ជឿជាក់ថា អ្នកទាំងអស់គ្នាប្រាកដជាបានស្គាល់យ៉ាងច្បាស់ហើយកម្មវីធី ChatGPT របស់សហរដ្ឋអាមេរិក ដែលបានដាក់ឲ្យប្រើប្រាស់ជាផ្លូវការអំឡុងខែវិច្ឆិកា ឆ្នាំ២០២០។ យ៉ាងណា ដើមឆ្នាំ ២០២៥នេះ ក៏បានលេចវត្តមានកម្មវីធី AI ចិន DeepSeek ហើយត្រូវបានមនុស្សម្នាគិតជាគូរប្រជែងរបស់ ChatGPT។

អំឡុងខែមករា ឆ្នាំ២០២៥នេះ កម្មវីធី DeepSeek របស់ក្រុមហ៊ុនចិន បានបើកឲ្យមនុស្សម្នាទូទាំងពិភពលោកប្រើប្រាស់ជាសាធារណៈ។ DeepSeek ត្រូវបានគេឲ្យដឹងថាបានចាប់ផ្តើមបង្កើតដំបូងអំឡុងឆ្នាំ ២០២៣ ដោយលោក Liang Wenfeng ជាជនជាតិចិន។ យ៉ាងណា ត្រឹមតែរយៈពេលមួយថ្ងៃបន្ទាប់ពីដាក់ដំណើរការកម្មវីធីចិនមួយនេះ ក៏បានធ្វើឲ្យក្រុមហ៊ុន AI មួយចំនួនរបស់សហរដ្ឋអាមេរិក ធ្លាក់តម្លៃទីផ្សារភាគហ៊ុនផងដែរ។

សូមជម្រាបថា បច្ចុប្បន្ននេះ តាមរយៈកម្មវិធី ChatGPT ពិតជាជួយសម្រួលយ៉ាងខ្លាំងដល់សិស្សានុសិស្សនិងសាធារណជនទូទៅ ទាំងទៅលើការសិក្សាស្រាវជា្រវ សួរសំនួរ បំប្លែងអត្ថបទនិងអក្សរ ការសរសេរកូដ ការវិភាគ និងដោះស្រាយបញ្ហាផ្សេងៗជាដើម។

យ៉ាងណា វត្តមានរបស់កម្មវីធីចិន DeepSeek ត្រូវបានគេដឹងថាមានសមត្ថពិសេសដូចនឹង ChatGPT ដែរ ថែមទាំងអាចគាំទ្រដល់ភាសាចិន និងភាសាខ្មែរបានទៀតផងដែរ ដែលកំពុងតែបង្ហាញឲ្យភាពលេចធ្លោយ៉ាងខ្លាំង៕

អាគារដ៏ខ្ពស់មួយនេះគឺគ្មានបង្អួចនោះទេ ហើយក៏គ្មានមនុស្សរស់នៅដែរ ប៉ុន្តែតើគេសាងសង់វាដើម្បីអ្វី?
TK Elevator Testturm គឺជាអាគារខ្ពស់បំផុតមួយនៅក្នុងប្រទេសអាល្លឺម៉ង់ ស្ថិតនៅទីក្រុង Rottweil នៃរដ្ឋ Baden-Württemberg ដែលមានកម្ពស់ជិត ២៤៦ ម៉ែត្រ ជាមួយរចនាសម្ព័ន្ធចម្លែក និងលេចធ្លោបំផុត។ អាគារនេះមិនមានបង្អួច ហើយក៏មិនមានការិយាល័យ ឬផ្ទះល្វែងអ្វីដែរ ក៏ដូចជាមិនអនុញ្ញាតឱ្យមនុស្សរស់នៅនោះទេ ដោយសារអាគារ TK Elevator Testturm ត្រូវបានគេសាងសង់ឡើងដើម្បីសាកល្បងជណ្តើយន្តប៉ុណ្ណោះ។

TK Elevator Testturm គឺជាក្រុមហ៊ុនផលិតជណ្តើរយន្តដែលផ្តល់ជណ្តើរយន្តទំនើបៗសម្រាប់អគារខ្ពស់ៗជាច្រើនទូទាំងសកលលោក។ ក្រុមហ៊ុននេះមិនត្រឹមតែមានប៉មសាកល្បងនៅក្នុងប្រទេសខ្លួនប៉ុណ្ណោះទេ ក៏មានប៉មសាកល្បងកម្ពស់ ១២៨ ម៉ែត្រនៅទីក្រុង Atlanta សហរដ្ឋអាមេរិក និងប៉មសាកល្បងកម្ពស់ ២៤៧ ម៉ែត្រនៅទីក្រុង Zhongshan ប្រទេសចិនផងដែរ។ ការសាងសង់ប៉មសាកល្បងជណ្តើរយន្តនេះគឺមានសារៈសំខាន់ខ្លាំងណាស់ ព្រោះវាអាចធ្វើតេស្តមុខងារសុវត្ថិភាពមួយចំនួន ដែលអាចធ្វើបាននៅក្នុងបរិយាកាសពិតប្រាកដ។

លោក Tomio Pihkala ប្រធានផ្នែកបច្ចេកវិទ្យានៅក្រុមហ៊ុនផលិតជណ្តើរយន្តបាននិយាយថា ជណ្តើរយន្តទំនើបបំផុតគឺមានល្បឿនលឿនណាស់ ដូច្នេះប៉មមួយចំនួនត្រូវតែមានកម្ពស់ “ខ្ពស់” ដើម្បីងាយស្រួលក្នុងការសាកល្បង។ នៅក្នុងប៉មសាកល្បង យើងបង្កើតឡើងវិញ និងពង្រីកលក្ខខណ្ឌប្រតិបត្តិការជាក់ស្តែងនៃជណ្តើរយន្ត ហើយវាក៏ជាកន្លែងដ៏ល្អមួយដើម្បីពិនិត្យមើលគុណភាព ផាសុកភាព និងភាពជឿជាក់នៃជណ្តើរយន្តផងដែរ។

លើសពីនេះប៉មសាកល្បងជណ្តើរយន្តក៏ត្រូវបានសាងសង់ដើម្បីទប់ទល់នឹងខ្យល់ខ្លាំងដែលអាចបណ្តាលឱ្យមានការរញ្ជួយដី និងប៉ះពាល់ដល់លក្ខខណ្ឌសាកល្បង ក៏ដូចជាការពារអគារពីវិទ្យុសកម្មព្រះអាទិត្យ ដែលជួយឱ្យអគារនេះក្លាយជាស្ថាបត្យកម្មក្នុងស្រុកដ៏លេចធ្លោបំផុត។ ក្នុងរយៈពេលប៉ុន្មានឆ្នាំមកនេះ អាគារ TK Elevator Testturm មិនត្រឹមជាប៉មសាកល្បងជណ្តើរយន្តប៉ុណ្ណោះទេ វាក៏ជាកន្លែងទាក់ទាញភ្ញៀវទេសចរមកទស្សនាឥតឈប់ឈរផងដែរ។

ភ្ញៀវទេសចរភាគច្រើនមកទីនេះគឺដើម្បីទទួលបានបទពិសោធន៍កន្លែងសង្កេតខ្ពស់បំផុតរបស់ប្រទេសអាល្លឺម៉ង់ ដោយសារនៅទីនេះអនុញ្ញាតឱ្យភ្ញៀវឡើងដល់កម្ពស់ខ្ពស់ជាមួយជណ្តើរយន្តទំនើប ដើម្បីមើលជុំវិញទីក្រុងទាំងមូលយ៉ាងស្រឡះភ្នែកតែម្តង។ នៅពេលភ្ញៀវឡើងដល់កម្ពស់ ២៣២ ម៉ែត្រ នឹងអាចមើលឃើញភ្នំអាល់ស្វីសយ៉ាងច្បាស់ ជាមួយទិដ្ឋភាពដ៏អស្ចារ្យជាច្រើនទៀតផងដែរ៕

ប្រទេសជប៉ុន ៖ បន្ទប់នានាក្នុងពន្ធនា.គារ ថូឈិគិ ស្ថិតនៅភាគខាងជើងទីក្រុងតូក្យូ ប្រទេសជប៉ុន ពោរពេញទៅដោយអ្នកទោ.ស ស្ត្រីចំណាស់ ខ្នងកោង ខណៈអ្នកទោ.ស ខ្លះទៀត ត្រូវដើរកាន់ឈើច្រត់ជាជួរយឺតៗ ។ ថូឈិគិ គឺជាពន្ធនា.គារ ដ៏ធំបំផុតនៅជប៉ុន ហើយអ្នកទោ.ស ភាគច្រើននៅទីនេះមានអាយុច្រើន ឬមានជីវភាពក្រីក្រ គ្មានសាច់ញាតិ ។

ចាប់ពីឆ្នាំ២០០៣ ដល់ឆ្នាំ២០២២ ចំនួនអ្នកទោសក្នុងពន្ធនាគារជប៉ុន ដែលមានអាយុច្រើនជាង៦៥ឆ្នាំ បានកើនឡើងរហូតដល់៤ដង ។ នៅឆ្នាំ២០២២ អ្នកទោសជាង៨០% គឺជាអ្នកទោសស្ត្រីវ័យចំណាស់ដែលបានលួចសម្ភារៈតូចតាច ហើយការលួចខ្លះ គឺសម្រាប់ឱ្យពួកគេមានជីវិតរស់នៅបន្តទៀត ។ តាមទិន្នន័យបញ្ជាក់ថា ពលរដ្ឋជប៉ុនអាយុច្រើនជាង៦៥ឆ្នាំ ស្មើនឹង២០% មានជីវភាពក្រីក្រ ។

អ្នកទោសស្ត្រីម្នាក់ឈ្មោះ អាយិគុ អាយុ៨១ឆ្នាំ និយាយថា រៀងរាល់២ខែម្តង រដ្ឋាភិបាលបានផ្តល់ប្រាក់ឧបត្ថម្ភពុំដល់៤០ដុល្លារអាមេរិក សម្រាប់ចាយវាយប្រចាំថ្ងៃ ហើយប្រាក់នេះពុំគ្រន់គ្រាន់ឡើយ ។ ហេតុនេះ ដោយសារការរស់នៅឯកោ គ្មានសាច់ញាតិ ទើបសម្រេចចិត្តលួចអាហារដើម្បីបានរស់នៅក្នុងពន្ធនាគារ ដោយសារគ្មានជម្រើស ហើយគិតថា ការរស់នៅទីនេះមានស្ថិរភាពបំផុត ។

មនុស្សមួយចំនួនមករស់នៅពន្ធនាគារដោយសារអាកាសធាតុខាងក្រៅត្រជាក់ ឬគ្មានអាហារបរិភោគ ។ រីឯអ្នកមានជំងឺនឹងទទួលបានការព្យាបាលពុំគិតថ្លៃក្នុងពន្ធនាគារ ទើបពួកគេចង់រស់នៅក្នុងពន្ធនាគារឱ្យបានយូរបំផុត ។ អ្នកខ្លះទៀតសុខចិត្តចំណាយប្រាក់ពី២ម៉ឺន ទៅ៣ម៉ឺនយ៉េនក្នុង១ខែ ដើម្បីបានរស់នៅក្នុងពន្ធនាគាររហូត ។ នេះបើតាមការលើកឡើងរបស់ឆ្មាំពន្ធនាគារថូឈិគិ ។

អ្នកទោសទាំងអស់ត្រូវធ្វើការក្នុងពន្ធនាគារ ដើម្បីទទួលបានអាហារ ៣ពេល, ទទួលការព្យាបាលជំងឺ និងការថែទាំផ្សេងៗពុំគិតថ្លៃសម្រាប់អ្នកទោសអាយុច្រើន ។ វាល្អប្រសើរបំផុតសម្រាប់អ្នកទោស បើធៀបនឹងការរស់នៅក្រៅពន្ធនាគារ គឺពួកគេគ្មានលទ្ធភាពទទួលសេវាពុំគិតថ្លៃទាំងនេះទេ ។ អ្នកទោសវ័យចំណាស់ដែលត្រូវបានដោះលែងចេញពីពន្ធនាគារ ពួកគេទទួលបានប្រាក់ឧបត្ថម្ភតិចពីរដ្ឋាភិបាល ទើបពួកគេប្រព្រឹត្តល្មើសម្តងទៀត ។

រដ្ឋាភិបាលជប៉ុនបញ្ជាក់ថា ពលរដ្ឋវ័យចំណាស់បានកើនឡើងយ៉ាងឆាប់រហ័ស ហើយនៅឆ្នាំ២០៤០ ជប៉ុននឹងត្រូវការបុគ្គលិកថែទាំមនុស្សចាស់ រហូតដល់ជាង២លាននាក់ ។ បច្ចុប្បន្ន ជប៉ុនខ្វះខាតបុគ្គលិកផ្នែកនេះ និងត្រូវការពលករបរទេស ៕

Hope Diamond ដែលជាពេជ្រពណ៌ខៀវងងឹតជាមួយទំហំ ៤៥.៥២ ការ៉ាត់មកពីប្រទេសឥណ្ឌា ត្រូវបានគេចាត់ទុកថាជាពេជ្រដ៏ស្រស់ស្អាតបំផុតមួយនៅលើពិភពលោក ប៉ុន្តែក៏ជាពេជ្រដែលគេជឿថាមានជាប់បណ្តាសាដែរ ដោយសារពេជ្រនេះពាក់លើខ្លួនអ្នកណា អ្នកនោះនឹងបាត់បង់ជីវិត។
ពេជ្រនេះធ្លាប់ជាកម្មសិទ្ធិរបស់ស្តេច និងជាកម្មសិទ្ធិរបស់ពួកវរជនល្បីៗ ហើយភាគច្រើននៃពួកគេដែលបានពាក់ពេជ្រនេះនៅលើខ្លួនតែងតែជួបរឿងអាក្រក់ៗជានិច្ច ខណៈអ្នកខ្លះអាចបាត់បង់ជីវិតទៀតផង។ ដូច្នេះហើយតើ Hope Diamond ពិតជាមានបណ្តាសាអាថ៌កំបាំងមែនឬ?

Hope Diamond បានបង្ហាញខ្លួនជាលើកដំបូងក្នុងឆ្នាំ ១៦៦៦ ជាមួយទំហំ១១២ ការ៉ាត់នៅក្នុងប្រទេសឥណ្ឌា ហើយត្រូវបានអ្នកលក់ត្បូងបារាំងឈ្មោះ Jean-Baptiste Tavernier ទិញយក។ បន្ទាប់មកលោកក៏បានហៅវាថាជាពេជ្រ Tavernier ប៉ុន្តែយើងមិនដឹងច្បាស់ថាតើពេជ្រនេះត្រូវបានគេរកឃើញដោយរបៀបណានោះទេ។ ទោះជាយ៉ាងណាបើយោងតាមឯកសារប្រវត្តិសាស្ត្រមួយចំនួនបានឱ្យដឹងថា ពេជ្រ Tavernier ត្រូវបានយកពេជ្រចេញពីភ្នែករូបសំណាករបស់ទេពធីតាហិណ្ឌូ Sita នៅពេលដែលមេដឹកនាំសាសនាក្នុងតំបន់បានរកឃើញថាពេជ្រនេះបាត់ ពួកគេក៏បានដាក់បណ្តាសាចោរទាំងនោះ។

ក្រោយមកពេជ្រ Tavernier ក៏បានលក់ទៅឱ្យស្តេច Louis XIV នៃប្រទេសបារាំង។ ស្តេចបានកែច្នៃ និងឈូសឆាយពេជ្រមកត្រឹម ៦៧ ការ៉ាត់វិញ ត្រូវបានគេស្គាល់ថាជា “Blue Diamond of the Crown” ឬ “French Blue”។ មិនយូរប៉ុន្មានស្តេច Louis XVI ក៏ត្រូវបានគេផ្តួលរំលំក្នុងអំឡុងពេលបដិវត្តន៍បារាំង ដោយមានអ្នកលួចធ្វើឃាតក្នុងខែមករា ឆ្នាំ ១៧៩៣។ ប្រហែល ២០ ឆ្នាំក្រោយមកពេជ្រមួយនេះក៏បានបង្ហាញខ្លួនជាថ្មីនៅទីក្រុងឡុងដ៍ដែលជាកម្មសិទ្ធរបស់ស្តេចអង់គ្លេស George IV។ បន្ទាប់មកពេជ្រ Tavernier ក៏បានលក់ឱ្យអ្នកជំនួញល្បីល្បាញ Henry Philip Hope វិញដោយសារស្តេចអង់គ្លេស George IV ជំពាក់បំណុលគេច្រើនពេក។

បន្ទាប់ពីទទួលបានពេជ្រនេះ អ្នកជំនួញ Henry Philip Hope ក៏ធ្លាក់ខ្លួនជំពាក់បំណុលគេដែរ ហើយក៏លក់ពេជ្រនេះជាបន្តបន្ទាប់។ ម្ចាស់ពេជ្រជាច្រើនដែលបានកាន់កាប់ពេជ្រ Tavernier សុទ្ធតែជួបរឿងសយៗដូចគ្នា ប៉ុន្តែនៅក្នុងឆ្នាំ ១៩៥៨ ពេជ្រនេះក៏ត្រូវបានគេប្រគល់ឱ្យសារមន្ទីរប្រវត្តិសាស្រ្តធម្មជាតិ Smithsonian ក្នុងទីក្រុង Washington សហរដ្ឋអាមេរិកវិញ។ ដោយដឹងពីប្រវត្តិមិនល្អជាច្រើន ម្ចាស់សារៈមន្ទីក៏សម្រេចដូរឈ្មោះពេជ្រដាក់ Hope Diamond វិញ បន្ទាប់ពីពេលនោះមកពេជ្រក៏ស្ថិតក្នុងទីសុវត្ថិភាព ហើយត្រូវបានភ្ញៀវទេសចររាប់លាននាក់មកទស្សនាជារៀងរាល់ឆ្នាំ៕

ប្រទេសសិង្ហបុរី ៖ កាលពីថ្ងៃទី២៨ ខែមករា ឆ្នាំ២០២៥ ការិយាល័យដឹកជញ្ជូនផ្លូវគោករបស់សិង្ហបុរីប្រកាសថា សិង្ហបុរីនឹងសាកល្បងគម្រោងផ្តល់សេវាកម្មរថយន្តក្រុងបើកបរដោយស្វ័យប្រវត្តិ រយៈពេល៣ឆ្នាំ ដោយអនុវត្តចាប់ពីពាក់កណ្តាលឆ្នាំ២០២៦ តទៅ ហើយរថយន្តក្រុងនឹងបើកបរនៅលើផ្លូវចំនួន២ ដែលបានកំណត់ ។

គម្រោងសាកល្បងនេះនឹងចាប់ផ្តើមប្រើប្រាស់រថយន្តក្រុងបើកបរដោយស្វ័យប្រវត្តិ ចំនួន៦គ្រឿង ហើយរថយន្តនីមួយៗមានកៅអីអង្គុយយ៉ាងហោចណាស់ ១៦កៅអី និងបើកបរនៅលើផ្លូវជិតៗងាយស្រួលធ្វើដំណើរ ។ គម្រោងនេះមានគោលដៅវាយតម្លៃពីបច្ចេកទេសបើកបរ និងស្រាវជ្រាវទិន្នន័យស៊ីជម្រៅពាក់ព័ន្ធនឹងសុវត្ថិភាពការបើកបររបស់រថយន្តនីមួយៗ ។

ការសាកល្បងដំណាក់កាលទី១ គឺនឹងមានអ្នកបើកបររថយន្តប្រចាំការក្នុងរថយន្តក្រុងបើកបរដោយស្វ័យប្រវត្តិ ដើម្បីមើលការខុសត្រូវផ្សេងៗ ដូចជា ៖ ការទទួល និងជូនអ្នកដំណើរទៅកាន់គោលដៅដោយសុវត្ថិភាព, អ្នកដំណើរត្រូវអង្គុយស្ងៀមលើកៅអី និងពាក់ខ្សែក្រវ៉ាត់ការពារ ព្រមទាំងមានបុគ្គលិកសម្រាប់អ្នកដំណើរត្រូវការជំនួយ ។

ពេលរថយន្តក្រុងទាំងនេះអាចបើកបរនៅលើផ្លូវ និងមានការគ្រប់គ្រងពីចម្ងាយគួរឱ្យទុកចិត្តហើយ គឺភ្នាក់ងារផ្តល់សុវត្ថិភាពពីចម្ងាយនឹងបញ្ជារថយន្តក្រុងជំនួសអ្នកបើកបរ ។ រីឯការិយាល័យដឹកជញ្ជូនផ្លូវគោកនឹងតាមដានការបើកបររបស់រថយន្តក្រុងទាំងនេះគ្រប់ពេលវេលានៃការសាកល្បង ដើម្បីវាយតម្លៃពីប្រសិទ្ធភាព និងការបំពេញតាមលក្ខខណ្ឌនានា ។

បើគម្រោងសាកល្បងទទួលបានជោគជ័យ ការិយាល័យដឹកជញ្ជូនផ្លូវគោកនឹងទិញរថយន្តក្រុងបើកបរដោយស្វ័យប្រវត្តិបន្ថែម រហូតដល់១៤គ្រឿង និងបន្ថែមផ្លូវសាកល្បងចំនួន២ ទៀត ។ ក្រសួងដឹកជញ្ជូនសិង្ហបុរីបានប្រកាសកាលពីពាក់កណ្តាលខែមករា ឆ្នាំ២០២៥ ថា គម្រោងផ្លូវ «Friendly Streets» នឹងដំណើរការជាបណ្តើរៗក្នុងឆមាសទី១ ឆ្នាំ២០២៥ ហើយសិង្ហបុរីនឹងមានផ្លូវ Friendly Streets យ៉ាងហោចណាស់ ១ផ្លូវ នៅឆ្នាំ២០៣០ ។

គួរបញ្ជាក់ថា សិង្ហបុរីបានសាកល្បងរថយន្តបើកបរដោយស្វ័យប្រវត្តិជាច្រើនប្រភេទអស់រយៈពេលជាច្រើនឆ្នាំហើយ រួមទាំងការសាកល្បងរថយន្តដឹកទំនិញ និងរថយន្តតាក់ស៊ី ៕