ប្រទេសកូរ៉េខាងត្បូង ៖ មហាជនបានជជែកគ្នាពេញបណ្តាញសង្គមនៅប្រទេសកូរ៉េខាងត្បូង ដោយសារហួសចិត្តនឹងក្រុមនារីអាកាសចរណ៍ធ្វើការនៅក្រុមហ៊ុនអាកាសចរណ៍ Eastar Jet បើកទ្វារអាសន្នយន្តហោះថតរូបសែលហ្វីនៅបរិវេណស្លាបយន្តហោះ ក្នុងពេលយន្តហោះកំពុងពន្យារពេលធ្វើដំណើរដោយសារព្រិលធ្លាក់ខ្លាំង ។

កាលពីថ្ងៃទី១២ ខែកុម្ភៈ ឆ្នាំ២០២៥ នៅអាកាសយានដ្ឋានអន្តរជាតិ Cheongju យន្តហោះ១គ្រឿងបានពន្យារពេលចេញដំណើរជាង១ម៉ោង ទៅកាន់កោះជេជូ ដោយសារព្រិលធ្លាក់ខ្លាំង ។ ពេលនោះ ក្រុមនារីអាកាសចរណ៍បានបើកទ្វារអាសន្នថតរូបសែលហ្វីនៅបរិវេណស្លាបយន្តហោះ ហើយរូបភាពរបស់ពួកនាងត្រូវបានអ្នកលេងបណ្តាញសង្គមចែកចាយ និងរិះគន់យ៉ាងច្រើន ។

អាកាសយានដ្ឋានអន្តរជាតិ Cheongju ត្រូវបានកំណត់ថា គឺជាតំបន់ការពារយោធា និងហាមថតរូបដាច់ខាត លើកលែងតែទទួលបានការអនុញ្ញាតពីមេបញ្ជាការយោធាប៉ុណ្ណោះ ។ ហេតុនេះ ការថតរូបដោយគ្មានការអនុញ្ញាតនឹងមានទោសជាប់ពន្ធនាគាររយៈពេល៣ឆ្នាំ ឬពិន័យជាប្រាក់ជាង២ម៉ឺនដុល្លារអាមេរិក ។

ការរិះគន់នារីអាកាសចរណ៍ពីសំណាក់មហាជន ដោយសារការធ្វើដំណើរតាមយន្តហោះនៅកូរ៉េខាងត្បូងជួបគ្រោះថ្នាក់ញឹកញាប់ ។ មហាជននិយាយថា នារីអាកាសចរណ៍ស្លៀកពាក់ឯកសណ្ឋាន និងពាក់ស្បែកជើងកែងខ្ពស់ៗ ប៉ុន្តែបើកទ្វារអាសន្នយន្តហោះថតរូបសែលហ្វីបែបនេះ ពុំសមរម្យឡើយ ពីព្រោះទ្វារនេះអាចបើកបានតែករណីមានហេតុការណ៍បន្ទាន់ប៉ុណ្ណោះ ។ លើសពីនេះ យន្តហោះកំពុងស្ថិតនៅតំបន់ការពារយោធា ដែលជាកន្លែងហាមថតរូប ។

ក្រោយពីមហាជនរិះគន់ខ្លាំង ក្រុមហ៊ុនអាកាសចរណ៍ Eastar Jet បញ្ជាក់ថា នារីអាកាសចរណ៍ទាំងនេះគ្រាន់តែហ្វឹកហាត់រកផ្លូវចេញពីយន្តហោះពេលមានហេតុការណ៍បន្ទាន់ ខណៈពេលយន្តហោះកំពុងរង់ចាំព្រិលឈប់ធ្លាក់ ។ ប៉ុន្តែវាពុំសមរម្យដែលនារីអាកាសចរណ៍ថតរូបសែលហ្វីពេលកំពុងហ្វឹកហាត់ ហើយក្រុមហ៊ុននឹងចាត់វិធានការជាបន្ទាន់ ។

ហេតុការណ៍នេះកើតឡើងស្របពេលយន្តហោះនានារបស់កូរ៉េខាងត្បូងត្រូវបានត្រួតពិនិត្យសុវត្ថិភាពហោះហើរយ៉ាងតឹងរ៉ឹង ក្រោយកើតហេតុការណ៍គ្រោះថ្នាក់យន្តហោះ Jeju Air កាលពីខែធ្នូ ឆ្នាំ២០២៤ ដែលជាសោកនាដកម្មធ្ងន់ធ្ងរបំផុតរបស់អាកាសចរណ៍កូរ៉េខាងត្បូង ។ ក្រៅពីនេះ ក៏មានហេតុការណ៍ភ្លើងឆេះយន្តហោះរបស់ក្រុមហ៊ុនអាកាសចរណ៍ Air Busan កាលពីខែមករា ឆ្នាំ២០២៥ ផងដែរ ។

ក្រសួងដែនដី ហេដ្ឋារចនាសម្ព័ន្ធ និងការដឹកជញ្ជូនកូរ៉េខាងត្បូង បានប្រកាសពីផែនការគ្រប់គ្រងក្រុមហ៊ុនអាកាសចរណ៍ និងដាក់ទោសយ៉ាងធ្ងន់ធ្ងរចំពោះក្រុមហ៊ុនអាកាសចរណ៍ណាដែលពុំអនុវត្តតាមវិធានការសុវត្ថិភាព ដើម្បីឱ្យពលរដ្ឋអស់បារម្ភពីការធ្វើដំណើរតាមយន្តហោះ ៕

ហេតុការណ៍មួយធ្វើឱ្យមហាជនភ្ញាក់ផ្អើលយ៉ាងខ្លាំង ហើយពួកគេសំណូមពរទៅកាន់អ្នកថតរូបសែលហ្វីទាំងឡាយ គួរតែប្រយ័ត្នខ្លួនពេលថតរូបនៅកន្លែងគ្រោះថ្នាក់ បើពុំដូច្នោះទេ នឹងជួបហេតុការណ៍ដូចស្ត្រីទេសចរកាណាដាម្នាក់ ។ ស្ត្រីរូបនេះបានបាត់បង់ដៃទាំងសងខាង ក្រោយពេលព្យាយាមហែលទឹកទៅថតរូបសែលហ្វីជាមួយត្រីឆ្លាម ។

កាលពីថ្ងៃទី៧ ខែកុម្ភៈ ឆ្នាំ២០២៥ ស្ត្រីទេសចរកាណាដាឈ្មោះ Natalie Ross អាយុ៥៥ឆ្នាំ បានព្យាយាមថតរូបសែលហ្វីជាមួយត្រីឆ្លាម១ក្បាលនៅសមុទ្រការ៉ាបៀន ស្ថិតនៅភាគខាងត្បូងឈូងសមុទ្រម៉ិកស៊ិក ស្រាប់តែត្រីឆ្លាមបានត្របាក់ដៃទាំងសងខាងបណ្តាលឱ្យរងរបួសធ្ងន់ ។ បន្ទាប់មក ស្ត្រីឈ្មោះ Ross ត្រូវបានស្វាមីនាំមកដេកលើខ្សាច់ ហើយស្វាមី និងអ្នកឃើញហេតុការណ៍ផ្សេងៗបានជួយគ្នាធ្វើចលនាលើខ្លួនស្ត្រីរូបនេះដើម្បីកុំឱ្យឈាមហូរ មុនពេលដឹកតាមយន្តហោះបញ្ជូនទៅមន្ទីរពេទ្យ ។

បុរសឃើញហេតុការណ៍និយាយថា ត្រីឆ្លាមក៏បានត្របាក់ជើងរបស់អ្នកស្រី Ross ផងដែរ ប៉ុន្តែពុំរងរបួសធ្ងន់ធ្ងររហូតដល់កាត់ជើងទេ ។ រីឯអ្នកឃើញហេតុការណ៍ផ្សេងទៀតប្រាប់ថា ស្វាមីរបស់ស្ត្រីរូបនេះព្យាយាមដេញត្រីឆ្លាមក្នុងទឹក ដោយសារវាចង់ត្របាក់ដៃម្តងទៀត រួចហើយ ស្វាមីក៏បាននាំខ្លួនភរិយាត្រឡប់មកឆ្នេរខ្សាច់វិញ ប៉ុន្តែគេពុំដឹងច្បាស់ថា ត្រីឆ្លាមដែលខាំភ្ញៀវទេសចរកាណាដានេះជាពូជអ្វីទេ ។

មន្ត្រីក្រសួងការបរទេសកាណាដាឱ្យដឹងថា ពួកគេបានជ្រាបពីហេតុការណ៍គ្រោះថ្នាក់កើតឡើងលើពលរដ្ឋកាណាដានៅប្រជុំកោះ Turks និង Caicos គឺគ្រូពេទ្យបានកាត់ដៃម្ខាងរបស់ស្ត្រីកាណាដាត្រឹម កដៃ ខណៈដៃម្ខាងទៀតត្រូវកាត់ត្រឹមកែងដៃ ដោយសារដៃទាំងសងខាងរបួសធ្ងន់ធ្ងរ ។

ស្ត្រីកាណាដារូបនេះបានព្យាយាមហែលទៅទឹកជ្រៅ ដើម្បីថតរូបសែលហ្វីជាមួយត្រីឆ្លាម ។ នៅប្រជុំកោះនេះជាកន្លែងរស់នៅរបស់ត្រីឆ្លាមជាច្រើនប្រភេទ ដូចជា ៖ Tiger Shark, Bull Shark, Hammerhead Shark និង Reef ។ នេះបើតាមការលើកឡើងរបស់អាជ្ញាធរប្រជុំកោះ Turks និង Caicos ៕

ប្រទេសថៃ ៖ តាមការចុះផ្សាយរបស់សារព័ត៌មានថៃឱ្យដឹងថា ការធ្វើដំណើរតាមរថភ្លើងដ៏វែងបំផុតលើពិភពលោក ចាប់ពីទីក្រុង Lagos ភាគខាងត្បូងប្រទេសព័រទុយហ្គាល់ ទៅដល់សិង្ហបុរី គឺជាឱកាសថ្មីនៃការអភិវឌ្ឍសេដ្ឋកិច្ចថៃ ។ ផ្លូវរថភ្លើងនេះមានប្រវែង១៨,៧៥៥គីឡូម៉ែត្រ និងចំណាយពេលធ្វើដំណើរ២១ថ្ងៃ ដោយឆ្លងកាត់១៣ប្រទេស រួមមាន ៖ ព័រទុយហ្គាល់ អេស្ប៉ាញ បារាំង អាល្លឺម៉ង់ ប៉ូឡូញ បេឡារ៉ុស រុស្ស៊ី ម៉ុងហ្គោលី ចិន ឡាវ ថៃ ម៉ាឡេស៊ី និងសិង្ហបុរី ។

ផ្លូវរថភ្លើងដ៏វែងនេះអំណោយផលដល់សេដ្ឋកិច្ចថៃជាច្រើនផ្នែក ហើយកត្តាចម្បងដែលគាំទ្រការអភិវឌ្ឍសេដ្ឋកិច្ចថៃ គឺទីតាំងយុទ្ធសាស្ត្រ ពីព្រោះថៃស្ថិតនៅចំណុចកណ្តាលនៃតំបន់អាស៊ីអាគ្នេយ៍ ដែលថៃជាមជ្ឈមណ្ឌលសេដ្ឋកិច្ច និងពាណិជ្ជកម្មដ៏សំខាន់ ហើយផ្លូវរថភ្លើងវែងបំផុតលើពិភពលោក បានឆ្លងកាត់តំបន់អាស៊ីអាគ្នេយ៍ និងតភ្ជាប់អាស៊ីបូព៌ា និងអឺរ៉ុប ។

កត្តាបន្ទាប់ គឺថៃមានហេដ្ឋារចនាសម្ព័ន្ធដឹកជញ្ជូនទំនិញខ្វាត់ខ្វែង ជាពិសេស ការដឹកជញ្ជូនតាមរថភ្លើង ។ បច្ចុប្បន្ន ថៃមានផ្លូវរថភ្លើងតភ្ជាប់ជាមួយប្រទេសជិតខាង ដូចជា ៖ ឡាវ កម្ពុជា និងមីយ៉ាន់ម៉ា ដែលអាចជួយឱ្យថៃអាចអភិវឌ្ឍន៍សេដ្ឋកិច្ចរបស់ខ្លួន តាមរយៈផ្លូវរថភ្លើងពីប្រទេសព័រទុយហ្គាល់ ទៅសិង្ហបុរី ។

ក្រៅពីនេះ រដ្ឋាភិបាលថៃមានគោលនយោបាយជំរុញការតភ្ជាប់ថៃជាមួយប្រទេសនានា តាមរយៈគម្រោងអភិវឌ្ឍន៍តំបន់សេដ្ឋកិច្ចពិសេសខាងកើត (EEC )និងគម្រោងផ្លូវ១ ខ្សែក្រវ៉ាត់១ (BRI) ។ គោលនយោបាយរបស់រដ្ឋាភិបាលថៃបានគាំទ្រដល់ការអភិវឌ្ឍហេដ្ឋារចនាសម្ព័ន្ធដឹកជញ្ជូន រួមទាំងការដឹកជញ្ជូនតាមផ្លូវរថភ្លើង ។

អ្នកជំនាញសេដ្ឋកិច្ចយល់ឃើញថា ថៃនឹងទទួលបានឱកាសសេដ្ឋកិច្ចបន្ថែមទៀតនាថ្ងៃអនាគតពីផ្លូវរថភ្លើងវែងបំផុតលើពិភពលោក ដោយសារប្រទេសនានាអាចសហការគ្នាយ៉ាងរលូនផ្នែកវិនិយោគ និងពង្រីកពាណិជ្ជកម្មសេរី ។ រីឯប្រទេសផ្សេងៗដែលរថភ្លើងឆ្លងកាត់ ក៏ទទួលបានឱកាសអភិវឌ្ឍន៍សេដ្ឋកិច្ចដែរ បើសង្គ្រាមនៅអ៊ុយក្រែនបញ្ចប់ ហើយអាមេរិក រុស្ស៊ី និងចិន ចរចាគ្នាស្វែងរកសន្តិភាពពិភពលោក ៕

ប្រទេសន័រវេស ៖ មហាជន និងអ្នកស្រឡាញ់បរិស្ថាននៅប្រទេសន័រវេសបានបង្ហាញក្តីបារម្ភយ៉ាងខ្លាំងពីការប៉ះពាល់ជីវៈចម្រុះ និងការឆ្លងមេរោគដល់ត្រីសាលម៉ុនធម្មជាតិ ក្រោយពីត្រីសាលម៉ុនចិញ្ចឹមជាច្រើនក្បាលរបស់ក្រុមហ៊ុនអាហារសមុទ្រលំដាប់ពិភពលោក រួចពីទ្រុងចូលសមុទ្រ ដោយសារខ្យល់ព្យុះ ។

ទ្រុងចិញ្ចឹមត្រីសាម៉ុនអណ្តែតទឹករបស់ក្រុមហ៊ុន Mowi នៅតំបន់ Dyroy ក្នុងទីក្រុង Troms ប្រទេសន័រវេស បានខូចខាតយ៉ាងខ្លាំងដោយសារខ្យល់ព្យុះ និងធ្វើឱ្យត្រីសាម៉ុនជាច្រើនក្បាល ដែល១ក្បាលៗ មានទម្ងន់ជាង៥គីឡូក្រាម រួចពីទ្រុងចូលសមុទ្រ ។ ក្រុមហ៊ុននេះប្រកាសថា បើអ្នកនេសាទណាម្នាក់អាចចាប់ត្រីសាម៉ុនទាំងនេះត្រឡប់មកវិញ ក្រុមហ៊ុននឹងផ្តល់ប្រាក់រង្វាន់ចំនួន៤៦ដុល្លារអាមេរិកក្នុង១ក្បាល ។

ក្រុមហ៊ុន Mowi បញ្ជាក់ថា ក្រុមហ៊ុនសោកស្តាយយ៉ាងខ្លាំង ដោយសារទ្រុងចិញ្ចឹមត្រីសាលម៉ុនអណ្តែតទឹករបស់ក្រុមហ៊ុន បានខូចខាតដោយសារខ្យល់ព្យុះ ។ វាធ្វើឱ្យត្រីសាម៉ុនជាច្រើនក្បាលដែលមានទម្ងន់ប្រមាណជាង៥គីឡូក្រាម រួចពីទ្រុងចូលសមុទ្រ ។

ចំណែកមន្ត្រីនាំពាក្យការិយាល័យជលផលឱ្យដឹងថា ៖ «តាមធម្មតា រដ្ឋាភិបាលន័រវេសនឹងអនុញ្ញាតឱ្យកសិករចិញ្ចឹមត្រី អាចចាប់ត្រីរួចពីទ្រុងក្នុងចម្ងាយ៥០០ម៉ែត្រជុំវិញទ្រុង ប៉ុន្តែត្រីសាលម៉ុនរបស់ក្រុមហ៊ុន Mowi ដែលរួចពីទ្រុង គឺរដ្ឋាភិបាលអនុញ្ញាតឱ្យចាប់បញ្ចូលទ្រុងវិញក្នុងចម្ងាយឆ្ងាយជាងនេះ» ។

ក្រោយការប្រកាសប្រគល់ប្រាក់រង្វាន់ឱ្យអ្នកនេសាទចាប់ត្រីសាលម៉ុន ក្រុមអ្នកស្រឡាញ់បរិស្ថានជាច្រើនបាននាំគ្នាតវ៉ាថា ត្រីសាលម៉ុនរួចពីទ្រុងច្រើនបែបនេះ នឹងប៉ះពាល់ដល់ជីវៈចម្រុះ ឆ្លងមេរោគ ហើយត្រីសាលម៉ុនចិញ្ចឹម និងត្រីសាលម៉ុនធម្មជាត នឹងដណ្តើមកន្លែងគ្នាពង ។ អ្នកតវ៉ាម្នាក់និយាយថា ៖ «តាមការស្រាវជ្រាវផ្នែកវិទ្យាសាស្ត្រ គឺកូនត្រីសាលម៉ុនដែលកើតពីការផ្សំពូជរវាងត្រីសាលម៉ុនចិញ្ចឹម និងត្រីសាលម៉ុនធម្មជាតិ នឹងរស់ពុំបានយូរទេ» ។

ចំណែកមហាជនលើកឡើងថា ត្រីសាលម៉ុនចិញ្ចឹមរបស់ក្រុមហ៊ុន Mowi ដែលរួចពីទ្រុងនេះ នឹងចម្លងមេរោគទៅត្រីសាលម៉ុនធម្មជាតិ ហើយការតាមចាប់ត្រីទាំងនេះត្រឡប់មកវិញ គឺដូចគ្នានឹងការរាវម្ជុលក្នុងបាតសមុទ្រ ៕

សេដ្ឋវិទូមកពីស្ថាប័នហិរញ្ញវត្ថុលំដាប់ពិភពលោក ដូចជា ៖ ស្ថាប័ន Morgan Stanley និង Nomura Holdings Inc. បានដាស់តឿនថា ប្រទេសថៃ និងឥណ្ឌា គួរតែត្រៀមខ្លួនទទួលការដំឡើងពន្ធទំនិញរបស់ប្រធានាធិបតីអាមេរិក លោក Donald Trump ។ រីឯមូលហេតុដែលអាមេរិកដំឡើងពន្ធទំនិញ ដោយសារប្រទេសទាំងពីរនេះបានយកពន្ធទំនិញនាំចូលពីអាមេរិកខ្ពស់ ។

ហេតុនេះ លោក Trump នឹងឆ្លើយតបវិញ ដោយការដំឡើងពន្ធទំនិញនាំចូលពីប្រទេសថៃ និងឥណ្ឌា ។ សេដ្ឋវិទូម្នាក់មកពីស្ថាប័ន Nomura Holdings Inc. និយាយថា ប្រទេសនានានៅតំបន់អាស៊ីអាគ្នេយ៍ គួរតែប្រញាប់ចរចាជាមួយមេដឹកនាំអាមេរិកអំពីបញ្ហាការដំឡើងពន្ធទំនិញ ។

កាលពីថ្ងៃទី១៤ ខែកុម្ភៈ ឆ្នាំ២០២៥ លោក Trump ប្រកាសថា នឹងដំឡើងពន្ធទំនិញប្រទេសផ្សេងៗ ហើយក្រោយលោក Trump ប្រកាសបែបនេះ ក្រុមហ៊ុននាំចូលឧស្ម័នធម្មជាតិដ៏ធំរបស់ឥណ្ឌាបានចរចាទិញប្រេងឥន្ធនៈបន្ថែមទៀតពីអាមេរិក ។ រីឯប្រទេសថៃវិញកំពុងពិចារណាទិញទំនិញពីអាមេរិកដូចគ្នាដែរ និងត្រៀមនាំចូលឧស្ម័នអេតាន និងទំនិញកសិករអាមេរិក ដើម្បីកុំឱ្យអាមេរិកដំឡើងពន្ធទំនិញថៃ ។

គួរបញ្ជាក់ថា ប្រទេសឥណ្ឌាបានយកពន្ធទំនិញអាមេរិកក្នុងអត្រាខ្ពស់ជាងអាមេរិកយកពន្ធទំនិញឥណ្ឌា រហូតដល់ជាង១០% ទើបធ្វើឱ្យឥណ្ឌាប្រឈមមុខខ្លាំងដែលអាមេរិកនឹងដំឡើងវិញ ។ សេដ្ឋវិទូម្នាក់ទៀតមកពីស្ថាប័ន Morgan Stanley និយាយថា ឥណ្ឌា និងថៃ គឺជាប្រទេសដែលលោក Trump នឹងដំឡើងពន្ធទំនិញចាប់ពី៤% ទៅ៦% ។ ដូច្នេះ ឥណ្ឌាមានគម្រោងទិញអាវុធ ថាមពល និងយន្តហោះពីអាមេរិក ដើម្បីចៀសវាងសង្គ្រាមពាណិជ្ជកម្មជាមួយអាមេរិក ។

មហាជនចាត់ទុកថា ការដំឡើងពន្ធទំនិញលើកនេះរបស់លោក Trump គឺខ្លាំងជាងការដំឡើងពន្ធទំនិញលើកមុនទៅទៀត ហើយវានឹងធ្វើឱ្យសង្គ្រាមពាណិជ្ជកម្មរវាងអាមេរិក និងប្រទេសផ្សេងៗកាន់តែក្តៅគគុក ៕

ប្រទេសចិន ៖ រដ្ឋាភិបាលចិនបានបង្កើតគម្រោងមួយជំរុញពលរដ្ឋអាយុច្រើនជិះរថភ្លើងដើរលេង និងបង្កើតកម្មវិធីដំណើរកម្សាន្តទៅកាន់តំបន់ទេសចរណ៍នានាសម្រាប់ពលរដ្ឋវ័យចំណាស់ ។ ស្ថានីយរថភ្លើងនៅប្រទេសចិននឹងបង្កើនចំនួនរថភ្លើងឱ្យបានច្រើនខ្សែ និងកំណត់គោលដៅទេសចរណ៍ចម្រុះសម្រាប់ដំណើរកម្សាន្តរបស់ពលរដ្ឋវ័យចំណាស់នៅទូទាំងប្រទេសចិនក្នុងឆ្នាំ២០២៧ ខណៈបច្ចុប្បន្ន (ឆ្នាំ២០២៥) ចំនួនរថភ្លើងនៅមានកំណត់ ។

គម្រោងជំរុញពលរដ្ឋវ័យចំណាស់ជិះរថភ្លើងដើរលេងទៅកាន់តំបន់ទេសចរណ៍ផ្សេងៗ គឺជាការសហការគ្នារវាងក្រសួងពាណិជ្ជកម្ម និងស្ថាប័នរដ្ឋាភិបាល ចំនួន៨ ព្រមទាំងមានការសហការពីក្រុមហ៊ុនឯកជនផងដែរ ។ រថភ្លើងនីមួយៗនឹងត្រូវកែលម្អឱ្យមានកៅអីអង្គុយ និងច្រកផ្លូវដើរធំទូលាយ ក៏ដូចជាធ្វើបន្ទប់ទឹកដើម្បីផ្តល់លក្ខណៈងាយស្រួលដល់ពលរដ្ឋវ័យចំណាស់ ។

ប្រទេសចិនមានចំនួនពលរដ្ឋវ័យចំណាស់កើនឡើងជារៀងរាល់ឆ្នាំ ហើយពលរដ្ឋវ័យចំណាស់ជាច្រើននាក់មានសុខភាពរឹងមាំ និងចង់ដើរលេង ។ ប៉ុន្តែក្រុមហ៊ុនទេសចរណ៍បានបង្កើតកម្មវិធីដំណើរសម្រាប់តែយុវវ័យប៉ុណ្ណោះ និងគ្មានកម្មវិធីដំណើរកម្សាន្តសម្រាប់ពលរដ្ឋវ័យចំណាស់ទេ ។ ហេតុនេះ រដ្ឋាភិបាលចិនក៏បង្កើតគម្រោងពលរដ្ឋវ័យចំណាស់ជិះរថភ្លើងដើរលេងដើម្បីជំរុញវិស័យទេសចរណ៍ និងបង្កើនប្រាក់ចំណូលពីវិស័យទេសចរណ៍បន្ថែមទៀត ពីព្រោះពលរដ្ឋវ័យចំណាស់ភាគច្រើនមានប្រាក់ចូលនិវត្តន៍ និងប្រាក់សន្សំច្រើន ។

រដ្ឋាភិបាលចិនបានមើលឃើញឱកាសបង្កើនប្រាក់ចំណូលសេដ្ឋកិច្ចតាមរយៈដំណើរកម្សាន្តរបស់ពលរដ្ឋវ័យចំណាស់ ហើយរដ្ឋាភិបាលចិនប្រកាសទទួលការវិនិយោគពីក្រុមហ៊ុនបរទេស ដូចជា ៖ ការវិនិយោគសាងសង់ផ្ទះស្នាក់នៅសម្រាប់មនុស្សចាស់ មន្ទីរពេទ្យ និងមជ្ឈមណ្ឌលសុខភាព ដើម្បីត្រៀមទទួលចំនួនពលរដ្ឋវ័យចំណាស់កើនឡើង បន្ទាប់ពីចិនអនុវត្តគោលនយោបាយកូនតែម្នាក់ ធ្វើឱ្យចំនួនពលរដ្ឋវ័យចំណាស់កើនឡើងយ៉ាងឆាប់រហ័ស ។

កាលពីឆ្នាំ២០២៤ រដ្ឋាភិបាលចិនបានចំណាយប្រាក់យ៉ាងច្រើនដើម្បីសាងសង់ផ្ទះស្នាក់នៅ និងកម្មវិធីកម្សាន្តសម្រាប់ពលរដ្ឋវ័យចំណាស់ ។ រីឯក្រុមហ៊ុនទេសចរណ៍នានាបានចាប់ផ្តើមផ្តោតលើគោលដៅដំណើរកម្សាន្តសម្រាប់អតិថិជនអាយុច្រើននៅឆ្នាំ២០២៥ ខុសពីពេលកន្លងមក ដែលក្រុមហ៊ុនទេសចរណ៍ផ្តោតតែលើអតិថិជនជាយុវវ័យ ៕