះគឺមានរយៈពេល ៥ ឆ្នាំហើយ ដែលពួកគេសម្រេចឈានចូលរោងជ័យជាមួយគ្នានាថ្ងៃទី១១ ខែធ្នូ ឆ្នាំ២០២៤។ ទោះយ៉ាងណា តាមរយៈពិធីមង្គលការនិងភាពសាកសមគ្នានេះ ហាក់អង្រួនបេះដូងមហាជនជាច្រើនមានការស្ញើចសរសើរនិងចែករំលែកពេញបណ្តាញសង្គមអំពីរូបថតអនុស្សាវរីយរបស់អ្នកទាំងពីរជាហូរហែរ បើទោះបីជាកម្មវិធីបញ្ចប់ទៅដោយរលូនហើយក្តី៕

ស្ពានតម្លៃ៦០លានដុល្លារ ត្រៀមលេចរូបរាងឡើង ជួយកាត់បន្ថយការកកស្ទះនៅចំណុចស្ពានព្រះមុនីវង្ស
ស្ពានឆ្លងទន្លេបាសាក់ ចាក់អង្រែក្រោម-ព្រែកប្រា ដែលជាស្ពានថ្មីមួយ គ្រោងនឹងបញ្ចប់ការសាងសង់នោឆ្នាំ២០២៧ ដោយតភ្ជាប់ពីចាក់អង្រែក្រោម ក្នុងខណ្ឌមានជ័យ នៅត្រើយខាងលិច និងព្រែកប្រា ខណ្ឌច្បារអំពៅ នៅត្រើយខាងកើត។

គម្រោងស្ថាបនាស្ពានចាក់អង្រែក្រោម-ព្រែកប្រា មានតម្លៃប្រមាណ ៦០លានដុល្លារ ត្រូវប្រើរយៈពេលសាងសង់ ៤២ខែ ដោយប្រើឥណទានសម្បទានពីប្រទេសចិន។

ស្ពានេះ ជាប្រភេទស្ពានបេតុងភ្លោះ មានប្រវែង ៨៤៥,៧ម៉ែត្រ ទទឹងប្រវែងសរុប ២៧ម៉ែត្រ ៤គន្លងរថយន្ត ២កន្លងម៉ូតូ និង២គន្លងថ្មើរជើង។

ក្រោយសាងសង់រួច ស្ពាននេះនឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្សឆ្លងកាត់ទន្លេបាសាក់ ភ្ជាប់ផ្លូវជាតិលេខ១ នៅខណ្ឌច្បារអំពៅ។

លើសពីនេះទៀត ស្ពាននេះ នឹងជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ៕