ចែកគ្នាដឹង! គ្រូពេទ្យបានណែនាំថា «ប្រញាប់បោះចោលរបស់៣យ៉ាងនេះជាបន្ទាន់ បើអ្នកមិនចង់ប្រឈមនឹងជំងឺធ្ងន់ធ្ងរ»

គ្រូពេទ្យជំនាញផ្នែកប្រព័ន្ធរំលាយអាហារមកពីសាកលវិទ្យាល័យ Harvard សហរដ្ឋអាមេរិក បានណែនាំឱ្យប្រញាប់បោះចោលរបស់ក្នុងផ្ទះ៣យ៉ាងនេះជាបន្ទាន់ ដោយសារយើងទុករបស់ខ្លះនៅក្បែរខ្លួន ។ ប៉ុន្តែវាផ្ទុកមេរោគយ៉ាងច្រើន ហើយមនុស្សភាគច្រើនពុំបានគិតដល់ ពេលប្រើប្រាស់យូរទៅ វានឹងឆ្លងមេរោគដល់រាងកាយឈានទៅកើតជាជំងឺធ្ងន់ធ្ងរ ។

គ្រូពេទ្យរូបនេះឈ្មោះ Saurabh Sethi បានបង្ហោះសារដាស់តឿននៅក្នុង Instagram របស់ខ្លួនថា របស់៣យ៉ាងក្នុងផ្ទះ អាចចម្លងមេរោគប៉ះពាល់ដល់សុខភាព ។ ក្នុងចំណោមរបស់៣យ៉ាងនេះ គឺមានសម្ភារៈប្រើប្រាស់ក្នុងផ្ទះបាយ ចំនួន២ ដែលអាចចម្លងមេរោគមកអាហារដោយផ្ទាល់ ។ តើរបស់៣យ៉ាង ដែលគួរប្រញាប់បោះចោលមានអ្វីខ្លះ?

១-ទៀនក្រអូបតម្លៃថោក ៖ ទៀនក្រអូបតម្លៃថោកមួយចំនួនបានផលិតពីក្រមួន Paraffin (គឺជាក្រមួនចម្រាញ់ពីប្រេង មានពណ៌ថ្លា គ្មានក្លិន) ហើយពេលដុតទៀន វានឹងបញ្ចេញជាតិពុលអាចប៉ះពាល់ដល់ការដកដង្ហើម ជាពិសេស អ្នកមានជំងឺហឺត ឬអាឡែស៊ី ។

ក្រៅពីនេះ ផ្សែងចេញពីទៀនក្រអូបដែលមានគុណភាពអន់ គឺវាមានកំទេចល្អិតអាចជ្រាបចូលក្នុងសួត បណ្តាលឱ្យយើងមានបញ្ហាផ្លូវដង្ហើម ដូចជា ៖ ពិបាកដកដង្ហើម រលាកទងសួត និងកើតហឺតធ្ងន់ធ្ងរ ។ បើស្រូបផ្សែងទៀនក្រអូបរយៈពេលយូរ នឹងធ្វើឱ្យសួតដំណើរការខុសប្រក្រតី ។ សារធាតុផ្សេងៗផ្សំក្នុងទៀនក្រអូបតម្លៃថោក នឹងបង្កគ្រោះថ្នាក់ដល់សុខភាពមនុស្ស ហើយវានឹងបង្កជាជំងឺមហារីក បើហិតផ្សែងទៀនក្រអូបយូរថ្ងៃ ។

២-ខ្ទះពុំប្រើខ្លាញ់ ៖ សារធាតុស្រោបខ្ទះកុំឱ្យជាប់ចំណីអាហារ គឺផលិតពីសារធាតុ PTFE ឬ PFOA ហើយពេលខ្ទះមានស្នាមឆ្កូត វានឹងធ្វើឱ្យសារធាតុទាំងនេះជាប់ជាមួយអាហារដោយផ្ទាល់ ។ ពេលយើងបរិភោគអាហារដែលចម្អិនដោយខ្ទះនេះយូរថ្ងៃ សារធាតុទាំងនេះនឹងប្រមូលផ្តុំក្នុងរាងកាយ ហើយធ្វើឱ្យយើងមានបញ្ហាថ្លើម និងតម្រងនោម ពេលខ្លះ វានឹងបង្កជាជំងឺរ៉ាំរ៉ៃ ។

លើសពីនេះ ពេលសារធាតុទាំងនេះរបូតចេញពីខ្ទះ ហើយខ្ទះទទួលកំដៅខ្លាំង វានឹងបញ្ចេញឧស្ម័នពុលធ្វើឱ្យយើងរលាកផ្លូវដង្ហើម ឈឺក្បាល និងវិលមុខ ក្រោយពេលស្រូបផ្សែងៗញឹកញាប់ ។

៣-ជ្រុញញឈើ និងផ្លាស្ទិក ៖ គឺជាសម្ភារៈផ្ទះបាយដែលយើងប្រើប្រាស់រាល់ថ្ងៃ ការប្រើជ្រុញឈើយូររហូតដល់មានស្នាម វានឹងបង្កគ្រោះថ្នាក់ដល់សុខភាពក្រុមគ្រួសារបាន ដោយសារស្នាមលើជ្រុញសម្បូរមេរោគ ខ្លាញ់ និងកំទេចអាហារ ដែលមើលពុំឃើញដោយភ្នែកទទេ ។ ទោះយើងលាងសម្អាតជ្រុញ ប៉ុន្តែមេរោគ Salmonella (ឬ E. Coli) នៅតែជាប់ជ្រុញដដែល ហើយវានឹងចូលក្នុងអាហារធ្វើឱ្យយើងពុលអាហារ និងកើតជំងឺពោះវៀន ។

រីឯជ្រុញផ្លាស្ទិក ក៏ដូចគ្នាដែរ បើប្រើវារយៈពេលយូរ កំទេចល្អិចរបស់ផ្លាស្ទិកនៅលើជ្រុញផ្លាស្ទិកអាចទៅប្រមូលផ្តុំក្នុងរាងកាយ ។ វានឹងប៉ះពាល់ដល់ប្រព័ន្ធរំលាយអាហារ បំផ្លាញថ្លើម និងតម្រងនោម ៕