តារាចម្រៀង តន់ ចន្ទសីម៉ា ត្រូវបានអ្នកលេងបណ្តាញសង្គមរួមទាំងអ្នកគាំទ្រមួយចំនួនចង់ឱ្យតារាស្រីរូបនេះបកស្រាយបទចម្រៀងកុំកាច់តុងពេកជាក់ស្តែងដូចកាលពីច្រៀងបទ សែកមន្ត រួមទាំងបទថ្មីនេះទៀត។ ជាមួយគ្នានេះអ្នកគាំទ្រជាច្រើនចង់ឱ្យមានការផ្លាស់ប្តូរការសម្តែងក្នុង MV ដែលមានអ្នករាំច្រើនគួរតែផ្លាស់ប្តូរដើម្បីកុំឱ្យរសជាតិដដែលៗ។

ថ្មីៗនេះ តន់ ចន្ទសីម៉ា បានទម្លាក់ឈុតក្រៅឆាកមួយចំនួនពីការថត MV «កុលាបមានបន្លា» ជា Version នារី ដែលមាន Version បុរសជាតារាចម្រៀងឧកញ៉ា ព្រាប សុវត្ថិ។ ទោះយ៉ាងណា តាមរយៈចម្រៀងនិងការសម្តែងក្នុងបទនេះទស្សនិកជនជាអ្នកលេងបណ្តាញសង្គមបានបញ្ចេញមតិជាច្រើនអំពីបទថ្មីរបស់តារាចម្រៀង តន់ ចន្ទសីម៉ា។

មានការលើកឡើងស្រដៀងៗគ្នាអំពីតារាស្រីរូបនេះទៅលើការបកស្រាយបទចម្រៀងរបស់នាងដែលច្រៀងកាច់តុងខុសពីការបកស្រាយរបស់ Version បុរស ។ ទស្សនិកជនចង់ឱ្យ តន់ ចន្ទសីម៉ា បកស្រាយចម្រៀងកុំកាច់តុងពេក ចង់ឱ្យនាងបកស្រាយដូចកាលពីមុនដែលទទួលបាននូវការគាំទ្រយ៉ាងច្រើនពីសំណាកទស្សនិកជន។ កាលពីចេញឃ្លាដំបូងនៃបទ «សែកមន្ត» កាលពីកន្លងមកថ្មីៗនេះ សីម៉ា ក៏ទទួលបានមតិប្រតិកម្មពីការច្រៀងរបស់នាងដូចគ្នា។

ចំណុចមួយទៀតអ្នកគាំទ្របានសម្លឹងមើលឃើញពីការថត MV នៃបទ «កុលាបមានបន្លា» ដែលមានមនុស្សរាំច្រើននិងស្លៀកសំលៀកបំពាក់ពណ៌ខ្មៅ។ រូបភាពនេះត្រូវបានអ្នកគាំទ្រលើកឡើងថា ស្ទាយ៍ដដែលៗដែលមានអ្នករាំច្រើនដូចគ្នាគួរតែផ្លាស់ប្តូរទម្រង់នេះដើម្បីកុំឱ្យមើលទៅសុំាភ្នែកឃើញដដែលៗពេក។

គួរបញ្ជាក់ផងដែរ ចុងក្រោយនេះនៅលើបណ្តាញសង្គមទិកតុកបទចម្រៀង រំលោះប្រពន្ធ របស់ តន់ ចន្ទសីម៉ា គឺទទួលបានការគាំទ្រគួរឱ្យកត់សម្គាល់ពីហ្វេនៗទាំងក្នុងស្រុកនិងក្រៅស្រុក រហូតថ្មីៗនេះមានការសម្ភាសន៍ពីខាងប្រទេសថៃ៕

អ្នកគាំទ្រធ្លាប់តែឃើញភាគច្រើនកញ្ញា រ៉េត សារីតា បវរកញ្ញាចក្រវាលកម្ពុជាឆ្នាំ២០២០ បង្ហាញខ្លួនធ្វើជាពិធីការិនី ស្រាប់តែថ្មីៗនេះរូបនាងបានបង្ហើរសំឡេង Cover បទចម្រៀងមួយបទជាភាសាអង់គ្លេស។ អ្នកគាំទ្ររបស់ រ៉េត សារីតា បានសរសើរបវរកញ្ញារូបនេះថាសំឡេងផ្អែម និងចង់ឱ្យរូបនាងទម្លាក់បទ Cover ជាបន្តទៀត។

កញ្ញា រ៉េត សារីតា ដែលមហាជនទទួលស្គាល់ពីសមត្ថភាពរបស់នាងក្នុងការប្រើប្រាស់ភាសាបរទេសបានយ៉ាងល្អដែលលេចមុខជាពិធីការិនីតាមកម្មវិធីជាច្រើនបានធ្វើឱ្យទស្សនិកជនចាប់អារម្មណ៍ជាថ្មី។ មែនទែនទៅកញ្ញា រ៉េត សារីតា ជាតារាសម្តែង បវរកញ្ញា ម៉ូដែល វាគ្មិន រួមទាំងជាពិធីការិនីផង ជាសិល្បការិនីម្នាក់មានទេពកោសល្យច្រើនផ្នែកនិងពោរពេញដោយចំណេះដឹង។ ជាមួយនឹងសមត្ថភាពដែលមហាជនបានដឹងយ៉ាងទូលំទូលាយ ទស្សនិកជនបានចាប់អារម្មណ៍ពីទឹកដមសំឡេងរបស់ បវរកញ្ញាចក្រវាលកម្ពុជាឆ្នាំ២០២០ រូបនេះបន្ទាប់ពីនាងបានទម្លាក់បទ Cover មួយបទ។

នៅយប់ថ្ងៃទី១៦ ធ្នូ រ៉េត សារីតា បានទម្លាក់បទ Cover មួយបទមានចំណងជើងថា « You are my sunshine» ជាភាសាអង់គ្លេសដោយបានជូនមនុស្សពិសេសនៅឆ្ងាយដែលទំនងគឺជាគូស្នេហ៍របស់ខ្លួន។ ការបង្ហើរសំនៀងពីបវរកញ្ញារូបនេះបណ្តាអ្នកគាំទ្របានពោលសរសើរបវរកញ្ញារូបនេះមានទឹកដមសំឡេងផ្អែម គួរឱ្យចង់ស្តាប់និងបានសំណូមពរឱ្យនាងទម្លាក់បទ Cover ជាបន្តទៀត។

ក្រៅពីអាជីពសិល្បៈ ជីវិតឯកជនរបស់ រ៉េត សារីតា ក៏ត្រូវបានអ្នកគាំទ្រយកចិត្តទុកដាក់ដូចគ្នាដោយកាលពីខែមីនា ឆ្នាំ២០២៤ គូស្នេហ៍បរទេសរបស់ រ៉េត សារីតា បានស្នើសុំនាងរៀបការ ខណៈអ្នកទាំងពីរបានបញ្ចេញរូបថតបែបប្រពៃណីដែលអ្នកគាំទ្រគិតថាជារូបភាព Pre Wedding ហើយអ្នកទាំងពីរអាចនឹងរៀបការឆាប់ៗនេះមិនខាន៕

ទីបំផុតបន្ទាប់ពីស្ងប់ស្ងាត់អស់រយៈពេលជាច្រើនថ្ងៃបន្ទាប់ពីនារីម្នាក់ឈ្មោះ ធីតា ចេញមកចោទខ្លួនចម្លងរោគទៅកាន់នាង តារាចម្រៀង វណ្ណថាន បានចេញលិខិតបំភ្លឺជាសាធារណៈ ទាក់ទងនឹងបញ្ហានេះដោយលោកដោះស្រាយតាមប្រព័ន្ធផ្លូវច្បាប់ដើម្បីស្រោចស្រង់កេរ្តិ៍ឈ្មោះនិងកិត្តិយសរបស់លោកត្រឡប់មកវិញដែលជារឿងគួរឱ្យអាម៉ាស់បំផុតក្នុងជីវិតខ្លួន។ វណ្ណថាន ថាលោកនឹងប្រគល់ជូនលទ្ធផលតេស្តសុខភាពស្អាតស្អំរបស់ខ្លួនទៅកាន់តុលាការ។

នៅព្រឹកថ្ងៃទី១៩ ធ្នូ ឆ្នាំ២០២៤ តារាចម្រៀង វណ្ណថាន បានចេញលិខិតបំភ្លឺជាសាធារណៈដោយបានលើកឡើងថាសប្តាហ៍ដែលទើបតែកន្លងមកនេះ គឺជាពេលដែលពិបាក និង គួរឱ្យអាម៉ាស់បំផុតក្នុងជីវិតរបស់លោក។ ហើយលោកដឹងដែរថា ទស្សនិកជនមានមន្ទិល និង ចម្ងល់ជាច្រើនទាក់ទងនឹង ភាពស្ងៀមស្ងាត់របស់ខ្លួន។ ចំណុចនេះតារាចម្រៀង វណ្ណថាន ថាការស្ងៀមស្ងាត់របស់លោកគឺដោយសារបានទទួលការប្រឹក្សាពីខាងក្រុមមេធាវីរបស់ខ្លួន សុំឱ្យរក្សាភាពស្ងៀមស្ងាត់ មិនតបត ដើម្បីងាយស្រួលនឹងប្រមូលព័ស្តុតាងទាក់ទងនឹងករណីនេះ ដើម្បីបញ្ជាក់ ពី ភាពស្អាតស្អំរបស់លោក។

ម្ចាស់បទ កំលោះស្រុកខ្មែរ បានបញ្ជាក់ថាលោកជឿលើប្រព័ន្ធតុលាការ និង ការដោះស្រាយបញ្ហានេះតាមនីតិវិធីច្បាប់ ហើយ ជឿជាក់ថាច្បាប់របស់ប្រទេសកម្ពុជានឹង ដោះស្រាយបញ្ហានេះ ដោយយុត្តិធម៌ និង ការពារភាពស្អាតស្អំរបស់លោក។ លោកបានស្នើសុំកុំឱ្យមានការផ្សព្វផ្សាយនិងចែករំលែកព័ត៌មានមិនពិតរង់ចាំការសម្រេចសេចក្ដីរបស់តុលាការ ឬក៏ធ្វើការវិនិច្ឆ័យណាមួយដោយពុំមានមូលដ្ឋាន ឬប្រភពច្បាស់លាស់ព្រោះនាំឱ្យប៉ះពាល់ យ៉ាងខ្លាំងដល់ជីវិតបុគ្គល និង អាជីពរបស់លោកក៏ដូចជាបំពុលបណ្តាញសង្គមទូទាំងប្រទេស។

តារាចម្រៀងពហុជំនាញឧបករណ៍ភ្លេងរូបនេះ ក៏បានសូមទោសដល់ដូចសាធារណជន ដោយរឿងនេះបង្កជាការជ្រួលច្របល់ក្នុងបណ្តាញសង្គម។ វណ្ណថាន ថាលោកពិតជាមានការពិបាកខ្លាំងមែនទែន ដែលមិនអាចធ្វើការបកស្រាយភ្លាមៗជូនទៅកាន់ទស្សនិកជន និងអ្នកគាំទ្រទាំងអស់គ្នា ខណៈពេលដែលកេរ្តិ៍ឈ្មោះ និង កិត្តិយសរបស់លោកត្រូវបានបង្អួចបែបនេះ។ ដោយហេតុ នេះហើយ ទើប លោកសម្រេចចិត្តដោះស្រាយបញ្ហានេះតាមនីតិវិធី គឺតាមច្បាប់ ដើម្បីបញ្ជាក់ពីភាពស្អាតស្អំ និង ស្រោចស្រង់ កេរ្តិ៍ឈ្មោះ និង កិត្តិយសរបស់លោកមកវិញ។

តារាចម្រៀងលី វណ្ណថាន អះអាងថា នឹងប្រគល់ជូនលទ្ធផលតេស្តសុខភាពស្អាតស្អំរបស់ខ្លួនទៅកាន់តុលាការ រង់ចាំការសម្រេចរបស់តុលាការមុនពេលធ្វើការអារកាត់ណាមួយនិងអរគុណសម្រាប់ការស្រលាញ់គាំទ្រលោកក្នុងគ្រាដ៏លំបាកនេះ៕