សហរដ្ឋអាមេរិក ៖ ពលរដ្ឋកាណាដាចង់ឱ្យប្រទេសរបស់ខ្លួនក្លាយជារដ្ឋទី៥១ របស់សហរដ្ឋអាមេរិក ពីព្រោះពួកគេនឹងអាចកាត់បន្ថយការបង់ពន្ធទំនិញ និងគ្រប់គ្រងផ្នែកកងទ័ព ហើយខ្ញុំគិតថា វាជារឿងល្អ ។ នេះបើតាមការលើកឡើងរបស់ប្រធានាធិបតីអាមេរិកថ្មី លោក Donald Trump ក្នុងបណ្តាញសង្គម Truth Social កាលពីថ្ងៃទី១៨ ខែធ្នូ ឆ្នាំ២០២៤ ។

នាយករដ្ឋមន្ត្រីកាណាដា លោក Justin Trudeau បានប្រឈមមុខនឹងភាពផុយស្រួយផ្នែកនយោបាយ ក្រោយពីរដ្ឋមន្ត្រីក្រសួងហិរញ្ញវត្ថុ លោកស្រី Chrystia Freeland ប្រកាសលាលែងពីតំណែងភ្លាមៗ ដែលលោកស្រីជិតស្និទ្ធជាមួយលោក Trudeau និងជាបុគ្គលមានឥទ្ធិពលក្នុងរដ្ឋាភិបាល ។ វាធ្វើឱ្យមានសំណួរថា តើលោក Trudeau នឹងត្រៀមខ្លួនដូចម្តេចជាមួយលោក Trump ពាក់ព័ន្ធនឹងការដំឡើងពន្ធទំនិញ? ខណៈលោក Trump សរសេរក្នុងបណ្តាញសង្គមថា ពលរដ្ឋកាណាដាចង់ឱ្យប្រទេសពួកគេក្លាយជារដ្ឋទី៥១ របស់សហរដ្ឋអាមេរិក ។

លោក Trump និយាយថា នេះជាគំនិតល្អប្រសើរបំផុត ដែលកាណាដាចង់ក្លាយជារដ្ឋទី៥១ របស់សហរដ្ឋអាមេរិក ស្របពេលនាយករដ្ឋមន្ត្រីកាណាដាកំពុងប្រឈមនឹងបញ្ហានយោបាយក្នុងប្រទេសពាក់ព័ន្ធនឹងការដំឡើងពន្ធ និងសង្គ្រាមពាណិជ្ជកម្មជាមួយសហរដ្ឋអាមេរិក ។ លើសពីនេះ លោក Trump ថែមទាំងហៅលោក Trudeau ថា ជាអភិបាលខេត្តកាណាដា ទៀតផង ។

លទ្ធផលការស្ទង់មតិរបស់ Leger បង្ហាញថា ពលរដ្ឋកាណាដា ប្រមាណ១៣% ចង់ឱ្យប្រទេសកាណាដា ក្លាយជារដ្ឋមួយរបស់សហរដ្ឋអាមេរិក ។ កាលពីខែវិច្ឆិកា លោក Trump បាននិយាយមកពីកាន់សារព័ត៌មាន Fox News ថា ៖ «ការបង្រួបបង្រួមប្រទេសរវាងសហរដ្ឋអាមេរិក និងកាណាដា នឹងអាចដោះស្រាយបញ្ហាការជួញដូរថ្នាំញៀន Fentanyl និងទប់ស្កាត់ជនភៀសខ្លួនខុសច្បាប់» ។

គួរបញ្ជាក់ថា រដ្ឋមន្ត្រីក្រសួងហិរញ្ញវត្ថុ លោកស្រី Freeland មានគំនិតផ្ទុយគ្នាជាមួយលោក Trudeau ទាក់ទងនឹងការបញ្ឈប់បង់ពន្ធការលក់ទំនិញរយៈពេល២ខែ និងការផ្តល់ប្រាក់ជាង១៧០ដុល្លារអាមេរិកឱ្យពលរដ្ឋ ។ លោកស្រីប្រាប់ថា វាជាការធ្វើនយោបាយឥតប្រយោជន៍ ហើយកាណាដាពុំអាចធ្វើបែបនេះទេ ប៉ុន្តែត្រូវរក្សាប្រាក់បម្រុងសម្រាប់ចំណាយពេលចាំបាច់ ករណីកើតសង្គ្រាមពន្ធជាមួយសហរដ្ឋអាមេរិក ពីព្រោះលោក Trump នឹងដំឡើងពន្ធទំនិញកាណាដា ២៥% ។

ការលាលែងពីតំណែងរបស់លោកស្រី Freeland បានធ្វើឱ្យពលរដ្ឋកាណាដាទាមទារឱ្យលោក Trudeau ចុះចេញពីតំណែង ហើយមេដឹកនាំគណបក្សប្រឆាំងអំពាវនាវឱ្យមានការបោះឆ្នោតមុនពេលកំណត់ ៕

សហរដ្ឋអាមេរិក ៖ កាលពីថ្ងៃទី១៩ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា អាមេរិកប្រើប្រាស់បច្ចេកវិទ្យា AI ក្នុងសាលារៀន ដើម្បីត្រួតពិនិត្យអាវុ.ធ យ៉ាងឆាប់រហ័ស និងកាត់បន្ថយហេតុការណ៍បា.ញ់ ប្រហារ ។ ក្រៅពីនេះ អាមេរិកក៏បានដំឡើងប្រព័ន្ធឃ្លាំមើលនៅតាមព្រំដែនផងដែរ ក្នុងគោលបំណងទប់ស្កាត់ជនភៀសខ្លួនខុសច្បាប់ និងការជួញដូរគ្រឿងញៀន ។

ស្របពេលភ្នាក់ងារគយ និងការពារព្រំដែនអាមេរិកបានប្រើប្រាស់បច្ចេកវិទ្យា AI សម្រាប់តាមដានការឆ្លងដែនខុសច្បាប់ គេសង្កេតឃើញសាលារៀនកាន់តែច្រើនបានប្រើប្រាស់បច្ចេកវិទ្យានេះចាប់អាវុធ ដើម្បីផ្តល់សុវត្ថិភាពក្នុងទីធ្លាសាលា និងការពារការបាញ់ដែលតែងតែកើតឡើងជាញឹកញាប់នៅអាមេរិក ។

សាលា Cardinal Local Schools ស្ថិតនៅតំបន់ Geauga County រដ្ឋអូហៃអូ បានបំពាក់បច្ចេកវិទ្យា Zeroeyes ចាប់អាវុធជាតិផ្ទុះដោយស្វ័យប្រវត្តិហើយវាអាចទប់ស្កាត់ការគំរាមកំហែងចាប់ពីខ្លោងទ្វារសាលា ។ បច្ចេកវិទ្យានេះនឹងពិនិត្យការធ្វើចលនាផ្សេងៗនៅមុខកាមេរ៉ា បន្ទាប់មក វានឹងជូនដំណឹងពីប្រភេទកាំភ្លើងទៅនាយកសាលា និងសន្តិសុខជាបន្ទាន់ ។

រីឯសាលា Stark County នៅក្បែរគ្នា ក៏បានប្រើប្រាស់បច្ចេកវិទ្យា Zeroeyes ដែរ កាលពីចុងខែតុលា ឆ្នាំ២០២៤ ពីព្រោះសាលាគិតពីសុវត្ថិភាពកូនសិស្ស និងគ្រូបង្រៀនជាចម្បង ។ ប៉ុន្តែបច្ចេកវិទ្យានេះពុំអាចចាប់អាវុធដែលលាក់ទុកបានទាំងអស់ទេ ហើយសាលាត្រូវតែប្រើប្រាស់ឧបករណ៍ការពារសុវត្ថិភាពបន្ថែមទៀត ។

ទីប្រឹក្សាសន្តិសុខអាមេរិកនិយាយថា Zeroeyes គ្រាន់តែជួយការពារសុវត្ថិភាពបន្ថែមប៉ុណ្ណោះ ចំណែកបច្ចេកវិទ្យាដែលអាចចាប់អាវុធលាក់ទុកនោះ គឺ Evolve ពីព្រោះវានឹងស្កេនមនុស្សដើរឆ្លងកាត់ ។

បច្ចុប្បន្ន បច្ចេកវិទ្យា AI ក៏ត្រូវយកទៅប្រើប្រាស់នៅតាមបរិវេណព្រំដែនអាមេរិកជាប់ប្រទេសម៉ិកស៊ិកផងដែរ ដើម្បីតាមដានសកម្មភាពជួញដូរមនុស្ស, ការនាំចូលគ្រឿងញៀន និងជនភៀសខ្លួនខុសច្បាប់ ៕

ប្រទេសថៃ ៖ កាលពីថ្ងៃទី៨ ខែធ្នូ ឆ្នាំ២០២៤ លោក Pichai Naripthaphan រដ្ឋមន្ត្រីក្រសួងពាណិជ្ជកម្មថៃបានពិភាក្សាជាមួយឯកអគ្គរដ្ឋទូតចិនប្រចាំប្រទេសថៃ លោក Han Zhiqiang ព្រមទាំងមន្ត្រីពាក់ព័ន្ធ ដើម្បីពង្រឹងទំនាក់ទំនងពាណិជ្ជកម្មរវាងប្រទេសទាំងពីរ ។ ក្រៅពីនេះ ភាគីទាំងពីរបានពិភាក្សាពីការដោះស្រាយបញ្ហាទំនិញ និងអាជីវកម្មខុសច្បាប់ ហើយថៃសុំឱ្យចិនជួយទិញទិន្នផលកសិកម្ម ដូចជា ៖ ដំឡូងមី និងអង្ករបន្ថែម ។

លោក Pichai និយាយថា តាំងពីឡើងកាន់តំណែងជារដ្ឋមន្ត្រីក្រសួងពាណិជ្ជកម្ម លោកបានជួបជាមួយលោក Han ជាបន្តបន្ទាប់ ដើម្បីស្វែងរកកិច្ចសហការរវាងថៃ និងចិន ។ កាលពីថ្ងៃទី២៦ ខែកញ្ញា កន្លងមក លោក Han បាននាំមន្ត្រីមកប្រជុំនៅក្រសួងពាណិជ្ជកម្មថៃ ដោះស្រាយការបារម្ភពីបញ្ហាទំនិញ និងអាជីវកម្មខុសច្បាប់ ។ យើងផ្តោតលើមិត្តភាព សម្ព័ន្ធភាពដ៏ល្អគ្រប់វិស័យ និងពុំប៉ះពាល់ទំនាក់ទំនងរវាងប្រទេសទាំងពីរ ហើយភាគីចិនយល់យ៉ាងច្បាស់ និងជួយគ្នាដោះស្រាយបញ្ហាដោយជោគជ័យ ។

នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បារម្ភពីបញ្ហាទំនិញ និងអាជីវកម្មខុសច្បាប់នៅប្រទេសថៃ ទើបតែងតាំងលោក Pichai ជាប្រធានគណៈកម្មការដោះស្រាយបញ្ហានេះ ។ លោកក៏បានប្រជុំជាមួយភ្នាក់ងារពាក់ព័ន្ធផងដែរ និងរកវិធានការដោះស្រាយយ៉ាងឆាប់រហ័សដើម្បីកាត់បន្ថយផលប៉ះពាល់ ។

ក្រោយពីមើលឃើញថា ចិនជាទីផ្សារធំ ទើបលោក Pichai ស្នើឱ្យចិនជួយទិញទិន្នផលកសិកម្មរបស់ថៃ ហើយវានឹងមានប្រយោជន៍ដល់កសិករថៃយ៉ាងខ្លាំង ។ ការពិភាក្សាគ្នាជំហ៊ានដំបូង គឺចិនរីករាយនឹងជួយកសិករថៃ ហើយចិនសន្យាថា នឹងទិញអង្ករថៃបន្ថែមទៀត ចំនួន២៨ម៉ឺនតោន ។ លើសពីនេះ លោកបានស្នើឱ្យចិនទិញទិញដំឡូងមី ដែលកំពុងផ្តល់ទិន្នផលយ៉ាងច្រើនដើម្បីជួយកសិករជាង៧សែនគ្រួសារ ។

នៅឆ្នាំ២០២៥ គឺជាខួបលើកទី៥០ នៃទំនាក់ទំនងការទូតរវាងប្រទេសថៃ និងចិន ហើយក្រសួងពាណិជ្ជកម្មនឹងរៀបចំកម្មវិធីជាច្រើនរួមគ្នាជាមួយចិន ក្នុងគោលបំណងជំរុញពាណិជ្ជកម្ម ការវិនិយោគរវាងសហគ្រិនថៃ និងចិន ។

ចំណែកលោក Han ឯកអគ្គរដ្ឋទូតចិនប្រចាំប្រទេសថៃ និយាយថា ទំនាក់ទំនងរវាងប្រទេសទាំងពីរប្រៀបដូចជាព្រៃឈើ ដែលនឹងដុះលូតលាស់ជាបន្តបន្ទាប់ទៅថ្ងៃអនាគត ប៉ុន្តែបញ្ហាផ្សេងៗ គឺដូចគ្នានឹងសត្វដង្កូវតូចមួយ ហើយត្រូវតែចាប់វាចេញ ទើបព្រៃឈើដុះលូតលាស់ល្អ ។ លោកនឹងជំរុញការធ្វើពាណិជ្ជកម្មរវាងចិន និងថៃ ឱ្យកាន់តែល្អប្រសើរ ៕