ប្រទេសថៃ ៖ និស្សិតចិនបានមកសិក្សានៅប្រទេសថៃជាច្រើន ក្រោយពីរដ្ឋាភិបាលចិនមានគោលនយោបាយកាត់បន្ថយម៉ោងសិក្សាភាសាអង់គ្លេស ហើយនិស្សិតចិនត្រូវចំណាយប្រាក់ច្រើនក្នុងការសិក្សានៅប្រទេសរបស់ខ្លួន ជាហេតុធ្វើឱ្យអាណាព្យាបាលបញ្ជូនកូនទៅសិក្សានៅក្រៅប្រទេស ជាពិសេស នៅថៃ ។ ហេតុនេះ ថៃបានក្លាយជាគោលដៅសំខាន់ក្នុងការសិក្សាបន្តរបស់និស្សិតចិន ខណៈសាលារៀនអន្តរជាតិនៅថៃមានស្តង់ដារដូចប្រទេសមួយចំនួនក្នុងតំបន់អាស៊ាន ។

លោក គេតផុន ប្រៃផៃសានកិច្ច នាយករងក្រុមហ៊ុន UOB Kay Hian និយាយថា ការមកសិក្សាបន្តរបស់និស្សិតចិននៅកម្រិតបឋមសិក្សា, មធ្យមសិក្សា និងឧត្តមសិក្សា គឺផ្តល់ផលវិជ្ជមានសម្រាប់សេដ្ឋកិច្ចថៃរយៈពេលខ្លី តាមរយៈការចំណាយប្រាក់ក្នុងការសិក្សា និងស្នាក់នៅរបស់និស្សិតចិន ខណៈថៃ និងចិនបានចុះកិច្ចព្រមព្រៀងពាណិជ្ជកម្មជាមួយគ្នាជាច្រើនច្បាប់ ។

ប៉ុន្តែពេលនិស្សិតចិនមានចំណេះដឹងផ្នែកវប្បធម៌ និងចេះភាសាថៃ គឺថៃនឹងមានបញ្ហាប្រឈមរយៈពេលវែង ហើយធ្វើឱ្យថៃចាញ់ប្រៀបពាណិជ្ជកម្មជាមួយចិន ។ និស្សិតចិនមានប្រៀបក្នុងការប្រកបអាជីវកម្មនៅថៃ បើធៀបនឹងនិស្សិតថៃប្រឈមនឹងឧបសគ្គក្នុងការទៅសិក្សាបន្ត និងប្រកបអាជីវកម្មនៅចិន ។

ច្បាប់ថៃទាក់ទងនឹងពាណិជ្ជកម្មជាមួយចិននៅមានចំណុចខ្សោយ វាដល់ពេលរដ្ឋាភិបាលថៃត្រួតពិនិត្យ និងកែលម្អបទប្បញ្ញត្តិពាណិជ្ជកម្មជាមួយចិន ដើម្បីបិទចន្លោះប្រហាងដែលធ្វើឱ្យថៃចាញ់ប្រៀបចិននាថ្ងៃអនាគត ។ រយៈពេលពី២ឆ្នាំ ទៅ៣ឆ្នាំកន្លងមក និស្សិតចិនបានមកសិក្សានៅសាលារៀនអន្តរជាតិក្នុងប្រទេសថៃយ៉ាងច្រើន ជាពិសេស នៅតាមបណ្តាខេត្តធំៗ និងខេត្តទេសចរណ៍ ។

ម្យ៉ាងទៀត អាណាព្យាបាលនិស្សិតចិនដែលបញ្ជូនកូនមកសិក្សានៅថៃ ពួកគេមានលទ្ធភាពចំណាយប្រាក់ក្នុងការសិក្សារបស់កូន ហើយក្នុងរយៈពេលខ្លី គឺថៃទទួលបានផលប្រយោជន៍ពីការចំណាយរបស់និស្សិតចិន និងការកម្សាន្តរបស់ពួកគេ ប៉ុន្តែសម្រាប់រយៈពេលវែង ថៃនឹងចាញ់ប្រៀបពាណិជ្ជកម្មចិន ដោយសារនិស្សិតចិនយល់ពីសេដ្ឋកិច្ច និងពាណិជ្ជកម្មថៃ ៕

ជឿជាក់ថា អ្នកទាំងអស់គ្នាប្រាកដជាបានជ្រាបហើយអំពីកម្មវីធីដ៏ពេញនិយមមួយគឺ Tik Tok របស់ក្រុមហ៊ុនចិន ByteDance មានអ្នកប្រើប្រាស់រហូតដល់ ២.០៥ ពាន់លាននាក់នៅទូទាំងពិភពលោក។

យ៉ាងណាថ្មីៗនេះ ប្រជាជនអាមេរិករាប់លាននាក់កំពុងតែធ្លាក់ចូលក្នុងភាពចលាចលជុំរិញរឿងរ៉ាវបើកនិងបិទកម្មវិធី Tik Tok លើទឹកដីខ្លួន។ នាថ្ងៃទី ១៩ ខែមករា Tik Tok បានបិទដំណើរការនៅសហរដ្ឋអាមេរិក យ៉ាងណាត្រឹមរយៈពេល ១២ ម៉ោងក្រោយបិទ កម្មវីធីមួយនេះក៏ត្រូវបានបើកដំណើរការវិញហើយ ក្រោមកិច្ចចរចារបស់លោកត្រាំ។

បណ្តាញសង្គម Tik Tok ត្រូវបានគេទទួលស្គាល់អំពីសារសំខាន់របស់វា ជាពិសេសនោះគឺអាចរកប្រាក់ចំណូលបានយ៉ាងងាយស្រួល តាមរយៈការលក់ផលិតផល សេវាកម្ម ការផ្សាយពាណិជ្ជកម្ម ការបង្កើត Content ថ្មីៗ ក៏ដូចជាដើម្បីលេងកម្សាន្តសប្បាយ ជាមួយនឹងមាតិកាចម្រុះយ៉ាងច្រើនសម្បូរបែប។ បណ្តាញសង្គមមួយនេះហាក់មានភាពលេចធ្លោនិង Viral ខ្លាំងមែនទែន ខណៈដែលគ្រប់មាតិកាទាំងអស់នឹងបញ្ជូនទៅកាន់ទស្សនិកជនជុំវិញពិភពលោក។

យោងតាមរបាយការណ៍ ឆ្នាំ ២០២៤ ចំនួនអ្នកចូលប្រើប្រាស់បណ្តាញ Tik Tok គឺមានចំនួន ២.០៥ ពាន់លាននាក់នៅទូទាំងពិភពលោក ខណៈគេរំពឹងថា ចំនួននេះនឹងកើនឡើងជាបន្តបន្ទាប់នាឆ្នាំក្រោយៗ។ នៅសហរដ្ឋអាមេរិក មានអ្នកលេងបណ្តាញសង្គមនេះរហូតដល់ ១៧០ លាននាក់។ ការប្រកាសបិទ Tik Tok ក្រោមហេតុផលថា បណ្តាញសង្គមចិនមួយនេះនឹងចូលទៅគ្រប់គ្រងទិន្នន័យរបស់អ្នកប្រើប្រាស់ទាំងអស់ ដែលនាំប៉ះពាល់ប្រព័ន្ធនយោបាយអាមេរិក។

ក្រឡេកទៅកាន់ប្រទេសកម្ពុជា ទិន្នន័យឆ្នាំ ២០២៤ អ្នកប្រើប្រាស់បណ្តាញសង្គម Tik Tok គឺមានរហូតដល់ ៩.៩៦លាននាក់ឯណ្ណោះ ដែលភាគច្រើនសុទ្ធតែជាតែក្រុមយុវវ័យ។ យ៉ាងណា នាពេលបច្ចុប្បន្ន Tik Tok កំពុងដំណើរការជាធម្មតានៅប្រទេសកម្ពុជា និងមិនមានលេចឮដំណឹងថានឹងបិទដំណើរការនោះទេ៕

ប្រជាជនចិន និងអ្នកដែលមានសែស្រឡាយចិនគឺមានជំនឿណាស់ ទាំងអាហារ ការសែនព្រេន និងទំនៀមទម្លាប់ផ្សេងៗ ដែលពួកគេតែងតែអនុវត្តតាំងពីយូរយារណាស់មកហើយ។ ជាពិសេសក្នុងឱកាសបុណ្យចូលឆ្នាំចិនខាងមុខនេះ បើសិនក្រុមគ្រួសារណាបានរៀបចំសែនអាហារដូចខាងក្រោមនេះ នឹងនាំសំណាងល្អដល់គ្រួសារនោះ ក៏ដូចជាជួបតែរឿងល្អៗ ការរកស៊ី ឬលក់ដូរមានម៉ូយមកទិញឥតដាច់មិនខានឡើយ។ ដូច្នេះអាហារដែលអ្នកគួរតែសែនក្នុងឱកាសបុណ្យចូលឆ្នាំចិនខាងមុខរួមមាន៖

១.មាន់ស្ងោរ៖ មាន់ស្ងោរទាំងមូលជាមុខម្ហូបដ៏ពេញនិយមបំផុតសម្រាប់ពិធីបុណ្យចូលឆ្នាំចិន ដែលវាតំណាងឱ្យភាពរុងរឿង សាមគ្គីភាព និងអាពាហ៍ពិពាហ៍យូរអង្វែងនៅក្នុងក្រុមគ្រួសារ។ ប្រជាជនចិនតែងតែថ្វាយមាន់ស្ងោរ ដើម្បីបូជាដល់បុព្វការីជន ឋានសួគ៌ និងផែនដី ដើម្បីបង្ហាញការគោរព ក៏ដូចជាបួងសួងដល់ឆ្នាំថ្មីប្រកបដោយភាពសុខដុមរមនា។

២.ត្រី៖ នៅក្នុងភាសាចិន ពាក្យត្រីត្រូវបានបញ្ចេញសំឡេងស្រដៀងគ្នានឹងពាក្យ «សំណាង»។ ដូច្នេះត្រីតំណាងឱ្យភាពសម្បូរបែប វិបុលភាព ការរីកចម្រើន និងភាពសំបូររុងរឿង ដែលពលរដ្ឋចិនមិនដែលរំលងម្ហូបមួយមុខនេះឡើយ។

៣.គាវចំហុយ៖ គាវចំហុយមានប្រវត្តិជាង ១,៨០០ ឆ្នាំហើយ គឺជាម្ហូបបែបប្រពៃណីដែលនាំមកនូវសំណាងល្អ និងទ្រពសម្បត្តិ។ ម្ហូបនេះត្រូវបានគេញ៉ាំជាញឹកញាប់ក្នុងថ្ងៃចូលឆ្នាំជាមួយនឹងគោលគំនិតថាអ្នកដែលញ៉ាំច្រើន ប្រាក់ក៏កាន់តែច្រើន។

៤.សាយ៉បំពង៖ សាយ៉បំពងតំណាងឱ្យភាពត្រចះត្រចង់ និងទ្រពសម្បត្តិ ភាពរុងរឿងបរិបូរណ៍ និងភាពចម្រុងចម្រើន ក៏ដូចជាសំណាងល្អផងដែរ។

៥.នំអង្ករដំណើប ឬនំជាល៖ តំណាងឱ្យការឡើងដំណែង និងកើនចំណូល។ នំនេះត្រូវបានគេនិយមទទួលទានក្នុងថ្ងៃចូលឆ្នាំចិន ដោយសារឈ្មោះជាភាសាចិនរបស់វា មានន័យថា ខ្ពង់ខ្ពស់ ដែលប្រៀបដូចជាការនាំភាពចម្រុងចម្រើនខាងផ្នែករកស៊ីពីមួយឆ្នាំទៅមួយឆ្នាំ។

៦.ស៊ុបម្រះ៖ ទោះបីជាម្រះមានជាតិល្វីងបន្តិចមែន ប៉ុន្តែការទទួលទានអាហារនេះនឹងទទួលបានលាភសំណាងពេញមួយឆ្នាំ។ ក្រៅពីនាំមកជូននូវលាភសំណាង ស៊ុបម្រះក៏ជាអាហារដែលមានជីវជាតិផងដែរ ដែលវាជួយឱ្យត្រជាក់ និងបន្សុទ្ធរាងកាយក្នុងអំឡុងពេលបុណ្យចូលឆ្នាំ។

៧.ខរពងទាសាច់ជ្រូក៖ ខរពងទាសាច់ជ្រូកគឺជាម្ហូបប្រពៃណីរបស់ចិនដែលមានលក់ញឹកញាប់ក្នុងឱកាសបុណ្យឆ្នាំ។ ដូច្នេះការទទួលទានមុខម្ហូបនេះ និងទទួលបានវិបុលភាពក្នុងថ្ងៃដំបូងនៃឆ្នាំថ្មី។

៨.មី៖ មីឆាគឺតំណាងឱ្យសុភមង្គល និងអាយុវែង ដោយសារ មី មានសរសៃវែងដែលមានន័យដូចជាការជូនពរឱ្យមានអាយុវែងប្រកបដោយសុភមង្គល ហេតុនេះ មី អាចយកទៅធ្វើជាម្ហូបសែនដោយឆា ឬធ្វើជាមីស៊ុបក៏បាន។

៩.បន្លែបៃតង៖ គឺជាម៉ឺនុយអាហារពេលល្ងាច ដែលមិនអាចរំលងបាន ដោយសារបន្លែបៃតងតំណាងឱ្យថាមពល វឌ្ឍនភាព និងទ្រព្យសម្បត្តិ។

១០.ផ្លែឈើ៖ ផ្លែឈើរាងមូល ឬរាងជារង្វង់ដូចជា ក្រូចថ្លុង ក្រូចឃ្វិច ឪឡឹក ផ្លែប៉ោម…គឺតំណាងឱ្យភាពពេញលេញ។ មនុស្សជាច្រើនជឿថា ការទទួលទានផ្លែឈើទាំងនេះនៅដើមឆ្នាំថ្មី នឹងទទួលបានសុភមង្គល ភាពពេញលេញនៃជីវិត និងរីករាយពេញមួយឆ្នាំ៕

មហាសេដ្ឋីរបស់ពិភពលោកចំនួន ៥ រូបគឺ Elon Musk, Jeff Bezos, Larry Ellison, Mark Zuckerberg និង Bernard Arnault ត្រូវបានគេព្យាករណ៍ថា នឹងមានទ្រពសម្បត្តិជាង ១ ពាន់ពាន់លានដុល្លារក្នុងរយៈពេល ១០ ឆ្នាំខាងមុខ។

យោងតាមរបាយការណ៍ប្រចាំឆ្នាំរបស់ Oxfam កាលពីពេលថ្មីៗនេះបានបង្ហាញថា មហាសេដ្ឋី ៥ នាក់ នឹងមានទ្រព្យសម្បត្តិលើសពី ១ ពាន់ពាន់លានដុល្លារក្នុងរយៈពេល ១០ ឆ្នាំខាងមុខ ប្រសិនបើនិន្នាការកើនឡើងនៃភាគហ៊ុនបច្ចុប្បន្ននៅតែបន្ត។

ជាក់ស្តែងស្ថាបនិកនៃក្រុមហ៊ុន Tesla និង SpaceX គឺលោក Elon Musk បច្ចុប្បន្នជាមហាសេដ្ឋីមានជាងគេនៅលើពិភពលោក ជាមួយទ្រព្យសម្បត្តិច្រើនជាង ៤៣០ ពាន់លានដុល្លារទំនងនឹងមានទ្រពសម្បត្តិលើសពី ១ ពាន់ពាន់លានដុល្លារក្នុងរយៈពេលតិចជាង ៥ ឆ្នាំ។ រីឯស្ថាបនិក Amazon លោក Jeff Bezos និងលោក Larry Ellison រួមទាំងនាយកប្រតិបត្តិ Meta លោក Mark Zuckerberg ក៏ដូចជានាយកប្រតិបត្តិ LVMH លោក Bernard Arnault ក៏ទំនងនឹងក្លាយជាមហាសេដ្ឋីដែលមានទ្រពសម្បត្តិជាង ១ ពាន់ពាន់លានដុល្លារក្នុងរយៈពេល ១០ ឆ្នាំខាងមុខផងដែរ។

យោងតាមរបាយការណ៍របស់ Oxfam មហាសេដ្ឋីទាំងនេះមិនត្រឹមតែក្លាយជាអ្នកមានលើភពផែនដីប៉ុណ្ណោះទេ ប៉ុន្តែថែមទាំងមានអំណាចកាន់តែខ្លាំងឡើងដោយសារតែឥទ្ធិពលរបស់ពួកគេលើនយោបាយទៀតផង។ របាយការណ៍នេះក៏បានលើកឡើងថា បច្ចុប្បន្នរដ្ឋបាលរបស់ប្រធានាធិបតីអាមេរិក Donald Trump មានមនុស្សជិត ១៤ នាក់ដែលមានទ្រព្យសម្បត្តិយ៉ាងហោចណាស់ ១ ពាន់លានដុល្លារ ដែលធ្វើឱ្យរដ្ឋាភិបាលមួយនេះក្លាយជាស្ថាប័នដែលមានជាងគេបំផុតក្នុងប្រវត្តិសាស្ត្រអាមេរិក។

គួរបញ្ជាក់ដែរថា របាយការណ៍របស់ Oxfam គឺផ្អែកលើទិន្នន័យរបស់ Forbes ហើយត្រូវបានបោះពុម្ពមុនការបើកវេទិកាសេដ្ឋកិច្ចពិភពលោក (WEF) នៅទីក្រុង Davos ប្រទេសស្វីស នៅថ្ងៃទី ២០ ខែមករា ឆ្នាំ២០២៥។ Oxfam International គឺជាអង្គការសប្បុរសធម៌ និងជាសម្ព័ន្ធអន្តរជាតិនៃអង្គការចំនួន ២១ ដែលប្រតិបត្តិការនៅក្នុងប្រទេសជិត ៨០ ដែលតែងតែចេញផ្សាយរបាយការណ៍ប្រចាំឆ្នាំរបស់ខ្លួនស្តីពីគម្លាតរវាងអ្នកមាននិងអ្នកក្រ៕