យ៉ាងគួ និង សៀវឡុងនី២០១៤ លែងលះគ្នាជាផ្លូវការ

តារាសម្តែងចិន Chen Xiao និងតារាសម្តែងតៃវ៉ាន់ Michelle ដែលជាតួអង្គ យ៉ាងគួ និង សៀវឡុងនី ២០១៤ បានប្រកាសលែងលះគ្នាហើយបន្ទាប់ពីរៀបការបានជាង៨ឆ្នាំនិងទទួលបានកូនប្រុសម្នាក់ជាចំណងដៃ។ មុននឹងប្រកាសជាផ្លូវការនេះអ្នកទាំងពីរមានពាក្យចចាមអារ៉ាមលែងលះគ្នាជាយូរមកហើយ។

នៅថ្ងៃទី១៨ ខែកុម្ភៈ នេះតារាសម្ដែងទាំងពីរដួងបានបង្ហោះ Status នៅលើបណ្តាញសង្គមផ្ទាល់ខ្លួន ដោយបញ្ជាក់ថា ពួកគេលែងជាប្ដីប្រពន្ធទៀតហើយ។ តារាសម្តែងទាំងពីររូបបានសរសេរថា «អរគុណដែលបានជួបអ្នក ចាប់ពីពេលនេះតទៅនឹងរស់នៅដោយសុខសាន្តរៀងៗខ្លួន ហើយយើងនឹងក្លាយជាឪពុកម្តាយរបស់កូននាពេលអនាគត និងកំដរកូនរបស់យើងឱ្យធំឡើងជាមួយគ្នា។ ពាក្យចចាមអារ៉ាមរបស់គូស្នេហ៍មួយគូនេះបានបែកបាក់គ្នានៅក្នុងឧស្សាហកម្មកម្សាន្តក្នុងឆ្នាំ ២០២៤។ នៅលើ Next Apple ប្រភពមួយបានបង្ហាញថា Chen Xiao បានស្នើរសុំបែកគ្នា បន្ទាប់មកបានសម្រុកចេញពីផ្ទះនៅឆ្នាំ ២០២៣។ តារាប្រុសរូបនេះក៏ប្លុកភរិយា នៅលើកម្មវិធីផ្ញើសារ និងវីដេអូហៅទូរសព្ទផងដែរ។ ពួកគេផ្លាស់ប្តូរព័ត៌មានតាមរយៈអន្តរការី។

យោងតាមប្រភពបានឱ្យដឹងថា មានហេតុផល «ដ៏គួរឱ្យភ័យខ្លាច» ដែលធ្វើឱ្យ Chen Xiao អស់ចិត្ត និងតាំងចិត្តបញ្ចប់អាពាហ៍ពិពាហ៍។ ដំបូងឡើង Michelle ចង់រក្សាចំណងអាពាហ៍ពិពាហ៍ ប៉ុន្តែនៅពាក់កណ្តាលឆ្នាំ ២០២៤ នាងបានដោះចិញ្ចៀនអាពាហ៍ពិពាហ៍ចេញ។
ពួកគេបានរៀបការនៅឆ្នាំ ២០១៦។ បន្ទាប់ពីរៀបការ Michelle បានកំណត់ការងាររបស់នាងក្នុងការថែរក្សាកូន និងមើលថែគ្រួសាររបស់នាង ខណៈដែល Chen Xiao តែងតែថតខ្សែភាពយន្ត។ ក្នុងកម្មវិធី The Icon ឆ្នាំ២០២២ តារាប្រុសរូបនេះធ្លាប់និយាយថា ភរិយារបស់លោកគឺឆ្លាត ចេះដឹង ដែលបានមើលថែគ្រួសារ និងចិញ្ចឹមកូន។

បច្ចុប្បន្ន Chen Xiao មានវ័យ៣៧ឆ្នាំ និង Michelle មានអាយុ៤១ឆ្នាំ ។ អ្នកទាំងពីរបានស្រលាញ់គ្នានៅពេលដែលពួកគេដើរតួជាយ៉ាងគួនិងសៀវឡុងនីក្នុងឆ្នាំ២០១៤និងបានរៀបការនៅខែកក្កដា ឆ្នាំ ២០១៦ ហើយនៅក្នុងខែធ្នូ ឆ្នាំដដែលនោះគូស្នេហ៍នេះបានស្វាគមន៍កូនប្រុសជាមួយគ្នា៕