Hope Diamond ដែលជាពេជ្រពណ៌ខៀវងងឹតជាមួយទំហំ ៤៥.៥២ ការ៉ាត់មកពីប្រទេសឥណ្ឌា ត្រូវបានគេចាត់ទុកថាជាពេជ្រដ៏ស្រស់ស្អាតបំផុតមួយនៅលើពិភពលោក ប៉ុន្តែក៏ជាពេជ្រដែលគេជឿថាមានជាប់បណ្តាសាដែរ ដោយសារពេជ្រនេះពាក់លើខ្លួនអ្នកណា អ្នកនោះនឹងបាត់បង់ជីវិត។
ពេជ្រនេះធ្លាប់ជាកម្មសិទ្ធិរបស់ស្តេច និងជាកម្មសិទ្ធិរបស់ពួកវរជនល្បីៗ ហើយភាគច្រើននៃពួកគេដែលបានពាក់ពេជ្រនេះនៅលើខ្លួនតែងតែជួបរឿងអាក្រក់ៗជានិច្ច ខណៈអ្នកខ្លះអាចបាត់បង់ជីវិតទៀតផង។ ដូច្នេះហើយតើ Hope Diamond ពិតជាមានបណ្តាសាអាថ៌កំបាំងមែនឬ?

Hope Diamond បានបង្ហាញខ្លួនជាលើកដំបូងក្នុងឆ្នាំ ១៦៦៦ ជាមួយទំហំ១១២ ការ៉ាត់នៅក្នុងប្រទេសឥណ្ឌា ហើយត្រូវបានអ្នកលក់ត្បូងបារាំងឈ្មោះ Jean-Baptiste Tavernier ទិញយក។ បន្ទាប់មកលោកក៏បានហៅវាថាជាពេជ្រ Tavernier ប៉ុន្តែយើងមិនដឹងច្បាស់ថាតើពេជ្រនេះត្រូវបានគេរកឃើញដោយរបៀបណានោះទេ។ ទោះជាយ៉ាងណាបើយោងតាមឯកសារប្រវត្តិសាស្ត្រមួយចំនួនបានឱ្យដឹងថា ពេជ្រ Tavernier ត្រូវបានយកពេជ្រចេញពីភ្នែករូបសំណាករបស់ទេពធីតាហិណ្ឌូ Sita នៅពេលដែលមេដឹកនាំសាសនាក្នុងតំបន់បានរកឃើញថាពេជ្រនេះបាត់ ពួកគេក៏បានដាក់បណ្តាសាចោរទាំងនោះ។

ក្រោយមកពេជ្រ Tavernier ក៏បានលក់ទៅឱ្យស្តេច Louis XIV នៃប្រទេសបារាំង។ ស្តេចបានកែច្នៃ និងឈូសឆាយពេជ្រមកត្រឹម ៦៧ ការ៉ាត់វិញ ត្រូវបានគេស្គាល់ថាជា “Blue Diamond of the Crown” ឬ “French Blue”។ មិនយូរប៉ុន្មានស្តេច Louis XVI ក៏ត្រូវបានគេផ្តួលរំលំក្នុងអំឡុងពេលបដិវត្តន៍បារាំង ដោយមានអ្នកលួចធ្វើឃាតក្នុងខែមករា ឆ្នាំ ១៧៩៣។ ប្រហែល ២០ ឆ្នាំក្រោយមកពេជ្រមួយនេះក៏បានបង្ហាញខ្លួនជាថ្មីនៅទីក្រុងឡុងដ៍ដែលជាកម្មសិទ្ធរបស់ស្តេចអង់គ្លេស George IV។ បន្ទាប់មកពេជ្រ Tavernier ក៏បានលក់ឱ្យអ្នកជំនួញល្បីល្បាញ Henry Philip Hope វិញដោយសារស្តេចអង់គ្លេស George IV ជំពាក់បំណុលគេច្រើនពេក។

បន្ទាប់ពីទទួលបានពេជ្រនេះ អ្នកជំនួញ Henry Philip Hope ក៏ធ្លាក់ខ្លួនជំពាក់បំណុលគេដែរ ហើយក៏លក់ពេជ្រនេះជាបន្តបន្ទាប់។ ម្ចាស់ពេជ្រជាច្រើនដែលបានកាន់កាប់ពេជ្រ Tavernier សុទ្ធតែជួបរឿងសយៗដូចគ្នា ប៉ុន្តែនៅក្នុងឆ្នាំ ១៩៥៨ ពេជ្រនេះក៏ត្រូវបានគេប្រគល់ឱ្យសារមន្ទីរប្រវត្តិសាស្រ្តធម្មជាតិ Smithsonian ក្នុងទីក្រុង Washington សហរដ្ឋអាមេរិកវិញ។ ដោយដឹងពីប្រវត្តិមិនល្អជាច្រើន ម្ចាស់សារៈមន្ទីក៏សម្រេចដូរឈ្មោះពេជ្រដាក់ Hope Diamond វិញ បន្ទាប់ពីពេលនោះមកពេជ្រក៏ស្ថិតក្នុងទីសុវត្ថិភាព ហើយត្រូវបានភ្ញៀវទេសចររាប់លាននាក់មកទស្សនាជារៀងរាល់ឆ្នាំ៕

ប្រទេសសិង្ហបុរី ៖ កាលពីថ្ងៃទី២៨ ខែមករា ឆ្នាំ២០២៥ ការិយាល័យដឹកជញ្ជូនផ្លូវគោករបស់សិង្ហបុរីប្រកាសថា សិង្ហបុរីនឹងសាកល្បងគម្រោងផ្តល់សេវាកម្មរថយន្តក្រុងបើកបរដោយស្វ័យប្រវត្តិ រយៈពេល៣ឆ្នាំ ដោយអនុវត្តចាប់ពីពាក់កណ្តាលឆ្នាំ២០២៦ តទៅ ហើយរថយន្តក្រុងនឹងបើកបរនៅលើផ្លូវចំនួន២ ដែលបានកំណត់ ។

គម្រោងសាកល្បងនេះនឹងចាប់ផ្តើមប្រើប្រាស់រថយន្តក្រុងបើកបរដោយស្វ័យប្រវត្តិ ចំនួន៦គ្រឿង ហើយរថយន្តនីមួយៗមានកៅអីអង្គុយយ៉ាងហោចណាស់ ១៦កៅអី និងបើកបរនៅលើផ្លូវជិតៗងាយស្រួលធ្វើដំណើរ ។ គម្រោងនេះមានគោលដៅវាយតម្លៃពីបច្ចេកទេសបើកបរ និងស្រាវជ្រាវទិន្នន័យស៊ីជម្រៅពាក់ព័ន្ធនឹងសុវត្ថិភាពការបើកបររបស់រថយន្តនីមួយៗ ។

ការសាកល្បងដំណាក់កាលទី១ គឺនឹងមានអ្នកបើកបររថយន្តប្រចាំការក្នុងរថយន្តក្រុងបើកបរដោយស្វ័យប្រវត្តិ ដើម្បីមើលការខុសត្រូវផ្សេងៗ ដូចជា ៖ ការទទួល និងជូនអ្នកដំណើរទៅកាន់គោលដៅដោយសុវត្ថិភាព, អ្នកដំណើរត្រូវអង្គុយស្ងៀមលើកៅអី និងពាក់ខ្សែក្រវ៉ាត់ការពារ ព្រមទាំងមានបុគ្គលិកសម្រាប់អ្នកដំណើរត្រូវការជំនួយ ។

ពេលរថយន្តក្រុងទាំងនេះអាចបើកបរនៅលើផ្លូវ និងមានការគ្រប់គ្រងពីចម្ងាយគួរឱ្យទុកចិត្តហើយ គឺភ្នាក់ងារផ្តល់សុវត្ថិភាពពីចម្ងាយនឹងបញ្ជារថយន្តក្រុងជំនួសអ្នកបើកបរ ។ រីឯការិយាល័យដឹកជញ្ជូនផ្លូវគោកនឹងតាមដានការបើកបររបស់រថយន្តក្រុងទាំងនេះគ្រប់ពេលវេលានៃការសាកល្បង ដើម្បីវាយតម្លៃពីប្រសិទ្ធភាព និងការបំពេញតាមលក្ខខណ្ឌនានា ។

បើគម្រោងសាកល្បងទទួលបានជោគជ័យ ការិយាល័យដឹកជញ្ជូនផ្លូវគោកនឹងទិញរថយន្តក្រុងបើកបរដោយស្វ័យប្រវត្តិបន្ថែម រហូតដល់១៤គ្រឿង និងបន្ថែមផ្លូវសាកល្បងចំនួន២ ទៀត ។ ក្រសួងដឹកជញ្ជូនសិង្ហបុរីបានប្រកាសកាលពីពាក់កណ្តាលខែមករា ឆ្នាំ២០២៥ ថា គម្រោងផ្លូវ «Friendly Streets» នឹងដំណើរការជាបណ្តើរៗក្នុងឆមាសទី១ ឆ្នាំ២០២៥ ហើយសិង្ហបុរីនឹងមានផ្លូវ Friendly Streets យ៉ាងហោចណាស់ ១ផ្លូវ នៅឆ្នាំ២០៣០ ។

គួរបញ្ជាក់ថា សិង្ហបុរីបានសាកល្បងរថយន្តបើកបរដោយស្វ័យប្រវត្តិជាច្រើនប្រភេទអស់រយៈពេលជាច្រើនឆ្នាំហើយ រួមទាំងការសាកល្បងរថយន្តដឹកទំនិញ និងរថយន្តតាក់ស៊ី ៕

សហរដ្ឋអាមេរិក ៖ ប្រធានាធិបតីអាមេរិក លោក Donald Trump ថ្លែងថា Microsoft ជាក្រុមហ៊ុនបច្ចេកវិទ្យាយក្សនៅលើពិភពលោក កំពុងចរចាសុំទិញ TikTok របស់ក្រុមហ៊ុន ByteDance ដែលមានការិយាល័យធំនៅប្រទេសចិន ហើយមានក្រុមហ៊ុនផ្សេងៗជាច្រើនទៀតចាប់អារម្មណ៍ទិញ TikTok យ៉ាងខ្លាំង ។ នេះបើតាមការចុះផ្សាយរបស់សារព័ត៌មាន BBC កាលពីថ្ងៃទី២៨ ខែមករា ឆ្នាំ២០២៥ ។

អតីតប្រធានាធិបតីអាមេរិក លោក Joe Biden និងលោក Trump បានព្យាយាមចរចាឱ្យ ByteDance ជាក្រុមហ៊ុនមេរបស់ TikTok នៅប្រទេសចិន លក់បណ្តាញសង្គមនេះឱ្យអាមេរិក ដោយសារអាមេរិកបារម្ភពីសន្តិសុខជាតិជាច្រើនឆ្នាំ ។ បើទោះជាអាមេរិកអនុញ្ញាតឱ្យ TikTok ដំណើរការរយៈពេល៧៥ថ្ងៃ ប៉ុន្តែលោក Trump ជាប្រធានាធិបតីដំបូងគេ ដែលចាប់ផ្តើមដាក់សម្ពាធឱ្យ ByteDance លក់បណ្តាញសង្គម ។

កាលពីថ្ងៃទី២៧ ខែមករា កន្លងមក លោក Trump បានថ្លែងទៅកាន់ក្រុមអ្នកនយោបាយមកពីគណបក្សសាធារណរដ្ឋ នៅរដ្ឋផ្លរីដា អំពីការលក់ TikTok ថា ៖ «យើងរង់ចាំមើលថា តើនឹងមានអ្វីកើតឡើង? ពីព្រោះមានមនុស្សច្រើននាក់ចង់ទិញបណ្តាញសង្គមនេះ ។ បើយើងទិញវាបាន គឺចិននឹងពុំចូលពាក់ព័ន្ធទេ យើងពុំត្រូវការឱ្យចិនពាក់ព័ន្ធជាមួយអាមេរិកទេ» ។

លោក Trump ថ្លែងថា លោកបានពិភាក្សាជាមួយភាគីជាច្រើនអំពីការទិញ TikTok ហើយលោកនឹងសម្រេចចិត្តលើអនាគតបណ្តាញសង្គមមួយនេះ ក្នុងរយៈពេល៣០ថ្ងៃទៀត ។ រីឯអ្នកនាំពាក្យរបស់ក្រុមហ៊ុន Microsoft ពុំទាន់និយាយអ្វីទេ ពាក់ព័ន្ធនឹងការសុំទិញ TikTok ។

មុនពេលបិទដំណើរការ TikTok នៅអាមេរិករយៈពេលខ្លី មានការលើកឡើងថា មហាសេដ្ឋីជាច្រើនរូបចាប់អារម្មណ៍ទិញ TikTok ដូចជា ៖ មហាសេដ្ឋីអាមេរិក លោក Frank McCourt ជាម្ចាស់គម្រោងអចលនទ្រព្យ, អ្នកជំនួញកាណាដាដ៏ល្បីល្បាញ លោក Kevin O’Leary, លោក Jimmy Donaldson ឬ MrBeast គឺជា YouTuber ដ៏ល្បីបំផុតលើពិភពលោក ដែលមានមនុស្សតាមដានជាង៣៤៤លាននាក់ និងនាយកក្រុមហ៊ុន Tesla លោក Elon Musk ៕

សម្រាប់អ្នកដែលមានបំណងចង់ចាក់សាក់ត្រូវមើលអត្ថបទនេះឱ្យចប់ ព្រោះការសាក់មានទាំងគុណសម្បត្តិ និងគុណវិបត្តិ ក៏ដូចជាមានហានិភ័យជាច្រើនផងដែរ ជាពិសេសសម្រាប់អ្នកដែលនិយមចាក់សាក់ពេញខ្លួនតែម្តង។ ជាការពិតណាស់ នាពេលបច្ចុប្បន្ននេះមិនថាបុរស ឬស្ត្រីនោះទេសុទ្ធតែចូលចិត្តការសាក់នៅលើដងខ្លួន ដែលបង្ហាញពីអំណាច ភាពឡូយឆាយ និងទាន់សម័យ។

ទោះជាយ៉ាងណាអ្នកជំនាញខាងស្បែក បានក្រើនរំឭកដល់អ្នកចូលចិត្តសាក់ សូមឱ្យសង្កេតមើលលើស្បែករបស់ពួកគេ បន្ទាប់ពីចាក់សាក់រួច ព្រោះវាអាចមានការផ្លាស់ប្តូរនៃស្បែក ដែលបង្ហាញអំពីហានិភ័យ ដូចជាការឆ្លងវីរុសជាដើម…។ លោកស្រីវេជ្ជបណ្ឌិត Mingkwan Wichaidit នាយកវិទ្យាស្ថានរោគសើ ស្បែករបស់ប្រទេសថៃ បានថ្លែងថា ការចាក់សាក់ អាចបណ្ដាលឱ្យមានការឆ្លងមេរោគ ការរលាក ដែលបណ្ដាលមកពីប្រតិកម្មអាឡែកហ្ស៊ី ដោយសារទឹកថ្នាំ ឬ keloids ដែលជាការដុះលើស នៃជាលិកាស្លាកស្នាមជាដើម។

លោកស្រីវេជ្ជបណ្ឌិត ក៏បានបន្តទៀតថា ពេលខ្លះការឆ្លងមេរោគ ក៏អាចលេចចេញមកផ្ទៃស្បែកតែម្ដង ដែលជាសញ្ញាគួរឱ្យព្រួយបារម្ភ។ ប៉ុន្ដែករណីនេះ មនុស្សភាគច្រើនហាក់មិនបានដឹងថា ពួកគេមានអាឡែកហ្ស៊ីអ្វីនោះទេ រីឯការប្រើប្រាស់ផលិតផល ឬថ្នាំ នៅពេលចាក់សាក់ ក៏អាចបណ្តាលឱ្យមានការរលាកស្បែកធ្ងន់ធ្ងរផងដែរ។ លោកស្រីវេជ្ជបណ្ឌិត បានបញ្ជាក់ថា ប្រសិនបើអ្នកចាក់សាក់ហើយ មានកន្ទួលរមាស់ ឬចេញខ្ទុះនៅលើស្បែក អ្នកត្រូវតែទៅជួបគ្រូពេទ្យជាបន្ទាន់ ដើម្បីបង្ការគ្រោះថ្នាក់ដល់សុខភាពរបស់អ្នក៕