សារព័ត៌មាន BBC បានរាយការណ៍កាលពីថ្ងៃទី២ ខែកុម្ភៈ ឆ្នាំ២០២៥ ថា ប្រធានាធិបតីអាមេរិក លោក Donald Trump បានដំឡើងពន្ធទំនិញនាំចូលពីចិន កាណាដា និងម៉ិកស៊ិក ដោយសារប្រទេសទាំង៣នេះ គឺជាគូប្រជែងដ៏ធំបំផុតរបស់អាមេរិក ។ លោកបញ្ជាក់ថា អាមេរិកនឹងដំឡើងពន្ធទំនិញកាណាដា និងម៉ិកស៊ិក ស្មើ២៥% ចាប់ពីថ្ងៃទី៤ ខែកុម្ភៈ ។ រីឯពន្ធនាំចូលថាមពលពីកាណាដា និងទំនិញចិន គឺអាមេរិកនឹងដំឡើង១០% ។

លោក Trump បានសរសេរក្នុងបណ្តាញសង្គម Truth Social ថា ៖ «យើងធ្វើបែបនេះ ដោយសារការគំរាមកំហែងយ៉ាងធ្ងន់ធ្ងរពីជនអន្តោប្រវេសន៍ខុសច្បាប់ និងផលប៉ះពាល់ដោយសារថ្នាំញៀនដែលបំផ្លាញជីវិតពលរដ្ឋអាមេរិក» ។ រីឯមន្ត្រីសេតវិមានអាមេរិកបានបង្ហោះសារក្នុងបណ្តាញសង្គម X ថា ៖ «ការដំឡើងពន្ធនេះមានភាពចាំបាច់ ដើម្បីឱ្យចិន កាណាដា និងម៉ិកស៊ិក ទទួលខុសត្រូវចំពោះការប្តេជ្ញាចិត្តទប់ស្កាត់ការហូរចូលថ្នាំញៀនមកអាមេរិក» ។

ក្រោយពីប្រធានាធិបតីអាមេរិកប្រកាសដំឡើងពន្ធទំនិញ មេដឹកនាំប្រទេសកាណាដា និងម៉ិកស៊ិកលើកឡើងថា ពួកគេនឹងដំឡើងពន្ធទំនិញនាំចូលពីអាមេរិកដូចគ្នា ដើម្បីឆ្លើយតបនឹងគោលនយោបាយដំឡើងពន្ធរបស់លោក Trump ។

ប្រធានាធិបតីម៉ិកស៊ិក លោកស្រី Claudia Sheinbaum បានឆ្លើយតបនឹងការលើកឡើងរបស់មន្ត្រីសេតវិមានអាមេរិកថា រដ្ឋាភិបាលម៉ិកស៊ិកមានទំនាក់ទំនងជាមួយក្រុមជួញដូរថ្នាំញៀន លោកស្រីប្រាប់ថា វាជាការចោទប្រកាន់លើម៉ិកស៊ិក ។ លោកស្រីបានអំពាវនាវឱ្យអាមេរិកចាត់វិធានការបន្ថែមទៀតដើម្បីបង្ក្រាបការរត់ពន្ធអាវុធបញ្ជូនទៅឱ្យក្រុមជួញដូរថ្នាំញៀននៅម៉ិកស៊ិក ហើយលោកស្រីរីករាយសហការជាមួយអាមេរិក ពីព្រោះបញ្ហាពុំអាចដោះស្រាយដោយការដំឡើងពន្ធទេ ប៉ុន្តែដោះស្រាយដោយការពិភាក្សាគ្នា ។ ម៉ិកស៊ិកនឹងដំឡើងពន្ធទំនិញអាមេរិកវិញ ប៉ុន្តែលោកស្រីពុំបានបញ្ជាក់ព័ត៌មានលម្អិតទេ ។

ដូចគ្នានេះ ក្រោយពីលោក Trump ប្រកាសដំឡើងពន្ធទំនិញមិនប៉ុន្មានម៉ោង បានធ្វើឱ្យមេដឹកនាំកាណាដាសម្រេចចិត្តដំឡើងពន្ធទំនិញអាមេរិកវិញ ក្នុងជំហ៊ានដំបូង ស្មើ២៥% រួមមាន ៖ ភេសជ្ជៈ, គ្រឿងសម្អាង និងក្រដាស ចាប់ពីថ្ងៃទី៤ ខែកុម្ភៈ ដូចគ្នា ។ ជំហ៊ានបន្ទាប់ កាណាដានឹងដំឡើងពន្ធទំនិញអាមេរិកថែមទៀត រួមមាន ៖ រថយន្តតូច, រថយន្តដឹកទំនិញ, ដែក និងអាលុយមីញ៉ូម, ផ្លែឈើ និងបន្លែមួយចំនួន, សាច់គោ, សាច់ជ្រូក, ទឹកដោះគោ និងឧបករណ៍អវកាស ។

នាយករដ្ឋមន្ត្រីកាណាដា លោក Justin Trudeau ថ្លែងថា ៖ «យើងមិនចង់ធ្វើបែបនេះទេ ប៉ុន្តែយើងនឹងពុំព្រមដកថយឡើយដើម្បីការពារពលរដ្ឋកាណាដា ។ រដ្ឋាភិបាលកាណាដានឹងដំឡើងពន្ធទំនិញអាមេរិក ស្មើ២៥% ចាប់ពីថ្ងៃទី៤ ខែកុម្ភៈ ហើយកាណាដានឹងដំឡើងពន្ធទំនិញអាមេរិកថែមទៀតក្នុងរយៈពេល២១ថ្ងៃខាងមុខ» ៕

សហរដ្ឋអាមេរិក ៖ បច្ចេកវិទ្យា AI បានក្លាយជាប្រធានបទគួរឱ្យចាប់អារម្មណ៍សម្រាប់បច្ចេកវិទ្យាលើពិភពលោកក្នុងរយៈពេលជាច្រើនឆ្នាំមកនេះ ជាពិសេស ការប្រកួតប្រជែងផ្នែក Generative AI ក្នុងនោះកម្មវិធី ChatGPT ដ៏ល្បីរបស់ក្រុមហ៊ុន OpenAI ទទួលបានការដោនឡូតច្រើនបំផុតក្នុង App Store អាមេរិក ។ ប៉ុន្តែនាពេលថ្មីៗនេះ កម្មវិធី DeepSeek របស់ចិនមានចំនួនដោនឡូតច្រើនបំផុតនៅអាមេរិក និងវ៉ាដាច់ ChatGPT រហូតដល់មានសំណួរ និងការវិភាគពីអនាគត AI ។

ក្រុមហ៊ុន DeepSeek បានបង្កើតកម្មវិធី DeepSeek R1 ដែលជាគំរូបច្ចេកវិទ្យា AI ថ្មីមានសមត្ថភាពប្រហាក់ប្រហែលនឹងគូប្រជែងជាច្រើន ដូចជា ៖ កម្មវិធី GPT-4 របស់ OpenAI, កម្មវិធី Llama របស់ Meta និងកម្មវិធី Gemini របស់ Google ប៉ុន្តែការចំណាយសម្រាប់ប្រើប្រាស់កម្មវិធី DeepSeek គឺថោកជាងគូប្រជែងយ៉ាងខ្លាំង ។

ក្រុមហ៊ុនបច្ចេកវិទ្យាចិនបានចំណាយប្រាក់វិនិយោគប្រមាណតែ៥លាន៦សែនដុល្លារអាមេរិកប៉ុណ្ណោះដើម្បីបង្កើតគំរូបច្ចេកវិទ្យា AI ខណៈក្រុមហ៊ុនបច្ចេកវិទ្យានៅអាមេរិកបានចំណាយប្រាក់ច្រើនជាងនេះ ។ លើសពីនេះ អាមេរិកបានព្យាយាមកំណត់ការនាំចេញបន្ទះឈីប AI កម្រិតខ្ពស់ទៅប្រទេសចិនអស់រយៈពេលជាច្រើនឆ្នាំ ប៉ុន្តែក្រុមហ៊ុន DeepSeek នៅតែទទួលបានជោគជ័យក្នុងការបង្កើតម៉ូឌែលតម្លៃទាបសម្រាប់បន្ទះឈីប AI ។

លោក Liang Wenfeng សហស្ថាបិកក្រុមហ៊ុន High-Flyer បានបង្កើតក្រុមហ៊ុន DeepSeek កាលពីឆ្នាំ២០២៣ ហើយបច្ចុប្បន្ន ក្រុមហ៊ុនផ្តោតលើការបង្កើតគំរូភាសាធំ Large Language Models (LLM) ឬម៉ូឌែលសម្រាប់បង្ហាត់ AI និងការបង្កើត Artificial General Intelligence (AGI) ដែលមានប្រាជ្ញាស្មើ ឬខ្ពស់ជាងមនុស្ស ។

អ្នកប្រើប្រាស់បាននិយាយពីកម្មវិធី DeepSeek យ៉ាងច្រើននាពេលបច្ចុប្បន្ន ហើយចំនួនការដោនឡូតកម្មវិធី DeepSeek បានបង្ហាញពីការប្រកួតប្រជែងបច្ចេកវិទ្យា AI កម្រិតខ្ពស់ ដើម្បីក្លាយជាក្រុមហ៊ុននាំមុខក្នុងសម័យឌីជីថលលើពិភពលោក ។ កម្មវិធី DeepSeek របស់ចិនទទួលបានជោគជ័យយ៉ាងខ្លាំងកាន់តែធ្វើឱ្យអាមេរិកព្យាយាមរក្សាការមានប្រៀបផ្នែកបច្ចេកវិទ្យាលើសចិន ។

ការលេចឡើងនូវកម្មវិធីថ្មីនេះបង្ហាញថា បច្ចេកវិទ្យាបានរីកចម្រើនយ៉ាងឆាប់រហ័ស ហើយក្រុមហ៊ុននាំមុខផ្នែកបច្ចេកវិទ្យានឹងអាចបំពេញតម្រូវការអ្នកប្រើប្រាស់ដោយការចំណាយប្រាក់តិចជាង ៕

ប្រទេសប៉ាណាម៉ា ៖ លោក Rudiger Koch អាយុ៥៩ឆ្នាំ ជាវិស្វករអវកាសអាល្លឺម៉ង់ និងជាសហស្ថាបនិកក្រុមហ៊ុនរចនា និងបង្កើតស្ថាបត្យកម្មក្នុងទឹកឈ្មោះ Ocean Builders បានបង្កើតកំណត់ត្រាពិភពលោកថ្មី រហូតដល់មានការទទួលស្គាល់ពី Guinness World Records ក្រោយពីលោកបានរស់នៅក្រោមទឹកសមុទ្ររយៈពេលយូររហូតដល់១២០ថ្ងៃ ។

លោកបានរស់នៅផ្ទះពិសេសមួយក្រោមទឹកសមុទ្រក្នុងឆ្នេរប៉ាណាម៉ា ប្រទេសប៉ាណាម៉ា ស្ថិតនៅភាគខាងត្បូងនៃតំបន់អាមេរិកកណ្តាល អស់រយៈពេលជិត៤ខែ ដោយការសង្កេតមើលត្រី និងជីវិតសត្វក្នុងទឹកជារៀងរាល់ថ្ងៃ ។ ផ្ទះដែលលោករស់នៅនេះ គឺជាគម្រោងផ្ទះនៅកណ្តាលបាតសមុទ្រឈ្មោះថា Seapod សាងសង់ដោយក្រុមហ៊ុន Ocean Builders ហើយមានទីតាំងនៅឆ្ងាយពីឆ្នេរសមុទ្រខាងជើងប្រទេសប៉ាណាម៉ា ដោយចំណាយពេលជិះទូកប្រមាណ១៥នាទី ។

ផ្ទះនេះចែកចេញជា២ផ្នែក រួមមាន ៖ ផ្នែកខាងលើអណ្តែតពីលើផ្ទៃទឹកសមុទ្រប្រមាណ៣ម៉ែត្រ និងផ្នែកខាងក្រោមលិចក្នុងទឹកសមុទ្រ ដែលលោកធ្វើជាកន្លែងរស់នៅ ។ ផ្នែកខាងក្រោមមានសម្ភារៈប្រើប្រាស់គ្រប់បែបយ៉ាង ដូចជា ៖ គ្រែ បន្ទប់ទឹក ទូរទស្សន៍ កុំព្យូទ័រ អ៊ីនធើរណេត កង់ហាត់ប្រាណ បន្ទះសូឡាផលិតអគ្គិសនី និងម៉ាស៊ីនភ្លើង ។ លោកបានជញ្ជូនអាហារពីផ្នែកខាងលើចុះមកផ្នែកខាងក្រោមតាមរយៈជណ្តើរតូចមួយ ហើយវាជាជណ្តើរសម្រាប់លោកជួបគ្រូពេទ្យផងដែរ ។

លោកនិយាយមកកាន់សារព័ត៌មាន AFP ថា ៖ «វានឹងផ្លាស់ប្តូរគំនិតរបស់យើងពាក់ព័ន្ធនឹងទីកន្លែងដែលមនុស្សអាចរស់នៅបាន ដោយក្រុមហ៊ុនព្យាយាមពិសោធន៍ឱ្យឃើញថា នៅក្រោមទឹកមានបរិស្ថានសមស្របសម្រាប់ការរស់នៅ ។ វាជាការផ្សងព្រេងដ៏អស្ចារ្យ ភារកិច្ចនេះបានបញ្ចប់ហើយ ខ្ញុំរីករាយណាស់ដែលបានរស់នៅទីនេះ ។ វាមានសភាពស្ងប់ស្ងាត់ ផ្ទៃទឹកសមុទ្រភ្លឺថ្លាពេលផ្ទៃមេឃងងឹត រកអ្វីនិយាយមិនត្រូវទេ គឺលោកអ្នកគួរសាកល្បងដោយខ្លួនឯង» ។

ក្រៅពីនេះ មានកាមេរ៉ាចំនួន៤គ្រឿងសម្រាប់ថតការរស់នៅប្រចាំថ្ងៃ និងត្រួតពិនិត្យសុខភាពផ្លូវចិត្តរបស់លោក ព្រមទាំងមានភស្តុតាងបញ្ជាក់ថា លោកពុំធ្លាប់ឡើងមកផ្នែកខាងលើផ្ទៃសមុទ្រឡើយ ក្នុងរយៈពេល១២០ថ្ងៃនេះ ។ លោក Rudiger Koch បានឈ្នះកំណត់ត្រាពិភពលោកលើកមុនជារបស់លោក Joseph Dituri ជនជាតិអាមេរិក ក្រោយពីលោករស់នៅផ្ទះក្រោមទឹកសមុទ្រក្នុងរដ្ឋផ្លរីដា សហរដ្ឋអាមេរិក រយៈពេល១០០ថ្ងៃ ៕

្រទេសចិន ៖ កាលពីថ្ងៃទី២៧ ខែមករា ឆ្នាំ២០២៥ សារព័ត៌មាន South China Morning Post រាយការណ៍ថា ប្រទេសចិនទទួលបានជោគជ័យក្នុងការសាកល្បងឆ្កែយន្ត (Robot Dog) នៅកន្លែងត្រជាក់បំផុត គឺទ្វីបអង់តាកទិកដែលមានសីតុណ្ហភាពទាបរហូតដល់ -៤០អង្សាសេ ។ ក្រុមអ្នកសាកល្បងបានយកកៅស៊ូមករុំជើងឆ្កែយន្តដើម្បីការពារកុំឱ្យវារអិលពេលដើរលើទឹកកក ហើយពួកគេបានសាកល្បងឱ្យវាលើកវត្ថុមានទម្ងន់រហូតដល់១០០គីឡូក្រាម ។

ភាពជោគជ័យនេះនឹងធ្វើឱ្យប្រទេសចិនអាចប្រើប្រាស់ឆ្កែយន្តសម្រាប់ការស្រាវជ្រាវនៅទ្វីបអង់តាកទិកយ៉ាងមានប្រសិទ្ធភាព ព្រមទាំងប្រើប្រាស់ទិន្នន័យស្រាវជ្រាវសម្រាប់ឱ្យឆ្កែយន្តអភិវឌ្ឍន៍សមត្ថភាពបំពេញភារកិច្ចនៅកន្លែងស្មុគស្មាញ និងការងារចម្រុះ នាថ្ងៃអនាគត ។

ឆ្កែយន្តនេះមានជើងចំនួន៦ ដែលផលិតដោយសាកលវិទ្យាល័យ Shanghai Jiao Tong សហការជាមួយក្រុមហ៊ុន Lenovo ក្នុងគោលបំណងសម្រាប់ការស្រាវជ្រាវផ្នែកវិទ្យាសាស្ត្រ, ត្រួតពិនិត្យកន្លែងគ្រោះថ្នាក់ និងថែទាំមនុស្សចាស់ ។ ឆ្កែយន្តត្រូវបានបំពាក់ដោយឧបករណ៍ទំនើបៗ និងបច្ចេកវិទ្យា AI ដើម្បីអាចប្រើប្រាស់បានច្រើនមុខងារ ។

ក្រុមអ្នកសាកល្បងបានយកឆ្កែយន្តទៅធ្វើតេស្តនៅកន្លែងស្រាវជ្រាវក្នុងតំបន់អង់តាកទិក Zhongshan ហើយក្រោយការធ្វើតេស្តឃើញថា វាអាចធ្វើការរហូតដល់ជាង៤ម៉ោងក្នុងសីតុណ្ហភាពទាបខ្លាំង ស្មើនឹង-៤០អង្សាសេ ។ វាថែមទាំងអាចត្រួតពិនិត្យស្នាមប្រេះទឹកកក និងបញ្ជូនឧបករណ៍ផ្សេងៗ ។

ក្រោយការស្រាវជ្រាវផ្នែកវិទ្យាសាស្ត្រឃើញថា ប្រទេសចិននឹងអាចប្រើប្រាស់ឆ្កែយន្តនេះសម្រាប់ការត្រួតពិនិត្យក្នុងរោងចក្រថាមពល ដោយសារវាអាចដើរនៅកន្លែងលំបាក ឬកន្លែងគ្រោះថ្នាក់ផ្សេងៗ ។ លើសពីនេះ ការប្រើប្រាស់បច្ចេកវិទ្យា AI បានជួយបង្កើនសមត្ថភាពឆ្កែយន្តអាចថែទាំមនុស្សចាស់ទៀតផង ។

ចំណុចសំខាន់បំផុតក្នុងការប្រើប្រាស់បច្ចេកវិទ្យា AI ជាមួយឆ្កែយន្តជើង៦ គឺការមានគំរូសំឡេងខ្នាតធំ, ការចងចាំបរិយាកាសនៅជុំវិញដើម្បីអភិវឌ្ឍន៍សមត្ថភាពមើលឃើញ និងការយល់ដឹងពីកាយវិការរបស់មនុស្ស ។ ឆ្កែយន្តអាចធ្វើជាមិត្តភក្តិរបស់មនុស្ស និងជួយមនុស្សចាស់ ដូចជា ៖ ប្រាប់ផ្លូវ ឬទំនាក់ទំនងជាមួយអាជ្ញាធរករណីមានអាសន្នកើតឡើង ។ នេះបើតាមការលើកឡើងរបស់អ្នកជំនាញផ្នែកវិស្វកម្មមេកានិកនៃសាកលវិទ្យាល័យ Shanghai Jiao Tong ៕