រដ្ឋបាលខេត្តបាត់ដំបង បានប្រកាសពីគម្រោងសាងសង់ “សួនតេជោសន្តិភាព” ដែលមានប្រវែង ៩៩៤ម៉ែត្រ និងស្ថិតនៅលើផ្ទៃដីសរុប ១៦.០៧៤ម៉ែត្រការ៉េ។
សួននេះ មានទីតាំងស្ថិតនៅខាងកើតស្ទឹងសង្កែ មុខវត្តកណ្តាល ក្នុងភូមិរំចេក៤ សង្កាត់រតនៈ ក្រុងបាត់ដំបង ចាប់ពីស្ពានសម្តេចក្រឡាហោម ដល់ស្ពានសោហឺ។
សួនតេជោសន្តិភាព មានគោលបំណងធំ ចំនួន ២៖
ទី១.ដើម្បីកែលម្អសួនឲ្យមានភាពស្រស់បំព្រង មានផ្លូវដើរ ផ្លូវជិះកង់ មានកន្លែងលំហែ ស្រូបខ្យល់អាកាសបរិសុទ្ធ ហាត់ប្រាណ និងកែប្រែទីក្រុងឲ្យក្លាយជាទីក្រុងឆ្លាតវៃ និងមានបរិស្ថានរស់នៅល្អ
ទី២.ដើម្បីរំលេចពីគុណតម្លៃនយោបាយឈ្នះ-ឈ្នះ របស់សម្ដេច ហ៊ុន សែន ប្រធាន ព្រឹទ្ធសភា និងជាអតីតនាយករដ្ឋមន្រ្តី ដែលនាំមកនូវសុខសន្តិភាព ស្ថិរភាព ការឯកភាពជាតិ និងការអភិវឌ្ឍ។
រដ្ឋបាលខេត្តបានបញ្ជាក់ថា នៅពេលសាងសង់រួចរាល់ សួននេះ នឹងបម្រើជាផលប្រយោជន៍ដល់សាធារណជន ប្រជាពលរដ្ឋទូទៅ និងជម្រុញដល់ប្រព័ន្ធទេសចរណ៍ ក្នុងខេត្តមួយផ្នែកផងដែរ៕
