សហរដ្ឋអាមេរិក៖ Elon Musk បានបង្កើតប្រវត្តិសាស្ត្រថ្មី ក្លាយជាមនុស្សដំបូងគេក្នុងពិភពលោក ដែលមានទ្រព្យសម្បត្តិរហូតដល់ ៤០០ ពាន់លានដុល្លារអាមេរិក។
យោងតាម CNN ឥឡូវនេះទ្រពសម្បត្តិសុទ្ធរបស់មហាសេដ្ឋី Elon Musk គឺបានឡើងដល់ ៤៤៧ ពាន់លានដុល្លារអាមេរិក ដែលធ្វើឱ្យមហាសេដ្ឋីរូបនេះ ក្លាយជាមនុស្សដំបូងគេក្នុងប្រវត្តិសាស្ត្រពិភពលោក មានន័យថា គ្មាននរណាម្នាក់ធ្លាប់មានទ្រពសម្បត្តិច្រើនមហាសាលដូច Elon Musk នោះទេ។

ជាការពិតណាស់ ចាប់តាំងពីលោក Donald Trump ជាប់ឆ្នោតជាប្រធានាធិបតីអាមេរិកមក ទ្រព្យសម្បត្តិសុទ្ធរបស់ Musk បានកើនឡើងយ៉ាងខ្លាំងឥតឈប់ឈរគួរឱ្យកត់សម្គាល់។ លោក Musk បានគាំទ្រលោក Trump ជាសាធារណៈកាលពីខែកក្កដា ហើយបន្ទាប់មកបានចំណាយប្រាក់រាប់រយលានដុល្លារដើម្បីគាំទ្របេក្ខជនគណបក្សសាធារណរដ្ឋក្នុងអំឡុងពេលយុទ្ធនាការបោះឆ្នោត។ កាលពីដើមខែនេះប្រធានាធិបតីជាប់ឆ្នោត Trump បានតែងតាំង Musk និងអ្នកជំនួញ Vivek Ramaswamy ឱ្យដឹកនាំនាយកដ្ឋានការអនុវត្តរដ្ឋាភិបាល (DOGE) ជាមួយនឹងមហិច្ឆតានៃការកែទម្រង់ឧបករណ៍រដ្ឋាភិបាលសហព័ន្ធ។

មិនយូរប៉ុន្មានភាគហ៊ុន Tesla ស្រាប់តែបានឈានដល់កម្រិតកំណត់ត្រា ៤២៤.៧៧ ដុល្លារ កើនឡើងរហូតដល់ ៦៧%។ លើសពីនេះការចាប់ផ្តើមបង្កើតបញ្ញាសិប្បនិមិត្ត xAI របស់ Musk ក៏បានបង្កើនតម្លៃរបស់វាទ្វេដងដល់ ៥០ ពាន់លានដុល្លារបន្ទាប់ពីការផ្តល់មូលនិធិថ្មីផងដែរ។ កាលពីថ្ងៃទី១០ ខែធ្នូ ទ្រពសម្បត្តិរបស់លោកក៏បានកើនឡើង ៣៥០ ពាន់លានដុល្លារ បន្ទាប់ពីកិច្ចព្រមព្រៀងជំរុញតម្លៃនៃសាជីវកម្ម SpaceX។

បច្ចុប្បន្នមហាសេដ្ឋីដែលមានជាងគេនៅលើភពផែនដីយើងនេះ នៅតែជា Elon Musk ជាមួយទ្រពសម្បត្តិជាង ៤០០ ពាន់លានដុល្លារអាមេរិក ខណៈ Jeff Bezos ស្ថាបនិកអាម៉ាហ្សូនមាន ២៤៩ ពាន់លានដុល្លារ គឺជាមហាសេដ្ឋីលំដាប់ទីពីរនៅលើពិភពលោក។ រីឯនាយកប្រតិបត្តិ Meta លោក Mark Zuckerberg ក៏មិនធម្មតាដែរ មានទ្រពសម្បត្តិសុទ្ធប្រមាណ ២១៥ ពាន់លានដុល្លារ គឺជាមហាសេដ្ឋីលំដាប់ទីបីនៅលើភពផែនដី៕

ប្រទេសថៃ ៖ កាលពីថ្ងៃទី១០ ខែធ្នូ ឆ្នាំ២០២៤ សារព័ត៌មានថៃរាយការណ៍ថា គេបានប្រទះឃើញសា.កស.ព មនុស្សចំនួន៥នាក់ ក្នុងអាងធ្វើប្រហុកមួយកន្លែងនៅខេត្តពេជ្រឆាប៊ូន ប្រទេសថៃ ក្រោយពីម្ចាស់អាជីវកម្មប្រាប់ឱ្យកម្មករលាងសម្អាតអាងប្រហុកដើម្បីត្រៀមធ្វើប្រហុកថ្មី ។

អភិបាលខេត្តពេជ្រឆាប៊ូន លោក សារ៉ាន់យូ មីថងខាំ បានបញ្ជាឱ្យលោក ផាស៊ុក ស៊ុគ្រីវ៉ាក់ មន្ត្រីឧស្សាហកម្មខេត្តចុះត្រួតពិនិត្យនៅកន្លែងកើតហេតុ ដែលមានសាកសពមនុស្ស៥នាក់ ក្នុងអាងប្រហុករបស់រោងចក្រផលិតប្រហុក ស្ថិតនៅឃុំណងខ្វាយ ស្រុកឡមសាក់ ខេត្តពេជ្រឆាប៊ូន ។

ក្រោយការពិនិត្យរបស់មន្ត្រីឧស្សាហកម្មខេត្តឃើញថា ការធ្វើប្រហុកនៅទីនេះពុំបានប្រើប្រាស់ម៉ាស៊ីនទេ និងមានកម្មករតែ៦នាក់ប៉ុណ្ណោះ ។ ដូច្នេះ ទីតាំងមិនចាត់ទុកជារោងចក្រប្រហុកទេ ពីព្រោះបើតាមច្បាប់ គឺរោងចក្រត្រូវតែមានកម្មករចាប់ពី៥០នាក់ឡើងទៅ ឬប្រើប្រាស់ម៉ាស៊ីន ។

កាលពីមុន ទីតាំងធ្វើប្រហុកនេះជាកន្លែងចិញ្ចឹមមាន់ ហើយក្រោយមក ម្ចាស់អាជីវកម្មក៏បានកែច្នៃជាកន្លែងផលិតទឹកប្រហុក ។ អភិបាលខេត្តពេជ្រឆាប៊ូន បានបញ្ជាឱ្យអាជ្ញាធរនៅឃុំណងខ្វាយ ពិនិត្យមើលថា តើទីតាំងនេះបានសុំការអនុញ្ញាតផលិតទឹកប្រហុកស្របច្បាប់ដែរឬទេ? ព្រមទាំងឱ្យមន្ទីរសុខាភិបាលខេត្ត និងស្រុកពិនិត្យថា តើការផលិតទឹកប្រហុកមានអនាម័យដែរឬអត់?

ដោយឡែក សមត្ថកិច្ចបញ្ជាក់ថា កម្មករ៤នាក់នេះបានជួយគ្នាលាងសម្អាតអាងប្រហុក ប៉ុន្តែទឹកសម្រាប់លាងអាងផ្ទុកសារធាតុគីមីបង្កើតជាឧស្ម័នពុលយ៉ាងខ្លាំង រហូតដល់កម្មករសន្លប់លែងដឹងខ្លួន ។ រីឯលោក កុលឆាតិ ជាសាច់ញាតិរបស់ម្ចាស់អាជីវកម្មផលិតទឹកប្រហុក បានតាមរកកម្មករបាត់ខ្លួន ហើយឃើញកម្មករសន្លប់ លោកក៏ព្យាយាមជួយសង្គ្រោះ ។ ប៉ុន្តែលោកបានសន្លប់តាមដែរ និងស្លាប់ជាមួយកម្មករ គឺសរុបមានសាកសព៥នាក់ ។

សាកសពទាំង៥នាក់ ត្រូវបានបញ្ជូនទៅធ្វើកោសល្យវិច័យនៅមន្ទីរពេទ្យខេត្តពេជ្រឆាប៊ូន ប៉ុន្តែរង់ចាំមួយរយៈ ដោយសារមានគ្រូពេទ្យតែម្នាក់ ។ ក្រៅពីនេះ ក៏មានការបញ្ជូនឈាមសាកសពទាំងអស់ទៅពិសោធន៍នៅមន្ទីរពេទ្យប៉ូលិសផងដែរ ដើម្បីរកមូលហេតុការស្លាប់ពិតប្រាកដ ។

រីឯលោក វិន័យ អាយុ៤៥ឆ្នាំ ជាកម្មករដែលបានប្រទះឃើញសាកសពមុនគេ និយាយថា ទីតាំងផលិតទឹកប្រហុកនេះមានកម្មកររួមទាំងលោកដែរ ចំនួន៦នាក់ ហើយនៅថ្ងៃកើតហេតុ លោក និងមិត្តភក្តិម្នាក់ទៀតបានបើករថយន្តដឹកប្រហុកទៅខេត្តឡឺយ ។ រីឯកម្មករ៤នាក់ដែលស្លាប់នេះបានជួយគ្នាសម្អាងអាងប្រហុក ត្រៀមធ្វើប្រហុកថ្មីនាថ្ងៃបន្ទាប់ ។

ពេលល្ងាច លោក និងមិត្តម្នាក់ទៀតបានត្រឡប់មកកន្លែងធ្វើប្រហុកវិញ ហើយគ្មានឃើញអ្នកណាសោះ លោកក៏ស្រែកហៅ ប៉ុន្តែគ្មានការឆ្លើយតប ។ ដូច្នេះ លោកក៏ដើរចូលទៅបន្ទប់ធ្វើប្រហុក និងប្រើពិលក្នុងទូរស័ព្ទដៃបញ្ចាំងមើល ស្រាប់តែឃើញសាកសពកម្មករទាំងអស់ រួមទាំងលោក កុលឆាតិ ជាសាច់ញាតិរបស់ចៅកែ ទើបលោកទូរស័ព្ទប្តឹងសមត្ថកិច្ច ។

ចុងក្រោយ មន្ត្រីនាយកដ្ឋានគ្រប់គ្រងការបំពុលខ្យល់បានយកឧបករណ៍មកវាស់ស្ទង់ការបំពុលនៅកន្លែងកើតហេតុ និងយកស័ង្កសីគ្របលើអាងប្រហុក ដើម្បីឱ្យខ្យល់ពុលមានបរិមាណប្រហែលគ្នានឹងថ្ងៃកើតហេតុ ទើបទទួលលទ្ធផលច្បាស់លាស់ថា តើខ្យល់ពុលមានបរិមាណខ្ពស់កម្រិតណា ទើបបណ្តាលឱ្យកម្មករស្លាប់ ៕

ប្រទេសថៃ ៖ កាលពីថ្ងៃទី៨ ខែធ្នូ ឆ្នាំ២០២៤ សារព័ត៌មានថៃរាយការណ៍ថា ថៃបានជាប់ចំណាត់ថ្នាក់ទី៣ គឺជាប្រទេសមានអត្រាកំណើតទាបបំផុតនៅលើពិភពលោក ក្រោយពីអត្រាកំណើតរបស់ថៃធ្លាក់ចុះខ្លាំងរហូតដល់៨១% ក្នុងរយៈពេល៧៤ឆ្នាំមកនេះ ។ រីឯចំណាត់ថ្នាក់លេខ១ បានទៅកូរ៉េខាងត្បូង, លេខ២ ចិន, លេខ៤ ជប៉ុន និងលេខ៥ អ៊ីរ៉ង់ ។

ប្រទេសនានាបានប្រឈមនឹងបញ្ហាចំនួនពលរដ្ឋធ្លាក់ចុះខ្លាំង ដោយសារតែវិបត្តិសេដ្ឋកិច្ច និងសង្គម ពុំអំណោយផលដល់ការបង្កើនអត្រាកំណើត ។ Global Statistics បានបង្ហាញទិន្នន័យកំណើតទារករបស់ប្រទេសនានាឃើញថា ថៃបានជាប់ចំណាត់ថ្នាក់លេខ៣ ផ្នែកអត្រាកំណើតទាបក្នុងចំណោមប្រទេសចំនួន៨០ លើពិភពលោក គឺអត្រាកំណើតថៃធ្លាក់ចុះរហូតដល់៨១% ។

Global Statistics បានដកស្រង់ទិន្នន័យពី United Nations Population Division (UNPD) និងប្រមូលទិន្នន័យចាប់ពីឆ្នាំ១៩៥០ ដល់ឆ្នាំ២០២៤ និងបញ្ជាក់ថា អត្រាកំណើតទារកនៅប្រទេសថៃ បានធ្លាក់ចុះខ្លាំងក្នុងរយៈពេល៧៤ឆ្នាំចុងក្រោយ ។

ខាងក្រោមនេះ គឺជាប្រទេសមានអត្រាកំណើតធ្លាក់ចុះខ្លាំងជាងគេ រួមមាន ៖
១-កូរ៉េខាងត្បូង ធ្លាក់ចុះ ៨៨%
២-ចិន ធ្លាក់ចុះ ៨៣%
៣-ថៃ ធ្លាក់ចុះ ៨១%
៤-ជប៉ុន ធ្លាក់ចុះ ៨០% និង
៥-អ៊ីរ៉ង់ ធ្លាក់ចុះ ៧៥%

អ្នកលេងបណ្តាញសង្គមមួយចំនួនលើកឡើងថា អត្រាកំណើតធ្លាក់ចុះខ្លាំងនៅប្រទេសទាំង៥នេះ ដោយសារពួកគេឱ្យតម្លៃលើបុរសជាធំ និងដាក់សម្ពាធលើមនុស្សស្រី ។ ប្រទេសមួយចំនួនមានបញ្ហាសេដ្ឋកិច្ច និងសង្គម ព្រមទាំងការចំណាយខ្ពស់ក្នុងជីវភាពប្រចាំថ្ងៃ ហើយវាក៏ពាក់ព័ន្ធនឹងបញ្ហាសុខភាពយុវវ័យផងដែរ ដែលរស់នៅជាមួយការបំពុលបរិស្ថាន និងបរិភោគអាហារគ្មានប្រយោជន៍ដល់រាងកាយ ៕