កន្លងមកនេះតារាសម្តែងជួរមុខ ស៊ីន យូប៊ីន ធ្លាប់បានផ្តល់បទសម្ភាសន៍បន្ទាប់ពីចូលរួមកម្មវិធីនៅក្រៅប្រទេសនាងនឹងផ្អាកសកម្មភាពរបស់ខ្លួន ខណៈចុងក្រោយនេះតារាស្រីរូបនេះក៏បាត់មុខពីបណ្តាញសង្គមដូចគ្នា។ យ៉ាងណាមិញថ្មីៗនេះស្រាប់តែមានវីដេអូចែករំលែកនៅលើបណ្តាញសង្គមទិកតុកដោយកញ្ញា យូប៊ីន ស្លៀកពាក់សនៅវត្តមួយកន្លែង។

ថ្មីៗនេះគណនីទិកតុកមួយឈ្មោះថា «Longdy fan Shin Yubin » បានបង្ហោះវីដេអូខ្លីមួយជិត១នាទីដោយបានដាក់ខេមសិនថា «ចែប៊ីនគាត់បួសជាជីព្រាហ្មបានជិតមួយខែហើយ…»។ ក្នុងវីដេអូនេះគេបានឃើញតារាសម្តែង ស៊ីន យូប៊ីន ស្ថិតក្នុងសំលៀកបំពាក់ពណ៌ស បេះផ្កាម្ល៉េះ មានស្នាមញញឹមជាមួយនឹងសត្វចិញ្ចឹមក្នុងវត្ត ដើរសមាធិ បង្រៀនអក្សរដល់ក្មេងៗ លាងចាននៅក្នុងវត្ត បោសសម្អាតវត្តអារ៉ាម…។

ការប្រតិបត្តិរបស់តារាសម្តែងក្នុងនាមជាពុទ្ធសាសនិកមួយរូប អ្នកគាំទ្រជាច្រើនបានពោលសរសើរចំពោះនាងដែលជ្រើសរើសយកព្រះពុទ្ធសាសនាជ្រះថ្លាជាមួយនឹងព្រះធម៌ អប់រំទូន្មានចិត្តឱ្យកាន់តែល្អប្រសើរ។ យ៉ាងណាចំពោះការបួសនេះមិនដឹងថាស្ថិតក្នុងរយៈពេលប៉ុន្មាននោះទេ ខណៈអ្នកគាំទ្ររបស់នាងគាំទ្រពេញទំហឹងចំពោះនាងក្នុងការបួសនេះ។

តារាសម្តែង ស៊ីន យូប៊ីន មិនត្រឹមតែជាអ្នកសិល្បៈតែក៏ជាម្ចាស់ជំនួញមួយរូប។ នាងគឺជាតារាសម្តែងល្បីម្នាក់ក្នុងប្រទេសដែលក្រសោបពានរង្វាន់ជាច្រើនទាំងជាតិនិងអន្តរជាតិ រួមទាំងចូលរួមកម្មវិធីធំៗទាំងនៅអឺរ៉ុបនិងអាស៊ី។ បន្ទាប់ពីចូលរួមកម្មវិធីមួយនៅក្រៅប្រទេស ស៊ីន យូប៊ីន ធ្លាប់បានបង្ហើបដែរថានឹងផ្អាកចូលរួមកម្មវិធីក្រៅប្រទេស ចំណែកឯនៅលើបណ្តាញសង្គមរបស់នាងក៏ស្ងប់ស្ងាត់នេះអាចដោយសារតែ ស៊ីន យូប៊ីន កំពុងតែជ្រះថ្លាជាមួយនឹងព្រះធម៌ ប្រើជីវិតស្ងប់ស្ងាត់មួយរយៈពេលសិន៕

សាស្រ្តាចារ្យ ឱម យុវណ្ណឌី ដែលជាអតីតនាដការីរបាំបុរាណមួយរូប ខណៈបច្ចុប្បន្នគឺជាប្រធានក្លិបសិល្បៈវប្បធម៌យុវណ្ណឌី បានរួមចំណែកយ៉ាងសំខាន់ក្នុងការបណ្តុះធនធានជំនាន់ក្រោយ ជាពិសេសគឺទាក់ទងនឹងរបាំក្បាច់បុរាណ ដែលជាទម្រង់សិល្បៈវប្បធម៌ដ៏ស្រស់ផូរផង់របស់ខ្មែរ។

លោកស្រី ឱម យុវណ្ណឌី បច្ចុប្បន្នស្ថិតក្នុងវ័យប្រមាណ ៦៧ប្លាយ នៅតែមានកម្លាំងមាំមួន និងមានទឹកចិត្តថែរក្សាសម្បត្តិវប្បធម៌ខ្មែរមិនឲ្យបាត់បង់។ យោងតាមការដាក់បង្ហោះជាច្រើននៅលើបណ្តាញសង្គម បានបង្ហាញពីសកម្មភាពដែលគាត់តែងចូលរួមក្នុងការបង្ហាត់បង្រៀនក្បាច់របាំដោយផ្ទាល់ ទៅកាន់ក្មេងៗសិស្សានុសិស្ស។ កាយវិការរបស់លោកស្រីពោរពេញដោយបទពិសោធន៍និងភាពស្ទាត់ជំនាញ ជាមួយទឹកមុខញញឹមប្រិមប្រិយ បង្រៀនយ៉ាងយកចិត្តទុកដាក់កាន់សិស្សានុសិស្សគ្រប់ៗរូប។

យោងតាមកិច្ចសម្ភាសន៍មួយ លោកស្រីបានហាត់រៀនរបាំតំាងពីអាយុ ៦ ឆ្នាំមកម្លេះ ដែលមានម្តាយជាគ្រូបង្ហាត់របាំក្នុងព្រះបរមរាជវាំង ខណៈរហូតមកដល់ពេលនេះលោកស្រីបានឈរជើងលើវិស័យនេះប្រមាណនឹង ៦០ ឆ្នាំហើយ។ លោកស្រីបានរៀនចេះចាំរបាំក្បាច់បុរាណខ្មែរជាច្រើនទម្រង់ ដែលបន្សល់មកពីសម័យសាធារណរដ្ឋនិងសង្គមរាស្រ្តនិយម។ មូលហេតុដែលលោកស្រីចាប់យកអាជីពនេះ ព្រោះថាជាអាជីពប្រចាំត្រកូលរបស់លោកស្រីផ្ទាល់ ក៏ដូចជាមានទឹកចិត្តស្រលាញ់ ចង់បន្តកេរ្តិ៍ដំណែលដល់កូនខ្មែរជំនាន់ក្រោយៗនិងសង្គមជាតិទាំងមូល។

សូមជម្រាបថា កន្លងមក លោកស្រី ឱម យុវណ្ណឌី ធ្លាប់ដំឡើងនិងដឹកនាំទស្សនីយភាពខ្នាតធំជាច្រើន មានដូចជារឿងហ្លួងព្រះស្ដេចកន រឿងប្រវត្តភ្នំដូនពេញ បង្ហាញស្នាដៃកសាងរាជធានីភ្នំពេញរបស់ដូនពេញ និងព្រះបាទពញាយ៉ាត របាំទេវៈស្រីសួគ៌ របាំទេពនិករកន្សែង ក៏ដូចជារបាំក្នុងព្រឹត្តិការណ៍ថ្នាក់ជាតិធំៗ ក្នុងទទួលភ្ញៀវអន្តរជាតិធំៗ បុណ្យឯករាជ្យជាតិ បុណ្យចូលទីវង្គត់របស់ព្រះករុណា បុណ្យឡើងគ្រងរាជព្រះមហាក្សត្រ បុណ្យថ្វាយព្រះពរចម្រើនព្រះជន្មជាដើម៕

តារាចម្រៀង លាង សុផាឡែន ម្ចាស់បទ «បេះដូង១០០» បានបង្ហោះរូបភាព Screenshotមួយសន្លឹកពីខ្លឹមសារការបង្ហោះរបស់ពិធីករ សុខ រ៉ាស៊ី ដោយបានលើកឡើងថាខ្លួនក៏ចេះខឹងជេរតែមិនបង្ហាញតាមចម្រៀងប៉ុន្តែឥឡូវដូចជាចង់ព្រោះសិល្បៈក្នុងស្រុកឈ្លោះគ្នាល្បីលឿន មានទីផ្សារ។

ថ្មីៗនេះបទចម្រៀង Diss Track កំពុងឡើងកម្តៅនៅលើបណ្តាញសង្គមជាមួយនឹងការទម្លាក់បទរបស់តារាចម្រៀង ជី ដេវីត បន្ទាប់ពី វណ្ណដា បញ្ចប់ការជួបជុំអ្នកគាំទ្រហើយមានវីដេអូចែករំលែកពីបទ J+0 II និងពាក្យសម្តីរបស់ វណ្ណដា ពីរឿងចាប់ដៃ។ រឿងរ៉ាវនៅក្នុងវិស័យរ៉េបផ្ទុះឡើងម្តងទៀតនេះ គេបានឃើញតារាចម្រៀង លាង សុផាឡែន បានបង្ហោះសំណេររបស់ខ្លួនភ្ជាប់មកជាមួយនឹងខ្លឹមសារការបង្ហោះរបស់ពិធីករ សុខ រ៉ាស៊ី។

លោក សុខ រ៉ាស៊ី បានបង្ហោះថា «ចិត្តសាស្រ្តMMO :យល់ដឹងទីផ្សារ មានអ្នកចង់ដឹង រឿងគេឈ្លោះគ្នាច្រើន ល្បី ខំបង្កើតបន្តទៀត វីដេអូ អប់រំ បរាជ័យនៅកម្ពុជា! វីដេអូ ចែករំលែកចំនេះ បរាជ័យនៅកម្ពុជា!»។ ខ្លឹមសាររបស់ពិធីកររូបនេះត្រូវបានតារាចម្រៀង លាង សុផាឡែន Screenshot យកមកបង្ហោះបន្តនឹងអមជាមួយនឹងអត្ថន័យបន្ថែមថា «ខ្ញុំក៏ជាមនុស្ស មានចិត្ត មានថ្លើម ប្រម៉ាត់ ចេះខឹង ចេះគុំគួន ចេះឈ្លោះចេះជេរ តែមិនដែលបង្ហាញតាមរយៈបទចម្រៀង ប៉ុន្តែឥឡូវដូចចង់បញ្ចេញអារម្មណ៍ពិតតាមបទចម្រៀងដែរ ព្រោះសិល្បៈស្រុកយើង ឈ្លោះគ្នាល្បីលឿន ចែកចាយតគ្នា មានទីផ្សារ»។

តារាស្រីរូបនេះបានដាក់ហាសថេកបន្ថែមដែរថា «ចង់ Diss បែប Sweet Voice ម្តងក្តៅចិត្ត» ៕