ប្រទេសវៀតណាម៖ ហាងកាហ្វេដែលទើបនឹងបើកថ្មីនៅស្រុក Hoang Mai ប្រទេសវៀតណាម គឺមានភាពលេចធ្លោខ្លាំងណាស់ជាមួយនឹងធ្នើសៀវភៅទំហំ ៧៥ ម៉ែត្រការ៉េ ដែលមានផ្ទុកសៀវភៅចំនួន ៣ តោនកំពុងទាក់ទាញភ្ញៀវទេសចរអន្តរជាតិ។

ហាងកាហ្វេ Tiny Revolution បានបើកដំណើរការកាលពីចុងខែវិច្ឆិកា ដោយបានទាក់ទាញយុវជនជាច្រើន រួមទាំងភ្ញៀវបរទេស ដោយសារតែធ្នើសៀវភៅដ៏ធំរបស់វាមានទីតាំងនៅក្រោមពន្លឺដ៏ស្រស់ស្អាត អាចផ្ទុកសៀវភៅចំនួន ៣ តោន ស្មើនឹងសៀវភៅ ៦ ទៅ ៧ ពាន់ក្បាល ពោរពេញទៅដោយអតិថិជនរាប់រយនាក់ក្នុងពេលតែមួយ។

កន្លែងដាក់សៀវភៅយក្សក៏ត្រូវបានគេប្រើជាកន្លែងសម្រាប់ការសម្តែងតន្ត្រីដោយឥតគិតថ្លៃនៅចុងសប្តាហ៍ផងដែរ។ តន្ត្រីត្រូវបានជ្រើសរើសក្នុងស្ទីលបែបស្រទន់ ស្រណុកសុខស្រួលសម្រាប់លំហ និងស្មារតីរបស់ហាង។ ហាងកាហ្វេនេះមានសៀវភៅចម្រុះគ្រប់ប្រភេទ ដែលភាគច្រើនគឺសម្បូរទៅដោយសៀវភៅភាសាអង់គ្លេស។ នៅទីនេះមានកន្លែងធំទូលាយ កក់ក្ដៅ មានសាឡុង និងទូសៀវភៅធំ សមរម្យសម្រាប់ភ្ញៀវទេសចរគ្រប់ជាតិសាសន៍។

ក្រៅពីកន្លែងដាក់សៀវភៅយក្ស ហាងក៏មានជ្រុងតុបតែងជាច្រើនទៀត ដែលភាគច្រើនមានវត្ថុបុរាណដូចជា ព្យាណូ ទូរស័ព្ទ កាមេរ៉ា ឬគំនូរអរូបីជាដើម។ លើសពីនេះហាងកាហ្វេនេះក៏មានសេវាកម្មរហ័ស និងកាហ្វេឆ្ងាញ់ ដែលភេសជ្ជះរបស់ហាងមានជាចម្បងគឺ កាហ្វេ តែ និងម៉ាតឆា ជាមួយគុណភាពភេសជ្ជៈគឺល្អ ងាយស្រួលផឹក រសជាតិលេចធ្លោ។ ភ្ញៀវទេសចរក៏អាចទស្សនា ថតរូបជាមួយសៀវភៅ និងវត្ថុបុរាណគ្រប់ប្រភេទយ៉ាងសប្បាយរីករាយផងដែរ។

ជាការពិតណាស់ក្រៅពីបណ្ណាល័យ ហាងកាហ្វេក៏អាចតុបតែងសៀវភៅបានដែរ ប្រសិនបើហាងកាហ្វេទាំងអស់តុបតែងសៀវភៅច្រើនបែបនេះ ទំនងទាក់ទាញភ្ញៀវទេសចរបានច្រើន។ ការអានសៀវភៅមិនត្រឹមផ្តល់អត្ថប្រយោជន៍ដល់សុខភាពរាងកាយទាំងមូលប៉ុណ្ណោះទេ ថែមទាំងធ្វើឱ្យដំណើរការខួរក្បាលមានភាពរស់រវើកទៀតផង។ ចំពោះប្រយោជន៍មួយដែលសំខាន់បំផុតនោះគឺការអានបានពង្រឹងខួរក្បាល ក៏ដូចជាការគិត តាមរយៈប្រព័ន្ធដំណើរការទាំងមូលនៃរាងកាយបានផ្តោតទៅលើទំព័រសៀវភៅដែលកំពុងតែអាន រួមជាមួយការអានបណ្តើ ផឹកកាហ្វេក្តៅៗបណ្តើគឺថាស្រស់បំព្រងម្តង៕

នៅលើផែនដីយើងនេះ មានកោះប្រមាណជាង ១០០ ពាន់កោះ ក្នុងនោះមានមនុស្សប្រមាណ ១០ ភាគរយនៃចំនួនប្រជាជនលើពិភពលោក រស់នៅលើដែនដីកោះទាំងនេះ។ ក្នុងចំណោម ១០០ ពាន់កោះមានកោះចំនួន ៥ ប៉ុណ្ណោះដែលត្រូវបានគេចាត់ទុកថា មានសម្រស់ស្អាត និងទាក់ទាញភ្ញៀវទេសចរច្រើនជាងគេបំផុតលើពិភពលោក។

១.កោះ Bora Bora៖ កោះដ៏ស្រស់ស្អាតនេះ មានទីតាំងស្ថិតនៅភាគខាងត្បូងនៃមហាសមុទ្រប៉ាស៊ីហ្វីក ប្រទេសបារាំង។ កោះតំបន់ត្រូពិចនេះគឺ បឹងទឹកប្រៃដ៏ស្រស់ស្អាត ជាមួយនឹងពណ៌បៃតងឆ្លុះ។ នៅទីនេះអ្នកអាចឃើញពពួកមច្ឆា អណ្តើក ត្រីឆ្លាម បបែលហែលលេងក្នុងទឹកថ្លាឆ្លុះដល់បាត។ ភ្ញៀវទេសចរណ៍ដែលនិយមមុជទឹក និងជិះក្តារស្គី ពិតជាអាចរីករាយជាមួយនឹងការកំសាន្តនៅក្បែរតំបន់ថ្មប៉ប្រះទឹក។ ប្រសិនបើអ្នកមានលទ្ធភាព គួរតែទៅកំសាន្តនៅទីនោះ ដោយស្នាក់នៅក្នុងបង់ហ្កាឡូបណ្តែតលើទឹកជាមួយអារម្មណ៍ស្រស់ថ្លា។

២.កោះ Fiji៖ ប្រទេសដីកោះ Fiji មានទីតាំងសិ្ថតនៅមហាសមុទ្រប៉ាស៊ីហ្វិកខាងត្បូង ជាតំបន់បុរាណវិទ្យាដែលប្រមូលផ្តុំដោយកោះប្រមាណជាង ៣០០។ ភាពល្បីល្បាញនៃកោះនេះ បានដោយទេសភាពនៃកោះរដិបរដុប ឆ្នេរដែលមានរាងដូចជាម្រាមដៃ និងផ្កាថ្មប៉ប្រះទឹក ព្រមទាំងផ្ទៃទឹកថ្លាឈ្វង់។

៣.កោះ Bali៖ កោះ Bali ក្នុងប្រទេសឥណ្ឌូនេស៊ី គឺមានភាពល្បីល្បាញដោយសារវាជាភ្នំភ្លើងគ្របដណ្តប់ដោយព្រៃឈើ វាលស្រែធ្វើលើភ្នំ ឆ្នេរសមុទ្រ និងផ្កាថ្មប៉ប្រះទឹក។ កោះនេះជាបណ្តុំនៃទីតាំងសាសនា ដែលមានដូចជាវិហារ Uluwatu ដែលស្ថិតនៅចំណោទកោះជាដើម។ ទីក្រុង Kuta ដែលស្ថិតនៅតាមបណ្តោយឆ្នេរនៅភាគខាងត្បូងនៃកោះ Bali ក៏សម្បូរដោយក្លឹបរាត្រី ចំណែកក្រុង Seminyak Sanur និង Nusa Dua ជារមណីយដ្ឋានដ៏ពេញនិយមមួយ។ កោះនេះក៏មានភាពល្បីល្បាញក្នុងនាមជាកន្លែងហាត់ Yoga និងកន្លែងសង្រួមផ្លូវចិត្តផងដែរ។

៤.កោះ Maldives៖ ប្រទេស Maldives ជាប្រជុំនៃកម្រងកោះដែលស្រស់ស្អាតជាងគេលើពិភពលោក ផ្ទៃទឹកសមុទ្រពណ៌ខៀវស្រងាត់ ជាផ្នែកមួយជម្រុញឱ្យកោះទាំងនេះកាន់តែលេចឡើង។ Maldives ជាប្រជុំកោះដែលប្រមូលផ្តុំដោយកោះផ្កាថ្មធម្មជាតិចំនួន២៦ និងមានផ្ទៃដីទាបជាងគេបំផុតនៅលើពិភពលោក ដោយនៅត្រង់ចំណុចខ្ពស់បំផុត ផ្ទៃដីមានកម្ពស់មិនខ្ពស់ជាង ៣ ម៉ែត្រឡើយពីនីវ៉ូសមុទ្រ។ នៅពីក្រោមផ្ទៃទឹកដ៏ស្រស់ស្អាត សម្បូរទៅដោយផ្កាថ្មដុះប៉ប្រះទឹក ដែលបានទាក់ទាញភ្ញៀវទេសចរជុំវិញពិភពលោកមកកំសាន្តនៅទីនេះ។

៥.កោះ Palawan៖ កោះ Palawan នេះជាឋានសួគ៌ក្រោមមេឃ ស្ថិតនៅក្នុងប្រទេសហ្វីលីពីន។ ខេត្តដីកោះនេះ លាតសន្ធឹងលើតំបន់ភាគនិរតីទៅកាន់កោះ Borneo ជាមួយនឹងថ្មបាយក្រៀមផុសឡើងចេញពីផ្ទៃសមុទ្រ។ ពីលើកោះនេះ អ្នកអាចឃើញសកម្មភាពរបស់ពួកមច្ឆាហែលទឹកលេងបានយ៉ាងច្បាស់ អ្វីដែលទាក់ទាញបំផុតរបស់កោះ Palawan នេះគឺសួនឧទ្យានជាតិ Puerto Princesa Subterranean River ដែលត្រូវបានគេដាក់បញ្ជូនក្នុងបញ្ជីបេតិកភណ្ឌពិភពលោក៕

ប្រាសាទ Katsuoji នៅក្នុងប្រទេសជប៉ុនគឺជាកន្លែងដ៏ស្រស់ស្អាតបំផុតមួយដើម្បីមើលស្លឹកឈើជ្រុះ និងជាកន្លែងសម្រាប់រក្សាទុកតុក្កតា Daruma រាប់ពាន់ផងដែរ។ ចាប់ពីខែធ្នូរហូតដល់ខែមករា គឺជាពេលវេលាដែលប្រាសាទទាក់ទាញជនជាតិដើមភាគតិច និងភ្ញៀវទេសចរអន្តរជាតិឱ្យមកទស្សនាយ៉ាងច្រើនកុះករ។ ទោះជាយ៉ាងណា ភ្ញៀវទេសចរដែលមកទស្សនាប្រាសាទនេះ តែងតែឆ្ងល់ថា ហេតុអ្វីប្រាសាទ Katsuoji មានតុក្កតាច្រើនយ៉ាងនេះ តើគេរក្សាទុកតុក្កតា Daruma ដើម្បីអ្វី?

Daruma គឺជាតុក្កតាជប៉ុនមិនធម្មតាមួយ ដែលមានរាងកាយមូល និងរឹងមាំ មានការតាំងចិត្ត និងមានមុខកាច។ តុក្កតានេះត្រូវបានផលិតឡើងដោយប្រើបច្ចេកទេសក្រដាសម៉ាចបែបបុរាណមានពណ៌ក្រហមតំណាងឱ្យសំណាង និងភាពជោគជ័យ។ ប្រសិនបើតុក្កតានេះដួល ឬធ្លាក់អាចធ្វើឱ្យប្រទេសជប៉ុនប្រឈមនឹងរឿងមិនល្អជាច្រើន។ មូលហេតុដែលប្រាសាទ Katsuo រក្សាទុកតុក្កតា Daruma នៅគ្រប់ទីកន្លែង គឺដោយសារគេជឿថា វាអាចការពារពពួកអមនុស្ស ឬអារក្ស ជួយឱ្យអ្នកទស្សនាមានសំណាងល្អ បំណងប្រាថ្នាក្លាយជាការពិត និងជោគជ័យគ្រប់ភារកិច្ច។

Katsuo-ji គឺជាប្រាសាទមួយដែលមានទីតាំងនៅលើភ្នំគ្របដណ្តប់ដោយដើមម៉េផល ក្នុងទីក្រុង Mino ប្រទេសជប៉ុន គឺជាកន្លែងដ៏ល្បីល្បាញបំផុតដើម្បីមើលស្លឹកឈើពណ៌ក្រហម អ្វីដែលពិសេសរបស់ប្រាសាទនេះគឺរូបចម្លាក់តុក្កតា Daruma តែម្តង។ ប្រាសាទ Katsuo មិនត្រឹមតែជាកន្លែងបន់ស្រន់ដ៏ពិសិដ្ឋ និងជាកន្លែងពេញនិយមមើលស្លឹកឈើជ្រុះប៉ុណ្ណោះទេ ថែមទាំងជាកន្លែងទេសចរណ៍ពិសេសមួយ ដែលទាក់ទាញភ្ញៀវទេសចរបរទេសឱ្យមកទស្សនា ឆែកមើលតុក្កតា Daruma ពណ៌ក្រហមភ្លឺរាប់ពាន់នៅជុំវិញប្រាសាទ។

នៅខាងក្នុងប្រាសាទក៏មានលក់វត្ថុអនុស្សាវរីយ៍ជាច្រើនទៀតផងដែរ ដែលធ្វើឱ្យ ប្រាសាទនេះតែងតែមានភ្ញៀវទេសចរតម្រង់ជួរទិញយ៉ាងពេញទំហឹង។ អស់រយៈពេលជាយូរមក ការអធិស្ឋានសុំសំណាងល្អជាមួយតុក្កតា Daruma នៅប្រាសាទ Katsuo-ji មិនត្រឹមតែទាក់ទាញប្រជាជនជប៉ុនប៉ុណ្ណោះទេ ថែមទាំងទាក់ទាញអ្នកទេសចរមកពីជុំវិញពិភពលោកទៀតផង៕

ប្រទេសថៃ ៖ កាលពីថ្ងៃទី១៤ ខែធ្នូ ឆ្នាំ២០២៤ សារព័ត៌មានថៃរាយការណ៍ថា ក្រសួងវប្បធម៌នឹងស្នើសុំចុះបញ្ជីប្រពៃណីបណ្តែតប្រទីប (Loy Krathong Festival) នៅប្រទេសថៃ គឺជាបេតិកភណ្ឌវប្បធម៌អរូបីជាមួយអង្គការយូណេស្កូ (UNESCO) នៅខែមីនា ឆ្នាំ២០២៥ ។ បច្ចុប្បន្ន ស្ថាប័នពាក់ព័ន្ធកំពុងសិក្សាពីចំណុចលម្អិត និងត្រួតពិនិត្យឯកសារឱ្យបានត្រឹមត្រូវមុនពេលបញ្ជូនទៅអង្គការយូណេស្កូ ។

លោកស្រី Sudawan Wangsuphakijkosol រដ្ឋមន្ត្រីក្រសួងវប្បធម៌និយាយថា កិច្ចប្រជុំគណៈកម្មការលើកកម្ពស់ និងអភិរក្សបេតិកភណ្ឌវប្បធម៌ បានឯកភាពឱ្យនាយកដ្ឋានផ្សព្វផ្សាយវប្បធម៌ប្រកាសពីការដាក់បញ្ចូលក្នុងបញ្ជីបេតិកភណ្ឌវប្បធម៌អរូបី នៅឆ្នាំ២០២៤ ចំនួន១០ប្រភេទ ។ ក្រសួងវប្បធម៌បានប្រកាសពីការចុះបញ្ជីបេតិកភណ្ឌវប្បធម៌ជាតិ ចាប់ពីឆ្នាំ២០០៩ រហូតដល់បច្ចុប្បន្ន សរុបចំនួន៣៩៦ប្រភេទ ។

កន្លងមក ប្រទេសថៃបានចុះបញ្ជីជាមួយអង្គការយូណេស្កូ ដូចជា ៖ ល្ខោនខោល, ម៉ាស្សា, របាំមនោរ៉ា និងសង្ក្រាន្ត គឺជាបេតិកភណ្ឌវប្បធម៌អរូបី ។ បន្ទាប់មក កិច្ចប្រជុំបានឯកភាពចុះបញ្ជីប្រពៃណីបណ្តែតប្រទីប ជាបេតិកភណ្ឌវប្បធម៌អរូបីនៃមនុស្សជាតិជាមួយអង្គការយូណេស្កូ ដោយចាត់តាំងឱ្យនាយកដ្ឋានផ្សព្វផ្សាយវប្បធម៌ និងគណៈកម្មការពាក់ព័ន្ធសិក្សាពីចំណុចលម្អិត និងត្រួតពិនិត្យឯកសារឱ្យបានត្រឹមត្រូវ បន្ទាប់មក នឹងបញ្ជូនទៅគណៈរដ្ឋមន្ត្រីត្រួតពិនិត្យ មុនពេលបញ្ជូនទៅអង្គការយូណេស្កូ នៅខែមីនា ឆ្នាំ២០២៥ ។

រដ្ឋាភិបាល និងក្រសួងវប្បធម៌ថៃតែងតែផ្តល់ភាពសំខាន់លើបេតិកភណ្ឌវប្បធម៌អរូបី ដើម្បីឱ្យពលរដ្ឋស្រឡាញ់ និងផ្តល់តម្លៃលើវប្បធម៌ជាតិដែលបន្តពីដូនតា ។ ការស្រឡាញ់វប្បធម៌នឹងធ្វើឱ្យពលរដ្ឋចេះសាមគ្គីគ្នាជាធ្លុងមួយ ដើម្បីបង្ហាញពីជីវិតរស់នៅក្នុងសង្គម ដូចជា ៖ ការបរិភោគ, ការរស់នៅ, ការទំនាក់ទំនង និងសហការគ្នា ។

ហេតុនេះ វប្បធម៌នឹងជួយជំរុញសេដ្ឋកិច្ច និងក្លាយជា Soft Power ឱ្យគេស្គាល់នៅទូទាំងពិភពលោក ។ ក្រៅពីនេះ រដ្ឋាភិបាលថៃក៏បានកំណត់គោលនយោបាយឱ្យគ្រួសារពលរដ្ឋជួយជំរុញ Soft Power ផងដែរ ពីព្រោះពលរដ្ឋជាប្រភពនៃការទំនាក់ទំនង ។

គួរបញ្ជាក់ថា ពិធីបុណ្យបណ្តែតប្រទីប មិនមែនមានតែនៅប្រទេសថៃមួយទេ គឺប្រទេសផ្សេងៗក៏បានរៀបចំពិធីបុណ្យនេះដែរ ដូចជា ៖ កម្ពុជា, ឡាវ និងមីយ៉ាន់ម៉ា គ្រាន់តែការរៀបចំពិធីបុណ្យមានលក្ខណៈខុសៗគ្នាទៅតាមជំនឿរបស់ប្រទេសនីមួយៗ ៕