សហរដ្ឋអាមេរិក ៖ កាលពីថ្ងៃទី១ ខែមករា ឆ្នាំ២០២៥ សមត្ថកិច្ចនៅទីក្រុង Las Vegas រដ្ឋ Nevada សហរដ្ឋអាមេរិក និយាយថា យ៉ាងហោចណាស់ មានមនុស្សស្លា.ប់ ម្នាក់ និងរងរបួស៧នាក់ ក្រោយពីរថយន្តអគ្គិសនី Cyber Truck របស់ក្រុមហ៊ុន Tesla ឆេះនៅបរិវេណខាងមុខសណ្ឋាគារមួយកន្លែង ដែលជារបស់ប្រធានាធិបតីអាមេរិកថ្មី លោក Donald Trump ។

សមត្ថកិច្ចនៅទីក្រុង Las Vegas បាននិយាយមកកាន់សារព័ត៌មានថា រថយន្តអគ្គិសនីនេះបានបើកមកចតនៅខាងមុខទ្វារចូលរបស់សណ្ឋាគារឈ្មោះ Trump International Hotel បន្ទាប់មក វាក៏ផ្ទុះឆេះដោយខ្លួនឯង ដែលបណ្តាលឱ្យអ្នកជិះក្នុងរថយន្តម្នាក់ស្លាប់ និង៧នាក់ទៀតរងរបួសស្រាល ។ ក្រោយហេតុការណ៍នេះ សមត្ថកិច្ចបានប្រមូលកម្លាំងប្រុងប្រៀបជាមុន ដើម្បីទប់ស្កាត់ហេតុការណ៍ផ្សេងៗដែលគំរាមកំហែងពលរដ្ឋ និងអសន្តិសុខសង្គម ។

ចំណែកលោក Elon Musk នាយកក្រុមហ៊ុន Tesla និងជាអ្នកគាំទ្រលោក Donald Trump ក្នុងពេលឃោសនារកសំឡេងឆ្នោត កាលពីខែវិច្ឆិកា ឆ្នាំ២០២៤ បានសរសេរក្នុងបណ្តាញសង្គម X នៅថ្ងៃទី២ ខែមករា ថា បុគ្គលិក Tesla មានតួនាទីធំៗកំពុងតែស្រាវជ្រាវរកមូលហេតុ ពីព្រោះយើងពុំធ្លាប់ជួបហេតុការណ៍បែបនេះពីមុនទេ ។ វាដូចជាអំពើភេរវកម្មកើតឡើតដោយសារគ្រាប់បែកផ្ទុះ ឬកាំជ្រួចទំហំធំនៅផ្នែកខាងក្រោយរថយន្ត ។

លោកបន្តថា រថយន្តនេះឆេះដោយសារកាំជ្រួចដ៏ធំមួយនៅផ្នែកខាងក្រោយរថយន្ត Cyber Truck ហើយវាពុំពាក់ព័ន្ធនឹងផ្នែកខាងមុខរថយន្តទេ ពីព្រោះប្រព័ន្ធវាស់ចម្ងាយទាំងអស់របស់រថយន្តនៅតែដំណើរការធម្មតាក្នុងពេលរថយន្តផ្ទុះឆេះ ។

ប្រធានាធិបតីអាមេរិក លោក Joe Biden បានជ្រាបពីហេតុការណ៍នេះ ដោយលោកបានបញ្ជាឱ្យមន្ត្រីរដ្ឋាភិបាលផ្តល់ជំនួយពេលមានការចាំបាច់ ។ មុននេះ នៅថ្ងៃដដែល លោកទើបតែទទួលដំណឹងពីជនមិនស្គាល់អត្តសញ្ញាណបើករថយន្តបុកហ្វូងមនុស្សមកចូលរួមឆ្លងឆ្នាំ នៅទីក្រុង New Orleans រដ្ឋ Louisiana បណ្តាលឱ្យមនុស្សស្លា.ប់ ១០នាក់ និងរងរបួស៣៥នាក់ ។ នេះបើតាមការអះអាងរបស់មន្ត្រីសេតវិមាន ៕

បំណាច់ឆ្នាំចាស់ផ្លាស់ចូលឆ្នាំថ្មី ឆ្នាំ២០២៥ បានប្រព្រឹត្តិដោយរលូននិងប្រកបដោយសិរីសួស្តី ដោយសង្កេតឃើញថា នៅតាមបណ្តារាជធានីខេត្តទាំងអស់ទូទាំងប្រទេសកម្ពុជាក៏បានប្រារព្ធនូវកម្មវីធីសប្បាយៗជាច្រើន ដើម្បីអបអរដល់ថ្ងៃឆ្លងឆ្នាំសកល។

យោងតាមការចុះផ្សាយរបស់ក្រសួងទេសចរណ៍បានឲ្យដឹងថា ស្ថិតិទេសចរជាតិ និងអន្តរជាតិ ដើរលេងកម្សាន្តទូទាំងប្រទេស ក្នុងឱកាសឆ្លងឆ្នាំសកល នៅតាមបណ្ដារាជធានី-ខេត្ត ចាប់ពីថ្ងៃទី៣០-៣១ ខែធ្នូ ឆ្នាំ២០២៤ មានដូចជា៖
– ទេសចរសរុបប្រមាណ ៖ ៣ ៥៣៥ ៣២៥នាក់
– ទេសចរជាតិ សរុបប្រមាណ ៖ ៣ ៤៨៨ ០៦៥ នាក់
– ទេសចរអន្តរជាតិ សរុបប្រមាណ ៖ ៤៧ ២៦០នាក់។

ជាមួយគ្នានោះ ខេត្តក្រុងចំនួន ៥ ដែលទទួលបានភ្ញៀវទេសចរច្រើនជាងគេ ដោយចំណាត់ថ្នាក់លេខ ១ បានលើរាជធានីភ្នំពេញ ប្រមាណជាង ១លាន ៥សែននាក់។ លេខ ២ ខេត្តព្រះសីហនុ ៤២ ម៉ឺននាក់។ លេខ ៣ ខេត្តសៀមរាប ៣៣ ម៉ឺននាក់។ លេខ ៤ កំពត ២២ ម៉ឺននាក់។ និងលេខ ៥ ខេត្តកែប ១២ម៉ឺននាក់។

សូមជម្រាបថា នាថ្ងៃទី ៣១ ខែធ្នូ ឆ្នាំ ២០២៤ នៅបរិវេន មុខព្រះបរមរាជវាំង រាជធានីភ្នំពេញ បានប្រារព្ធនូវព្រឹត្តិការណ៍ដ៏ធមសម្បើមមួយ គឺសាទរកម្ពុជា ដែលរួមមានក្បួនដង្ហែរ អ្នកចូលរួមជាង ៣០០០នាក់ ការសម្តែងទស្សនីយភាពចម្រុះ ការតំាងពិពណ៌ ការប្រគុំតន្រ្តី និងការបាញ់កាំជ្រួចអបអរសាទរផងដែរ។ ក្រៅពីនេះ តាមបណ្តាខេត្តនានា ដូចជាខេត្តព្រះសីហនុ បាត់ដំបង តាកែវជាដើមក៏បានរៀបចំកម្មវិធីសប្បាយៗ ដើម្បីអបអរឆ្នាំថ្មីផងដែរ៕

មនុស្សម្នាក់ៗមានការសរសេរខុសៗគ្នា អ្នកខ្លះក៏សរសេរដៃស្តាំ អ្នកខ្លះទៀតក៏សរសេរដៃឆ្វេង ប៉ុន្តែមនុស្សភាគច្រើនគឺគេប្រើប្រាស់ដៃស្តាំជាងដៃឆ្វេង។ ទោះជាយ៉ាងណាអ្នកសរសេរដៃឆ្វេងក៏ត្រូវបានគេនិយាយផងដែរថា ឆ្លាតនិងខ្លាំងពូកែជាងអ្នកប្រើដៃស្តាំ តើនេះជាការពិតដែរឬទ? យោងតាមការសិក្សាស្រាវជ្រាវរបស់សាកលវិទ្យាល័យ Groningene ប្រទេសហូឡង់ និងក្រុមអ្នកវិទ្យាសាស្ត្រ IFL Science ដែលបានពិនិត្យនូវសមត្ថភាពដៃ ដើម្បីសាកល្បងទ្រឹស្ដីនេះបានពន្យល់ថា មុខងាររបស់ដៃ គឺជាការបង្ហាញនៃមុខងារខួរក្បាល ហើយមានការទាក់ទងទៅនឹងការយល់ដឹង។

ដូច្នេះអ្នកប្រើដៃឆ្វេង ទំនងមានខួរក្បាលធំជាងអ្នកប្រើដៃស្តាំ ដែលជួយឱ្យពួកគេមានការចងចាំខ្ពស់ជាងអ្នកផ្សេង។ លើសពីនេះមនុស្សប្រើដៃឆ្វេងក៏មានទេពកោសល្យ និងមានបញ្ញាខ្ពស់ខ្លាំងផងដែរ ដោយសារពួកគេតែងប្រើផ្នែកទាំងពីរនៃខួរក្បាលរបស់គេ។ ជាពិសេសខួរក្បាលខាងឆ្វេង តំណាងឱ្យភាពវៃឆ្លាតគណិតវិទ្យាឡូជីខល ខណៈដែលខួរក្បាលខាងស្តាំ គឺជាភាពវៃឆ្លាតខាងអារម្មណ៍ មានភាពរសើប និងអាចបត់បែនបាន។

ទន្ទឹមនឹងនេះមនុស្សប្រើដៃឆ្វេងពីកំណើតក៏មានអឌ្ឍគោលពីរនៃខួរក្បាលដែលអាចសម្របសម្រួលបានកាន់តែរលូននៅក្នុងផ្នែកដែលទាក់ទងនឹងភាសា ដែលផ្តល់ឱ្យពួកគេនូវសមត្ថភាពនិយាយខ្ពស់ មានន័យថាពួកគេគឺពូកែខាងទំនាក់ទំនង។ នេះបើយោងតាមការស្ទង់មតិឆ្នាំ ២០១៩ លើមនុស្សជាង ២០,០០០ នាក់ អ្នកដែលប្រើដៃឆ្វេងភាគច្រើនក៏មានទំនោរខាងសិល្បៈខ្ពស់ផងដែរ។ សរុបមកវិញអ្នកសរសេរដៃឆ្វេងពិតជាមានភាពឆ្លាតវៃជាងអ្នកប្រើដៃស្តាំមែន ប៉ុន្តែមិនប្រាកដថា អ្នកសរសេរដៃស្តាំសុទ្ធតែខ្សោយនោះទេ។

អ្នកប្រើប្រាស់ដៃស្តាំក៏មានភាពឆ្លាតវៃ និងចំណុចល្អច្រើនដែរ នេះបើយោងតាមការសិក្សាដៃស្តាំអាចចាប់កាន់អ្វីមួយបានល្អជាងដៃឆ្វេង និងគ្មានភាពឆ្គងឡើយ។ ទន្ទឹមនឹងនេះអ្នកប្រើប្រាស់ដៃស្តាំក៏ខ្លាំងខាងចិត្តវិទ្យា ពូកែមើលចិត្តមនុស្ស ទោះបីជាមិនសូវរៀនឆាប់ចេះ ឆាប់ចាំដូចអ្នកប្រើប្រាស់ដៃឆ្វេងក៏ដោយ អ្នកប្រើដៃស្តាំទំនងចិត្តធ្ងន់ជាងអ្នកប្រើដៃឆ្វេង មានភាពរហ័សរហួន និងឧស្សាហ៍ព្យាយាម ហើយដៃស្តាំក៏ត្រូវបានគេចាត់ទុកថាមានអនាម័យខ្ពស់ជាងដៃឆ្វេងផងដែរ៕

ស្របពេលប្រទេសនានាលើពិភពលោក រួមគ្នាអបអរការឆ្លងឆ្នាំសកល ឆ្នាំ២០២៥ អ្នកដំណើរមួយចំនួនបានធ្វើដំណើរឆ្លងប្រទេស ប៉ុន្តែវាជាការធ្វើដំណើរត្រឡប់ពេលវេលា ។ អ្នកដំណើរទាំងអស់បានឡើងជិះយន្តហោះនៅប្រទេសដែលឈានចូលឆ្នាំ២០២៥ រួចហើយ បែរជាយន្តហោះចុះចតនៅប្រទេសពុំទាន់ឆ្លងឆ្នាំ គឺឆ្នាំ២០២៤ ។ នេះបើតាមការផ្សព្វផ្សាយរបស់គេហទំព័រ Hflight ។

គេហទំព័រ Hflight បានត្រួតពិនិត្យទិន្នន័យពីវែបសាយ Flightradar24 ឃើញថា យន្តហោះជើងហោះហើរ NH106 របស់ក្រុមហ៊ុនអាកាសចរណ៍ All Nippon Airways (ANA) ដែលចាកចេញពីអាកាសយានដ្ឋានហាណេតាក់ ទីក្រុងតូក្យូ កាលពីថ្ងៃទី១ ខែមករា ឆ្នាំ២០២៥ ហើយអ្នកដំណើរបានឆ្លងឆ្នាំ (Countdown) នៅប្រទេសជប៉ុនរួចហើយ បែរជាពួកគេមកដល់គោលដៅនៅឆ្នាំ២០២៤ ។

យន្តហោះនេះបានចុះចតនៅអាកាសយានដ្ឋានអន្តរជាតិឡូសអេនជឺឡេស សហរដ្ឋអាមេរិក នៅថ្ងៃទី៣១ ខែធ្នូ ឆ្នាំ២០២៤ ហើយធ្វើឱ្យអ្នកដំណើរឆ្លងឆ្នាំនៅសហរដ្ឋអាមេរិកម្តងទៀត ។ មូលហេតុដែលយន្តហោះធ្វើដំណើរត្រឡប់ពេលវេលាទៅកាន់ឆ្នាំ២០២៤ វិញ ដោយសារពេលវេលានៅទីក្រុងតូក្យូ លឿនជាងទីក្រុងឡូសអេនជឺឡេស រហូតដល់១៧ម៉ោង ។

ពេលយន្តហោះចាកចេញពីទីក្រុងតូក្យូ នៅវេលាម៉ោង១យប់ ថ្ងៃទី១ ខែមករា ឆ្នាំ២០២៥ គឺនៅទីក្រុងឡូសអេនជឺឡេស ទើបតែម៉ោង៨ព្រឹក ថ្ងៃទី៣១ ខែធ្នូ ឆ្នាំ២០២៤ ។ ដូច្នេះ ការធ្វើដំណើររយៈពេល៩ម៉ោង គឺធ្វើឱ្យយន្តហោះចុះចតនៅអាកាសយានដ្ឋានអន្តរជាតិឡូសអេនជឺឡេស នាល្ងាចថ្ងៃទី៣១ ខែធ្នូ ឆ្នាំ២០២៤ ។

ដូចគ្នានេះ យន្តហោះដឹកអ្នកដំណើររបស់ក្រុមហ៊ុនអាកាសចរណ៍ CATHAY PACIFIC ក៏បានធ្វើដំណើរត្រឡប់ពេលវេលាដែរ គឺយន្តហោះនេះចាកចេញពីទីក្រុងហុងកុង នៅថ្ងៃទី១ ខែមករា ឆ្នាំ២០២៥ ហើយទៅដល់ទីក្រុងឡូសអេនជឺឡេស នៅថ្ងៃទី៣១ ខែធ្នូ ឆ្នាំ២០២៤ ។ បុគ្គលិកអាកាសចរណ៍ប្រាប់ថា ពេលវេលារបស់ប្រទេសនីមួយៗពុំដូចគ្នាទេ គឺអាស្រ័យលើខ្សែកំណត់ពេលវេលា (International Date Line / IDL) ៕

សហរដ្ឋអាមេរិក ៖ សារព័ត៌មានបរទេសរាយការណ៍ថា កាលពីថ្ងៃទី១ ខែមករា ឆ្នាំ២០២៥ ជនល្មើ.ស បានបើករថយន្តភីកអាប់បុកហ្វូងមនុស្សដែលកំពុងចូលរួមអបអរឆ្លងឆ្នាំនៅតំបន់ French Quarter ដ៏ល្បីល្បាញក្នុងទីក្រុង New Orleans រដ្ឋ Louisiana សហរដ្ឋអាមេរិក ដែលបណ្តាលឱ្យមនុស្សស្លា.ប់ ចំនួន១០នាក់ និងរងរបួស៣៥នាក់ ។

ជនល្មើសស្លៀកពាក់ឯកសណ្ឋានយោធាបានបើករថយន្តក្នុងល្បឿនលឿនខ្លាំងទៅបុកហ្វូងមនុស្សដើរនៅតាមផ្លូវ រួចហើយ ជនល្មើសក៏ចុះពីរថយន្តមកបាញ់តទល់ជាមួយសមត្ថកិច្ចបណ្តាលឱ្យសមត្ថកិច្ច២នាក់រងរបួស រីឯជនល្មើសត្រូវបានសមត្ថកិច្ចបាញ់ស្លា.ប់ នៅនឹងកន្លែង ។ នេះបើតាមការចុះផ្សាយរបស់សារព័ត៌មាន CBS News ។

ស្នងការប៉ូលិសនៅទីក្រុង New Orleans លោកស្រី Anne Kirkpatrick និយាយថា បុរសម្នាក់ព្យាយាមបើករថយន្តបុកមនុស្សឱ្យបានច្រើនបំផុតតាមដែលអាចធ្វើទៅបាន ។ នៅថ្ងៃកើតហេតុ មនុស្សម្នាបានដើរតាមផ្លូវដើម្បីអបអរឆ្លងឆ្នាំក្នុងតំបន់ French Quarter ដែលសម្បូរក្លិបរាត្រី និងភោជនីយដ្ឋាន ។ បុរសនេះបានតាំងចិត្តធ្វើឱ្យមនុស្សស្លាប់តាមផ្លូវច្រើនបំផុត និងបំផ្លាញទ្រព្យសម្បត្តិសាធារណៈ ។

ក្រោយពីបាញ់ជនល្មើសស្លាប់នៅហ្នឹងកន្លែង សមត្ថកិច្ចបានស៊ើបអង្កេតរកមូលហេតុដែលធ្វើឱ្យជនល្មើសហ៊ានប្រព្រឹត្តបែបនេះ ។ ប៉ុន្តែសមត្ថកិច្ចពុំបានបញ្ជាក់ពីអត្តសញ្ញាណលម្អិតរបស់ជនល្មើសទេ ។

មន្ត្រីនាំពាក្យការិយាល័យស៊ើបអង្កេត (FBI) បញ្ជាក់ថា ពួកគេនឹងស៊ើបអង្កេតករណីករណីភេរវកម្មនេះបន្តទៀត ពីព្រោះជនល្មើសជាក្រុមប្រដាប់អាវុធរដ្ឋអិស្លាម (ISIS) ដោយសារមានគ្រឿងផ្ទុះលើរថយន្ត ។ កាលពីខែវិច្ឆិកា ឆ្នាំ២០២៤ ពលរដ្ឋអាមេរិក២នាក់បានស្លាប់ និងរងរបួស១០នាក់ ដោយសារការបាញ់ក្បួនដង្ហែរនៅទីក្រុង New Orleans ។

ប្រធានាធិបតីអាមេរិក លោក Joe Biden បានបញ្ជាឱ្យមន្ត្រីស្ថាប័នពាក់ព័ន្ធសហការគ្នាស៊ើបអង្កេតរកមូលហេតុពិតប្រាកដឱ្យបានឆាប់រហ័សបំផុត និងត្រូវតែធានាសុវត្ថិភាពជូនពលរដ្ឋឱ្យចៀសផុតពីការគំរាមកំហែងនានា ៕

នៅប្រទេសជប៉ុនអ្នកមានៗគឺកម្រអួ.តសម្ភារៈនិយមណាស់ មានន័យថាពួកគេច្រើនរស់នៅក្នុងជីវិតសាមញ្ញ មិនជិះឡានទំនើប មិនប្រើប្រាស់របស់របរថ្លៃៗនោះទេ ខណៈអ្នកមាន ឬសេដ្ឋីនៅបណ្តាប្រទេសផ្សេងៗទៀតតែងតែចូលចិត្តរស់នៅក្នុងជីវិតហៃសូ ជិះឡានទំនើប ប្រើប្រាស់វត្ថុមានតម្លៃរាប់លានដុល្លារ។ ចុះហេតុអ្វីបានជាអ្នកមានៗនៅប្រទេសជប៉ុនវិញមិនប្រើជីវិតហៃសូដូចគេទៅ ខណៈប្រទេសនេះក៏ជាប្រទេសសេដ្ឋកិច្ចធំជាងគេទី ៤ របស់ពិភពលោកដែរ។

សម្រាប់ចម្លើយនោះគឺជនជាតិជប៉ុនមានគំនិតប្លែក និងទស្សនៈខុសគេ ពួកគេគិតថាការបង្អួតសម្ភារៈនិយមនឹងធ្វើឱ្យបាត់បង់ការអាណិតអាសូរពីមិត្តរួមការងារ ឬមនុស្សជុំវិញខ្លួន ថែមទាំងប៉ះពាល់ដល់អាជីពការងាររបស់ពួកគេផងដែរ។ ការបង្ហាញពីជីវិតរស់នៅហៃសូហួសហេតុ តែងតែធ្វើឱ្យអ្នកដទៃមានការសង្ស័យ ក៏ដូចជានាំមកនូវបញ្ហាសន្តិសុខជាច្រើន។ ហេតុនេះហើយនៅតាមដងផ្លូវរបស់ប្រទេសជប៉ុន គឺយើងតែងតែឃើញរថយន្តធុនតូច និងរថយន្តក្រុងប៉ុណ្ណោះ ដែលបង្ហាញថានៅក្នុងសង្គមជប៉ុន មនុស្សភាគច្រើនតែងតែជ្រើសរើសរស់នៅដោយសមរម្យ និងស្ងប់ស្ងាត់។

លើសពីនេះការប្រើប្រាស់សម្ភារៈនិយមដូចជាឡានទំនើប ក៏មិនត្រូវបានចាត់ទុកថាជានិមិត្តសញ្ញានៃឋានៈ ឬទ្រព្យសម្បត្តិឡើយ សូម្បីតែអ្នកមិនមានឡានក៏មិនអាចមើលស្រាលបានដែរ ព្រោះប្រទេសនេះប្រកាន់ភ្ជាប់នៅវប្បធម៌ខ្លាំងណាស់ មិនមានប្រជាជនណាមើលងាយគ្នានោះទេ។ យើងដឹងហើយថាប្រទេសជប៉ុនគឺជាប្រទេសមួយដែលមានវប្បធម៌ល្អសូម្បីដើរ ដេក ឈរ អង្គុយក៏មានរបៀបរៀបរយ និងត្រឹមត្រូវដែរ។ ដូច្នេះវប្បធម៌ជប៉ុនមិនត្រឹមតែជួយរក្សាស្ថិរភាពក្នុងសង្គមប៉ុណ្ណោះទេ ថែមទាំងនាំមកនូវសុខដុមរមនា និងការគោរពគ្នាទៅវិញទៅមក។

ហេតុផលសំខាន់មួយទៀតដែលប្រជាជនជប៉ុនជាច្រើនមិនមានរថយន្តទំនើប គឺដោយសារតែហេដ្ឋារចនាសម្ព័ន្ធដឹកជញ្ជូនសាធារណៈទំនើបហើយ។ នៅក្នុងទីក្រុងធំៗដូចជាតូក្យូ ឬអូសាកា ប្រព័ន្ធរថភ្លើងក្រោមដី និងឡានក្រុងត្រូវបានរចនាឡើងយ៉ាងងាយស្រួល ដែលជួយមនុស្សផ្លាស់ទីបានយ៉ាងងាយស្រួលដោយមិនចាំបាច់ត្រូវការឡានផ្ទាល់ខ្លួននោះទេ។ លើសពីនេះការធ្វើជាម្ចាស់រថយន្តនៅក្នុងប្រទេសជប៉ុនគឺថ្លៃខ្លាំងណាស់ ដោយសារវារួមបញ្ចូលទាំងថ្លៃចំណត ការថែទាំ និងពន្ធផងដែរ ដែលពិបាកក្នុងការប្រើប្រាស់រថយនផ្ទាល់ខ្លួន។

សម្រាប់មនុស្សជាច្រើន ជាពិសេសបុគ្គលិកការិយាល័យ ឬគ្រូបង្រៀន ការប្រើប្រាស់មធ្យោបាយធ្វើដំណើរសាធារណៈមិនត្រឹមតែជួយសន្សំប្រាក់ប៉ុណ្ណោះទេ ប៉ុន្តែថែមទាំងជួយពួកគេកាត់បន្ថយសម្ពាធក្នុងការស្វែងរកកន្លែងចតរថយន្តនៅកន្លែងដែលមានមនុស្សច្រើនផងដែរ។ នេះធ្វើឱ្យការទិញរថយន្តផ្ទាល់ខ្លួនជាជម្រើសដែលមិនចាំបាច់។ ទោះជាយ៉ាងណាក៏ដោយ ប្រជាជនជប៉ុនក៏មានឡានទំនើបដែរ ដោយសារពួកគេត្រូវការឡានសម្រាប់ការធ្វើដំណើរ ឬចង់មានសេរីភាពក្នុងការធ្វើដំណើរគ្រប់ពេល៕

ប្រទេសឥណ្ឌូណេស៊ី ៖ ប្រទេសឥណ្ឌូណេស៊ីបានផ្តល់ឱកាសសម្រាប់ក្រុមហ៊ុនប្រកបអាជីវកម្មម្ហូបអាហារ ដោយសារមានកត្តាគាំទ្រជាច្រើន ដូចជា ៖ ចំនួនពលរដ្ឋច្រើន, កំណើនអ្នកមានជីវភាពធូរធា និងចំណង់ចំណូលចិត្តចម្អិនអាហាររបស់ពលរដ្ឋឥណ្ឌូណេស៊ី ។ ហេតុនេះ ក្រុមហ៊ុនបរទេសអាចបើកអាជីវកម្មពាក់ព័ន្ធនឹងម្ហូបអាហារនៅឥណ្ឌូណេស៊ី ដូចខាងក្រោមនេះ ។

១-សេវាកម្មដឹកជញ្ជូនអាហារ ៖ ក្រុមហ៊ុនបរទេសអាចបើកសេវាកម្មដឹកជញ្ជូនអាហារ ដោយសហការជាមួយភោជនីយដ្ឋានក្នុងស្រុក ពីព្រោះសេវាកម្មនេះទទួលបានប្រាក់ចំណូលច្រើន ក្រោយពីពលរដ្ឋឥណ្ឌូណេស៊ីចូលចិត្តការដឹកជញ្ជូនអាហារមកដល់ទីកន្លែងកាន់តែច្រើន ។

២-កសិដ្ឋានបន្លែគ្មានគីមី ៖ បច្ចុប្បន្ន ពលរដ្ឋឥណ្ឌូណេស៊ីមានតម្រូវការបរិភោគអាហារល្អសម្រាប់សុខភាព ហើយនេះជាឱកាសសម្រាប់ក្រុមហ៊ុនបរទេសធ្វើកសិដ្ឋានដាំបន្លែ ឬផ្លែឈើពុំប្រើប្រាស់សារធាតុគីមី សម្រាប់លក់នៅប្រទេសនេះ ។

៣-អាហារប្រពៃណី ៖ ក្រុមហ៊ុនបរទេសអាចលក់ម្ហូបអាហារប្រពៃណី ពីព្រោះឥណ្ឌូណេស៊ីមានអាហារប្រពៃណីជាច្រើនមុខ ដូចជា ៖ បាយឆា, សាច់ដោតចង្កាក់ និងសម្លសាច់ ដើម្បីទាក់ទាញអតិថិជនក្នុងស្រុក និងភ្ញៀវទេសចរបរទេស ។

៤-អាហារសុខភាព ៖ ការបើកភោជនីយដ្ឋានលក់អាហារជំនួយដល់សុខភាព គឺជាឱកាសសម្រាប់ក្រុមហ៊ុនបរទេសដែលចង់បានអតិថិជនចាប់អារម្មណ៍នឹងការថែទាំសុខភាព ។

៥-Franchise ៖ Franchise អាហារលំដាប់ពិភពលោក ត្រូវបានចាត់ទុកថា គឺជាអាជីវកម្មដ៏ទាក់ទាញមួយនៅឥណ្ឌូណេស៊ី ដោយសារពលរដ្ឋឥណ្ឌូណេស៊ីមានប្រាក់ចំណូលកើនឡើង ។

៦-អាហារវេចខ្ចប់ និងភេសជ្ជៈ ៖ ការវិនិយោគលើអាហារវេចខ្ចប់ និងភេសជ្ជៈ ដែលមានរសជាតិតាមចំណង់ចំណូលចិត្តរបស់ពលរដ្ឋឥណ្ឌូណេស៊ី គឺចាត់ទុកថា ជាអាជីវកម្មគួរឱ្យចាប់អារម្មណ៍ ។

៧-លក់អាហារតាមអនឡាញ ៖ ការលក់អាហារតាមអនឡាញ និងបញ្ជូនឱ្យអតិថិជនដល់ដៃ គឺជាឱកាសសម្រាប់ក្រុមហ៊ុនបរទេសដើម្បីបំពេញតម្រូវការកើនឡើងខ្លាំង ពីព្រោះពលរដ្ឋឥណ្ឌូណេស៊ីត្រូវការភាពងាយស្រួល និងការបញ្ជូនអាហារទាន់ពេលវេលា ។

សរុបមក ក្រុមហ៊ុនបរទេសអាចប្រកបអាជីវកម្មពាក់ព័ន្ធនឹងម្ហូបអាហារដូចខាងលើនេះនៅប្រទេសឥណ្ឌូណេស៊ី និងគួរតែសិក្សាពីទីផ្សារបន្ថែមទៀត ដើម្បីឱ្យអាជីវកម្មរីកចម្រើន និងមិនងាយដួលរលំ ៕